رواية قمع المشاعر الفصل العشرون 20 - بقلم Rozaya1122

قمع المشاعر.... البارت الحادي والعشرون..
للكاتبة زهراء ( روزايه)....

غيّمت والليل چلچل
والخواطر سيّرت ويّه الغروب
وگوطر ابروحي الحنين
اشمالهه ويه الليل من يگبل تلوب
وچني شمعه وذابت بحظن الصواني
اشباقي بيّه؟ البيّه ع البيّه يذوب
.....

فاديه ... رجلج السابق اسمه عزيز جاي عليج !!
قبس.. اريد استوعب اسمه الي جاي تحجي حجيت بتعجب وعلامات دهشه ع وجهي عزيز!!
فاديه.. اي بسرعه روحي بدلي لان من زمان كاعد ينتظر وبس جدو يمه بابا بالدوام

قبس.. رحت للغرفه ابدل وعقلي تشوش شعنده عزيز شجابه بعد هاي الاشهر كلشي ينذكر من ناحيتهم يتملكني القلق والخوف بدلت ولبست عبايه اسلاميه فوك ملابسي وطلعت جان البيت هادى محد اكو

بس شافني جدو بالباب صاح تعالي قبس جان عزيز منطيني ظهره كلت السلام عليكم وطبيت بس جنت احس نفسي موتمام بوقتهه وكلساع الزم التخم لان اشوف المكان يدور بيه

الحجي.. قبس بنتي هذا يسمى طليقج ومامن حقه يجي ويطالب يحجي وياج لان رجال غريب ومانسمح بهالشي بس صار بحدود الساعتين ماخله امام مايمشي علينه حته يحاجيج وهاي اني كاعد وبحضوري خلي يحجي

قبس.. اباوعله متفاجئه بي هذا عزيز!! شاب انيق معدل نفسه الشعر شلون اللبس شلون راقي الموبايلات اثنين كدامه من ارقى موديل حته انصدمت بي !!

عزيز.. شلونج قبس
قبس.. شعندك جاي اكوشي بيناتنه؟؟ حته جاي لبيت جدو شعندك عزيز؟؟
عزيز.. اريد احجي وياج وماتنطين مجال رحت للشركه واصلا ماسمحو لواحد يدخل بدون هويه واتصل عليج من كوم ارقام تحضريهن لان ادري بيج ماتجاوبين ع الرقم الغريب ويمكن حته الرساله ماتقريهه

قبس.. فعلا اني تتصل عليه ارقام هوايه كل اتصال احضر وحته رساله ما اقره انطي مسح للكل لان ماعندي احد مثلا خاف امي او اختي اوصديقتي الحمدلله مقطوعه من شجره جليت صوتي كتله وهسه شرايد؟؟

عزيز.. اني اعترف تعبتج وانتي بعدج شابه وماشفتي مني غير بس القهر بس هسه اموري تحسنت ورحت للجيش وما اجيتج قبل لا بنيتلج بيت واثثته كامل واني جاي اطلبج من جدج حته نرجع واواعدج تعيشين معززه مكرمه

والتفت على جدو حجي اني مرتي احبهه وقبلت اطلكهه حته تخلص مم الفگر والضيم مالتي بس هسه علمودهه غيرت حياتي بس حته ارجعهه

الحجي.. يا ابني كلامك مامعقول انت افرضهه متزوجه يعني انت موتاخرت هواي
عزيز.. لا حجي قبس اعرفهه زين اني وياهه ربينه سوه من لحدما تزوجنه اعرف نوعيه قبس شنو؟؟

قبس.. جان يحجي بمنتهى اللطافه والهدوء ولاهذاك عزيز ابو الشرب والريحه الي يشوفه يغمني الف مره لان عفته شكد ما اوصف التغير البي اكون مقصره

عزيز.. قبس فكري بالموضوع والله اعيشج ملكه
قبس.. عزيز اسمعني زين تدري بيه مثل ماجنت تسميني انت ودكول عليه مخبله ولحد الان اني هيج اذا عتبت هذا البيت لو شوفتني وجهك ماتعرف شسوي لاتدخل بخطيتي لان اني مليت من عيشتي القذره الوياكم وهسه بهاي الاشهر اشتميت هوه نظيف ماارجع لذاك المستنقع

عزيز.. والله مالي علاقه بساجده بالصدفه اشوفهه حته شلت من يمهه قبس سبحان المايغلط غلطت وصححت غلطتي اني احبج تدرين بيه احبج ولوما احبج ماعفتج بهذنيج السنتين اني اريد كلشي يريحج

قبس.. كمت وكفت كتله اخر كلام عندي اذا اجيت مره ثانيه وحاولت تتصل بيه اني برجلي اروح ابلغ عليك والتفتت ع جدو كتله هاهي جدو ماعندي شي اكوله بعد من رخصتكم

طلعت من الاستقبال والعن بحظي الي ماجاي يستقيم احسه مثل شجره ومايله كلما حاولو يعدلوهه حته توكف شامخه تجيهه عاصفه تهدهه للكاع

سالتني ام بشار شيريد سولفتلهه بس لان شافتني مالي خلك واني دايخه مدري شبيه ماحجت حته بيومهه غده ماتغديت وجريتهه نومه ماكعدت غير الاذان يأذن كمت صليت وطلعت اساعدهن بالعشا جنت ساكته او اكو قلق بداخلي عزيز صارت عنده فلوس وخاف ياذيني!!!

كملنه العشا واني حته ماكعدت يمهم بسرعه للغرفه جان بشار بعده ماجاي تقريبا الساعه ب١٠ كاعده اتابع تلفزيون اجتني رساله من بشار مكتوب بيهه باجر لا اداومين؟؟

استغربت ليش ما اداوم واصلا باجر عدنه شغل هوايه لان اكو تصدير ماعندي رصيد ادزله واكله ليش كمت من فراشي لبست حجابي وصعدت لغرفته دكيت الباب هوايه محد جاوب حته ماتجرأت وفتحتهه خليت ونزلت...

تلكتني فاديه كتلهه وين بشار كالت برا بالحديقه!! طلعت للحديقه شفته كاعد هو وعمو عادل وجدو وملتهين يسولفون بس لمحني عمو صاح تعالي قبس على صوت عمي التفتت هو..

نزلت للحديقه كعدت يمهم جانو فارشين بالكاع كعدت بصف جدو صار بشار كدامي!!
عادل.. بنتي هسه ابوي الحجي حجالنه على سالفه رجلج وانريد نعرف رايج شنو؟؟

قبس.. اجت عيني ع بشار جان طابك المخده ومرتجي على ايده اليمنى والجكاره بيده اليسرى يدخن ويباوعلي

انتبهت ع صفنتي كتله عمو رأي هو نفسه لواريده ماطلكت؟؟
عادل.. بس جدج سال هواي علي وفعلا بيت وسياره والرجال متندم ويحبج وحسب كلامه يكول مايوم مديت ايدي عليهه؟؟

قبس.. صح مايضربني بس اني تعبت من هذيج البيئه مااكدر ارجع وبلاساس اني مااحبه تزوجته حته لاتحجي عليه الناس لان يوميه عايشه بمكان جنت احجي ويتناقشون وبشار ع سكته بس يباوعلي..

عادل.. شوفي بنتي الله شاهد ماتفرقين عن شجن بكد الشعره بس احنه هم اهلج وبمثابه ابوج اذا تحسين نفسج تكدرين تحجين هاي كدامنه اريد تحجيلي الماضي مالتج شلون عشتي من بعد وفاه ابوج من تكفل بتربيتج

قبس.. بلعت ريكي ودنكت عبالهم الماضي مالتي فدشي مايدرون خلصت عمري حابسه نفسي بالمخزن كتله شحجي ؟؟

عادل.. من ماتو اهلج لحد مااجيتي يمنه انريد نعرف شلون عشتي واعذريني يابنتي ترى جدج ابو امج هو الي زرع هالشي بينه جان يحجي عمو ويباوع لبشار

قبس.. راح احجيلكم من ماتو اهلي كالولي انتم الي كتلتوهم لذلك حقدت عليكم واني جنت اسمع بابا هوايه يذمكم ويكول اهلي بس اروحلهم يكتلوني بس ع حياة بابا جان مايخليني اختلط حته صديقات ماعندي ولا يخلينه نروح لبيت جدو
بس جانو جيرانه عزيز وامه وعزيز اكبر من عندي بسنه علاقتنه قويه بيهم وبحكم هو يتيم وهي ارمله ومره جبيره عادي يجونه وماما تروحلهم يعني بس هالجار عدنه وعزيز صديق اخوتي الله يرحمهم وجان حيل مؤدب يطلع يشتغل حته يجيب علاكه لامه يعني موهذا عزيز الشفتو

ماجنت اعرف اي شي عن وضع اهلي ليش انتم ماتريدوهم وليش بابا دائما يكولون علي العاق وحته ماكدر اساله ومن اسال ماما تكوم تبجي وتسكتني لحدما بيوم هي حجت كالت اهله ماقبلواا علينه بس هيج كالت بس لهاي اللحظه ما اعرف ليش بابا جان يعامل ماما معامله اكثر من السيئه وهي ساكته ومتحمله

بعد ماانهزمت من عدكم رحت لبيت جدو شفت العجب واني مراهقه دنكت راسي ماكدرت احجي اضغط ع نفسي واكول احجي كوه طلعت من عندي كتلهم جانو يجونه ناس كبار بالدوله وراد يبيعني عليهم واني انهزمت لساجده

بشار... من كلت هيج حط الجكاره مردهه بماعون الجاي الكدامه وحجه بنبره غضب وانتي اذا تعرفين ماضي جدج وين موليه انهزمتي من عدنه

قبس.. ما اعرف شي عنه لان بابا مايخلينه نروحلهم عبالي يكرهه بس مومساله اخلاق من كبرت وعشت يمهم يله عرفت معدنهم
عادل.. خلي نفتهم منهه يابويه كملي بنتي

قبس.. هذا الحجي ورا سنه من انهزمت من يمكم وبعدين اخذتني ساجده ماانكر رادت تصرف مثل جدو بس اني جنت هجوميه بشكل حته مره ضربتهه بالسجين كلما تحاجيني اروح ابلغ عليهه وشكم مره اخذوهه لذلك تابت من عندي

بس جنت احجي لام عزيز وهي خطبتني لعزيز وساجده انطتهم نص من بيتهه وتزوجت عزيز حته محد يكدر يسويلي شي والباقي تعرفو عزيز ورا ماتوفت امه صار يشرب لحدما اجيتو اخذتوني وبخصوص التربيه محد رباني ترى اني جنت جبيره عمري ١٦ سنه وماردت اصير مثل خالاتي لذلك اعتمدت ع نفسي واكثر وحده ساعدتني وعلمتني الصح والغلط هي ام عزيز

عادل.. فرك وجهه وكال والله ياعمو الواحد مايعرف شيتصرف الراي الاول والاخير الج ماقابله بعزيز هاهي عبالنه مرته وتريدي؟؟

قبس.. لا مااريده وظليت ساكته
عادل.. يابه كوم انام وراي دوام وانتي عمي قبس سدي الموضوع..
قبس.. ردت اكوم بس اشرلي بشار براسه اكعدي وهو ع نفس كعدته

راح عمو وجدو واني صرت كدامه بس ما اعرف ليش جان عصبي كلت اغير الموضوع؟؟ سالته ليش باجر ما اداوم؟؟

بشار.. اكو لجنه صيانه للحاسبات وانتي شغلج ع الحاسبه يعني ماكو..
قبس.. رفعت راسي باوعتله جان لابس بجامه سوده وتشيرت ربع ردن ابيض وبي كتابه سوده ع الصدر

التقت عيونه وهو مركز بوجهي لحظات جان يكول اسالج سؤال وجاوبي بصراحه كتلج مره اكثر ما اكره البنيه الي اتجذب

هزيت راسي جان يكول بغض النظر عن عزيز او غيره هم حبيتي سابقا؟؟

قبس.. شيقصد غيره يعني عباله اني كل اليجي اباوعله واحبه لوشنو؟؟ كتله شتقصد شنو عزيز اوغيره؟؟

بشار.. يعني هم حبيتي بحياتج عزيز حبيتي؟؟ غير عزيز؟؟
قبس.. لاماحبيت ولو احب عزيز اتحملته وجان هسه رجعت ويااا؟؟

بشار.. لاتزعلين مني بس ماجاي اصدكج ابد مرات هاي عيونج توهمني !!!

قبس.. شتقصد انت اني اجذب عليك؟؟ ترى محد يجبرني اكعد اصفط جذب حته تصدكني وهالشي راجعلك صدكت والا لا؟؟ يدق الگلب بالهدوء مالته احس روحي اشتعلت نار اني عصبيه من طريقه كلامه وهو ينرفز المقابل بهدوءه  جان يكول وشبيج ترجفين؟؟

قبس.. ما ارجف بس طول ما اني احجي انت مبين عليك مامصدك شوف ابن عمي الي كدامك مايوم باوعت بوجه واحد وكلت حلو ولا بيوم حطيت راسي ع مخده وفكرت بشخص كل حياتي الي عشتهه بس علمودين اثنين شلون اكمل دراسه وشلون آكل بس وحته لسه ما اعرف شعور الحب شلونه!!

بشار.. ترى جاي ترجفين شوفي ايدج!!
قبس.. باوعت ع ايدي فعلا ترجف هو اني هيج من واحد يشك بيه او يذكرني بالماضي مدري شيصير بيه ضميت ايدي وكتله لا ما ارجف ..

بشار.. يعني هم اتجذبين؟؟ موهاي كدامي ايدج ترجف شوفي حته شفايفج رجفت؟؟

قبس.. كل كلامه بقمه الهدوء واني مدري شبيه ماجاي اسيطر ع رجفتي الافضل اكوم هستوني اريد اكوم جان يكول هااا انهزمتي؟؟

قبس.. انت شتريد من عندي اعرف مامصدك كلامي لاتصدك بس ثق بالله هاي الكدامك حاربت الدنيا وشافت الويل بس حته ماياخذوني بذنب خالاتي ارتاحيت هسه؟؟

كمت من يمه من كلت ارتاحيت جان يجيني صوته يكول لااااا هي عيونج هاي ورجفتج اتجيب الراحه؟؟

ماكدرت اوكف ابد ولا التفت علي واشوف وجهه بسرعه طبيت وبوجهي لفراشي همزين محد بالغرفه جان سالني ومالي قابليه اجاوب اشد ع ايدي شجاني رجفت موحجيت طبيعي ويه عمو ليش بس سمعت صوته هيج صرت وفوكاهه لاحظني  اغمض بعيوني واحاول افرغ دماغي من الافكار السوده حته انام بيومهه تعلعلت يله غفيت

شجن.. اليوم خطوبه عمر بس لاحفله ولاهوسه اهلهه ماقبلو حته مشيه مال زلم ماقبلو كالو بس انتم واحنه البنات ولا وحده راحت كالو بس ام العريس وكلما نحجي عليهه ماما ماتقبل 

شكد حجت هدى ع ماما شلون هيج وعمر اول عريس عدنه؟؟ بس خاله البنيه متوفيه ماصار شهرين واحنه منا رجل عمه بسمه وصارت سكته ماحسينه باي اجواء بس من اجه عمر باركناله طولت خطوبتهم تقريبا ٣ اشهر ماشفناهه ولا اجتنه وحته عزمناهه وما اجت..

قبس.. من بعد اخر حديث بيني وبين بشار ماحجينه غير السلام وبلاساس مايتواجد حته بالشركه اجته ترقيه وكام يروح ندوات يوميه بمحافظه وكام يغيب عن البيت ايام ومن اسال بالشركه كالو ماتدرين مسافر صار سفره هواي كل اسبوع لويداوم يوم لوماكو

دوامي بشركه حيل هادىء ما اتحرك من مكاني بس للضروره ومتونسه ع سوالف عاليه وسناء ومن ارجع للبيت بعد اهدء لو نوم لوتلفزيون وبهاي الفتره عمو قرر ياخذ شجن يسويلهه مسند لرجلهه

جان شهر العاشر سنه ٢٠١٢ اخذ شجن عمو عادل لتركيا وظلت بحدود ٢٠ يوم واجو مخليلهه مسند وتكدر تمشي وتكوم وحدهه بس مبين ع كف رجلهه واكف وبي انحراف بس احسن من قبل...

بدينه نحضر ع عرس عمر الي كان لراس الشهر نهايه شهر العاشر واكو شغلات بسيطه بلبيت من ترميم وصبع لغرفته

اخذت اجازه حته اساعد البنات بشغل وحته فاديه دوامهه مومستمر لان جان بدايه دوام وتكدر تغيب يوميه نشتغل لمن نوكع ع صفحه وام بشار مثل المقاول واكفه ع راسنه ماتريد هلكد مامنظف حته الي منظفي قبل اسبوع عدنه التنظيف مالته...

جان اخر شي غرفه بشار وهالمره عجبني افوت ويه فاديه لان هي تنظف وهاي اول مره ادخل غرفته هذا الحجي جان بليل  وهو طالع...

مابيهه شي جانت نظيفه بس بدلت الفرشه وجانت غاسله البرده ورجعنه صعدناهه كعدت ع جربايته واني اباوعلهه بكل تفاصيلهه جانت هادئه حيل حته الوان الصبغ مالتهه ولون الفرشه كلشي بيهه هادىء وتعكس شخصيته

فاديه.. قبس راح انزل اجيب منظف مال اخشاب ووصله هاي البيدي صار بيهه مي وانتي بين ما اجي لبسي المخده الوجه مال الفرشه

قبس.. طلعت فاديه واني لبست الوجه مال المخده وسحبتهه اشتميتهه عطره ممزوج بيهه عدلتهه ورحت للميز جانت ساعته ع الميز اخذتهه شفتهه جانت ب١٠ وربع

رتبت العطور جانن ٥ كلهن فتحتهن اشتميتهن ولا واحد من هذا الي يخلي واصلا الي مخلي تايه عليه ممزوج بريحه جكاير بحيث بس يفوت للبيت اشتمه لان قوي..

بعدني واكفه فاتحه العطر مامكتوب كلشي علي مبين تعبئه وانفتح الباب عبالي فاديه التفتت واشوفه بشار بسرعه نزلت العطر وابتعدت عن الميز

حاجاني وهو يخلي اوراق مال تصميم مدري شنو كبار بزاويه الغرفه اليوم بغرفتي شعجب؟؟

قبس.. دا انظف بيهه اني وفاديه وهي راحت اتجيب المنظف اباوعله شلون يمشي بالغرفه راح للكنتور اخذ تشيرت ورجع التفت عليه جنت واكفه بنص الغرفه

بشار.. باجر اداومين؟
.. لا اخذت اجازه اسبوع
.. منين اخذتي اني مديرج ومامنطيج؟؟
.. لا اخذت من استاذ حسين جنت مسافر انته
...ممم راح اروح اسبح اجي الكاجن مكملات ترى تعبان

قبس.. كتله ماشي وحجيت بصوت ناصي هو انت خلصت عمرك تعبان ؟؟
بشار.. شكلتي ولج ؟؟

قبس.. ماكلت شي؟؟
... ليش تجذبين؟
.. ما اجذب بس كلت دائما انت تعبان يعني مو بالضروره لازم اكولهه بوجهك ليش عندك الناس كلهه تجذب

قبس.. التشيرت مخلي ع اكتافه وهو يتقرب عليه واديه بجيب البنطرون وصل قريب عليه جان يكول اسمعج تحجين عليه ليش تحجين بگلبج احجي بوجهي ؟؟

.. وين حاجيه عليك؟؟
... اكلج شي؟؟ اكره هاي المراوغه الي بعيونج

قبس.. اغم نفسي الي ماكدرت اتجاوبه وظليت ساكته وهو من شافني سكتت طلع بسرعه وفاديه مدري وين ولت عفتهه ونزلت لكيتهه كاعده تاكل صحت بيهه جان تغمزلي هاي ما اخلص منهه وخاف تفلتهه كدام امهه سكتت

ثاني يوم رحنه ويه ام بشار اشترينه ملابس اني اشتريت فستان عدل مخصر ع الجسم يوصل جوه الركبه بس اردان والكصه مالته من فوك دائريه ويم اكتافه نفخ لونه زيتوني

اليوم الحنه مال عمر وعندي احساس غريب حيل وما اعرفه شنو زين لوموزين ماراح تعدي ع خير قدر الامكان حاولت اتجنب كلشي شفت ناس اول مره اشوفهم خالاته وخواله وبناتهم وكرايبهم مادري منين طلعوا هلكد

بحيث من الصبح اندك شغل لحد ٢ واني ماكدرت اطلع من المطبخ هدى وام بشار مايلحكن وحته نسيت نفسي لا سويت شعري ولا رحت للصالون والبنات كلهه راحت ...

الحفله ب٤  واني كلشي مامسويه اجتني هدى كالت روحي للغرفه سوي شعرج اني هنا لان كلهه بالصالون..

رحت للغرفه واريد مكان اوصل بي للكنتور ماكو والمصيبه كلهه ماعرفهه اخذت الشسوار وشغلاتي ورحت لغرفه عمو عادل بعد اتعس صارت بوجهي ام بشار كالت صعدي فوك محد اكو بشار مايجي...

صعدت فوك سديت الباب محد اكو بس الجهال يلعبون ع السطح كعدت كدام المرايه جبت كرسي من برا وبديت اسوي شعري اني بس شعري ماعندي شي وكلت من انروح اخلي مكياج...

كملت شعري ورفعته بالقراصه وطلعت الصبغ كمت اصبغ باظافيري كملتهم ارتاحيت ماعندي شي بعد بس اخلي مكياج باوعت لساعه ماظل شي بسرعه بدلت وتمكيجت ويمي عبايه اسلاميه كلت البسهه وانزل

بعدني لازمه قلم الكحل اريد اعدل عيني وما احس غير الباب انفتح بقوه وصوت بشار عالي وهو يحاجي بعمر وامجد يكله استعجل ترى جماعتك جايين..

كمزت من مكاني مثل المفزوعه وهو لازم اليده مال الباب وصافن عليه هي لحظات وكصني كص من فوك ليجوه عينه تصعد وتنزل ع طولي  ..

بسرعه رحت لجربايه واحجي ويا بشار اطلع خلي البس جريت العبايه الاسلاميه اريد البسهه وما اشوف غير يسد الباب ويتقرب باتجاهي ضاع عليه راس العبا افوت راسي بردانهه واشوف رجلي قريبه عليه

لزمتهه خليتهه ع صدري كتله بشار ميصير اطلع خلي البس بس ما انكر ارتباكي بهذيج اللحظه  ؟؟
بشار.. لايصير شو خليني اشوفج ومد ايده ع العبايه سحبهه مني وشمرهه ع الجربايه

قبس.. موقفي فدمره ما اعرف شسوي من شده الارتباك تحركت من كدامه اريد اطلع حايره وين اولي وعمر وامجد فوك بس كتله الله عليك ميصير هيج اطلع خلي البس

بشار.. شبيج انخبصتي مثلا ماشايف شعرج قبل موجنتي مومحجبه؟؟
قبس.. اي جنت يله بشار .. يحجي ويتقرب واني ارجع ليورا ما اطلع اريد اتمعن بهندسه الخالق واشوف هالابداع هذا !!

رجليه صارن خيوط استحيت من لبسي لان ضيك حيل وراسم جسمي رسم  انمدت ايده ع شعري الجان نازل ع اكتافي ووخره ليورا وكانو متعمد يطلع جزء من ركبتي..

عينه تتجول ويتمعن رفعت راسي علي اجت عيني بعينه ظليت اباوعله واركز بهاي العيون الحيرتني شتريد من عندي بالضبط؟؟ باطراف اصابيعه الثنين السبابه والوسطى حركهن على خدي بسرعه غمضت واستمر بحركتهن ع عيوني واحس بيهن وهن يلامسن جفوني..

كلبي وعقلي وكلشي بيه انتهى اريد بس اسيطر ع نفسي ما اكدر واني مغمضه واحسه بقربه من انفاسه اخذ نفس عميق حته استنشق عطره حسيت بقربه يم اذانه

بشار.. شنو رأيج اخذج هسه واعقد عليج ويصير العرس عرسين؟؟

قبس.. بسرعه فتحت عيني ورجعت ليورا بس بعدني اباوعله اريد اكله شتحجي انت؟؟ بس افتهم حركتي
بشار.. البسي يله وانزلي بسرعه ولا اطلعين هيج ابد منا لمن تروحين
قبس.. لا حجيت ولا فتحت حلكي بحرف بسرعه لبست العبابه واخذت الملابس مخليتهم بعلاكه ونزلت ياربي وين اروح كلهه تباوعلي وعبالك وجهي بي شي لو كلهه تدري بالصار فوك

جنت واكفه يم الدرج اريد اروح للغرفه كلت حتلو متروسه نسوان بس ايد انمدت ع كتفي التفتت عمه بشرى ضحكت بوجهي كالت تعالي  لغرفه امي مشيت وراهه ورجليه ماتساعدني احس لمساته مثل النتلات الكهربائيه...

بشرى.. فوتي شبيج مفزوعه
قبس.. حجيت بتعلثم لامابيه شي!!
بشرى.. بشار مووو؟؟

قبس.. لا اليوم موعرس راح اتخربط بي وين اودي وجهي ياربي اول مره اجرب هيج شعور حته اريد ابجي سحبتني من ايدي وكعدتني  ع الجربايه..

بشرى.. اعرف كلشي اني وبشار هيج اشرت باصبعهه عود اصدقاء ادري بي معجب بيج وادري صعد فوك وانتي بغرفته اسمعي قبس عمه بشار صعب حيل لاتشوفي هذا الهادىء ماتعرفين الي بداخله شنو؟؟

الي اريده من عندج اتصبرين علي هو رايدج ومعجب بيج حيل وانتي بنت عمه بس اكو حسابات حايله دونه وهاي مااعتقد تنحل بيوم وشهر ويجوز ع ساعه ماتحسي غير جايب الشيخ وعاقدلكم

قبس.. اني!!!...
بشرى.. لاتحجين شي ادري بيج هم تحبي بس كل هذا ماريده يبين ترى فرح تحبه بجنون ومستعده ادمرج اذا عرفت يابنتي حافظي علي ولاتبينين ع نفسج

صفنت بوجهي ماشاء الله هيج شافج بشار راح تخبلين هالرجال بهاي العيون المفتونه ماسامعته يوم يحجي بغزل وخليتي يتغزل بعيونج هسه لازم نترحم لامج ع هاي العيون

قبس.. صرت بموقف لا اخذ ولا انطي من الخجل وكلهه تراكمت اليوم بشار يحبني؟؟ ما اعرف هذا الشعور ولا اعرف شنو الانسان اذا حب وشلون يبين ع تصرفاته لذلك جنت ماخذه نظره  عباله سهله ويضحك عليه

رحنه للحنه وطلعت ويه عماتي لكيت البنات كلهن هناك دك وركص وحفله تخبل والعروس شكلهه زين بس جامده واصلا مسويه دائره وحدهه وكلما وحده من عدنه تتقرب يمهم عينك عينك تطردهه وعبالك تحالف مسويه

اخر شي فاديه ماسكتت كالتلهه عيني عليمن سويتي حنه من الاول حطي صديقاتج وطبلي وحدج؟؟

صابرين... حياتي ركصكم اوفرر وميعجبني وتخربون علينه الركصه عادي اخذو راحتكم وركصوا بعيد وتجر بكلامهه.

فاديه.. صدقه لامج !! حرامات فلوس الصالون التفتت علينه كالت يله انروح خلنهه ويه امهه

انريد انسكتهه ماكو سحلت النسوان كلهه وطلعتهه بالطرمه وترجع تباوع خاف وحده بقت من كرايبنه وهم اهلهه متعجبين ظلو مابيهم عشره وامهه تركض ورانه وتتعذر بس ام بشار هم ضاجت وكلنه رجعنه اقل من ساعه.

كوه كدرنه نفوت من الزلم وبس طبينه انهدت فاديه وامهه تسكت بيهه طب عمر جان دكله ماتستحي هيج تحاجينه عديمه الذوق خاف دكول اخواتي وحق الله الساني مايطخ ع لسانهه اول مره انشوفهه وهيج تقلد ع بناتنه هي احلى من عدنه منو بينه قاصره جمال

خطيه عمر ظل بموقف محرج شفته اخذ تليفونه وطلع يخابر بعصبيه وام بشار رجعت ع فاديه دكلهه ليش كتيله

فاديه.. ماشفتيهه هالرعنه باذني سمعتهه تقلد عليج وع شجن احسن من عدنه هالفارغه فرح طالعه تخبل ويضحكن عليهه وع قبس ودكل لامهه ماما هذولي عربان؟؟

احنه عربان ابنآ عن جد احنه بغداد لان مانتعيقل مثلهه ذاك اليوم اجت من ازبل مناطق بغداد وكاعده تحجي هيج

قبس.. وام بشار حيل انقهرت لان اخواتهه انتقدن العروس وهن اخوات ام بشار قمه بالثقافه وحته وحده من اخواتهه دكتوره يعني عائله راقيه والعروس قللت من شأنهم

بعدنه مهوسين جان اطب ام العروس تملخ بنفسهه وتصيح الحكيلي ام بشار

عمر كال لصابرين ظلي يم اهلج وحلف مايجي يزفهه وباجر ماكو عرس وحته كال لابوهه خلي بنتك عندك...

يتبببع... متابعه شيقه

عمري انتو بالنسبه الي يسالون القصه طويله وشكم بارت بعد؟؟ ما اكدر احدد واني مقرره ما اختصر من عدهه ولاحرف ولحدالان احداثهه مستمره اتوقعوا تكون طويله