رواية خيِّال ومُهرة الفصل السابع 7 - بقلم amna

«بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

صغار چنَّه وكُلشي بعيُون الصِغار يصيِّر جَنة
‏يا مَراجيح الهُوى لوحَن كَمرنه..

~~~~~~~~

«مُهره»

(قبل العرس باليله)

نظفنا البيت اني وديار وصعدت الغرفتي هلكانه الساعه بـ 9 بـ ليل كعدت على السرير جاي اتمدد و دخلت ديار..

ــ عبالچ خلصنا؟؟؟

ــ شنو غير هلكت؟ بعد شنسوي؟؟

ــ  بعد بس ملابسچ امشي تعالي ناخذهن الغرفتكم..

ــ ما اروح سويهن وحدچ...

ــ والله ولا اسويهن الا انتِ وياي..

ــ لا تسويهن بكيفچ، بالنسبه اليه ابقه بغرفتي احسنلي...

ــ اتگومين لو اصيح الماما تجيچ؟؟

گمت وگتلها

ــ وين اكو عروس هي تصفط ملابسها؟

ــ اي اكو عادي..

جرتني من ايدي وگلتلي

ــ يلا شيلي خلي نوديهن الغرفتچ الجديده..

شلتهن ورحنه وگفنه بالباب مالت بيت ياسر..

دگته هواي يلا اجه مبين چان نايم شعره مخربط ولابس تيشيرت اسود وبجامه سوده وعيونه حمر..

باوع علينه بعيونه التعبانه

ديار:  ها عريسنا اجينه نرتب غراض مُهره...

ــ تفضلو...

دخلنه البيت اثاثه يخبل الصاله اول ما ندخل بيها قنفات لونهم بيجي و شاشه چبيره ومفروش  فراش ابيض ومن الجهة الثانيه مطبخ مفتوح على الصاله و اكو بيناتهم طاوله بيضه وكراسي والكاونتر ابيض ويجنن..

الغراض البيدي وبيد ديار نحطهم بالغرفه دخلت ديار
للغرفه واني دخلت وراها..

چان ياسر گاعد على الچربايه و يباوع بالموبايل مالت
خليت الغراض بالگاع وطلعت رجعت الغرفتي اني وديار جبنه بقيت الغراض..

هو همين گام فرغ من خانات الكنتور علمود احط  بيهن ملابسي وبدينه نرتب بالاغراض والملابس كوومه...

ملابس داخليه ومال النوم وهذا لزگ ولا طلع
كملنا الملابس بقه بس المكياج والعطور..

ابو علي صاح على ديار  راحت
تركض و بقينا بس اني وياه..

بس ولا اهتميت بينتله ما مهتمه بس
بالحقيقه اتمنا اطلع من الغرفه ركض..

خلصت اخير شي من العطور وشلت الزباله الصارت لميتهن وطلعت رحت الغرفتي گعدت شويه وبعدين رحت الديار..

خطيه تعبت كلش نظفت و خابرت تعزم بالاقارب و اتفقت ويه القاعه على الاكل، رحت نمت يمها..

اني للصبح گاعده ولا نمت صارت الساعه بـ ٧ وكمت غسلت وبدلت ونزلت لگيتهم محضرين الريوگ گعدت اكل..

شويه ونزلت ديار مبدله و رحنه للصالون من 9 للـ 4 العصر يلا طلعت من الصالون متت من التعب وديار خطيه ولا عافتني كوله هي تحچي وياهم على المكياج و التسريحه...

اجه هو بسيارته و راشد بسيارته..

لزم معصم ايدي ويمشيني لان كلشي ما اشوف مغطيه وچهي..
من وصلنه للسياره فتح الباب وصعدت وديار ويه راشد والى ان وصلنا ولا كلمه حچينه..

مادري ليش احس اريد اگعد ابچي واصرخ اختنگت كلش...
من وصلنه ساعدني انزل من السياره الباب القاعه..

من دخلنه للقاعه نزعتني ديار البرگع وبقينه واكفين
منتظرين ياسر حتى نبدي بالتصوير واني ميته تعب
بالگوه واكفه..

فستاني ما منفوخ من فوگ بدون اكمام وساده وياه
چفوف واصلات الزندي..

وشعري مفتوح بس خصلتين من الجهتين شايليهن وتاج وهو شعري طويل كلش  ...

اجه ياسر والمصوره تشرحلنه شنسوي وشلون نمشي
على كيف والاغنيه مشتغله الحد منوصل للكوشه.

لزم كف ايدي ورحنه للكوشه عدناها مرتين علمود التصوير..

گعدت ياسر طلع بسرعه  واجتي يمي ديار  طالعه تجنن لابسه فستان زيتوني وفاتحه شعرها ومسويته كيرلي بالصالون سوته هو والمكياج...

ــ ولچ شنو طالعه تخبلين..

ــ وانتِ لامه شكو جمال بالعالم بوجهچ... 

ــ اگلچ ذولي منين الوادم شو ولا واحد اعرفه؟

ــ شعليچ بيهم..  تعاي گومي نركص

ــ ما اعرف اركص..

ــ اي تعاي هيچ نهوس

ــ ما اعرف اهوس..

ــ شبيچ؟؟   تعالي صفگي لو متعرفين تصفگين؟

ــ لا شمالني ما اعرف اصفگ..

ــ خوش تعالي لعد...

ــ لا ديار و الله استحي، انتِ روحي رگصي اني راح
اباوع عليچ منا، لان ما اعرف غيرچ..

ــ لا …

سحبتني بالبدايه ما گمت بعدين انتبهت الناس كلها تباوعلنه وگمت ويها وگفت بالنص والبنات داير مدايري يرگصن واني بس اصفگ و مبتسمه...

گالو اجه ياسر البنات راحو يلبسون حجاب و اني
رجعت المكاني وديار وياي و اني همين لازگتلها كل
ما تريد تروح اگللها لا ابقي يمي..

دخل ياسر يمكن اول مره اشوفه يضحك ويه مره
تهوسله و هو يصفگ ويضحك وياها بالأخير باس
راسها واجه يمي گعد..

ديار نزلت وياهم يهووسون بعدين صورنه كلنه سوه والوحدنه اني و ياسر و المصوره كل شويه تگول

ــ العريس ابتسم شويه...

شغلو موسيقى وگالت المصوره تعالو ركصو فرغت
المكان ورحنه عافني و راح  ياربِ هذا الولد شگد
ما عنده احساس صاحت عليه امه و رجعلي لزم ايدي
ورحنه للمكان..

المصوره حطت ايدي على كتفه و الثانيه بأيده وهو ايده على خصري وحطت جبهته على جبهتي اخذت كم صوره..

بدينه نتحرك واني كلشي ما اعرف هو وين يروح اروح وياه...

مادري ليش حسيت نفسي فرحانه وبنفس
الوقت خايفه هذا الشعور المحير...

ــ مُهره...

مدري ليش رجف گلبي من گال مُهره بصوت ناصي..

ــ هااا

ــ المصوره تحچي وياچ....

يممممه متت من الفشله باوعتله هو ابتسم
وبسرعه درت للمصوره..

ــ  وين چنتي صافنه؟؟؟ 

بقو يضحكون  واني من الفشله ضحكن وياهم..

ــ باعي عليه وابتسمي..

سويت الگالته ورجعت المكاني شويه وطلعنه من القاعه متت وهلكت من التعب اريد بس اوصل للبيت وانزع البدله

الطريق كله ساكتين وبره الزفه هوسه وبا لأزداحام ينزلو الولد يرگصون و لا اعرف واحد بس راشد اباوع عليهم ومبتسمه..

ــ غطي شعرچ جاي يباوعون الولد علينه..

چان اكو خصل من شعري طالعه غطيتهن بدون ما احجي..

وصلنا للبيت و همين بقو يهوسون ويرگصون
بالصاله صعدنه اني وياه و ديار وصلنا للطابق
الثالث اتمنيت اعوفهم واروح الغرفتي..

فتح الباب مال البيت ودخلنا ديار دخلتني للغرفه وراحت  بقيت گاعده شويه و هو  ما دخل للغرفه..

گمت وخرت الطرحه من شعري گامت توجعني و طلعتلي بجامه و تيشيرت  قفلت باب الغرفه اريد انزع البدله يلا اسبح نزعتها وفتحت القفل مال الغرفه وطبيت للحمام  ...

من طلعت لگيته ينزع بالساعه مالته يم الميز حطها على الميز و نزع المحابس..

اني انشف بشعري بالمنشفه و كل شويه اباوع عليه خطف حتى مينتبه عليه..

اخذت المشط و رحت للسرير أگعد امشط ولگيته
يباوع عليه اول ما شافني درت دار وجها بسرعه..

اندگ الباب و گال

ــ تفضل..

دخلت ديار بيده صينيه العشا وامه وراها

ــ يااااا ولچ ماما شلابسه وينه الابيض الشتريناه لعد؟
ديار مو گتلچ حضريه الها تلبسه...

ــ اي ماما هذا باعيه معلگته على الزاويه...

مُهر:  اي خاله اني ما لبسته وره العشا البسه..

ــ لا امي ميصير...

ياسر:  خلي ناكل هسه بعدين سولفو...

ــ اني ولا اروح الحد ما اشوف مُهره مبدله

ديار:  ماما.... شنيه خليها براحتها

گمت اخذت الروب  ورحت للحمام لبسته وطلعت...

ــ اي هسه ارتاحيت راح انزل مرتاحه... وگامت تضحك سحبت ديار و طلعت.. 

و ياسر اخذ العشا للصاله گال

ــ تعالي بالصاله ما اعرف اكل هنا..

رحت وراه اتمنا حتى ما اكل  واروح انام بس ميته من الجوع گعدت اكلت وخلصت هو شال الماعين غسلهن واني رحت للغرفه.. 

نمت بسرعه حتى ما فكرت بيه راح يجي ينام هنا اولا.

ـــــــــــــــــــــــ

«آسيا»

بدت امتحانات نص السنه واني هلكت من القرايه...

بالگوه يلا خلصت متت تعب لا اكل ولا نوم وحتى مهدي ما احچي وياه قليل..

من رجعت من اخير امتحان رحت گبل نمت لليل يلا گعدت خابرت مهدي وسولفتله على الامتحانات وشگد تعبت وهو همين يسولفلي على دوامه...

دخلت اختي للغرفه واني بسرعه ضميت الموبايل

ــ بابا يصيحلچ..

ــ اجيت..

طلعت اختي من الغرفه  ورجعت گلت المهدي

ــ راح اروح بابا يصيحلي

ــ تمام عيوني..

رحت لگيتهم كلهم گاعدين يسولفون گعدت وياهم نسولف ونضحك...

بابا:  اسيا خلصتي امتحانات موو؟؟

ــ اي بابا خلصت..

ــ خوش لعد اني راح احجز نسافر باچر.......

كلنا نصدمنه  ممحضرين نفسنه

بدينه نطلع الجنط ونحضر و صارت هوسه كل واحد يطلع ملابسه بجها..

من خلصت ونزلت اختي ومرت اخوي اتصلت على مهدي وگتله راح نسافر نجي المطار المحافظه ونروح منها..

هو كلش فرح گال حتى اجي اشوفچ..

ثاني يوم گعدنه من الصبح بدلت ومتريگت لان تلعب نفسي بالطريق..

طلعنه من البيت وره ساعتين وصلنه للمحافظه....

نزلت من السياره ونزلت جنطتي ومشيت وره بابا ولگيته واگف يم التفتيش لابس بنطرون اسود وقميص..

كولش فرحت من شفته..  ما شبعت من عنده بس اهتمامه وشوقه خلاه يجي علمود يشوفني كولش فرحني...

دخلت للمطار رسلتله رساله...

ما شفتك زين بس كولش فرحت...

جاوبني

ــ احسن من ماكو..

ــ اي طبعاً

خلصنا سوالف المطار وصعدنه بالطياره رسلتله رساله.

ــ حبيبي  الطياره راح تطير ومنگدر نحچي

أحبك هوواي وراح اشتاقلك...

ـــــــــــــــــــــــ

«روسلينا» 

رجعت من الشركه سبحت وسويتلي غدا وشغلت التلفزيونوگعدت اكل واباوع..

اندگ الباب  لبست حجابي وطلعت لگيت
بابا سلمت عليه ودخلنا...

بابا كلش اهتم بيه اخير فتره لان حس بنفسه شگد چان مقصر وياي و شگد صرت انسانه متسرعه و وحيده بسبب هذا الأهمال..

چنت مقرره اذا يصير عندي طفل راح اخليه اهم شي بحياتي راح اهتم بكل تفاصيله الممله راح انطيه حب انحرمت منه بطفولتي انطيه كلشي املكه من حنان ودفئ وكل شويه اعبرله عن حبي...

بس هسه قررت ما اجيب طفل اخاف اجيبه الهاي الدنيا و اظلمه...

الحياة كلش صعبه وراح يجي يوم يمشي الوحده بالطريق.. 

اخاف يمشي الوحده وبقرارته ويصير بيه مثلي.....

گعدنه اني وبابا سولفنه بعدين بابا گال نطلع واني وافقت..

رحت ويه بابا اشتريت لامي هديه والاختي والاخويه وبنت اخوويه....

من يجي بابا  احس اشتاقلهم بس بنفس الوقت اريد ابني حياتي صح ما اريد اتراجع ويخرب كولشي بنيته رب العالمين هواي ساعدني ونقذني  ....

بقى بابا يمي ثلاث ايام وراح الصبح طلعنه سوه اني رحت للشركه وبابا راح للمطار...

دخلت للشركه چنت لابسه بنطرون جينز  عريض و قميص ابيض مدخلته بالبنطرون و ستره سوده و حجاب ابيض...

نسيت اجيبلي قهوة  رحت القاعه التصوير گالو العارضين يبدلون نزلت جبتلي قهوه و رجعت شربت نصها وگمت نظفت الكاميرا وعدلتها 

شغلتها اريد اشوف الوضوح مال الكاميرا قربتها على عيني
شفت علي واگف مبتسم ويلوح بأيده" هلو " ابتسمت

ــ هلاو... شلونك؟

ــ هلا روسلينا الحمد لله.... شلونج؟

ــ الحمدلله....  وين گلادتي؟ اهم شي جبتها؟

ــ اي يااابه جبتها لا تخافين....  وضحك

ــ  عاشت ايدك... 

ــ وايدچ... يلا تعالي خلي نكمل تصوير حتى انطيچياها..

ــ تمام...

بدينه التصوير چان لابس هاينك وبنطرون لونهم اسود وكوت رصاصي...

بدل ثلاث  مرات ونصور بكل تبديل فد عشرين صوره..

جون: روسلينا باچر تصوير خارج الشركه..

ــ وين؟؟

ــ باليخت مالت المدير راح ناخذ الصور بالشروق لازم تجين من وقت قبل الشروق يعني ..

ــ شلون اجي هيچ وقت ما اكدر اطلع

جون:  ما اعرف المدير گالي انطيچ خبر وسويت الگالي عليه..

ــ ما أكدر اجي شوفو غير مصور...

علي:  اذا تردين اجيچ اني ونطلع سوه..

ــ مادري..

جون:  قرري وگولي للمدير

شگد صايره ما اطيق جون ابد غثه...

خلصنه التصوير وشفناهن بالكمبيوتر و طلعت من القاعه رحت للمصعد..

وأفكر باچر شسوي شلون اطلع والدنيا ظلمه؟

احسن حل اروح ويه علي وجوليت گالت تعالو عليه همين..

قاطع افكاري صوت علي..

ــ نسيتي امانتچ..

انفتح باب المصعد وصعدنه سوه..

ــ اي والله من وره جون...

ــ  ههههههه واضح عليچ تحبينه..

ــ كلش... ضحكنه وگتله

ــ  وين الگلاده؟

استغربت من فتح دگمت القميص وهو يباوع لعيوني مادري ليش رجف گلبي و گتله...

ــ شتسووي؟؟

ــ انطيچ گلادتچ....

طلع المداليه نزعها من رگبته ومد ايده ينطينياها...

ــ لبستها حتى متضيع...

مديت كف ايدي وحطها بيها و المداليه حاره كلش..

ــ شكراً..

ــ عفواً...

رجعت للبيت واني بس افكر بالموقف الصار...

ثاني يوم گعدت قبل الشروق بدلت وحضرت غراضي ونزلت لگيته واگف بالباب  رحت للسياره صعدت..

ــ السلام عليكم..

ــ  وعليكم السلام...

رحنه الجولييت و بعدين لليخت بس احنه الثلاثه محد جاي...

بدل و جولييت حطتله مكياج وانتظرنه تشرق الشمس واحنه نسولف..

الجو بااارد حيل وعلي لابس بس قميص ومفتوح

ــ بارده...

ــ لا زينه.. انتم البنات تبردون بسرعه مو نفس الولد..

ــ ها طمنتني يعني متتمرض..

ــ ليش خفتي عليه؟؟ 

ــ لا خفت على نفسي وين نروح اذا تمرضت..

ــ شگد خبيثه...

(بالنگليزي)
جوليت :  انتم شنو تحچون؟؟

علي  :  سلامتچ مانحچي شي..

بدينه نصور وطلعت الصور تخبل صورته من
خلصنه صورت المكان وچنت كولش فرحانه...

گال للسايق نرجع واني ملتهيه بالتصوير كملت حطيت الكاميرا بالجنطه و رجعت المكاني واني امشي اكو حبل بالگاع ما شفته وعثرت بيه و گعت بنص البحر...

وحتى ما اعرف اسبح حسيت بعد هاي نهايتي انگطع
النفس وعيوني حاوطها الظلام.....

ـــــــــــــــــــــــ

«مُهره»

گعدت من النوم  بقيت صافنه و اباوع للغراض والغرفه

ــ اني وين؟؟

باوعت النفسي لابسه الروب الابيض و تذكرت اني عروسه...

گمت جسمي كله خدران يمكن من التعب مال البارحه

لبست القفطان الخالتي گالتلي عليه احسن ما تجي وترزلني ولبست تراچي ذهب ورفعت شعري وخليت شويه مكياج...

رتبت الغرفه وطلعت لگيت ياسر نايم على القنفه وما
مكفيته مطلع رجليه منها و حاط ايده على عيونه..

اخذت موبايلي و لگيت ديار مراسلتني قبل ربع ساعه

ــ هلاو مُهره... گاعدين؟

ـ هلا  حبي.. اي گاعده بس ياسر نايم

ــ راح اجيب الريوگ وماما وياي..

ــ خوش...

گعدت انتظر

بعدين تذكرت ياسر نايم بالصاله واذا خالتي شافته راح تفضحني...

رحت بسرعه الياسر

ــ ياسر..... ياسر...

ــ هاا...

وخر ايده وفتح عيونه باوعلي

ــ خالتي راح تجي

ــ شتسوي

ــ يجيبون ريوگ

ــ هاا..

گام وشال مخدته ودخل للغرفه واني رتبت الصاله دقيقتين و اندگ الباب رحت فتحته ودخلت ديار حطت الاكل على ميز الطعام وخالتي وياها وعيونها تدور بالمكان..

ــ وين ياسر؟؟

ــ بالغرفه..

ــ هاا...  شلونها ليلتكم؟؟ 

استغربت من سؤالها وفظولها بقيت اباوع عليها الحد ما حچه ياسر....

ــ شسويتو ريوگ

ديار: سويتلك كلشي تحبه...

ــ عاشت ايدچ حبيبتي...

خاله: بلا تعال ياسر احاچيك شويه..

راحت هي وياه يم الباب

ديار: لا تضوجين من امي هي هيج  طبعها...

ــ لا ما ضجت بس اسغربت سؤالها كلش..

قاطعنه صوت ياسر من صاح

ــ لا تحطين نفسچ بكل سالفه....
وبعد لا تصعدين البيتي..

وحاط اصبعه السبابه بوجها ويخزر بيها اني من يمي خفت  ...

استغربت اكو واحد يصيح على امه هيچ..

هي بسرعه طلعت وصاحت

ــ دياررر.... تعالي

و ديار راحت ورها بسرعه واشرتلي باي وسدت الباب..

و ياسر راح گعد ياكل ولا يمه و اني رحت نزعت
القفطان لان اختنگت منه...

رحت گعدت تريگت وياسر گام دخل الغرفه بصف غرفتنه بس مادري شنو بيها وحتى ما دخلتلها..

غسلت الماعين ونظفت ورحت الغرفتي القديمه جبت كتب السادس وگعدت بالصاله اقره طلعت محاضرات بالتلفزيون..

فاتت يمكن ساعتين يلا طلع ياسر  لابس فانيله داخليه وبيجامه والسلسله لابسها كالعاده وحاط المداليه جوه..

صار عندي فضول اعرف شنو المداليه...
فات للغرف وسد الباب وراه.

وره شويه گمت دخلت للغرفه لگيته ماكو و صوت
الدوش مبين يسبح..

طلعت من الغرفه رحت الباب الغرفه الچان بيها لزمت اليده بالبدايه تراجعت بس فضولي ما خلاني ارجع المكاني...

فتحته و لگيت المكان عباره عن اجهزه رياضيه ما اعرف ليش عجبني شكلهم كولش وبقيت صافنه...

ــ شتسووين؟؟

ــ ما اسوي اباوع..

ــ امم

ــ عادي العب بيهن....

ــ هنا مو العاب...

ــ ترى ادري...  اجهزه رياضيه..

ــ اقصد يراد واحد يعرفلهم..

ــ اي علمني.... 

انصدمت من ردي السريع الطلع مني بدون تفكير..
هو همين بقا صافن..

ــ اقصد اني اطلع مقاطع من اليوتيوب  واتعلم..

ــ اي عادي المهم متأذين نفسچ... ابتسمت

ــ تمااام....

رجعت كملت دراسه الحد ما تعبت وبطني وجعتني من الجوع..

انتبهت اكو صوت بالمطبخ سديت الكتاب ورحت للمطبخ لگيته لابس صدريه الطبخ وحاط السماعات بأذنه ويثرم..

بقيت شويه من بعيد اباوع يثرم ويحط بالجدر على الطباخ...

تقربت اريد اشوف الجدر لان الريحه تخبل وهو فاصل حتى ما اكدر احچي وياه اسئله على الأكل شنو يسوي...

باوعت بداخل الجدر شفت دجاج و خضرواات...

درت وجهي عليه ردت احاچيه..

و دار هو بسرعه و بيده التخته رگعني بيها بأيدي..

وخر السماعات بسرعه

ــ هاي وين واگفه... 

لزمت ايدي متوجعه وباوعت عليه بخزره..

ــ هاي ابدال ما تعتذر؟؟

ــ مادري بيچ واگفه وراي الواحد يحچي يگول...

ــ واذا حچيت انته تسمع غير مخلي السماعات..

ــ يلا يابه اعتذر...

راح بسرعه للجدر يگلب بيه ومبتسم
حسيته يريد يضحك...

ــ اني جوعانه..

باوع عليه وگال

ــ نص ساعه واكمل..

هزيت راسي و رحت للثلاجه طلعت خس وطماطه وجزر غسلتهم وسويت زلاطه وهو صب ماعونين وخلاهم على الطبله واني خليت الزلاطه على الطبله واكلنه ولا حچينه كلمه طول الوقت..

گام شال ماعونه وياه غسله ودخل للغرفه واني خلصت وشلت الماعون طلع طبخه طيب كلش مسوي كبسة دجاج ...

شويه وطلع مبدل وطلع من البيت..

اني اتصلت على ديار گتلها

ــ تعالي  يمي ضايجه..

ــ جاي اقره باچر دوام وميته تعب...

ــ يا عمري...  اني قريت شويه همين..

ــ هاا...  يلا اني راح اكمل دراسه وانام بعدين نسولف..

ــ خوش گلبي...

كلش مليت واني گاعده وحدي رجعت اقره بعدين گمت دخلت للغرفه البيها اجهزه رياضيه گعدت بيها وبيدي الموبايل كل جهاز بحثت عنه وحده وعرفتلهم كلهم..

بعدين شفت البنات اليلعبون لبسين ملابس رياضه خاصه للتمارين رحت للأنستا وبحثت وطلبت ثنين بيجامات ومالتهم التيشيرت  وحذاء..

رحت للغرفه جمعت الفلوس النطونياهن
بالعرس وگلت منهم ادفع..

صارت الساعه بـ ١١ باليل واجه ياسر اني
چنت گاعده بالصاله دخل للغرفه..

اني شويه ونعست دخلت للغرفه گلت اذا اشوفه نايم اخذ فراشي وانام بالصاله..

دخلت للغرفه ماموجود مبين بالحمام  وصوت الدوش..

رحت للميز مخليه عليه مرطب خليت الوجهي..

وانتبهت الغراضه شلون مرتبهم على الميز الساعه والمحابس...

وبالجهة الثانيه السلسله الابسها دائماً لزمتها بـ أيدي
وفتح باب الحمام...

يتبع🦋.....

ـــــــــــــــــــــــ

لا تنسون التصويت واشتركو بقناة التلي