رواية خيِّال ومُهرة الفصل الرابع 4 - بقلم amna

«بسم الله الرحمن الرحيم»

«خـيَّـال و مُـهـره»

«آمـنـه عـادل»

========
«لا تنسون التصويت آغاتاتي»

«اللهم صلِّ على محمد وآلِ محمد»
======

شَايِف مِن يجن كلهن ؟
لا بيك التگوملهن ، ولا بيك التِرتبَهن
حِزنك ، خُوفك ، والضَياع الـ بيك
گلي شلون متحَملهن ؟

________

«مُهره»

سديت باب السطح والتفتت لگيته واگف گمزت
وشهگت بصوت عالي وحطيت ايدي على صدري...

ياسر: اسم الله..

باوع عليه عفته ونزلت بسرعه رحت للحمام
غسلت ولگيت عيوني حمر ووچهي شاااحب
و رجعت للغرفه لگيت ديار گاعده..

_وين چنتي؟؟

_صعدت للسطح..

_ولچ متت خوف من ما شفتچ

_قابل وين اروح؟؟

_ مادري ليش خفت.

_ رحت باوعت على شروق الشمس وگعدت شوي
و نزلت...

_ها عفيه عاشت ايدچ

_ وايدچ

_هم شفتي ياسر

_ غير گمزني گمزه وگف گلبي من الخوف..

_ياا اسم الله ليش؟

_من دخلت من السطح سديت الباب والتفتت ولگيته
واگف گبالي متت من الخوف..

_ و هو شگال؟؟

ــ اسم الله واني عفته ونزلت..

_ هاا..

راحت ديار للمدرسه واني گعدت قريت شويه
و رجعت نمت ماحسيت بنفسي شكد نمت اجت
الى ان اجت ديار گعدتني..

_ولچ بعدچ نايمه گومي

_شبيچ غير ولا نمت باليل..

_ لعد اني شگول من الصبح گاعده و ركض من درس الدرس..

_اي خوش الله يساعدچ تعاي ابوسچ...

اجتي يمي وهي تضحك..

_ انتِ والله لوتيه لو تتزوجين رجلج يصير عصبي كليله تعال ابوسك يگلچ خلي يوميا اصير عصبي احسنلي...

_چا شعبالچ؟؟؟

سولفنا شويه نوب نزلت اني وديار حضرنا الغدا ويا خاله واحنه نسولف..

اليوم من صعدت للسطح احس بنفسي چان اكو على
گلبي همووم بگد الدنيا من شفت شلون چان الظلام
وطلعت الشمس حسيت بيها طلعت علمود تخفف عني همومي وترجعني شويه النفسي الضاعت مني..

اجه عمو من شغله حضرنه الاكل على ميز الطعام
ودخل ياسر اول ما شافه عمو گاله

ــ تعال وراي..

راحو للمكتب وسدو الباب وما نسمع بس صياح ياسر

_اني ما اريد شنو تغصبني؟؟؟؟
عبالك اذا انت ابوووي يعني اعيش عبد الك
ما اوافق لو تنطبق السما على الارض وشتريد تسوي
سوي ما خايف منك اني خوووش..

طلع من المكت ورگع الباب وراه باوعلي بخزره ويتنفس بثقل اني گبل نزلت راسي..

احس بيه ميريدني اعيش وياهم وما طايقني
واني وعدت نفسي ارجع ادرس واشتغل وارجع
بيت اهلي نفس قبل وارجع اعيش....

مرت أيام وبديت ادرس اني وديار اگعد
ساعات بالغرفه ادرس بدون ملل..

ديار دخلت دروس حصوصية وگالتلي
سجلي وياي اني ما قبلت.

اطلع مدرسين باليوتيوب وجاي افتهم عليهم كلش
زين سويتلي جدوول وملتزمه بيه لان ماعندي شي
اسويه اني كلش احب الدراسه واني صغيره...

چنت گاعده ادرس وسمعت خاله اتصيح..

_مُهره يلا تعالي حبيبتي صبيت غدا..

عفت الكتاب وگمت بسرعه لبست حجاب ونزلت
لگيتهم كاعدين كلهم اجيت وگعدت...

_السلام عليك..

ردو السلام انتبهت الياسر چان موجود گاعد
على الكرسي وياكل عبالك محد موجود..

ابو علي: شلونچ بالدراسه مُهره؟

_الحمدلله زينه..

_ عمو راح اسويلج غرفه فوگ الچ خاصه علمود تاخذين راحتچ.

گبل اجتي عيني على ياسر من حچه عمو چان لازم الخاشوگه يريد يحطها بحلكه ومن سمع ابوه گال نزل الخاشوگه ورگعها بالماعون..

_لا عمو ميحتاج اني مرتاحه ويه ديار..

ديار: اي بابا احنه سوه نقره وانام

ــ لاااا من باچر ابدي بالترتيبات واجيبلچ سرير
ومكتب تقرين عليه وكنتور وباچر تاخذچ خالتچ
تشتريلچ ملابس..

استحيت احچي شي تغديت بسرعه وغسلت الماعين واخذت الچاي وطلعت بالحديقة الجو بده يبرد والحديقه شكلها يجنن سحبت نفس احب ريحة الحديقه..

گعدت اباوع للسما و للورد الي مفتوح على النص وكل الالوان ومن الجهه الثانيه اكو شجر ..

اجتي ديار گعدت يمي

_شو گاعده وحدچ بدووي ومبين عليچ مستمتعه..

_اي والله مستمتعه وانتِ خربتي اللحظه..

_طاحضچ رادت تكوم..

_ولچ شبيچ اشاقه گعدي...

_واني اكول خاف تبقى وحدها اتضوج..

_شبيچ اتشاقه ترى وحتى اني اذا انتِ مو وياي
عبالچ ابقى بهذا البيت والله ولا ابقى بس المصبرني
انتِ..

_ترى البيت كُله يحبچ..

_اي ادري بيهم يحبوني بس من عدا ياسر..

_يااا شبيچ ليش شمسويلچ؟

ـ ممسويلي شي، بس نظراته اليه عبالك اني
كاتله واحد من اهله..

ـ هههههههه خرب يومچ.. ولچ هو ياسر هيچ
طبعه ثگيل وميجامل وما اله خلگ اي واحد..

ـ بس هو صدك يكرهني  ..

_ والله شبيچ هو هيچ والا هو بيوم الوصلچ
من توفو اهلچ خابرني يريد يبچي ويكلي روحي
ويه بابا ماعدها احد هنا...

واني سمعت كلامه واجيتلچ ويه بابا

_مادري... بس شفتيه من عمو گال أكعد فوگ..

_ترى غرفچ حيسويها على السطح حتى ياسر
ميضايقچ ولا انتِ تضايقيه..

اني گلت البابا يعوفچ يمي گال لا حالها من حالكم..

قنعتني وطبينه جوه خلصنه دراسه وسوتلنه ديار معكرونه كلش طيبه..

اكلنا ونمنا من التعب نگعد من الصبح حتى ندرس..

ثاني يوم اجت خاله گعدتنه حتى نروح للسوگ
رحنه للسوگ واشتريت ملابس وكلشي على ذوق
ديار لان استحي

خلصنه ورحنه للسياره چان راشد واگف النه وصلنه للبيت وراشد ينزل بالغراض ويدردم اكو واحد يشتري هلكد..

دخلنا للبيت لگينه عمو گاعد بالصاله و ولد يطبون
ويطلعون بيدهم خشب..

ديار: امشي نروح للغرفه..

ابو علي اجه ورانه

_جبت غراض الغرفة مُهره لحد يطلع راح يخلصون.

مادري صار عندي احساس غريب فرحه بس بنفس
الوقت مستحيه، مهمه يكون الواحد مدلل بس
ميحس بيه بيته شعور ابد مو مريح..

وره شويه راحو وعمو اخذني يشوفني الغرفه..

_باعي احچي بصراحه اذا ما عجبتچ..... خوش؟؟

بتسمت وهزيت راسي . وصلنه للباب مال السطح
مفتوح اول منطلع من السطح على الجهة اليمنه اكو
باب شفته ذاك اليوم من صعدت بس ما هتميت..

فتح الباب و دخلنا لگيت نفس اثاث غرفه ديار بالضبط
سرير ابيض وكنتور ومكتبه اكو شباك صغير يطل على السطح وبيه برده تول بس اليختلف عن غرفة ديار حاطين مكتب صغير ابيض بصف المكتبه..

_ها عمو عجبتج؟؟

_كلش عمو... شكراً

_ادللي بنيتي، باعي هذا حمام يمچ واي غرض
نقص عندچ كولي الخالتچ..

_ ان شاء الله.....

طلع عمو بقيت اباوع بالغراض دخلت ديار بيدها ماسحه ومنظفات

_يلا نظف... ابتمست وهزيت راسي

_علمود نسوي احلى فقره نصفط ملابسچ الجديده..

نظفنه ورتبنا وعافت المنظفات بالحمام وگالت..

_عفتهن الچ خاف تردين تنظفين

_هاا عاشت ايدج..

نزلنا اني وياها جبنا الغراض الشتريناهن وكتب السادس وكم شغله مالتي بغرفة ديار وصعدنه واحنه نسولف ونضحك كملنه تصفيط رتبت كتبي و الدفاتر على المكتب

واندگ باب الغرفه

ديار: منوووو

راشد: اني....

اخذت الشال مالتي حطيته على راسي وديار
فتحتله الباب وهو دخل بيده كارتونه..

ديار: شنو هاي؟؟

راشد: شاشه... وين احطها

ديار اشرت على جرارات هناك حطهن.

راشد: مُهره احطها هناك؟؟؟

مُهره: اي حطها ماكو غير مكان مناسب الها..

حطها وجاب الريمونت يعلم بيه ادخل لليوتيوب
وابحث علمود ادرس بيها..

_هاا تمام شكرآ

_عفواً

نزل راشد وديار راحت جابت غطا ومخاد ورتبت السرير

_هسه يلا هنا لازم نودع بعضنا

_ ديار شكراً تعبتچ وياي

_ انچبي.. اكو واحد يتعب لليحبه...

رحت شبگتها و بستها و ضحكنا شويه ونزلت
بقيت الوحدي گعدت شويه اقره نوب حسيت
بروحي تعبانه كلش طفيت التلفزيون ونمت...

ـــــــــــــــــــــ

«آسيا»

اجو اليوم يمنه اخووي الچبير باقر وزوجته لان
رأس السنه الميلادي امي جابت كيكه واشياء
للحفله واتصلت بيه و اجه هو و زوجته وبنته...

احتفلنه احتفال بسيط وگعدنه سوه نسولفه و
نضحك بعدين باقر راح نظفت البيت والكل راح نام.

اني رحت الغرفتي اتصلت على مهدي سولفنه
شويه بعدين گتله..

_جبتلك دفتر بس شلون اطيكياه

_صدك خوش حجي، بعد عشر دقايق تعالي اطلعي بالباب وجيبي الدفتر وياچ...

مادري شصار بيه بالبدايه خفت لا
واحد من اهلي يشوفني..

بعدين گمت بدلت وحطيت عطر وخليت الوجهي شويه مكياج وحطيت شال على راسي أخذت الدفتر و نزلت وبيدي الموبايل فتحت الباب بهدوء وطلعت للحديق
بقيت واگفه دقايق واتصل رديت گال بصوت ناصي..

_ها نزلتي؟

_اي واگفه بالحديقه

_يلا فتحي الباب.. سديت الموبايل ورحت
للباب فتحته شويه.

_شلونج آسيا

_زينه وانت شلونك

_الحمدلله هاچ هاي هديتچ ما حبيت ندخل
بالسنه الجديده واني ما جايبلچ شي..

مد ايده بيها العلاگه اخذتها من عنده..

_شكراً عليمن تعبت نفسك

_ اني الچ ما اتعب..

مديت ايدي البيها الدفتر اطيتها اله
كتبت بأول صفحه..

( قد كان قبلك كُل شي جامد لاروح فيه
ومنذ ان تعرفت عليك اصبح كُل شيء يختلف
اصبحت احب كُل شي يتعلق بك)

_يلا دخلي باوع بعيوني وگال بصوت ناصي

_اني احبچ...

وسد الباب حتى مانتظر مني اردها اله طبيت
جوه والفرحه ماليه كل خليه بجسمي.

فتحت العلاگه حمره مال هدايه بيها دبدوب أحمر وعلبة كاكو....

شبگت الدبدوب واتصلت بيه..

_ اني احبك هوواي ..
ردت اكوله الك واحنه بره بس سديت الباب بوچهي. 

ضحك بصوت وكال

_لمن كتلچ احبچ ما انتظرت تردينها الي خاف
تستحين مني لو شي...

_لا عبرنه مرحلة المستحه اريد اعيش وياك بتفاصيل ما اتندم عليها بعدين من اسولف الجهالي..

_ ههههههههه خوش فكره

_اي

_هسه وصلت للبيت خلي اشوف الدفتر.

سمعت صوت العلاگه يفتح بيها شويه

_هاي انتِ كاتبته..

_اي

_أقصد تأليفچ

_اي ردت اخذ من كتاب نزار قباني العندي بس كلت خلي اعبر اني واكتب يمكن يطلع شي خاص اكثر.

_ عاشت ايدچ يجنن طلعتي شاعره عمي منو يوصلچ.

_تدري هاي احلى سنه بحياتي راح تصير
لان اني وياك سوه..

_احلى سنه خلصت لان اليوم التعرفت بيه
عليچ چان بيها..

مرت ايام واحنه منعرف منتواصل باليوم يتصل
3 مرات او 4 وحتى انام مرات واني احجي وياه
الى ان صار امتحانات وشويه ابتعدت عن كلشي
علمود اگعد اقر زين كولش تعبت بهاي الفتره هو
همين مرات يزعل مرات يكولي لا روحي اقري
عوفيني..

وبيوم النتائج رحت للمدرسه جبت النتيجه ورجعت
چنت كلش فرحانه درجاتي كلهن عاليات..

اتصلت بيه كتله وهو همين كلش فرح وگالي
تطلبيني هديه وقررت اني همين اشتريله هديه
لان عيب هو كم مره جابلي واني ولا مره جبتله..

اليوم الثاني اجه بابا وگال  لامي
لازم نشيل الغير محافظه..

بالبداية رفضت امي  واني همين كلش ضجت
وانقهرت مو لان حنشيل بس احس راح ابتعد
عن مهدي وهاي السنه سادس ما اريد التهي بشي..

باليل اتصل عليه و اني كلش مختنگه بس سمعت صوته گال..

ــ الوو.. ها عيوني الاشوف بيهن شلونچ..

گبل بچيت وتغيرت نبرة صوته...

ـ شبيچ آسيا؟؟ شنو جاي تبچين؟؟

ــ مهدي اليوم بابا أجه وگال نشيل البغداد.

ــ شنو شكو صاير شي؟

ــ لا ما صاير بس يگول شغله كوله هناك وتعب من الروحه والرجعه.

ــ صدگ يحچي؟؟

ــ اي والله..

ــ زين انتِ ليش تبچين..

ــ أحس راح ابتعد عنك وبعد ما اشوفك..

ــ يلا على اساس احنه يوميا واحد شايف الثاني
لا تضوجين واني بس اشتاقلچ اجي البغداد
واشوفچ وعد.

ــ گلبي يوجعني

ــ اسم الله على گلبچ.. اني همين قهرتيني بس
شنسوي نكتل ابوچ..

ضحكت وهو همين ضحك

ــ بعد لا تبچين ترى اموتچ..

ــ خوش..

ــ آسيا اريد أجي اشوفچ.

ــ شوكت؟

ــ اليوم بليل..

ــ لا مهدي مو اليوم خلي يروح بابا لان اخاف.

ــ ها ان شاء الله بس اني ترى كلش مشتاقلچ.

ــ والله حتى اني..

ــ من نتزوج ما اخليچ ترحين لاهلچ..

ــ ياا ليش؟؟

ــ هما حارميني منچ هسه من نتزوج اردها الهم
واحرمهم منچ.... ضحكت وگتله

ــ عوف هاي سوالف الانتقام..

ــ نتزوج وتشوفين..

ــ اي يلا خوش..

ــ اكو موسيقى احبها لازم تسمعينها حتى نسمعها سوه..

ــ يمكن اني ما احبها

ــ اذا ما حبيتيها عود الله كريم..

ــ اتشاقه اني كلشي تحبه انته احبه بدوون تفكير..

ــ حتى اني..

ــ شسمها خلي اطلعها؟

ــ اسمها «first touch»

ــ شكد حلو اسمها..

ــ اي معناها المسه الأولى..

ــ من هسه اگلگ اني حبيتها هاهيه..

ــ ههههههه لا تحكمين على الكتاب من غلافه اصبري
سمعيها يلا تقررين..

ــ خوش راح اروح اسمعها..

ــ يلا اني همين راح اطلع باليل اتصل عليچ..

سمعت الموسيقى صدگ طلعت تجنن نزلتها
بالموبايل علمود كل ساع اسمعها..

رحت گعدت يم امي اقنع بيها اروح على الشارع
اشتري كم شغله بالگوه قبلت بس شرط أخذ اختي
وياي أخذتها شسوي حكم القوي على الضعيف..

رحت علمود اشتري المهدي هديه.

اشتريتله تشيرت اسود وساعه بدون ما تنتبه اختي الفتانه كلشي تشوف تروح تگول لامي ..

رجعت للبيت سوينا عشا وتعشينه وصعدت
حجيت وياه الحد ما نمت..

گعدت الصبح نظفت الببت ويه امي وبابا گاعد بغرفته
وامي تسولفلي على البيت الراح نگعد بيه البغداد ويمكن باچر تروح البغداد هي وباقر وبابا ومرت اخووي تجي
يمنه تبقى..

رحت الغرفتي اتصلت عليه ولبست السماعات..

ــ الوو هلاو مهدي شلونك

ــ الحمد لله وانتِ شلونچ شخبارچ..

ـ الحمد لله زينه.. اتصلت بيك علمود اكلك باچر..

يرحون امي وبابا البغداد يباتون يردون يشوفون
البيت نبقى اني واخواني وتجي مرت اخوي يمنه..

ــ ها خوش باچر يمكن اجي

ــ اي ان شاءالله

ــ وأخيراً ميت على شوفتچ ترى..

ــ ههههه ما بقا شي..

انفتح باب الغرفه و دخل بابا واني گلبي
وگف من الخوف احس بروحي مادري شسوي..

ــ ويا منو تحچين؟؟

احس اختنگت الكلمه ما تطلع مني وايدي ترجف..
اخذ الموبايل من ايدي وحطه على آذانه وگال..

ــ الوو..

خفت يحچي مهدي ....

__________

«روسلينا»

رفعت راسي شفته واگف گال

_احمم السلام عليكم

_وعليكم السلام....

_ممكن اخذ من وقتج دقيقه؟؟

_بس اني جاي اطلع للبيت تأخر الوقت...

_دقيقه وحده

_تمام تفضل..

گعد على الكرسي الگبالي وگال..

_راح اختصر...

الصراحه البارحه شفت صفحتچ بالانستا وكاتبه
تگدرين تسوين عقد للتصوير ويه اي عارض..

_ايي

_اني المصور مالتي مو كلش محترف نفسچ فا أريدچ تكونين المصوره مالتي..

_ اي بس اني ما متفقه ويه واحد قبل فا ما
اعرف التفاصيل..

_ ماكو تفاصيل هو مجرد اني اتفق وياچ
على وقت ومكان..

_تمام، والشركه؟

_ اني لا انتمي الماركه ولا شي مجرد تصوير الصفحتي الخاصه، ونتفق على الفلوس على كل جلسه..

_ مو مهم الفلوس بس عندي شرط

_تفضلي

_اريد بكل بوست تنشره تكتب اسمي بالوصف..

_سهلة

_تمام اتفقنا..

_اني راح اسويلچ متابعه بالانستا و نتفق على التفاصيل..

_تمام، كام وهو يسد دگمة سترته..

_شكراً..

_عفواً...

رجع الطاولته واني اخذت غراضي وطلعت للشقه حضرت الملابس مال باچر ونمت حتى ما شفت موبايلي مسويلي متابعه ولا تذكرت.

گعدت الساعه بـ7 الصبح سبحت وبدلت وگعدت اباوع بالموبايل وشفته مسويلي متابعه ومنطيني لايك على كم صوره دخلت على صفحته صوره يخبلن ملابسه وجسمه وكولشي بيه ولا غلطه..

باوعت هوواي اكو فيديوات و صور نوب يكول
المصور القديم مو حلو تصويره...

انتبهت للساعه تأخرت بسرعه كمت لبست حذائي
واخذت جنطتي و طلعت اخذت قهوة ووصلت
للمكتب گالولي المدير يريدچ رحت اول مادخلت
هو لبناني فحجيت وياه بالعربي..

_اهلاً استاذ..

_اهلا وسهلا تفضلي..

دخلت گعدت على الكرسي اليم المكتب..

_بعتذر منك كنت اكتير مشغول وما صحلي
وقت اسئل عنك بتحتاجي شي ابوك وصاني
عليكِ شي 50 مره..

ابتسمت وگتله

_كلش شكراً، لا مامحتاجه شي سلامتك..

_الله يسلمك ويحفظك

طلعت من مكتبه رحت المكان التصوير عدنه اليوم جلسة تصوير مهمه...

سويت الكاميره ورتبت المكان للتصوير واجه علي گال

_السلام عليكم...

رديت السلام وبادلته الابتسامه وبدينه التصوير
لمن خلصت رحت تغديت ورجعت كملنه الجلسه
بتعب كلش، كلهم تعبو جاب علي الكل الكادر قهوة
وزعها من وصلني گال..

_تفضلي

_شكراً..

_ادللي

اخذ مالته واجه يمي گال..

_ باچر عندچ مجال نصور..

_لا بس دوام بالشركه من اخلصه نصور

_تمام اتفقنه...

ثاني يوم خلصت شغلي من الشركه رحت للبيت
سبحت ورحت للموبايل اشوف العنوان حتى اروح
الجلسة التصوير..

بدلت لبست هودي بيجي وبنطرون عريض نفس
الون وشال ابيض وخليت الاكلاو مالت الهودي
على راسي وحطيت حمره ومسكاره وعطر واخذت
الجنطه وطلعت..

وصلت للمقهى لگيته گاعد يشرب چاي وصلت يمه..

_السلام عليكم اسفه اذا تأخرت

_وعليكم السلام لا ما تأخرتي..

فات ولد يشتغل گاله بالنگليزي جيب چاي..

_لا اني ما احب الچاي گتله اريد قهوة ساده.

الولد هز راسه بـ أي وراح.

_ عراقي ميحب الچاي اول مره اسمع بيها..

ـ مادري شلون يشربون الچاي ما احبه ابد

ـ اني اكول شلون تشربون القهوة وهي مره ما تنجرع
ـ ترى بيها انواع..

ـ ما احبها بكل انواعها...

ضحكت جابو القهوة شربتها بعدين گلتله..

ـ يلا نبدي

ـ براحتچ..

طلعت الكاميره وبديت ارتب الغراض مالتها
واركب العدسه ونظفتها وهو گام لبس الستره
وفوگها الكوت و لفاف بيجي..

ـ عادي ناخذ هنا كم صوره ونطلع بالشارع واني امشي تاخذيلي صور.

ـ اي عادي

صورت كم صوره بعدين أخذ الفنجان الچنت اشرب
بيه قهوة ولزم بيد الصحن وبيده الثانيه الفنجان صورته يمكن چان منتظرني احچي لو ارد عليه بس ما حچيت شي ما اريد اسوي علاقة واصدقاء وكذا ما احب هاي السوالف.

ـ ها نطلع

ـ أي

ـ بس خلي ادفع وابدل ملابسي

طلعت وبيدي الكاميره انتظرت شويه وطلع لابس قميص ابيض وفاتح البدايه مالت الدگم وبنطرون اسود تمشينه شويه واخذتله كم صوره وهو يعبر الشارع بعدين واگف على الرصيف وصورته ورجعنه تمشينه..

ـ نروح هناك

ـ اي حلو المكان

رحنه للمكان هو وگف واني رجعت اليوره حتى
اصور وگفت بالمكان المناسب ..

وبس رفعت ايدي أحس اكو شي خطف من يمي
و ضرب ايدي حسيت بوجع بايدي موتتني لزمت چفي
بأيدي الثانيه ورفعت عيني اباوع على علي أجه يركض
وهذا الضربني چان صاعد بايسكل تقرب يمي يحچي بالنگليزي..

ـ اسف..... أسف ما شفتچ..

راد يلزم ايد يريد يشوفها سحبتها بسرعه واجه
علي لزم ايده بقوه گلتله..

ـ علي عوفه..

عافه واجه بتجاهي وهو ضايج..

ـ تعورتي؟

ـ هسه يروح الوجع بس خلي اگعد شويه..

الضربني: خلي أخذچ للمستشفى

علي: احمد ربك گلتلي عوفه چان كسرت ايدك..

ـ لا مابيه شي روح

ـ اعتذر مره ثانيه..

ـ ما صار شي

راح الولد اباوع على الكاميره همزين لابسه مالتها الحزام برگبتي و ما وگعت چان انكسرت...

أخذ علي الجنطه مالتي شالها
وگالي تعاي نروح للمستشفى..

ـ لا ميحتاج

ـ شنوه الميحتاج ترى الضربه قويه مو بكيفچ تعالي
گعدي بالمطعم راح اجيب سيارتي واجي ما حچيت
شي سويت الگاله وره عشرة دقايق أجه گمت وياه
طلعت فتحلي الباب و صعدت واحس انشاغت
روحي من الوجع حتى ما اكدر احجي گمت اتلوه
أروح منا و منا و اني لازمه ايدي..

ـ ها جاي توجعچ؟؟؟

ـ موتتني.. ونزلت ادموعي بدون ما احس

ـ وصلنا.. وصلنا

اول ما وصلنا ركض فتحلي الباب ولزم زندي يمشيني اني حتى مابيه حيل اوخره مني لو اكوله حراام ..
دخلنا للطبيب سويت اشعه طلعت مابيها كسر بس اصابعي ورمن من گد ما الضربه قوويه انطوني مسكنات و گال الدكتور حطي ثلج و لا تحركينها هوواي

لفها اليه وكال بليل فتحيها وخليها بالثلج
طلعنا وعلي و لا عافني دقيقه

ـ استاذ علي روح اني اخذ تكسي و ارجع للبيت تعبتك وياي

ـ شنو السالفه ليش شبيه اني و تاخذين تكسي
اوصلچ و اروح و بعدين انضربتي بسببي
فا هذا واجبي.

ما حچيت شي فتحلي الباب صعدت وسده
وهو افتر صعد و گال وهو يلبس حزام الامان..

ـ لبسي الحزام.

سحبته بيدي الثاني و لبسته

ــ باچر لا تداومين..

ــ اي اطلب اجازه

ــ اي ان شاء الله

وصلنا للبيت دليته اني عليه نزل فتحلي الباب وگال

ــ ديري بالچ على نفسچ ولا تحركين ايدچ هوواي حتى تطيب، و ترجعين تصوريني..

ضحك اني همين ضحكت وگلتله..

ــ ان شاء الله

أخذت جنطتي من عنده ودخلت بالگوه نزعت ملابس ولبست دشداشه قصيره و شربت دوه وحطيتلها ثلج و خابرت جولييت سولفتلها حتى تروح للمدير تحچيله و تطلبلي اجازه اسبوع وطفيت الموبايل ونمت..

ـــــــــــــــــــــــ

«مُهره»

مرت ايام وگمت حتى ما انزل هوواي على گد الأكل واغسل الماعين واصعد.

عمو يوميا ينطيني مصرف ويه ديار و حتى ما اصرف هوواي جمعتهن بجنطه من الاشتريتهن من السوگ..
طلبت من الانترنت طبله صغيره خشب و بيها كراسي
ثنين وطلب ثاني همين زرعاات اريد احطهن بالسطح..

اليوم العصر اتصلو عليه وصلن واني مو كولش اندل العنوان دزيتلهم الموقع ديار علمتني.

ونزلت الديار كلتلها

ـــ گولي الواحد من الولد بس يدخلهن للبيت
وينطيه الفلوس حبابه.

ــ يلا اوك امشي ننزل نزلت وياها لگينه راشد گاعد على القنفات وبيده الموبايل.

ديار: راشد ابو التوصيل بالباب عفيه انطيه الفلوس

راشد: انتِ شوكت تبطلين يوميا طالبه ادري شگد عندچ فوس.

ديار: ترى هاي المره مو الي المُهره .

استحيت من باوع عليه ضحك وگام

ــ اني وحده چانت و موتتني جيبلي وحطلي نوب صارن ثنين.

ديار: راشد ترى مُهره عبالها متشاقه..

راشد: صدك مُهره؟

مُهره: لا ادري بيك تشاقه..

راشد: انتِ بس تتدخلين بيني وبينها وهي ما تزعل

ديار: ليش هو شكو بينك وبينها هي وياي بالگوه تحچي نوب وياك..

مُهره: انتِ شبيچ گلبتي عليه بسرعه..

ضحك راشد وگال

ــ هي هاي اختي مخبله...

ديار: راشد تروح لابو التوصيل لو اروح انا..

ــ بلا روحيي..

ــ لا مابيه حيل..

ــ  يلا انطيني الفلوس..

اطتهن اله وطلع، شكد حباب راشد و بس يتشاقه ويضحك عكس اخوه ياسر و رضا طول الوقت ساكت وبس يدرس مرات من نسولف يمه يحچيله كلمتين..

دخلهن للصاله ورجع جاب زرع وجع مره ثانيه دخل

ــ شني جاي تسوينلچ حديقه..

ــ هههههه لا اريد احطهن بالسطح..

ــ يعني لازم اصعدهن اني؟؟

ــ لا اني وديار نصعدهن

ديار: منو گلچ خلي هو يصعدهن.

راشد: مو اني اشتغل عند الخلفچ؟

ديار: بكيفك تخليها وحدها تصعد تقبلها على نفسك..

راشد: اي عادي

مُهره : يابه اني اصعدهن وحدي عليمن تتناگرون

راشد: صيحي ياسر يشيل وياچ.

مُهره: اخاف يرگعني اشيلهن وحدي واسكت..

ديار بهمس : وراچ ياسر

يممه وگف گلبي من حچت فات من يمنه ولا حچه شي
فد استحيت صعد الدرج وخطواته ثابته اباوع بس على رجليه من رفعت عيوني باوعت على عيونه عليه ويخزر بيه..

يابه شصار بيه متت بدمي شلت الزرعه وصعدت
من وصلت الباي الصطح هو چان واگف يفتح بالباب
طب ورگعه حيل فزيت فزه وكف گلبي..

حطيت الزرعه بالگاع ودرت لگيت ديار وراشد واكفين شايلين الطبله..

ــ مو صارلكم ساعه تتنگرون متردون تشيلون وياي
ديار: مو گتلك تصدگ

راشد: يابه نتشاقه وياچ...
ترى حچينه اني وديار كله هيچ نتناگر..

مُهره: اي ادري بيكم، عكس ياسر...

ديار: راح يجيچ باليل يكتلچ

مُهره: اسكتي ديار لا همين يجي.

ضلو يضحكون صعدن الغراض كلهم وبقينا بس اني وديار نرتب صار المكان يجنن يم شباك غرفتي حطيت الزرعات و وحده تتعلگ علگتها بالشباك وحطينه الطبله والكراسي و ديار جابت ڤازه من عدها بيها ورد وجابت نشره لونها اصفر علگناها يم الشباك يخبل طلع بالاخير فد شي..

ديار: والله طلع يجنن تعالي خلي نصور..

صورته ونشرته ستوري وسوتلي تاگ ونشرته
بصفحتي همين..

بقت شويه ديار ونزلت اني بقيت گاعده طلعت موسيقى بالتلفزيون واخذت كتبي وطلعت گعدت على الميز شويه وطلع ياسر وبيده جگاره ولابس فانيله داخليه وبجامه سوده وشعره مخربط ونازل على گصته باوع عليه تقرب يم الميز شويه وگال..

ــ منو سواه

ــ اني... سكت گلت يمكن هسه يگول حلوو او شي بس صدمني من حچه

ــ انتِ شنو عبالك هذا بيتچ تجيبين غراض وتتصرفين براحتچ...

حسيت الدموع تجمعن بعيوني وگلبي نعصر عصر وگلتله.............

يتبع🦋...

ــــــــــــــــــــــــ

لاتنسون التصويت واشتركو بقناة التلي..