رواية قلوب على جرف الهاوية الفصل الخامس 5 - بقلم الكاتبة نهى

قلوب على جرف الهاوية
للكاتبة nuha-d-h

حسام -جدي جبت المعلومات عن بيت عمي لكن
عمي منذر متوفي بحادث سير على طريق بغداد هو مرتة وباقيات بس البنات ساكنات لوحدهن بمشتمل وهسة همة حاليا بالناصرية والحالة المادية ضعيفة وهنة
اربع بنات سماح وسلوى وفرح وسرور عاد هاي بالنص ليس ما سماهة اسم بنفس حرف خواتها ما اعرف

الجد صالح وحس بگلبة نغزة على ابنة الي توفى بدون ما يقيم عليه العزاء ولاينصب له فاتحة وهاي شانت بنفسه -شوف بوية العار ركبنا من تالي عمري اني تنكسر رگبتي وشرفنا ينمسح بالگاع بسبب بنات منذر
شوف بوية لحمنا ما يبقا بيد الناس الغرب
وهذا شرفنا
صالح
جدا قاسي وغاضب لابعد الحدود الي يشوفة يخاف منة ويتصورة منزوعة من گلبة الرحمة يعني باختصار طاغية
على الرغم من حبة لابنة الصغير منذر لكن قسى عليه وطردة من حضنه
لكن هناك اسرار خلف جفاء الاب على الابن

حسام -يعني المطلوب تريد اجيب بنات عمي واجي
الجد-لابوية هاي عوفها علية اني وعمك وابوك احنا نتكفل بالشغلة انت بس انطينا العنوان
لان انت ما فارغ لهاي الاشياء خلينا احنا نتصرف
حسام -براحتك جدي اني راح اتوكل على شغلي
حسام نقاله يتصل -الو هلو حب
حضري روحج اريدج اليوم عروسة اليوم اريد تعدلين المزاج لان كلش تعبت هاي الايام
اي لاتخافين جايب الج هدية
يالله مع السلامة بالليل نلتقي

حسام وهو ينهي الاتصال اوف بس خل اخلص من هاي كومة الشغل العندي لان الله يحفظة جدي سملني طركاعة بنات عمي ما اعرف منين طلعوا والله ياجدي كل يوم اكتشف بيك شي والمصيبة الكل يگول انت شبيه جدك ادري هو اني صحيح محد يحزرني لكن معقولة طاغي واني مامنتبه على نفسي
حسام وهو يحجي وية نفسه
اي حسام انت طاغي ولاتغالط نفسك انت تكسر المقابل وابد ما ترحم والدليل حياتك وعملك ونسوانك وابنك الي ما تسأل عنه ولاتعرف الله وين خالقه حتى مايعرفك ابوه

حسام عندة ثلاث اخوة علي وعلاء وعامر وخوات اثنين رشا وشهد
وعمة نبيل عندة حسين ومحمد واسراء ونسرين وزينة زوجة حسام الي توفت
علي ضابط مقدم بالاستخبارات
وعامر مساعد ويشتغل وية حسام
وعلاء طالب بالكلية علوم حاسبات
الجد والعمام كلهم ساكنين بمنطقة راقية في بغداد بحيث يملكون شارع كامل كل البيوت الهم
البيوت تكون بيت بصف بيت الجد يسكن وياه نيبل وعائلتة
والبقية كلمن طالع ببيت
طبعا الجد كلمن منطي حصة لكل واحد من اولاده هاي الحصة الي بنطيها حتى من عندها ويبدي يكون نفسة ويشق طريقه بتكوين نفسه واسمه
كلهم نجحو من اخذوا مساعدة ابوهم وكلهم فتحولهم بيوت ومشاريع الا نبيل اتقشمر وضحكو عليه واخذوا فلوسه ورجع خالي اليدين الى ابيه ورجع گعد وية ابوه عايش جوة ايد ابوه وبكل ظنه ان هو الي يورث ابوه من يموت لان الكل مامعتاز
لكن نبيل خايف من حسام لان هو المسؤل وبيدة كلشي

فرح
كنت كاعدة بالدكان كالعادة بعد ماجبت لخواتي المسواك
رجعت بسطت بالدكان والوضع الف الحمدلله نعمة من الله وبعدني بزي الولادي
لكن اتفاجئت من شفت اثنين رياجيل اكبار بالعمر راكبين سيارة بيضة عالية لكزس
وراهم طبكت سيارة لاخ هم لكزس بس سودة
ونزل منه ضابط
اني ظل گلبي يرجف شلون ياالله شنسوي هذولي منو
رحت دخلت على بيت ابو نوال اني منبهة على البنات محد تفتح الباب انة كاعدة بالدكان واشوف الجاي والرايح فهنة اتعودن علية اني موجودة
رحت بدلت ملابسي ولبست عبات الراس واخذت عمو ابو نوال ورحنا لباب بيتنا
ابو نوال-تفضلو عمي طالبين منو
الغريب-هذا مو بيت ابو سماح
ابو نوال-اي عمي وصلتو
فرح طبعا هذا الحجي همة يحجون واني لابدة خلف ابو نوال اتسمع ومدنگة راسي لكن انصدمت من سمعت كلام الغريب من حجة كانت اللهجة مالتة بغدادية
الغريب-اني عم البنات
وطلع جنسية وشوفها لابونوال حتى يتأكد
التفت ابو نوال على فرح-لاتخافين بوية هذولي عمامج
التفت توفيق واخوه جواد على فرح وانصدمو
توفيق والدمعة صارت بطرف عينه من نظر على حال بنت اخو شلون تعبانة وضعيفة يعني خدامتهم موهيج تعبانة بگد هاي المگرودة الي گدامة تباوع عليهم وبخوف وبعد وياهة كره
فرح-شتردون من عدنا ماعدنا اي شي يربطنا وياكم
ابو نوال-بوية فرح دخلي عمامج جوة بالبيت مايصير تحجون هذا الحجي بالشارع
انتبهو العمام شلون فرح مطيعة وتحترم الرجل الكبير الي واكف امامهم عكس معاملتها وياهم بجفاء صدمهم
علي -اشو انتي ماتحشمين احد
فرح -اني احترم الناس الاعرفهم لكن الغرباء ما مجبورة احترمهم خصوصا اذا كان ما مرحب بيهم
علي اجة يهد علية لكن وقفه ابوه باشارة منه
توفيق-شوفي بوية ترة احنا ما درينا بوفاة اخونا منذرالا البارحة وبالصدفة ولانعرف ان هو عندة بنات وهم بالصدفة عرفنا
فرح وتنظر الهم نظرت حذر
وبتردد راحت طرقت باب الشارع وطلعت الهم سلوى لابسة حجاب
سلوى منو
فرح -اني فرح اختج فتحي الباب
انتبهو على نوعية الحذر والخوف واجراء الحماية الي متخذاته
انقهروا عليهم
فتحت سلوى وببتسابة تحجي وية فرح بدون ما تنتبه على الي خلف فرح
سلوى -هَـا فلاح ليش راجع من وكت
العيون كله عقدت الحواجب باستفهام من هو فلاح
فرح ووجه گام ينطي الوان
فرح بصوت ناصي-دخلي فوتي جوة فضحتينا انتي وكشرتج
علي ابتسم على شكل فرح شلون تخزر اختها الاكبر منها مبينة اكبر منها بس الله يستر عليها شكد حلوة
رفعت سلوى عيونها من على فرح ووگعت على الرياجيل خلف فرح شهكت بصدمة وبخوف لان شكلهم عرفتهم مثل الشكل الي بالصور مالت ابوهة
لكن فرح ما شايفة الصور لان ماجانت تحبهم لان همة الي اذو ابوها ومحد رحمة وهو عايش ولا احد رحمة وهو ميت ابد ما راح تنسالهم الي صار بابوها وقهرت ابوها ودمعتة الي كانت كلها اشتياق لحضن امه وابوه واخوانة والي همة مو بحاله
دخلو العمام وعلي للهول الحولي الصغير كان مكان صغير دافي يجمع البنات وبي تعم الالفة والسكينة
وكانت سماح تطبخ بالمطبخ وريحة الطبخ الزكية تملىء المنزل
فرح -سموحة تركي البيدج وتعاي شوفي منو اجانا للبيت
سماح وهي تنشف ايدها بمنشفة المطبخ وتنزل ردن الثوب وتلبس شالها الي معلگته على باب المطبخ وراحت ورة فرح وتوقفت بصدمة من شافت منو القادم لزيارتهم
سماح-السلام عليكم
الكل -وعليكم السلام والرحمة
اتقدم عليها توفيق وهو القهر ينازع يگلبه -انتي سماح
سماح والخوف مالي گلبها-اي اني سماح
العم غمض عينة واخذ شهيق وزفير
علي التفت عليها وانصدم ان هذا الجمال احد مدنسة ومغتصبة صدگ قهر وغصة بالگلب دنك والحسرة صارت بالگلب
خطية هاي شنو شافت من دنيتها
جواد-هلة بوية وين اختكم الصغيرة
كان هناك بعض التردد والفضول بين العمام وبنات الاخ
سماح التفتت للغرفة الي تنام بيها سرور خطية هاي الايام كعدت حالتها تتحسن
سماح-فرح روحي ساعدي سرور حتى تجي تسلم على عمامي
جواد-ليش شبيه سرور
فرح وهي تنظر الهم بغضب -اختي قبل فترة موبعيدة احترگ جسمها بماي حار وتضررت بس رجلها كلها
توفيق -شوفي بنتي احنا نتكفل بيها وناخذها او نسفرها لاحسن جراح بالعالم حتى يعالجهة

راحت فرح بعد ماغزرت علي لان گعد بباوع على سماح وعيونة ما طاحت من عليها
رجعت فرح وهي تسند سرور ولازمة ايدها وسرور تمشي ببطيء
سرور رفعت راسها ووكعت عينا على توفيق وصرخت صوت عالي وصاحت
سرور وبتعجب -بابا بابا عايش
بنات شفتو اني مو كنت اگول بابا عايش دائما يجيني بالحلم عبالك عايش ماميت
طبعا كان لكلمات سرور البريئة كان لها الوقع الحزين على توفيق وجواد
كان حزنهم على بنت اخوهم الي ستوهم عرفو بيها محترگة وحزن على لهفتها لابوها خطية بعدها صغيرة وفاركت احباب گلبها
توفيق ما تحمل الموقف وراح اقترب عليها وبجة وحضنها
توفيق-تعاي يابعد عمج اني مثل ابوج
سرور بتسأل لسماح-لعد منو هذا اذا ابوي
سماح وبصوت ناصي -هذا عمو توفيق اخو بابا الله يرحمة
علي-احم احم هلو شلونج سرور
سرور وبخجل-اني زينة
اقترب منها جواد بخطوات ثقيلة ونزل عليها وباسه من راسها
توفيق -شوفو بوية احنا اجينا حتى ناخذكم ويانا لبيت ابوكم وجدكم مايصير بعد تعيشون لوحدكم واحنا مثل ماتعرفون ماكان عندنا خبر
فرح -ليش مو اتصلنا عليكم على الرقم الي كان بابا بتصل عليه وكان واحد منكم دائما يجاوبه ويظل يحجي عليه ويسدة بوجهة اتصلنا بيوم وفاة بابا وگال ماعدنا واحد بهذا الاسم
توفيق وجواد باستغراب -منين جبتي هذا الكلام
سماح تصيح باختها -فرح بس كافي
فرح -لا ما اسكت ليش تخافين على مشاعرهم خاف تنجرح
علي -احترمي نفسج ترة مو تشوفين لحد هسة احنا ساكتين عنج معناها تظلين تمسلتين بالكلام
توفيق -اسكت علي اتركها تحجي ترة حقها الظاهر كان اكو واحد يتواصل وية اخوي الي مخلي يعتقد ان ابوي مايرحب بي وما يريد يشوفه
وهذا اعرفة منو بس خل افرغ اله واشوف شمصخم هلمرة
لكن ما راح اسكت اذا اكتشفت ان هو ورة كل السالفة
جواد-يالله يابعد عمكم جهزو حالكم وقفلو بيتكم واريدكم حتى ترجعون ويانا للبيت اليوم
فرح وهدت رادت تعارض لكن سماح سبقتها-صار عمو بس انطونا فرصة حتى نلم غراض البيت
والله وفعلا بلشو البنات يلمون غراض البيت وفرح اتكفلت ان تحفظ غراض ابوها وامها

وكانت ترتب بيهم وشافت الرسايل الي واصلة لابوها من جدها وحفظتهم بجنطتها وشافت صورهم خطية ظلت تبجي شلون راح تفارق البيت الي اتجمعت مع امها وابوها وخواتها اتذكرت ابوها شلون من يرجع من الشغل شلون محمل بمسواك للبيت وشغلات الهن وشلون يطلعهم لمدينة الالعاب وامها من كانت تمشط الها شعرها الطويل وتكول انتي بيوم عرسج اني اسوي شعرج
هواي مواقف الهة ويه عائلتها بهذا البيت شلون راح يتركونة يارب واحنا نراح نروح للمجهول

ورحنا اني وخواتي الى بيت الرجل الطيب ابو نوال الذي عاش معنا كل معاناتنا واحزانة وما قصر ويانة ابد حضنت الحضن الحنين الي استقبلنا ام نوال وكان الموقف لايخلو من الحزن والدموع
الا. فرح الي تكون اكثر صلابة في كل مرة
حتى مرات سماح تتمنى اختها فرح ان تبكي في وقت الحزن مثل اي فتاة حتى لاتظل حسرة مكبوتة بالگلب

فرح وهي تلتفت على بيت ابو نوال وتودعهم في سرها
سوف نترك اناس احبونا واحببناهم بالله
ابونوال-روحن بوية مودعات بالله

وفعلا صار اليوم الثاني والبنات محملات في الكثير من التفائل والامل الا فرح محملة بالحقد والكره باتجاه هؤلاء الذين يطلقون على انفسهم اهل

يتبع