رواية قلوب على جرف الهاوية الفصل الخامس عشر 15 - بقلم الكاتبة نهى

قلوب على جرف الهاوية
للكاتبةNuha-d-h

فرح
كنت كاعدة اعدل بفستاني ومنتظرة الحبيب الي راح يجي وياخذني الي راح اعيش وياه حياتي واعيش كل احلامي
وصرت اعدل بفستاني وبقيت منتظرة واضحك وية البنات واخذ وياهم صور بنقالي وكعدت ارسل بصوري
لرنا صديقتي حتى تشوفني ببدلة العرس وهي خطية كلساعة تتصل علية وتعلمني شنو اسوي فديتهة
واشوف خواتي وبنات عمي شلون فرحانات ويركصون على اغاني الديجي والنسوان يسولفن ويضحكن وكانت السعادة مرسومة على جميع الوجوه والجو مخبوص خبص
قبل قليل كالت شهد حضرو روحكم واستعدو راح يجون واني دگات گلبي صارت مثل قرع الطبول بيوم الحرب هيج كانت ترعد
ما اعرف اخبي فرحتي وين من عيون البنات كنت كلش كلش فرحانة
لكن بعد ساعة من الانتظار حسيت هناك وصارت حركة غريبة بين البنات وانتبهت عليهن شوية شوية بدن ينسحبن وحدة ورة الثانية وطلعن من الصالة
وراهة حسيت نصة صوت الديجي
وشوية خفت الرجل عن الرقص واصبحت فقط
اسمع صوت الهمس بين النساء
شفت اختي سرور دخلت وصارت عينها بعيني وكانت عيونها حمرة
اتململت اتضجورت من الكعدة اشرت لسرور شنو شبيها
سرور -ها لامابية شي
وبعدين صارت سنطة هدوء وشفت النسوان شلون بدو ينسحبون اهووو ماعاد عندي صبر خل اروح اشوف شنو اشو منو أسئلها تكلي ماكو شي اخير شي ما اتحملت
كمت اني وبدلتي ودخلت على البيت وتوجهت على غرفة بيبي ردت اشوف وين صارو الجماعة اشو اتأخرو عسى ماشر
رحت اقتربت وكانت شهد ورشا ظهرهم علية ويحجون وية بيبي
رشا-شهد ما اصدك الي جاي تحجينة مامعقولة حسام يسوي هيج دكة مستحيل
شهد -حبيبتي روحي شوفي بعينج بابا شلون شايط من القهر والامة مگلوبة برة
ويگولون خطية علي شلون مكسر جام السيارة مالت العرس من الغضب كلة من ورة اخوج والله فشلنا گدام العالم
فرح اني اسمع بكلام البنات بس حسيت اطرافي بدت تبرد وثكلت
رشا-والله ما اصدك ليش هيج سووة بينا ادري حتى لو جدي غصبة وجبرة. على الزواج منها بس مو معناها يطلع هيج طلعة ناقصة ادري هاي مو بنت عمة شلون يكسر بختها هيج والله حرام عليه
فرح
من سمعت كلام البنات عبالك واحد رفسني ببطني انحنة جسمي للامام ولفيت ذراعي وحضنت نفسي من الرجفة والبرد الي اكتسح جسمي مو هنا الصدمة لا
الصدمة من اجتني رسايل على الواتس اب من نقال حسام واني دموعي غوشت عيوني من الالم
دخلت على الواتس اب وكانت الصدمة الي اودت بحياتي وحطمتها الى قطع صغيرة مبعثرة
شفت صور حسام وهو نايم بحضن بنية وحدة لاخ شلون وهو يضحك وياهة وحاضنة وغيرها وغيرها
وبعد صور عديدة بيهة لعقد زواجه
لكن الاخيرة كانت الطعنة ان هو بقاط العرس مالتة نايم بحضنها وهي حاضنتة اخ الله
اي هو هذا قاط العرس نفسة الي رسلة الي حتى اشوفة وياخذ رأيي بي
وراهة رسل الكلام الي نها اخر امل الي
((هاي هدية مني الج ياحبابة حتى تبطلين حركات الاسترجال منا ورايح
ترة مو اني الي يجبرني جدي علمود اتزوجج هذا عشم ابليس بالجنة يخليني اربط نفسي بوحدة مثلج ))

لا لا مستحيل شلون
يتركني ويخليني بهيج موقف انتظرة ببدلة العرس
ليش هيج يسوي بية و گدام الناس كلها يهجرني يعني ربي حتى لو يهودي ما اتوقع راح يسوي هيج سواية وياي
فرح وهي تجر النفس وتحس بالالم ليش ليش اني شسويت حتى استحق هيج يصير بية ترة ما ردت شي
ردت بس انستر حالي حال اي بنية
رفعت راسي للسما وحسيت بالم جاي يكطع بكلبي ربي اخذ امانتك ولا هاي الذلة والعار ربي اخذ عمري خليني ارتاح ما عاد بية صبر

كان منظري من بعيد واني لابسة بدلت العرس ولازمة نقالي بيدي ودموعي اختلطت بكحلتي وساحت على خدي كانت لوحة تعبر عن مدى انكسسار حلم فتاة
لم يكن بمقدورها حماية نفسها من الالم والخذلان
انتبهولي البنات من گعدت على الگاع اني وبدلتي
وشافو حالي وركضو علية
رشا اخذت مني نقالي وشهد گومتني رشا بشهكة وهي تحط ايدهة على حلگها من الصدمة واقتربو منها البنات وشاهدو لحظات انكساري وشافو صور حسام وهو يدوس على كرامتي بالگاع
والرسالة لحد هسة امام عيوني

گمت اني وبدلتي بعد ما اجت اختى سلوى علية وهي تبجي على حالي
طبعا شما احجي عن لحظة الانكسار الي اتعرضت لها بوقتها ما راح اوفيهة حقها من كم الالم الي حسيت بي
شعوري كان مثل الي يستأصلون عضو من جسمة بعملية بدون بنج هيج كان حالي من الالم

رفعت البدلة ورفعت راسي ووكعت عيني على بنت عمي نسرين شلون فرحانة وتضحك بكل شماتة
وراهة بفترة سمعت الناس كله راحت لبيوتها وكلها تتسائل واسمعهم شيحجون
والي وصل لسمعي
((الله العالم شنو مسوية من مصيبة وخلت ابن عمها يتبرة منها بيوم عرسها ))
هذه الكلمات حسيت بيها مثل السياط التي تقع على جسمي فتلسعه بالم مبرح
وغيرة وغيرة من الكلام الي كلة طعن ومابي
اي رحمة

والله
ما ردت شي غير افرح حالي حال البنات

فرح وبصوت عالي امام الكل
اااااخ الله
ربي جا ماكسرت خاطرك وتعاين لحالي
سمعت اصوات الزلم دخلت للديوان
واني نهضت من مكاني وكأن فرح القديمة رجعت من جديد بعد ما اني خنكتها بثنين ايدية وقضيت عليها هسة محد راح يفيدني غير فرح القديمة
رفعت بدلتي

سلوى-فرح وين رايحة
فرح -رايحة برجلي للموت الاحمر
راح اروح واكلة هلة بيك يالموت تعال لية وافتحلة ذرعاني اذا يريد بعد

سرور وهي ممرودة على حال اختها شافت هي وين متوجهة وخافت عليها خاف يسون بيها شي لان هناك اهلنا كلهم موجودين عمامي واولادهم واقاربهم
-لاعفية فرح على بختج وين رايحة
ركضت وراهة لكن مع الاسف ما لحكت عليها
كانت فرح دخلت عليهم على جدها وعمامهة وبس الله اليستر

فرح

دخلت عليهم وشفت جدي وعمامي واولادهم واقاربهم كلهم رفعت فستاني الثقيل واتقدمت عليهم
فرح الشرر يتطاير من عيونها بتجاه جدها

انتبهت على علي ابن عمها شلون ركض من شافها دخلت عليهم راد يردعها عيب عمومتهم كلها موجودة
لكن فرح لم تبالي

انتبهت لعلاء شلون لزم علي ومنعة عنها حتى مايصولها
كانت جدا ممنونة لعلاء على موقفة هذا لان هو ما اهتم للعالم بكد ما اهتم ان اني ادخل واخذ حقي منهم وابرد النار الي بصدري الي ما ناوية تنطفي
وما اهتميت للعالم ولمنظري من دخلت بهذا شكلي
لان شنو فايدة الستر بعد ما انهتك عرضي وشرفي من ورة سواية ابن عمي بية

فرح وكفت گبال جدي ورفعت راسي وصارت عيني بعينة
وحجيت وبصوت عالي مهضوم -هَـا يشيخ صالح مابسك ما شبعت من دم بنات منذر ليش يشيخ ماكفاك قهرة منذر وهو عايش ورحت عليه بگبرة تريد تقهرة ببناتة جا ماخفت الله بايتام منذر عفو عليك ياشيخ صالح مو هيج العشم بيكم والله لو تاركينا للذيابة تنهش بلحمنا ولاهاي سوايتكم بينا اني وخواتي على الاقل هذولي غربة وما عليهم عتب بيوم يكسرونة لكن انتو شنو عذركم ويانة
والله جنت خايفة من الغرب خاف مايرحمونة
لكن ماجنت حاسبة حساب اهلنا وسندنا
يكسرونا ويطعنونا بظهرنا
ليش يجدي كسرت بختي واني حرمة ليش
بعد شخليتو للغرب بعد ما اعتب على الناس بيوم تنهش بشرفي وبسمعتي
فرح تتوعد -شوف يجدي اذا جانت نيتك
بعد الي صار بية اليوم
ترجع تكمل وتزوجني لحسام
من هسة اگلك لاتعب نفسك
اكتلني وادفني من هسة احسنلك لان. انتو. بس هاي الي تگدرون عليها بس الذبح
وتعوفون الي يلحق بيكم العار يعيش حياتة طول بعرض
وتروحون تركضون على المظلوم تاخذون الحق منا
شوف لو يبقى حسام اخر رجال بالعالم ما راح بعد اقبل بيه والله لوتصوغونة ذهب ما اقبل بي
لان مع الاسف مايشرفني اخذ هيج واحد

انتبهت على حركة مو طبيعية خلفها واتجهت الوجوه على الي دخل من باب الاستقبال
التفتت
وشفت حسام
لابس قاط العرس وعيونة حمرة وشعرة منفوش ومهوس
انتبهت على علي شلون ركض عليه لزمة من سترتة وشبعة طن بوكسات وضرب ورفس
و حسام لايشيل ايد ولا رجل
لكن انتبهت على صيحة عمو توفيق
التفتت شفت جدي لازم گلبة ووگع بالگاع
اني ارتديت للخلف وسويت مجال لعمامي لان انخبصو
بجدي
وشفت عمي توفيق وعلي شالو جدي وركضو بي وصار الصياح وكلها ركضت على سياراتهم حتى ياخذونة للمستشفى
ابد ما رف گلبي على جدي لان موهين الي صار بية كلة من تحت ايدة
عفتهم وطلعت بعد ما وجهت نظرة اخيرة
على حسام الي كانت شفتة تجري دم

فرح
دخلت على البنات لان ما يدرون شنو صار
نظرت لنسرين اشوفها شلون تضحك بشماتة على حالي

اخ الله شكول عليك ياحسام خليت الشماتة يفرحون بهضمي وكسري
رحت لغرفتي وسمعت بيبي تبجي
الجدة -اوي حسيم كون الله يبليك ويشلع گلبك مثل ماشلعت گلب هالمكرودة

رفعت بدلتي ردت اصعد فوك لغرفتي
شفت البنات رادو يصعدن وراي لكن اشرتلهم محد تجي وراي طلبت منهم يتركوني لوحدي لان محتاجة ابقى لوحدي ما اريد احد يشاهد لحظة ضعفي وانهياري

رحت دخلت بغرفتي وقفلت الباب على روحي
وجلست بالزاوية وكرفصت على نفسي. مثل الطفلة
ظليت فترة طويلة على نفس كعدتي واني جامدة بمكاني
كان البيت هااااديء انتبهت على نفسي وشفت وضعي
حسيت بروحي وحيدة بهذا العالم
صار حالي مثل الي عبالك دخل غيبوبة

((امي-شوفي ماما اني اسويلج شعرج من تصيرين عروسة
فرح بقهر وهي تهلس وتجر بخصل شعرهة وتنزل بتسريحتها -زين يمة تعاي شوفي بتج شلون هضموهة باحلى يوم بحياتها يمة تعاي اسولفلج شنو جرة بحالي ))

ترة ياناس
والله ماسويت شي غير سلمت امري بيدهم وتنازلت عن عنادي ورضيت ان ارضخ
لقوانينهم وكفيت عن العناد ولبست ثوب ابد مو ثوبي وغيرت من شخصيتي
وغيرت حياتي كلها
جنت اگول عسى ولعل من اتغير همة والزمن يتغيرون وياي و
الجائز اني باسلوبي وتصرفاتي هي الي جاي تعثر وتعاكس حياتي وتخليهم يقسون وياي كلة مني
لكن مع الاسف الي صار هسة ثبتلي ان
فرح القوية الصلبة هي الصحيحة
ان فرح المسترجلة القديمة هي الوحيدة القادرة على الوقوف بوجهم وهي الوحيدة القادرة على حماية نفسها
ولو هي موجودة جان ماهذا حالي ولاصرت بهيج موقف
المفروض ما اغير نفسي واتنازل الهم
لكن فضلت السكوت والانحناء امامهم
تحت مقولة اسايرهم لكي اعيش لكن مع الاسف كنت بهذا عملي اسلمهم سلاح موتي بيدهم حتى يقتلون روحي الابية ويدفنون فرح بنت ابوها

گمت ونزعت البدلة عني ولزمت مكص وظليت اكص وامزق بالفستان

وانهاريت ابجي
شكول عليك
يالعلكت گلبي بهواك
شكول عليك يلعلگتني بيك ليش ولك خليتني احبك
اخ الله اتعلمت من وراك شلون احلم مثل البنات
فرح اصحي ليش مقهورة على واحد خانج وغدرج هو اصلا شوكت حبج حتى جاية تعتبن عليه وتنقهرين على حب اصلا ماموجود

ورحت وكفت كدام المرايا
ولزمت وكعدت اكص بخصل شعري واني فاقدة وما ادري بروحي شجاي اسوي وكعدت بالگاع
وطاح المكص من ايدي وحسيت بي جرحني جرح عميق
من طاح لكن ما اهتميت لان جرح المكص مايجي بكد الجرح الي يگلبي
انهاريت حسيت نفسي من ورة المصايب الي جاي تدور علية عبالك شلون المدفوعة على حافة هاوية واريد اوكع
وحسيت بلحظة لازم اقرر ان ارمي نفسي من الحافة حتى ارتاح لو ابقى اقاوم

مرت الساعات واني لوحدي بالغرفة
صحيت على دگ الباب وشفت روحي نايمة بمكاني بالگاع
ما كمت مابية حيل واصلا ما اريد اكوم احجي وية احد
حسيت جسمي بارد وملابسي مبللة ما اعرف ليش ردت ارفع ايدي اتحسس هذا البلل منين لكن ماكدرت ورجعت حست غطيت بالنوم بدون ما ادري على روحي
ورة فترة ما اعرف شكد بس سمعت اصوات صياح وصوت كلش قوي عبالك باب وگع على راسي
رجعت غطيت بالنوم
لكن الصريخ ما يريد يتركني ودوخني
حسيت على روحي خفيفة بالهوى طايرة
شنو معقولة الله استجاب لدعائي وراح اموت
وراها حسيت بالهدوء العميق المريح

يتبع