رواية قلوب على جرف الهاوية الفصل التاسع 9 - بقلم الكاتبة نهى

حسام: عهود، هذا هو، انتهت بعد وياج خلاص، لأن أنتِ طلعتي عن القواعد. عهود: لا عفية حسام، آسفة أروحلك فدوة، لا تتركني والله التوبة بعد ما أعيدها، والله بعد ما أطلب منك تعلِن زواجي منك. حسام: لا عهود بعد ما ينفع الأسف، خرجتِ عن النظام وسقط حقك. حسام

كالعادة، كلما وحدة منهم تبدي تِنِك وتلمح على مطالبتها بحقوق الزواج العلني، اني بسرعة أصدر القرار واتركها. لأن اني ما ضربت وحدة على إيدها، هم بنفسهم يقبلون بزواج المتعة ويكونون على معرفة تامة بالشروط والقواعد اللي اني حاطها. لذلك أي وحدة تبدي تلعب بذيلها اني قَبل أصدر القرار وأطردها من حياتي. لذلك اني أبد ما أثبت على وحدة، أكثر وحدة بيهم سنة أبقى وياها. لأن اتعلمت ما اتعلّق بوحدة. وهاي سوالف الحب اللي يوَهّمن نفسهم بيها هاي أعتبرها مضيعة وقت، لأن ما عندي ثقة بأي وحدة من جنس حواء.

حسام: ألو، نعم جدي، إي إي، إن شاء الله اليوم عشاي عندكم سوي حسابي. الجد اتخذت القرار وصار لازم أنفذه. توفيق: زين تسوي يابه، بس أريد أسأل سؤال، ليش شمعنى تسجل الورث كله باسم فرح؟ ليش ما تقسم الورث عليها وعلى خواتها بالتساوي؟ الجد: لا توفيق، من خلال مراقبتي طول هاي المدة لفرح وخواتها، لاحظت إن فرح مهرة شرسة وكلش تعجبني شخصيتها، وهي الوحيدة اللي راح أضمن إن حصتها وحصة خواتها تكون بأمان عندها، لأن هي كلش سباعية وتعجبني.

ابتسم الجد صالح بيوم اتذكر دفاعها عن أختها وشلون لازمة السجين وشخطت وعلّمت على أولاد عمها بكل جرأة. كلش عجبتني وحسيت ابني منذر عرف يربي. بس اللي سويته بحق سماح كان لازم أسويه، لأن اني العيون كلها عليّ. اتفاجأ الجد صالح بدخول ابنه نبيل عليهم فجأة، لأن الظاهر وكالعادة إنه كان يسترق السمع عليهم. نبيل وبغضب والشر يطلع من عيونه: ليش بويه تنطي الورث لبنت منذر؟ ليش انا ما محسوب ابنك؟ يعني صدق تحكي بويه؟

اني أتعب وبعدين تالي تعبي يصفى ويروح لهاي الزانية بنت الزانية؟ الجد صالح: نبيل احترم نفسك ولا تتجاوز، ترى اتعديت حدودك ومو شايفني ساكت عليك لحد هسه عبالك ما أعرف سوالفك.

توفيق: نبيل لا تجرب حظك عند أبوي، لأن أبوي عرف كلشي عن منذر وشلون كنت تطرد منذر، وحتى عرف إن أنت اللي استلمت الاتصال من البنات بيوم وفاة منذر، وكنت تعرف بخبر وفاة أخوك بس فضّلت تسكت. فأحسن شي ما تفتح حَلْقك، وعرف حتى بالرسايل اللي كان منذر يرسلهن وأنت تستلمهن. الجد: وعن أي ورث وحق وتعب تحكي عنه؟

ترى أنت عايش هنا بفضلي واني مسوي فضل عليك، وراحمك وعفتك هنا تسكن بهذا البيت. ليش نسيت بيوم أخذت حصتك مني أنت وإخوانك وما ظل واحد بيكم ما أخذ حصته وبعد ما عندكم شي يمي؟ مو مشكلتي إذا أنت انضحك عليك وطلعت قشمر وأخذوا فلوسك، لأن أنت أرعن ما دتشوف اني ليش ما أسلمك إدارة أمور محلات صياغة الذهب؟

لأن أعرف بيك لو بقت يمك سالفة الإدارة هم راح تخسرهم وتخسرني وتغرّك. أما هاي المحلات والأملاك الباقية كلها حصة منذر، لو نسيت منذر أخوك اللي نكرته؟ واللي خليت قلبي يشيل عليه ويحقد كله من وراك، لأن كنت تجيب لي أخبار كلها جذب بجذب، واللي خليت أغرّك إيدي بدم بنت ابني من وراك ومن ورا عملتك السودة. الجد صالح: تتذكر بيوم دزيتك على أخوك حتى تجيبه وياك، لأن كنت مريض وطلبت واحد منكم إن يسافر للناصرية ويجيب منذر وعائلته؟

تتذكر أنت شلون دكيت لي صدر وگلت بويه اني أروح أجيب أخوي وأجي، وحتمت وما قبلت أي واحد غيرك يروح إلا أنت تروح؟ واني بكل طيب خاطر وافقت تروح لكن مع الأسف، أنت خنت ثقتي بيك. ورغم هذا كله هم بقيت ساكت عبالك ما أعرف سوالفك. شوف ولك نبيل، إذا اقتربت لوحدة من بنات منذر فكرك ترى وأنت حصتي تصير إذا صار عليهن شي. طلع نبيل وهو يصيح ويعيط. لكن من طلع وشاف بوجه فرح، نبيل وهو يتوعد بقلبه: هين يا فرح، هين انا لك بسيطة.

فرح من سمعت جدي وعمو نبيل وشنو هو مسوي ويه بابا، يعني جدو ما كان غاضب عليه وراد يشوفه لكن هذا العار نبيل هو اللي وقف بطريقهم، الله لا يوفقك نبيل بعد وبعد، والله اليعلم شمصخم. حسام

ركنت سيارتي قرب بيت جدي وشفت عمي نبيل طلع من بيت جدي عصبي والغضب مبين عليه استغربت سلمت عليه ما رد السلام حتى ما انتبه عليّ. ما اهتميت ودخلت وشفت وحدة مدنقة وتغسل بالكراج بالمكناسة بس كانت ما منتبهة. بس جمدت بمكاني لأن كان شعرها صاير صفح ونازل وما مبين وجهها لكن جسمها كان يحكي قصة غير. ما انتبهت على روحي شلون سهيت. أهو يمكن الغريزة تطالبني بالإشباع لأن صار لي فترة من تركت عهود واني ما متعود أبقى هيج فترة ما مقترب لمرة ومشبع نفسي. حسيت الغريزة عندي صارت فول من تتحرك قدامي بهذا جسمها اللي يجيب راس أكبر واحد، بس غير أقوم وأعرف هاي منو؟

معقولة جايبين عاملة جديدة؟ والله كأن استجابت لندائي ورفعت نفسها. وكانت الصدمة، هاي فرح المهرة الجامحة. بس غير عليها جسم وشعر، أتذكر قبل سنتين شلون كان شعرها ولادي. اني طبعي ما أحب الشعر القصير أحب الشعر الطويل غير أخرب عليه. بس حرامات هذا الجسم لهاي الوكحة أم اللسان. بالله هاي شلون طالعة بره هيج؟ بالله واحد غيري شافها هيج؟ أهووو، شكو شبيك حسام؟ شنو راح تطبق براسها الزوج الحريص؟ أهوووو. خل أدخل جوه أحسن لي.

حسام: السلام عليكم. الجد وتوفيق: وعليكم السلام والرحمة. شلونك بويه، تفضل أشوف اتأخرت.

فرح كمزت من شفت حسام واقف بباب البيت ويباوع عليّ، من شافني حسيت بيه نفر مني وراح للديوان. واني دخلت جوه، اليوم البنات كلهم متجمعات هنا، مسويات سهرة يريدون يتجمعون حتى يخططن وينظفن جسم سلوى ويحفن وجهها، لأن شفت رشا دخلت وجابت وياها بنية شابة حتى تحف لسلوى والبنات وتسويلهم تنظيف للجسم. دخلت على المطبخ واني العرق ماخذ جسمي ومحترة. خليت الشال على ميز الطعام ورحت أسوي العشا، لأن كلهم موجودين البنات وعمو توفيق وعمو جواد وحسام. البنات كلهم لكن الأمهات ما أجوا. دخلت بنت عمة رسمية زمن الصغيرة أصغر من سرور بالابتدائية.

زمن: عفية فرح سوي لنا كيك، والله طيب الكيك مالتك. فرح: وأخيراً. واحد قرر يدخل للمطبخ. فرح: أوك، أسويلكم كيك بس ابقي يمي وسولفي وياي والله ضايجة محد يحجي وياي. زمن بطفولة: لعد ليش متروحين وية البنات؟ كلهم متجمعات فوك ومتونسات، مشغلات دي جي ويركصون ويضحكون. فرح: أجذب عليكم إذا أنكر وأكول ما أحب هاي الأجواء، اللمة مالت البنات بس سمعت حسيت گلبي طكطك. خلصت الكبة والزلاطة والمقبلات وسويت شوربة كنور وشويت كباب.

كافي، وصيت الحارس على خبز وراح يجيب. فتركت المطبخ ورحت صعدت وياهم فوك. وشفتهم ملتهيات يلبسن وينزعن الملابس والفساتين. وكعدت على صفحة. انتبهت على سلوى شلون منطلقة وياهم هي وسرور هم. فرحت من شفتهم. بس أبد محد اقتربت مني. يعني شنو فرح راح تگلبيها دراما هندي؟ أنتي بادري من يمج وروحي گعدي يمهن وسولفي. سمعت سلوى تسأل البنات: أگول بنات، منو أحلى علي هذا الفستان لو هذا؟ أني من يمي اختاريت الفستان الأحمر كان حلو عليها.

فرح: الفستان الأحمر كلش حلو عليج. نسرين التفتت علية ونظرت باستهزاء: هههههه، وأنتي شعرفج بالموديلات حتى تختارين؟ هي ما ماخذة رايج لأن ما عندج ذوق. فرح: ليش ما يحتاج الها ذوق؟ مبين حلو عليها. نسرين

وهي تگلب بعيونها بضجر: أي عادي مو كلشي حلو عليه معناها ألبسه. هسة مثلا أنتي تلبسين بملابس بيبي عادي حلوة عليج، بس مو تلبسيها بمهر أختج وتفضحينا. هههههههههههههه سلوى لحكي، ونوب صديقاتج الي بالكلية راح يجون للحفلة، وراح يسوون المهر بنادي راقي، خوما تعرفين هاي أختج عليهم. سلوى وهي مدنگة ولا عبالك نسرين أهانتني گدامها. رشا: وشنو يعني وإذا أجو صديقات سلوى؟ شنو قابل أحلى من فرح لو أرتب منها؟ نسرين بلؤم: ههههههه شنو؟

شبيهج رشا؟ أنتي تضحكين على نفسج، يابة هاي متعرف حتى تلبس حذاء كعب، أتحداها إذا تعرف ههههههه، والله راح تصير حفلة المهر تخرب ضحك إذا حضرت. سلوى: أحم آه آه لا ما أتوقع فرح راح تگدر تحضر حفلتي، هي بنفسها گلتلي إن هي ما تگدر تجي، تگول أبقى يم جدو خطية خاف يحتاج شي. والتفتت على فرح المصدومة من كلام أختها. سرور: إذا فرح ما تحضر أني هم ما أحضر حفلة المهر. فرح

وبكل روح رياضية مجروحة: لا حبيبتي سرور، خطية أختنا خو ما نتركها بهيج يوم مهم لوحدها، لازم وحدة بينا. بس تعرفين أني خطية جدو هاي الأيام مريض وما أگدر أتركه. فرح انقهرت إن أختي كانت تستنكف مني، شنو الغلط البدر مني؟ ليش أني مو غيرت حياتي علمودهم؟

فرح وهي تحجي وية نفسها: أي فرح، بس هي ما ضربتج على أيدج حتى تضحين بمستقبلج وتصيرين إلها الدرع المصان حتى تحميها. أنتي أصبحتِ وسيلة عبرت بيها إلى بر الأمان وتركتج لوحدج خاوية، ليش ضايجة هسة ومقهورة؟ ترة عادي. بلعي وسكتي. ظليت گاعدة وياهم ما قبلت أگوم حتى ما تفرح ست نسرين بانهزامي. سمعت البنات شلون يسولفون على أجواء الكلية. وشلون يحجون ويتهامسون بينهم عن شلون الشباب يتوددون إلهم.

إسراء: رشا تتذكرين الولد الي واعترفلج بحبه گدامنا وطلب أيدج للزواج؟ وإحنا واگفات بقينا صافنات بوجهه وأنتي وجهج صار طماطة. رشا وخدودها صارت حمرة: أي هذا أيهم فديته، بس ما جاوبته بوقتها. نسرين: أني لو منج أوافق، يجي يتقدم لي، وين تلگين هيج واحد صاك وشخصية قوية؟ شلون جريء؟ شلون أجه وگدامنا كلنا طلبج؟ أحب هيج شاب واثق من نفسه. رشا: أي فديته بس هو انطاني مهلة أسبوع حتى أرد إله جواب.

إسراء: أي صدك سلوى، إحجيلنا شلون حبيتي نواف. سلوى وهي حاضنة الكوشة وسرحانة: أوف نواف، الحب الجميل وأحلى شي صار بحياتي، ما أتوقع راح يجي شي أكثر أهمية من نواف. جنت طالعة للمدرسة عندي امتحان وهاي ست إسراء رايحة بايتة عند بيت عمة رسمية، وأني فاتني الوقت مالت الامتحان ورحت أركض وأبجي بالشارع. ليش ما شفت صفت سيارة قريب علية ونزلت الجامة. نواف بفزعة على شكل بنت عمة: سلوى ليش وتمشين وتبجين بالشارع ولابسة هدوم المدرسة؟

شبيج شاربة شي؟ سلوى وهي تمسح دموعها: عفية نواف، فاتني وقت الامتحان، أخذتني نومة عفيا أخذني للامتحان والله ما أعرف شلون غفلت عفية راح أتأخر. نواف خرب ضحك على سلوى وشكلها: هههههههههههههه والله أنتي فلم هندي. سلوى بتساؤل هذا شبيه يضحك وأني مقهورة ويشوفني متبهذلة على امتحاني ويضحك: سلوى وهي تكمل طريقها مو صوجك صوجي أني الي ضيعت وقتي واگفة أشرحلك وأنت تضحك. نواف وهو ينزل

من سيارته ويركض ورة سلوى: هوب هوب هوب، اوگفي اوگفي وين رايحة؟ جنج مخبلة والله هسة الي يشوفج يگول هاي مخبلة. سلوى وهي تزيد بالبجي: أبتعد عن طريقي رحمة لأهلك ترة أخرتني وراح يضيع مستقبلي. نواف: ههههههههههههه أخ يابة صدك موتيني ضحك. ولج اليوم جمعة يا امتحان هذا رايحة تركضين بالشارع جنج مخبلة علموده.

سلوى: بنات ما أوصفلكم شعوري شنو كان بلحظتها، شگد كنت فشلانة بس بعدين خربت من الضحك وصرنا أني ونواف واحد مگابل الثاني ونضحك، وكان هذا أول لقاء إلي مع نواف، وصرنا كلما تلتقي عيونا نتذكر الموقف ونضل نضحك أثنينا لوحدنا، والي يشوفنا يگول علينا مخابيل. أي صدك بعدين صرنا مجانين بس مجانين بالحب. فرح: كنت أسمع كلام سلوى وكلام رشا وإسراء شلون هي معجبة بواحد بغير قسم وكلش معجبة بيه بس تستحي تحجي وياه.

انتبهت على روحي أتمنيت إن أعيش هذا الشعور الي يحسون بيه البنات. صرت أتمنى مثل أي بنية أحب وأنحب. بس ما أتوقع المثلّي هم إلها حق تحب. ولأول مرة دخلت على گلبي مشاعر جديدة وحسيت إن هاي المشاعر أنثوية هههه وأخيراً صرت أمتلك صفة مثل البنات. نزلت من عند البنات وأني تفكيري بغير مكان.

ههههههه يعني أني هم بنية وعندي مشاعر، الله شوكت يجي هذا اليوم الي يجي شاب يعبرلي عن مشاعره ويگلي أني أحبج وأريد أخطبج، أهووو يخطبني شنو وأني أصلاً متزوجة أوف. والله صدك مبين حلو هذا الشعور، يعني مجرد التفكير بيه تكونين سعيدة، يعني لو أعيش هذا الشي شلون راح يكون شعوري؟ يمكن أطير بين الغيوم. يعني إحساس حلو إن تحس اكو من يبادلك الحب.

يعني شگد حلو أشوف نفسي واحد يهتم بيه ويگعد يراضيني إذا زعلت، وإذا مرضت يشعر بالقلق علية. وما يقبل واحد يحجي علية ويدافع عني، الله مثل ما شفت مرة نواف شلون كام يحوم على بيت جدي من سمع بسلوى تمرضت، خطية ما يعرف شيسوي لأن كانوا بعدهم ما خاطبين. يا رب أسعد أختي وهنيئها بحياتها. وأرزقني بواحد يسعدني.