رواية خيِّال ومُهرة الفصل الخامس والعشرون 25 - بقلم amna

«بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

ــــــــــــــــــــــ
أظنُّ أن الذين ننظر إليهم يدخلون
في أجسادنا عَبْرَ عيوننا
ويصيرون دمًا و لحمًا.
وبعضهم يصير من المارة التائهين
بين مفاصلنا.ونستمرُّ،
هكذا،نسمع طَرقات، على عظامنا.
إني أسمع الآن دقَّات ماء
وعليَّ أن أفتح..

♡ــــــــــــــــــــــ ♡
«ديار»

مرت الأيام هدوء ما قبل العاصفه..
چنت متأكده راح يصير شي يگلب حياتنه گلاب...

بابا چان گاعد هو و ماما يباوعون و اني و راشد گاعدين نسولف و ما حسيت الا ياسر ينزل بكل سرعته و عيونه حمره وعلي يمشي وراه بتعب عبالك شايل حمل على ظهره ويسحل بروحه سحل...

تقرب يم بابا وشمر الدفتر الچان بيده على بابا...

ــ اريد تفسير وبسرعه..

باقر: ماكو تفسير

علي: انت انسان طبيعي؟؟

ياسر: ليش چنت ضامه؟

باقر: بكيفي..

ابتسم ياسر ولزم بابا من ياخته و وگفه وگله....

ــ لهنا وكافي راح تشوفني ضدك و ويه عدوك...

ــ هو اليلزم ابوه هيچ شتحچي وياه بعد...

ــ مو بس الزمه اضربه همين...

ضربه بوكس خله بابا يختل توازنه و وگع بالگاع..

نشغت بصوت عالي وطاحت دموعي..

علي: ياسر امشي لا تعب نفسك..

راح علي اخذ الدفتر ولزم ايد ياسر وجره وطلع طلعت وراهم ودموعي تنزل..

ديار: علي ياااسر وين رايحين؟؟

اندار عليه ياسر واجاني بسرعه واجه وراي راشد..

تقرب مني حاوط وجهي بـ أديه مسح دموعي وگال..

ــ لا تبچين دياري..
ماكو شي بس اني بعد ما اريد ويه العار ابوچ..

ــ واني شلون اعيش بدونكم اول شي مُهره عافتني وهسه انته ياسر ..

راشد: بس هاي الفترى وبعدين كولشي يتصلح ديار كافي تعالي..

لزم ايدي ودخلني جوه دخلت لگيت بابا يسب ويغلط گعدت حيلي مهدود وبابا مستمر يهدد ويغلط على اخواني واني كلشي ما مفتهمه من الصار ليش ياسر وعلي نزلو هيچ سوو والدفتر شنو بيه مادري..

دخل مالك والفتهمته بابا مخابر عليه گايله تعال...

گعدو بالصاله بابا يسولفله ياسر شسوه وهو بس يهز راسه رحت جبتلهم چاي من قدمته الـ مالك باوع بعيوني بعدين اخذ كوب الشاي و گال..

ــ شكراً..

ما بيه حيل حتى ارد هزيت راسي ورحت گعدت على الدرج اريد اسمع بابا شنو يريد يسوي...

بابا: تتذكر من استلم ياسر السياره مالت غسيل اموال اريد الأوراق مالت التسليم..

مالك: خالو شتريد تسوي؟

ــ اريد ادخله للسجن واخليه يخيس هناك..

ــ واذا اعترف عليك..

ــ ماعنده دليل..

گمت بسرعه رحت يمهم وگلت الباب بصوت مخنوگ...

ــ يمعووود ياااااسر ابنك والله ابنك انت شنو تريد تسوي؟
ضيعتنه وخربت حياتنه شتريد؟

بابا: ديار روحي هناك...

ــ ما اروح اريد اعرف ليش تتعامل ويه ياسر هيچ راح اموت والله راح اموت من القهر ليش تسوي هيچ...
ما چنت قبل هيچ بابا شنو التغير؟

صاح بصوت فززني...

ــ دياااااااار گتلچ رووووحي...

عفتهم وطلعت بالحديقه حسيت بنفسي ضايع ومختنگه وما عندي حل غير اگعد ابچي..

باوعت للسماء القمر كامل والجو كلش بارد نزلت دموعي ودعيت رب العالمين يحل الموضوع وميخلي ياسر يتأذه..

ــ لا تخافين على ياسر...

مسحت دموعي وباوعت عليه...

ــ خايفه من بابا...

ــ ميگدر يسوي شي الياسر لان عنده ورقه لابوچ توديه وره الشمس..

ــ يبقون بحرب طول حياتهم..

تقرب مني گعد بصفي وگال..

مالك: ابوچ مو شويه السواه بـ ياسر..

نزلت دموعي وحچيت بغصه...

ــ مقهوره على ياسر...

ــ ترى ياسر مو سهل راح يرجع الصاع صاعين لابوچ...

ــ ما چنت اتوقع بابا يسوي هيچ دائماً چنت اگول بابا الشخص المثالي الما عنده زله بحياته..
هسه كل شي انگلب وما جاي افهم شي..

ــ گومي بدلي وتعالي وياي..

ــ وين؟

ــ البيتنه..

ــ شسوي؟؟

ــ غيري جو...

ــ والبيت؟

ــ شعليچ بالبيت.. انتِ امهم؟
تعالي يم زينب غيري جو احسن من ما تبقين هنا الوحدچ..

ــ اي والله احسن...
بس وبابا منو يگوله...

ــ اني اگله روحي بدلي بسرعه وتعالي..

ــ تمام..

صعدت بدلت بسرعه وحطيت بالجنطه ملابس باوعت النفسي بالمرايه وجهي ذبلان و عيوني حمره من البچي
عدلت شالي و حطيت عطر ونزلت لگيت مالك واگفلي..

ــ ها بابا قبل؟

ــ اي...

ــ اوك...
راح اسلم على ماما واجي..

ــ اني رايح السياره..

رحت سلمت على ماما ورحت الراشد انطيته خبر وهو گالي اي روحي احسن..
طلعت بره لگيته صاعد بالسياره رحت صعدت وگتله..

ــ شكراً مالك تعبتك..

ــ ماسويت شي حتى اتعب..

بقيت ساكته طول الطريق و اباوع على الطريق واحس بيه يباوع عليه كل شويه ويرجع يباوع للطريق ..

من وصلنه دخلت للبيت چانت عمتي وزينب گاعدات بالصاله يباوعن بـ التلفزيون و سجى گاعده على صفحه دخل مالك واني دخلت وراه من شافتني زينب طفرت من مكانها واجتي ضمتني من بين وجع گلبي ابتسمت على شكلها وفرحتها..

ــ ولچ مشتاقتلچ كومه..

ــ حتى اني والله...

ام مالك: تعاليلي يا بعد گلبي..

رحت بوستها وگعدت يمها وبقت تسئلني على بابا وياسر عمتي كلش تحب ياسر وهو الوحيده من اقاربنه يحبها ويگعد يمها و يسولف وياها..
قاطعها مالك من گال...

ــ يمه جبتها حتى تنسى لاحد يفتح الموضوع مال بيت خالي...

ارتبكت من حچه هيچ باوعت عليه چان گاعد على القنفه ومشابك اديه و متچيهن على رجليه و نظراته تخترقني من حدتها دنگت راسي بسرعه..

زينب: اني انسيها ابوها وجدها لا تخاف..

سجى: وليش يخاف..

ــ يخاف على ديار لعد ليش جابها غير لان يخاف عليها..

مالك: ززززينننب لا تظلين تحچين زايد..

سجى: متتحمل..

زينب: اوك يا گلب اختك لا تضوج..

سجى: شگد لوگيه...

زينب: تعالي ديار خلي نروح للغرفه مالتي لا الحيه تذب علينه سمها..

ــ ماكو غيرچ حيه

ابتسمت ومديت ايدي الها وسحبتني ورحت وياها گعدنه نسولف وهي تسولفلي على راشد و من طلعو شسوت وشجابلها وشگد تحبه..

ــ اگلچ انتِ ما عندچ سالفه غير راشد غيري الموضوع يامعوده..

ــ لا والله ما عندي ههههههههه..

ــ ههههه.. طلعيلنه فلم شي خلي نشوفه...

گامت شغلت التلفزيون وگعدت يمي اختارينه فلم و گالت..

ــ امشي نسويلنه اكل ما اعرف اباوع فلم بدون ما اكل شي..

ــ اني جوعانه..

رحنه للمطبخ چان البيت هدوء و مبينين كلهم نايمين طلعت اكل من الثلاجه و سوينه صينيه واخذناها للغرفه نزعت البشت والحجاب وگعدنه جاي ناكل وگالت زينب...

ــ باع الثول نسينه البيبسي والخبز..

ــ شلون اثنين مهمات..

ــ روحي جيبيهن.. گمت من مكاني..

ــ امداچ تگومين خطارچ...

ــ اي والله ما استحي هههه..

شمرت الشال على راسي وطلعت هو اني لابسه تيشيرت نص اكمام اسود وبنطرون بارز جسمي كله وعود لابسه شال المن مادري بس لان ادري بيهم نايمين..

رحت للمطبخ اخذت الخبز و درت على الثلاجه جاي اخذ بيبسي و فزيت من شفت مالك واگف طاح الخبز من ايدي وحطيت ايدي على قلبي..
من صدگ وكف گلبي غمضت اعيوني...
تقرب مني وگال..

ــ شبيچ ديار....

ــ وگف گلبي هو هيچ الواحد يدخل ولا صوت..
دنگت شلت الخبز..

ــ شسوي مثلاً واني امشي اعيط؟؟

ابتسمت ومن تذكرة اني شلابسه وهو شلون قريب مني اختفت ابتسامتي..

ــ شبيچ..

ــ دير وجهك خلي اطلع...

بقى صافن بوجهي وگال...

ــ انتِ خبله ليش ادير...

ــ شبيك ملابسي مو مال حجاب...

باوع على جسمي واني عطت..

ــ گتلك لا تباوع..

تقرب مني اكثر اكثر وحط ايده على خدي مسح بـ ابهامه على خدي وگال وعيونه تتنقل بملامحي...

ــ شلون بيچ ..

ــ شمسويه؟

ــ يوميا تعذبيني...

ــ ليش؟

گلبي يدگ حيل وجسمي كله يرجف من قربه بس بنفس الوقت ما اريده يبتعد..

ــ اريد اضمچ...

حچيت بصوت يرجف

ــ ضمني محتاجتك..

حاوط خصري بـ أديه وضمني بقوه واني حاوطت رگبته بـ أديه ودموعي تنزل حسيت بالضعف ردته يلمني بحضنه ما اعرف ليش الرغبه چانت تعتليني..

حچيت بهمس..

ــ حرام مالك خلي اروح ..

ــ اول حرام احبه..

ابتعدت عنه و رحت الغرفة زينب واني امسح بدموعي واحاول ابين طبيعيه...

ــ ها ولچ وين رحتي جاي اجي اشوفچ وين رحتي...

ــ هااا... اجيت..

ــ شبيچ ديار شصار.. تقربت مني وهي تتفحص عيوني
ــ چنتي تبچين..

ــ معليچ بيه تعالي ناكل يلا جوعانه...

چذبت عليها اريد اغير الموضوع وانسيها بس جسمي فاضحني من الرجفه و كل شويه اصفن...
خلصنه الفلم ونمت و گعدت الظهر اني وزينب گبل تغدينه ورجعت للبيت ويه عمتي..

ـــــــــــــــــــــــ

«مُهره»

گعدت من النوم رحت غسلت و بدلت ورحت للصاله لگيت عمتي ام رضا چانت حاطه صينيه بالگاع بيها ريوگ ومشغله الصوبه وعليها القوري ابتسمت من شفتها و تذكرة حياتي يم اهلي چانت هيچ ..

ــ صباح الخير عمه..

ــ صباح العافيه يا بعد گلبي انتِ مو نفس افنان ورضا يگعدون الظهر..

ــ لا من چنت صغيره احب أگعد قبل ما تطلع الشمس..

ــ تعالي گعدي يا بعد عمتچ..

گعدت صبتلي چاي اكلت وهي تسولفلي على حياتهم قبل وتذكرت عمتي مُهره..

ــ اني المعجبني شلون تتشابهن انتِ و عمتچ بالشكل وبالطبع..
دمعت عيونها وهي تحچي..

ــ من شفتچ ياعمه الهسه اني لا ليلي ليل ولا نهاري نهار عبالك اختي رجعت للحياة..

ــ مادري والله بس من تحچون بيها احس اعرفها وشايفتها..

رضا: شنو هالگعده الحلوه سوولي مكان..

ام رضا: غسل وتعال يا بعد امك..

راح للمطبخ ورجع گعد ويانه وگال..

ــ شلونچن يالحبيبات..

ام رضا: الحمدلله..

مُهره: تدرون عبالك رب العالمين عوضني عن اهلي بيكم...

ام رضا: ياحبيبتي..

ــ احس چنت فاقده الأمل وما عندي احد بالدنيا الحد ما تعرفت عليكم...

رضا: اني اخوچ وامي امچ وافنان اختچ بعد شتردين

مُهره: اريدكم سالمين..

رضا: الله يسلمچ...
ياسر رايح البيت اهلچ..

ــ شوكت؟

ــ البارحه الظهر راح هو وعلي والظاهر بعد ميرجعون البيت باقر..

ام رضا: مو كافي يمه گلوله انتِ يمنه..

مُهره: مو هسه عمه..

رضا: بعدنه ما كافخين ابوعلي الكفخه الاولى..

ام رضا: اخاف هو يكفخكم يايمه...

ضحكنه بصوت عالي ورجعنه ناكل شويه واجت افنان وكملنه ريوگ وغسلنه الماعين..

صعدت بالسطح الجو بارد اخذت موبايلي وياي وشغلت موسيقى و گعدت بالگاع وشفت جايتني رساله دخلت عليها لگيتها من ياسر گلبي رجف من شفت كميت الرسائل...

ــ انتِ وين؟؟

راح اتخبل والله عود تحچين صدگ يعني كلشي ماعفتيلي منچ لا اندلچ لا رقمچ و هسه دازتلي من حساب وهمي ادري بيچ انتِ..

كافي مُهره عاقبتيني..

وره عشر دقايق كاتب..

منين جبتي الدفتر؟

لا تجاوبيني خوووووش مُهره خووش اني اعلمچ..

واني اقره وصلت رساله..

انتِ اذا متحبيني و تردين تنتقمين مني من عرفتي اني مريض ليش اجيتي ركض وبنص الليل...

سويتله بلوك وايدي ترجف سديت الموبايل ونزلت جوه حچيت الرضا وهو استلمني شلون اسوي هيچ بدون ما اگله واتصرف بكيفي...

مر اليوم عادي واني احاول انسى ياسر بس هيهات گلبي الأثول يعوفني انسه...

باليل رحت انام بالغرفه اول ما غفيت سمعت صوت رضا يدگ الباب ويهمس

ــ مُهره گاعده؟؟

ــ اجيت رضا..

لبست حجاب وطلعت بسرعه حسيت صاير شي گلبي گلي اول ما طلعت...

ــ مُهره باقر مدخل ياسر للسجن..

بقيت صافنه بوجهاما اعرف شسوي وشگوله...

ــ مُهره ....
مو وكت صفنات بدلي بسرعه وتعالي اسولفلچ شنو نسوي...
التفت ورجع..

ــ مُهره يامعوده... لبسي كون شي مال مافيات و كذا حتى نروح نرگع باقر بالقندره...

هزيت راسي ولبست بنطرون وبلوز اسود وفوگهم كوت وشال رحت الرضا چانت گاعده افنان بصفه وگعدو ثنينهم يگلولي شلون ادخل وشلون احچي وياهم...

ــ يلا...

باوعت للساعه بـ11..

ــ مو الوقت متأخر..

افنان: يا متأخر بابا گومي الولد بالسجن وهي تريد تنام..

ــ يمعوده اني شوكت گلت اريد انام..

رضا: هي غير گلبها طار من درت بـ حبيب الگلب...

ــ اذا خلصتو يلا امشي...

طلعنه من البيت واني گلبي صاير طبل من الخوف و رضا يحفز بيه ويسويلي واهس...

وصلنه للباب البيت نزلت ومابقيت آية من القران ما قريتها...

ــ لعبي بيهم لعب...

اخذت الأوراق منه و طلعت المفتاح ودخلت للبيت عبرت الحديقه قبل ما ادخل سحبت نفس وزفرته وگلت بسم الله الرحمان الرحيم ودخلت واني رافعه راسي وانظرلهم بنظرات حاده...

باوعت عليهم ام مالك گاعده بالگاع تبچي و باقر گاعد بصفها و ديار گاعده على الدرج ويمها زينب وسجى..

من شافوني كلهم وگفو وابو علي عاط بصوت مبين عليه الخوف...

ــ شتردين جااايه...

ــ شبيك ترجف على كيفك...

ــ لا تخليني ارتكب جريمه..

ــ على اساس ما مرتكب قبل القتل لعبتك بعد باقر...

ــ شتريييييدينن؟؟

ــ حلووو... اني احب واحد يجي من الأخير...

ــ شترييدين؟؟

ــ والله يا بقوووري اريد اطلع ياسر من السجن و هسه..

ــ لا والله؟؟

ــ اي والله..

ــ واذا ما اطلعه...

شمرت عليه الأوراق البيدي وگتله...

ــ راح تروح وراه بس هو يطلع وانته تبقى طول عمرك هناك...
مصايبك كلهن عندي وانته بكيفك اختار انطي يا اوراق للشرطه اول شي...

يتبع🦋..........

ـــــــــــــــــــــــ

لا تنسون التصويت والتعليق بين الفقرات عيوني..
اعتذر لان البارت گصير...