رواية خيِّال ومُهرة الفصل الثلاثون 30 - بقلم amna

بسم الله الرحمن الرحيم

خيَّال ومُهره
آمنة عادل

لاتنسون التصويت والتعليق حبيباتي ♡

ـــــــــــــــــــــــ

هذا النضج الذي أرتديه لم تلبسني إياه الأيام كهدية، لقد نسجته من تجارب قاسية و أخرى كادت
أن تكون الأخيرة، و هذا الهدوء الذي يعلو
ملامحي قد سبقه اندفاع كلفني كثيرا
و قبل أن أقف بثبات هكذا تأرجحت
و سقطت مرات و عدت من حافة الهاوية.
كل خيط في هذا الثوب قد دفعت ثمنه
بعضًا مني.

♡ـــــــــــــــــــــــ ♡

«افنان»

المرحله الجديده بالجامعه بعد اصعب من الفاتت كل الوقت مخلص على الدراسه نگعد اني و مُهره ونتصل على ديار وندرس سوه..

چان واگف الأستاذ الوحيد اليدخلنه العزابي الكل البنات موتات نفسهن عليه وهو ما معبر وحده وحتى من وحده تحاول تتقربله يصدها...

بس من الأخير هو يخبل بس مستحيل اسوي مثل تصرفات البنات بلا ملح مسوياتها..

طلعنه من الدوام اني و مُهره ويه الخط رجعنه للبيت لگينه امي وروسلينا محضرات الغدا الولد ما موجودين اني اكلت ورحت نمت من گعدت سمعت اصوات الولد لبست حجابي وگعدت يمهم...

علي: البيت يرادله صبغ وشويه تعديلات..

رضا: احنه بيتنه همين ما بقه شي ويخلص الترميم..

علي: شنو شغلهم زين؟
حتى هما نفسهم يسوون بيتنه..

رضا: اي والله زينين وسريعين..

ياسر: اي هاهيه عليمن تدور وتتعب اتفق وياهم..

روسلينا: وين مكان البيت كون قريب على بيت خالتي ان رضا..

علي: يعني مسافة 10 دقايق بالسيارة..

مُهره: يعني راح ترحون كلكم...

ياسر: اي ونبقى وحدنه...

حچاها وغمز و مُهره هزت ايدها ودارت وجها.

ام رضا: ان شاءالله الله يرزقكم اطفال ويملي عليكم البيت يا بعد گلبي..

الكل: ان شاءالله

گعدنه نتعشى والكل يسولف ويضحك كلنا انتبهنا على علاقة ياسر و مُهره متصالحين يسولفون سوه ويضحكون و كل شويه يجي يمها يگعد ويبقون يحچون بصوت ناصي..

كلنا فرحنالهم لان من صدگ هوواي تعذبو بحياتهم..

ثاني يوم رحنه للجامعه اول ما دخلنه شفت ديار منتظرتنه سلمنه عليها بس مو من عوايدها ساكته ومتگمز من تسولف..

مُهره: شبيچ؟

ديار: مابيه..

افنان: مبينه ضايجه سولفي...

ديار: البارحه منايمه نعسانه..

مُهره: شعجب؟

ديار: مادري بقيت طول اليل افكر...

افنان: خاب شني اجچي نجدي منچ...

ديار: خابرت عمتي ام مالك بابا وووو....

مُهره: راح تنضربين بالنعال احچيييي..

ديار: ومرض اصبرن استحي...

افنان: هههههههه.. ديلا..

ــ ايي.. گلتله اريد اخطب ديار المالك..

مُهره: صدگ؟

ديار: اي والله..

مُهره: وشگال ابوچ؟

ديار: گال انطينه مجال شهر اخلص شغلي واتفرغلهم..

مُهره: جاي يسويله مصيبه اكيد..

افنان: حياتي بالتوفيق ان شاءالله...

ديار: يروحي شكراً..

مُهره: تعالي احطچ على گلبي..

افنان: ترى اغااااار..

مُهره: تعاالي..

ديار: ما اتخيل نفسي اتزوج مالك...

مُهره: ليش؟

ديار: مادري... هو بخيالي موجود واتخيله بكل التفاصيل موجود..
بس من صارت صدگ مادري شعور يختلف..

مُهره: اي طبعاً...

افنان: يلا راح تبدي المحاضره..

مُهره: يلا...

بدينه بالمحاضرات الى ان خلصنه ورحنه بالخط ويه بنات ثنين بس ماعدنه علاقه وياهن مجرد سلام بيناتنه اول شي وصلهن وبعدين راح على طريق بيتنه..

ــ اگلچ اني ميته جوع بس كون امي مسويه شي احبه.

ــ اي حتى جوعانه..

ــ شفتي ديار شلون فرحانه..

ــ اي خطيه من صدگ فرحت الفرحتها...

ــ اني همين... يوم الألي..

ــ هههههه.. ان شاءالله..

ــ والعب لعب بعرسي..

ــ ولچ عـ......

ماحسينه السياره وگفت وطلع منه صوت انضربت بالكرسي الگدامي رفعت راسي اشوف ولد ملثمين فتحو الباب اليمي واليم مُهره والسايق سحلو يضربون بيه واني سحبوني من السياره واني ادفر واضرب احاول اوخره غطه وجهي بقطعة قماش وعيوني تدور على مُهره شفت واحد محاوطها وحاط على خشمها همين وصلنه وصعدوها بالسياره...

هنا اني ما گدرت بعد اقاوم استسلمت وغمضت عيني بتعب...

من بعد ما الظلام حاوطني اسمع صوت يمي...

ــ افنان.... افنااااااان... خويه فتحي عينچ...

فتخت عيني بتثاقل واشوف السايق وجها موم من الضرب...

ــ گومي خلي اوصلچ للبيت...

گمت اسحل بنفسي سحل وعيوني تتنقل بالمكان..

ــ و مُهره وين؟؟

نزل راسه وحچه بأسف

ــ اخذوها..

ــ شلون اخذوها؟؟
ليش اخذوها بس هي؟

ــ هما يردونها هي حاولت امنعهم بسهما عددهم هوواي ما گدرتلهم وحدي...

صعدت بالسياره ودموعي تنزل وگلبي يوجعني...

دخلت للبيت واني احس حيلي كله رايح و ما اگدر اصيطر على رجفت جسمي...

تلگتني امي عبالك عرفت صاير شي..

ــ وووولچ يممممه شبيييييچ منووووو سوه بيچ هيچ ولچ افنااااااان اصخااااام بوجهي...

روسلينا: افنان.... مُهره وووين؟؟

ام رضا: ولج احچيييي راح اااااموووت...

اجتي يمي روسلينا لزمتني من اكتافي وهزتني بقوه وحچت..

ــ افنان..... شكو شصار مُهره وووين؟

گعدت بالگاع ولطمت على وجهي وگالت....

ــ خطفوووو مُهره اخذوهااا....

امي گعدي گدامي وهي تلطم...

ــ ولچ وووين اخذوووها البنيه وووين ودوها...

ـــــــــــــــــــــــ

«روسلينا»

ركضت للموبايل اتصلت على علي جاوبني..

ــ شلونه غرامي؟

حچيت بهدوء حتى ما اخوفه..

ــ الحمدلله حبيبي..
اگلك علي شوكت ترجع..

ــ ارجع باليل...

ــ لا حباب تعال هسه..

ــ ليش شكو شصاير؟

ــ مُهره ماكو...

ــ شنو يعني ماكو؟

ــ اجتي افنان وحدها من الجامعه..

ــ ايييي...

ــ تگول مُهره خطفوها..

ــ خررررب ابوي الگ***
ياسر بالبيت؟

ــ لا محد بالبيت الولد طالعين...

ــ يلا خوش اني راح اگللهم سدو الباب زين ولا تفتحيه لاي واحد روسلينا ما اوصيچ...

ــ تمام...

رحت الأفنان گومتها من الگاع...

ــ خابرت علي گال هسه نرجعه لا تخافين تعالي سبحي واني راح اجيبلچ ملابس...

رحت الخالتي بعدها گاعده بالگاع وتبچي..

ــ خاله حبيبتي گومي علي گال هسه نروح نحل الموضوع لا تخافين.

گومتها ورحت طلعت ملابس لافنان انطيتهيا واسمع صوت شهگاتها شويه وطلعت...

مرت نص ساعه ودخل ياسر وعلي بي ياسر وجها ميتفسر من الغضب حسيت عيونه تريد تنفجر..

قرفص گدام افنان وحچه بحده..

ــ احچيلي من البدايه...

بدت تحچيله افنان ودموعها تجري وعلي مكتف اديه واگف ومنتچي على الباب ويسمعلها بتركيز...

ام رضا: شلووون بيه خاله اريد بنيتي جيبوها..

علي: ان شاءالله حبيبتي لا تخافين..

ياسر: اني خلص صبري ويه باقر بعد ما يوگف بعيني لا ابووي ولا احترام...
اذا ما ابهذله تبهذل بسيطه..

علي: نگل للشرطه؟؟

ياسر: طبعاً...
گومي افنان بدلي وتعالي ويانه..
علي اتصل على ابو الخط خلي يجي بسرعه...

چان البيت كله قلق على الراح يصير..

ـــــــــــــــــــــــ

«علي»

صعدت بالسياره اسوق وافنان گاعده وره وياسر يمي والسايق اجه ورانه المركز الشرطه دخلنه حچتلهم افنان والسايق وسئلو ياسر تشك بواحد لو عدها اعداء...

ــ اي ابووي اكثر من مره هددها..

ــ يعني ابوك يهدد مرتك؟

ــ اي ميحبها ويوميا مسويله مشكله وياها..

ــ تمام...

رحنه للبيت رجعنه افنان ورحنه فرينه بيوت ابوي كلهن حتى المستودعات مال بضاعته دورناهن واحد واحد صار نص اليل واحنه بعدنه...

رجعنه للبيت هلكانين من التعب اول ما دخلنه تلگتنه خالتي ام رضا...

ــ هااا يمه ما لگيتوها...

علي: لا والله خاله ماكو..

رضا: ابوكم سواها موو؟؟

ياسر: مو ابووي لا تگول ابوووي ميشرفني واحد عااار مثله يصير ابوووي..

گعد على وحط راسه بحضن خالتي...

ــ تعبت خاله تعبت شوكت اعيش ويه مرتي مثل الناس..

ــ الله لا يوفق الچان السبب سوده عليه يايمه...

حسيت بنبرة صوته يبچي...

ــ خاله اني احبها كلش احبها هي الشي الوحيد بحياتي صح...
شلون اخذوها خاف يئذونها؟

رضا: گوم خوويه مو وقتها هسه تضعف..
مُهره قوويه ومتخلي واحد يتجاوز حدوده وياها...
امشي تعال وياي احچيلك شي يخلينه نهد حيل ابووك ويطيح حضه ويجي هو يتوسل بينه...

رفع راسه ياسر وگله...

ــ شنووه؟؟

ـــــــــــــــــــــــ

«مُهره»

فتحت عيني لگيت نفسي بغرف فارغه مابيها اي شي بس فراش بالگاع شامريني عليه اديه ورجليه مربوطه..

صحت بصووت عاالي...

ــ منووووو هناا سااعدووووني....

محد يجاوب بقيت ساعه ما اعرف اكثر وشفت باقر دخل وهو مبتسم سد الباب وراه وگعد گدامي...

ــ هلاااا والله بچنتي الغااااااليه...

ــ الله لا يوفقك ان شاءالله...

ــ تؤ تؤ تؤ.... اكو چنه تحچي ويه عمها هيچ؟

ــ شترررريد احچي من الأخير؟

ــ عفيه عليج حبيبتي تربيتي..

ــ اني تربية امي وابوي انته شنووو؟؟

ــ اني زوج عمتچ...
المهم خلي اسولفلچ من الأخير..

ــ احچي لان مطايقتك...

ــ اني اريد شكو شي اخذتيه من القاصه مالتي ترجعينه..
وبهاي الطريقه انتِ ترجعين سالمه غانمه الزوجچ...

ــ لو تذبحني ما اطيكياهن خووووش؟
تحلم انطيك ورقه وحده...

ــ لعد استلمي المصايب الراح تنزل على راسچ..

ــ اعلى ما بخيلك اركبه...

ــ ياسر يدور عليچ بكل مكان خطيه عباله اني غبي ليچ بمكان يعرفه..

عافني وطلع شويه واجه واحد حط صينيه بالگاع وفتح اديه وحچه بـ صوته الخشن..

ــ اكلي...

عافني وطلع اني من صدگ انهاريت اول مره هيچ اخاف بحياتي حسيت عظامي كلها ترجف ضميت رجليه الصدري وبچيت بعدين حسيت صوت قريب يم الباب مسحت دموعي وگعدت عدل اخذت بطل المي وشربت منه ورجعته بمكانه وگفت عدلت ملابسي فتحت الباب ونفس ما توقعت مقفول رحت للشباك اريد اشوف اني وين حاول افتحه ما گدرت باوعت داير مداير المكان حديقه...

وعلى صفحه سياره سوده...

بقيت اروح منا واجي منا افكر بحل ممكن يطلعني منا..

تقربت للباب ودگيته....

ــ منووو هنااا؟؟

رجع حچه نفس الصوت المساع دخل جاب الأكل...

ــ شتردين؟

ــ اااا... اريد ادخل للحمام..

فتح الباب ولزمني من زندي حيل وسحبني ودخلني لحمام وسد الباب بگلبي گلت...

ــ گبرر چنك وحش مو بشر...

حاولت اشوف اكو شي اهذه يساعدني اخاف واحد يريد يأذيني بس كولشي ماكو اكو شباك صغير حاول افتحه مينفتح...

ــ يلاااا...

ــ اجيت... بهمس وسم السمك..

طلعت لگيته واگف بالباب رجع لزمني من ايدي...

ــ عوفني لا تلزمني هيچ...

ــ امشششيي...

ــ لا تجرني.

دگ موبايل رد عليه وهو يسحل بيه للغرفه..

ــ تمام...
امممم..
هذا دلال وراتب...
الله وياك.

گلبي نغزني من حچيه وحسيته راح يسوي شي..

شمرني بالغرف وگعت على ركبي..

ــ كسر بيدك ان شاءالله...

ــ يلا بده اللعب الحقيقي..

تقرب مني ونزع الحزام واني اسحف ليوره وگلبي راح يطلع من مكانه خفت خوف عمري ما خايفته...

ــ اول شي نبدي على الخفيف.
اذا ما فاد وياچ نلعب على الثگيل..

ــ شتريد تسوووي؟؟

سحب الحزام من بنطرونه وتقرب عليه وضربني بيه بكل قوته على ايدي وظهري...

احتاريت شسوي من الوجع عطت بصووت عالي وحسيت روحي طلعت...

ــ وين الأوراق..

اني ما أگدر اتنفس مو احجي....
رجع رفعه وضربني مره ثانيه حاولت اوخر بس اجتي الضربه بكتفي وبقوه اكبر...

گامت دموعي تنزل بدووون توقف گمت من مكاني وحاولت اطلع لان روحي فرفحت ظربني على رجليه...

ــ ماكو طلعه اليوم لو تحچين لو يصير شي متريده اي بنيه..

بقه يضر ب بيه الى ان حسيت بعد ما اسيطر على عيوني حاوطني الظلام..

گعدت ما اعرف شگد وقت مر..

فتحت عيوني وجسمي كله يوجعني گعدت لگيته گاعد گبالي اول ما شافني گعدت ابتسم...

واني گلبي وجعني وتذكرت كلامه..

ــ ماكو طلعه اليوم لو تحچين لو يصير شي متريده اي بنيه..

ــ شتريد؟؟

ــ گلي اضربها اذا ما فاد وياها اغتص**
فـ أحچي اشرفلچ...

حچيت واني الخوف مالي روحي...

ــ اغتصبني وموتني ولا اطيك الاوراق...

ــ ها تفكرين بيه ترديني ارتاح اشكر جهودچ..

تقرب عليه واني نايمه على ظهري وصلت ريحته الكريها قبله حاولت اتحرك بس جسمي كله يوجعني...

نام فوگاي واني روحي طلعت بسرعه ضربته كف على خده وهو ولا تحرك گعد على بطني ولزم اديه ثنينهن ورفعهن فوك راسي وتقرب عليه...

عطت بصووت عاااالي بس ميفيد...

ــ ووووووخرررر...
يااااربِ
يااااربِ ماااعندي غيرك...

وخر شتريد اسوي بس ابتعد عني عليك الله...

يتبع🦋....
ــــــــــــــــــــــــ

گلولي شنو رئيكم بالبارت
لا تنسون التصويت والتعليق بين الفقرات