رواية قلوب على جرف الهاوية الفصل العاشر 10 - بقلم الكاتبة نهى

حسام اليوم تزوجت وحدة عن طريق صديقي نوفل. هو رتب لي السالفة، هم كالعادة زواج متعة بالسر. وهاي الجديدة قنبلة متنقلة، غير تدوخ، اسمها هالة. يابة عالدلع والغنج فرتني فر. كعدت تركص وتهز بخصرها من أول يوم. وباعتباري عريس جديد بشهر العسل هم فترة، اختفيت عن الأنظار وصرت من الشغل گبل لأحضان اللعبة الجديدة. علي: الو، أهلاً بحسام، شخبارك؟ أشوف ماكو مداشوفك هالايام، شكو شصاير؟ حسام: اسكت ولك، أخوك غركان بشهر العسل عريس.

علي: ولك، انت متوب من هالسوالف هاي؟ عيب بطل لعب ونسوان. حسام: يابة دروح، هو احنا شماخذين من الدنيا؟ دخلي نتونس شوية. علي: الله يهديك يا أبو فهد. صدك على طاري فهد، ترى فهد كلش مريض بالبيت، ومحد بحاله، لا أمك فارغة تعتني بيه ولا أخواتك فارغات. رحت أخذته لبيت جدي هناك لعند فرح بنت عمي منذر، راح تعتني بيه لأن الوحيدة متطلع من البيت، والبقية كلهم عندهم دوامات. حسام: هذا هو، زين تسوي أخذته لعندهم.

طبعًا اتعودت على إهمال ابني فهد، أبد ماشاف يوم مني عناية أو اهتمام أب باتجاه ابنه. علي: حسام، ترى جدي يريدك بموضوع كلش مهم، وهو گلي اتصل على حسام وأنطيه خبر حتى يجي اليوم لبيتنا عنده موضوع وياك. حسام: الله يستر من جدي، إذا رادني بموضوع مهم لأن كلها مواضيعه تخوف. علي: يالله انت اخذ راحتك، اني رايح. حسام: الله وياك مع السلامة. فرح اليوم أجة علي ابن عمو توفيق للبيت.

وجاب وياه فهد ابن حسام خطية مريض مخنجر، غير يكسر الخاطر. علي: هاج اخذي رحمة على أبوج الطيب، اعتني بيه. خطية لگيته مريض ومبقيته عند الخدامات. محد درى بحاله. فرح وهي تقترب من هذا الطفل اليتيم يكسر الگلب. صدره صاير خرخاشة من الرشح وبس يكح خطية، الظاهر عنده التهاب بالقصبات. فرح أحس حتى بيت عمو توفيق صاروا يعتمدون عليه بهاي الأشياء. ما أعرف يمكن اني صارت عندي هواية أحب أعتني بالأشخاص الضعفاء. مثلًا:

عمو أبو نوال جارنا وزجته، وأختي سلوى وسرور، وجدي وجدتي. والله حتى عمامي وبنات عمي، وهسه هذا المسكين انضم للقائمة. رحت عليه وشلته. خطية هو ما گال باطل. حضني بإيده الصغيرة من رگبتي. فرح: روح علي لا يظل بالك، اني أهتم بيه، أصلًا هذا صديقي بعد، علواه إذا تبقوه عندي. فهد وهو يأشر على علي: لوح عمو لوح، اني أبقى يم فلح. فرح وعلي: هههههههه، الملعون بسرعة صرفني.

أخذت فهد وسبحته بحمام بخاري حتى البخار يوسع التنفس مالته، وسويت شوربة إله. عامر دخل على فرح بالمطبخ، شافها توكل بفهد. عامر: أهلاً بفروحة، هاي ملابس فهد وملاعيبه جبتهم. فرح: أي عفية، لأن لبسته نفس ملابسه. عامر: عفية صبيلي شوربة ريحتها طيبة. علاء: عفية اني هم صبيلي شوربة. عامر: أهووو، هسة هذا اللزكة شجابه. فرح: لا تخافون اكو شوربة تكفي الكل ههههه.

اتعودت كل يوم يجون أولاد عمو توفيق وأبوهم على العشا، لأن هم وقت فراغهم بالليل. أتذكر بيبي تگول هم كانت جيتهم هنا لهذا البيت قليلة، لكن من انتوا أجيتوا لهذا البيت تغيروا. حتى عمامي كانت قليلة جيتهم. طبعًا نسيت أگلكم إن عمو نبيل أخذ عائلته وطلع زعلان. وراح بيهم لبيت المزرعة. وبس اني وجدي وعمو توفيق نعرف ليش طلع زعلان. وبقيت بس اني وأخواتي هنا عند بيت جدو.

وصار يوم عن يوم يلتمون عمي توفيق وجواد وعائلتهم ويجون هنا يتجمعون، وصار كل خميس بالضبط. يتجمعون ولد وبنات وحتى عمة رسمية صرت أحبها. لأن هي الوحيدة اللي انتبهت على ملابسي وحجت ويا جدو إن تاخذني وأشتري ملابس، وهو قبل أن أطلع استغربت ما أعرف شعجب. وگالت على الأساس على باجر تجي تمر عليه تاخذني حتى أشتري ملابس وأغراض. أما حسام، الشخص الوحيد من بيت عمو توفيق اللي أبد ما اختلط بيه غير بعض الكلمات. حسام: السلام عليكم.

الكل: وعليكم السلام. حسام: شنو شالوا بيت توفيق هنا راح يسكنون؟ أشوف شوكت ما أجيكم ألاگيكم هنا انتوا وأبوكم، شكو جاي يوزعون الحصة هنا وصاير ازدحام؟ عامر: لا عندهم غزالة جارة قلوب الكل وراها، واحنا هنا علمودها. وهو يغمز لفرح. فرح بابتسامة: هههههه، أي ترى ماتقشمرني بهاي السوالف، ما أسويلك دولمة موحسبالك لو تظل منا للصبح تحمد بيه وتشعرلي.

علاء: بم بم تم، قصف الجبهة بنجاح، عاشت إيدج لاتسويله، انتي عندج حبيب واحد اللي هو اني. فرح: هههههههه، والله ضحكتني، قصدك عندي زاحف واحد اللي هو انت أبو كرش. حسام: ما أعرف ليش ضجت من شقاهم، ولو هو عادي مابي شي، هي البنية حبابة وروحها رياضية، لكن اني ليش أضوج أصلًا؟ حسام: يالله خلصوا عشاكم وتوكلوا عالبيت وأخذوا وياكم فهد. علاء: أي عفية، خل ناخذ الزاحف الصغير، لأن من شافته فرح بعد ما قلدتنا ولا تعبرنا صارت بس لفهدّي.

فهد بانزعاج: لوح لوح، فلح ماتي بس أنا. فرح: حسام. حسام: أخ الله، هاي شنو هذا اسمي هيجي يصير بصوتها. عبالك وحدة جاي تغازلني وتتودد إلي حتى أجيها لعندها وأنام بحضنها. أهوووو، حسام هاي شبيك انثولت، أستغفر الله. علاء وبصوت عالي: حساااااااااام. حسام يفز من مكانه على صوت علاء العالي: هاي شبيك وثول كمزتني. علاء: أي مو صارلها ساعة تحجي وياك وانت صافن مو ويانا. حسام: توخر منا لا أنطيك دفرة.

علاء: هههههههههههه، لاتنطي دفرة ولا رفصة، رايح عمي رايح. فرح: حسام ماجاوبتني. حسام: أخ الله، هاي صدك من گال إن صوت المرأة عورة. هسه افتهمت شنو المقصود. يعني لأول مرة أنجذب لصوت بنية من تگول اسمي. الله لعد هاي إذا صاحت اسمي وهي بين إيديا وبأحضاني شراح يصير بيه. أخ الله أستغفر الله، خلي أطلع منا أحسنلي، هاي البنية دائمًا من ألتقي بيها أحس اكو شي يحصرني ويخليني أفكر بيها تفكير مو راحة. حسام: گولي شنو ردتي.

عامر: صارلها ساعة تگلك خلي فهد يبقى عندها لأن هو مريض ومحد منتبه عليه. حسام: هَـا، زين وين ينام؟ فرح وبكل براءة: لا تخاف والله أنومه بحضني. عامر وحسام في نفس اللحظة بدون مايحسون على نفسهم: أخ الله هنياله. حسام وعامر واحد يلتفت عاللثاني وحسام يخزر عامر. حسام: يالله تحرك روح للبيت، ترى هم يالله تروح. عامر: ماتگول لروحك تروح للبيت مو بس اني أطلع.

حسام عيونه جدحت بوجه عامر: أگول أتوكل على الله وسد الباب لاتخليني أگعد أغرد الك والبنية منا عيب ترى. عامر يعرف هاي اللغة ويفتهم شنو معنى أگعد أغرد. عامر: يالله اني راح أطلع. والتفت على فرح: مامحتاجة شي. فرح: لا مشكور، رحمة الله والديك ماتقصر. فرح بسؤال لحسام: هَـا شكلت؟ تقبل تبقي فهد عندي عفية على ما يطيب وأخذوه خطية جنة عصفور مبلل بالمطر من يكون مريض.

حسام التفت على فرح: لعد هذا هو، إذا تديرين بالج عليه عادي خلي عندج. حسام أول مرة بحياتي ألتِمس بصوت بنية هيج كمية حنان ودفء واهتمام لشخص، وحتى هذا الشخص ما يمت إلها بصلة قوية حتى هيج تخاف عليه. أهوووو، هسة اني شلزكت بصوتها؟ فرح من طلع حسام أخ گلبي شلون دگاته اختلفت وتخربط من أول ما سمعت صوته من دخل علينا بالمطبخ.

هذا الشعور يراودني كلما أشوف حسام، يظل گلبي دگاته تصير سريعة وأصير قليلة الكلام وهادئة بوجوده، وما اگدر اتصرف بصورة طبيعية من يكون موجود، يعني معقولة هو هذا الشعور اللي يكولون عليه البنات؟ أي هي الصفات كلها تنطبق عليه. أخ ربي والله وأجى اليوم اللي گلبي دگ، خلي يسمعون البنات ههههه، صرت مثلهم أشعر وصار عندي أحاسيس مرهفة. هو عودك صدك ليش مامتزوج لحد هسة من بعد مرته المرحومة؟ يعني معقولة وفي إلها؟ وباقي على ذكرى زوجته.

والله عمي بالعافية عليها على هيج زوج. أهووو فرح، راح تگعدين تحسدين الميت بگبره؟ طلع حسام من المطبخ متوجه لجدّه ويريد يعرف شيريد منه هالمرة، شنو من تحدي جديد ضامله. لأن هو اتعود على جده أن يشمرله التحديات بدربه وهو بطريقته الخاصة يحب يحلها. حسام وهو يبوس راس جدّه وإيده ويسلّم على ابوه الي جالس قرب جده: هلّا جدي، شلونك؟ شنو يقولون طالبني، تريد تحجي وياي بموضوع؟ الجد: هلّا بيك ابني، تعال اگعد يمي.

حسام: يلّا وهاي احنا گعدنا، احجي گول اسمعك. الجد صالح: صار لازم تنفذ الي گتلك عليه، لأن طلع شكي بمحله واكتشفنا كان كلشي صحيح. حسام بتعجب: يعني معقولة لهالدرجة توصل بي المواصيل ويدز ناس يقومون بهاي السواية القذرة؟ حسام وبصوت عالي: اخ الله، أتمنى ألزمه والله محد بيفكّه مني، بس جدي شلون عرفتوا؟ علي: اكتشفت من خلال اعتراف المتهمين بالقضية، هم بنفسهم ذكروا الاسم الي حرضهم. حسام: هسة والحل شنو؟

الجد: الحل عندي بس حسام وهسة أريد منك تنفذ الي گتلك عليه. علي: عن إذنكم، أني أترخص. فرح: جنت قاعدة بالمطبخ وحاطة فهد على الميز وجاي أسويله عصير برتقال حتى يفيده علاج. علي: ها فروحة، اليوم ورطناج بهذا المجرم. علي كان لازم

بإيده علاكة انطاها لفرح: هاج لزمي هذا نقال اشتريته الج، لأن أريد أطمن على جدتي ومحد موجود بالبيت بس انتي وبيبي متعرف للنقالات. فگلت لجدي وقبل اشتريلج نقال، لأن كلشي يصير وخاف تحتاجين حتى تتصلين على أي واحد. فرح وكانت الفرحة ما سايعتها: يعني صدگ صدگ هذا النقال الي؟ يعني عادي ألزمه وأشوف شنو بي؟ علي بابتسامة على شكل فرح الي ممصدگة واحد مشتريلها شي. علي وهو يسحب كرسي

قريب على فرح ويگعد عليه: شنو شبّيج مامصدگة واحد جايبِّلج شي؟ فرح والدمعة غزت عينها: والله أول مرة من بعد وفاة أبوي واحد يذكرني بشي، وأشكرك الله يجبر بخاطرك مثل ما تجبر بخاطري. علي وانكسر خاطره عليها: أوف والله انظلمت هاي البنية. علي: لعد تعاي گعدي خلّي أعلمج عليه، لأن سويتلج بي فيس بوك وواتس اب. فرح وعيونها مفتوحة على النقال شلون حديث: هذني كلهن بهذا النقال؟ حسام:

كنت قريب أريد أدخل على المطبخ وسمعت حديث علي ويه فرح وشلون شفته هدّالها نقال وگعدوا يسولفون. وسمعتها من تگول أول مرة واحد يجيب إلها شي. ما أعرف ليش ضجت إن هو علي الي يدخل الفرحة بگلّب فرح. ما أعرف اكو شعور بگلبي لأول مرة أحس بهيج شي، إن أضوج من شخص يدخل السعادة على گلب واحد، وأكون أريد أني الي أدخل السعادة لگلبها وأشوف الضحكة والفرحة بعيونها تكون بس الي مو لأحد غيري. هاي شنو شبيك حسام؟ أشُو جَنّك بديت تغار؟

لالا بوية اسم الله علية، على شنو أغار خو ماكو شي؟ لا يابة مو أني الي أغار على وحدة. أشُو هو أني سمعت ضحكتها وأني طگّن فيوزاتي والكلام الي جنت أحجي بي ويه نفسي قبل شوية طار من الشباك بس من سمعت ضحكتها. حسام: احم أهـ، شنو شعندكم تتمضحكون؟ اقترب منهم وجاب الكرسي وخلاه بنصهم. حسام: بالله أشُو شوية علي وخر الكرسي مناك خلّي اگعد. علي باستغراب وهو يبعد الكرسي

حتى هذا الشافط يگعد بنصهم: أي والله اتفضل أبو الشباب، شكو حاشر روحك بيني وبين بنت عمي؟ حسام والحرارة صارت عنده فول: أگول دنجب وانطيني هذا النقال، أني أعلم فرح عليه، وقبل لا أعلم فرح عليه أريد أفهمها على علاج فهد، يعني عندي موضوع أهم من النقال، يلّا وانت گوم اتوكل لا تنتظر لأن عندك شغل، يلّا يلّا ذاك باب المطبخ مناك. وهو يأشر على باب المطبخ. علي وهو يفر بإيده

ويبوسها ويحطها على گصته: الله مثبت العقل والدين، هذا الزلمة مو بعقله، والله من تالي وكت أتذكر هو أب وعنده ولد، يلّا أني رايح. والتفت على فرح: إذا تحتاجين شي گليلي ما يردج إلا السانج. حسام بدون ما يهتم: شنو بوية واني وين رحت حتى تروح تطلب منك؟ فرح أباوع على تصرفات حسام الغريبة وعلى علي شلون يحجي وياه استغربت. طلع علي والتفت عليه حسام وبخزرة: أگول مو جنّك مصختيها؟

يعني من دخلت لحد ما ردت أطلع كل ساعة ألكه واحد من إخواني گاعد يمّج ومضيع الأول والتالي، وآخرهم هذا أخوي الي جنت أگول عليه رزن وثگيل، أشُو هذا هم صار خفيف وگعد يجبلج هدايا، والله اليعلم شراح يجبلج باجر. فرح وهي تخزره: شنو قصدك بهذا الحجي حسام؟ ترة كلامك ميعجبني أحس بي يمس سمعتي وهذا الشي ما أقبله على نفسي. حسام

وشگد عجبه ستر هاي البنية: ما قصدي شي، بس المفروض انتي تسوين حساب إن انتي مرة متزوجة وهذا التصرف اللا أبالي يطمع إخواني بيّج، احتمال يفتهموج غلط. فرح: العفو منو گالّك أني مرة متزوجة؟ أني مرة مركونة عالرف، لا تسوي حالك مو داري عن شنو أحجي. شوف يبن الناس مو أني الي أحتاج رجال فوگ راسي يلّا أصير محترمة، لا حبيبي أني محترمة من گاعي مو بعازة رجال يفهمني الأصول، لأن أني بنت الأصول.

حسام كلما تحجي كلمة كلما أحس بگلبي يِدُگ سريع ما أعرف ليش، أتمنيت ألتقط كلماتها بين شفايفي. حسام: يلّا خلّي أعلمج على النقال يا بنت الأصول، ترة ما يصير واحد ما يحل عليج وهيج قريب منّج ويشم عطرّج، ويگعد يعلمّج على النقال. ترة بس أنّه الي أگدر أوصل لهالقرب، هسة فهمتي شنو كان قصدي من بعدت علي عنّج؟ فرح وهي گلبها صار طبل واقترب حسام منها وهو على الكرسي وصارت العيون مقابلة بعض.

حسام انتبه على نفسه: احم احم أهـ، هذا النقال. وگعد يشرحلها عن النقال وعلمها على الفيس بوك وكان علي مسوي صفحة خاصة باسمها وهي اتعلمت بسرعة. بعدين من انتبه عليها شلون سرح، شالها من شعرها وهي ما منتبهة وعينها على النقال شلون يگلب بي بإيده. سجل رقمه بنقالها وشافته دخل على الواتس اب وكتب لرقمه حتى يعلمها شلون ترسل، ورسل لنفسه من رقمها وهي جاي تقره شنو جاي يكتب:

((عدلي شالج ترة وگع من راسج وسدي حلگج ترة فضحتينا عبالك ماشايفة نقال) هي قرت هاي الكلمات الي كتبهن وهي گبل شهگت وعدلت نفسها وشالها وگعدت عدل. حسام: اخ الله ربي والله تصرفاتها تموتني، عبالك طفلة. أحس أريد أكلها.