رواية قلوب يتيمه الفصل الثاني 2 - بقلم لينه سعد

قصة #قلوب_يتيمه الجزء الثاني
للكاتبة لينه سعد
............
عدة ثاني يوم ...واني نايم بالهول الجوة
حسيت بخطوات تنزل الدرج
خطوات خفيفة هادئة
واختفى الصوت ....
وبدة الباب الخارجي ينفتح ...
ورة ربع ساعه ...

حسيت ...بملاكي  ....الاشگر داخل علية
وبيدهة
كوب حليب دافي
_اتفضل اشرب هذا الحليب.....يساعدك تتقوة اشوية
...ابتسمت الهة
ماعرف ليش من اشوفه تترسم على وجي الابتسامه ويبدي كلبي يخفق بسرعه ...

كمشت الكوب
واتلامست ايدي وي ايدهة حسيت
الكهرباء مشت بكل جسمي ...جانت انفعالاتي قوية ...
وعيوني الي اتركز بهذاك البحر الامع
اغرك ومحد يكدر ينقدني منه
عيون زرك والشفايف كرزية
سبحان الله مااخلق وابدع

...جاوبتة وكتلة
_مااريد اتعبكم وياي
....ابتسمت الية ...وبدت الرصعات الي بوجهة تنحفر وجانت هاي كفيلة بان تكتلني بمكاني
كانما اني ناقص اذية ....
_لا ماكو تعب المهم اتكوم بالسلامه وترجع لاهلك سالم
وثانيا متعودة هيج وكت احلب البقرة ونشرب يعني ماكو تعب

....باوعت الة بتعجب ...
_شنو ...اتحلبين
_اي عندة خير من الله دجاج وخرفان وبقر
معتمدين على نفسنه

....جانت تحجي واني هايم بين الحروف الي تنطقه بالمكسر...وتحاول جاهدة اتقربة الية
جانت سلسة بكل شي 
جنت احلم واني ذايب بالحروف
الي تتكلم بدون ماانتبة لمعاناته ...معقول هذا الجمال كلة وهاي مهمتة بالحياة
شفتة اشكد كبرت بعيني

.....بدو يكعدون واحد ورة الثاني ....
ويتريكون وهم يحجون كلام مفاهمة ....
جنت احس بان اني مثقل عليهم بكعدتي هاي ...
بدة كل واحد يشتغل شغلة
الام تشتغل ...
الاجبان .والكيمر ....واللبن
اما اخوهم فيروح يزرع بالمزرعه...

اما ملاكي الاشگر .....فجانت مهتمة بالتنضيف والطبخ
جنت اشوفهم اشلون عائلة حلوة ...
عكس عائلتي الي كلهة مشاكل واذية
ماشفتهم بيوم كاعدين الا اذا ماتعاركو

دخلت علية .....وكالت
_يلة اريد اغير الك الضماد ...
...هزيت راسي .....
وبدت اتغيرةالية وتفتحة وحدة وحدة ....
اما اني جنت اموع بلمسته

بديت الاحظ هذيج الشعيرات الذهبية الي طارت من عقدة حجابهة
ونزلت على تقاطيع وجهة الرقيقة
جنت ابلع ريكي ....واني هايم بين هذيج الملامح
الغريبة
_انتي شنو اسمج

....رفعت عيونه مثل لون البحر ....واهدابة مثل ارماح كانما ترميني بيهن
_جوانا......وانت
_اصيل.....
_حلو اسمك ...وغريب

....باوعت علية وكلت بكلبي
...هو انتي الغريبة والحلوة .....الله يستر عليج
نزلت عيوني جنت اخاف لااحسده

_مبقة شي اشوية اشوية ....راح تكدر تمشي وترجع لاهلك

.....جانت هاي كلمتة تاذيني
اشلون ارجع .....معقولة ...وبعد مااكدر اشوفه
ممااعرف اتمنيت لو ماامشي طول عمري
.............
عدة اسبوع واني بديت اتحسن ...
وبديت امشي
بس بتعب ...
بهذاك اليوم الام تعبانه مريضة
ولازم واحد ينزل الغراض للسوك علمود يبيعه
فققر وند هو يروح
اما اني فكتلهم راح اخذ مكان وند واكمل شغلة الي بالمزرعه

_بس متكدر للزرع ....وانت بعدك تعبان
....باوعت اله بامتنان
على خوفه علية
_لتخافين كولشي اعرف ...ولتنسين انتي راح اتعلميني

....باوعت الية بعيونه الي كلهة غموض ...مثل غموض البحر
منعرف شنو داخلة
_ماشي ...يلة لعد تعال اعلمك.....

...خطوت رجلي الباب ....
وهاي اول مرة تخطوهة بعد ما جنت نايم لمدة اسبوع
شفت الهوى الي عمري مشامه بحياتي
لو الخضار الي على مدت العين ....
ياربي.....شنو هذا الجمال ......
اكول ليش هيج حلوين ثاري على حلاة ...هاي الطبيعه

باوعت لجوان ...وكتلة
_شنو هذا الجمال ....
...ابتسمت الية ...
_بعدك مشايف شي ....
باجر اذا ماعندي شي اشوفك الغابة....
واشوفك البحيرة
شي تتمنى ميروح من خيالك ...
_ياريت والله

بديت امشي وراهة.....
وهي مثل الغزال البري ....
رشيقة ....واثقة.....و صلبة وقوية
كل المعالم الحلوة بيهه
التفتت الية وهي اتعلمني
_شوف اصيل .....
من هاي المنطقة تقطف الطماطه
وتعال اعلمك اشلون اطلع البتيتة ....

_ماشاء الله هاي انتم كلشي اتزرعون
_الحمد لله كلشي نزرع ...بس كل هذا لبيتنه يعني مو انبيع
بس ننصنع اللبان هو هذا الربح النه

_الله يرزقكم....
...يلة اني اعوفك واروح احصد برتقال

....ضليت اراقبة وهي تاخذ الدرج وتروح تصعد اتكطع ...
...غمضت عيني وبديت اتنفس الهوى الحلو....
واني بالي مشغول
بالتريلة الي انباكت مني ....
اشلون اتصرف....وشلون راح ادبره
وهسة اهلي شيسون ....امي اشلونه؟؟

بديت احصد الي كالت علية جوانا .....
وبديت اكمل ....
اتفتت علية ...بعدهة اتكطع
رحت وراه .....بديت اتقدم وبدة الهوى يعله...
ويخطف وياه ثوبة
الي بدت رجلية تطلع وهي مثل بياض الثلج
دنكت عيني
واني الثورات الي بداخلي تنطلق
جنت اغار علية ...من نفسي ...
شنو الي اني بي؟؟؟
شنو الي صار الي؟؟؟

وصلت يمة وكتلة
_انزلي جوان ....
اني اكمل
....التفتت الية وكالت
_لا اكدر ....لتخاف مبقى شي
...باوعت علية بخزرة
وكتلة
_لا انزلي ...اني اريد اكطع
بديت تنزل ...
هي تنزل ...
وتزحلكت رجلة ...
مااحس الا اني ملتقطهة بذراعي و صارت باحضاني
التقطته مثل مالتقط
الوردة من الزرع
مثل مااقطف التفاحة من الشجر ...
جانت خفيفة ....حلوة هادئة ...
جانت دكات كلبي تنبهني للخطر الي اني بي
بدت اعيونه اتركز على عيوني
وتتسع....
وتطلق البحر ....ليغركني بشاطئهة
وخصلات الشعر المتطايرة نازلة على وجهة
جانت مثل لوحة
وتحتاج لرسام يبدي برسمه

جانت قريبة لدرجة اخاف عليهة من نفسي
نزلتة بهدوء
وصعدت بالدرج .....
محجيت اي كلمة ...لان مااكدر اعبر عن الي بداخلي ....
كافي المعروف الي سوته الية وانقذتني ودارتني ...مااريد ااذيهة بمشاعر يجوز
مالله صحة
التفتت شفتة ماكو ....
كانما ملح وذاب.....جنت حاير والحيرة موتتني
اني اشلون اذا صرت زين
اشلون اكدر اعوفهة وانسى كل شي
اشو دكات كلبي اتزيد بس من اشوفه ..

.........
صار العشة وجانت نظراتة مختفية
ابد متباوع علية
الوحيد الي جان يجاملني هو وند
الي هو ااوحيد الي يحجي عربي بعد اخته

ردت افتح موضوع....اريدهة اتجاوبني ...اريد اسمع صوتة ...

جنت اكول هاي اني هسة هيجي وتعبان لعد من اروح اشلون
سئلت وند
_اشلون اتعلمتو العربية ...؟؟
...شفتة ماالتفتت الية ...ولا كانما داحجي
...جاوبني
_بابا..الله يرحمه ...جان ينزل لبغداد هواي وهو يعرف ...
فعلمتي اني وجوانا ...
صح نحجي مكسر واكو مفردات منعرفة بس احسن من غيرنه

....باوعت على جوانا.....
شفتة سارحه بغير عالم ....اول مرة اشوفه بعيدة عني
ضجت حييل
كلت
_الحمد لله كملت عشى راح انام ..
شفت نضرت الية ورجعت نزلت راسة ...
رحت دخلت للهول ونمت
اعرف اني صرت زين ...ولازم اروح لاهلي...
بس شلوون ...
نمت وقررت باجر اطلع من البيت
جان الي بداخلي مو قليل ....صعب واصعب من اي موقف صار بية
لان كلبي هو الي متاذي هسة
..............

صعدت فوك...واني حايرة ومااعرف اشبية
ليش هيج يصير وياي
ليش مااكدر انساه ...
ليش خيالة يلاحقني...
مجنت اعرف هذا الشي الا من وكعت بحضنة
سمعت كل نبضة
حسيت بكل احساسة
قريت عيونه ...
تاهت بشفايفي كل الكلمات ....
اول مرة احس بهذا الاحساس

جانت كمشة ايدة الي محاوطتني تحجيلي هواي اشياء
لو ملامح وجة الي كل مااريد اشتغل شي الكاه كدامي ...

....فركت راسي حييل
وغمضت عيوني بشدة ....ورفعت وجي
دااختنك ...
اشلون يعني ...اني راح ابقى هيج
اشلون اذا راح ...
منو يصبر كلبي ....منو يواسي ليلي ...

....ضليت اتكلب على جربايتي ...
مااحس بالنوم ...
كل دقيقة يطفر بمخيلتي
تعبت
كمت ...بسرعه .....
نزلت جوة بهدوء ....
رحت فتحت الباب ....وطلعت اشم الهوى
بدت البرودة تدخل لكل جسمي
بدت الاشحار اتلحن وي الريح الي اتحركة
ضليت امشي
بعيد عن بيتنه وصلت لشجرة الليمون
كعدت بحضنة ....ومااحس الا بدت الدمعات تنزل
...ليش داابجي

شنو الي صار .....ابجي لان حبيته وهو مو من عدنة لو ابجي لان بعد مراح اشوفه بعد

رحت حضنت الشجرة وشكيت اله ....

_جوااان....ليش طالعه بهيج وكت؟؟؟؟

سمعت صوتة ....صفنت ....معقولة
هو وراية ....
فزيت ... ...وشفتة كبالي
_اشجابك هنا

....اتقرب مني
_شبيج ....ليش هاي الدموع تارسة خدج
....رفع ايدة وبدة يمسح الدموع
...جانت موقفي ماانحسد علية
رجعت ليورة
واني مرتبكة
شكلة ...اكلة ابجي عليك .....
اكلة بديت احبك ....اتعودت عليك

....اتقدم مني وكال
_اشبيج ....اتخافين مني!!!

وهسة يالة ؟؟؟
من بديت اتعود عليكم ....بديتي اتخافين؟؟؟
يتبع