رواية خيِّال ومُهرة الفصل الثاني والعشرون 22 - بقلم amna

بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

   
گُمت أتخَيلك ترجَع وأحاچيك
وأسولِفلك الصاير مِن عِفتني
عَلى يا هيَّ أعِذرَك ؟
صارَن هواي ..
بَس حچاية أكلك
" ضَيعتني " .

ـــــــــــــــــــــــ           

«ديار»

رحنه للمطبخ اني و مُهره وبقينه ثنينه واكفين و مصدومين..

ياسر اول ما شافنه لزم سجى من اكتافها وبعدها عنه وهاي مستمره تبچي وتناشغ من شافتنه واگفين مشت بسرعه طلعت من المطبخ وضربت مُهره بكتفها..

مُهره سوت نفسها ما مهتمه راحت للكاونتر طلعت الـ دله والقهوة ..

ديار : شنو شبيها هاي؟

ياسر : مادري شو دخلت من بره شمرت نفسها عليه وتبچي...

ديار : شگد متستحي ...

ياسر: مُهره...

مُهره: ها...

ــ ترى ما اكو غير الگتلچياه..

ــ تمام...

ديار : ضجتي؟

مُهره : لا على شنو اضوج...

طلع ياسر من المطبخ و مُهره تحاول تبين طبيعيه بس مبينه الضوجه بعيونها..

اخذنه القهوة و رجعنا يمهم بالصاله..

راشد : اگلك مالك شفته ذاك اليوم احمد
من رحنه اني وديار نشرب قهوة؟

مالك: اي هو چان ويانه گاعد ومن شافك گام..

راشد : شفته شلون صاير هيبه و لبس وحركات..

مالك: ترى هو لابس قاط ياحركات؟

ياسر: بعد ما تعرف راشد لازم يزيد شويه ويسويها دراما...

مالك : ايي والله نسيت ابو المصايب ذاك اليوم واحد خابرني صديقنه يگلي انته مو صرت مدير عام..
بقيت صافن گتله منو گلك؟
گالي راشد گلي..
گتله خويه هذا يخوط بصف الاستكان..
اني صرت مسؤول الشعبه مالتنه مو مدير...

راشد : على اساس اني افرق اذا چان مسؤول الشعبه لو مدير عام...

ياسر: چا المن تحچي سد حلگك واسكت...

راشد : شنو اليسد حلگي...

مالك: خيطه...

راشد : هو انته لو ما اني وياك تعيش بتعاسه...

مالك : منا البنات لا تخليني احچي..

ام مالك : يمممه شني شمالكم تتناگرون..

ياسر : زعطيط عمه عوفيهم..

مالك : رحم الله والديك

ياسر: والديك حبيبي...

ضحكت على سوالفهم باوعت المُهره صافنه

ــ الصفنه مو الچ گليبي...

باوعت عليه وابتسمت..

ــ اريد اصعد..

ــ ليش؟

ــ مادري تعبانه..

ــ تمام روحي اصعدي...

سلمت على عمتي وصعدت اباوع الياسر عينه عليها وهي تصعد..

هما شويه و طلعو وياسر صعد و راشد بغرفته رتبت البيت ورحت الغرفتي خلصت دراسه ونمت..

خلصت العطله مالت نص السنه وبدينه انداوم..
رحنه للدوام اني و مُهره...

واحنه گاعدين ننتظر الدكتور يجي للقاعه حتى تبدي المحاضره اجتي بنيه گعدت يمنه لابسه عبايه و شكلها يخبل نور الايمان مبين عليها حچت ويه مُهره..

ــ عادي استعار الملزمه بس اطبعها؟

ــ اي عادي..

انطتها مُهره الملزمه هي راحت شويه ورجعت انطت الملزمه المُهره وگالت..

ــ شكراً حبيبتي..
ــ عفواً حياتي..

ــ ممكن نتعرف الصراحه اني وحدي هنا وحتى كلشي ما اندل..

مُهره: اي طبعاً.. ابقي يمنه اني وديار..

ــ اني اسمي افنان...

ــ اني مُهره..
ــ واني ديار..

ــ تشرفت بيكم..

بقت گاعده يمنه بالمحاضره من خلصنه رحنه ناكل شي..

ديار: اني ميته جوع..

افنان: حتى اني جوعانه..

مُهره: خلي نطلب شي يشبع لان كلنه جوعانين..

ديار: اي مو مال لواگه وگهوة وكروسان..

افنان: هههههههه اني اريد همبرگر..

مُهره: حتى اني...

ديار: يلا خلي اروح اطلب مُهره تعالي وياي..

مُهره: مابيه حيل والله..

افنان: اني اجي وياج..

ديار: يلا امشي..

رحنه طلبنه اكل واخذناه ورحنه يم مُهره اكلنه وخلصنه و رجعنه للبيت افنان اطتنه رقمها حتى نتواصل..

مرت الايام وصرنه صديقات كله سوه ندرس و نحضر للفاينل..

و بيوم واگفين بالحديقه مالت الجامعه و افنان اجتي يمنه چانت بالحمامات..

وهي تمشي واني و مُهره نباوع عليها منتظرينها تجي حتى نطلع الراشد واگفلنه بالباب يرجعنه للبيت..

ما حسيت الا افنان اندارت وبقت تحچي ويه ولد..

رحتلها اني و مُهره تقربنا عليها واشوف الولد صديق راشد و مالك..

ــ اعتذر مره ثانيه..

افنان: ما صار شي..

ــ شبيچ افنان؟

ــ مابيه شي خلي نروح..

ابتعدنه منه وسئلتها..

ــ شكو شبيچ؟؟

ــ هذا الدكتور واني امشي داس على عباتي ونزلت من راسي...

ــ ها.. و شنو گلتيله..

ــ ما گتله..

ــ بس هو بقى يعتذر واني گتله ما صار شي..
بس ضجت بالبدايه من اعتذر سكتت..

مُهره: چنتي ناويه تعاركين..

افنان: لا وين اني ما اعرف الهاي السوالف..

ديار: ههههههه... كلنا عوبات..

مُهره: ديلا امشي خلي نشوف راشد..

رحنه للبوابه مالت الجامعه لگينه ياسر و مالك واگفين ودعنه افنان وصعدنه بالسياره اول ما وصلنا للبيت لگينه بابا واصل صوته للشارع اول ما دخلنا..

تقرب على ياسر وضربه كف...

ديار: باباااا... لاااااا..

مالك: شكو عمي شصاير...

بابا ولا عبالك واحد يحچي وياه يباوع بعين ياسر ويصيح بوجها..

ابو علي: منووووو گلك انت شنوو عبالك اني ما اگدر ادوس عليك بحذائي واعبرك؟
بس اني اعلمك ياااسر ااااني بعد اعرف اللعب وياك...
اذا ما اخليك ما تنام ليلك بسيطه...

ياسر : شتريد تسوي سوي اني ما اتراجع...

ابو علي: لو مخلف مطي ولاا مخلفك..

ياسر يريد يبين هو ما مهتم بس بالحقيقه نار مشتعله بداخله..

راح ياسر للدرج يريد يصعد و راحت مُهره وراه بس وگفها بابا لزم ايدها وسحبها و گاللها..

ــ لا يغرچ ياسر يضحك عليچ و صلحلچ البيت و يضحك عليچ بسوالف..
فتحي عينج و شوفي منو القتل اهلج...

ياسر : اذا تريد اني اگللها ما يحتاج تفتح عينها...

ابو علي : گللها بلا خلي نشوف تبقى وياك من تدري..

مُهره بقت تباوع عليهم مصدومه وحسيتها احتارت شتسوي...

مُهره: انتم شنووو جاي تحجووون؟؟

ياسر نزل لزم ايدها وهمس باذنها واخذها و صعد و بابا بقى يحچي ويغلط ومالك يحچي وياه يريد يسكت بس بابا ولا يمه ومستمر رحت بدلت ونزلت...

بقى بيتنه على هاي المشاكل يوميا ينزل ياسر يتعارك ويه بابا و مُهره  متحچي ويه شخص حتى بالجامعه اغلب الوقت صافنه بالفراغ ومن اسئلها

ــ بيچ شي؟
ــ لا..

مرت امتحانات نهاية السنه و مُهره عبالك غير شخص تتصرف وياي عبالك غريبه عني..

و بأخير امتحان طلعت من قاعة الامتحان اني و مُهره وافنان...

مُهره:  اني راح اروح للحمام...

افنان:  اجي وياچ؟

مُهره:  لا حبيبتي ميحتاج هسه ارجع بسرعه..

افنان:  تمام براحتج..

راحت مُهره وبقينه اني وافنان واكفين مرت ربع ساعه

افنان:  اني رايحه اجه اخويه...

ديار:  حياتي الله وياچ...

ودعتها وراحت واني بقيت على وگفتي مرت نص ساعه و مُهره ماكو اختفت...

اتصلت عليها يطلع مغلق رحت للحمامات اشوفها اخاف صار بيها شي دورت عليها ماكو..

رجعت بمكاني اشوفها بلكي رجعت بس ماكو عبالك فص ملح وذاب اتصلت على ياسر  وايدي ترجف من الخوف عليها..

ــ هاا ديار؟

ــ يااسر.... مُهره ماكو اختفت..

ــ شنو ماكو يعني؟

ــ ماكو والله صار ساعه ادور عليها..

ــ ديار اني بـ الباب تعاي بسرعه...

سد الخط وطلعت بسرعه اجاني بخطوات سريعه  وگال...

ــ احچيلي من البدايه... دمعت عيني وحسيت اختنكت

ــ گالت رايحه للحمام وبعد ما رجعت.

ــ اييي

ــ وصار ساعه ونص ادور عليها ماكو اتصلت عليها يطلعلي مغلق..

ابتعد مني يفتر بحيره ويمسح وجها وگال بصوت عالي..

ــ گلتلي...... بس اني ماصدگتها..
گلتلي..... راح اروح....

ـــــــــــــــــــــــ

«روسلينا»

طلعت من الشركه علي واگفلي بـ الباب رحت سلمت عليه وصعدنه بالسياره..

ــ اگلچ نروح البيتي بس ابدل ملابسي...

ــ تمام..

رحنه البيته بس اني رفضت ادخل وهو ما حچه شي بدل ورجع..

رحنه المول اشتريت غراض اليه لان جاي نحضر للعرس و رحنه اختارينه غرفة نوم..
صح راح انسوي عرس بالعراق بس نرجع هنا نستقر بـ بيت علي..

اشتريت كم شغلت للبيت ورجعني للشقه دخلت هلكانه من التعب والشقه هوسه رحت سبحت ونظفتها ورتبت الغراض الجديده ونمت..

ثاني يوم رحت للشركه خلصت الجلسه مالت التصوير اتصلت على علي ما جاوبني..

خلصت شغل و طلعت للبيت رجعت اتصلت عليه ما جاوبني كلش قلقت عليه رحت للبيت سبحت من طلعت شفت الموبايل لگيته متصل عليه رجعت اتصلت عليه...

ــ الوو.. وينك اليوم؟؟

اجاني صوته تعبان وبالگوه يحچي...

ــ ها روسلينا...

ــ شبيك علي؟؟

ــ شويه مريض..

ــ شبيك يعني شنو يوجعك؟

ــ حرارتي مرتفعه..

ــ اكلت شي؟
شربت علاج؟

ــ لا ما بيه حيل اگوم...

ــ راح اجيك اني واجيب وياي علاج...

ــ لا عيوني...  لا تعبين نفسج بس تعاي محتاجچ..

ــ يلا بيباي راح ابدل واجي...

ــ الله وياچ..

رحت لبست على السريع وطلعت شتريت خضروات اسويله شوربه ورحت للصيدليه جبت دوا ورحت البيته اول ما وصلت اتصلت عليه..

ــ علي اني بـ الباب..
ــ اجيت..

فتح الباب چان وچها تعبان وعيونه حمر لابس فانيله داخليه وبيجامه..

ــ تفضلي يـ الغرام..

ابتسمت ودخلت چان البيت نظيف و مرتب حطيت الغراض بالمطبخ و هو اجه يمي گعد على الكرسي وگال...

ــ مو گتلچ لا تعبين نفسچ؟

رحت يمه گومته واحچي وياه...

ــ وين غرفتك؟  اشرلي عليها

دخلت للغرفه گعدته على السرير..

ــ نام، بين ما اسوي الشوربه اجيك اگعدك..

ابتسم وحط ايده على خدي..

ــ ترى اني احب الدلال...

ــ ههههه... يلا بس اليوم ادلل..

نام غطيته وطلعت سويت شوربة خضار و رتبت المطبخ لان سويت بيه انفجار وهو چان يلمع..

سويت عصير برتقال وحطيت الشوربه والعصير بصينيه واخذتهن اله بالغرفه  چان نايم حطيت الصينيه على الميز وتقربت يمه...

ــ علي... علي..

فتح عينه باوع عليه وگال..

ــ شوكت تجين يمي؟
وتگعديني من النوم يوميا..

ــ هههههه...  گوم يلا...

ــ طيني ايدچ ساعدين اريد اغسل..

لزمت ايده وگام وصلته للحمام هو دخل غسل وطلع اجه يمي وگال...

ــ توكليني؟؟

ــ اي...

ــ بس بسرعه لان بردان...

جبت الصينيه وكلته الكاسه كولها بـ التوسل يلا خلصها اطيته العصير شرب نصه وحطه يمه على الميز وگال..

ــ بقيه هنا فد شويه اكمله...

ــ اوك ... يلا اشرب علاج..

اطيته علاج شربه ونام وتغطه وهو يرجف وگال...

ــ روسلينا تعالي يمي...

تقربت يم راسه وامسح على جبهته وشعره وهو مغمض گلبي وجعني عليه..

نام واني ما انطاني گلبي اعوفه و اروح اخذت الصينيه ورحت غسلت الماعين ونزعت حجابي وتمددت على القنفه..

مرت ساعه اباوع بالموبايل وسمعت صوته طلع من الغرفه من شافني گال..

ــ عبالي رحتي...

ــ لا ما گدرت اعوفك واروح..

گعدت وهو تقرب يمي گعد وبعدين حط راسه على رجلي وگال...

ــ تدرين لمساتج تذكرني بـ امي من اتمرض...

ــ الله يرحمها..

ــ بس مُهره كلش تشبه شكلها من شفتها اول مره انصدمت... سئلت ياسر گتله شلون تشبه امي  هيچ؟
گالي هي بنت خالي...
بس هي متدري اني وياسر ولد عمتها...

ــ شلون متدري؟؟

ــ متعرفنه بس احنه نعرفها..

ــ خطيه...

ــ روسلينا...

ــ هاا..

ــ بوسي راسي.... ضحكت بصوت عاليي وگتله..

ــ شنو حجه؟؟

ــ اي..

ــ نام علي نام.. اني همين نعست ترى..

غمض عيونه مرت فترى وسحبت نفسي من عنده و رحت نمت على القنفه الثانيه....

ـــــــــــــــــــــــ

«مُهره»

لم اكن احسب ان من كنت احسبه اماني..
اصبح هلاكي...

من شفت سجى حاضنه ياسر حسيت عقلي وگف ما اگدر افكر بـ أي شي تظاهرت مابيه شي وماكو شي مأثر عليه حاول ياسر يبررلي بس اني بينت الموضوع ميهمني..

بقيت شويه گاعده وعفتهم وصعدت فوگ رحت بدلت ورحت الغرفة الرياضه تمرنت شويه  ودخل ياسر تقرب عليه وگال...

ــ ضجتي؟؟

ــ لا..  ليش اضوج؟

ــ مادري عبالي ضجتي..

طفيت الجهاز وردت اروح الغيره وگفني ياسر من لزم ايدي وسحبني عليه صار وجهي بصدره..

ــ ممكن تبطل هاي السوالف..

ــ نوب تگول ما ضايجه..

ــ شتريد؟؟

ــ اريدچ..

ــ ياسر عوفني...

ــ لا.. تدرين من اشوفج تتمرنين يحترگ گلبي چنت ما اكدر اتقربلچ..

ــ هسه شنو؟

ــ هسه اريد ابوسچ...

ــ تقرب مني حتى اعيط عيطه اخلي خلق الله تنلم عليك..

ــ انچبي مُهره...

رفع ايده حطها على خدي ويحرك ابهامه بهدوء ويباوع بعيوني..

ــ ليش ضجتي؟؟

ــ مادري..

ــ غرتي؟

ــ مادري..

ــ شنو لعد؟

ــ مادري..

ــ شتدرين؟

ــ مادري..

ــ راح اكفخج  كفخه..

ــ انته شبيك كل ما حچيت راح اكفخچ..

ــ احچي عدل...

ــ خوش...

قرب وجها عليه وگال..

ــ ادري بيچ غرتي...

ــ اني مادري بروحي انته شلون دريت؟

ــ اني اعرفچ اكثر من نفسچ..

ــ اني مو نفس البنات اليخجلن يگولن غرت اذا اغار اگلك غرت..

ــ وهسه شنو غرتي؟

ــ مادري بس ضجت..
حسيت بشعور غريب..

ــ يعني غرتي..

ــ اذا غرت شنو تستفاد..

ــ يعني تحبيني وتغارين عليه..

ــ لا مو قياس... وكافي وخر اريد اسبح..

نزل ورفعني من الارض لفيت اديه على رگبته وگلت بخوف..

ــ نزلني يااسر شبيك

ــ اوديچ للحمام...

مشه واني ادفر واتحرك اريد بس ينزلني بس ولا يحس.. دخلني للحمام و وگفني جوه الدوش فتح الدوش وگالي..

ــ تتذكرين من تمرضتي؟

ــ اي..

ــ چنت ما اعرفچ مثل هسه..

ــ اطلع.... اطلع يااسر شنيه...

لزمني من خصري وسحبني عليه..

ــ بس خلي اخذ شي يصبرني على عذابي و اروح...

تقرب عليه و باسني واني ذبت بين اديه الدافيه..
من حسيت بيه يحاول ينزعني تشيرتي دفعته وگتله..

ــ كافي روح...

ابتسم وضمني الصدره وطلع...

مرت الايام واني ابد ما مرتاح احس راح يصير شي وگلبي مقبوض بدينه نروح للدوام ونرجع وتعرفنه اني و ديار على بنيه كلش حبابه وصارت علاقتنه قوويه..

و باليوم الرجعنه  من الدوام ويه ياسر و مالك سمعنه صوت ابو علي واحنه بره اني حسيت هنا گلبي صدك يوجعني والموضوع يخصني متأكده....

صار حچي وعمو من ضرب ياسر كلش انقهرت عليه بس ياسر ابد مابين هو ضعيف بالعكس..

عافه ياسر بضوجته وعصبيته وصياحه الراج البيت رج  وصعد..

صدمني من رجع عليه وگال..

ــ لا يغرچ ياسر يضحك عليچ و صلحلچ البيت و يضحك عليچ بسوالفه التعبانه..
فتحي عينج و شوفي منو القتل اهلج...

درت وجهي الياسر مصدومه و حسيت كلماتهم ضربت گلبي..

ــ انتم شنووو جاي تحجووون؟؟

اجه ياسر لزم ايدي وهمس بـ أذاني

ــ مُهره  اني اشرحلچ كولشي بس تعالي وياي  لا تخلينه هو يحچيلچ..

سحبني من ايدي و صعدت وياه واني احس ثقل العالم كله صار بـ جسمي..

اول ما دخلنه شمرت الجنط بالگاع وگلتله بهدوء عكس گلبي...

ــ تعرف الكتلو اهلي؟ بقه ساكت وتقرب مني صحت بصوت عالي...

ــ احجييييي يااااااسر تعرف بأهلي من انقتلو؟؟

ما جاوبني واني نار اشتعلت بيه گمت اضرب على صدره بقوه واصيح وابچي حسيت كل الچنت عايشته وياه جذب..

ــ منووو قتل اهلي احچي....
لك ليش؟؟
ليش؟
احچي ليش ما تگلي منو كتل امي...
منو سوه ببنيه يتيمه عمرها 17سنه حتى متعرف شنو الصح وشنو الغلط وين تر...
قاطعني...

ــ ابوووي..

فتحت عيوني على وسعهن واني اباوع بعيونه...
تقرب عليه ولزم ايدي..

ــ تعالي اگعدي اسولفلچ...  سحبت ايدي بقوه ونترت بيه..

ــ انته بيك شي؟؟
شنو اگعد شنو اسولف؟؟
ليش گتللهم؟
احچي ياسر لا والله افضحكم فضيحه انته وابوك...

ــ ابوي قتل اهلج حتى ياخذ المزرعه  وجابچ هنا حتى متموتين وياهم عباله يضحك عليچ وياخذ الگاع منچ بس فشل لان انتِ ما قبلتي..

ــ انته تدري من البدايه؟؟

ــ اي...

ما چنت موجوعه من حقارت ابوه
چنت متأكده هو..
بس غلست وگلت ما معقوله يقتل بشر بهاي البساطه..

الوجع گلبي اكثر ياسر شلون كل هذا الوقت اني وياه عايشين سوه وحتى ما فكر يگلي...

ــ اندمذكم...  كلكم اندمكم اخليكم تبچون بدال الدموع دم..... وحق الله اندمكم
وحق لا اله الا الله ما اخليكم ترتاحون....

ــ لا تسوين هيچ مُهره..
اني مثلچ انظلمت واكثر... حسيت الدنيا عوضتني بيچ..

ــ الا اخليك تدور على مُهره..
اخليك تتندم كل يوم لان ما حچيتلي..

عفته ودخلت للغرفه...
چانت دموعي الرافضه البچي..
و روحي رافضه تصير  ضعيفه..
من هاي اللحظه صارت حياتي كلها عباره عن خطط انتقام...

مرت الايام واني يااسر حتى من اشوفه يمي اتصرف عبالك مموجود و من اشوفه يدخل واني گاعده بالصاله اروح الغرفتي حتى ما يحچي وياي..

وبأخير يوم الامتحانات خليته اخير يوم يشوفون وجهي بيه اختفيت من حياتهم وراح ارجع مثل الاعصار الما يخلي واحد بيهم صاحي..

يتبع🦋.....

ـــــــــــــــــــــــ

لا تنسون التصويت والتعليق بين الفقرات..