رواية خيِّال ومُهرة الفصل الثامن والعشرون 28 - بقلم amna

بسم لله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

ــــــــــــــــــــــ
وشبدينّه ؟
نباگت أحلام الصغر
منه وبچينه،
وردنّه نبدي من جديد
وما بدينه .

-عريان .

♡ـــــــــــــــــــــــ ♡

«روسلينا»

رجعت الأهلي بالعراق صار فتره و قررت انقل شغلي هنا بالعراق وعلي ساعدني هواي و سويت عقد ويه شركه جديده وبديت اشتغل وياهم هم بالتصوير..

رجعت من الدوام لگيت يمنه آسيا سلمت عليها ورحت بدلت ورجعت گعدت يمهم...

روسلينا: اليوم علي عازمني على الغده يم بيت خالته..

حوراء: ها ماما براحتكم بس انطي خبر الأبوچ..

روسلينا: اي طبعاً..

آسيا: تتأخرين؟

ــ والله ما اعرف..

ــ اريد اشوفچ..

ــ ان شاءالله احاول ارجع من وقت..

گمت بدلت احتاريت شنو البس ماعندي لبس مناسب اخير شي اقتنعت بفستان اسود ولبست حجاب ابيض وحذاء كعب وحطيت مكياج وطلعت الـ علي لگيته هو همين لابس اسود من بعيد شفته وابتسمت شكله تعبان ومتغير بس بعده انيق..

ــ هلا بـ الغرام....

ــ هلا حبيبي... شلونك؟

ــ هسه صرت زين..

باسني بخدي وفتحلي الباب مالت السياره صعدت وهو افتر وصعد من الجهى الثانيه لزم ايدي وباسها ومشت السياره..

ــ شلونه وضعكم؟

ــ لا تسئلين احسن..

ــ ليش؟

ــ هوسه كلش..
طلعت الفرق الچنت عايش بيه بـ أمريكا..

ــ الله يساعدك..

ــ ويساعدج غرامي..
اييي شخبار دوامچ؟

ــ زين الحمدلله..

بقينه طول الطريق نتشارك الحديث عن الايام الأخيره لان حتى منسولف اني وياه ملتهي ويه ياسر و مشكل ابوه نحچي باليون مره اشياء مختصره وبس..

من وصلنه نزلت من السياره...

ــ اگلك شو استحي..

ــ محد غريب تعاي...

لزم ايدي و دخلنه انتبهت على صوت ياسر چان يصيح والكل ضايج بس من دخلت غيرو الموضوع وحاولو ما يبينون عدهم مشكله..

سلمت على البنات وعرفني علي ع خالته وبنتها شگد محبوبه واخوها رضا...

مُهره: روسلينا حبي تعالي ويانه نحضر الغدا..

علي: ديري بالچ منها...

مُهره: ليش يمه شبيه...

علي: اندري صايره تخوفين...

افنان: احنه علمنها...

علي: فرحان؟؟
هي غير صايره مچلوبه...
نوب هذا اخووي كاتل روحه عليها...

ياسر: علي نچب احسنلك...

مُهره: عمي خلي مرتك يمك بعد ما اريدها گلت تضوج لان كلنه نروح للمطبخ تجي يمنه احسن..

روسلينا: لا اجي وياچ...

رحنه للمطبخ حضرن البنات الأكل و فرشت السفره اني وديار والولد گاعدين يحچون بهمس..

گعدنه كلنه على السفره واجه اخوهم راشد همين گعد ويانه و هو يگول...

ــ ياابه شني جاي تاكلون بدوني...

علي: قابل انته خبز لو صمون وناكل بدوونك...

راشد: اني اهم من الصمون بـالسفره..

مالك: لا تخليني اگوم اسحلك و ما اخليك تگعد ويانه..

راشد: لا سكتت..

علي: هيچ تخاف منه؟

راشد: لا بس جوعاان واذا يبقى يحچي وياي ما اكل شي...

سوالفهم تموت ضحك بقو يتناگرون على طول الگعده بعدين گمنا شلت الماعين وياهم وصاحتلي ام رضا اگعد يمهم بالصاله والبنات بالمطبخ يغسلن اماعين..

ام رضا: تعالي يمه گعدي..

رحت گعدت يمها وهي تسولف وياي شگد لطيفه وحتى
من تسئلني مو اشياء خاصه و حچيها مليان حنيه...

اجن البنات جايبات الشاي وگعدنه سوه نسولف..

ديار: باچر تداومون بنات؟

مُهره: اي ان شاءالله..

روسلينا: شنو انتم كلكم بجامعه وحده..

افنان: اي حبي ونفس القسم...

روسلينا: هههههه شگد حلو...

مُهره: اي... انتِ شنو راح تستقرون هنا؟

روسلينا: اي يمكن نبقى سنه هيچ يلا نرجع..

مُهره: احسنلكم...

روسلينا: اي طبعاً هناك احسن..

علي: شجاي تحچين ويه مرتي؟

مُهره: اهووووووو.....

علي: شكو؟

ــ شتريد؟

ــ مادري بس احب اضوجچ...

ــ ليش؟؟

ــ مادري...

رضا: عوفها علي...

ياسر: هما بيناتهم يتشاقون..

رضا: ادري بس ضاجت..

مُهره: لا عيوني متعوده عليه ما يرتاح اذا ما يغثني..

علي: ترى اني من احب واحد هيچ اضوجه..

افنان: يعني تضوج روسلينا هيچ لو گادر بس على بت خالي؟

علي: مرات..

مُهره: ولا مره هسه نشوف...
روسلينا هم هيچ يسوي وياچ؟؟

روسلينا: اني اول ما تعرفت على علي چان كلش حباب ميتشاقه ولا يسولف هواي بس من خطبني حسيته تحول..
بس احلى هيچ...

كلهم ضحكو بس ياسر عينه على مُهره و حتى ميبتسم وهي مغلسه عليه تتظاهر متشوفه...

روسلينا: اگلچ انتِ و ياسر متعاركين؟« بهمس»

مُهره: ليش؟

روسلينا: شو صافن عليچ و حتى ميشارك الحديث ويانه...

ــ اي متزاعلين وخليه يباوع عليه حتى اشلع گلبه وما اباوع عليه..

ــ ياا خطيه..

ــ عوفينه منه.. شوكت عرسكم؟

ــ علي يگول بعد اسبوعين اقل..

ــ ها ان شاءالله...

لزمت موبايلي ورسلت الـ علي رساله..

ــ تأخرت آسيا منتظرتني..

باوعت عليه لزم موبايله كتب بيه وقفله..

ــ يلا غرامي..

گام و گال..

ــ يلا روسلينا ابوچ گالي لا تتأخرون..

مُهره: بعد وقت..

علي: يلا ما بقى شي و نتزوج وتگعدون سوه..

مُهره: ان شاءالله...

ياسر: شني ناوي تگعد ويانه؟

علي: طبعاً...

مُهره: تگعد ويه ياسر لو تسافر..

ياسر: يگعد ويانه وبعدين يسافر..

مُهره: هااا....
انت وين راح تگعد؟

ياسر: وياچ وين مترحين...

مُهره: بس ميصير تطلع عليه سمعه اگعد ويه طليقته
بنفس البيت...

ياسر: اي عود منا الوقتها نحتار بالسمعه ميخالف..

علي: حمت...
شگد احب العركات...

رضا: انت بس عوفهم وهما يتصافون...

راشد: ولك هو ميت من الغيره شلون يعوفهم

علي: الك الله ياالفقير شوكت حچيت..

ياسر: علييي....

علي: هاا...

ياسر: انچب...

علي: اگلك انت شبيك ترى اني اخوك الچبير كل ساع وگلت انچب...

راشد: والله خبصتنه اخوك الچبير...
هو انت اكبرمنه بسنه...

علي: اوگفلي راشد....
وانت بعد بس تگولي انچب اسطرك..

ياسر: خاب رروووح...

بقو يسولفون الحد ما طلعنه منهم رحنه بالسياره اول ما صعدت سحبني عليه وضمني حيل...

ــ مشتاقلچ...

ــ حتى اني..

ابتعد مني وحاوط وجهي بـ أديه وگال...

ــ خايبه فلك طرچ على هذا الجمال...

ــ هههههه...

ــ والعباس ترى اني ما أگدر بعد اريدچ..

ــ مو يمك هسه...

تقرب عليه باسني ورجع گال..

ــ غير هسه حتروحين...

ــ اي ما بقه شي ونتزوج...

ــ ان شاءالله...

وصلني للبيت صعدت بدلت ونزلت العب ويه اطقال آسيا عدها بنات ثنين و ولد...

لليل صعدت الغرفتي واجتي آسيا يمي سولفنه شويه وگالت شي انصدمت..

ــ قبل اسبوع رحت للامام علي و فطومه بنتي مشت سريع وبقيت ادور عليها ما لگيتها...

ــ ايي...

ــ واني ادور عليها وگلبي طاير وما اشوف گدامي واني ادور عليها امشي سريع ونرگعت بشخص..
من رفعت عيني عليه جاي اعتذر منه لگيته مهدي...

ــ مهدي نفسه؟

ــ ايي...
ومنا اني گلبي رايح على فطومه وانصدمت من شفته هو گال...

ــ آسيا...
اني غلست ردت اروح ورجع گالي...
بيچ شي تحتاجين شي؟
هزيت راسي بـ لا ورحت شويه ولگيت فطومه و من جاي نطلع من الأمام شفته واگف يم اليشتغلون هناك يمكن يشتغل وياهم..

ــ هااا...
بعدچ ما ناسيته؟

ــ لا نسيته...
بس من شفته كل شي رجع بذاكرتي...

ــ اي هو احنه هيچ اذا أيام حلوه نعيشها ويه شخص حتى لوچانت ساعه..
وعشتي وراها سنين..
ما راح ننساها مهما صار...

ــ اي والله..

بقينه نسولف وهي شويه ونزلت واني نمت..
مرت الأيام واني احضر للعرس يوميا طالعين السوگ كلش تعبت مرات نروح اني وآسيا لان ماما تتعب الحد ما خلصنه كل الأشياء الأحتاجهن....

ـــــــــــــــــــــــ

«مُهره»

سمعت صوته يدگ بالباب واني فرحتي ما توسعها
الدنيا فتح الباب رضا هو دخل مثل الثور الهايج
دفعه من گدامه واجه عليه...

ــ انتِ عبااااالچ قوووويه ترى بحركه ووووحده مني اوديچ وره الشمس...

اجه ياسر سحبه من يمي وگاله....

ــ لا تصيح عليها..... احچي نفس الناس لو لا تحچي يكون افضل...

ــ انتم كلكم واگفين ووويااااها..

ياسر: شنو شسوت؟

ــ رافعه قضيه عليه اهرب اموال...

ياسر: وشني هي چذابه؟؟
انت صدگ تهرب اموال...

باقر: اييي هو منو طيح حضي غيركك عود اگول ابني
الچبير..

دفع ياسر الچان واگف كدامه واجه بتجاهي اتقرب عليه واني مبتسمه بوچه گال...

ــ عبالچ تگدريلي؟
عادي كلشي بيدچ سويه واني اطلع منه مثل الشعره من العجين...
بس كلشي تسوينه اخليچ تدفعين ثمنه وابچيچ بدال الدموع دم واخليچ تعضين اصابتچ ندم...

لزمه ياسر  وهو يحچي وياه...

ــ تهددها گدامي؟؟
جرب تتقربلها وشوفني شسوي...

طلع وقبل ميوصل للباب گال

باقر: اني وياچ والزمن طويل....

اني اچذب اذا گلت ما انقهرت بس وجهي ممبين عليه اني خايفه وحتى مبتسمه واياوع عليه ببرود...

اول ما سد الباب ياسر لزم ايدي وسحبني للغرفه دخل وسد الباب نترت ايدي من عنده وگتله...

ــ شبيك؟

ــ اذااااا سوااالچ شي شسوووي ااااااني گللليلي؟

ــ ميسووي شي لان خياسته كلهن يمي يحچي هيچ حتى يخوفني...

ــ ليش متگليلي شنو جاي تسوين؟؟

ــ لان ما اثق بيك...

ــ عاشت ايدچ...
كلامچ يوووووجع انتهبي من تحچين...

ــ وانتم ماا وجعتوني؟؟
شو محد انتبه اذا اذا انووجعت منكم لو لاااا؟

ــ مُهررررره... كااااافي عاد...

صاح بصوت عالي وعيونه حمره تخوف رجف گلبي من نبرة صوته...

تقرب عليه لزمني من زندي وقربني عليه راسي انظرب بصدره حط راسه برگبتي وگال بهمس...

ــ شلون بيه مُهره عطرچ ما جاي يفارگني ما جاي يخليني اعيش بسلام...

بقيت ساكته واني جسمي احس بيه ارتفعت حرارته وگلبي يدگ مثل الطبل...

مرر خشمه من رگبتي لأذني وگال...

ــ اني احبچ مهرتي..

حطيت اديه على صدره ودفعته وطلعت گعدت على القنفه واهز برجلي طلع من الغرفه واجه يم رضا وگاله..

ــ رضا بعد كلشي تسوونه گولي حتى اني اساعدكم..

رضا : اني همين اگول هيچ موو مُهره؟

مُهره: شتردون تسووون سوو ميهمني اذا گتله او لا...

ياسر: السانچ راح ينگص والله...
مُهرررررره احچي عدل مو تشوفيني منطيچ وجه...

قاطعنه دخول علي غيرنه الموضوع لان روسلينا وياه. صبينه غده وگعدنه نسولف ونضحك الحد ما راحو و اني وافنان وديار گلنالهم ياخذونه للسوگ..

مالك: اني رايح راشد انته ترجع ديار؟

راشد: اي حبيبي اني رايح للبيت بكل الأحوال الله وياك..

طلع مالك وديار راحت يم ياسر...

ــ خلي نروح للسوووگ حبااااب يسووووري..

ياسر: يسوووري منين؟؟

ــ انت...

ــ جيره بفرگچ...

ــ يااا ليش؟

ــ انتِ ويامن ترحين؟

ــ اني والبنات ما مشترين ملابس للجامعه وبده الدوام لازم عدنه ملابس جديده..

ــ تمام بس لا تتأخرون..

رحنه بدلنه بسرعه اخذنه راشد اشترينه ملابس و بقينه لليل تعشينه بره ورجعنه اني اول ما وصلنه رحت نمت الثاني يوم رحت للجامعه..

ومرت الأيام بين الجامعه والبيت والهوسه واني احاول ابتعد عن ياسر وما اشوفه من ارجع من الجامعه ابقى گاعده بغرفتي

وبيوم من خلصت دراسه سديت الكتاب و تعاجزت اگوم اطفي الضوه نمت على السرير وبسرعه غفيت..

فزيت على ايد تتلمس وجهي فتحت عيوني على كيف شفته ياسر گاعد بالأرض ومتچي ايده على طرف السرير ومخلي راسه على ايده وصافن بوجهي وايده الثانيه تمسح على خدي..

ــ خِذانا الواهسّ من بعيد نِزف
شموعنه لشوگك مِشينا وأيدّ
تشبچ ايدّ تِناغـي الروح بطيوفَك
العُمر من غَير حُب ، شيفيد؟
لَك لِمنّي بعَصرة چفوفَك ياريحَة
مَسچ ياهَيل ، عَذبني ونين اللّيل
جيتَك من بَعد غُربة جيت بليلة
گَمرية هَذاك انا نَبع صافي يَخايب
دَغش مابيـه .

بقيت صافنه عليه الكلام من صدگ اخترق گلبي وخلاني مو طبيعيه وهو انتبه عليه حسيت الدموع تجمعت بعيني واول مره احس مشتاقتله واريده يضمني الصدره..

گمت بسرعه افتريت بالغرفه بعديت فتحت الشباك حتى اشتم هوى سحبت نفس و رفعت عيوني ليفوگ حتى متنزل دموعي..

حسيت بـ اديه حاوطت خصري من وره و قربني على جسمه مد ايد على شعري المنثورعلى ظهري وجمعه كله على چتفي وحط وچه برگبتي حسيت طاقه ماعندي ابعده..

وحتى ما أگدر ابعده لان اني مشتاقتله وبعد ما أگدر اقاوم يوميا اشوفه واعامله بـ برود واني گلبي ما نابض بس اله...

غمضت عيوني وراسي مال عليه بدون ما احس دارني عليه باوع بعيوني
ومد ايده مسح بـ ابهامه على طرف شفتي..

ــ لو أنكِ كُنتِ أقلُ جَمالًا
لَكانَت الأمور أسهلُ عليَّ

تقرب عليه وباسني واديه محاوطه ظهري حسيت دخلت بعالم ثاني رفعت ايديه وحاوطت رگبته وهو استغل الوضع..

من حاول يتجرأ بلمساته حسيت لازم اوگفه..
نزلت اديه وگتله...

ــ ياسر.... روح..

ــ كافي عاد مُهره..

ــ ما اگدر ياسر ما اگدر...

ــ زين شوكت تگدرين؟

ــ من اخلص من باقر العار..

ــ خرب باقر خووش اشتعلت روووحه..

طلع من الغرف زاني بعدني ارجف وگلبي نبضه سريع..

مرن يومين رحنه اشترينه فساتين العرس علي وقررنه نسويه بالمزرعه بيناتنه عائلتنه وعائلة روسلينا الولد بالحديقه واحنه بالبيت...

بيوم العرس گعدنه من الصبح نظفنه كلنه سوه حتى علي ويانه مشغل اغاني وينظف ويركص وميتين ضحك على حركاته...

رتبنه الحديق وجبنه اضويه وحطينه طبلات وكراسي ونشرات صارت كلش حلوه..

و اجرنه كوشه الـ روسلينا حطيناها بوسط الصاله اني وافنان هلكنه من التعب...

من خلصنه الشغل رحنه اني وافنان وديار چانت ويانه خلينه مكياج ولبست فستان اسود بدون اكمام وضيگ على الجسم وقصير..

اول مره البس هيچ بس كلش عجبني لبست حذاء كعب وحطيت حمره حمره وايلاينر صارت عيوني كبار وبرز لونهم..

لميت الغرفه مالتي والبنات خلصن وگلتلي ديار..

ــ مُهره لا نطلعين بره علي...

ــ تمام قلبي.... بس افنان مو طلعت؟

ــ هااا... اي لبست عبايه...

ــ خوش..
طلعن وسدت الباب واني اخذت موبايلي صورت نفسي كم صوره و ما حسيت الا نفتح الباب و دخل ياسر مبين ميدري بيه لان فتح الباب باوع عليه ودار وچه بعدين رجع باوع عليه مصدوم..

واني حسيت گلبي وگف دخل وسد الباب اتقرب مني بخطواتت ثابته وكل خطوه يتقرب بيها احس روحي راح تطلع...

صار قريب مني هو لابس قميص اسود ومفتوحه كم دگمه يم صدره وبارزه سلسه فضيه ولابس بنطرون اسود قماش ومشط شعره بطريقه تختلف عن يوميا طالع كولش انيق ومرتب

عينه ما شالها مني تنتقل بين جسمي وعيوني وكل تفاصيلي...

يتبع🦋......

ـــــــــــــــــــــــ

حبايب گلبي لا تنسون التصويت والتعليق بيت الفقرات