رواية قلوب يتيمه الفصل العاشر 10 - بقلم لينه سعد

قصة #قلوب_يتيمه الجزء العاشر
للكاتبة لينه سعد................. خاص لعيونكم❤💜

ضلت سميرة تفتر بالغرفه مثل المخبلة
من بعد مااختة سدت الموبايل ابوجهة
... كل هم سميرة... متريد وحدة غريبة تدخل البيت...
متريد وحدة اتنافسهة وتسيطر على البيت
لان بالنهاية اختة فقيرة... وهي امسيطرة عليهة..
كل الي اتسوية... مو من اجل الخوة... ولا لاجل شي
كل همة.... البيت وبس

_اشلون ياربي... لازم اسوي شي... مستحيل اخلي يجيب ياهي الجانت
مستحيل كل تعبي بهذا البيت... وبالاخير تجي وحدة تحكم بي وتتآمر علية

...............

جانت ام اصيل بغرفتة.... مثل شمعة وكاعد اتذوب..
نار تاكل بكلبة
خايفة على ابنهة.... ومتعرفة شسوي
... جانت فارشة السجادة.. والسبحة بايدهة..
وهي اتناجي ربة بان يريح كلبة... ويبعد عنة كل هم
وينسي الي مكدر ينساهه

وبلحظة اندكت الباب... انفتح..
اتفاجئت ام اصيل بدخول سميرة وبايدهة صينية وبيهة ماعون فواكه
_الله يساعدج عمة.....
اليوم شفتج ماطلعتي من غرفتج.... واني ضايجة كلت اروح اسولف وياج
..... اتقدمت سميرة وهي اتحط الصينية بالكاع.... وكعدت يم ام اصيل

... اتفاجئت ام اصيل بهاي الحركة لان مو عوايد سميرة تتصرف هيج تصرفاات
جانت حذرة وتحاول تفهم شنو الي يدور براسهة

... بهاي الاثناء... حجت سميرة عن كرايبهم... وحدة وحدة وشو الي صاير بالبيوت
اما ام اصيل فجانت تستمع الهة وسوالفة..
وفعلا سميرة اله طريقة تجذب الواحد بالسوالف وتنسي كل الي مضايقة
ظل الحديث يدوور بين هذا وذاك

ومن بين الكلمات ذبت كلمة....
_ان شاء الله يوم الاصيل..... ونفرح بي
_الله يسمع منج....
_اني سمعت رايد كردية..... والله فكرت شكو بيهة..
انروح ونخطبهه المهم هو رايدهة
احسن ماناخذ وحدة منعرفهة على الاقل هاي هو يعرفة ويعرف اصلهة

... جانت تحجي وهي اتكشر بالبرتقال....بس كل الي ابالهه اشلون تكدر اطلع الحجاية من عمتة...... 
وشلون تكدر تدخل بالموضوع....

_اي عمة.... اذا يندل بيتهم ليش مانروح ونخطبهة
..... سكتت الام....
وهي اتفكر باصيل... وشلون حظ علية
جانت التنهيدهة الي تطلع من صدرة بكل قوة دليل علىىالتعب والتفكير الي يدور براسهة وملاكية حل الة

_مانكدر سميرة نخطبهة....
_هاااااا...... ليش عمة
_راح طلبهة.... بس رفضو
_اي طبعا يرفضون غير اتروحين انتي واني.... واخوة
علمود يشوفونه ويعرفون احنى رايديهم
_هو راح يجس نبضهم ...
بس الظاهر ماكو قسمة...
والله ياسميرة اريد ازوجة.... وخاصتا هسة
لان وضعيتة معجبتني...

_ليش لا خالة الف وحدة تتمناه... واصلا همة الخسرانين... من باجر ادور الهة على مرة
_لا مو هسة خلي يرتاح اشوية...
_ابكيفج عمة.....
يلة اني اروح اسبح رائد اليوم تعبني من الظهر ليهسة ااوسل بي ...

..... طلعت سميرة وعيونه تلمع...... والابتسامة على وجهه
لان  نالت الي رادتة....
ولازم بالايام الجاية اتحاول تتقرب من الكل....
وتحببهم بيهة....
ويبدي المخطط الجديد

...... عدت اسابيع من اول مارجع اصيل.... ونفسيتة يوم بعد يوم تتازم
ميعرف يشتغل
ميعرف يمارسة حياتة
حتى اصدقائة  كطع بيهم.... ودائما منعزل ومهموم.... ويتمنة يرجع ويشوفهة....
وجان عندة استعداد يخطفهة...
وفعلا بيوم ليلتهة.. قرر يروح... وياخذة بس اخر لحظة كعد ومكدر ينفذ
جان الشي قوي ومقيدة....
وجان يعرف بان هسة هي مخطوبة ويجوز اتزوجت

امه جانت تعرف بان هو متعلق بيهة لذلك اتفقت وي سميرة يدورولة على مرة 
يجوز ينسى
كامت سميرة تطرح الهة اسماء بنات من جوارين وبنات كرايبهم واذا اقتنعت  بيهة ام اصيل
تجيهة ثاني يوم سميرة واطلع بيهة الف عيب... وتخلي ام اصيل تلعب نفسة منهة وتيآس ومتعرف تتصرف.

... جانت خطة سميرة... اتخلي ام اصيل هي تنطق اسم اختة علمود يتزوجة ...
علمود مايكول اصيل هاي اختيار سميرة لان تعرف هو ميطيقهة
وفعلا بيوم كعدو العصر...
وكالت ام اصيل لسميرة
_اكولج سميرة..... شتكولين لو ناخذ سراب لاصيل....

_هاااا عمة والله فاجئتيني...... مااعرف
_اختج خوش ابنية واصيل خوش ولد وانتي اتعرفينه
_طبعا خالة وين تلكة احسن منة
اني عن نفسي ماعندي مانع اكيف بس هي مااعرف
_والله لو اتروحين  باجر وتشوفين... وتطقسين  من اهلج........ واني اشوف اصيل
_تدللين عمة ليش لا
.................
دخل اصيل الغرفتة من بعد مارجع من الشغل....
جان يومة يمشي عادي...
كل يوم نفس اليوم الي وراه.... ماكو اي فرق...
حتى هو ميعرف اشلون جان قبل يقضي يومه...
ايامه كلة متشابهة

.... ورة عشر دقايق.. دخلت امة...
_هاا يمة الله يساعدك
_هلا والله اشلونج اليوم.... اشو البيت سنطة
_اي مو اليوم سميرة عند اهلة
ابتسم اصيل ابتسامة سخرية
_هااا بيهة الخير..
.... وراح يتقرب من كنتورة وهو يطلع ملابس البيت

_ها يمة جاي تسبح
_اي والله تعبان.... اريد انام
_ليش ماتتغدة.. ؟؟
_لا مااشتهي اريد انام واكعد وبعدين
_هااا جا خوش...

..... ضلت الام كاعدة وهي متعرف اشلون اتفاتح ابنهة بموضوعهة

صفن اصيل على امة... اتقرب وكعد يمهة على الجرباية
_هااا يوم اشو احس اكو حجي بكلبج
... التفتت الام علية
_اي يمة..... عندي حجي وحجي هواي هم... بس تسمعني لو تعوفني نص الحجاية
_لا يمة كولي.... اني اسمعج
_باع اصيل... انت معاجبني...
من يوم الي اجيت من الشمال وانت متغير اصلا حتى محجيت اشكالو... وليش هيج انت منقهر
يمة ترة الي خلقهة خلق غيرهة
ومو انت الي تنكسر من ورة مرة.... لان اعرفك انت شنو
يجوز بيهة خير لان الله بعدك عنهة
_يوم ليش تحجين هيج.....
اني  ممتغير واصلا نسيت بس تعبان من الشغل

_لا يمة انت ابني وحافضتك.... ولتكول نسيت... واذا صدك اثبت الية
_شلون اثبت...
_تتزوج
_هههههه موخوش اثبات... يعني ماكو غيرحل
_اهوووو اصيل مو وكت شقة
_لعد شكول يمة.... اني مالي خلك  لهذا حجيج

.... كام اصيل من الجرباية وهو يريد يطلع برة
_هاااا اصيل شردت.... مو كتلك لاتعوفني
.... وكف اصيل يم الباب والتفت الة
_يمة شتريدين هسة
_اني لكيتلك بنت حلال.... واريدك اتشوفهة
... سكت اصيل
_يعني مكلت منو
_منو
_سراب اخت سميرة
_ههههههههه....... يمة خلي اسبح لا اختنك واموت هسة

..... طلع اصيل من الغرفة.... وضلت امة كاعدة وجانت تعرف ردت فعلة...
جانت تعرف صعب اتخلي يقبل بيهة....
بس لازم اتلح علية يجوز الله يهدية

....................

_اسمعيني زين سميرة... لو يصير اخر رجال... مااخذة
ولج انتي الي حببتيني بي
انتي الي خليتيني اتخيلة وهو زوجي... اتخيل اليوم الي يجي يخطبني بي
اتخيلة كامش ايدي وهو فرحان لان اتزوجني
... ليش هيج سميرة....
ليش هيج خليتيني اتعلق بي.... مو اني اختج..
ماعندج كلب.... ماعندج حنية
متعرفين الليل من يجيني واني اتخيل هو ميريدني ويريد وحدة ثانية
... متعرفين شنو الي اعاني.... حتى مااتخيل اني اصير لغيرة...
كانما اني بس اله..... وهو الية 

... جانت كلماات سراب الي تنطقهة وهي تجهش من البجي.. جانت كل كلمة تطلع من كلبة وتعبر عن الاسى الي اتشوفة وهي تعرف ان اصيل ميريدة وحاب وحدة ثانية
اتقربت سميرة منهة...
وهي اتشوف اختة تبجي بقوة...

_هسة انتي جايتني اتقنعيني بي... بعد ماانرفض وماردو
قرر يروح للمسكينة الي كاتلة نفسهة علية
شوفي سميرة اتروحين وتحجين هذا الحجي
لو اخر واحد مااخذة... فهمتي... مااخذة بعد..
مااريدة...
ابتسمت سميرة... لان تعرف سراب تتمناه..
وتموت لو ماتاخذة... وكالت

_على كيفج عيني سراب... خلي يرضة بالاول... ولج انتي اشبيج... ولج انتي اتحبينة واني ادري هسة لو يجي يدخل لابوج ويطلبج راح اتوافقين
بس هاي عيارة منج
اسمعيني زين... اني كاعد اسوي كل عذا علمودج...
لتخربية من يمج اسكتي ومعليج خليهة وراية
.......................

دخلت سميرة لبيتهم... وهي ضامنة موافقة اهلهة لاصيل
اول ماراحت لغرفة عمتة
_هااا عمة الله يساعدج
_هلا بسميرة... اشلونهم اهلج
_ابخير يسلمون عليج هواي
_الله يسلمهم

_يلة عمة اروح اغير ملابسي واجيج
... طلعت سميرة الدرج وهي فرحانة... وكملت بسرعه ونزلت اتريد تتفق وي عمتة
دخلت لغرفة عمتة وسدت الباب علمود تتاكد محد يسمهة
ولو هو محد يسنط بالبيت غيرهة

_اي عمة اليوم رحت لاهلي... وجسيت نبضهم ولكيتهم الكل مرحبين باصيل....
وكالو مانلكة مثلة...

... جانت هاي الكلمات مثل صاعقة على ام ام اصيل
معرفت اتجاوب ضلت ساكتة....
شتكول الهة... اصيل ميريد اختج..... جانت صعبة عليهة تحجي وضلت ساكتة
ظلت تحجي سميرة.... واتبين اختة بان هي ماكو مثلة
من شطارة وجمال واخلاق...
والكل رادهة بس هي ترفض
... ضلت ام اصيل على سكتتهة... مثل بلاع الموس لاهي تكدر تتقبل الحجي ولا تكدر تحجي

... لحد ماسكتت سميرة.... وعلامات الاستفهام ابوجهه
_هااا عمة اشو ساكتة ماانطيتي رايج
_هااااا...... لا ماكو شي.... ان شاء الله بيهة الخير

.... عرفت سميرة الي صار.....
بدون ماتنطق عمتة......
فهمت كلشي من يمهة....
عرفت كلشي من اعيون عمتة... بس محجت خلت الامور على ماهو علية
مااتريد اتخرب الي سوتة
ومااتريد تنطق عمتة بان اصيل مموافق.....

انسحبت بهدوء.... وكالت
_يلة عمة اروح انوم رائد.
طلعت سميرة وهي النار تاكل كلبة.....
يعني شنو... ميريدة.... بعد ماقنعتة ... بعد كلشي سويتة...
كل هذا الشغل يخرب....
مو بكيفك اصيل..... وحق ربك مو بكيفك...
الا اخليك تاخذهة
جانت نضراتة السود.... وعيونة الي تلمع.... ادل على قوتة وجبروته
جانت متخسر دووم الي اتريدة اتحصلة...
ومراح تخسر هاي المرة....

..............
_ولك رائد انطمر... الكاهه منك من عمك....
... بهاي اللحظة
دخل سعيد لغرفتة
_هاااا سميرة اشو كابة..... اشبيج وشبية عمة
_لا ماكو شي...
اريدة ينام وهو النهار كلة يلعب... وهسة الليل ماينام
موتني...
اوووف
كامت سميرة وهو تفكيرهة اشلون.... وشنو الطريقة الي اتخلي اصيل يروح بنفسة وهو يتمنى ينطوه سراب
جانت الافكار هواي....
يتبع