رواية قلوب على جرف الهاوية الفصل الثاني والعشرون 22 - بقلم الكاتبة نهى

قلوب على جرف الهاوية
للكاتبة nuha-d-h

فرح
اليوم المهر مالتي واني كلت لإيهاب ان يسويه بسيط وهدوء ما اريد هوسة
و طلبت من جدي ان ينطي خبر بس لعمو توفيق وعمو جواد ما اريد اولاد عمي يحضرون الخطوبة طبعاً جدي افتهمني
صرت اجهز نفسي للخطوبة وشفت رشا وشهد اجن وياي يساعدني رغم عيونهن مفضوحة بس مايكدرن يحجون وياي
اتذكرت الايام الي تلت موقفي مع حسام بيوم اخذني للشقة اتذكر بوقتها
من ردت اطلع بيومها وكنت واكفة يم باب الشقة
احس وجهي كلة احمر من الضرب وكان وضعي كلة يوحي بالانكسار
حسيت بحسام اتقدم علية بخطوات ثقيلة
اقترب مني
-يفرحة حسام وين رايحة
شوفي قبل لا اتطلعين وهاي اخر مرة احجيها وياج واريدج تجاوبيني وبصراحة على سؤالي
احلفج بالله واريدج تحجين الصدك
-انتي تحبينة لحسام ؟؟
فرح وهي تتململ من بين اديه وتريد تتهرب من الاجابة
حسام لاتنسين حلفتج بالله حاوليني واعدج بعد ما اتعرضلج
فرح بضعف ودموعها نزلت بنكسار وحجتها بغضب
-اي احبك واتنفس هواك واعشقك لحد الالم. اي الالم لدرجة الخوف يالله هسة ارتاحيت من شفتني مكسورة

حسام وهو يلمها بحضنة
-اخ الله ولج شتحجين يا انكسار يا تفليش
ولج انتي بكلامج هذا وقعتي على ملكيتي الج
فرح-حسام والله خايفة منك خاف ترجع تكسرني من جديد
حسام-ولج على شنو تخافين اذا هو حسام بكبرة صار ملكج شتحجين وتكولين خايفة لعد انة شكول
من اشوفج تردين ترحين گبال عيني لغيري بالله شيكون شعورج لوكنتي بمكاني ولج المفروض اني الي اخاف
لا ترحين من بين ادية
بوقتها ما كدرت حسيت بالضعف واتهدمت جدران گلبي وما بقى اي حاجز بيني وبين حسام
شمرت نفسي بحضنة وهو لمني بثنين اديه لصدرهة الله
احلى شعور كان عبالك جنت ضايعة ولكيت البيت وكان فعلا حضن حسام هو بيتي

وقررت افتح صفحة جديدة بيني وبين حسام وطلبت منة
فرح -حسام عفية انطيني وقت حتى احجي وية جدي ينطي خبر لايهاب ان ماكو خطوبة ومن يخلص موضوع الخطوبة
انت افتح الموضوع مع جدي
حسام-خلاص هذا هو الج التردينة اني عندي سفرة لدبي من ارجع گبل نتزوج فاهمة
فرح بخجل امممم
حسام وبلهفة -شنو ماسمعتج علي صوتج
فرح -اي
وصلني بوقتها حسام للبيت
ونزلنا سوة ببيت جدي ودخلنا بالاستقبال وصار بوجهنا
نبيل وهو شايط من الغضب وكان يصيح باوع علينا اني وحسام وكنا متلازمين ايد بأيد
شافنا وخزرنا وطلع ركب سيارتة وراح
حسام -باستفسار هذا شبي اشو بس يصيح شكو
توفيق -بعد شبي متداين من الناس ولاعب عليهم والفلوس كلش هواي وما يعرف يتصرف اجة لابوي هسة يكلة اشتري ابنك ليش انة مو ابنك اشتري سلامت ابنك وبيع واحد من المحلات مالت الذهب وانطيني خليني اوفي ديوني وانتو ما محتاجين المحل خلوه الي
حسام-يعني بكل گوات عين جاي يطالب هذا شنو من بشر والله تعبان صدك يحجي ومتداين فلوس من الناس بمئات الملايين بالله هذا شلون راح يدبر امرة
الجد-اني كتبت بي تبرئة
بس مو علمود الفلوس الي ماخذهن من الناس تبريت منة لا
الشغلة اكبر من هيج
والله لو على الفلوس جان سهلة السالفة وتنحل
اخ يارب سترك شحجي والله السالفة ماتنحجي
صارت اكبر من الفلوس
حسام-ليش شبيه شمسوي هلمرة من مصيبة
الجد - خليني ساكت احسن والله
خل الضيم الي بگلبي مستور يمكن لو اطلع عليه الطفل يشيب من القهر
مرت الايام وسافر حسام لدبي
بعد يومين من سفره
حسام ما اتصل علية بهاي الفترة واتذكر قبل لايسافر كلي نتواصل عن طريق الوات ساب
لكن بهاي اليومين هو ما اتصل
وظل بالي عليه وكعدت اتصل على نقاله بس ماكو ما رد لكن بالليل اتصلت عليه وحصلتة لكن
جاوبني صوت بنية
يمة هاي منو
فرح-الو انتي منو
-حٍٍِْــًبٌٍـــِٓېٍٓ انتي المتصلة على جوال رجلي مو اني
هنا اجيت اتخبل ظليت بس ارجف
فرح وهي ترجف-منو انتي ومنو تقصدين برجلج
-شوفي حبابة رجلي حسام اكدر اعرف انتي منو وشتسوين متصلة على زوجي
فرح -انطيني اريد احجي وية حسام
-لا والله خاف ماترضين انطيج زوجي تحجين وياه شنو اتخبلتي شوفي ولج اذا مرة لاخ اتصلتي على رقم زوجي صدكي امحيج فاهمة
فرح-انتي جذابة جذابة حسام مو زوجج هو كلي مامتزوج
-هههههههه والله خطية انتي عادي اتعودت كل مرة هيج يضحك على البنات ترة هاي انتي مو اول وحدة تتصل على حسام وتفاجئني بس اتعودت عليه وعلى دگاته وياي بس هو يروح يروح ويرجعلي

وگع النقال من ايدي هاي شنو ليش شجاي يصير وياي يعني معقولة
هاي ليش هيج جاي يسوي بية يعني ماكفاه الي صار من وراه وجاي هسة يكمل على الباقي من فرح

لكن من وصلتني الصورلحسام وهو وياه نفس البنية الي كان متزوجها او بالاحرى احتمال بعدة زوجها والصور وكلهن كانو بدبي يعني شنو مسفرها وياه
فرح وطلعت اني المغفلة بالموضوع كلة

لاااااااااااا كاااااااااافي كااااااافي والله مليت ليش الدهر ديعاند وياي ليش يارب
رحت على ميز المراية كسرت كلشي صار گدامي
دخلت علية سرور وشافت حالتي وركضت علية ولزمتني
حتى تهدئني
سرور-شنو شبيج فرح شكو شصاير
فرح -سرور عفيا ابوس ايدج طلعي برة وتركيني لوحدي
سرور-مااگدر اعوفج وانتي هذا حالج اي غير تحجين شننو صاير وياج حتى افتهم
-فرح ماكو شي ماصاير شي بس طلعي منا فدوة اروحلج
وظليت ابجي بنهيار
سرور-يالله يالله راح اطلع بس لا تتعصبين بس خلي ببالج لكلشي الة حل لاتقهرين نفسج
وطلعت وتركتني
مسحت دموعي وكمت
خلاص لهنا وانتهى الموضوع ماعاد بية صبر ولاراح اگدر اتحمل الم
اني احجي واحس نار تكوي بصدري
وكانت ردت فعلي لضربة حسام الي بوقتها اتخذت قرار ونفذتة بساعتها
فرح- الو هلو ايهاب شلونك
اني زينة
اتصلت عليك حتى تستعجل بالخطوبة وخل نسويها هي خطوبة وهي مهر احسن وياحبذا لو كانت بسيطة بدون هوسة
طبعا خلال هاي الايام محد يدري بقراري اني وحسام بان احنا راح نرجع لبعضنا
واحمد الله الف مرة ما استعجلنا وماحجينا لاحد عن خبر رجوعنا
وما راح اخلي اي واحد يعرف
هذا هو انطيت اكثر من طاقتي
وصرت بهاي الفترة بحرب اعصاب مع نفسي
والكل يباوع على حالي بس محد يدري بضيمي بس اني
وصرت احضر لمهري مع ايهاب واتحرك مثل الرجل الالي
كمت ما اكل ولا انام صرت مثل الشبح
سلوى ونواف رجعو لبعض وكانت جاي تجهز لعرسها
فقررت ان ابلع ضيمي واسكت وما احجي لأحد خاف همين ااثر على اختي المكرودة كلما تريد تفرح اني اكوم اعرس عليها واجبلها الضيم

وكمت اشتريلي ملابس واحذية وجنط احضر لجهازي بس بدون فرحة
كانت ام ايهاب كلش حبابة كون ربي يقدرني واسعد ابنها
بس خطية ايهاب راح يرتبط مع بقايا حطام انثى
والله رجعنا اني وسلوى من السوگ. محملات بالغراض
وصادف شفت سيارة ستوها طبگت بباب بيت جدي
انتبهت على الراكب شفتة علاء
والله نزل وگعد يساعدنا بتنزيل. الغراض من سيارة التكسي
والله ودخلنا كلنا جوة للمطبخ شفت سرور كاعدة على ميز الطعام وتبجي
وگعن الغراض مني وركضت عليها وگعدت التفت منا ومنا اريد اشوف منو بالبيت خفت عليها لاصاير بيها شي
فرح -شبيج سرور وگعتي گلبي
سرور-عمي نبيل اليوم اجة هو ومحمد وخطبني لابنة محمد وگال لجدي ابن عمها اولى بيه من الغريب
هنا سمعنا صوت العلاليك مالت الغراض وگن بالگاع التفتت شفت علاء جامد بمكانه ووجهة اصفر
كمزت على صوت اصياح بالاستقبال
درت وجهي لسرور باستفسار منو موجود عدنا
سرور-همة نفسهم عمي نبيل ومحمد بعدهم هنا موجودين
ما حسيت الا على علاء ركض للاستقبال وعرفت نيتة شنو
بوقتها عرفت قيمة سرور بگلب علاء
خلاص سرور تستاهل واحد مثل علاء
وسمعنا صار مصايح ومدافع بس اني وخواتي ابد ما اقتربنا منهم وراهة سمعنا صوت عمي توفيق
-بوية سلوى سويلنا جاي لان راسي راح ينفجر من ورة مشاكل نبيل الما تنتهي
بعدين افتهمت ان علاء متعارك ويم محمد ومتزانگين مع بعض لدرجة ان متعارك وية عمة وابن عمة ومتضاربين وطلع علاء من المعركة مشكوك الرأس ازرق العينين مسكينة ياسرور شكلج راح تتزوجين علاء بالتفصيخ او بالاقساط
على العموم يالله على كولت اخوانا المصريين (( اهو ظل راجل ولا ظل حيطة نحمدوه ونشكروه على كل حال ))

رجعت فرح من رحلة الذكريات على صوت ام ايهاب بيوم شافتها شلون طالعة حلوة بالفستان والميك اب
ام ايهاب -مشاء الله فروحة طالعة كلش حلوة
فرح بجمود -اشكرج خالة
سلوىوهي تقترب على فرح
-ضحكي شبيج جنج ميتلج واحد اي مو هذا الي ردتيه خلاص بعد شتردين گالبة الخلقة عيب ترة منا الناس تباوع عليج
فرح
الكل كان ملتم ومحضر نفسه لمهري وجانو الزلم بالاستقبال يم جدي وعمي توفيق وجواد
شفت ام حسام وبيبي
كاعدات يمي ويسولفن
الجدة-شنو يمة حسام شلونة اشو من سافر لليوم ماسمعت عنة خبر
ام حسام- يا خالة جا ما دريتي نقال حسام انسرق منة وهو ببدبي يكول جان كاعد ياكل بالمطعم وضاع منة يكول دورت عليه ردت ماكو
وخطية اضطر يشتريلة نقال جديد وكال ارقامكم كلها ما اعرفها بس رقم علي اخوه حافظة لان سهل واتصل على علي وخطية وطمنا عليه
فرح بفزعة وخوف
التفتت على ام حسام
-خالة صارلة شكد من ضاع نقالة
ام حسام-والله من اول يوم دخل بي لدبي
فرح ما اعرف شصار بية احس افتر راسي ومعدتي انعقدت حسيت راح اتقيء
عبالك صاعدة بدولاب شنو شجاي يصير ماجاي افتهم
اذا كانالنقال مسروق لعد شلون اني حجيت وية زوجتة
طبعا هي وحدة من الثنين اما حسام كان يكذب ونقاله مامسروق او ضايع مثل ما يدعي
او فعلا نقاله انسرق منة وهذا طعم
بس الخيار الاول هو الارجح ان حسام كذاب
كنا گاعدين ودخل عمو توفيق علية وگلي عمو حضري نفسج حتى ادخلج للاستقبال علمود تعقدون
اني بوقتها گلبي كام يرعد وحسيت اكو شي غلط جاي يصير
گمت احضر بنفسي واجت علية سلوى تساعدني حتى تلبسني البرنص علمود ادخل عليهم
لكن بهاي الاثناء
سمعت صوت صياح بالشارع مال زلم وصار رمي كلش قوي وصار المراكض شفت علاء طلع من باب الاستقبال على غرفة جدي وبعدين طلع شايل سلاح بيدة
يمة عزة اصخام شنو شجاي يصير

بس وصلت لاذني صياح علي
علي -حسااااام ارجع ارجع لتروح يمهم
هذولي هادين علينا اوكف
وصار الرمي وماحسيت على روحي الا واني اغمى علية

يتبع