رواية خيِّال ومُهرة الفصل السابع والعشرون 27 - بقلم amna

بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

ــــــــــــــــــــــ

‏لا يعود الإنسان بعدما أحب من قلبه
لا يعود كاملًا كما كان،لا يعود قلبه على مايرام
ولا حتى أيامه القادمة ولا أوقاته التي يعيشها
بخلوة مع نفسه سيتذكر كل شيء حتى
وإن أظهر النسيان سيبكي كثيرًا
سيُصبح ضحية أمام الذكريات
كل شيء لن يعود كما كان بعد أن تحب
لأن الذي بيسار صدرك لم يعد لك.

                 ♡ـــــــــــــــــــــــ ♡

«مُهره»

رحنه للسياره گتله على المكان مال البيت وطول الطريق اني مختنگه وحاصرتني البچيه بس گاعده اكابر وما ابين..

ــ بهذا الفرع...

اول ما دخلنه للفرع انتبهت للشارع نااس كومه واگفه وكل واحد متگدر السياره تدخل نزلنه من السياره

ياسر: شكو عمي؟

ــ محترگ بيت روح من غير شارع لان سيارة الأطفاء ساده الشارع...

مُهره: بيت منو؟؟

ــ بيت رضا.....

هنا حسيت گلبي راد يوگف واخذتني ذاكرتي اليوم احترگ بيت اهلي و من شفت تابوت امي وابوي بالگاع والبيت محترگ..

فتحت باب السيار ركضت اوخر بالناس وامشي ودموعي تنزل من وصلت لگيت البيت كله محترگ بس ماكو نار مطفيها گعدت بالگاع..

ــ يااربِ ما بقالي بهاااااي الدنيااااا غيرهم يااارب..

حسيت برجلين شخص واگف گدامي رفعت راسي..

ــ گومي مُهره...

ــ رضااا.... وين عمه وين افنان؟؟

ــ مابيهم شي كلهم طلعتهم من البيت بس گومي...

گمت واني امسح دموعي وابتسامتي ملت وجهي..

ــ يعني ما بيهم شي؟

ــ اي والله.. ما بيهم شي.. يلا تعاي..

ــ وين نروح؟؟

ــ البيت اهلچ بين ما ارجع البيت نفس قبل..

مشيت وراه وشفت ياسر اول ما شافني گال..

ــ هاا مُهره بس لا بيهم شي؟

رضا:  لا طلعتهم من البيت قبل لا ابوك العار يحرگه..

بقه صافن عليه ياسر اني گتله..

ــ هذا رضا...

ياسر: شلون عرفت ابوي؟؟

مُهره:  خليت كاميرا بالمكتب مالته يعني كلشي يريد يسويه نعرفه...

رضا: ودخلت على التسجيل بالوقت الضايع لو متأخر شويه چان احنه ميتين هسه...

مُهره:  الحمدلله..

حسيت ياسر خجلان من تصرف ابوه وميعرف شنو يگول..

رضا:  خويه لا تضوج انته شعليك بـ باقر العار تعودنه على دگاته الناقصه..

ياسر:  هسه وينها خالتي؟

ــ بالسياره..

ــ الحمدلله على السلامة...
اني رايح اذا تحتاجون شي لا تترددون..

ــ ان شاءالله..
عافنه وراح واني رحت ويه رضا للسياره لگيت عمه تبچي وافنان گاعده تسكت بيها دخلت للسياره..

ــ ها عمه الحمدلله على السلامه..

ــ الله يسلمج يانظر عيني..

ــ ليش بچين؟

ــ خايفه عمه هذا باقر ما يسكت ولا يعوفنه خايفه على رضا وافنان وعليچ شلون بينه...

ــ عمه ما يطول يدخل للسجن ونبهذله..

ــ وداعتچ يطلع مثل الشعره من العجين..

رضا:  يمه كافي هسه احنه مابينه شي الحمدلله عدت على خير...

رحنه للبيت چان الطريق طويل شويه واني هلكانه من التعب وما ماكله اي شي..

من وصلنه للبيت باوعت عليه والضحكه ملت روحي شگد مشتاقه الكل ركن وكل زاويه بالبيت فتحت الباب ونزلت و عيني تتنقل بـ المكان وصلنه للبيت وشفت رضا دگ الباب..

ــ اكو واحد بالبيت..

ــ اي ياسر وعلي هنا..

فتح الباب علي وتفاجأ من شافنه حچيت اني..

ــ شلونك علي...

ــ هلا مُهره.. الحمدلله..

ابتعد عن الباب وتفاجأت بالبيت شلون وصخ وكله تراب وحتى فارشين بالأرض فراش عباره عن طبع مال احذيه..

ــ علي هاي عمتي ام رضا وهاي افنان ورضا اولادها.. 

علي تقرب من عمتي باسها وهي گامت تبچي وضمته و حسيت بيه هو همين عيونه دمعت..

اجت يمي افنان وحچت وياي بهمس..

ــ خايبه منين هذا الصاك..

ابتسمت وگتلها...

ــ ميفيدچ خاطب..

ــ حرامات عبالي راح اعيش قصة حب وياه...

ــ خيالچ واسع...

ــ كلش..

رضا:  شنو تحچن؟

مُهره:  خلي افنان تسولفلك...

افنان:  اگول اخوي رضا يخبل...

ضحكت بصوت عالي..

ــ ادري بيچ چذابه بس مالي خلگ احچي وياچ...

ضحكنه وبدينه انظف اني ورضا وعلي وافنان وعمتي
راحت للمطبخ تنظف بيه...

شلت الفراش كله وجبت صونده ارش مي وعلي ورضا لازمين ماسحه وينشفون بيها و افنان اخذت جنط الملابس ودتهن بالغرف ورتبتهن...

علي:  عذرونه بس حتى ما نلحگ انظف..

مُهره:  شعجب ياسر عايف المكان وصخ..

رضا:  يمكن مشغول..

مُهره: هو كلش نظيف..

علي:  واني شنو وصخ؟؟

مُهره:  مادري ما شايفه بيتك...

علي:  اني وياسر نفس الشي بينه هوس مال نظافه..

مُهره:  چا شمالكم البيت معفن...

علي:  احصان گنالچ عدنه شغل...

رضا بقه صافن على كلمة احصان واني بيدي الصونده مال المي رشيت عليهم وگلت..

ــ مسحو عدل...

علي:  ايااااا حصاااان نگعتيني...

رضا: عود ليش يگلچ احصان؟

مُهره:  اهوووووووووو...

علي:  هي شسمها..

رضا:  مُهره...

علي:  اي المُهره شنو غير احصان...

وگعت الماسحه من ايد رضا وگعد بالگاع وهي مبلله ومات من الضحك وعلي يضحك وياه اجتي افنان صفنت عليهم وگالت...

ــ عليمن يضحكون...

ــ مخبلين.. روحي كملي شغل..

ــ خوش بس اعصابچ...

ــ هذا ما يسكت بعد راح اصيح العمتي..
عمممممه تعااااي الرضاااا...

اجتي عمه تباوع عليهم وتضحك...

ــ يااا شمالك رضااا..

علي:  خليه يضحك خاله شتردين منه

ام رضا:  عليمن يضحك..

مُهره:  عليه..

ام رضا:  يااا ولك شمالك تضحك عليها؟

علي:  چا خليه يضحك عليها...

مُهره:  يااااربِ هذا الولد شگد غثه...

شلت الماسحه وگلتلهم..

ــ روحو طلعووووو برره اني انظف مووتوني.. 

طلعو بره واني كملت تنظيف و رحت يم عمه سوينه عشا لان ميته من الجوع حطينه الاكل بالصاله وشغلنه الصوبه لان البيت بارد حيل طلعت بره اصيح الـ علي ورضا اول ما طلعت لگيتهم گاعدين و وياهم ياسر..

ــ تاكلون ويانه؟؟

علي:  اي والله جوعاان..

مُهره: يلا تعالو جاي ناكل بالصاله..

اجو كلهم وگعدنه نتعشه ونسولف ونضحك واكثر واحد چان فرحان بينه عمتي بحيث الأبتسامه ما راحت منها وكل شويه تبوس ياسر وعلي..

رضا:  شنيه يمه حتى طلع حب بوجههم من گد البوس..

عمه:  ههههههه..  خايب شمالك غير ولد اختي...

رضا: چا اني ابنچ ولا مره بايستني...

افنان:  حتى اني...

ياسر:  وهسه انتم تغارون؟؟

رضا:  اي نغار ولو تعودنه من اجت مُهره گامت ما تگلبنه...

عمه:  يااااا ولك انته فد واحد...

استمرو بالضحك والسوالف...
اني حسيت كلش تعبت رحت للغرقه ونمت بحيث اول ما حطيت راسي على المخده نمت بسرعه..

گعدت شبعانه نوم باوعت للساعه 5 ونص بعدها الشمس ما طالعه..

گمت باوعت على ملابسي لابسه ثوب طويل واكمامه نص حطيت شال على شعري بدون ما الفه وشعري مفتوح...

طلعت بره چان الجو كلش بارد ابتسمت واني اتذكر الأيام الچانت هذا الشي الوحيده الأحبه بيومي شلت شالي بـ ايدي حتى شعري يطير واني اركض  ...

الى ان وصلت للنخله گعدت واني اتنفس بصعوبه ابتسمت نمت بالگاع غمضت عيوني وشعور حلو يحاوطني...

ــ بعدچ تحبين هاي النخله...

فتحت عيني واني مصدومه اتلفت بالمكان ماكو اي احد...

سمعت صوت بابا چان صوته گمت على حيلي ادور وادموعي تنزل...

رجعت ركضت واتلفت بكل مكان...

ــ معقوله كل هذا خيال...

رجعت گعدت يم النخله ضميت رجليه الصدري ومتت من البچي شرقت الشمس واني بعدني بنفس المكان.. 
بقيت صافنه بالمكان مرت ساعتين..

چنت محتاجه اگعد وحدي حسيت لازم املي طاقتي بهذا المكان لان من صدگ حالتي النفسيه منتهيه.. 

رجعت للبيت اجر بنفسي جر شفت الفراش الطلعناه البارحه وصخ فرشته بالگاع وجبت ادوات التنظيف و شديت ثوبي حتى ما يتبلل وگعدت اجلف...

ــ شتسوين من الصبح؟؟

رفعت راسي وبسرعه طفرت من مكاني نزلت ثوبي...

ــ اغسل...

ياسر:  شبيچ مُهره؟؟

ــ شبيه جاي اغسل افراش...

ــ عيونچ حمر..

ــ مو مهم..

ــ مُهره  كاافي ترى اذيتيني هواي..

ــ شسويتلك؟

ــ شلعتي گلبي..
عفتيني ورحتي ما فكرتي بيه..
صرت مثل المدمن بيچ..
وگعدت الصبح انتِ  ماكو..

شمرت الصونده والفرچه البيدي بالگاع و تقربت منه و حچيت بحرگه...

ــ انت....  حطيت اصبعي على صدره اشرت على گلبه...
محد وجع روحي غيرك يااااسر محد كسرني غيرك انت شنو جاي تحچي اني تعذبت من ابوك وانت كملتها...
فكرت بيه؟
چنت تشوفني واني اتعذب بفراگ أهلي..
وما حچيتلي..

ابتعدت عنه وگتله..

ــ ديررررر بااالك يااسر تحچي وياي كلمه..

ــ انتِ غبيه اني ابوي ابوووي هذا السوه بيچ هيچ
يعني شلون اروح اگول المرتي و البنيه الوحيده الحبيتها..
اروح اگللها ابوي كتل اهلچ..
ابوي حرگ بيتچ..
حرگ احلامچ..
دمرچ ودمرني وياچ....

نزلت دموعي واني افرك بالفراش وما رفت راسي رجع گال...

ــ والله  صعبه مُهره صعبه حسي بيه شويه..

سكتت هو شويه ودخل جوه واني خلصت ودخلت لگيت عمه تسوي ريوگ رحت وياها من خلصنه گعدنه ناكل واني كلمه ما حچيت من خصلت ريوگ دخلت للغرفه و رحت نمت..

وره ساعات گعدت لگيت بس افنان وعمتي گاعدات يباوعن تلفزيون گعدت يمهن بدون كلام اباوع وياهم الحد ما دخلو الولد گعدو يمنه  يسولفون..

رضا:  مُهره....

باوعت عليه بدون ما احچي...

رضا:  بيچ شي؟ شو اليوم كله ما سمعت صوتچ..

ــ مابيه شي..

عفتهم وطلعت وسمعت رضا حچه وراي..

ــ انتظريني جاي وياچ...

طلعت گعدت بالأرض بيها عشب گمت العب بيه وسمعت صوت رضا من گال...

ــ ليش تعذبين نفسچ مُهره؟؟

ــ ما معذبه نفسي هما عذبوني...

ــ انسيهم خلي باقر العار عليه اني وياسر وعلي وانتِ ريحي نفسچ...

ــ لااااا رضااا لااا..
ما اتنازل وابقى وراه الحد ما اخليه يتعذب..
ليش تگلي هيچ؟

ــ والله لان اشوفچ تعبانه والا اني ما أگدر بدونچ...

ــ خلص بعد لا تگلي تطلعين من الموضوع...

ــ تمام عيويني..
بس ما گلتيلي شصار وياچ انتِ وياسر؟

ــ ما صار شي..

ــ تمام براحتچ...

بقيت شويه گاعده ومن دخلت گعدت وياهم وياسر گاعد گدامي وبس يخزر بيه واني تجاهلته واسمع علي يحچي العمتي..

ــ اريد اسوي العرس مالتي هنا...

ــ يا بعد خالتك شوكت تسويه؟

ــ يعني يمكن اسبوعين ونخلص التحضيرات...

ــ أن شاءلله..

ـــــــــــــــــــــــ

«ديار»

مرت يومين عطله وراها رجعنه داومنه ونركض ركض بالمحاضرات..
عرفت بـ مُهره اقارب افنان وراحو كلهم گعدو سوه بيت اهل مُهره حتى اخواني وياهم..

طلعت من الجامعه ويه البنات ردت اروح بتكسي لان ابو الخط ما يجيني اليوم..

مُهره:  تعالي ديار نوصلچ ويانه شلون ترحين بتكسي؟

ــ لا والله استحي...

افنان:  خاب منين تستحين هو نوصلچ وهاهيه..

سحبتني من ايدي وگفنه يم سيارة ولد طويل و مرتب شكله كلش حلو ابتسم اول ما شافني عبالك يعرفني من زمان سلمت عليه وصعدت بالسياره يم مُهره..

طول الطريق ساكته ومستحيه...

مُهره:  اكلچ شعندچ باقيه هنا تعالي ويانه...

ــ والله اني همين اريد اجيكم بس خطيه راشد يبقى وحده واكيد بابا ميقبل..

رضا:  يابه نعزمچ تغدي يمنه على الأقل..

ــ ان شاءالله...

رجعت للبيت بس تغديت رحت نمت ما گعدت الثاني يوم لان هلكانه من التعب ما داومت لان ماعدنه محاضارت  ...

نزلت جوه نظفت البيت و گعدت اتريگ اتصل بيه مالك استغربت من اتصاله عليه..

ــ الوو...  هلا مالك..

ــ هلا ديار... 
اگلچ اني فد ساعه اجي اخذچ...

ــ وين؟ 

ــ غير عازمينه اخوانچ بـ بيت جدچ...

ــ هاا..  ما ادري..
زين وبابا خاف ميقبل..

ــ انتِ لا تحچن وياه اني اگله...

ــ تمام راح انتظرك..

سديت الخط وصعدت بدلت لبست فستان لون ابيض وبيه ورد اصفر ناعم و حطيت مكياج خفيف ولبست شال واخذت جنطتي ونزلت جوه انتظره..

من اتصل عليه طلعت صعدت بالسياره كالعاده لابس ملابس كلها سوده ومناظر شمسيه...

ــ السلام عليكم...

ــ وعليكم السلام.. 
مو مبالغه بـ لبسچ؟

باوعت عليه نزع مناظره وعينه تتنقل بيه..

ــ مالك احترم نفسك ولا تباوع عليه هيچ وبعدين لبسي ما بيه شي...

ــ راح اطيح حضچ شنو شلون مباوع عليچ؟

ــ مادري تباوعلي من فوگ ليجوه...

ــ اي لبسچ عبالك رايحه العرس...

ــ شعللليك بااابااا شعليك...

ــ لا تصيحين لا اطيح حضچ...

ــ شنو تطيح حضي لا تعيش الدور مالك...

لزمني من ايدي حيل وسحبني عليه وگال من بين اسنانه..

ــ ياااااا دور؟؟

ما اعرف ليش خفت من عنده وحسيت راح تنزل دمعتي..

ــ عوفني....

عاف ايدي وهو يگول..

ــ استغفر الله..

چان الطريق طويل واني اذا ابقى بالسياره فتره طويله اتخربط وتلعب نفسي... 

ــ اريد مي..

ــ هاچ...  باوعت ماد ايده بيها بطل مي..

اخذته من ايده وشربته وفتحت الجامه..

ــ بيچ شي؟

ــ لعبة نفسي كلش..

ــ اوگف السياره تنزلين شويه؟؟

ــ لا هسه اصير احسن..

ــ خمس دقايق ونوصل..

ــ تمام..

من وصلنه نزلت صارلي هواي مجايه هنا فرحت المُهره لان واخيراً رجعت للمكان العاشت بيه وتحبه..

دگينه الباب وفتحته افنان چانت لابسه بشت اسود وشال حجابها يخبل ولا طالع منها شي ابد..

ــ تفضلو...

دخلنه البيت صاير هوواي احلى من قبل الأثاث جديد وكلشي بيه عبالك غير بيت مو نفسه..

دخلت لگيت ياسر وعلي و رضا گاعدين يسولفون.. 

رحت الياسر ضمني الصدره ويبوس بيه بعدين رحت الـ علي همين نفس الشي گعدو ومالك گعد وياهم رحت للمطبخ اخذتني افنان لگيت مُهره و عمتها واگفات يشتغلن سلمت عليهن و وگفت يمهن نسولف...

افنان: خااايبات راح انجلط شنو هذول يخبلووون واحد يگول للثاني اني احلى...

ديار: شعبالچ لعد اخواني يخبلووون...

مُهره:  يلعبون النفس..

ويه ماگالتها دخل ياسر وگال...

ــ عايفين الحلا الچ مهرتي...

وگف بصفها هي چانت تثرم زلاطه التفتت عليه خزرته ورجعت تثرم من سوت هيچ هو ضحك بصووت عالي..

ام رضا:  يلا يمه نصب الغدا

ياسر:  بس خلي يجي علي راح يجيب خطيبته ويجي..

ديار:  صدگ يعني روسلينا حتجي..

ــ اي..

گعدنه بالصاله ننتظر روسلينا وعلي نسولف ونضحك كلش تونست وياهم حتى نسيت ذيچ الأيام شلون چنا كل واحد بمكان..

طفرنه كلنا من  سمعنا صوت دگ بـ الباب وصياح چان الكل مصدوم..

باوعت على مُهره مبتسمه وتباوع الرضا وهو همين مبادلها الأبتسامه...

يتبع🦋............

ـــــــــــــــــــــــ

شنو تتوقعون حيصير؟؟

لا تنسون التصويت والتعليق بين الفقرات گليباتي...