رواية قلوب يتيمه الفصل السادس 6 - بقلم لينه سعد

قصة  #قلوب_يتيمه الجزء السادس
للكاتبة لينه سعد
...................
اتقربت من المراية ....
بديت اباوع لوجهي التعبان .....
جانت علامات السهر امبينه على عيوني ...

الكل متوقع اسهر للدراسة ...بس ميعرفون اني اسهر بس علمودة

هو الي شاغل كل تفكيري ....
هو الي مامهتم لوجودي ....كانما سراب  يمه
تعبت واني اريد امحي من مخيلتي
اريد ابعدة مثل ماهو باعدني من تفكيرة

دنكت راسي وبدت تنزل الخصلات السود على وجي  وخليت ايدي على الميز ... رفعت راسي واني اشوف شحوب وجي و احس بالتعب
احس بان محد يمي يسندني  ...
محد يفهمني ...

...باوعت لجربايته ....جانت خالية ...باهته
دائما من تاخذ غفارة
اختنك بوحدي
احس اني يتيمة فعلا

رغم تعبة واهتمامهة بي  ...بس جان اكو شي يبعدني عنه
شي اكبر مني ....

بديت البس ملابسي .....
وبديت امشط شعري ....وبديت الف الحجاب
باوعت لنفسي ولحجابي

...جان هناك فرق جبير بيني وبين فيروز
فرق الكل تحجي بي
كانما مو اختي ......
الكل يكولون انتي تختلفين عنه ....
بس مااعرف هذا الاختلاف ....هو زين او لا....
صح هي معالم وجهنه تختلف
بس اكو شي يجمعنى بيهة.
هو اسمة ....
"اصيل" وبس

طلعت من الغرفة ....
واخذت كتبي بايدي
وبديت انزل الدرج .....
وبلحظة بدت دكات كلبي ادك بقوة وبدة نفسي يصعد وينزل ...انخطف لوني ..........

بدء صوتة يعلى .....
اي هو صوته .....هو موجود....
ابتسمت .....وحسيت يومي راح يختلف.
كانما بدت الدنيا تتلون من جديد

مااكدر انكر هذا الاحساس من يجيني
مااكدر امنع هذا الشي الي بداخلي اتجاهه
..
بديت انزل بسرعه ....
بس قبل لا ادخل للهول
هدئت نفسي ......واخذت نفس ومسحت خدودي الي بدت تحمر
باوعت على نفسي .....
اريد يشوفني بكل اناقتي ...
اريد يميزني ...اريد يشوفني مثل مااني اشوفه

دخلت وعيوني ادور علية ....
وبلحظة ...شفتة .... نفس مكانة المميز الي يحب يكعد بي

شفت سمارة ....شعرة البني ..
ابتسامته ...
تقاطيع وجة ...الي اتخلي اي بنت تنجذب اله
وكعدتة المميزة وهو ياكل

...بدة صوتي يطلع
_صباح الخير
_صباح الخير نيروز ...

....بدو الكل يصبحون علية .....
...شفتة رفع عينة اتجاهي ...وابتسم
جانت هاي كافية ....الية
يكفيني بس نضرة عيونه

...اتقربت منهم وحجيت بهدوء
_شلونك رائد
_الحمد لله ...انتي اشلونج وفيروز شلونه
_الحمد لله ....
_اشوكت نزلت ؟؟؟
_البارحة بليل ....بس الظاهر جنتو نايمين

....جاوبتني بيبيتي ..
_يلة يمه اكعدي اتريكي
_لا بيبي ....مااكدر متاخرة لازم اوصل للكلية

جاوب رائد
_لعد فيروز وينه
_فيروز البارحة خفارة والمفروض هسة تجي
_اهااا....
شفتة دنك راسة وبدة ياكل

_اكلك رائد ماتوصل نيروز بطريقك ...

....رفع راسة وكال
_لا بيبي مستعجل عندي ولد منتظرة
باوعت الهم وكتلة
_لا ماكو داعي اني متعودة اروح
يلة من رخصتكم

...طلعت واني اعرف راح يكون ردة هيجي ...
بس هو هذا نصيبي من الدنيا
هو هذا حظي بان اتعذب ...اتعذب بحب واحد ميحس بية ..

بديت امشي واني بدوامه من الافكار
جنت اعرف بمشاعرة
بس اني غبية ....اني دااوهم نفسي بي
...بس صدكني رائد
راح يجي اليوم وتخسرني بي للابد
..........................

_ها فيروز راح اطلعين ...
_اي دكتورة ....خلص وقتي ...ليش محتاجة شي
_لا بس المدير يريدج
_ياستار ياربي .....ليش
_مااعرف والله ....هو كال اريد فيروز قبل لاتطلع تجيني

_ماشي هسة من اكمل اروح اله

...نزعت الروب الابيض ....ورحت عدلت شعري
وطلعت من غرفتي وبديت اصعد للطابق الخاص بغرفه المدير
....دكيت الباب بهدوء
_ادخل...
_صباح الخير دكتور .....كالو اتريدني
....رفع عينة من الاوراق ....وهو يتفحصني
بعيونه من ورة المناضر

_اكعدي فيروز ...
...اتقدمت وكعدت ....واني متخوفه منه
_اريدج اتصعدين للطابق العاشر ....
اكو مريضة اريدج تهتمين بيه

....فتحت اعيوني بقوة ...واني متعجبة من طلبة
_بس دكتور انت تعرف اني اختصاصي اطفال
وانت تعرف زين محد يكدر يهتم بيهم بكدي

_اعرف فيروز ....لان اعرف انتي الج مقدرة بالتعامل وياهم
اريدج اتصعدين لهاي الغرفه لان تهمني

_اهااا قصدك شغل اضافي
_اي بالضبط
_شكو بيهة ....من ارجع باجر لان تدري هسة خلصت غفارتي لازم ارجع للبيت ارتاح
_لا فيروز ...اريدج هسة اتصعدين

_بس دكتور اني تعبانه تكدر تستعين باي احد

.....رجع يكلب بالاوراق الي كدامه ....
وكال
_انتهى الكلام فيروز
...اتكدرين اتباشرين

....كمت واني بودي اركعه بالنفاضة الي يمه
لان ماكو هيج استغلالي ....
....طلعت واني افووور
يعني يستعبدونه علمود كم فلس ناخذهة بطلعان الروح
والله لو ما نيروز ماابقى هنا ....

نزلت جوة لغرفتي ...بديت البس ملابسي
واني شايطه من القهر

دخلت دكتورة الاء ....
_ها فيروز اشو بدلتي
_غير شماعه الفكر ....كال ماطلعين
_ههههههنه عزة بعينج فيروز ...ولج السانج

_اوووف دكتورة ...انتي اكثر وحدة تدرين بية اشكد اتعب
وهسة حتى روحه للبيت يستكثرة علية
ادري ميكول هاي ابنية وعدهة اهل يحاسبوهه
هي بس مرت عمي
كافي علية اسمع السم منه

_ماشي عيني ...كلنه هيج والله بس على كيفج وهذا كلة الج
يعني مو بلاش اكيد راح يكرمونج

_تعرفين دكتورة اني ماادور كراميات
عكس اللممرضات كولهن ماانتهز الفرص وامد ايدي

على العموم بعد ميحتاج احجي خلي اروح اكمل واطلع وامري لالله
_صدك هو منو المشرف على غرفه رقم
٤٥
_اتصور دكتور حازم
_يبووووو يبووو علية ....هو هذا الي جان ناقصني ..
_فيروز روحي كملي شغلج ولتحجين وياه باي شي ..
سوي نفسج متسمعين غلسي
_مااكدر دكتورة ....ياربي شكد غليض ..ماينجرع ..حالفه اذا اتصرف تصرف انزع الي برجلي وعلى راسة واخلي مضحكة للمشفى
وخليني انطرد ...

_لا ولج عيب ...شنو هذا الحجي
_اي حقج دكتورة ...مو مامتعاملة وياه ...هو اني ليش انهزمت لقسم الاطفال ..

يلة ميفيد الحجي هسة اروح ...اكمل شغلي قبل لااشوفه

..............
بديت اطلع للطابق العاشر ....
اتقربت من الغرفه .....دكيت الباب ...
ودخلت ..
_صباح الخير...
اتقدمت ....للمريضة
جانت مرة جبيرة ...جسمة ممتلىء ...

اتقربت اله..وابتسمت ...جاوبتني
_صباح النور ...

يلة امي ....خلي اقيس ضغطج
بدت تكعد ....اتقربت منه وبديت اساعده اتعدل كعدتة .......بس
حسيت بايد بدت اتساعدني ...
فزيت التفتت بعيني علية
شفتة هو ......اي هو نفس الشخص الي انضربت بي قبل ايام
شعرة كثيف ....اسمر ....
اعيون جبيرة وحادة ....
شارب خفيف ولحية متوسطة الطول 
جانت نضرتة مركزة على عيوني
كانما يريد يقرة هواي اشياء مني

دنكت راسي وابتعدت .....
بديت اقيس اله الضغط .....
وانطيته الدوى ....
واني احس نفسي متراقبة ...

وكتلة بعد ساعتين تاخذين وحدة من هاي الحباية

....جاوبني ابنه
_لا تعالي انتي انطيهة
التفتت الام الية وكالت
_اي بنتي اني مااعرف ....

...باوعت الة واني عاقدة حاجبي ....
_اتصور عندي بيت ارجع اله ....اذا اني موجودة بعيني واذا لا اكو غيري هواي ...
....التفتت اله ...وابتسمت

_امي صدكي جاي اطلع
على العموم بـــ........جاي اكمل الحجي
بهاي اللحظة اندك موبايلي
ابتعدت اشوية ....

_الو.....ها رائد ....
.........
_الحمد لله ...اي هسة جاي اطلع
.........
_اوك هسة انزل الك
........
سديت الموبايل ...ولكيته واكف منتظرني كانما منتظر مني شي
باوعت على المريضة
_يلة امي معافاية من رخصتج ....

....التفتت الة شفته حاط ايدة بجيبة وهو مركز علية ...
وهناك ابتسامه خفيفه على وجه

....نزلت جوة واني متوترة مااعرف ليش ....
رحت اخذت جنطتي
ورحت للاستعلامات
بديت ادخل ولكيت الممرضات دايرات على رائد
كانما ممثل سنمائي
والي تضحك وياه
والي اتسولف...

بديت اتقرب ....لكيته لابس قميص اصفر وبنطرون كابوي
بس لكيت العيون كلة علية
وهو مبتسم ويسولف
_حمد لله على السلامه ...

التفت الية
_الله يسلمج ..اشلونج فيروز
_ابتسمت ...الحمد لله
يلة امشي ترة مراح يتركنك ...

جريتية من ايدة جان طويل هواي ....وبديت اجرة وهو مستمتع
والناس اتباوع علينة ...
اعرف نضراتهم ...النه ...بس ماااهتم المهم احنى نيتنه شنو
جانت نضرات الممراضات الية بالحسد ....

_ههههه على كيفج فيروز .....ترة عبالك انتي امي واني ابنج
..التفتت اله
_هههه مو مهم ولك اشعندك جاي لهنا ...
هسة لو امك تدري ادكلنه طبل .وتبدي موسيقى حسب الله تنعزف

_ههههه لا على بختج ....ترة امي طيبه بس هو هذا طبعه
وثانيا بنت عمي وجاي علية

....سكتت مااكدر احجي اي حجاية ....
حقه امة ...لازم يحجي هيج ..

...ركبت بسيارته ...وبدت تمشي ....
..التفت الية
وضل يباوع علية هواي ...
وكال
_فيروز ...ليش ماتتحجبين ...
انتي حلوة والعيون عليج

...مكدرت احجي بس درت وجي للشباك وصفنت

...مااحس الا ايدة بكل هدوء بدت تكمش ايدي
...
فزيت .وباوعت علية وكال...
_ضجتي لان احب الج الزين
...سحبت ايدي بهدوء

_لا بالعكس رائد ...انت مثل اخوية ....الي ماحضيت بي بحياتي
اضوج من العالم كله ومااضوج منك
...بس مو وكته هسة هم يجي يوم واتحجب

يتبع