رواية خيِّال ومُهرة الفصل الثامن والثلاثون 38 - بقلم amna

«بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

ــــــــــــــــــــــ

‏‏لا تدع
‏الأيام
تأخذك منّي
‏لا تسمح
‏أن نكون يومًا
‏دون بعضنا...

                            ♡ــــــــــــــــــــــ ♡

«سجى»

گعدت من النوم واحس بنفسي تعبانه وجسمي متكسر احس بصخونه داخليه ما اكلت شي عكس العاده بس سويتلي حليب شربته وطلعت للدوام..

واحس ما طايقه اي واحد هناك لا بنات ولا ولد..
طول الوقت يتشاقون ويضحكون مرات رضا يشاركهم بس قليل مدري ليش الگه نفسي مرات اراقبه وهو يشتغل لو من يحچي وياهم اركز وياهم..

واني طبعي ما اهتم باليحچي ابد..

واني ادخل للشركه شفت رضا دخلنه سوه گال...

ــ السلام عليكم..

ــ وعليكم السلام..

اني چنت لابسه بنطرون وقميص ولافه شعري وحطيت شويه مكياج لان مالي خلگ..

دخلنه للغرفه سوه وكالعاده بدت سوالفهم والريوگ وريحة البيض السلگ تلعب النفس ما اطيقها..

رحت الرضا گتله..

ــ عادي تفتح الشباك اليمك..

ــ اي عادي..

ــ اختنگت من الريحه..

ــ عبالي بس اني ما احبها...

ابتسمت بمجامله وهو گام فتحه واني رجعت المكاني بديت اشتغل..

واكو واحد اسمه حسن مزعج الدرجه عمره چبير وبس يباوع وحركاته تلعب النفس وكل شويه يجيبلي شي وارفض وحتى ما ابتسم بوچه ومرات يحاول يحچي وياي اعوفه واروح..

اعرف هسه تگولون اني قليلة ذوق بس ما احب اجامل ابد الاحبه والاكرها ابينله بسرعه..

تقرب للميز مالتي وبيده كوب شاي گال...

ــ لا ترفضين مره وحده اخذي مني..

حطه على الطبله..

ــ ما اريد بلا زحمه اخذه وياك..

ــ اريد اسئلچ سؤال انتِ على شنو شايفه نفسچ هيچ نرى طبعچ يلعب النفس..

ــ عفواً....
اني طلبت منك تنطيني رئيك بيه؟
وبعدين اني گايلتلك تعال احچي وياي؟
شگد ناس متستحي...

شو هذا لزم الجاي وگلبه على الأوراق العلى الميز باوعت عليه مصدومه..

واحس ذرة عقل مابقه براسي..

ــ هاااااي شسوووويت؟

ــ علمود تحترمين نفسچ وتحچين عدل...

گمت من مكاني اريد اروح يمه ارگعه على وچه القذر..

بس ما حسيت الا انسحب حسن ورضا ضربه بوكس من گد ما قوي وگع بالگاع و يطلع دم من حلگه..

ابتسمت على منظره بس بنفس الوقت ما اريد واحد. يتورط وياي..

صارت هوسه واحد يجر طول واحد يجر عرض الحد ما دخل المدير وصاحلي اني وحسن ورضا رحنه الغرفة المدير..

المدير: شنو شبيكم زعاطيط...

سجى : استاذ حسن تجاوز حدوده وياي ورضا ضربه لان يستاهل لو ما ضاربه چان اني ضربته...

حسن:  وانتِ ما تجاوزتي؟

رضا: لا ماتجاوزت... متريد چاي منك شنو يعني غصب؟

المدير:  ليش انتو بيناتكم علاقه..

رضا:  منو؟

المدير:  انت و سجى؟

سجى:  لا اقاربي رضا...

المدير:  ها...  انتم حلو الموضوع بهدوء لا تتعاركون
وانت حسن لا تتقرب من سجى..

حسن:  ان شاءالله..

طلعنه من الغرفه حسن قبلنه واني ورضا سوه گتله...

ــ شكراً لان ساعدتني بس المره الجايه لا تتدخل ما احب اورط واحد وياي...

وگف وباوع عليه واحس من عصبيته راح ينفجر بوجهي..

ــ هو اني تورطت و انثولت انتِ شجاي تحچين...

بقيت صافنه واريد افهم كلامه نزلت راسي باوعت الأيده الضرب بيها حسن صايره حمره..

مديت ايدي ولزمت ايده ورفعتها بدون وعي مني وشهگت

ــ تعورت موو؟
توجعك؟

سحب ايده بهدوء من بين اديه وگال..

ــ لا مابيه شي..

ــ تمام...

ــ امشي خلي نرجع..

ــ اني راح اروح شويه واجي...

ــ وين رايحه؟ 

ــ اجيبلي عصير احس صار عندي هبوط من وره ذاك العار..

ــ ارجعي اني اجيبلچ...

ــ ما اريد اكلفك..

ــ ما تكلفيني..

ــ تمام..

رحت للغرفه واني افكر ليش قبلت هو يجيبلي عصير واول مره اسمع كلام واحد وما اعاند بقيت صافنه بتصرفاتي وياه..

ليش اتعامل وياه مو نفس البقيه؟
وشلون لزمت ايده وانقهرت..
وشلون شهگت...

مرات حتى اني اتفاجأ بردات فعلي وتصرفاتي..

مرت عشر دقايق اجه وبيده گلاصين سفري حط واحد على الميز مالتي وراح المكانه والكل يباوع علينه..

شربت العصير واني جسمي كله يوجعني واحس بتعب مو طبيعي..

بالگوه يلا خلص الدوام رجعت للبيت هلكانه من التعب سمعت صوت زينب بغرفتها تبچي استغربت فتحت الباب ودخلت لگيتها گاعده على  الچربايه وضمه رجليها الصدره وتبچي..

ــ شبيچ؟؟

دخلت وسديت الباب وگعدت بطرف السرير وگتلها...

ــ احچي شبيچ؟

ــ راشد شاف موبايلي من رجعني من الجامعه جاي يدخل على محادثتي وياه وشاف اسم واحد ويانه بالقسم...

ــ ليش شحاچيه وياه؟

ــ هو زميلي اسولف وياه سوالف عاديه على الجامعه ومره حچيتله على راشد...

راشد قره الرسائل كلها وتخبل من شافها وبقى يصيح عليه وگال من هاي اللحظه تنسيني..

ــ بصراحه تصرفچ مو حلو اني ما احب هاي السوالف..

ــ والله اني همين عمري ممسولفه ويه واحد بس محمد لان كلش حباب وعمره ما سوه سوالف مو حلوه..

ــ مادري...

مسحت دموعها وگالت انتِ شبيچ شو وجهچ اصفر..

ــ مابيه شي...

ــ هو انتِ يا يوم گايله بيچ شي؟

ــ راح اروح انام..

ــ ما تاكلين؟

ــ لا...

صعدت للغرفه سبحت ورحت نمت بفراشي بعد تفكير دام ساعه اخيراً  غفيت...

گعدت لگيف نفسي حرارتي مرتفعه وما اگدر اتحرك كلش تعبانه و مماكله شي من البارحه حسيت راح اموت من التعب رجعت نمت...

مدري شگد مر وقت گمت من السرير اريد انزل جوه يم ماما تسويلي شي اشربه لو اكله بس المهم شي يسويني زينه..

نزلت بالبجامه وشعري مفتوح واحس الحراره تطلع من عيوني سمعت صوت هوسه جوه يمكن عدنه احد بالبيت اگول ليش محد سئل عليه...

من وصلت النهاية الدرج الدنيا تفتر بيه اباوع عليهم كلهم يباوعون عليه مصدومين واني احس بعد ما اسيطر على نفسي من الفشله من شكلي وهمين ماعندي طاقه اوگف بعد حاوطني الظلام وبعد ماحسيت بشي..

ـــــــــــــــــــــــ

«افنان»

گعد على الكرسي الگدامي والطلاب كلهم يباوعون علينه...

ــ شلون بيج كل ما اريد اخسرچ
اطلع اني الخسران..

ــ استاذ ممكن تروح لان الطلاب كلهم يباوعون علينه..

ــ عبالچ راح استسلم من رفضتي..
راح يصير عندي اصرار بالزايد..

بقيت صافنه وگلت مادري شلون حچيت هيچ بس چنت مقهوره منه..

ــ واذا ما استسلمت تحاول تفشلني گدام الطلاب
لو تحاول ترسبني بالمتحان؟

ــ اي والله حقچ... تصرفاتي مال مراهقين..
بس وياچ رجعت مراهقتي واحس باشياء عمري ما متخيل نفسي راح اسويها...

ــ استاذ انـ...

ــ اني رجعت حاچيت رضا من جديد قبل شويه اتصلت عليه وگتله اريد اختك..

دنگت راسي وما رفعته الى ان گال...

ــ افنان باعي عليه...

رفعت راسي باوعت عليه گال ببتسامه...

ــ  دحَبيني شبيج مَتشوفين
أسَمر والغزل تارس عيُوني .

حسيت گلبي راح يوگف وجهي صار يطلع منه نار دنگت راسي بسرعه وهو ضحك بصوت عاالي..
حسيت العيون علينه ومستغربين من عنده هو بالسنه حسنه يضحك...

ــ يلا راح اروح ادري بيچ بگلبچ تگولين بس رووح..

راح واني رحت للحمامات غسلت وجهي بمي بارد واباوع على نفسي بالمرايه ابتسمت وخليت ايدي على گلبي واحچي ويه نفسي..

ــ شمالك ادگ ابسرعه بسك...

طلعت من الحمامات ورحت يم مُهره وديار..

خلص الدوام ورجعت للبيت كملت دراسه و نظفت البيت وباليل اجه رضا چنت گاعده بالصاله اباوع تلفزيون گعد يمي مر وقت بعدين گال...

ــ خابرني دكتور احمد يريد يرجع يخطبجمن جديد..

ــ ها..

باوعت عليه وگتله..

ــ خاف عيب بالبدايه گلنالهم لا وهسه نگللهم اي؟

ــ لا مابيها شي..

ــ اي بس لا تگله هسه اني موافقه خليه يومين ثلاثه يلا تگله...

ــ ماشي تأمرين أمر...

ــ تدري احبك هواي...

ــ واني احبچ...

مرت يومين اني اداوم ومغلسه على احمد حتى احاول ما اباوعله بس ما اقاوم كل شويه الگه نفسي صافنه عليه واتلاحگ الروحي و ادنگ..

اليوم الثالث من رجعت من الدوام تغديت اني ورضا همين چان راجع من الدوام وماما تسولفلنه..

ــ اليوم خابرني ياسر يگول اخوه راشد يريد يخطب بنيه ويريدنه نروح وياه...

افنان:  راشد؟

ــ اي يمه...

رضا:  ها خير ان شاءالله..

ام رضا:  اي يمه خطيه گال امه متقبل تروح البيت ام مالك..

افنان:  ام مالك؟

ام رضا:  اي غير يخطب اخت مالك..

شفت رضا چان مدنگ على الاكل ويسولف ويه امي من گالت اخت مالك ذب الملعقه ورفع راسه يباوع لامي و گال..

ــ سجى؟؟

ــ لا يمه الصغيره...

ــ هاا... 
ورجع ياكل

هنا افتهمت اخوي واگع ومحد مسمي عليه...

خلصنه الغده غسلت الماعين ورحت الغرفتي جاي ارتب بيها واندگ الباب..

ــ تفضل...
دخل رضا گال..

ــ اريد احچي وياچ..

ــ تعال..

دخل گعد على طرف السرير وطبطب على المكان بصفه  رحت گعدت يمه وحاوط كتفي بـ أيده..

ــ ها هسه  اگول الـ احمد متصل عليه واني اتغده..

ــ اي گوله..

ــ تمام...
اگلچ عود صدگ يعني راح ترحين يم رجلچ واحنه نبقى وحدنه..

ــ لا متبقون راح تجي سجى..

باوع عليه مستغرب وگال..

ــ شمعنه؟

ــ عبالك مادري بيك؟

ــ شتدرين؟

ــ مبين معجب بيها..

ــ اي معجب بيها بس هي مو نفس ثقافتنه..

ــ تتعلم على ثقافتنه مو مشكله..

ــ مادري الله كريم...
يلا انتِ بدلي نروح ويه ياسر..
واني راح اروح اخابر الدگتور..

رحت بدلت وكل شويه اشمر نفسي على السرير  فرحانه واطفر الى ان عاطت امي بيه بدلت على السريع وطلعت ورحنه البيت مالك...

گعدنه بالصاله كلنه سوه واني ما نازعه العبايه لان الولد كلهم سوه واني لابسه قميص  قصير وبنطرون..

قدمتلنه ديار قهوة وقطع مالت كيك..

ام رضا:  احنه اجيناكم بطلب اتمنا ما تردونه...

ام مالك:  يااخيه نشلع عيونه ونطيكم اياها...

ــ تسلم عيونچ يابعد حيلي.. 

ياسر: عمه احنه اجينه نطلب ايد زينب لاخوي راشد..

راشد متوتر مدنگ ويهز برجله  و زينب صافنه وما مستوعبه شكلهم يضحك..

مالك:  الله يقدم البيه الخير ان شاءالله...

وهما يسولفون نزلت سجى  لابسه بيجامه لونها بيجي وشعرها مفتوح واصل اسفل ظهرها و وجها احمر طالعه تجنن باوعت على رضا باوع عليها وتفاحت ادم البارزه تحركت.. مبينه تفاجئت من شافتنه..

بس شنو لحظات و وگعت على الارض وانرطم راسها بالگاع بقوه ركض عليها مالك شالها ورضا ركض طلع يشغل السياره وام مالك تدگ وتلطم هذا كله صار بلحظات البيت كله انگلب اخذوها وراحو الولد وراحت وياهم مُهره لان هما رادو وياهم وحده من البنات..

بقينه ننتظرهم بقلق اتصل عليهم محد يجاوب.
مرت ساعه واحنه القلق اكلنه اكل گاعدين كلنه
سوه ام مالك ماما گاعده يمها وتهدئ بيها وزينب
تبچي وديار ضامتها الصدرها واني گاعده اباوع عليهم...

اجو دخلو مالك لازمها من جها ومُهره من الجها الثانيه
تمشي بتعب گعدوها وبيدها كانيوله...

ام مالك:  ها يمه شگالو شبيها اختك؟

مالك:  مرتفعه حرارتها وصاير عدها هبوط لان ما ماكله شي اليوم كله..

ام مالك:  يمه سوده عليه حبيبتي بنيتي..

راحت يمها تبوس بيها وياسر گعد وهو وراشد يحچون بهدوء ويضحكون..

باوعت على رضا واگف يم الباب ومايل جسمه على الباب ومكتف اديه ويباوع عليها..

انقهرت عليه و هي همين كل شويه تحچي ويه امها تهدئ بيها وتباوع على رضا..

رضا:  يلا يمه خلي نروح..

مالك:  وين رايح ابقو تتعشون هنا..

رضا:  لا خويه والله تعبان اريد اروح انام..

مالك: اي تتعشون وترحون..

رضا:  وداعتك ما اگدر غير مره ان شاءالله..

مالك:  قافل.. يلا براحتك..

سلمنه على الكل ورحت السجى..

ــ الحمدلله على السلامة يروحي ان شاءالله عندچ العافيه..

ــ الله يسلمچ قلبي شكراً...

رجعنه للبيت سويت عشا اكلنه بس اني وماما لان رضا گال راح انام اول مادخلنه رحت الغرفتي كملت دراسه وفتحت الموبايل لگيت رساله جايتني من رقم مجهول فتحتها وبقيت صافنه..

منين جاب رقمي؟

ــ أتاكِ ملتزمًا بصلاته، لا يترك فرضًا، قارئًا للقرآن، محبًا لكِ يدعو الله بكِ في سجوده .

واخيراً راح نصير سوه بالحلال

يتبع🦋.......

ـــــــــــــــــــــــ

لاتنسون التصويت ..