رواية قلوب على جرف الهاوية الفصل الثالث والعشرون 23 - بقلم الكاتبة نهى

قلوب على جرف الهاوية
للكاتبة nuha-d-h

حسام
من بعد ما اتفقت مع فرح ان تنتظرني ارجع من دبي
واطلبها من جدي وبعدها نـِـٓـتزوج لان ملينا الانتظار والصبر وجزعت من الفراق
المهم التهيت وسافرت لدبي والتقيت بالصدفة مع صديقي نورس باول يوم وصولي لدبي وعزمني على الغدة بمطعم واخذني وياه وبعد ما خلصت اكل رحت اني وياه حجزت بفندق وبعدين افترقنا لان هو هم كان عندة شغل
لكن انتبهت على نقالي ماكو بجيبي وتذكرت اخر مرة حطيتة على ميز الطعام والله ظليت احوم شلون الگة نقالي لان بي ارقامي كلهن وارقام العملاء وغيرهن
اهووو والله سالفة هاي منين طلعتلي بالليل واجة نورس
وحجيتلة السالفة واتصل عالمطعم وانطاهم مواصفات النقال بس ماكو ما لگوه
اني ما يهمني النقال بس عندي هواي شغلات مهمة
واهم شي سجل الارقام وعملائي كلة
يتواصلون وياي عن طريقه هسة ما اريدة ميخالف خل ياخذونة بس على الاقل يرجعون الشريحة
اوف و الله غير شغلة عاوية طلعتلي
بعدين اخذت نورس ورحت اشتريت نقال جديد وشريحة وبعدها اتصلت على علي لان هو الرقم الوحيد الي عالق ببالي وحافظة لان اني بية طبيعة ما احفظ ارقام
المهم انطيتة خبر ان نقالي ضاع او انسرق وبعدين كعدت اخلص شغلي
ورحت على الوكيل وخلصتلي كم شغلة تخص معرض السيارات وبعدها رحت على شغلة الصياغة لان كنت متفق مع كم زبون على موديلات طلب خاص واني كلة اشتغلهم هنا بدبي عندنا مشغل خاص بينا نتعامل وياه دائما وهذا الشغل اخذ مني وقت كلش هواي
وبعدها طلبت من صاحب المشغل ان يسويلي عقد ذهب مخصوص محفور عليه كلمة ((فرحة حسام)) وكعد ابو المشغل يعرضلي الدزاين على الكمبيوتر واني ظفت عليهم بعض التعديلات وهو كان جدا متعاون وياي
وخلصت وطلعت وبقيت بس انتظر الاستلام بس عودك شنو انهلكت من المشاوير لان شغل المعرض مو بنفس مكان شغل المجوهرات
واني بالطريق اتصل علية علي اخوي
وصدمني بخبر خطوبة فرح من ايهاب
بلحظتها اجيت انجلط من الصدمة
حسام-علي شجاي تحجي انت متأكد
علي -اي متأكد گلت خل انطيك خبر لان شكلك ماتدري
بالخطوبة واني ادري بيك بعدك نفسك بيها
فيا خوي ترة راح يسوون الخطوبة والمهر بنفس اليوم والموعد على باجر يجون يخطبون
اني ما ادري شصار بية لكن اتمنيت بلحظتها فرح گدامي جان لزمتها رگبتها وخنكتها على هاي الشوطة
الي اكلتها بس بالقران اذا ما احرك عشيرتها واسود عيشتها فلا اني حسام بس خل تصبرلي
يوم ثاني طلعت من مطار بغداد الدولي
وبوجهي اجرت تكسي گبل على بيت جدي
وكان وقت العصر يعني مابقى شي احتمال هسة يمكن وصلو الخطابة على بيت جدي بس كون الحك اتمنى من الله جايين والله العظيم يافرح اذا ما اخليج تتمنين الموت وماتحصليه بسيطة لج اني تلعبين علية وتوهميني بالموافقة وتستغلين غيابي وتنفذين الي ببالج وتكملين خطوبتج جا بسيطة
اتصل علية علي اخوي
-هَـا حسام وين صرت ترة وصلو وجاي يحجون
-جاي جاي هذا انة وصلت يم باب البيت

وصلت وشفت سيارات هواي يم بيت جدي شي اكيد هذولي اهل العريس
نزلت من السيارة وصدفت وية نزلتي طبگت سيارتين غريبات بالاول عبالي تعود لاقارب ايهاب لكن اتفاجئت
نزلو من السيارة وبيدهم رشاشات
وشفت علي منتظرني بالباب لكن اتفاجيء من هذولي
رحت بأتجاهم اريد افتهم شنو سالفتهم شعندهم هنا
بس فاجئني صياح علي اخوي
علي -حسااااام ارجع ارجع لتروح يمهم
هذولي هادين علينا اوكف ولك اوكف

اني مالحكت افهم شي غير هذلي كامو يرمون على بيتنا واني اتخبلت شجاي يصير رحت عليهم اركض
-شكو شكو ليش هادين علينا
والله ماحسيت الا واني وكعت بالگاع واحد ضربني على راسي بكعب السلاح وبعدها ما دريت شصار
غير شفتهم شايليني ومدخليني للبيت
وشفت اهل ايهاب طلعو بالباب يردون يفتهمون شنو السالفة
بعدين اتضح الموضوع هذولي الديانة جايين علمود يطالبون بدينهم من عمي نبيل والتهينا وياهم
واتصلنا عالشرطة وصارت لخة
ورة ساعتين دخلوني علي وعلاء مسنديني للبيت وراسي ورگبتي كلها دم من ورة الضربة
دخلت وشفت فرح عيونها حمر وشفايفهة ترجف وجانت بيبي كاعدة يمه وامي بالجهة الثانية
وصارت عيوني بعيونها وانطيتها نظرة احتقار وحقد تركتها ودخلت بغرفة جدي اتمددت على السرير

فرح
بعد ما اغمي علية اتبهت على بيبي تمسح على وجهي
ووعيت على رشا تحجي لبيبي شنو الصار
وان حسام انضرب براسة واني گلبي گرصني عليه
جنت كلش خايفة عليه
وعرفت بعدين ان هذا الرمي كان علمود سالفة عمي نبيل
وبعدها جدي وعمامي التهو وية الديانة واتصلو عالشرطة وبعدين جدي اعتذر من ايهاب واهلة
عن تكملة مراسيم الخطوبة والمهر وكللهم ان يأجلون الموضوع وكان جدا متفشل ومستحي منهم لكن اهل ايهاب اتفهمو الوضع وانسحبو همة واهلهم ((طبعا هذا الموقف حقيقي من ارض الواقع ))
المهم رحت شفت شهد دخلت لغرفة جدي وبيدهة صندوق عدة الاسعافات
واني گلبي گام يلوب اريد اشوف حسام شصار عليه
بس العجيب بالامر نظرتة خلتني اعيد حساباتي مرة ثانية شنو كان يقصد بهاي النظرة. الي كانت كلها احتقار وحقد الي يشوفة وكأن اني الي خنتة مو هو
بس رغم هذا ظليت احوم اريد اشوفة
بعدين
شفتهم خفت الرجل عن غرفة جدي وانتبهت بس علي بقة عند حسام
والله بعد ما بقى بية صبر اريد اشوفة
زين اني ليش ينتابني شعور بعدم الراحة وان السيويتة غلط وكان هذا الاحساس تأتيب ضميري
بس ياناس هو الخاني هو الطعني بعد شكو ليش اخاف خل ادخل واوجهة بسوايتة وياي حتى بعدها ضميري برتاح من التأنيب
رحت دخلت عليه كان علي گاعد بصف حسام عالسرير.
وشفت راسهة شادينة ولافينة بقطن وشاش
حسام انتبه علية من دخلت
-علي رحمة على والديك طلعها برة من گدامي ما اريد اشوفها لا بالقران ارتكب بيها جريمة
فرح
بارتباك بعد ما دخلت وكانت واثقة ان هي صاحبة الحق
لكن كلام حسام قلب عليها الطاولة واصبحت تبادل بالادوار اصبح حسام صاحب الحق
فرح-يعني حضرتك فوك حگة دگة يعني فوك ما انت الخنت وفوك ما انت الكسرت جايني بكل وقاحة تهجوم علية بلسانك
لاحسام ترة مو كل مرة تسلم الجرة انت كسرتني وخنت ثقتي بيك للمرة الثانية
حسام وهو يرفع حاجب
-اي بالله نورينا وفهمينا شنو الي استجد بالسالفة وخلاج تستغلين فترة غيابي وترحين تدزين على ايهاب حتى يخطبج من وراي خو ليش ما تگولين انتي الي خنتي ثقتي بيج
جر نفس بغضب وكمل
اكول طلعي برة منا احسن ما اكفر بيج هسة
-لا ما اطلع حسام وكلامك كلة خطاء راجع ذاكرتك شوف نفسك ويامن سافرت لدبي
حسام وهو يعقد حواجبة بتسائل
- انتي شنو جاي تخربطين كملي كلامج واحجي عدل
فرح-اني اتصلت عليك وجاوبتني بنية من نقالك وكالت اني زوجة حسام وظلت تحجي علية وهددتني بعد ما اتصل عليك وبعدها رسلتلي صوركم هاك شوف
وانطت النقال لعلي حتى حسام يشوف
حسام بتسائل اي وشنو يعني
ليش انتي ما دريتي ان نقالي انسرق
-ومنو يكول نقالك انسرق شنو يخليني اصدك كلامك
حسام وحس روحه زهكت وتعب من المحاولة وياهة
-شوفي يبنت الناس اني انطيها الج من الاخير
ترة اني ابو نسوان وكل يوم وية وحدة ومو راحة وعندي سوالف مكسرة كلش هواي ولاعب لعب بحياتي
هسة ارتاحيتي هذا انة وهاي حياتي
بعد ما راح اكعد ابررلج كل يوم موقفي وتعال يحسام برر لست فرح ام راس اليابس واكعد اشرحلها وفهمها ترة والله مليت طلعت روحي منج
بس تدرين شنو
انتي اصلا عمرج ما حبيتي حسام انتي اصلا بايعة
وانة المشتري بس لهنا وخلاص
ما اريدج بس مو تفرحين ما اريدج
بس لاتفرحين مااخليج تاخذين واحد ثاني
اخليج هيج تبقين عند بيت جدي لحد ما تعفنين وتعنسين ويالله هسة طلعي برة ما اريد اشوفج
فرح كان كلام حسام مثل الصدمة الي سحب البساط من تحتي بحيث سرق كل الكلام مني وما عرفت شلون اجاوبة واحجي وياه يعني شنو ما افتهمت شجاي يصير
انتبهت على علي اجة وراي
علي -فرح ممكن تجين وياي للمطبخ اريد احجي وياج
رحت ورة علي واني مثل المبنج امشي وراه
كعدت على الميز وهو كعد مقابيلي
علي-شوفي فرح احنا من ذاك اليوم كان لازم انفهمج الموضوع وتكونين على بينة
ترة حسام بيوم عرسج والموقف الي صار وياه كان كلة كمين منصوب حتى يوگعون حسام
وهسة هذا الصار وياج انتي و حسام كان نفس الشخص الي راد يوكعكم ولاتنسين ترة حسام اختفى نقالة من وصل لدبي واني هسة عرفت منو ورة سالفة اختفاء نقال حسام بس بسيطة هذولي حسابهم يمي
لكن انتي مايصير كل موقف والثاني تتمزعلين وتتهمين حسام بدون ما تسمعين كلامة بالاول
و تحكمين عليه
وخلي ببالج ترة اني اول مرة اشوف حسام متمسك بوحدة ويقاتل علمودها لهدرجة
ترة هو مطول خلك وياج كلش هواي لان يحبج والله لو ما يحبج كان من زمان
عافج وانهزم من السانج بس خطية هذا الله بلاه بوحدة مخبلة تبجيه على زمانه
حتى يتوب لله وبعد يحرم يعلب بذيلة
فرح اسمع كلام علي ابجي وابتسم
ابجي على الخطاء الفادح الي ارتكبتة بتجاه حسام وابتسم على معرفتي ان حسام شكد يحبني ومتمسك بية
بس يا ترى هل حسام بعدة يحبني بعد كل هاي سوالفي وياه والله ما اتوقع راح يظل باقي على حبة الي
ومرت الايام واني نهيت موضوع خطوبتي مع ايهاب باتصال مني كان
ان اعتذرت منة على كل الي صار وان اني احب ابن عمي واريدة
وهو اتقبل الموضوع بروح رياضية لاتخلو من التأنيب

وبعدها قررت اسعي وابذل كل مجهودي حتى حسام يرجعلي لكن مع الاسف هو ابد ما انطاني اي فرصة
حتى احجي وياه واذا يجي للبيت علمود جدي اني بسرعة اروح لعندهم اريد بس اشوفة بلكي احجي وياه
لكن مع الاسف اشوفة يتجنبني وينهي كلامة مع جدي ويطلع ابد ما ينظر باتجاهي وظليت احاول وياه
اتصل عليه بعد ما اخذت رقمه الجديد من علي
لكن ابد ميجاوب على اتصالاتي ولا على مسجاتي
صرت اروح لعندهم بالبيت حتى بلكي اشوفة
بس مرة انتبهت عليه كان جالس وية اهلة وبحضنه ابنة فهودي وجان يلعبه ويضحك وياه لكن من انتبه على دخولي عليهم شفت معالم وجهة اتغيرت من الابتسامة الي عقدة الحاجبين بضجر
اني بوقتها افتهمت الرسالة ان حسام ما عاد يحبني مثل الاول
ومن عندها بعد اتوقفت محاولاتي وانطويت على نفسي وصرت اختلط بس مع خواتي وبيبي ومالي شغل باحد وكمت اساعد سلوى بتجهيز العرس. والتحضيرات

وكنت دائما على اتصال مع صديقتي رنا
واطلعها على كلشي يصير وياي
لكن استغربت صارلي يومين
اتصل على رنا ماكو ظل بالي عندها هي خطية لوحدها بالناصريا واهلها كلهم مسافرين وظالة بس هي وزوجها
وزوجها ضابط وكان يداوم يومين ببغداد ويومين يمهم هي وابنها
وخفت عليها لان تبقى تبات لوحدها بالبيت
رجعت اتصل. وماكو والله خفت عليها ادري شنو السالفة
شصار عليها گلبي ظل يلوب وين صارت
انتبهت على بيبي تحجي وية عمة رسمية على سالفة عمي نبيل
الجدة-ما ادري هاي وين جانتلي يمة ابني صار مطلوب للحكومة
يمة صخام الصخمني على عملتة السودة والله ينبيل كضيت عمرك شالع گلبي وگلب ابوك
رسمية-حل يستاهل خلي ياخذ جزاه من الحكومة
هسة شنو لزموه لو بعدهم
الجدة-لا يمة شارد ومانعرف وين اراضيه وابوج انطة بيه تبرئة
شدعوة عليه اتنازل بدم ابنة خلي يدفع فلوس الديانة ويخلصة منهم بس مو توصل بي يتبرة من ابنة
رسمية-اهووو انتي ظلي هيج هو شخرب نبيل غير هاي سوالفج والتستر على افعالة بس خلي ببالج ترة ابوي مايسوي هيج شي لو ما الله اليعلم شنو عرف عن نبيل وخلاه يتنازل عنه

يتبع