رواية قلوب على جرف الهاوية الفصل الخامس والعشرون 25 - بقلم الكاتبة نهى

قلوب على جرف الهاوية
للكاتبةnuha-d-h
فرح
وعيت على نفسي وحسيت ادية مربطة وعيوني معصبة ونايمة عالكاع عدلت نفسي لان رجلية كانت حرة غير مقيدة وگمت وكفت صرت اتحرك بالمكان مثل العمية وانضربت بوجهي بالحايط وكمت امشي على كيف بموازاة الحايط كنت احاول استطلع المكان الي اني بي وماعندي اي وسيلة تخليني اعرف اني وين وشنو يحيط داير مدايري كانت العيون والايدين مقيدات كانت بس رجلية حرة. وبقيت اتحرك على كيف وكتفي ملاصق للحايط بعدين حسيت بتغيير مسار الحايط هاا
هذا ركن الغرفة يعني لازم اعكس واستمريت بالحركة لحد ما صادفت بواحد من الحيطان باب
درت جسمي وتكأت على الباب من جهت الظهر لان كانت ايدية مقيدة للخلف اتلمست الباب كان نوعة باب حديد قوي حاولت اتحسس معالم الباب لاحظت بي سركي ((يعني اللسان الي من نسحبة للخلف وللامام لقفل الباب ))
حطيت اذني على الباب كانت هناك برودة وسمعت صوت جلب وصوت صياح ديج بعيد
كعد دماغي يحلل نوع المكان الي اني بي
وتبين من خلال بحثي في المكان ان اني كاعدة بغرفة معزولة خارجية ليست في بيت او تابعة لبناية لان حسب معلوماتي الطفيفة ان هذا الباب نوعة حديد ومحد يحط باب حديد لغرفة داخل البناية او المنزل هاي وحدة
ثنين بما ان الباب بارد وصوت الكلب والديك يدل على ان الغرفة خارجية معزولة غير متصلة مع البيت او البناية
او بالاحرى الغرفة هاي موجودة في مزرعة والله اعلم

رحت اتابع رحلة البحث لكن هاي المرة اتخليت عن لمس الجدران واصطدمت ببحبال معلقة نازلة من السقف
اتوصلت الى استنتاج ان هاي الغرفة مخصصة لخطف الراهائن عزة يعني اني رهينة بس هسة بيش الساعة واني شكد بقيت على هذا وضعي
وحسيت معدتي صاحت من الجوع اوف يمة
والجو گعد يبرد بالزايد
احتمال الوقت لو فجر لو ليل لان صارت برودة قارصة
اوف والله ياربي احس بروحي صرت المحقق كونان
والله حتى كسرت عليه
سمعت اصوات اقدام قريبة على الباب رحت رجعت على نفس مكاني وسويت نفسي نايمة بالگاع
سمعت الباب انفتح واني گلبي احس صعد لبلعومي من سرعة النبض
-اهووو هاي بعدها نايمة ولك شكد خليتلها مخدر
-ما حطيت هواي بس رشيت على وجها ثلاث مرات
بس تلكاهة گعدت ورجعت نامت
-اكلك اترك صينية الاكل هنا وهي من تگعد تاكل
بس فك ايديهة
حسيت على واحد اقترب مني واني جمدت بمكاني
وكعدت اردد بگلبي (وجعلنا من بين ايديهم سداً ومن خلفهم سداً فأغشيناهم فهم لايبصرون) صارت مهمتي جدا صعبة ان لازم امثل دور النايمة ولازم ما اخلي يحس بية اني صاحية وهو راح يقترب مني وراح يلزمني يالله امتحانك صعب
دنك بتجاهي وگعد يفتح بالحبل المشدود حول ادية
وبعدها حسيت اطلق سراح ادية من الحبل

حسيت ايده تتلمس بوجهي وقرب نفسه على وجهي
كمزت وكوة لزمت روحي وبقيت متماسكة حتى ما اصرخ من الهلع والخوف
-هَـا سالم بدت رحمة الله دعوف البنية ترة هاي مو النا هالمرة
ولك هاي اذا يصير بيها خدش نروح كلنا ورة الشمس
-اخ بوية دشوف شوف شلون جمال خرب بالحظ
-دمشي يالله عوفها خل نروح ترة اجتنا اوامر لازم نشدد على الحراسة
حسيت عليهم جاي يمشون بتجاه الباب ويسولفون
فتحوا الباب حتى يطلعون وكمل كلامه وية صاحبة
سمعتة يگول لازم يشدد علحراسة لان راح ينقلون الرهينة الثانية يجيبوها هنا
-هَـا زين هاي الرهينة هم بنية لو رجال
سمعت صوت قفل الباب من الخارج
واصبحت اصواتهم ضعيفة بس كان باستطاعتي اسمعهم
-والله ما ادري بنوع الرهينة مرة رجال طفل شاب شايب
المهم همة كالو جهزو نفسكم احنا هنا عبد مأمور
واصبحت الاصوات جدا بعيدة واطمنت ان اصبح المكان هاديء كعدت وحسيت بروحي كنت حابسة انفاسي من الترقب يمة والله متت بدمي ياربي دخليك ابعدهم عني يارب ادفع البلاء واولاد الحرام من طريقي
كمت مديت ايدي على العصبة ونزلتهة من عيوني وانتبهت للمكان الي اني بي كانت غرفة تعبانة ووقذرة ومعلك بيها حبال وانتبهت على شباك لكن عالي ورحت گبل عالصينية واني افرك بيدي بمكان شد الحبل.
رحت كعدت وشفت شنو حاطين خبز وروبة وماي يالله انعم الله احسن من ماكو
وطحتلك على الموجود ونسفت الاكل نسف
وشربت الماي وكعدت اتخيل شراح يصير بخواتي من يسموعون اني انخطفت وحسام شنو راح تكون ردت فعله حسيت بالنعاس والبرد دورت بعيوني حول الغرفة على غطة حتى ادفي نفسي يعني اذا ما اموت من ورة القتل على ايد هذولي يمكن اموت من ورة البرد وانتبهت
لكيت بساط مشمور باهمال رحت ركضت عليه نفضته
مرة مرتين حتى خاف بي شي اخاف من الحشرات اوف
اخذتة ورجعت على نفس مكاني ولفيت روحي بالبساط والله كعدت اتحسر على نومتي ببيت جدي
بس كون الله يطلعني من هاي الشدة بالسلامة والله اورح گبل على جربايتي ولمخدتي وبطانيتي ابوس بيهم واشمهم وبعد اتنعم بحساس الدفو الي احس بي واني جوة بطانيتي وراسي عمخدتي غفيت ونمت على هذه الافكار التي تراود افكاري

حسام
صرت مثل المضيع له وطن تايه واعاين بالعبون واباوع للحلوك شيحجون
جانت اعصابي كلش مشدودة من التوتر والترقب جنت عايش على سماع الاخبار عن فرح
فهمني علي من رحنا اني وياه لبيت جدي عن مو ضوع عمي نبيل وشلون عرفو بي ان هو ورة اختطاف فرح
علي-اجت اسراء لبيت جدي اليوم من الصبح حتى تحجي لجدي السمعتة من ابوها بأثناء اتصالة مع بعض الاشخاص سمعتة ان هو راح يقوم بخطف فرح
وبعد حجت هواي اشيا عن ابوها احنا بالاصل نعرفها
حسام-والله عمي طلعت اسراء سباعية وبنت حلال شلون گدرت تحجي عن ابوها
علي-حسام ترة الظالم لا بد وان يجي يوم ويوگع وعلى ايد اقرب الناس الة واسراء رفضت ان تبقى ساكتة عن افعال ابوها وطلبت منا ان ما انجيب اسمها وسيرته لعند ابوها وما نگول ان اسراء حجت شسمعت عنك
حتى مايأذيه لان هذا مجرم
حسام-لا هذا هو الهة الامان بس خل ترجع ابيتهم وتبقي عيونها مفتحة على ابوها وشكو شي جديد تسمعة خل تنطينة خبر حتى لو برسالة
علي-وهو كذالك اني فهمتها شتسوي من تروح طلبت منها حتى اذا تكدر تدور بغراض ابوها الخاصة بلكت توگع النا على فد خيط يوصلنا لمكان فرح
حسام -عاشت ايدك
علي-شوف حسام ترة اتوقع راح يجيك او يجي لجدي اتصال من الخاطفين فما اريدك تتصرف من يمك لو مهما كان فاهم اي اتصال تستلمة تنطيني خبر بسرعة واني اتصرف فاهم
حسام -هذا هو وانت بالمقابل متتحرك لاي مكان يخص فرح بدوني سامع
علي-هذا هو اتفقنا

حسام
رحت طلعت من عند علي واني الدنيا صارت ضيگة بعيني فدوة رحتلك ربي حوط فرحة گلبي بأمانك وبدرعك المتين ربي هاي فرحتي من الدنيا لاتخليهم يأذوها ااااخ الله
وين الكاج يفرحة بيا مكان اتعنالج واجيج صرت مثل الهايم بصحراء مايعرف الطريق منين
يفرحة هسة شنو حالج خايفة مرعوبة لو جاي تحاولين تخلصين نفسج منهم لو منتظرة حسام يجيج
اااخ الله دليني عليها والله راح اموت من الانتظار
((وينج يفرحة عشگ حسام وينج يلهفة بوسط ظلعي
وينج يحسرة الم گلبي وينج يوردة بوسط خضني))(خاطرتي)
قطع افكار حسام ودك نقاله
باوع على المتصل وكان رقم غريب وبسرعة رد
-الو
-الو هلة بحسومة الوردة شلونك
-منو وياي
-انة عمك نبيل هسة عرفتني
-هلة بنبيل گول طلباتك وبسرعة ادخل بالمفيد
-حلو هسة الشغل بدة يحلى
-شوف نبيل قبل كلشي قسما بالله اذا لزمت شعر من فرح ماتلوم الا نفسك وقسماً بذات الله لو تصير بسابع ارض اجيبك
-لتخاف على فرحتك بالحفظ والصون هي خطار عند عمها كم يوم
بس هاي بقت انت وشطارتك بقت تريدها ترجعلك سالمة لو تريدها ترجعلك بتابوت بعد انت بكيفك هاي بقت يمك
-كول من الاخير شنو طلباتك
-حلو تمام اول شي اريد تحضر مبلغ مالي بقيمة (وذكر رقم المبلغ)وثاني شي تجيني على العنوان الي اني راح احددة الك وثالث شي وهو الاخير اياني وياك ودير بالك ان توصل اي كلمة من الاتفاق لاخوك علي او لاي جهة مختصة بالاستخبارات ترة اي حرف يطلع منك
فرحتك تروح بالرجلين سامع ترة هي الضحية
حسام يسمع كلام عمة وهو يحس بنزول عرق بارد على طول ظهره من الخوف على فرحة ومامتوقع ان نبيل لهدرجة قذر ابد ممتوقع والظاهر علي يعرف عنة هواي اشياء
-هذا هو تمام بس گلي عن موعد ومكان الاستلام واني جاهز بس هَـا دير بالك تلعب بذيلك وياي صدكني اكتلك ولشرب من دمك لو يكون اخر عمل الي بحياتي

فرح
كنت غاطة بنوم عميق وسمعت صوت واحد يون بالغرفة الي اني بيها صدك خفت بديت اصحصح من النوم وكنت منطية وجهي عالحايط بديت انهض ووخرت عني البساط الي كنت لافة روحي بي والتفتت لناحية الصوت
شفت جسم ممدد على الارض وبالجهة المقابلة الي كان مغطى بالسواد من فوك لي جوة
وانتبهت على صاحب الجسد بدة يصحة ويوعي لنفسيه وكان ظهرة بتجاهي شكلة هذا هم رهينة مثل حلاتي
خطية بس مبين موجوع بدة يلتفت بخوف ودار وجسمة ووجهة لناحيتي وباوعت عليه وشفتة

فرح بفزع وخوف وهلع صارت تصرخ بصوت عالي
لاااااا مستحيل
دخيلك يالله دخيلك ياصاحب الدخيل
لالا لا ااا مستحييييل لا هاي شننو يمة لا لا واغمى عليها
يتبع