رواية خيِّال ومُهرة الفصل التاسع والثلاثون 39 - بقلم amna

«بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

"يمكن ان تسمع صوت احدهم من خلال لوحة ويمكن ايضاً ان ترى لوحة من خلال قصيدة ما ، كل ذلك موجود في عبقرية التخيل.."

ــــــــــــــــــــــ
«سجى»

گعدت لگيت نفسي بالمستشفى
واكف قريب مني مالك ومُهره..

ايد مالك تمسح على شعري وكل
شويه يبوسني ويگولي..

ــ وگفتي گلبنه عليچ...

ــ اسم الله على گلبك حبيبي..
خلي نروح للبيت...

ــ اي هسه بس يخلص المغذي..

ــ شلون جبتوني بهاي الملابس..

مُهره:  الحمدلله على السلامة..

ــ الله يسلمچ..

انتظرت ربع ساعه ومالك ومُهره
ساعدوني اگوم بعدها الدوخه ملازمتني
طلعت من الغرفه الچنت نايمه بيها.
وبالباب واگفين ياسر وراشد ورضا
استغربت شعدهم كلهم جايين كلهم
گالولي الحمدلله على السلامة..
رديت عليهم وطلعنه بسيارة رضا اني
ومالك ومُهره والبقيه بسيارة ياسر..
گعدت ويمي مُهره گالتلي..

ــ بعدچ دايخه؟

ــ لا بس من اوگف..

ــ هسه من نرجع اكلي وان شاءالله
تصيرين احسن..

ــ ان شاءالله.. شكراً مُهره تعبتكم وياي..

اول ما گلت هاي الجمله باوع عليه رضا
بالمرايه و مالك يسولف وياه..

مُهره:  لا بالعكس..

حسيت شعري ضايقني لفيته كبايه
وبقيت طول الطريق اباوع على الطريق
واحس بالتعب جسمي متكسر..

وصلنه للبيت وماما كلش قلقانه بقيت
اگللها اني زينه مابيه شي وياسر جابلي
عشا وعصير اخذته ديار تحطلياه بصينيه
باوعت على رضا واگف يم الباب ويباوع
عليه استغربت من نظراته وحاولت اتصرف
طبيعي  بس قلقني..

سمعته گال الـ مالك راح يروح..
اجت افنان وامها سلمو عليه وطلعو واني
تعشيت ونمت الثاني يوم گعدت لگيت ماما
نايمه يمي اخذت موبايلي فتحته لگيت رساله
قبل ساعه راسلينها اليه فتحتها مكتوب..

ــ شلون صرتي؟

ــ منو؟

ــ افنان...

استغربت افنان لا تسلم لاتگولي على اسمها
بس تكتب (( شلون صرتي)) رديت

ــ اهلاً  افنان  .. الحمدلله احسن...

وقفلت الموبايل ورجعت نمت وبقيت طول
الاسبوع اني ممداومه بقيت بالبيت ومالك
طلب من رضا يطلبلي اجازه..

گعدت الصبح كالعاده بدلت و تريگت وطلعت
للدوام اول ما دخلت الكل اجه سلم عليه وگالي
الحمدلله على السلامة وهاي الشغلات..

انتبهت على ميز رضا ما موجود بعده مجاي
رحت المكتبي گعدت وبنيه مسويه قهوة انطتني
شكرتها واخذته لان احب القهوة ما اگدر ارفض
وهي بنيه مو ولد لو ولد اكيد ما اخذ منه...

دخل رضا وسويت نفسي مشغوله بالاوراق
بس اني تفكيري كله يمه سولف وياهم وهما
ياكلون بعدين راح المكتبه..

ــ شلونج سجى؟

ــ اهلاً  رضا الحمدلله..

رفعت راسي باوعت عليه  لابس قميص
ابيض وفوگها كوت اسود وبنطرون اسود
و شعره مرتب  ...

نزلت راسي ورجعت اكتب واحاول اتناساه
هو موجود يمي شربت القهوة وگمت انطيت
للبنيه الفنجان و غسلت اديه ورجعت المكاني..

بقيت النهاية الدوام واني ما مخلصه شغل
كلش تعبت ومتت من الجوع اغلب الموظفين
طلعو بقيت اني وكم واحد بقه قليل گلت اخلص
بسرعه واطلع..

من خلصت باوعت للساعه4 رفعت راسي المكان
فارغ واني فاصله گمت شفت رضا گاعد بمكتبه
حاط ايده على خده ويباوع عليه...

ــ واخيراً  .... يلا امشي..

ــ شنو منتظرني؟

ــ اي خو ما اعوفچ وحدچ هنا...

ــ ماله داعي لو رايح..

ــ ما ماخذ رئيچ..

ــ استغفر الله...

ــ يلا امشي..

اخذت جنطتي واني اصبر بروحي
ما اچفص بطنه يتأمر عليه اموت
من هذا الاسلوب بس اول وتالي
هو منتظرني حتى ميصير بيه شي
لازم اتعامل ويه الموضوع بصبر...

مشيت طلعنه من الغرفه مالتنه وهو
قفل الباب لگيت المنظفه جاي تغسل
بالمكان كله مي باوعت عليه من فوگ
ليجوه وبعدين باوعت على رضا  نفس
النظره اني ما تحملت..

ــ شبيچ تباعين شكوو؟

دارت وجها وراحت شلون ناس ياربِ
سمعت رضا يضحك باوعت عليه وگتله..

ــ ضحكني وياك؟

ــ انتِ شبيچ تعاركين؟

ــ ما شفتها شلون تباوع علينه؟

ــ شعليچ بيها خلي تباوع..

ــ انت تقبل واحد يباوع عليك هيچ اني
ما اقبل..

ــ اني ميهمني شلون يباوعون عليه
المهم اني شلون اباوع النفسي الباقي
مو مهم...

نزلنه الدرج وهاي مفيضه الدنيه كله
حسيت راح اوگع لان لابسه كعب عالي
لزمت المحجر ونزلت بهدوء وسمعت رضا گال..

ــ احنه الطابق الثالث اذا تبقين هيچ
تنزلين باچر نوصل...

باوعت عليه وفتحتله الطريق..

ــ فوت قبلي اني باچر يلا اوصل..

رفع راسه ليفوگ وضحك بصوت عالي
والمكان فارغ صوت ضحكته مله المكان..

اباوع عليه هو يضحك وحتى مادري على
شنو يضحك...
بس اني مثل الثوله ضحكت وياه..

ــ صدگ حچي ياسر من گال  تشوفها
من بعيد تحكم عليها شكل ومن تتقربيلها
تحكم عليها شكل..

ــ ليش هسه انت تقربت مني؟

ــ مادري بس احس تصرفتچ وياي مو نفس
البقيه...

ــ لا غلطان..

حسيت جسمي رجف واديه اليوميه بارده مثل
الثلج صارن حارات  لان اني من صدگ احس
نفسي اعامله معامله تختلف..

نزلت بسرعه نسيت المي والكعب وهو گال

ــ على كيفچ يمعوده..

حطيت رجلي على البايه مال الدرج وتزحلگت
رجلي وگعدت على الدرج ..

باوعت على رضا  ركض بسرعه و نظربت ايده
بالحديده مالت المحجر وصار شگ باطن ايده
وطلع دم..

هو ما هتم واجه عليه وهو يحچي بقلق
قرفص گدامي وكال ..

ــ بيچ شي؟ تعورتي؟

واني اباوع على ايده التجري دم..

ــ ايدك...

سحبتها اباوع بيها صاير شگ چبير جريت
الشال من رگبتي ولفيت ايده وشديتها حيل
و احس الدموع متجمعه بعيوني بالگوه مسيطره
عليهن حتى ما ابچي وافضح نفسي..

گمت شلت جنطتي  واني اتجاهل اباوع بوچه..
لزمت ايده بدون ما احس بنفسي ونزلت الدرج
امشي بسرعه...

ــ لازم نروح للمستشفى و نخيطها..

مشيت بسرعه الحد ما وصلت السيارتي
فتحت الباب ودرت عليه گتله..

ــ يلا اصعد بسرعه...

اباوع عليه هذا مبتسم ويباوع عليه..

ــ شبيك؟؟

مسح وچه وگال

ــ مابيه شي...  راح اروح اني للمستشفى بسيارتي
انتِ رجعي للبيت..

ــ هاا...  تمام..

صعدت بالسياره وهو راح السيارته باوعت اديه
ترجف وگلبي يدگ بسرعه اريد استوعب اني
شنو جاي يصير بيه...

ليش اني يم رضا  مو نفس البقيه وليش خفت
عليه من شفت الدم...

شبيچ سجى عاادي اني اي واحد اشوفه مضروب
وايده بيها دم اكيد اتصرف هيچ واخاف..

بس اني ادري بروحي مو طبيعيه حطيت ايدي على گلبي وسحبت نفس وشغلت السياره ورجعت للبيت

صبتلي ماما غدا تغديت ونمت گعدت المغرب..
افكر بيه شسوه و ايده صارت زينه تذكرة رقم
افنان العندي لزمت الموبايل كتبت رساله
ومسحتها ورجعت كتبت اريد ارسلها بس
ما اكدر شمرت الموبايل وگمت نزلت جوه

لگيت زينب وديار گاعدات گعدت يمهن وهنا
يسولفن بالملابس و المكياج..

ــ شنو وين جاي ترحن؟

ديار:  باچر خطبة افنان..

ــ هاا..

زينب:  تجين؟

ــ اي...

زينب:  شعجب؟

ديار:  شتردين منها خلي تجي..

زينب:  اني گلت حتى بخطبتي متجي..

سجى:  زين اجي هي غير بـ بيتنه..

زينب:  اي گلت هسه تطلعين علمود الهوسه..

ديار:  سجى معليچ بيها هاي عقلها مضروب..

سجى:  ادري بيها...

زينب:  هسه رجعنه من السوگ رحت اشتريت
فستان الخطبه واجرت كوشه وكيك وحضرت
كلشي حتى باچر اروح للخطبه ما عندي شي..

سجى:  ان شاء الله... بس واني شلبس؟

ديار:  اني بعد شويه گلت المالك ياخذني
اشتريلي فستانين وحذاء تعالي ويانه..

ــ ها تمام.. 

ديار:  يلا گومي نبدل راح يجي مالك
واذا لگانه مامبدلين يعوفنه ويروح..

رحنه للمول وكلشي ما عجبنه رحنه الثاني
وبالگوه لگيت واحد واقتنعت بيه..
رجعنه للبيت هلكانه تعشيت و رحت الغرفتي
فتحت موبايلي و رحت اتصلت بـ أفنان لان
كل الوقت گاعده افكر بيه..

چنت منتظره ترد عليه افنان بس اجاني
صوته رجف گلبي..

ــ الوو...

يبوو عليه هسه شسوي و شگول...
سويت روحي ماعرفته..

ــ الوو.. افنان؟

ــ اخو افنان وياچ..

ــ ها هلا رضا..
وين افنان؟

ــ هذا رقمي..

ــ ذاك اليو...

قاطعني..

ــ اني دزيتلچ الرساله وگتلچ اني افنان...

ــ ليش؟

ــ مادري.. چنت اريد اطمن عليچ وما لگيت
غير هاي الچذبه گدامي..

بقيت ساكته و هو همين..

ــ خيطة ايدك؟

ــ اي..

ــ توجعك؟

ــ لا..

ــ يلا اني حروح... باي..

ــ الله وياچ.. 

سديت الموبايل و ذبيت نفسي على السرير
وايدي على گلبي وابتسامتي شاگه حلگي..
احس بروحي  ثوله من گد ما فرحانه...

ثاني يوم رحت للدوام ورجعت حضرت نفسي
لبست الفستان «مثل البلصوره» الشتريت البارحه وحطيت مكياج وفتحت شعري..

ورحت للخطبه مالت افنان بسيارة مالك..
اول ما وصلنه الشارع كله ولد وگف السياره
بـ الباب ودخلنه للبيت بسرعه حتى محد يشوفنه
بس اضحك على روحي محد شافني واني لابسه
ماروني...

دخلنه جوه سلمت على البنات وصلنه شويه متأخر
لگينه افنان وزوجها يعقدون بقيت واگفه اباوع عليهم
ومدري ليش خطر ابالي ان يجي يوم واگعد
نفس افنان واعقد من شخص احبه..
استغربت من قبل ابد ما افكر هيچ تفكير
او اگول نفس البنات الباقيه..

«انو راح يجي يوم واتزوج»

طردت الأفكار من بالي ورحت يم مُهره و ام رضا
من خلصو عقد الكل يهلهل ويهوسون شال زوجها
الغطه منها وابتسم وباسها بجبينها واني و مُهره
ولبسها الذهب.

وزعنه كيك اني و مُهره و ديار..

مرت ساعه وطلعو لمينه الهوسه اني والبنات
وافنان بدلت واجت ويانه ومبين عليها شگد
فرحانه وكل شويه تصفن..

تعبت ورجليه يوجعني من الكعب..
رحت يم الباب مالت المدخل حتى انزع الحذاء
لان الحفله خلصت ورجليه يوجعني كلش..

دنگت فتحت الحذاء وگمت شعري نزل على
وچهي وخرته وشفت رضا وياسر واگفين گدامي
جاي يدخلون للبيت..

سلمت عليهم ورحت گعدت يم ماما و ام رضا..
هما اجو وگعدو يمنه وكل شويه تروح عيني
على رضا گاعد يم افنان ومحاوط كتفها بأيده
ويتشاقه وياها..

رجعنه نص اليل هلكانين سبحت ونظفنه البيت
لان باچر خطبة زينب وقررت اخذ اجازه الباچر
لان مترهم خطبة اختي واعوفها واروح للدوام..

دزيت رساله للمدير ونمت گعدت ثاني يوم من
الصبح اجو اليسوون الكوشه وبقيت يمهم كل
شويه اگللهم يسوون شي وديار سوت غدا
وماما ويه زينب بالصالون..

تغدينه على السريع ورحنه اني وديار بدلنه
لبست اليوم فستان ضيق على الجسم لان
بـ بيتنه ومستحيل واحد غريب يدخل

حطيت مكياج ورحت الديار لگيتها مكمله
نزلنه سوه لگينه زينب جايه وطالعه تجنن
دمعة عيوني من شفتها رحت بستها..

ــ طالعه تخبلين..

ــ صدگ ولچ گلبي راح يوگف من القلق..

ــ اقري ايات قرانيه..

ــ تمام..

عفته ورحت كملت التحضيرات ويه ديار..
الى ان اجو مُهره  وام راشد  وافنان وامها.
واقارب راشد خالاته وبناتهم..

سلمت عليهم ودخلتهم شويه وگال راح
يعقدون واني گلبي ضل يدگ بسرعه
اباوع على شكلهم شگد حلو ودمعت عيني..

خلصو عقد لبسها الذهب واني واگفه يم زينب
مبينه الفرحه بعيونهم شكلهم كلش حلو..

رحت قدمت الكيك للناس وديار همين وياي
خلصت الحفله وكل الناس راحو بقت بس
مُهره و روسلينا و ياسر وعلي ورضا وافنان
وراشد وزينب راحو گعدو بالستقبال والولد
گعدو بالصاله واني كملت ترتيب المطبخ..

ديار راحت لبست حجاب واني نحبست بالمطبخ
لان فستاني ضيق كلش وبيه فتحه چبيره..

فتحت الباب مالت الحديقه ورحت يم شباك
الاستقبال اشوف زينب وراشد شيسون
وانصدمت و وجهي گام يطلع حراره من الخجل
ركضت بسرعه وخرت منهم عزا بعينهم ولا يستحون

تقربت للمطبخ وسمعت صوت رضا هو ومُهره
يسولفون بقيت بره لان ما اگدر ادخل يم رضا
بهذا الشكل..

مُهره:  شبيها ايدك؟

ــ ما بيها شي ضربه خفيفه..

ــ شو هاي الايام مادري احس بيك ضايج؟

ــ راح اگلچ شي خليه بيناتنه..

ــ تمام..

ــ مادري شبيه بس احس بروحي معجب بـ
سجى..

حسيت گلبي راح يوگف حطيت ايدي على گلبي
وبقيت استمع الهم بتركيز لان يحچون بصوت
ناصي كلش..

ــ صدگ.... اي خلي نخطبها الك...

ــ بس احسها مو نفسي يعني ما اگدر اتقبلها
كزوجه لان متشبهنه افكارها وتقاليدها تختلف
و حجابها ولبسها كلهن ميشبهني مُهره اني ما
احب هيچ احب البنيه الملتزمه بحجابها..
بنفس الوقت البارحه شفتيها شلابسه من اجت
للخطبه فستان ماروني ونص جسمها طالع الولد
كلعا ضلت تباوع عليها...
اني ما اگدر اتقبل هذا الشي ابد مهما تطورت الدنيا..

ــ مادري شگولك..

ــ لا تگولين شي ميحتاج بس ردت احچيلچ..

من سمعت حچيه نزلت دموعي وايدي بعدها
على گلبي واحس الوجع انتقل بكل جسمي..

بقيت 10 دقايق ما متحركه من مكاني بعدين
گلت النفسي..

ــ اني شبيه ليش جاي اسوي هيچ شنو هالغباء..

مسحت دموعي و دخلت للمطبخ چانت جنطة
المكياج على الكاونتر طوخت حمرتي الحمره..
وحطيت كونسيلر تحت عيوني وطوخت الكحل..
ودخلت يمهم..

چان تصرفي غلط بس ردت احرگ گلبه واضوجه
فتت للصاله گلت

ــ السلام عليكم..

ردو السلام ورحت للدرج و رافعه راسي..
وكل قوه بداخلي طلعتها البره...

چانت عينه عليه واني امشي الحد ما صعدت
الدرج وهو باوعو عليه حطيت عيني بعينه.
للحظات چنت اتمنا اگول..

ــ اختارك گلبي لان عباله انته تختلف...
اختار گلبي لاول مره..
وخذلته انت...

و من هاللحظه اتظاهرت ان هو ميهمني
وتجاهلته بمعنى الكلمه حتى من يسلم عليه
مرات اغلس واسوي نفسي ما سمعت...

ـــــــــــــــــــــــ

«أفنان»

مر اسبوع واني احضر للعقد وساعدتني مُهره 
كلش تعبت يلا سويت كلشي نفس ما اريد..
اخذنه رضا بسيارته اني ومُهره للسوگ اشتريت
فستان و رجعنه جربته كولش حبيته..

ثاتي يوم گعدت الساعه بـ 9 الصبح رحت للصالون
وياي اجت روسلينا سوولي مكياج كلش بسيط..
وتسريحه ناعمه وتاج و رجعنه للبيت الظهر لبست
الفستان «يشبه البلصوره»

گعدت بالمكان جايبين الكوشه ومرتبين المكان
طالع يخبل..

مرت نص ساعه واجو دخلت امه واخواته ثنين
اول شي يهوسن ويرگصن حسيت متت من الخجل
بقن يهوسن الى ان گالو راح يعقدون غطتني
روسلينا وحطت رجليه بمي وفتحت القران
وخلته على رجليه و دخلو واني احس كل
جسمي يرجف حتى من رديت على الشيخ
بصوت يرجف..

خلص الشيخ وطلع واجت مُهره  اخذت المي
والقران ورفع الغطه من راسي  باوعت عليه
ابتسم وباس جبيني.. 

بعدين تقرب يم اذني وهمس..

ــ واخيراً صرتي حلالي..

باوعت عليه وابتسمت چان لابس ستره سوده
وبنطرون اسود وقميص ابيض ورباط اسود..

لبسني الحلقه ودنگ باس راحت ايدي واني
لبسته الحلقه واحس فراشات صارت بصدري
من الفرحه..

لبسن السوار و بعدين اخذ الگلاده لبسنياها
ومن خلص باسني بخدي اخذنه صور هواي
ورجع يم الولد..

شويه وطلعو صعدت فوگ اريد ابدل واتصل
عليه رديت واني مبتسمه..

ــ اشتاقيتلچ..

ــ شبسرعه؟؟

ــ طالعه تجننين سحرتيني بجمالچ وسحلتيني
سحل وعيونچ من شفتهن تخربطت اوضاعي
واحتاريت منين اجر النفس..

بقيت ساكته الى سمعت صوت واحد صاحله..

ــ يلا اني رايح بعدين اتصل عليچ..

ــ تمام..

نزلت كملنه تنظيف البيت والكل راحو واني رحت
الغرفتي اريد انام هلكت من التعب اول ما تمددت
اتصل عليه فتحت خط وبقيت اسولف وياه ومدري
شوكت غفيت وما حسيت بنفسيمن گد ما تعبانه..

ثاني يوم ما داومنه رحنه الخطبة زينب رجعنه باليل
متأخر الوقت كلش..

رحت للدوام ثاني يوم  اول ما دخلت اتصل عليه..

ــ لا ترحين للقاعه اجيت اني وياچ نروح..

ــ تمام راح انتظرك..

بقيت واگفه مرت 5 دقايق واجه لابس قميص
وبنطرون لابس مناظر  شمسيه وجنطته بأيده
طالع يخبل والبنات كلهم يباوعون عليه.. 

ــ شلونچ بويه؟

ــ الحمدلله..

تقرب مني باسني بخدي..
واني نشف دمي واباوع على الكل يباوعلنه
فشلت فشله وگتله..

ــ احمد..

ــ عيون احمد..

ــ امشي خلي نروح والله فشله..

لزم ايدي ومشينه طول الطريق يتغزل
ويحچي كلام يذوب الگلب من جماله..

دخلنه للقاعه وچانت مزينه و كيك.
چانت كلش حلوه الكل اجه باركلنه..

ومن صدگ حسيت نفسي اختاريت الشخص
الصح...

يتبع🦋....

ـــــــــــــــــــــــ

لا تنسون التصويت والتعليق بين الفقرات

بعد بارت واحد وتخلص القصه باچر ينزل..