رواية خيِّال ومُهرة الفصل السادس والعشرون 26 - بقلم amna

«بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

ــــــــــــــــــــــ

"ما أنا إلاّ أنا
بعضٌ مني
الكثير ممّا خلفتهُ الحروب
حروب الأنسان
و الأديان
و الحُب
ما أنا إلاّ الناجي
ببعض مني و الكثير من الخراب"

♡ـــــــــــــــــــــــ ♡

««البارت بدون تصحيح لا تركزون بالأغلاط🙂🙂»»

«ديار»

چنت گاعده بغرفتي وسمعت هوسه جوه طفرت بسرعه اشوف شصاير وانتبهت هذا صوت عمتي ام مالك تصيح وتبچي نزلت ركض و الخوف محاوط گلبي..

نشغت من كل گلبي من سمعت عمتي تگول الـ بابا...

ــ ولك بااااقر هذا ااابننك ابنك شلووووووون تذبه بالسجن وللللك....

حسيت رجليه بعد ميحملني گعدت على الدرج وگمت الطم على وجهي واجتني زينب و سجى ايسكتن  بيه ضميت وجهي بحضن زينب وبچيت بصوت عاالي وبحرگه...

ــ سووويتهاااا باااابااا يلا ارتاحيت....

ركضت سجى للمطبخ جابتلي گلاص مي شربتني منه واني اديه يرجفن وما عندي طاقه اتحرك....

واني بنص صدمتي وقهري وبچيتي دخلت مُهره چانت مو مُهره الأعرفها...

مُهره تختلف نظراتها وقوتها وملابسها وحتى شكلها متغير...

دخلت باوعت علينه واحد واحد وبـ ابتسامه خلتني اخاف حچت....

ــ يااااامرحباااا...

ــ شتردين جااايه...

ــ شبيك ترجف على كيفك...

ــ لا تخليني ارتكب جريمه..

ــ على اساس ما مرتكب قبل القتل لعبتك بعد باقر...

ــ شتردييييين؟؟

ــ حلووو... اني احب واحد يجي من الأخير...

ــ شترديين؟؟

ــ والله يا بقوووري اريد اطلع ياسر من السجن و هسه..

ــ لا والله؟؟

ــ اي والله..

ــ واذا ما اطلعه...

شمرت عليه الأوراق البيدها ...

ــ راح تروح وراه بس هو يطلع وانته تبقى طول عمرك هناك...
مصايبك كلهن عندي وانته بكيفك اختار انطي يا اوراق للشرطه اول شي...

ــ ومن شوكت صايره ويه ياسر...

ــ غير زوجي قابل اوگف وياك؟

ــ اني زوجتكم انتِ چنتي متردينه لو نسيتي زوجتكم غصب....

ــ لا تعيش الدور باقر وهذا ميعنيك..
اقره الأوراق وردلي جواب عندك مجال الباجر الساعه بـ 12 الظهر اخير فرصه الك وانتَ تعرف شگد محمل گلبي عليك ما اخليك تشتم الهوى...

عافتنه كلنه بوسط صدمتنه واندارت تريد تطلع ورجعت عليه باستني و گالت...

ــ راح اتصل عليچ من رقم جاوبيني...

هزيت راسي بـ أي غمزتلي بـ ابتسامه وطلعت وهنا انگلب بيتنه الى معارك طاحنه اجه علي و مالك...

علي گلب الدنيا على بابا و گعد يهدد ويرجع ليوره بس حتى يطلع ياسر ومالك اخذ علي للأستقبال واني طفرت رحت وراهم اريد اگول الـ علي مُهره شنو سوت..

دخلت للاستقبال علي گاعد وحاط اديه على راسه يضغط عليه بكل قوته وشرايين اديه بارزه...

ــ علي...

رفع راسه باوع عليه ورجع دنگ...

ــ ها عيوني...

ــ اجتي مُهره هددت بابا...

رفع راسه بسرعه باوع عليه...

ــ بشنو؟؟

ــ گلتله الك وقت الباچر بـ 12 الظهر اذا ما طلع ياسر اخليك انته بمكانه...

ــ والله هيچ حچت؟؟

ــ اي والله...

گام على حيله وابتسم ويمسح على وچه

ــ كفووو.... والله كفووو كون كل اليتزوجون هيچ مره ذيبه...

مالك: حصرته حصرت الچلب....

ــ طبه مرض...

ــ ولك احنه كلنه ضده ما گدرناله...

ــ عرفت تلعبها صح بس اني متأكد اكو واحد بظهرها وجاي يساعدها...

ديار: بس مُهره ماعدها احد غيرنه...

علي: هو هذا اليحير...

مالك: يلا اني رايح علي تجي وياي؟؟

ــ لا رايح البيت امي...

ــ ولك بعيد تعال وياي احسن..

اني كل هذا وما رفعت عيني على مالك ابد احس غاطه بملابسي من الفشله..

ــ هم صحيح...

ــ اني طالع..

ــ جاي وياك..

تقرب مني علي حاوط وجهي بـ أديه وباسني بـ بجبهتي و گال...

ــ لا تخافين بنيتي باچر يرجع ياسر..

نزلت دمعه مني ومسحها بسرعه...

ــ ان شاءالله..

ــ ياا گلبي يلا روحي نامي..

هزيت راسي باوعت الـ مالك چان واگف يم الباب بحلگه الجگاره ويباوع عليه...

ــ الله وياك...

طلعو واني صعدت فوگ و من گد التعب النفسي والجسدي بسرعه نمت ما حسيت الا الساعه بـ 10 الصبح گمت گبل سبحت وبدلت ونزلت جوه لگيت بس ماما گاعده بالصاله...

ــ صباح الخير ماما..

ــ وين اكو خير من وره اخوانچ..

ــ ليش شكو؟

ــ ابوچ راح طلع ياسر وگلب الدنيا بالصياح والغلط و راح..

ــ صدگ يعني هسه ياسر طلع؟

ــ انتِ والله ثوله...
اي طلع..

ــ ماما ليش تحچين هيچ؟

ــ روحي ديار مالي خلك...

عفتها وگمت اخذت موبايلي اتصلت على علي ما رد اتصلت على ياسر ماكو محد يجاوب اخير شي اتصلت بـ مالك اول ما دگ جاوبني...

ــ الووو...

ــ موبايلات اخوانچ يمي..
اني اخير واحد تتصلين عليه؟

ــ موو... شسمه... اااا...

ــ شبيچ گمتي ماتجمعين..

ــ استحي اتصل عليك اگول خاف عنده شغل او شي..

ــ عادي اعوف الشغل واجاوبچ ديار..
البارحه حتى ما باوعتي بعيوني خليتي دمي يحترگ..

بقيت ساكته وهو همين مرت دقيقه وگال..

ــ ليش اتصلتي؟

ــ ياسر ط...

ــ اي طلع بس فد ساعه هيچ يطلعونه لان بعده التحقيق ما خلصان...

ــ ها تمام شكراً..

ــ انچبي ديار احسنلچ..

ــ هاي شبيك مالك ليش تغلط؟؟

ــ شنو شكراً احس بيها تنگال الواحد غريب..

ــ لعد شگول..

ــ گليلي احبك مثلاً...

ــ يااا..

ــ وجعاااا..

ــ شبيك؟؟

ــ شبيه بت باقر العااار..

ــ لا تغلط على بابا...

ــ روحي ديار راح تجيچ كفخه..

ــ الله وياك...

سديته واني بعدني مصدومه هذا شبيه...
قاطع تفكيري من اتصل عليه رقم غريب تذكرة مُهره
وفتحت خط و بقيت ساكته الحد ما اجاني صوتها المشتاقتله گبل نزلت دمعتي..

ــ دياار...

ــ شلونچ مُهره؟

ــ الحمدلله.. انتِ شلونج؟

ــ شلوني؟؟ متعذبه حياتي انگلبت گلاب الچنت احسه اماني طلع العكس مُهره كلهم طلعو بالعكس...

ــ علمود بعد منثق بناس...
كلهم ميستاهلونه..

ــ اني مقهوره على اخواني وگعو بعمايل ابوي السوده..

ــ لا تخافين محد راح ينظلم..

ــ ان شاءالله... انتِ وين مشتاقتلچ.

ــ بـ أرض الله الواسعة....

ــ احس بيچ متغيره مو نفس مُهره القديمه..

ــ طبعاً... ديار ترديني ابقى ثوله اخليه يدوسون عليه..
اني تحولت غير بنيه..
ما يگدر احد يخوفني بعد..

ــ راح يبدي الدوام بعد يومين...

ــ اي ان شاءالله نلتقي هناك...

ــ ان شاءالله.

سديت الخط منها و رحت يم ماما گعدت وهي مطايقه الدنيا بس ما عندي حل..

ـــــــــــــــــــــــ

«مُهره»

للصبح واني گاعده ما غمضت عيني ولا رحت لفراشي بقيت افتر بالبيت و الدمعه بطرف عيني بس واحد يحچي وياي ابچي...

صارت الساعه بـ 7 الصبح گعدت عمتي سوت ريوگ...

ــ خايبه يمه شمالچ تفترين؟

ــ عمه خاف دخلو تحقيق وعذبوه؟؟

ــ لا يمه اسم الله عليه لا تحچين هيچ..

ــ شلون لو ما طلعه باقر العار..

ــ گمتي تحچين نفس رضا يا عمه شمالچ..

ــ هههههه.. اندري..

رضا: شبيه رضا؟؟

طلع من غرفته يمسح بوچه وشعره مخربط و بجامته رجل مرفوعه والثانيه نازله..

ام رضا: شني ولك چنت تتعارك بالحلم؟

مُهره: هههههههه عليك الله روح باوع على شكلك بالمرايه تموت من الضحك..

رضا: غير چنت نايم تردن اگعد اتمكيج يلا اجي يمچن عيني...

ضحكنه هو راح يغسل واني گعدت يم عمتي وگعدنه تريگنه وگمت طلعت بالحديقه مدري ليش مختنگه كلش وياسر ميروح من بالي ابد مقهورة عليه..

اتصلت على ديار حچيت وياها بعدين دخلت يم رضا گالي..

ــ بعدچ منايمه؟؟

ــ اي..

ــ وگولي ما احبه علمود اموتچ..

ــ اني ما گايله ما احبه بس اگول زعلانه عليه..

ــ هااا... زعل حبايب يعني؟

ــ هههههه.. لا مو زعل حبايب اني ما راح احچي وياه بسهوله..

ــ اني راح اطلع هسه...

ــ وين؟؟

ــ المركز الشرطه اشوف ياسر راح يطلع لا..

ــ خلي اجي وياك...

ــ لااااا..

ــ حبااااااب...

ــ لاااااا...

ــ اسم الله.. شبيك؟

ــ يعني وين احطچ..

ــ ابقى بالسياره واباوع من بعيد والله..

ــ يبووو عليك رضا...

ــ شنيييه... شبيك؟

ــ ماكو ملحه بـ العالم كله مثل ملحتچ

ــ ترى اني ما الح...

ــ اابددددد..

افنان: ترى هو متعود عليه يگلي لا مره وحده اعوفه واروح ابچي...

مُهره: جذاااابه.... هههههه

رضاا: اي والله افنان هسه عرفت اني چنت بنعمه..

مُهره: ااااه.. خوش رضا خوووش...

رضا: ليش حسيتچ تهدديني...

مُهره: شتريد تحسها حسها بكفك...

رضا: ترى اني ابو الراهي ما اخذچ وابقيچ تلطمين هنا..

مُهره: لا انته حباب والله متسويها...

ضحك بصوت عالي وگال...

ــ يلا بدلي تأخرنه..

رحت بسرعه بدلت وطلعنه وگفنه مسافه عن المركز و رضا نزل يشوف شنو صاير واني بقيت اراقب من بعيد مرت نص ساعه واجه رضا...

ــ باقر ذاب التهمه مالت ياسر على ولد وهسه جاي يكملون الأجرائات ويطلع..

ــ ها ان شاءالله...

ــ نروح؟

ــ خلي اشوفه..

ــ تمام..

انتظرته شويه وطلع ياسر وچان واگفله علي ومالك وراشد اول ما طلع حضنوه وهو شكله تعبان كلش..
حسيت عيونه تفتر بـ المكان عبالك يدور على شي بعدين صعدو كلهم بالسياره وراحو..

احنه رجعنه للبيت واني گبل رحت نمت ما گعدت لل7 بـ الليل رحت للمطبخ لگيت عمتي تحضر بالعشه گالت..

ــ صح النوم يا حلوو..

ــ هلا بيچ عمه..

رضا: ترحين ويانه راح نروح حديقه نتعشى بيها لان افنان جايتها المطيه...

مُهره: منيه المطيه؟

افنان: يعني جايتني الحاله...

مُهره: هههههههههه... شنو انتِ بيچ حاله؟؟

رضا: اي تطنگر و تريد تطلع... اني اگللها اجتچ المطيه...

مُهره: هههههه اي عفيه عليچ افنان...

افنان: والله ميطلعني الا هيچ اسوي...

رضا: يلا بدلن خلي نروح ونرجع من وقت تعبان..

رحنه بدلنه و اخذنه الأكل ورضا جاب بعد وياه لفات وحلويات  وگعدنه بالحديقه اكلنه واحنه نسولف ونضحك كلش تونست..

رحنه تمشينه اني وافنان شويه واجه رضا ويانه...

مُهره: اگلكم اني من صدگ الله عوضني بيكم عن كل الم عشته وكل شعور فقدته بـ بيت باقر العار چنت دائماً يحسسوني اني يتيمه عكسكم ولا يوم عاملتوني اني غريبه عنكم تدرون بيه شگد احبكم ميحتاج اگول..

رضا: لا والله مندري گليلنه عليچ العباس...

افنان: رضا الا يخرب السالفه يلا يرتاح..

رضا: ومرض...

مُهره: اااااييي احبكم هوووووواي... هسه عرفت استاذ رضا؟؟

رضا: اي...

رجعنه للبيت واني بعدني نعسانه رجعت نمت ومرت يومين نحضر للجامعه الحد ما داومنه اول يوم رحنه اني وافنان وصلنه رضا للباب و گال...

ــ لا تنزلون..

طلع محفظته واطانه كل وحده 25 افنان اهذتها واني ما اخذتها گتل بخجل..

ــ رضا ميحتاج اني عندي..

ابتسم واطاها الـ افنان وگال..

ــ اطيها الها من تنزلون...

نزلنه من السياره رحنه للقسم مالتنه بقينه واگفين شويه واجت ديار واني رحت حضنتها وهي گامت تبچي..

ــ مشتاقتلچ كومه..

افنان: هسه اني اريد حضن..

مسحت ديار دموعها واجت ضمت افنان و گالت..

ــ شلون التقيتو..

مُهره: بـ الباب..

افنان: يلا بدت المحاضره.

دخلنه للمحاضرات ومن اول يوم بدينه بـ الدراسه خلصنه المحاضره الثانيه و طلعنه من القاعه...

ديار: تدرون هذا الدكتور بالمحاضره صديق راشد ومالك...

افنان: هااا... بس هو شنو يخبل...

مُهره: اي من صدگ احلى دكتور بالجامعه يمكن...

ديار: تتذكرين افنان من داس على عبايتچ وانتِ تمشين..

افنان: هو هذا نفسه؟

ديار: اي هو...

افنان: ياااا غير تگليلي..

مُهره: ههههههه اذا گلتلچ شتسوين مثلاً؟

افنان: ما اسوي شي...

ديار: ههههه... ولچن مشتاقتلچن كووومه خلي نروح ناكل شي ونگعد نسولف مشتاقه للغيبه والنميمه..

مُهره: هههههه.. يلا امشو..

افنان: حرام يمعودات...

ديار: قابل صدگ هسه اخذنه غيبه..

گعدنه بالمطعم اكلنه وسوالف وضحك مرت يمكن ساعه و رضا اتصل بـ افنان...

افنان: يلا لازم اروح اخويه بالباب..

ديار: اني همين راح ارجع للبيت..

مُهره: ترجعين وحدچ؟

ديار: لا سجلت خط...

مُهره: هاا احسن..

ديار: اي طبعاً..

طلعن البنات واني بقيت شويه گاعده علمود تروح ديار يلا اطلع...

مرت نص ساعه واتصل عليه رضا وطلعت من المطعم توجهت للبوابه اول ما طلعت چانت مسافه بين سيارة رضا والبوابه.. جاي اتمشى وگفت يمي سيارة ما باوع عليها ابد..

من سمعت صوته وگفت عن الحركه والتفتت اله..

ــ صعدي مُهره..

ــ شنو هالثقه؟..

ــ تصعدين لو انزل اني اصعدچ..

ــ روح ياسر لا اصعد ولا تصعدني...

فتح باب سيارته ونزل وافتر وگف گبالي فتح باب السياره ولزم ايدي بخفه..

ــ يلا ياابه.. يلاااا...

سحبت ايدي وگلت بنتر واني اصعد...

ــ لا تلزمني..

صعد بالسياره مشيت السياره مسافه وگتله..

ــ شتريد مني؟

ــ اريدچ..

ــ وين رايحين..

ــ نسولف..

ــ ياااااااسر...

ــ اروح فدوه الأسمي بحلگچ...

ــ هاااااي شبيك يااسر احچي عدل..

اني محترگ گلبي واحچي وياه وهو ولا يمه اعصابه بارده ويحچي بهدوء...

ــ شبيچ هسه اني شمسوي؟

ــ شتريد؟

ــ اريد نحچي...

ــ اني ما اريد احچي وياك..

وگف السياره بمكان بيه حديقة چبيره وگال...

ــ انزلي...

ــ ما انزل..

ــ انزلي گلت..

ــ ما انزل گلت...

ــ العناد يمشي بدمچ مُهره..
تردين اسحلچ من السياره؟

ــ انته شبيك؟؟

ــ مُهره احسب من واحد لل5 اذا ما نازله من صدگ اسحلچ...

اول ما خلص جملته دگ موبايلي باوعت لگيته رضا جاوبته وهو صافن عليه...

ــ ها عيني..

ــ شنو وينچ؟

ــ روحو للبيت شويه وارجع..

ــ شنو وين رحتي؟؟ بقيت ساكته هو عرف بسرعه وگال..

ــ انتِ يم ياسر؟

ــ اي...

ــ تمام ديري بالچ على نفسچ ولا تتأخرين..

ــ ان شاءالله..

سديت الخط باوعت عليه گال بسرعه..

ــ ويا منو تحچين؟؟

ــ انته شعليك..

قبض ايده و ضرب ستيرن السياره ثلاث مرات وتحول الغير شخص ما عبالك نفسه المساع يحچي على كيف..

ــ هذاااااا ووووولد مُهرررره؟

بقيت ساكته عضيت شفتي خفت من شكله ونبرة صوته التغيرت..

ــ احححححچي..

ــ اي ولد...

ــ انزلي..

نزلت وسديت الباب وهو همين نزل ورگع باب سياره بقوه وگال..

ــ امشي گدامي..

مشيت دخلنه للحديق وگف واني همين وگفت اني ميته من الخوف بس اتظاهر اني ما بيه شي وقويه ومسيطره...

ــ يلااا الغي..

ــ احچي عدل وياي ياسر..

ــ خوووش... يلا احچي...

ــ شنو شحچي؟؟

ــ لا تخليني انزع ثوب الاخلاق..

ــ اسئلني واني اجاوبك.

ــ وين چنتي هاي الأيام كلها؟؟

ــ بيت عمتي؟

ــ عمتچ بـ ايران چنتي بـ ايران؟

ــ رجعو للعراق..

ــ وشلون عرفتيهم؟؟

ــ بنتهم ويانه بالجامعه..

ــ وهذا الحچيتي وياه منوو؟؟

ــ رضا ابنها الچبير...

ــ ليش خابرچ؟؟

ــ هو شنوه تحقييق كااافي اخذك الواهس

ــ ياااااارب صبرني على هذا البلاء..

ــ اني بلاء؟

ــ احلى بلاء كون كل بلاء مثلچ اني بخير...

ــ رجعني للبيت...

ــ بعدني ممخلص ...

ــ يااسر كافي اني تعبانه اريد ارجع للبيت...

ــ انتِ ليش زعلانه عليه؟؟

ــ تعرف كلش زين شسويت...

ــ زين ليش طلعتيني من السجن؟؟
ليش اجيتيني من تمرضت؟؟
ليش جبتي دفتر امي؟؟

ــ ما اجيت لان مريض اجيت اطيك الدفتر ولگيتك مريض...
و ما طلعتك من السجن ابوك طلعك..

ــ انتِ هددتيه..

ــ اي اريد انتقم منه مو علمودك..

ــ ها ومن اجيتي من طلعت من السجن همين علمود تنتقمين؟؟

بقيت صافنه شلون عرف...

ابتسم وتقرب عليه وگال..

ــ احچي...

درت وجهي ومشيت بسرعه اريد اطلع من الحديقه صاح وراي...

ــ مُهره..

ما باوعت عليه واستمريت بالمشي الحد ما لزمني من ذراعي وسحبني عليه وضمني الصدره...

ــ وين ترحين...
كافي تعالي وياي ترى عذبتيني والله..

ــ وخر ياسرر..

ــ تعالي نروح البيت امي وابوچ ونعيش بيه و نعوف الدنيا كلها..

دفعته وگلت...

ــ توصلني لو اروح بتكسي..

مسح وچها وسحب نفس وزفره وگال..

ــ اوصلچ..

رحنه للسياره گتله على المكان مال البيت وطول الطريق اني مختنگه وحاصرتني البچيه بس گاعده اكابر وما ابين..

ــ بهذا الفرع...

اول ما دخلنه للفرع انتبهت للشارع نااس كومه واگفه وكل واحد متگدر السياره تدخل نزلنه من السياره

ياسر: شكو عمي؟

ــ محترگ بيت روح من غير شارع لان سيارة الأطفاء ساده الشارع...

مُهره: بيت منو؟؟

ــ بيت رضا.....

يتبع🦋.........

ـــــــــــــــــــــــ

لا تنسون التصويت والتعليق بين الفقرات