رواية قلوب يتيمه الفصل الثالث 3 - بقلم لينه سعد

قصة #قلوب_يتيمه الجزء الثالث
للكاتبة لينه سعد
...............
حسيت بخطوات تنزل الدرج
جان كلبي يدك وي كل خطوة تخطيهة
_اي هي هاي ....
متعجب ....ليش نازلة بهيج وكت

كعدت من نومتي ....وتقربت من الباب وضليت اتسنط على الحركة
حسيت الباب الخارجي انفتح
...رحت فزيت على الشباك

شفتة هناك....شفت طولهة والشال الي مغطية نفسة بي تحتمي بي من برودة الليل
شفتة راحت تمشي يم الزرع
متحملت ابقى
مكدرت اسيطر على نفسي وهي وتبتعد عني
جانت قوة تجذبني الهة
بحيث انسى كل شي اني ناوي علية او مقرر اسوي

طلعت وراهه ....شفتة من بعيد حاضنة الشجرة...
اتقربت وبديت احس بيهة  تبجي وتحجي بكلمات كردية
مداافهم علية ....
بس احس بية .....احس بشي بداخلة موجعه
مااعرف شنو هو ...
اتمنيت كل عذابة انهي على ايدي ....

يمكن راح اتكولون شبسرعه حبيته
وشنو هذا الي قلب حياتك
صدكوني اني نفسي مااعرف ...
اشلون وشوكت
بس الي اتذكرة الايام السبعه الي جنت يمهم  كل ماانام ...
تترسم ملامحهه باحلامي

جنت اتمنى ما اشوف دمعه من دموعه ..
اتقربت منه
وحجيت وياهه

جانت مثل النسمه رقيقة هشة ...
صافية مثل المي الي بعيونه
حسيت بيهة فزت ...وبتعدت كانما مو كتي اطلع واشوفهة
جاوبتني برعشة شفايفهة

_ليش طلعت ..اصيل
_انتي ليش طالعه بهذا الوكت.....
وليش تبجين
_ميخصك
....عفتة وردت امشي

بس مااحس الا كمش ايدي كمش ايدي بقوة وجاوبني بكل عذوبة
_يمكن ميخصني ....بس مااكدر اشوف الحزن واسكت
انتي صاحبة فضل علية
ولو تطلبين اعيوني فدوة الج

....باوعت علية بحزن وكالت
_اذا اتريد اتريحني .....روح....
روح لاهلك ارجع بعد ....انت صرت زين

.....اتفاجئت من كلامه ....فتحت عيوني
وعفت ايدهة بهدوء
_تدللين ...من باجر راح ارجع
اذا هذا يريحج

...بديت اشوف الدموع تنزل
ضليت صافن متوجع ....ليش تبجي
_ليش تبجين.....بدر مني شي زعلج
اذا على البارحة ..فاني قصدي......

بعدني مكملت حجايتي عافتني وركضت ....

...ضلت اعيوني وراهه وهي تركض بقوة
كانما تنهزم من شي
مااعرف الي جان بداخلي بهذاك اليوم
بس حسيت بالخنكة
حسيت اريد واحد يسمعني ....
تريد احجي الي بكلبي
مكدرت ارجع للبيتهم

حسيت اذا ارجع اسوي شي مجنت ناوي علية
لذلك قررت ابقى برة  وبهدوء
بدون محد يعرف
................
كعدت من النوم على صوت امي  ...
_هاي اشبيج جوانا ....
ليش نايمة لحد هسة ...شنو مريضة
....كعدت واني دااحس التعب ماخذ كل طاقتي
مالي واهس لاي شي
مااكدر اشوفه
يمكن بس اشوفه راح يعرف من عيوني كل شي

جاوبت امي
_لا مامة مو مريضة بس احس بتعب
_يلة حبيبتي كومي ...لان عدنة شغل هواي
وهذا اصيل راح لاهلة

...فزيت من نومتي ....
_شنووو...
_هاي اشبيج ....ليش فزيتي
_لا ماما بس بعدة تعبان
_لا كلشي مابي ...واصلا لو باقي جان اني كلت لوند يكلة يروح اشعندة بعد باقي
بس متعجبة طالع بدون مايسلم
بس سلم على وند
....يلة اني نازلة الحكيني بسرعه

...شفته طلعت وسدت الباب ...
بس انسد كل شي وراهه
كمت واني رجلية خاوية ...تعبانه ...
بلعت ريكي كانما اتمنة ...الي حجتة امي مو صح
اتمنى  انزل واشوفة كاعد على مكانه ...منتظر الريوك
منتظر اغير الة الضماد

....بدت الدموع تنزل ....مو بس دموع لا
دااحس نغصة بكلبي صارت ...
وكفت كدام المراية واني اشوف نفسي ...
_هاي اشبيج جوانا ....
ضربت نفسي راشدي .....واحد... وثنين... وثلاثة ..
انتي تعبانه وبس
انتي بس محتاجة للراحة وهذا كلة وهم

مشطت شعري ....
وطلعت الابتسامه بالكوة رسمته على شفايفي
نزلت جوة واني اتصنع  كانما ماكو شي ...
لكيت امي امحظرة الريوك
بديت اكل
او وند يحجي اشلون ودع اصيل
_تدرون لكيته برة واكف ....وكاتلة البرد
كتلة اشعندك بالبرد طالع
...جاوبني ...اريد اروح اني صرت زين وتعبتكم وياي ...
اريدك اتسلم على اهلك كلهم
واعذروني لان تعبتكم وياي وهذا فضل ماانساه الكم طول حياتي ...

.....جان وند يحجي واني اتكطع ....
..يعني مدخل من البارح  بليل....
زين ليش ماودعني ....
اووووف ....هو اني طردته اشلون يودعني
...كمت من مكاني بدون مااحس
حسيت نفسي اختنكت رحت اخذت السطل ورحت احلب البقرة
وامارس حياتي ....
...بس راح اكدر .....يعني يصير الايام اتنسبني ...

...............

نزلت من القرية ...اني او وند ...
انطاني كروة
بالكوة اخذتة ....بس لازم اخذهة لان اشلون ارجع
طلعت لبغداد
...بس اني تفكيري يمهة ...
رجعت راسي ليورة ....وغمضت عيني ....وبديت اتذكر شكلهة اول ماشفتة
واول ابتسامه منه
واول كمشة من وكعت بحضني
جان جسمي كلة ينتفض بس اتذكرهه
فتحت عيوني واني افرك براسي بقوة ....
اريد اطلعه من دماغي

حسيت وصل لبغداد .....جنت مشتاق لامي
اعرف بيهة هسة متاذاية علية
نزلت ...وركبت عبرية ثانية ورحت للبيت
اول ماوصلت للفرع
بديت امشي...واشوف الجهال كلهة اتباوع علية وتركض
بدو الناس يطلعون من بيتهم ...
بدو الشباب يتجمعون علية ..
_هاااي وين جنت اصيل ...ولك كلبنة الدنية عليك

باوعت الهم ....
شكو يمعودين على كيفكم
_يمعود ولك اتوقعنه علسوك ...
وخطية امك كل يوم متخربطة
...فزيت من سمعت هيج
...رحت اركض لبيتنه ...
لكيت اخوية يفتح الباب بسرعه
الجهال بلوغوهم
اجة شبكني
_ولك اصيل ....صدك جذب
خابر ...دز خبر بيد صحبانك ...ولك كلنة مات

_مااعرف شكولك سعيد ...بس اريد ادخل اشوف امي
دخلت للباب لكيتة كاعدة على فراشهة وعيونه تجري وماتكدر اتكوم من التعب ...
اول مشافتني
_يمة وليدي .....يمة اصيل
...رحت وكعت بحضنهة واني اشم ريحتة الي كلهة ريحة هيل وحنية
_يمة اعذريني .....اذيتج
_لا يمة سودة علية ....راية الله بيضة من رجعت مااصدك شفتك مرة ثانية
يرادلهة جريان دم
جانت تحجي وتبوس براسي وبوجي

...وخرت شيلتهة من راسهة ورفعت ايدهة ليفوك
دخيلك ربي
ابو غيمة الزركه ....ماينسة عبدة
بدت الدمعات تنزل على خدودة المجعدة
وتنزل على الدكات المرسومه على حنجهة 

اما اني جنت  نايم بهذاك الحضن
الي محد يكدر يعوضة اذا فقدتة
جنت اعرف بكمية التعب الي سببته الهة بعد ما غبت عنهم اسبوعين

...............
كملنة عشة وبدت الناس تجي النه اتسلم علية
وبديت احجيلهم الي صار بية
وكلهم كالو فدوة الك السيارة ...همزين طلعت سالم
....صارت سوالف هواي ...وبعد ماطلعو الخطار .....
دخلت سميرة مرت سعيد
_حمد لله على السلامه ...وتعوج بحلكهة

ابتسمت اله ...
_الله يسلمج ام رائد
_اي ادري ياعيني ....احجي دز خبر ...
كول راح اتاخر عندي شغل اخلصة

....جانت تحجي وتنكط سم ....
اعرفة  واعرف اسلوبة ...بس اني تعبان
ومابية حيل اجادلة لو اغلط علية
كمت من مكاني وكتلهم
_تصبحون على خير تعبان واريد ارتاح
....جاوبتني امي
_يمة روح ارتاح ...بدل ماتكعد وتكابل ناس تعبانه

....دخلت جوة واني اسمع سميرة اترادد امي وامي اترد وسعيد واكع بنصهن

مابية حيلهم
_اوووف رجعت لسميرة وبلاويهة
رحت لجربايتي وخرت الغطى
وخليت راسي على المخدة
غمضت عيني ....وهي الا دقايق

وبدة خيالي يرسمهة
ضحكتة ....شفايفة.....وجناتة ورصعاتة ...
حتى الشعيرات الي جانت تنزل على وجهة
درت وجي وخليت المخدة على راسي
_اوووف ياربي ....اريدهة تطلع من راسي
اريد انساهه
اشبية اني ......

.....كمت مكدرت انام ...ضليت على حالتي هاي للفجر
رحت اتوضيت وبديت اصلي
كملت
كعدت واني افكر ....اشلون راح ابدي شغلي

...حسيت انفتح الباب
شفت امي دخلت
_هااا....يمة اشو كاعد
...ابتسمت الهة ...
_لا يمة بس صليت ...ومااجاني نوم
_ليش يمة ....لتشيل ابالك ...ماطول رجعت سالم كلشي يتعوض
اني ابيع ذهيباتي ...واشتريلك سيارة ولا تنقهر
...باوعت اله وابتسمت

_الله يخليج الية يمه ...
ومايحرمني منج يالغالية
...بست راسة
...وكتلة
_يمة اريد انام بحضنج .....
...باوعت على عيوني ....وابتسمت
وحضنتني وننمت.....
ومااعرف بعد اشلون راحت ....بس الي حسيت بي نمت مرتاح لاول مرة بدوم ماافكر واحسب
................

مر شهر من بعد مارجعت للبيت
بس بهذا الشهر ...مكدرت انساهه
كل مااريد انام ....تبدي معاناتي وياهه
تبدي ايامي من جنت يمهم
جنت اكول شتسوي هسة
جنت اكعد وي كعدتة واكول
بهيج وكت هسة تحلب
وهيج وكت اتروح تحصد

بديت اشتغل اشتريت اتريلة
من الفلوس الي جنت ضامهن ...وساعدتني امي
وبديت اشتغل نفس شغلي..
جان الطريق يحن الهة ...
كانما يصيحلي ويكول روح شوفهة
بس مااكدر اروح ...
وحتى لو رحت ...شكول ....شنو السبب الي ادخل عليهم
مشتاق لبتكم
...اوووف ربي ....
حلهة يارب مااريد بس ارتاح ...اريد انساهه
اريد ارجع اصيل مثل قبل
جنت اتصور بس اشتغل انسى
بس لا كانما القت علية تعويذة حبة
....بيومه دخلت امي ولكتني
نايم ومخلي ايدي على راسي
...اتقربت مني
_هاااا يمة ....اشو مامرتاح من اليوم الي رجعت
..التفتت الهة وكمت
_لايمة سلامتج بس تعبان من الشغل

_لايمة ....مو مال شغل انت وليدي حافضتك
انت وسعيد
اكو شي بكلبك وضامه ومدوخك
احجي وليدي محد غيري يسمعك

...رحت نمت بحضنة
_تعبان يمة
_يمة اسم الله الرحمن عليك .....
ولك اشبيك ....هاي اعيون سميرة ....والله ماكو غيرة
_لايمة مو سميرة
_مو سميرة ....
لعد شكو
...كومتني من حضنه  .....والله عرفتك انت متغير ...اشبيك
بروك ابوك احجي ...ولك لاتمرمر حالي

....صفنت واخذت نفس وكتلة
_يمة اذا عربي راد يتزوج كردية ينطوه

...صفنت علية ....وباوعت ومحجت شي
_هااا يوم اشو صفنتي

._عشكت كردية اصيل .....مالكيت غيرهة
_ليش يمة اشبيهم
_مابيهم شي ...بس ماينطون للعرب
ولك اشلون وشوكت

...كمت من عدهة ورحت للمراية
_حضي يمة .....حضي جابهة بطريقي
هي الي حجيت عليهة
هي الي ساعدتني
...كامت امي وراية
وكمشتني من جتفي وكالت
_يجوز متوهم ....يجوز لان ساعدتك هذة شعورك

...باوعت على عيونه وكتلة
_يمة شوفي عيوني ....وكوليلي اذا حجيج صح

...جانت اتباوع ...وطالت الصفنة علية
وعرفت اني مو بس حابة
اني عاشكة لدرجة الموت
يتبع