رواية خيِّال ومُهرة الفصل السادس 6 - بقلم amna

بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

ضاعن درابين العمر ‏
ما ندري نمشي بيا درب
‏چا ليش من دون الخلگ
عشنه ويه أهالينه غرب ؟

                     ♡ ـــــــــــــــــــــــ ♡

«روسلينا»

گعدت بالگوه فتحت عيوني ميته تعب باوعت بالمكان

ــ اني وين نايمه؟؟ 

نايمه بنص الصاله و بعدني بملابسي مال الحفله وحتى ما اتذكر شلون نمت گمت احس راسي ثگيييييل وجسمي كله خدران

دخلت سبحت وبدلت اليوم جمعه گعدت اتذكر اخير شي من اصور بـ علي  ....

صفنت شويه اريد اتذكر ماكو شي

تذكرت  وجه علي قريب مني واني محاوطه
بأديه رگبته ومدري شنو حچيت..

وگفت على حيلي واني اغم بروحي..

ـ ياااربي اني شمسويه؟؟

گمت ادور على موبايلي الكاميرا كلهم ماكو گلبت البيت گلاب لبست حجابي گلت يمكن واكعات مني بره..

اول ما فتحت الباب لگيت علي بوجهي
باوعت عليه  ابتسم..

ــ شكو؟؟ ليش تضحك؟؟

ــ شنو حرام اضحك..

ــ مو حرام بس … حطيت ايدي على جبهتي حكيتها وگتله....

ــ شصار البارحه؟؟   شبيه شو كلشي ما اتذكر..

ــ تعالي نروح للمقهى القريب ونحچي..

اني مصطوره و مشتهيه قهوة كلش
دخلت للشقه اخذت الجنطه مالتي و رحنه سوه..

هو كل شويه يدير عليه يباوع على وجهي ويضحك
اني حتى ضجت گلت شنو وجهي قبل شويه شفته
بالمرآيه مابيه شي شبيه هذا يضحك...

وصلنا للمقهى گعدت على الكرسي هو طلبلي قهوة
واله چاي ومن خلص باوعلي..

ــ  شكو شصاير البارحه
شبيه شنو اغمى عليه وانت رجعتني للبيت...

ــ لا....

ــ لعد شنو احجي بسرعه راح اموت وحتى موبايلي وكاميرتي ماكو...

ــ هذا الموبايل اجيت انطيچياه مد ايده خلاه على الطبله...

ــ انتَ شلتني؟؟؟

ــ ايي.. 

حطيت ايدي على حلگي مصدومه

ــ انتِ البارحه شربتي ولان سكرتي ماتذكرين شنو صار...

ــ شنوووو؟؟  شربت؟

ــ شربتي

ــ شربت شنو؟؟

ــ بيره..... 

ضحكت و گتله

ــ ترى اني ما اشرب  ... اني من عائله متدينه و اهلي
واثقين بيه ما اسوي شي غلط ومبقيني هنا..

ــ من گتيلي تعال ندور مكان نصور بيه

ــ اييي

ــ اخذتي گلاص مال البيره وشربتيه كله دفعه وحده..

بقيت صافنه عليه هذا شيحچي...

ــ شربت عصير ترى

ــ لا شربتي بيره اني واگف يمچ وشفتچ
حتى بطنچ گامت توجعچ

ــ لا..... لا  انت تشاقه وياي شربت عصير يلعب النفس.

بقه ساكت واني الدموع تجمعن بعيني 

ــ والله اني ما اشرب.. شلون سويت هيچ؟

حطيت ايدي على وچهي اغطيه من الفشله..

ــ روسلينا شنو شبيچ؟؟  مصدگ بيچ والله  ...

جابو القهوة وخرت اديه بس بقيت مدنگه راسي

ــ باعي راح انسه كلشي وحتى ما اذكر البارحه والحفله، وعد..

باوعت عليه وگتله...

ــ شسويت؟؟  احچيلي شسويت و بعدين انسه..

ضحك وگالي

ــ يمكن ما احچي احسن الچ...

باوعت عليه وگتله

ــ اريد اعرف..

ـ شربي قهوتچ وبعدين اسولفلچ ..

شربت القهوة بسرعه حتى يحچي.

ــ اول شي بطنچ كامت توجعچ واني اجيت يمچ اشوفچ شبيچ وگمتي تضحكين بصوت عااالي.. 

وكمل الحد  ما رگعت الباب بوچه واني يا گاع انشگي وبلعيني احتاريت شگول وشنو ااحچي.. 

وهو كل ما يسولف  يموت ضحك نوب يكمل...

ــ علي.... الگلاده؟

ــ  شفتها من لابستها..

ــ اليوم ما لگيتها دورت عليها البيت كله..

ــ ادورلچ السياره..

ــ شكراً..  تعبتك وياي البارحه كلش اعتذر..

ــ لا بالعكس تونست..  باوعت عليه صفح  كتله....

ــ گلتلي تنسى كلشي

ــ هاهيه اخير يوم نحچي بهذا الموضوع..

ــ تمام..  گلتله واني ابتسم

كمنا رحت للشقه قبل لا اصعد اطاني الكاميرا و شكرته ورحت للشقه نظفتها و رتبت ملابسي البارحه من رحت للحفله لعبت بيهن لعب..

سويت غدا وگعدت اكل  و اتصل عليه علي جاوبته

ــ  الو هلو  علي 

ــ  هلا روسلينا..   بس اتصلت عليچ حتى اگلچ لگيت الگلاده..

ــ ها صدگ... شكراً.. وين لگيتها

ــ بالسياره..  اخذتها للتنظيف ولگوها جوه الكشنات

ــ تمام..بقيها يمك لمن تجي للتصوير جيبها وياك

ــ تمام..

ـــــــــــــــــــــــ

«مُهره»

كل ما اتذكر اني البنيه الچانت ما عدها هم
غير تروح تگعد جوه النخله وتشوف الشروق
انقهر على وضعي هسه وقبل..

تمنيت يصير شي  ويغير هذا الوضع گاعده
بصفه واني مختنگه مرت حياتي كلها گدام
عيني تذكرت امي وابوي اشتاقيتلهم اتذكرت
ايامي الچنت طايره بيهن مثل العصفور الحُر
وهسه حطوه بقفص ...

حسيت الدموع تجمعن بعيني  وفززني صوت ام ياسر
اجتي يمنه تقربت وهي شايله الذهب خلته على الطبله
وهي تهلهل...

گام ياسر وگف وامه اشرتلي اگوم

گمت واني احس جسمي ثگيل و ما عندي طاقه..

مدنگه راسي ولا رفعته  اباوع على ايده من اخذ العلبه
مالت الحلقه من على الميز فتحها وطلع الحلقه

ـ اطيني ايدچ  ..

رفعت ايدي اريد اخفي رجفتي ما گدرت

لزم چف ايدي بطراف اصابعه ودخل الحلقه باصبعي.. وصوت الهلاهل يعلى اكثر..

اطتني ديار العلبه مال الحلقه اخذتها منها فتحتها واغلط واسب برجفتي و احس بيه يباوع على اديه...

رفعت عيني اول مره لابس قميص وستره رصاصي وبنطرون نفس لون الستره..

من رفعت عيني اله لگيته يباوع عليه رفعلي ايده و اني ايدي ترجف اريد الحقله احطها با اصبعه ماكدرت..

لزم اصابعي البيهن الحلقه ودخلها  باصبعه..

باوعت الوچه مستغربه من حركته بس مبين
مستعجل يريد بس يطلع..

اخذ العلبه الچبيره وطلع سوار لبسنياه وره 5 دقايق يلا عرف يسده واني حتى ما اتنفس من گد ما مرتبكه..

بعدين اخذ الگلاده واني اباوع عليه واسئل نفسي صدگ حيلبسني  يااا ذولي شبيهم ممصدگين جايبين ذهب..

درت وهو حط الگلاده على رگبتي تصنمت بمكاني

ديار: مُهره وخري شعرچ..

وخرته على جها و احس باصابعه كل شويه تطخ بشرتي.. 

مرت دقيقتين وهو بعده واني گلبي گام يوجعني
والفتحه مال ظهري چبيره كلش
غلطت على ديار بگلبي كله من وراها..

اخير شي حسيت انفاسه على رگبتي ياربي هذا شجاي يسوي..

مُهره:  ديار تعالي سويها  ..

هو عافها بسرعه وگعت الگلاده ولزمتها..

ــ گتلچ ديار انتِ لبسيها من البدايه ما اعرف

اجتي  ديار تركض لبستني ورجعت ليوره و هو طلع امه گلتله اكلو كيك گللها ما اريد..

شويه شويه الناس راحت واني متت تعب

ــ ديار اريد اصعد الغرفتي

ــ اوك قلبي 5 دقايق و نصعد

ــ تمام

انتظرها شويه و دخل عمو اجه باسني براسي 

ــ الف مبروك حبيبتي شايفه الخير ان شاء الله..

ــ الله يبارك بيك عمو..

دخل وراه ياسر راد يصعد فوگ

ديار:  ياسر حباب صعد وياك مُهره گلتلي صعديني
بس البيت هوسه ما اكدر اعوفه..

باوعتلها فاتحه حلگي شكد حقيره متعمده هيچ تسوي..

ــ شنو اصعدها يعني؟؟

ــ يعني ساعدها خاف توگع من وره الفستان..

عفتها ومشيت رحت للدرج

ــ لا اني اصعد وحدي ميحتاج...

صعدت والدمعه بطرف عيني من وره ديار شلون
تسوي هيچ..

حسيت بخطواته وراي يمشي وتذكرت فتحت الظهر
خرب يومچ ديار...

دست على طرف الفستان وردت اوكع ومنا الكعب
وصلت للطابق الثاني  نزعت الحذاء لزمت بيدي اريد
بس اوصل للغرفه..

چان هو اخير بايات الدرج مالت الطابق الثاني واني بأول بايه مالت الطابق الثالث  رفعت فستاني والفتحه مبينه صعدت اول بايه..

وباوعتله يباوع على رجليه بسرعه عفت الفستان..

وصعدت بسرعه عثرت عشر مرات وصلت الباب السطح اليده مالته كلش قويه بالگوه تنفتح

افتح بيه ومينفتح وصل هو شافني ايدي ترجف
وافتح و ميصير..

ــ بلا وخري..

وخرت فتحه وبسرعه فتت ودخلت الغرفتي گعدت وره الباب بالگاع وبچيت بصوت عالي ما حسيت بنفسي
انهاريت بالبچي كلش گلبي يوجعني..

گمت واني ابچي نزعت الفستان والذهب و بقيته
على الميز  ودخلت للحمام سبحت وحطيت راسي
على المخده والافكار كلها رجعت العقلي اريد بس اغفى ماكو..

مرت ساعتين واني نفس الشي گمت لبست ستره
لان الجو بارد كلش و اني هسه سابحه ولابسه ثوب
قصير طلعت من الغرفه الاضويه طافيه شغلتهم وگعدت اباوع للقمر والنجوم الجو يجنن گمت رحت جبت موبايلي ورجعت بنفس المكان..

شغلت اغنيه وجهك مثل ضي الگمر كلش احب
صوت هذا المطرب و اغانيه... 

شويه وطلع ياسر باوع عليه كل مره من يشوفني
بالسطح ميدخله..

اجه گعد على الكرسي الثاني،  خلصت الاغنيه لزمت
موبايلي طفيته وشلته ردت اكوم وگال..

ــ خلي نحچي شويه..

باوعت عليه وهزيت راسي

ــ ابوي يريد اسبوع و نتزوج بس علمود نثبت
الخوالچ انتِ مرتي..

بقيت ساكه وهو همين ساكت شويه و گال..

ــ خلي نتزوج وانتِ ابقي هنا الحد ما تتخرجين و
تعتمدين على نفسچ و وراها نتطلگ..
هذا احسن حل الچ..

ــ بس احنه ثنينه واحد ميطيق الثاني شلون نتزوج؟؟

ــ بس شكليات گدام ابوي..

ــ يعني نچذب عليهم؟

ــ غير هذا الحل ماكو.

گمت دخلت للغرفه و اني روحي طالعه كلش عصبت عنده عادي وبكل برود يكولها...

فريت الغرفه فر اروح منا و اروح منا سمعت صوته من الشباك  يحچي رحت تقربت للشباك لگيت ديار گاعده بنفس المكان الچنت گاعده بيه اني سمعتها تگوله

ــ شفتها شلون طالعه تخبل؟

هز  راسه بـ أي  بلا ما يحچي

ــ الفستان يخبل عليها اني رحت جبته..

ــ ما عرفتي تجيبين واحد مستور شويه؟

ــ ترى يخبل عليها....

ــ اني  گايل مو حلوو؟ 

بس كلش فضيحه ظهرها كله طالع والفتحه رجليها
كلهن طالعات واجه ابوج وشافها هيچ.

ــ اي شنو يعني مو حرام... و بعدين انته شنو تغار؟

ــ ديار مالي خلگ تفاهتچ

ــ ترى الغيره مو تفاها....

ــ ديار نزلي نامي...

ــ لا اني اجيت علمود مُهره..

ــ روحيلها..

اني بسرعه وخرت من الشباك گعدت على السرير و
سويت نفسي العب بالموبايل فتحت الباب ودخلت..

ــ يمه هلا بالعروس الحلوه..

ــ ديار ديري بالچ تحچين وياي ترى والله كلش
مقهوره من عندچ..

ــ هااا شكو شبيچ

ــ يعني متعرفين شبيه؟؟ 

اجتي گعدت يمي مستغربه..

ــ والله صدك تحچين اني زعلتچ؟؟

ــ اي والله.... شلون تگولين الياسر صعدها وياك؟؟

ــ ليش واذا غير زوجچ عادي يساعدچ..

ــ ديار انتِ تدرين كلش زين اني استحي من عنده
وگتلچ انتِ صعديني وانتِ رحتي گلتيله..

ــ والله مادري بس ردت اوخر الحزازيه البيناتكم..

ــ وشنو اذا صعدني راح نصير دهن ودبس

ــ يلا اعتذر تعالي ابوسچ... اجتي باستني

ــ بس بعد لا تعيديها

ــ التوبه.... يلا تعالي نشوف الصور

گعدنه نگلب بالصور وكل ما تطلع وحده تسولفلي عليها خالاتها وعماتها و بناتهم..

طلعت صوره من يلبس بيه الگلاده بقيت صافنه هيچ چان قريب من عندي اني واگفه ولازمه شعري من الجها الثانيه وهو واگف كولش قريب شويه ويطخني ولازم بـ أطراف اصابعه الگلاده ومركز بيها...

ــ شوفي شلون متقرب منچ...

ــ والله چنت خايفه هنا..

ــ اي بس حلووو

ــ شنو الحلو گلبي وگف من الخوف...

گلبت الصوره احلى صوره هاي من لبسني الحلقه لازم كف ايدي و بيده الثانيه الحلقه و يباوع عليه واني اباوع على ادينه شگد حبيتها..

ــ دزيلي الصور كلهن..

ــ اي طبعآ هسه ارسلهن..

بقينه گاعدين الصلاة الصبح نزلت ديار واني صليت ونمت ميته تعب..

ـــــــــــــــــــــــ

«آسيا»

مر شهر واحنه انحضر الغراض مالتنه علمود ننتقل للبيت الجديد بـ بغداد كلش تعبنه وحتى مهدي احچي وياه قليل وهو يوميا يزعل من عندي لان ما اتصل به..

نقلني بابا للمدرسه بـ بغداد و بيت اخوي بابا ما قبل يبقون هنا گللهم تجون ويانه و بيوم الرحنه البغداد اتصلت بـ مهدي..

ــ مهدي احنه نطلع هسه

ــ ليش هيچ اسيا هسه يلا حچيتي

ــ والله ما لحگت لو تشوف بيتنه شلون خبصه

ــ ديلا بيباي..

قطع الخط واني گعدت ابچي الحد ما سمعت بابا يگول يلا اخذت موبايلي ونزلت..

صعدت بالسياره چانت الگراج و اخويه فتح الباب و طلعنا..
  اول ما طلعت السياره نتبهت المهدي واگف على جها و يباوع عليه بقت عيني عليه الى ان مشت السياره وعبرناه عبالك عفت گلبي يمه ورحت ...

متت قهر ردت ارجع ابچي بس يحسون بيه اخواني.

محمد اخويه گاعد بصفي وبصفه اختي ومرت اخووي
وامي بالصدر و بابا يسوق..

وصلنا بابا جابلنه غدا تغدينا وفتريت بالبيت يخبل وجديد بابا گالي على غرفتي وجايبلي بيها غرفه تركيا بيضه كلش حلوه..

صارت الدنيا ليل واحنه نرتب ونعزل الساعه بـ 11 گلت الامي اريد انام..

صعت رحت للموبايل اتصلت عليه ما جاوب اتصلت عليه مره ثانيه و اول ما سمعت صوته متت بچي..

ــ شبيچ اسيا ليش تبچين؟؟

ــ لا تزعل عليه ترى والله اموت قهر كلش اتعب من تزعل عليه

ــ يابه ما زعلان هسه على هاي تبچين..

ــ زعلت اول ما رحنه..

ــ اي زعلت لان ردت اشوفچ  قبل لا ترحين..

ــ اني همين ردت اشوفك بس چان وضع بيتنه كلش مخربط،  حتى ما گدرت اگلك والله..

ــ اجيت ركض لمن گتيلي حتى ما بدلت..

ــ همزين اجيت...  بالبدايه ردت ابچي بعدين فرحت..

ــ ههههههه...  و الله اخذتي گلبي ورحتي..

ــ يمكن اول مره احس بهذا الاحساس ودعت اغلى ما املك بحياتي..

ــ يلا ان شاءالله بس اجي البغداد اشوفچ...

بقينا نحچي وغفيت من التعب وهو يسولفلي
گعدت الصبح لگيته الخط مفتوح بعده حطيت الموبايل على اذاني ماكو صوت يمكن نايم..
سديت الخط و كتبتله...

انا بخير مُنذ اول يوم وجدتك بهِ مُنذ أول ساعة
حديث بيننا ومُنذ أول احبك قد قلتها لي...

نزلت لگيت عمتي وبناتها يمنه صارلنه شكد مملتقين كولش تونسا وسولفتلهم على مهدي وشوفتهم صورته همين دزلياها قبل اسبوع...

خلصت العطله وبده الدوام كوولش تعب ارجع من المدرسه أگعد ادرس و وراها نحچي شويه اني ومهدي

وانام ضعفت كوولش لان حتى اكلي قليل..

وبيوم طلعت من المدرسه ارجع مشي لان بيتنه مو كلش بعيد...

اول ما طلعت لگيت مهدي بالباب منتظرني ولابس قميص اسود وبنطرون ابيض و شعره طولان وسمنان شويه...

اول ما شفته نرسمت ابتسامه على وجهي ورحتله بس ما تقربت كلش كام يمشي گدامي واني امشي واباوع الجسمه ولبسه مرات ما اصدك الشخص نفس الـ 24 ساعه نسولف هذا نفسه...

ــ شلونچ؟؟

ــ زينه..  اريد اشوفك شنو نبقى نمشي هيچ..

دار بسرعه عليه وحط عينه بعيني

ــ اگلچ انتِ يوميا تداومين بهاي الصدريه؟؟

باوعت على روحي و گتله

ــ أي… شبيها؟؟

ــ ضيگه كلش لو تلبسين فوگها شي لو متلبسينها

ــ خوش… ليش ضايج؟؟ 

ــ ما ضايج بس ضجت من شفت الولد بالباب مال
المدرسه وانتِ لابسه ضيق..

ــ اسفه...  بس لا ضوج خليني فرحانه بشوفتك..

ــ يااا گلبي عيوني مشتاگه الشوفتچ كلش..

ــ اني همين...

وگف يم محل مال عصير اشترالي و اشتره النفسه وانطانياه واني كلش فرحانه احس اخيراً شفته مشتاقتله كولش...

ــ باقي بغداد؟؟

ــ باچر بليل ارجع...

ــ ها ان شاء الله...

ــ باچر اجيچ من الصبح نروح للمدرسه سوه..

ــ اوك راح انتظرك..  بس شلون ندليت مدرستي؟؟

ــ انتِ دليتيني ذاك اليوم على بيتكم والأعداديه الوحيده الهنا بس هاي واجيت انتظرچ

ــ هاا...

وصلنا للبيت لگيت عمتي همين عدنه گعدت ويه البنات وهو اتصل عليه 4 مرات بعدين دزلي رساله

ــ اريد تسمعين هاي الاغنيه..

ــ يمي هوسه من اصعد فوگ اسمعها..

ــ لا گومي سمعيها هي بسرعه تخلص...

عفتهم وصعدت اول ما رحت للغرفه اجت وراي زهراء بت عمي وگامت تسولف وياي  شويه وگمت دخلت للحمام وشغلتها حتى ما ركزت بكلماتها كلش
بس چان اسمها (هي الروح)

دزيتله رساله
كلماتها شگد مُعبره..

وسديت الموبايل وگعدت يم البنات لليل يلا راحو
رحت اقره بالگوه لحگت اخلص

نمت وگعدت من الصبح بدلت ولبست غير صدريه و حطيت شويه حمره لخدودي وحلگي وعدلت شالي

وطلعت بسرعه لگيته واگف بالركن رحتله سلمت عليه وگام يسولفلي على الجامعه وشلون مشلوع گلبه بالدوام....

واني اباوع عليه بتركيز اريد اشبع منه...

من وصلت قريب على المدرسه گالي

ــ يلاا روحي دخلي...

باوعت لعيونه وگلتله

ــ ترى اني كلش احبك لا تنسى.. ابتسم و رد

ــ اني انسه...  الله يطيح حظي اذا نسيت... احبچ كووومه..

دخلت للمدرسه والدمعه بطرف عيني راح يرجع كلش انقهر من احسه بعيد عني..

ـــــــــــــــــــــــ

«مُهره»

گعدت الوقت متأخر و راسي يوجعني كلش و
جسمي متكسر بقيت نايمه بالفراش الحد ما ندگ
باب غرفتي و دخلت ام علي..

ــ لچ مُهره گوومي صُدگ تحچين بعدچ نايمه؟؟

ــ ها خاله شكو..

ــ غير نروح للسوگ نحضر الجهاز مالتچ وين انلحگ ورانه كومه شغل.... يلا... يلا گومي بسرعه بدلي خلي نروح...

ــ ما اريد جهاز عليمن غراضي كلهن جديدات الشتريناهم

ــ لا حبيبتي وين اكو عروس ما عدها جهاز... اني راح انزل وربع سااعه وتجين اوك... انتظرچ...

گمت والدنيا طالعه من عيني بدلت و لبست شال
جاي احط مسكاره واتصلت عليه خالتي...

ــ الوووو...  ها خاله اجيت كملت..

ــ اوك... وياچ روحي الياسر گليله تعال وصلنا..

ــ لا خاله اني ما اروحله استحي، اتصلي عليه احسن..

ــ ولچ هو زوجچ شنو تستحين بعد اسبوع وتنامين بحضنه...  بطلي سوالف المستحه...

حچت هيج وسدته ياااا هاي شبيها المره
استخفت كلش بقيت محتاره شلون اروحله..

خليت عطر وطلعت من الغرفه وگفت بالباب مالت بيته...

دگيته على كيف وادعي ياربِ ميسمع يااارب...

وفتح الباب شلون سمع مادري اني بالگوه وسمعت
لابس بنطرون بلعت ريگي ودنگت ما اريد اباوع عليه
وهو ملابس تيشيرت  وگلت..

ــ خالتي تگول تعال وصلنه..

ــ وين؟؟ 

ــ للسوگ...

ــ هسه اجيت...

نزلت بسرعه رحت الديار لكيتها نايمه عفتها ونزلت رحت گعدت يم خالتي وهو شويه ونزل گال وهو يطلع..

ــ يلا....

گامت خالتي ورحت وراها صعدت وره وگلتلي صعدي بالصدر.. گلت بهمس

ــ  اسغفر الله...

صعدت ودرت وجهي على الجامه ولا حچيت كلمه وخالتي ولا سكتت دقيقه نروح هنا ونروح هنا وهذا المكان بيه اشياء ماركه وهذا......

سطرتني...

وصلنا للكراده و ياسر بقه بالسياره رحنه للمحلات واني شتگولي حلو اگللها اي دخلنه يمكن 20 محل و رجعنه الياسر..

ــ ياسر اخذنه الشارع فلسطين خلي نتغدا وبعدين نرجع نكمل....

ياسر بس هز راسه بـ أي

جابلنه لفات للسياره و بيبسي اني ما اكلت لان استحي و اني من الصبح مماكله ومتت جوع...

اكلت لفتها ورجعنه نزلنا اشترت نص المحلات متت وهلكت من التعب احس راسي موتني...

رجعنه للبيت و اني الدنيا تفتر بيه رجعت راسي على
الكشن مالت السياره وغمضت عيوني اريد بس شويه
تروح الدوخه...

الحد ما وصلنه نزلت وياي شكم علاگه ودخلت للبيت
لگيت ديار بالمطبخ تغسل اماعين...

گعدت على الكرسي يمها بالمطبخ

ــ هاا قلبي الله يساعدچ...  شنو شتريتي؟؟

ــ گولي شنو مشترينه..

ــ هههه والله صاير وجهچ اصفر مبينه ماما موتچ من التعب..

ــ خليها سكته...

دخلو شايلين العلاليگ  كومه

خالتي:  مُهره قلبي صعدي وياچ خليهن بغرفتچ بعدين نوديهن البيت ياسر اوك اوك؟ 

هزيت راسي موافقه و گمت شلت كم علاگه
خالتي انطت الياسر همين گلتله..

ــ وديهن وياها

ما حچه اخذهن وصعد قبلي واني لعبت نفسي و الدنيا تفتر بيه من اباوع على الدرج احس بيه يتحرك..

بالگوه خلصت الدرج و هو فتح باب السطح و اني مشيت وراه للغرفه من و ضل الباب الغرفه بقه واگف و اني هنا گمت ما اشوف شمرت العلاليگ بالگاع ولزمت ايده و دنگت..

ــ شبيچ مُهره؟؟

بس اسمع صوته وما اشوف شي

ــ دخت..... ما جاي اشوف شي...

وبعد ما حسيت على اي شي...

من گعدت لگيت ديار بصفي باوعت للمكان اني بالمستشفى..

ــ ها ولچ خلستيني والعباس وگف گلبي من شفتچ مغمى عليچ..

ــ امچ ما عدها يمه ارحميني من الوحده الظهر للـ 9 باليل...

ــ غير انتِ ليش ما اكلتي يعني اكو واحد يومين مماكل..

ــ شنو شصار شگلولكم؟؟

ــ گالو هبوط لان صارلچ يومين مماكله.. وطلع عندچ فقر دم..

ــ هاا..  ومنو جابني؟؟

ــ لو شايفه شصار يمه متت والعباس من شفتچ..

وره ما صعدتو بشويه نزل ياسر يركض وشايلچ
اباوع الأيدچ شلون تتحرك بالهوه واني گمت اعيط..

ــ يااااسر شبيها؟؟؟؟ شبيها؟؟؟

ــ اغمى عليها، بسرعه لبسي وتعاي وراي اذا تأخرتي
اعوفچ واروح..

واني ركض لبست بشت وحجاب و اجيت وياچ  من وصلنا للمستشفى شالچ و وداچ للاسعاف، وهما جابوچ هنا وصار ساعتين نايمه...

ــ يااا ساعتين؟؟  شو عبالك بسرعه نمت وگعدت..

ــ تدرين متت من ياسر گالي گلتيله گمت ما اشوف..

ــ اي والله ما اشوف و نوب چلبت بـ ياسر..

طلعنا الساعه بـ 12 باليل وبعدني احس بدووخه قوويه كلش لازمتني ديار وصلنا للسياره وفتحتلي الباب ديار و صعدت..

مشت السياره شويه و وگفت السياره نزل ياسر ربع ساعه ورجع..

وصلنه للبيت لگينه عمو منتظرني هو وخاله سلمت عليهم وصعدتني ديار رحت للغرفه لگيت العلاليگ مخلينهن بالغرفه گعدت على السرير وديار طلعتلي ملابس و بدلتلي و الكانيوله بـ أيدي بعدها...

تمددت واندگ الباب راحت ديار شويه و رجعت بيدها علاگه..

ــ عيني جايبلچ زوجچ اكل و يگول تاكلينه كله يلا تنامين..

ــ نرى ما اشتهي..  خليها الصبح اكل..

ــ عبالچ بكيفچ؟؟  اجتي گعدت يمي وخلت العلاگ

ــ يلا گعدي بسرررعه...  گعدت واني اضحك

اكلت چان الاكل مشاوي تكا ومعلاگ بس شنو كلش طيبات...

ــ يلا اكلي خلي اروح اطمن روجچ اگوله زوجتك اكلت.  ارتاح و نام رغد..

ــ شنو صرتي خالتي شبيچ زوجچ وو زوجچ شكو شبيكم؟

ــ غير هو زوجچ..

ــ لا خطيبي بعدنه ممزوجين..

ــ بس عاقدين شرعاً هو زوجچ..

من تگول زوجچ تعووج بحلگها

ــ زين احچي بدون متعوجين حلگچ..

ضحكنا و ديار نامت يمي و لا عافتني لازمه ايد وكل شويه تبوسني..

گعدنه الصبح ديار جابتلي ريوگ اكلنا اني وياها وبعدين خليت  المغذي الثاني حطتلياه ديار ومن خلص گالت

ــ اخاف اوخر الكانيوله راح اصيح الياسر..

ــ شبيچ ميرادلها شي...

ــ تدرين بيه اخاف من الدم، راح اصيح الياسر هو يشلعها شبيچ..

ــ يلا بكيفچ

راحت صاحتله واجه وياها و گالب خلقته كالعده ولابس قميص مامدگم وجواه فانيله و سلسله ضام المداليه جوه الفانيله..

واني لابسه بيجامه والقميص مالتها لونهم  وردي  وظافره شعري وحاطه الظفيره صفح ومنزل گذله..

تقرب عليه لزم كفي وشلع الاسق انشاغت روحي

ــ اخخخ..

وهو ولا يمه ضغط على مكان الابره و سحبها بقى ضاغط عليها

ــ ديار تعالي ابقي لازمتها...

لزمتها ديار وهو طلع بسرعه

ــ اسم الله.... گتلچ شلعيها انتِ المن صحتيله؟؟

ــ شبيچ غير اخاف.. وبعدين شنو وجعچ؟؟

ــ عبالك مو بشر.. اگوول اخخخ حتى ما باوعلي..

ــ مُهره  ترى چان يتعارك ويه بابا اعذريه..

سكتت ما حچيت

مرت يومين و نزلت وخالتي مخبوصه خبص للعرس وگالتلي

ــ تعالي اكلي علمود ترحين انتِ وديار للبدلات يوصلكم راشد..
رحت اكلت ما اريد يصير بيه نفس ذاك اليوم..

العرس حيصير بقاعه بدون حنه يعني بس بدله العرس نأجر ونروح للصالون نحجز يمه..

رحت بدلت و طلعنه بقينه للعصر يلا رجعنه بس تونست لان وياي ديار افترينه ورحنه مطعم و راشد بس يتشاقه ويضحك...

رحت حفيت و ما قبلت يصبغون شعري اني اريده يبقى اسود احبه و امي چانت تگلي احلى شي بيچ شعرچ...

مرت اليومين بخبصبه نركض ركض الى ان اجه يوم العرس......

يتبع🦋........

ـــــــــــــــــــــــ

لا تنسون التصويت واشتركو بقناة التلي 🎀