رواية خيِّال ومُهرة الفصل التاسع والعشرون 29 - بقلم amna

«بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

ـ
وإن أعادوا لكَ الطريق فمَن يُعيد لكَ خُطاك؟
وإن أعادوا لكَ صوتَك فَمَن يُعيد لكَ الكلمات؟

♡ ـــــــــــــــــــــــ ♡

«مُهره»

طلعن البنات واني اخذت موبايلي صورت نفسي كم صوره و ما حسيت الا نفتح الباب و دخل ياسر مبين ميدري بيه لان فتح الباب باوع عليه ودار وچه بعدين رجع باوع عليه مصدوم..

واني حسيت گلبي وگف دخل وسد الباب اتقرب مني بخطوات ثابته وكل خطوه يتقرب بيها احس روحي راح تطلع...

صار قريب مني هو لابس قميص اسود ومفتوحه كم دگمه يم صدره وبارزه سلسه فضيه ولابس بنطرون اسود قماش ومشط شعره بطريقه تختلف عن يوميا طالع كلش انيق ومرتب

عينه ما شالها مني تنتقل بين جسمي وعيوني وكل تفاصيلي...

وگف گدامي يفصلنه شبر و عيونه تتنقل بـ تفاصيلي.

ــ واني بَس حيرني حسنچ
مُمكن أفهم وين حَده ؟

حچيت واني الرجفه ملازمه حتى صوتي

ــ اطلع ياسر...

حط ايده على خدي واني بدون وعي غمضت عيني حسيت انفاسه تضرب بوجهي..

ــ اني احبج...

فتحت عيني باوعت بعيونه نظراته چانت تكفي عن الكلام كله..

تقرب على اذاني وهمس..

ــ شلون بوجع گلبي؟
ارجعيلي مُهره كافي تعبت..

طبع بوسه سطحيه على شفايفي وحط جبهتا على جبهتي غمضت عيوني وگلبي يحترگ على وضعنه اثنينه نريد بعض بس ما أگدر اسامحه بسهوله من اذكر شلون اسغفلني .

لزم خصله من شعري بعدها عن وجهي وگال..

ــ مشتاقلچ..

اندگ الباب ابتعد عني يمسح بوچه سمع صوت رضا
طلعله..

واني فصلت عن العالم وادي ترجف وگلبي يدگ بسرعه حطيت ايدي على گلبي وگعدت على السرير حسيت رجليه ميحملني بعد..

شويه واجتني ديار..

ديار: يلا تعالي اجتي روسلينا..

سحبتني من ايدي وطلعنه رحت يم روسلينا طالعه تجنن بستها وگلت..

ــ ولچ شنو هذا الجمال طالعه تجننين..

ــ ياروحي انتِ همين طالعه كلش حلوه...

شغلنه اغاني ورگصنه كلنه سوه من صدگ تونسنا وحسيت صار شگد حياتي مفارگه الفرحه..

ام رضا: عمه مُهره بلا شوفي رجلچ وين العشا؟

مُهره: راح البس حجاب واشوف منو بره اصيحله..

ام رضا: اي بعد امچ...

رحت للغرفه لبست بشت ولفيت الشال ومديت راسي واشوف الأجواء يمهم تخبل مشغلين اغاني والولد لابسين كلهم قوط ويخبل شكلهم ويركصون ويهوسون بس اكيد ياسر مو وياهم..

شفت علي واگف بالنص ويركص يهز چتف وگباله راشد متت من الضحك على شكلهم حتى نسيت العشا والموضوع كله..

ــ شتسوين واگفه هنا؟؟

باوعت عليه ورديت...

ــ هااا.... ااا.. عمتي گلتلي شوفي العشا شوكت يصبونه؟؟

ــ صارلچ ربع ساعه واگفه وتباعين..

ــ اي الولد شكلهم حلو...

ــ انچبي مُهره راح تنكفخين..

ــ اقصد يعني رگصهم حلوو..

ــ روحي طبي هسه راح يجيبون العشه..

طبيت اهز بيدي شبيه هذا گالب خلقته عبالك مو عرس اخوه شگد مكروه..

رحت يم افنان چانت گاعده على صفحه..

ــ هااا ولچ شطالعه گيمرررر..

ــ ااايع مُهره غزلچ كرنج...

ــ هو صوچي اتغزل بيچ...

ديار: ولچن متت من التعب..

افنان: هو انتِ رگصتي رگص لا صاير ولا داير...

ديار: ولچ هو اني ما صدگت يصير عدنه عرس حتى اطلع بطولاتي بـ الرگص..

مُهره: ههههههههه... خلي نگوم نحضر للعشا..

گمنه اني وديار افنان بقت جوه لان ياسر دخل الاكل وهي بدون حجاب دخله وكمل بعدين گال...

ــ مُهره تعالي اگلچ..

ــ هاا؟

ــ تعالي...

رحت يمه و هو تقرب على اذني وهمس...

ــ كافي لعب وروحي نزعي الفستان..

ــ ما اريد انزعه هسه بعد وقت...

ــ لا تعاندين.. ونزعيه لا اطيح حضچ..

ــ ترى عيب عليك...

ــ راح احسب من واحد للخمسه اذا ما دخلتي للغرفه وبدلتي اني ادخلچ وانزعچ بطريقتي...

ــ هااااي شبييك؟؟

ــ 1
2
3
4

قبل ما يگول خمسه ركضت للغرفه بدلت لبست فستان طويل بيه چاكه الفوگ الركبه و بدون اكمام وبيه فتحه من يم الصدر لونه احمر مدري ليش حبيته رغم اني ما احب الاحمر ابد بس عجبني...

اول ما طلعت لگيته بعده واگف منتظرني من شافني ابتسم وراح...
وزعنه العشا وگعدنه ناكل واني رحت يم روسلينا وكلتها لگمتين بالگوه اقتنعت...

لمينه البيت ورجعنه شغلنه اغاني ورگصنه وگومنه روسلينا ويانه الى ان اندگ الباب وگالو علي راح يدخل ياخذ روسلينا..

چانت عائلة روسلينا موجوده بس شگد فقره وما الهم صوت ابد اختها وامها وبنات خالاتها...

لبست حجاب وبشت ودخل علي يهوس ويركص وعمتي تهوس وياه لزم ايد روسلينا گومها وبقى يركص وياها وكل شويه يهمس بـ اذانها ويرجع يرگص والبنيه ميته من الضحك على حركاته بس طالعين يخبلون سوه..

شويه وطلعو من راحو للفندق وعمتي ورضا وافنان راحو وياهم و راشد ومالك اخذو ديار وراحو..

نزعت ملابسي و اجيت اباوع للبيت خيسه منين ابدي طلعت للحديقه شفت ياسر گاعد على كرسي ويدخن هو بعيد عني صحت بصووت عالي ..

ــ يااااااسر......

گمز من مكانه واجه بسرعه..

ــ شبيچ؟؟

ــ تعال نظف وياي...

ضربني على راسي حيل وگال...

ــ انتِ ثوله هو هيچ وگفتي گلبي..

بقيت صافنه ومخليه ايدي على راسي..

ــ ليش تضرب؟

ــ وجعتچ؟

ــ اييي...

ــ تستاهلين..

سديت قبضت ايدي وضربته بكل قوتي بطنه وشردت..

ــ اخخخخخخخ..... ياااابت.... ما اريد اسب اهلچ بس اوگفيلي...

ركضت بس واني ميته من الضحك ما حسيت الا اديه حاوطت خصري وانرفعت من الارض...

ــ يااااسر نزلنييي...

ــ تضربيني موووو؟؟ اني اعلمچ..

اخذني للقنفه نومني وصار فوگاي باوعت علي واني ميته ضحك وهو مبتسم ويباوع عليه...

ــ وخر كافي خلي انظف البيت...

ــ لا....

چان ايده منتچي بيها يم راسي...

ــ تووووخررر لوووووو....

تقرب عليه وهو يهمس...

ــ لووو شتسوين؟؟

قربت حلگي من ايده وعضيته بكل قوتي سحبها مني متألم...

ــ مچلوبه؟؟

متت ضحك گمت طلعت بره انظفه اخذت اكياس مالت نفايات وبديت انظف اخير شي فتحت المي اريد اغسل المكان وشفته اجه شال الصونده...

ــ غسله انته اني حدخل انظف الجوه..

ــ تمام..

رحت جاي ادخل وما حسيت المي نگعني درت وجهي باوعت علي يرش عليه مي وميت من الضحك..

ركضت واني اضحك...

ــ كافي يااااااسر..

تقربت يمه اجر الصونده من عنده بس ماگدرت اخذها  شكلها بالنافوره مالت الحديقه وشابك اصباعه بـ اصابعي وسحبني يركض جوه النافوره...

بـ لحظه باوعت بعيونه وهو يركض ويضحك واني الضحكه ماليه روحي حسيت اني مثل الفراشه الاول مره نطير بجناحاتها وتتنقل بين الورد...

حاوط خصري بـ أديه بحركه سريعه وسحبني عليه التصق جسمي بيه وبعدنه واگفين جوه المي وباسني بدون اي مقدمات حاوطت رگبته بـ أديه وبادلته بكل حب ولهفه..

فصلنه عن العالم والوگفنه صوت سيارة رضا ركضت جوه لان ما لابسه حجاب اخذت ملابس على السريع و دخلت للحمام بدلت وطلعت نظفت اني وافنان الى ان هلكنه من التعب دخلت الغرفتي شمرت نفسي على السرير ونمت..
ـــــــــــــــــــــــ

«روسلينا»

من صدگ اول يوم بحياتي من گعدت من النوم واني الضحكه ما فارگت وجهي...

عبالك اول مره اعيش هذا الشعور رغم اني لابسه البدله قبل وعايشه شعور العروسه...

بس علي حبه الي عيشني احساس يختلف اول مره اعيشه...

طلعت من بيتهم واني مشابكه ايدي بـ أيده ويمشيني على كيف خاف اوگع لان البدله كولش چبيره..

وصلت للسياره بألف يا علي...

سد الباب وراح يرگص ويه الولد ورجع صعد ابتسم بوجهي وگال...

ــ ليلتي هاااااي...
اليوووم العب لعب..

ــ عليي شنيه...

ــ ولچ بعد اتحمل..

سحب وچهي و باسني بخدي بس مو بوسه شفط خدي

ــ هي هاي بوسه بلعت خدي..

ــ غير انتِ الحب والغرااام...

الطريق كله هو يتغزل ومشغل اغنيه ومعليها ويركص واني خربانه من الضحك عليه...

وصلنه للفندق و ام رضا ورضا وافنان واهلي اجو ويانه وگفو بالباب مالت الفندق يهوسون شكلهم كلش حلو..

دخلنه للفندق كلش ضخم وشكله يجنن گال علي و احنه نصعد بالمصعد..

ــ حجزة اسبوع هنا..

ــ هاا مو هوواي...

ــ لا مو هوواي واحنه بيتنه بعده ما كامل لازم نگعد بيت جدي هذا الشهر وياهم وهوسه هنا شويه براحتنه نلعب لعب...

ــ علي والله استحي من هذا الحچي..

ــ هسه اني شحاچي....

ــ ما حاچي شي ابد انت حباب...

ــ ههههههه اكبر حباب اني...

دخلنه للغرفه شكلها يخبل حاطين ورد بالگاع والسرير شكله يجنن الفرشه بيضه ومخين همين ورد عليها على شكل قلب وعلى صفحه ميز طعام صغير وعليه اكل..

تقرب عليه ضمني و گال...

ــ عجبتچ؟؟

ــ اي تخبل...

ــ اروح فدوه للعيون الحلوه..

تقرب عليه وباس عيوني وگال..

ــ يلا تعالي نصلي...

ــ خلي انزع البدله ما أگدر أصلي بيها..

ــ يلا راح اساعدچ..

ــ لا... اني انزعها وحدي..

ــ بس افتحلچ السحابه...

ــ يلا افتحها واطلع...

ــ تأمرين..

فتحلي السحابه وباسني بكتفي وطلع من الغرفه بدلت بسرعه لبست روب نوم ابيض طويل بس مفتح من كل مكان رحت للحمام مسحت المكياج وغسلت وشعري اني ممسويته تسريحه عفته مفتوح وشلت خصلات قليله بماشات عفته ما فتحته توضيت ورجعت خليت مكياج خفيف وطلعت لگيته گاعد على السرير ويباوع بالموبايل..

ــ يمه.... شلوون بيه...
تقرب مني باسني وطب للحمام لبست مالت الصلاة وفرشت السجادات انتظرته من طلع لابس دشداشه بيضه طالع شكله يجنن بيها صلينه سوه...

ــ تقبل الله غرامي..

ــ منا ومنكم حياتي..

ــ يلا تعالي ناكل...

تعشينه وهو يسولفلي على العرس وشلون من راحو للحلاق يرگصون كلهم حتى الحلاق راگص وياهم..

من خلصنه رحت للحمام جاي اغسل اجه للحمام وراي گال

ــ لا تغسلين اوگفي..

ــ ليش؟؟

ــ اجيت اني اغسلچ..

تقرب اخذ اديه وغسلهن بالصابون ومسح حلگي واخذ المشفه نشف اديه وبعدين حلگي اول ما بعد المشفه شمرها بالگاع وسحبني بسرعه باسني حاوطني باديه ورفعني ودخلني للغرفه وبدت ليلتنه...

چانت مليانه حب وحنيه ودفو من صدگ رب العالمين عوضني بـ علي..
يعاملني معامله تجنن و يخاف عليه من كلشي حتى من نفسه...

مر اسبوع واحنه عايشين حياة بالأحلام ما چنت احلم بيها  حنيت علي وتعامل وياي يخليني احبه اكثر واتعلق بيه...

ــ روسلينا استعجلي شويه..

ــ خلصت بس بعد ساعتك..

ــ لبستها...

ــ يلا لعد خلي نروح..

وصلنه البيت مُهره اولما دخلنه ام رضا هلهلت و افنان تشمر چكليت گعدنه بالصاله نسولف ...

علي: اشم ريحة اكل طيبه...

مُهره: اني سويت...

علي: الله عليچ؟

مُهره: اييي

علي: مو متعرفين..

رضا: امي علمتها...

ياسر: اليوم تجريبي

علي: طااااح حضك چا الا اليوم تجرب؟؟

مُهره: اني اختاريت اليوم..

علي: ميت من الجوع وصار اسبوع ناكل من الفندق اكله مو طيب...

ام رضا: يمه هسه تشوفه شلون طيب...

علي: خاله واذا مو طيب شنسوي؟

ياسر: عود احتار ابطنك...

علي: انته اخ چيس حب؟

ياسر: چيس حب..

علي: اگص ايدي اذا طلعو مامتصاااالحين...

الكل: ههههههههههههه

رضا: ياسر مفضوح...

علي: مو گلتلكم اني ادري بـ أخوي بس يصالحها يگوم ما يعرفني.... أغم...

ام رضا: ههههههه ولك بسك خلي نصب غدا يلا يمه افنان گومي ويع مُهره...

روسلينا: اني همين اجيت وياك...

گمنا نسولف وحضرنه الغده وفرشنه السفره چانت مسويه مُهره تمن برياني و دجاج و جدر دولمه شكلهم كلش طيب وافنان مسويه زلاطه...

گعدنه على السفره...

علي: شكل الأكل يبشر بالخير بس بعدني گلبي يلعب...

رضا: كول بسم الله وابدي..

افنان: وعلى الله بعد...

روسلينا: مبين طيب...

اكلنه وصدگ طلع طعمه يجنن اكلت كوومه لان صدگ بالفندق مو طيب...

علي: صدگ عاشت ايدج...

رضا: لازم نسجلها بـ التاريخ علي مدح مُهره...

علي: شعندي كم مرت اخو هي بس حصان...

ياسر: اني گلت معقوله يكمل جملته بدون ما يچفص..

علي: خايب وسم...

مُهره: المهم طيب طلع بس بعد لا واحد يجي يگلي طبخي بعد لان من صدگ شلعان گلب...

رضا: خووش نرجع لامي احسن النه..

گمنه غسلنه الماعين ورجعنه گعدنه سوه نشرب چاي..

مر اسبوع واحنه عايشين سوه البنات يرحن للدوام واني ماخذه اجازه ما داومت بس علي ورضا و ياسر يطلعون دائماً ويرجعون بالليل حتى البنات سجلن خط للجامعه يرحن ويرجعن وياه..

وبيوم رجعت افنان من الجامعه وجها احمر وعيونها مورمه وعبايتها مخربطه ومتربه راحتلها ام رضا وهي تلطم علىوجها وتحچي بحرگه....

ــ وووولچ يممممه شبيييييچ منووووو سوه بيچ هيچ ولچ افنااااااان اصخااااام بوجهي...

وافنان بس دموعها تنزل وتباوع على امها..
متت من الخوف عليها وحتى مُهره ماكو وياها حچيت وياها..

ــ افنان.... مُهره وووين؟؟

ام رضا: ولج احچيييي راح اااااموووت...

رحت يمها لزمتها من اكتافها وهزيتها حيل وحچيت وياها وعيوني بعيووونها...

ــ افنان..... شكو شصار مُهره وووين؟

گعدت بالگاع وگالت....

ــ خطفوووو مُهره اخذوهااا....

ـــــــــــــــــــــــ

شنو تتوقعون بالبارت الجاي؟

لاتنسون التصويت والتعليق بين الفقرات..