رواية قلوب على جرف الهاوية الفصل الثامن عشر 18 - بقلم الكاتبة نهى

قلوب على جرف الهاوية
للكاتبةnuha-d-h

فرح
من يوم الي تواجهت اني وحسام واني احس روحي بيها لوعة يعني وكأن المواجهة مع حسام كانت شبيهة بحالة الواحد الي كان مريض ويمر بفترة نقاهة بعدهة يرجع ينتكس اخ الله اني
هاي الفترة كلها جنت فقط العق بجروحي حتى تشفى وتبرة
يعني حظي يجي بالوقت الي كنت اتشافة منة ولو هو شوكت طلع من گلبي اللعين حتى اني اگول اتشافة حب حسام بصدري ربالي علة والف حسرة هسة لو هو الحب يستأصل كان اجريت العملية واستأصلة من گلبي ومن حياتي كلها لكن مع الاسف هذا داء ليس له دواء
اشكد اكون قوية لكن من داخلي اتفرگع عليه موبيدي والله موبيدي
يعني من جنت اسمع سوالف البنات عن الحب واشوف فرحة الحب بعيونهن اشو من اجيت احب ما لحكت اضوك طعم الفرح
شنو حظي حتى بهاي الله گلبة ثاري طلع بالحب متعوس و متلوع
اتذكر من اجة علية بالكلية وشفتة شلون كان متغير ومربيلة لحية عودك هو من اثر الحزن هامل نفسه وطالعة لحيتة
لعد اني اشو اشوفة بعيوني هاي زادتة وسامة فوك ماهو بعيوني وسيم
فرح
والله مرات ينكسر خاطري على گلبي اكول خطية ابتلة وماعرف يختار الحبيب هي قسمة وهم هذا نصيب
گلبي غلطان صح بس ماعندة اي ذنب
جان اكبر ذنوبه حب اليخون
گلبي الغبي صار عندة عناد وية روحي
ظل گاعد وباقي على حب الحبيب
جا ادري عفية گلب هيج تتحمل شلة الحال

اتذكرت بيوم ختمت كلامي وياه بالبيت مالتة
وكتلة مالك مكان بگلبي وهي فرصة وانت خسرتها

بوقته شفت بعيون حسام شي ابد ماشايفتة لاول مرة من تعرفت على حسام ماشفت بعيونة هاي النظرة

حسام-الله هاي كلها شايلتها بگلبج علية وتكولين جنت احبك
ههههه لافرح راجعي نفسج اليحب مايكره وهذا الي جاي اشوفة بعيونج هذا حقد وكره بتجاهي
بس صدگيني راح يجي اليوم الي راح تتندمين عن هذا صدج الي
فرح وهي تحط عينها بعين حسام

حسام-شوفي فرح راح يجي اليوم الي راح تعرفين بي اني بريء صحيح ما انكر اني كان عندي ماضي وبنات
لكن انتي ما تحقيني من هذا الجانب لان هذا كان قبل لا انتي تدخلين بحياتي لكن من دخلتي بحياتي
قررت ان ابدي وياج من جديد
قررت ان اغير من نفسي
اما تجين تحاسبيني على افعالي قبل زواجي بيج فهذا مو وارد واي شاب يكون عندة ماضي وما راح ينكر لان ابقى رجل وعندي احتياجاتي ولازم اشبعها وما اظن كنت ااثر على احد يعني لاعندي عائلة ولامرتبط بس مايوم حيبت وحدة من هذني الي اتزوجتهن اواتمنيت تكون ام بيتي وتشاركني حياتي
بس انتي بيوم الي دخلتي غيرتي حالي شكد جنت اعاند الروح والنفس واكول انة غلطان
لان ما جنت امن بسوالف الحب اعتبرها تفاهات واصلا ما اعرف شنو الحب وهم ماعرفتة بيوم دك باب گلبي ودخل واتربع بنصة واني اخر من يعلم بحال گلبي
بس تصرفاتي كانت بردت الفعل الي تثبت ان اكو حب دخل بگلبي بدون علمي صرت احب اشوف ضحكتج
واغار اذا كانت ضحكتج لغيري
صرت كل يوم احسب كم لحظة بقت حتى تصيرين ام بيتي جنت من اشوفج تعتنين بغيري اكوم اتگلب من الغيرة صرت اذا تفرحين افرح
كنت انوجع من اشوف عمي نبيل يضربج واتذكر بيوم الي راد يحركج احس گلبي احترگ وسبقني واتصدة لعمي ورده لعند حدة
گعدت اعاند الگلب واكلة لايا گلب ترة هذا مو حب هذا
عطف على حال فرح لكن الگلب ظل مصر ولا اهتم لاوامر عقلي الة وظل يتصرف من وحدة لحد اليوم الي سمعت بي عامر طلبج من جدي اني بوكتها رحت للگلب واعلنت استسلامي وگلت ياگلب طلعت انت الصحيح وانة الغلط ثاري الحب مثل الحرامي اليدخل على غفلة لصاحب البيت ويسرق بكل هدوء بدون علم احد
تصدگين هذا حالي وية حبج

هيجي صار بية حبج هو الحرامي واني صاحب البيت
تعرفين اول يوم الي شفتج بي وانتي مثل المهرة
هايجة ومحد يگدر يردعها
كان گلبي يتمنى يكون خيالج
فتح قميصة وسحبة عجهة اليسرة تتذكرين هذا
الجرح تتذكرين بيوم الي هجمتي على صدري و شلون كان اول لقاء بينا ومن التقت عيونا مع بعض
كان من عهدها گلبي سلم بدون امري ولا اخذ اذني
ترة صدگي وامني بالله اذا اكو واحد يشرد ويهاب الحب
والارتباط بقيود الحب فهو انة
لان احس بقيود الحب تتحكم بية وبمشاعري واخاف بيوم انذل
لكن احلفلج براس ابني لايوم خنتج ولاكنت افكر ان اخذلج واتركج بذاك اليوم لوحدج
كان كلة خطة محبكة من شخص ما اعرف شنو غايتة يفرقنا ويحطم زواجنا ولابد ويجي اليوم الي الزمة واخلي يعترف واجيبة لحد عندج
انة اسف فرح عن الالم الي سببتة الج وخليتج تعانين من وراي كان المفروض مني كان لازم
احجيلج عن الماضي واخليج على علم بأخطائي وجلة من لا يخطىء
بس شاءت الاقدار ان تخليني بهيج موقف ضعيف

فرح
اني كنت اسمع كلامة واشوف بعينة مشاعرصادقة لواريد اوصفها بكلام يمكن كلام الدنيا كلها ما تنصفها

لكن مع الاسف اني فرح المجروحة وبعدة جرحها ما برة ولاطاب
فرح -اسفة حسام ما اكدر انطيك فرصة ثانية لان روحي ماعاد تتحمل بعد الم طعنة الگلب مرة ثانية واخاف بعدها اخسر حياتي وما اگدر بعد اعيش
اعتذر اني راح ابقى مصرة على طلب الطلاق منك
وارجوك لو صدك ومثل ماتگول ان انت تحبي فارجوك طلگني اريد ارتاح واتحرر منك
حسام
بعد كل الكلام الي حجيتة مع فرح وكان هاي اول مرة بحياتي افتح گلبي لوحدة واعبرلها عن المشاعر الي بگلبي وقدمتلها گلبي وخليتة بين اديهة
تاليهة كانت ردة فعلها ان داست على گلبي ومشت

بوقتها صار الي كنت خايف من والي جان مخوفني من الحب هو الضعف الي يسحب وراه الذل
وهي بيدهة ذلت حٍٍِْــًبٌٍـــِٓېٍٓ الهة
حسام -هذا هو فرح خلاص لهنا وكافي
الا عزة نفسي ماتسمحلي بعد انزل من روحي وكرامتي لشخص بايع مو شاري
وكأن كنتي منتظرة مني شوكت اوگع وتگعدين تجردين اخطائي اسف يبنت العم النفس تراهة محشومة وعزيزة

وهذا هو التردينة يجرالج
تردين الطلاق خلاص صار راح اطلكج
واحققلج امنيتج حتى بعدها تعيشين بسعادة

وراح يجي اليوم الي اجيب الوگعني واخلي يعترف امامج بس بوقتها راح تكونين خسرتي حسام

فرح
من اطلگت من حسام ابد ما حسيت بالشعور الي المفروض الوحدة تشعر بيه من تتطلك المفرض تشعر بالحرية والتحرر من قيود الزوج اشو اني ما حسيت هيج
اشو صرت احس بألم طعنات بالگلب تنزف وماكو شي يضمدها
شفتة شلون وصلني لباب بيت جدي ولا حجة حرف ابد
حسيت بي مثل الي انسلبت منة الروح
لكن هيهات اخلي گلبي يحن عليه مستحيل ماعاد له بالگلب مكان احسن لو اعرف ادوس على گلبي ولا ارضخ واضعف امامه مستحيل اتنازل
وبقيت راسي مرفوع لحد ما دخلت البيت وسلمت على بيبي بكل برود وبعدها استأذنت وطلعت من الغرفة وصعدت فوگ لغرفتي ودخلت وفقلت الباب
وهنااااااك مع قفلة الباب ظهرت فرح الضعيفة الي كانت خاتلة ورة قوة فرح القوية
ااتكأت على الباب وانزلت للارض وطاحت كتبي من ايدي وحسيت بدفو غزة خدودي اتلمستة شفتها دموع حيرانة دمعة فراق حبيبة لحبيبها
لكن لازم اسوي هيج ما اخلي بعد واحد يستغلني هيهات
مرت الايام ورجعت اداوم بعد ما غبت بعد موقف حسام الي سواه بالكلية بعد ثلاث ايام وكنت كلش مستحية لكن
رجعت للدوام وبكل قوة ما اريد اتردد على شنو هذا الموقف لاشي بالنسبة للمواقف الي اسمعها كل يوم
التصير وية البنات
يالله لا اني اول وحدة هيج يصير بيها ولا اني اخر وحدة
لكن الحلو بالموضوع الگروب مالتي كان جدا عادي من رجعت وبعد قدمت اعتذاري لايهاب عيب خطية الولد وگف وياي وكان صاحب نخوة
وحسيت على ايهاب بدة يوم عن يوم يتقرب مني
ومن خلال كلامة وياي انتبهت له يلمح عن اعجابة بية
وصادف يوم من الايام عطلت سيارة الخط وظليت اتصل على علاء جهازة مغلق وبيقت محتارة شفت البنات الي اجرت تكسي وراحت والي راحت وية قرايبه هنا بالكلية المهم صفيت بس اني
ليش ما بالصدفة مر من يمي ايهاب وسئلني
-هاي شنو بعدج لحد هسة ما راجعة للبيت
- اي والله لحد هسة اتصل علبيت حتى واحد من اهلي يجي علية ياخذني لان هذا سيارة الخط عطلانة
-صدك جذب تحجين على بختج اني هنا موجود وانتي دايخة وظالة لحد هسة تنتظرين دتعاي اوصلج وياي بطريقي
فرح بتردد لان مهما كان هو شاب وهي بنية بصفتها شنو تركب وياه
-هَـا لا ما اريد اكلفك خاف اسوي عليك زحمة هسة ارجع اتصل على اهلي بلكي يجون
ايهاب دك الجرس عندة بان هي تخاف على سمعتها
-لا يابة اختي وياي لاتخافين ادري بيج متخوفة

وبهاي الاثناء دك نقال فرح
-الو هَـا علاء وينك جنت اتصل عليك ماكو يطلعلي مغلق
عفية علاء تعال اخذني ترة ابو الخط سيارتة عاطلة
هَـا خوش لعد انتظرك
التفتت على ايهاب
-هذا هو انحلت السالفة راح يجون علية اهلي
ايهاب لعد خوش انتظرج لحد مايجون اهلج عليج
وكالعادة كعد ايهاب يسولف وينكت واني بس ابتسم لان ما متعودة اسولف واحجي وية غريب وكان اتصالي بأيهاب كلة وية الگروب
والله شوية وسمعت صوت هورن سيارة وكفت قريب علية ونزل منها واحد التفتت اتفاجئت هذا حسام شيسوي هنا شعندة جاي هنا
حسام وهو يحجي بكل برود وية فرح بس اكو نار تكوي بگلبه على هذا الطرن الواكف وياهة وكاعدين يتمضحكون لوحدهم اخ الله انة ابو ابوي مشتعل وهي ولا يمهة
-اتصل علاء وكان يريد يجي عليج بالكلية وكنت قريب عليج فكتلة ارجع اني امر عليها واخذها
حسام وهو يأشر بيدة علسيارة حتى تركب

فرح گلبي صار طبلة من شفت حسام جاي ياخذني
وشفت البرود بعيونة وسمعتة بصوتة
واني گمت بالعناد التفتت لإيهاب وابتسمتلة
-اشكرك ايهاب اخرتك وياي واشكر عرضك الكريم على توصيلي
-لايابة شسالفة والله ترة احنا بالخدمة
حسام اشوفهم يسولفون ولابسين المطي الواكف يمهم
اني كبل رحت ركبت بالسيارة وشغلتها ودكيت هورن
عالي خلاهم يكمزون من مكانهم
ركبت فرح بسرعة
وعيونها كلها نار وشرار
عفتها كاعدة يمي وحسستها ان انة ابد مو يمها ولا الي غرض بيها عبالك ما راكبة وياي شفتها طلعت النقال
طبعا اني هذا مجرد تمثيل لكن بالحقيقة گلبي وعقلي وكلشي يمهة ويراقب كل حركة تسويها
المهم اجاني اتصال مو وحدة من الزبونات موصيتني على تخم ذهب
والتهيت بالاتصال وعيني وبالي عند الگاعدة بصفي
بس اشو هاي اني اتصل وكعدت تنفخ وتتأفف
ختمت الاتصال ودرت عليها
-شكو اشو كمتي تنافخين
-لا هيج حسيت بالملل والضجر فكنت اتسائل لو ايهاب موصلني كان الطريق صار احلى

يا يابة يابوية اني گبل لزمت السيارة بريك مفاجيء حسيت عليها رادت تطلع من جامة السيارة
-شنو شنو عيدي ولج شكلتي
فرح
بهبطة من المفاجئة وگلبها صار يدك الف بالثانية من الخوف
-ششنو اعيد
-اكول اشو كمتي تخربطين بالكلام
-شنوقصدك ترة مو من حقك تعلمني او تجبرني شنو احجي ويالله وصلني بسرعة البيت اشو جنة الطريق صار طويل
حسام-اي مو حقج جنتي تتمنين محد يجي عليج ويوصلج للبيت حتى يخلالج الجو وية الاستاذ
فرح هنا طبگن فيوزاتها
كبل فتحي باب السيارة ونزلي من السيارة وضربت رجلها بالكاع
- لو تنگلب الدنيا ما اتحرك منا ويالله روح على سيارتك شغلها وروح يالله واني راح اتصل على علاء
حسام -شوفي ولج ترجعين تركبين بالسيارة لو اسوي بيج سواية اخليج طول عمرج تعضين ايدج من الندم
فرح -والله اعلى مابخيلك اركبة اني ما اتحرك منا
عاد هنا حسام صار مايشوف من الغضب
ركض بتجاهة واخذها على حين غفلة وبسرعة هي سحبة وهي شمرة بالكشن الورة مالت السيارة وتركها هناك
فرح-انت مخبل شجاي تسوي
-اي مخبل وراح اراويج المخبل شيسوي

يتبع