رواية قمع المشاعر الفصل الثالث والعشرون 23 - بقلم Rozaya1122

قمع المشاعر.... البارت الرابع والعشرون..
للكاتبة زهراء ( روزايه)...

اجه اليل...
وبدت تتراوح -الصفنات.....
وعساهن لالفن......
صفنات الفراك..

قبس.. بكيفكم جدو خلي يجون حجيت هيج وهو مابدر من عنده اي ردة فعل شكد تمنيت بلحظتهه يحجي يكول لا !! حسيت بخيبه امل رغم اني صح حبيته ومعجبه بي بس موذاك الحب والتعلق بس كلشي بي يعجبني

بشرى.. هااا يابه هسه هاهي باجر ام بشار يجون العصر خاف مااكدر اجي وياهن بعد انتن تفاهمن والولد خوش ولد ومتعين ويدرون بيهه مطلقه بس كالت يشوفهه

ام بشار.. هاهي داده خلي يجون وان شاء الله خير احنه هم انريد نفرح بيهه بنيتنه هي
قبس.. ماكدرت اظل كاعده واني اشوفه ملتهي يسولف ويه عمو عادل رحت للغرفه بس اريد هوه رغم ماجان الجو شهر ١٢ وبارد بس الحراره تطلع من راسي

افتر بالغرفه اخذتهه طول بعرض ليش هيج تصرفه يضحك عليه شنو هاي التصرفات السواهه اني اظل عرضه يعني ناوي يضحك عليه بس الصوج موبي بيه اني ويني وين الحب وشلون امن بسرعه واعيش ع امل ويطلع سراب...

كعدت ع جربايتي واهز برجلي من التوتر مستهظمه حيل وضايجه ع نفسي ليش عشت ايام حلوه افكر بي وباعجابه احمد الله ماتعلقت بي وعشت علاقه حب وهيج يطلع

انفتح الباب عمه بشرى لابسه عباتهه تريد تروح سدت الباب وهي تتلفت وكفت كدامي جان دكول ظلي ع رايج مالج علاقه
قبس.. شفتي عمه يعني ماكلف نفسه بحجايه وانتي دكولين يحبج!!

بشرى.. هسه اريد اروح بس اسمعي قبس بشار صعب وكتلج من البدايه ترى يتعب واحفظي هالشي ترى شكاك بس ياكل بروحه مايبين علي وترى اني تعمدت احجي كدامه اريده يتحرك بس صدمني اكثر من عندج من شفته ساكت انتي ظلي مصره ع رأيج وياعمه مدام ماحجه وبين موقفه انتي شابه وحلوه تجيج قسمه زينه اتزوجي مدامج ع البر وماتعلقتي بي هو الخسران اني راح اروح انطيهم خبر والبي خير الله يقدمه

طلعت عمه بشرى بس احس نفسي مختنكه كلساع اخذ نفس عالي وازفره كلبي يوجعني ليش املني بنظراته وبكلامه الغلط من عندي صدكت بي لان اول مره اعيش هيج شعور لذلك جنت افرح بكل تصرف من عنده

مددت وتغطيت واني افكر بمصيري مامتقبله فكره الزواج بس هاهي ماعندي اي هدف بالحياه وهم مواهلي حته يتحملوني احسن شي اقبل اذا زين ومناسب وحتلو مااحبه الحب يجي بمرور الايام

سمعت الباب انفتح فاديه وصاحت قبس قبس ادري تريد تحجي وياي واحتمال دكلي لاتضوجين لان اخوهه موبس خذلني خذل الكل عبالهم جان يحبني من صدك!!

ثاني يوم العصر اجت عمه بشرى من وقت لان متفقه وياهم تجي قبلهم لان من طرفهه واني اخر يوم الي اجازه يعني باجر لازم اداوم بس ما اطيق نفسي كاعده ومخليه المخده بحضني

بشرى.. كومي عمه البسي شي حلو بس يجن يحجن هن شايفاتج بس فشله من عدهن ما اطلعين
فاديه.. عمه اخاف احجي وتجيني كفخه من عندج بس انتي مستوعبه اليصير مو ع اساس بشار رايدهه ليش ساكت؟؟

بشرى.. والله يابنتي علمي علمج اني اقرب وحده اله وحجيت ويا قبل وكال قبس من صغرهه ابالي بس صار الصار وطلعت من عدنه ورجعت وهسه داخله براسي بس شويه عندي حسابات ع ماضيهه ويريد يتاكد بعد الصار شنو وخلا سكت اني تعمدت احجي حته نسمع رايه بس والله صدمني ومن رحت دكيت عليك ردته يحجي شي مافتح الموضوع

قبس.. عمه اني ماحبيت بشار وتعلقت بي بس ما انكر انعجبت بي وبديت احس بشي اتجاهه بس بعدنه بالبدايه ماتصدكني اذا اكلكم حته احساس الحب مااعرفه شنو والله طول عمري ماحبيت ولافكرت بشاب بس مقهوره ع حالي لان مثل ماانتم متأملين اني هم خلاني اتامل بوهم

فاديه.. شوفي قبس يجوز لو وحده بمكانج ترفض لان تأملت بنظراته بس انتي بهذا تصرفج ثبتي صدك قويه وتكدرين بسرعه تتجاوزين الصعوبه حتلو تأذيج واني اكلج اقبلي لان اخوي ماعنده سبب مقنع متمكن ومتعين وعمره جبير هاهي وانتي كدامه شنو الي يمنعه ؟؟

بشرى.. هاهي امي الله يقدم البي صالح لاتهتمين انتي حره راح يجون واتعرفي عليج وهم شوفي الولد اذا اقتنعتي شوفي حياتج وكوني عائله المايريدج ربح لاتريدي خساره..

قبس.. كمت بدلت لبست بنطرون قماش وفوكا قميص وسويت شعري ذيل حصان واكفه اخلي كحل بعيني وسرح بالي بكلمات بشار من كالي شلون بهاي العيون؟؟ واتذكرت بالعيد من كال الي يصبح بهاي العيون شلون مايفرح !!

وما احس غير قلم الكحل يبط عيني ذبيته من ايدي وصحت فاديه تلحكلي بالمي انعميت كام تذب دموع وحته الثانيه اريد افتحهه ما اكدر غسلتهه وظليت مغمضتهه والناس ع جيه شيكولون شبيهه عينهه كله من ورا هو السبب متعود الظاهر يتغزل بكل بنيه يشوفهه ولا الوم فرح لوماشايفه مجال من عنده!!

شويه كدرت افتحهه حمره حيل بس بدت تبرد طلعت كعدت بالهول كاعدين كلنه وعمه بشرى عينهه عليه خطيه وحسره بداخلهه شكبرهه

تاخروا وعمه عينهه ع الساعه كالت حوراء عفتهه وحدهه هم كالو ب٤ نجي وهاي راح يأذن الاذان
ام بشار.. خاف صار عدهم ظرف خلي ننتظرهم

قبس.. شويه ودك تليفون عمه كالت اسكتن هاي هم فتحت خط وحجت بعد ماسلمت انشوف عمه بس تهز براسهه وعيونهه انكلبن وتكلهه ماصار شي لا هاهي افتهمت ارجع واخابرج..

سدته وكالت صاير عدهم ظرف امهم متخربطه خطيه ويعتذرون غير يوم يجون
قبس.. محد صدك جذبه عمه لان مبينه ارتبكت بس كامت تريد تروح وصاحت قبس تعالي رحت وراهه للغرفه

بشرى.. ولج تعالي سدي الباب
قبس.. شكو عمه ؟؟
بشرى.. هاي ام الولد تعاتبني دكلي ليش ماكتيلي ابن عمهه رايدهه وماكدرت احجي كتلهه من ارجع اخابركم دكول ابو حوراء مخابرهم كايلهم سدو هاي السالفه ابن عمهه رايدهه وبس هيج كايلهم هسه ارجع وافتهم من رجلي واخابرج خلي تليفونج يمج

قبس.. كلشي مافهمت من هوسه عمتي شجاب ابو حوراء وابن عمي اذا يريدني ليش ماحجه لو هم بيهه غرور وتكبر هاي الشغله رجعت بدلت وسوينه عشه وتعشينه يله خابرت عمه

بشرى.. هايمه قبس منو يمج
قبس.. محد يمي
بشرى.. رجعت التهيت سويت عشه بين ما اجه ابو حوراء وماقبل يحجي وتواسيل يله حجه كال بشار مخابره الصبح كايله سدو هذا الموضوع مال قبس وانت وصلهم خبر لايجون ولادكل لعمتي

شفتي ولج هذا ابو راس اليابس وهسه جاي افور مااكدر احجي لان ابو حوراء حلفني وكال ازعل اذا طلعت وراح اطلع حجه بان الولد خطبوله شو شلون

قبس.. عمه هذا من ياطينه مصنوع ماعرف يجي يحجيلي ويكلس انتظريني؟ صعبه علي يكول كدام الكل ترى رايدهه لو شنو اباله

بشرى.. ماادري بيمن يفكر وهذا راح كل اليجي خطاب يطفشه ولج بنتي صيري سباعيه وبيعي ثكل علي لاتنطي مجال ابد مويقشمرج بحجايتين

قبس.. سديته من عمه والله ماتنلامين صدك اتقشمر هسه موهيج اغلي من تصرفه جذب خلي بس يكول قبس ويباوعلي اذوب واظل الليل كله جني مخبله اتكلب واريد الوقت الي يباوعلي بي مايخلص

كلساع تجي الحجايه بحلكي واكول اني اعلمك بشار بس ادري بروحي بوخه وماراح اسوي شي بس لو اعرف شجاني  ما اتمالك نفسي من يباوعلي اني بخير

بيومهه اجه ورا العشا ماطلعت من الغرفه بس سمعت صوته يحجي ويه امه واني ماطلعت ابد وثاني يوم داومت والكل يتحمدلي ع السلامه وكلساع سناء تكلي وين الب.... الاندر تضحك عليه...

شجن... اني هاي الفتره علاقتي ويه غيث اغلبهه مشاكل من صارت السالفه الاخيره كلما نتخابر كال انتي ضامه عليه شي وكلما يذكر رفض وائل اتخبل وحته فاتح الموضوع ويا من جديد وكايله اني وياك انروح للنجف وماخلي شجن تصير الك

كرهت كلشي اني حياتي كرهتهه حته غيث شنو ذنبه هلكد تعذب وياي والى متى اظل عايشه تحت التهديد

من الاول الغلط مني المفروض ما احب غيث اخو وائل ولو حاجيه لغيث من البدايه جان ماقبل نرتبط لان اخو يحبنه لذلك اني المفروض اتحمل هالشي ..

دزيت رساله طويله لغيث نهيت بيهه كلشي وهالمره ما اتراجع لو اموت من شوگي لان هذا الحب من اساسه غلط وراح يدمرني ويدمر غيث خلي يروح يشوف حياته واني اظل احبه ومستحيل اتزوج غيره بس المهم مايتاذه

اني احس بي متاذي حيل لان لايكدر يعوفني ولايكدر يكمل طريقه مدام وائل يشم الهوه مالنه نصيب وهاهي القرار النهائي اتخذته

دزيتهه بسرعه وطلعت الخط وقفلت الجهاز جُبن من عندي ضعف!! تخلي!! اي اني خذلت غيث وللمره الثانيه بس كل هذا احسن النه اثنينه احبه واعشقه وافدي التراب اليمشي علي بس بنفس الوقت سلامته وروحه اهم من هذا الحب

هيج انسان مثل وائل مجرم خطير عادي يكتل اخو ويكتل اخوتي وبالنهايه شراح احصل من حبي اذا خسرتهم وحته اذا حجيت هم ماراح اقدم شي الي انطته نفسه يعوقني طول عمري ومات ولاضميره انبه راد يسوي نفس الشي باخو والله لطف هذا الانسان خطير ويسوي كلشي واني مامستعده اخسر اي واحد من احبابي...

ما اعرف شريد اسمي هذا التصرف بس ما اكول علي غير غباء وضعف شخصيه من عندي وراح اظل عايشه اسيره بحب غيث للابد اعرف راح يحزن وراح يضوج وراح يتاذى اضعاف من عندي بس يتعود وينساني...

ومن هاي اللحظه وبسبب هذيج الليله المشوؤمه انتهت قصتي ويه غيث باليوم اموت الف موته علي لاكعدت ويا ولا بررت ولابجيت كدامه ولاشفت ردة فعله انتهى غيث تليفوني غلقته نهائيا وكلما اريد افتحه اتذكر السجينه شلون تمشي ع جسمي وابطل

لا يجينه ولا احنه نروحلهم حته من يجي ويه عمر ومرات يجتمعون يمنه واظل اكل بروحي بس اريد اشوفه اتوسل لقبس حته اشوفه يطلع من الاستقبال مايلتفت ابد وعبالك يدري اني من ورا الجام اباوعله صارت شوفته حسره عليه

اذا هو متعذب اني اضعاف عذابه حته اهلي ملو من عندي من كدما يسالون شبيهه شجن وليش هلكد ضايجه ليل نهار وبس تبجي..

حته بوقتهه مافكرت بس هاهي لازم اخلص من هالحب الغلط واتحمل العواقب وغيث يروح يشوف حياته وينساني هاي صار سنتين ع علاقتنه وعايشه بدوامه من القلق ويوميه اخاف انام وافز ع مصيبه احسن النه كل واحد يروح بطريقه..

بديت اداوم بالكليه رغم شكد واجهت صعوبه باول ايام لان الكل يباوعون لرجلي بس لان كليه اهليه والكل جاي بفلوسه محد يدخل بالثاني تعرفت ع بنات وصرت وياهن بكروب هوايه سالني سبب الاعاقه واجذب الجذبه المعتاده

شويه كدرت اندمج بالدوام وبديت ارتاح شويه بس نفس طبعي قليله الكلام وارجع اقره لو انام بس غيث لحظه وحده ماراح عن بالي اتذكره بكل دقيقه شكد مشتاقتله شكد محتاجته

اخلي راسي ع المخده واتذكر سوالفه والشقه مالته غيرت خطي وبعد كل اتصال مابيناتنه حته الرساله الدزيتهه ما اعرف شنو ردة فعله بهذيج اللحظه

الليل بس يجي تتراكم عليه الذكريات ابجي لحدما اختنك احب غيث حيل متعلقه بي بشكل مااكدر اوصفه وجاي اتعذب بغيابه بس الالم ياكل بروحي واني الخسرانه الوحيده خسرت صحتي وخسرت حلمي وكليتي وخسرت حبي الاول...

اعتزلت عن الكل حته اهلي تعبو من عندي وبعد مايسالوني شبيج وشتحسين اكعد وياهم يسولفون واني ساكته شكد يتشاقون ويضحكون واني اذا دارت الضحكه ع وجهي بسرعه يجي غيث كدامي واكول هسه شلونه مرتاح لولا

مابيناتنه غير بيت واحد وهيج شوفته حسره عليه ملاحظته حته من يجي لويدير وجهه لو يدنك خاف اشوفه من الشباك حته امه كطعت رجلهه عنه ووائل مايجي لان موصلح ويه بشار...

مرات اكعد بالكليه واتذكر الايام الحلوه الي جان يجيني بيهه نكعد نسولف ويشاقيني ويروح شكد اتمنى لو ينعاد يوم واحد من هذيج الايام ع الاقل  اشبع شوف من عنده ...

قبس.. جنت كاعده اشرب جاي واسولف ويه سناء وسادين الباب لان بارده ومتعلمين كل الي يجي لغرفتنه يدك الباب من الاصول بس هالمره مانحس غير الباب يندفع بسرعه

سناء جانت مدده رجليهه ع الكرسي وعبالنه واحد من الموظفين خطيه حته فزت من مكانهه واني وكع شويه من الجاي ع رجلي من كدما جانت فتحت الباب قويه

ميامين.. ابدال هاي الكعده المسوياتهه كهوه جان خلصتن الملفات اكو لجنه شنكول كاعدات يتسامرن

سناء.. كامت وكفت العفو ست ميامين بس احنه مكملين شغلنه وهاي استراحتنه
ميامين.. ماكو استراحه وكتلكم عيدو البيانات لان اكو خطأ بيهن باوعت ع ساعتهه الي مطلعه نص من ذراعهه الكم نص ساعه واجي الكاهن كاملات

فرت روحهه وطلعت وغمتهه سناء شكد صلفه يعني ماتستحي تحاجي سناء المره جبيره بهالاسلوب حلفت ما اسوي البيانات لان الغلط مو من عدنه من عدهه هي مانبهونه حته سناء كتلهه ممنوع تسويهن كلبي مخزن عليهه وهي كلهه موظفه تجي تنطي اوامر وتروح

سناء رادت تشتغل واخذتهن من عدهه كتلهه كليلهه عند قبس بس خلي تجي هو منا شلون احبهه ماخذه الناس بالعين الصغيره

خلصت النص ساعه مانحسهه غير ع راسنه حاجت سناء كالتلهه عند قبس التفتت عليه كالت وينهن
قبس.. ما اشتغلتهن لان هاي مومسوؤليتنه الغلط من عدكم
ميامين.. اول شي من تحجين وياي كومي اوكفي واحجي وياي لان شهادتي تعادل عمرج..

قبس.. ليش انتي منو واكوملج انتي موظفه بالموارد واني موظفه بقسم الحاسبات انت درستي واني درست روحي انطي اوامرج ع غيري رفعت الفايلات كتلهه اخذيهن هذا موشغلي

ميامين.. انتي منو حته تحجين ويايه هيج الظاهر عايشه الدور هوايه بس كل CV مالتج يمي حضري نفسج وودعي زميلاتج حته تعرفين ويامن تحجين دارت وجهه وطلعت

سناء.. ولج معزايه هاي شنو فلمهه
قبس.. جانت مديره بغير شركه وهنا صارت موظفه وشوفيهه شلون ميته من القهر..

رجعت اشتغل وشويه واجتني السكرتيره كالت استاذ بشار دز عليج كمت عدلت ملابسي جنت لابسه تنوره وستره بس شويه طويله مو ع الكمر غيرت لبسي من داومت وقبل بشار ..

رحت اشوفه شيريد دكيت الباب ودخلت لكيتهه كاعده ومخليه رجل ع رجل وهو مدنك ع فايلات يوقع بيهن اشرلي اكعد صرت كدامهه

بشار.. يحجي بس مدنك ساعه ع الفايل ساعه ع الحاسبه قبس اجتني شكوه من ست ميامين ممكن توضحيلي

ميامين.. استاذ حجيتلك ماكو داعي تسمع من عدهه
بشار.. خاف ماتعرفيني بعدج اني ما اسمع من طرف واحد اسمع من الطرفين ومن اسمحلج تحجين يله ماعاجبج النظام ست ميامين رجعي لشركتج..

قبس.. حيل كبسهه حجيت طبيعي كتله هيج وهيج السالفه والغلط مويمنه
بشار.. شوفي ست ميامين شركتنه من يوم الي اجيت بيهه ماصارت بيهه مشكله ولا اجتني شكوه ع موظف وانطيج معلومه اذا الموظف عندي غلط اني اتحمل غلطه وياما كعدت اشتغل وياهن حته يتعلمون محد يجي متعلم

والبيانات وصلتني من البارحه من المسائي وكالو اكو غلط من عدكم يعني تغلطين وتذبيهه براس غيرج هاي ماتمشي عندي راح اكرر عليج كلامي بهاي الشركه كل واحد حسب خدمته ما اسمح لا لمدير ولا الوزير يهين موظف خدمته فوك ٣٠ سنه باي حق تعلين صوتج ع ست سناء

ميامين.. انت مستوعب الي دكوله منطي مجال زايد للموظفين وجاي تحاسبني لان نبهت ع الغلط...

بشار.. شمر القلم ع الميز بعصبيه جان يكلهه هاي المره راح اعديهه المره الثانيه فايلج تاخذي بيدج وترجعين منين ما اجيتي ماعندي موظف كان من يكون يعلي صوته ميامين احترمي المكان الي تشتغلين بي الناس موخدم عندج وهسه تفضلي

قبس.. طلعت بعصبيه لان اترزلت بس بشار عصبي حته فر الكرسي وخله ايده ع وجهه خفت من عنده خاف يطلع حركته بيه واني اصلا مامتواجه ويا من يوم الخطابه الي اجوني..

بس كمت وصلت للباب جان يجيني صوته اقفلي الباب لا اطلعين التفتت علي كتله ليش اقفله؟؟

كام من مكانه واني واكفه يم الباب وصل يمي مد ايده ع القفل قفله دب الخوف بكلبي بشار موطبيعي هم عصبي وهم احسه متنرفز

رجعت بخطوات ثقيله ليورا واني مدنكه افرك بايدي ياربي شراح يصير بشار مدري شلونه رفعت راسي كتله افتح الباب اريد اطلع

بشار.. وين اطلعين شكد صارلج شارده من عندي
قبس.. ماشارده لان مابيني وبينك شي ع شنو اتملق الك
بشار.. قبس!!!
قبس.. رفعت راسي علي من كال قبس الي نطقهه بكل هدوء..

بس رفعت راسي ايده انمدت ع خصري لفتني لحضنه لف وايده الثانيه لزمت راسي وبدون اي سابق انذار انطبعت شفايفه على شفايفي بكل حنيه ..

ظليت فاتحه عيني ع وسعهه واحس كلبي انجر من مكانه وبدت رجليه ترتخي دفعته من صدره حيل بس قبضه ايده المحاوطه خصري ماكدرت افلت منهه

غمضت عيوني وهو اخذ جوله عارمه وشفايفه جانت تعزف اجمل لحن واني بين اديه اريد اوكف مااسيطر رجليه ماساعدتني وحس على ضعفي ورفعني لصدره اكثر اريد اخذ نفس اختنكت جنت لازمه قميصه حيل

ابتعد شويه وخله راسه على كصتي ونفسه يصعد وينزل واني بس يسحب ايده من عندي اوكع بالكاع اول مره اعيش هذا الاحساس اول مره شخص يلامسني وهيج يسوي وياي

حيل جنت لازمه قميصه من صدره خله ايده ع ايدي ونزلهه بهدوء وهمس يم اذاني عدلي نفسج وروحي بس بي شي موطبيعي نهائيا

فتح الباب وطلع واني كعدت ع الكرسي كلبي اعظائي كلهه ترجف اتحسس اشفايفي باصابيعي شنو الصار بهاي اللحظه ليش هيج ضعف بشار وليش اني ضعف وسمحتله...

بسرعه عدلت نفسي وحاولت اخلي كلينس ع حلكي لحدما وصلت للحمامات مبين على شفتي لان حسيت بقساوته من يبوسني حاولت اعدل شفتي بالحمره البناتيه وغسلت وطلعت

تحجي وياي سناء واني مدنكه اجاوبهه بس اريدهه تسكت اريد اعيش الشعور اريد اغمض عيني واستوعب الصار لحد الان مامستوعبه كلشي حته حسيته تندم اخر شي لان عبالك موبوعيه

انتظر دقيقيه دقيقه شوكت يخلص الدوام رجعت للبيت لا اكلت ولاشربت طلعت حجتي راسي يوجعني ودكات كلبي ابد ماهدئت ولا لحظه واحس نفسي بعدني بحلم ماكعدت

مسويه نفسي نايمه بس اني مانمت عايشه باحساسي والشعور الي بداخلي مااكدر حته اشوف واحد اريد اظل هيج هادئه ...

شلت راسي شفتهه الساعه ب١٠ البنات كاعدات يقرن كمت غسلت ورحت للمطبخ سويتلي لفه اكلت ورجعت للغرفه كعدت شويه ويه البنات
سحبت تليفوني لكيت رسائل من رقم غريب فتحتهن انصدمت واني اقره جانن الرسائل من ساجده كاتبه

شبعتي خير هسه اجه احسابج ارجعج خدامه بالبيوت تحضري ياحلوه....

يتبببببع... متابعه ممتعه

اشكركم ع تفاعلكم القصه اخذت المرتبه الاولى احبكم حيل لاتقصرون بالتفاعل شوفو شكد فرحت من شفت الصوره المركز الاول شكرا لكم...
لاتنسون شاركوني بتوقعاتكم وانطيكم معلومه كل الاحداث نقطه ببحر من الي راح يصير وخاصه حياة قبس شي ماتتوقعوا ابد
الصوره👎👎