قصة #قلوب_يتيمه الجزء الثالث عشر
للكاتبة لينه سعد
...........
بديت اسمع الهلاهل.....
جان الصووت قوي.... مزعج..... مجنت اتصور هاي الهلاهل راح اتاذيني
صفنت على نفسي واني اريد استوعب
اني حاير..... اني اشسويت.... ليش قبلت بيهة...
اني مااحبهة..... اشلون وصلت لهاي المرحلة
بدو يطلبون مني اكووم اعقد سيد..
كمت واني اتلمس السجادة المفروشة..... جانت ناعمة
كانما هاي اول مرة يفرشوهة...
وخاصتا لهاي المناسبة
كمت واني اشوف اعيون الفرح بعيون الكل
بعيون اخوتهة..... بعيون ابوهة....
صفنت عليهم.... واني متاكد مااكدر اتراجع هسة
استسلمت...... اي نعم
ماعندي حل ثاني
اتقدمت.... جانت خطواتي ثكيلة.... باردة.... ماعندي اي احساس فاقد لاي شعور... بدة الاوكسجين ديضيق...
كانما هاي الخطةات ماشيهة من قبل
كانما هذا الشعور حاسة...... ضيق بالتنفس
تعب...... خايف....
مو هذا الي جنت منتظرة
مو هاي الفرحة الي جنت اتمناهة.....
انفتحت الباب
وبدة اتبين الي متواجدين بهذا المكان....
شفت النسوان الي اتصفك
بدت الهلاهل تزداد
بدت الكولات تتناثر على مسامع الكل.... الا سمعي جان يرفض هاي الكولات
ظلت اعيوني تتفرج وهي اتشوف الابتسامه على الكل
بديت المح امي وهي مبتسمة وتصفك
شفت فرحتة الي اتمنيت اتصير عندي
شفت نظرات عماتي.... وخالاتي وهنة فرحانتات...
حسيت بان اني مااكدر اكمل...
مااكدر اتواصل وياهم.....
حسيت دااختنك
كلبي يخفق... بضيق وبضعف
وفعلا...
ردت ارجع.... وانداريت.... بس الي شفتة....
سميرة واكفة وراية........ جانت صافنة علية
وبدون اي ملامح... جانت ساكتة
ملامحة ماتعبر عن اي شي
بدت تبتسم الية وكالت
_يلة اصيل اتفضل جوة اكعد هنا.....
درت وجي... بس
جانت نظراتي ادوور على شي...... جنت اتمنى اشوف شي... بس مااعرف شنو
معقولة ادور علية...
اريد المحهة...
وفعلا شفتة..... ولاول مرة
باعوت علية.... هي هاي الي راح اتشاركني حياتي
هي هاي الي راح اخلف منة جهالي وانطيهة اسمي
ردت شي بيهة.. يشبهة
جنت ادور بعيونهة..... بخجلهة
جنت اريد اي شي بيهة يذكرني بجوان
جانت تختلف هواي عنة....
بديت اتقدم وكعدت بدون مااسلم...
مااعرف ليش
مرتبك؟؟.... خجلان؟؟؟..... محتار؟؟؟؟
كعدت.... وجان السيد بنصنة وهو يقره واني اردد وراه
ختم السيد
وبدت الهلاهل تعلى.... تعلن على ارتباطي الرسمي بيهة
التفتت الهة...
وشفت الابتسامة بوجهة
معقولة راضية بية...... يععني معقولة محد جبرة
.... زين ليش الكل فرحانة واني...... لا
ليش مااحس بالفرحة مثلهم..... بديت اكووم اريد اطلع
اريد انهزم
اريد اخلص من هذا القيد الي راح اتقيد بي طول عمري
اني غلطت.....
بس غلطي بعد مااكدر اصلحة....
................................
مر اسبوع من بعد الخطوبة
مامريت الهة..... مو مثل كل خاطب فرحان بخطيبتة ويريد يكعد ويسولف وياهه
جانت امي اتلح علية وتكول روح عيب...
لازم تتعرف علية... واتشوفهة
... اني جنت حاير....
جنت اتصور بس اخطب... راح ارتاح
راح انساهه...
راح تبتعد عني هاي الاحلام......
كلشي متغير....
............................
جانت سميرة واكفة يم الكاونتر..... وبيدهة جيس اصغير
واكفة وحايرة
اتضل تستعملة لو..... لهنا وكافي
جانت مترددة اتضيفة... لستكان الجاي الي متعود يشربة
..... جانت اربيعين يوم اتضيفه اله بستكان الجاي
صفنت وهي اتكول
_بعد هو انربط...... عليمن احط
ابتعدت عن الاستكان وراحت... لسلة الزبالة وذبت الجيس هناك
بديت اهذ الصينية..... واتقدم منهم
شفتهم سكتو من شافوني...
شربو الجاي بدون اي كلمة.....
............................
بدت امي اتلح علية... اروح لسراب..
اني جنت رافض...
بس كلت لحد اشوكت..... لازم اتعود علية بحياتي
لازم اشوفهة... وتشوفني
يجوز احبهة
وفعلا..... قررت بهذا اليوم اروح....
...............
_الله يساعدك اصيل
.... كلماتة جانت بسيطة مهزوزة..... مستحية
لاول مرة اركز بوجهة
جانت بنت عادية......
بكلشي حتى بابسط كلماتة
دخلت علية..... بدشداشة عريضة لونة احمر الهة نقش ممزوجة بالوان متعددة
دخلت ببساطتة
جانت كاعدة امهة..... وكعدت مقابيلي..
بديت احجي وياهة...
واني كاره نفسي..... لان عرفت مراح اكدر اسعدهة
مرتح اكدر انسة جوان
جنت اريدة تشبهة...... بكل شي
مرت اسابيع....
واني اريد اعود نفسي عليهة...... بس
.... معجبتني.... مااعرف
_اوووف ياربي... معقولة راح اخلص عمري وياهه
لتعاتبوني.... مكدرت والله العظيم مكدرت انساهة
مرات من اسولف وي سراب
احاول اتخيلهة هي
اتذكر عيونة..... خصلات الشعر الي نازلة من شالهة الرافعة بي شعرهة
لو كصيبتة.... الي توصل لحد خصرهة
.... حتى بيوم كتلهة سراب اضفري شعرج
... ماانكر هي جانت تتمنى مني حجاية...
تتمنى تخدمنى... جانت طيبة...... حنونة
اني متاكد لو اتزوجة راح اتكون ام مثالية لاولادي
... بس زوجة فاشلة الية.....
والسبب مني
_يووم طالع اني
_هااا يمة وينن رايح
_اريد ازور..... احس نفسي مخنوك
.... باوعت لام لاصيل وسكتت.....
جانت حاسة بي..... بس عدهة امل يجوز من يتزوج يرتاح ويتعود على سراب
.... جنت امشي فوك الجسر.... واني اباوع على النهر ومية العذب
ضليت صافن واني اتمنى تخلص هاي الحيرة الي بداخلي
مااكدر اكمل حياتي وياههه
ولا اكدر انسى حبي
كانما اني بنص النهر.....
لا اني اكدر ارجع لهذيج الضفة القديمة
ولا اني اكدر اكمل للضفة الجديدة
جنت تعبان.... ومحد يحس بتعبي الا الي مجرب عذابي
وصلت للبوابة الرئيسية للامام
بديت اسلم
بديت اشوف قبتة الذهبية..... بدت خطواتي تمشي بقوة
تمشي بسرعه
اريد اشكي الهة همومي..... اريد انفض عني تعبي
دخلت واني بدت اعيوني اتنزل دمعاتة...
بديت اشم عطر حضرتة...
بدت نسمات الهوه المميزة تدخل انفاسي
بديت احس نفسي خفيف...
وبدت ادموعي اتهل....... وتغسر عيون شافت الويل
اتقربت من شباكة...... وبديت ادعي
_يارب...... بجاهه امامي..... ياسيدي ومولاي.......
اريد ارتاح..... ريحني اريد حل لنفسي
اهديني لطريق الصحيح الي اخلص من هذا الحمل
اريد انساهة
حببني بسراب...
بديت اشكي..... واشكي بدت ادعيتي تنتهي واني مامنتهي من قربة
ابتعدت ورحت صليت.....
وجنت مرتاح.... حسيت بالراحة .. كانما راح ارجع والكة كلشي محلول
رحت اطلع وبديت امشي.... واسمع صوت يكول.... اصيييل...
التفتت واشوف صديقي
جواد....
ابتسمت الهة.....
_هلا بجواد... شلونك
اتقرب مني وباوسني.... وباوع علية وكال
_احترم نفسك... شنو جواد
_هههههه يالله.... ابو منو
_ابو جمال
_عاشت الاسماء
_بشرني انت ..... اتزوجت لا
.... صفنت علية....
_خطبت.
_اي يالله..... وشوكت ان شاء الله
_ان شاء الله قريبا
_ان شاء الله.... بشرني بعدك بالتريلة تشتغل
_لا.. حولت... فتحت اللبان
_خوش شغلة
_الحمد لله نعمة
_تعال احجيلي.... شسويت ماسويت
.... ضليت احجي الة...... هواي سوالف...
وجان هو يسمعني.....
بديت احجي واخذني الواهس... كانما اريد اطلع الي بكلبي... هو صديق قديم الية بس بعيد هسة....
يعني انكطعت اخبارة من شالو
كتلة
_اجيت اليوم لهنا متضايق....
_هو احنى اصيل من اتضيق بينة الدنيا نلتجىء لابو الجوادين
_اي والله ياجواد
_خير اشبيك اصيل.... اشو اشوفك مامرتاح
_مااعرف شكولك هواي سوالف صارت....
... بديت اشكيلة الي صار.... لاخر شي لحد مااني شفتة
الي جذب جواد من قصتي هو سالفة الحلم...
مااعرف اشو حسيتة راد يعرف اكثر
... صفن جواد... علية وكال
_هذا الحلم جان مستمر وياك
... اتفاجئت من كلامة وكلت
_اي تقريبا سنة ...... احلم بي...
بس هسة صايرلة اسابيع مااشوفة
_شنو هذا الحلم
.... بديت احجيلة الحلم... وهو مركز بية..
متعجب من تفسيرة
اما اني فجنت حافضة لان باستمرار اشوفه ومليت منه
جاوبني
_محاولت اتفسرة...... اتروح لاحد يشوفه الك
_لا..... لان مهتميت
_اشلون ماتهتم..... ماطول الحلم يتكرر يعني اكو شي
كانما ربك يريد ينبهك او يحذرك
انت اشلون عايف نفسك
_اشو جواد انت مهتم... لش بي شي
جاوبني
.... زين تعرف هذا الصوت شنو الي اتسمعة
_لا جواد.... مااعرف... وممهتم
... صفن جواد.... بحيث من صفنتة خفت حسيت اكو شي واني ماادري
_شكو جواد.... اشو خوفتني
_هاي الكلمات الي اجتك بصوت خفيف... هاي كلماات كردية.... بس مااعرف شنو تقصد
بس اني اعرف كلامهم بس المعنى مااعرفه
.... هو من حجة هاي الحجاية.... صفنت
اخذني كلامة....
لهذاك الطريق الطويل ..... لهذيج الاشجار..... لهذاك النهر والجبل
لهذاك المكان المميز بريحت الورد والعشب........ بالهوه الي يختلف عن بغداد
.... اخذني لهذيج العيون الي تشبة موجات البحر...
وخصلات الشعر الي تشبة شعاع الشمس
..كانما وكفت بية عقارب الساعة......
معقولة.... صوتة الي جان بالحلم..... وشنو هاي الكلمات...
.... باوعت لجواد وكتلة
_تعرف واحد كردي....
_اي اعرف..... ليش...
_اريد اعرف شنو هاي الكلمات....
_وليش هسة... حبيت تعرفة...
_مااعرف جواد... كانما انت نبهتني لشي
............................
.... وصلنة لصديق جواد الي جان كردي....
اتقدم منه
ودك الباب... بدة يسلم علية....
احنى جنة محضرين شنكول اله
_اشلونك جعفر
_هلا والله بجواد..... انت شلونك
_بخير الحمد لله
_اكولك.... اكو شغلة اكو كم كلمة كردية اريد معناهة...
اكو... رسالة مكتوبة بالعربي بس كانما كردي...
بس منعرف معناهة
_وين الرسالة
_نسيتهة بالبيت... بس حافضهة
.... بدة جواد يحجي الكة الكلمات الي تقريبا خمس كلمات...
_ههههههه هاي شنو جواد
_هااا شكو
_لا بس ممفهومة.... معنى الكلمة...
"""""""لتدخل للضلمة...
ارجع للخلف""""""""... وباقي الكلمات مااعرفة لان مو كردية عبالك حجي مخربط
.... اني جنت واكف مصدووم..... كانما اني كاعد احل لغز...
وهذا اللغز هسة يالة كدرت احلة
بدون مااحس... صفنت وبديت امشي...... وعفت جواد وراية اتمنيت هسة ارجع للبيت بسرعه
.... كمت اتذكر كلشي جانت خطواتي الثكيلة بيوم الخطوة..... واني امشي
نفس الخطوات الي جانت بالحلم
كمت اجمع الحلقات المفقودة..... و
ومن اتقدمت.... حسيت نفس الاحساس بالخنكة مثل الي حسيتة بالحلم
ومن ردت ارجع.... ليكيت وراية حايط
ويوم الخطوبة.... من ردت ارجع جانت واكفة وراية سميرة ومنعتني ارجع
كل هذا........... جان رسالة من الله الية واني مااعرفف...
وكفت من بعد الدوخة الي صابتني
فتحت عيوني بقوة......
_جواااان........ منتظرتني
يتبع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!