رواية قمع المشاعر الفصل الثاني والعشرون 22 - بقلم Rozaya1122

قمع المشاعر.... البارت الثالث والعشرون..
للكاتبة زهراء ( روزايه)...

تترطب المخدة من دموعك
تطيح الملامح من وجهك
تلم شتات نفسك
تبني ما هدم منك
تصلح اخطائك
تنفض كل الي ذكرتهن و ولاجنك
....

خط
ميامين .. شلونك بشار
السكرتيره.. استاذ حاولت وياهه وتعاركت ويايه الا تدخل
بشار.. هاهي ماصار شي واندار كعد ورا المكتب بس ملامحه تغيرت حته غمض عينه بقله صبر ورجع فتحه وكالهه تفضلي شرايده

ميامين.. ممكن اكعد؟؟
.. تفضلي
قبس..اني ع نفس كعدتي واباوع لهاي الجديده ع الساحه شكلهه عاديه بس عدهه عيون تخبل ولابسه بنطرون قماش وستره طويله وكعب عالي مبينه انيقه وتهتم بمظهرهه

ميامين.. اعرف تفاجات بجيتي ؟؟
.. تدرين بيه ما احب المفاجئات
... يعني نفس طبعك ماتبدل شويه
... تعالي من الاخير شرايده؟

ميامين.. فتحت جنطتهه وطلعت فايل خلته ع الميز كدامه وحجت بكل تكبر وغرور هاي موافقتي ع النقل بهاي الشركه

بشار.. منو كالج الشركه محتاجه خبراتج؟ وماعندي خبر بان اكو موظفه جديده
ميامين.. بشار رجاءا عوف كولشي بالماضي ركزلي هسه اني تعبت من الطريق اداوم بشركه فوك التاجي والله تعبت ارجع بليل ولامكان ابات بي لان الوحيده اني ع الموارد والبقيه كلهم شباب صار بحدود السنه اركض ورا النقل وماحصلت وهاي قبل اشهر حصلت تنسيب يمك لمده سنه لاتصعبهه عليه

بشار.. ميامين مكانج مويمي اني لو محتاج موظفه موارد ادز طلب للوزاره يعني شلون انقل موظف حته حضرتج تصيرين بديل

ميامين.. الله عليك بشار والله تعبانه من دوامي واني قبل ماتصير مدير بهاي اجيت وقدمت وانقبلت يومين ورفضت الشركه الي بالتاجي تنطيني انفكاك هاي السنه الخامسه اني اطلع ب٤ الفجر ارجع ب٧ بليل سويهه لله

بشار.. رفع راسه عليهه وكانو هذا الكلب حن سحب الفايل مالتهه قرا ورجع سده كالهه تعذريني ماكو مجال بالموارد نهائيا

بعده يحجي واندك الباب فات واحد قاط وكولتهم افندي وكع لبشار دك بوس وشلونك وشلون الحجي وعمك عامر رحب بي وكعد كدام ميامين سلم عليهه والظاهر الواسطه مالتهه اسمه جابر ويشتغل بالوزاره

جابر.. استاذ بشار قسما بالله لوغيرك مدير بهاي الشركه مادزيت امر ست ميامين بس اعرفك ابن ناس وبعد ابن الحجي صالح معروف بالكرم بس ثق بلله تكسب اجر بموافقتك عليهه لان تعبت من الطريق

بشار.. استاذ جابر جيتك ع راسي واني هوايه قبلت وانطيت تنسيب بس ست ميامين مديره قسم الموارد يعني اني بهاي الشركه عندي مدير خدمته ٣٠ سنه يصير اكله يابه انزل صير موظف واخليهه بمكانه هنا بالعمل عدنه مبدا وهو احترام الخدمه اولا ومن ثم الشهاده

جابر.. ع راسي كلامك واعرف هالشي صعب وموافقتهه تمت من الوزير بس كال بعد الباقي يم مدير الشركه وهم اذا ماقبل استاذ بشار نحاول نرسله طلب بس كتلهه اني اجي وياج لان مشهودله بالوكفات وماتقصر...

بشار... كتلك استاذ تريد اوقع ع موافقتهه تختار غير منصب هنا عندي مدير مستحيل اروح اقلل من شان خدمته بسبيل ارضي الوزير مقدر جيتك ومايوم رجعتك فارغ بس هذا الي اكدر علي

ميامين.. يعني اني خريجه هندسه يصير اتعين كاتبه برايك؟؟
بشار.. الي يريد شي يعوف شي!! جان يحجيهه وهو يباوعلهه

وهذا كل الي اكدر علي اني ما احب اهين الشهاده بس موكاتبه اكو فروع هوايه بشركه اختاري كموظفه عاديه وهذا لخاطر استاذ جابر لان من الاول كتلج مامحتاج اي موظف ومااريد ازعزع نظام الشركه

ميامين.. استاذ بشار تكدر تخلي نفسك بمكاني تتنازل من مدير وتصير موظف عادي تحت ايد اقل من عندك شهاده؟؟

بشار.. اكره مبدا المقارنات ما اريد ادخل وياج بنقاش طويل والتفت ع جابر استاذ جابر هذا الي اكدر اسوي وحته وان رسلت الوزاره طلب ماراح اوافق لان المدير الي عندي اقدم مني بالخدمه ونجاحات هاي الشركه  اغلبهه ع ايده

جابر.. يله ست ميامين قرري احنه قبل لانجي حجينه كل الاحتمالات والقرار الج!! وانت هم ع كيفك استاذ بشار ترى ست ميامين جانت مديره ومضبوطه ووضعهه الاجتماعي مدهور ووالدهه توفه قبل فتره قصيره

بشار.. اعرفهه موغريبه عليه جانت سابقا تدرس ويايه نفس الكليه
جابر.. هااا لعد نتوكل مدام طلعت اكو معرفه واني اعزهه مثل بنتي لان ابوهه صديقي وقبل لايتوفى كال امانتك لان هاي الكدامك شافت الويلات بحياتهه نترخص احنه سلمنه ع الحجي وعامر...

شجن.. طلع هذا الاسمه جابر واني كاعده مبهوره بكلشي بتصرفات هاي ميامين وشلون تحجي بطرف خشمهه وببشار الي عبالك صخره وشلون نزلهه من الوظيفه بعدماجانت مديره

يمكن حلكهه يبس كلساع تشرب مي وهو بعد ماسلم ع جابر رجع لمكانه واخذ القلم من جيب سترته وكالهه هسه نوقع قابله ؟؟

ميامين.. قبل لاتوقع كولي شنو منصبي؟؟
بشار.. ماعدنه مناصب كلنه سواسيه ! ابقي بنفس اختصاصج هم ع شعبه الموارد بس موظفه مومديره

ميامين.. اوك وقع عرفت شلون تلوي ذراعي عبالي هاي السنين غيرتك بس انت ذاك هو نفس الخشم اليابس والغرور العندك

بشار.. اعوذ بالله اشفتي عليه وكلتي غرور رجال بسيط اني وهذا المبدأ الي اتبعه بالعمل الباقي يمج ماعجبج براحتج..

شجن.. قربت نفسهه حيل ع الميز وحجت بصوت خافت ماسمعته بس انتبهت ع ايد بشار الي جانت تكتب وكفت وماكمل كتابه بس ماباوع بوجهه...

احس نار واشتعلت بيه حته الم بطني نسيته كدامي اوراق وفايلات مطشره ع الميز بسرعه لميت من عدهن وكمت تقربت عليهم كتله استاذ بشار ممكن توقعهن ترى تاخرت

رفع راسه عليه ومايعرف شقصد بس فتحت عيني بقله صبر واتقربت من جهه الميز صرت بصفه وهي تباوعلي فتحت الفايل كدامه وكتله هذني بس حته مادري شمكتوب بيهن ممكن توقعهن محتاجيهن؟؟

بشار.. اكعدي قبس هاهي ست ميامين روحي للسكرتيره انطيهه الفايل مالتج وخلاص تعرفي ع الشركه ومن باجر باشري...

ميامين.. كامت وهي تباوعلي لان اني طاكه منهه هيج واصله بخشمي بس مبين عليهه الضوجه والقهره كالت شكرا استاذ طلعت وسدت الباب...

بس طلعت ما احس غير ايده تلزمني من ذراعي بقوه وسحبني علي هو جان كاعد ع الكرسي واني واكفه بصفه بس من سحبني انحنيت اله صدك لوكالت مغرور..

قبس.. شبيك ايدي هو هيج ياحضره المدير؟؟
بشار.. منين متعلمه هالدروب؟؟
قبس.. يادروب مواني ردت اخلصك منهه لان شفتك ضجت من جيتهه
بشار.. متاكده؟؟ ورفع طرف حاجبه الايسر

قبس.. اااي
بشار.. بس اني ما اشوف هيج اشم ريحه بالموضوع
قبس.. ممكن تترك ايدي استاذ ميصير هيج
بشار.. شو باوعيلي خلي اشوف غيرانه لولا؟؟

قبس.. استاذ ميصير اروح اقدم شكوه بان المدير يتحرش بالموظفات .

جر ايدي حيل راح اوكع بحضنه وبطني هاجت ونفسي لعبت يبووو تخيلت هسه اتقيء

بشار.. موجنتي مريضه شو هسه صحيتي ؟؟
قبس.. بشار والله بطني توجعني عليك الله عوف ايدي  تركهه وادنيت عنه بس شنو بطني الخانتني موجان الرجال عيونه ذايبه الا تخربين اللحظه

دك تليفونه السايق كاله اي هسه تجيك سده وكال يله اجاج السايق امشي وياي اوصلج؟؟
قبس.. لا لا انت ظل قابل ما اندل وهاي صخامين يجوز تحتاجك

بشار.. حجيت هيج شفته راد يلزمني بس بسرعه طلعت شكيت بيهه حبيبته السابقه او بينهم شي بس ارجع اسال شجن ع اسمهه

مريت ع سناء اريد اخذ جنطتي بس شافتني كالت هاا لسه مارحتي
قبس.. ماراح اكلج شي ع الفشله بس كون ماتشمين ريحه الرجال
سناء.. سوده بوجهج ورفعت راسهه ياربي لاتاخذ بحجيهه ولج كولي انكسرت ايدج رجلج لوري يطمج بس هيج دعوه وبيهه رجال ع بختج

قبس.. شلون تحجين كدامه هيج موعيب؟؟
سناء.. وشكايله اني ذاك اليوم عاليه تخربطت ورحتله وكال تحتاج مستشفى كتله لا سوالف نسوان ع اساس مايعرف هو ابن عمج مفتح باللبن

قبس.. خلي اخذ جنطتي واني الكم الا اخذ اجازه وهذا الشغل براسكم كله
سناء.. ولج انتي شكد فطيره هذا اقوى تهديد عندج وحق علي اجيبج سحل اذا غبتي

قبس.. طلعت بعد ماسويتلهن بيدي بيباي لكيت السايق واكفلي واكف ويا بشار هاي شوكت نزل وصى يوصلني للباب مرات ينزلني ع الشارع صعدت اباوعله لحدما مشت السياره وهو يباوعلي...

بس طبيت لكيت شجن سالتهه ع اسم حبيبته السابقه كالت مادري بس جان هو يصحيلهه ميمونه بس مدري شنو اسمهه الحقيقي

هاهي ميمونه اشتاق من ميامين باوعت لوجهي شكد فكر انتي ياقبس بلبيت عندج فرح بالدوام ميمونه وين تولين كليلي شلون راح اعيش الاكشن منا ومنا وخاصه اليوم شلون جربت الغيره

عليه العشه او هو ع فاديه بس كلت اني اسوي بمكانهه لان عدهه دوام وترجع تعبانه واني اليوم رجعت من وقت اخذت علاج صرت زينه سالت ام بشار شنسوي كالت يمج كبه وكلي بتيته وعمو كايل اجيب لحم بعجين وياا

وكفت اكشر بتيته اجت صابرين يمي كالت اساعدج كتلهه ماعندي شي شلونه عمر زين خومابعدكم زعلانين
صابرين.. لا مزعلانين بس عمر كلش عصبي ولازم ما اغلط بكد الشعره
قبس.. كلهه هيج سايسي مدام عن حب تعرفين اطباعه جنت اكشر وياهه واسولف شفتهه نزعت الشال وكلساع تفر ركبتهه يمين يسار وشلوت تشوفني

مدري اني يتخيلي تصرفهه بس عبالك متعمده حته تسوي نفسهه تحك ركبتهه حته انتبه الصايره خريطه دنكت وما اهتميت بس موقفهه موحلو تصرفات زعطوطه

شويه جان دكولي اكولج قبس ماتعرفين شي يخفي الاثار الي بركبتي استحي كدام خاله
قبس.. حجيت بكلبي مو ع اساس مجربه حته اعرف!! لاوالله ما اعرف ودرت وجهي خطيه عمر مايستاهل هيج زعطوطه الي يشوفهه يكول هي وبس بس تصرفاتهه لاتطاق...

فاديه.. هاياقوم شلونكم؟؟
قبس.. هله بيج ترى عليج المواعين اني سويت عشه
فاديه.. لا حبابه قبقب اليوم تعبانه غير مره اعوضج

قبس.. شعندج تعبانه هي كليه
فاديه.. منو كالح كملت الكليه ب١١ اجتي عمه بشرى خابرتني كالت بالباب احنه مسويه باجه واني افقد ع الباجه خابرت بابا وطلعت وياهه تغديت واجيت

قبس.. ادري جبار انتي وين الانوثه
فاديه.. الاكل شعلي بلانوثه وماكتلج حوري بنت عمتي بشرى يمكن راح تنخطب بس عمه كالت اليوم اجيكم بليل واحجي لاهلي خاف بشار يريدهه

قبس.. تحجين صدك؟؟
فاديه.. هههه لاوالله اتشاقه بس كالت تنطينه خبر دكتور وياهه والله محتاجه حفله وتركصين مثل ذاك الركص وهالمره اصورج وادزه لاخوي بس من حجت هيج شاورتني حته لاتسمع صابرين

قبس.. عابتلج ولي عوبه
فاديه.. هسه اني شبعانه واصله لهنا واشرت ع خشمهه اروح اقره عندي امتحاني وانتي ياقبقب ارجعلج الوكفه بيوم عرسج جاوو

قبس.. صابرين ماتحجي ويه فاديه الانادرا لان صار بسببهه وفاديه مطنشتهه صبيت عشه وتعشينه وبشار ما اجه الله يساعده بالصدفه اشوفه يكعد ويانه ياكل حته الجاي يشربه هو واكف ...

رحت للغرفه شفت شجن ضايجه وعبالك بيهه شي كعدت بصفهه حجيت ردت ماكو اصلا متعقده وعبالك بيهه حاله نفسيه ولاتسمح لاحد يشاركهه ومبين هي وغيث لان مرات اسمعهه تتعارك ويا وهو صوته من التليفون ينسمع ...

ثاني يوم كعدت تريكت وبدلت ومنتظره الخط مالتي وبشار سيارته عايفهه برا مدري شوكت يرجع طلع عمر للدوام كال اوصلج كتله لا مايحتاج اجاني الخط

صعدت بالسياره حاجاني السايق عمي شلون صرتي ؟؟ زينه الحمدلله عمو الله يحفظك
ابو حسين.. عمي اليوم ما اكدر اجيج بناتي يمي جايات ويزعلن ظن اطلع واعوفهن
قبس.. الله يخليهن الك عادي ماكو اشكال ارجع ويه البنات

قبس..وصلت للشركه بلباب انوقع يله انفوت تلكتني عاليه هستوهه جايه طبينه سوه فتحت الحاسبه اشوف المسائي شمسوين مامسوين مرات يصير اشكال...

بدينه بالشغل مندمجين لان اكو ملفات هوايه واكثر الشغل هو الصبح كل وحده بينه عينهه بحاسبتهه ونسمع طك طك مال الكعب وحده باوعت لثانيه

دخلت صخمونه وبيدهه ملفات وتحجي بامر حته ماكالت صباح الخير شمرتهن شمر كالت هذني بعد ساعه اريدهن ع مكتبي

سناء.. العفو بس ماعرفناج منو موظفه جديده؟؟
ميامين... استاذ بشار يخبركم ودارت وجهه تريد تطلع عيبت عليهه سناء

سناء.. وكعن اسنوني واني بهاي الشركه وماشفت حلوات بس من اجت قبس انوب جايه هاي هسه شكو موظف عدنه بي امل يخطبنه يركض وراهه

عاليه.. لعد هو الحظ الاعوج شلونه بطكه كعبهه اتجيب التايه شكم مره كتلج البسي كعب وطكي بي!!
سناء.. موتدرين عندي انزلاق غضروفي ويني وين الكعب الك ونه يكلبي

قبس.. اسمعهن واضحك سناء طك كلبهه ع الرجال دكول حتلو يومين املح كلبي راح اموت وماشتميت الريحه وعاليه دكلهه انتي بزونه. وادورين ريحه وهي دكلهه بزونه ادور لحم ...

كملنه البيانات مالتهه بس ماكمنه نوديهن اصلا بشار منطي قرار كل واحد يخلص شغله بنفسه لاتودي ولاتجيب وهي حته ماعرفت ع نفسهه

صارت الساعه ب١٠ اجتنه السكرتيره كالت اجتماع للكل لان اكو خطأ بالصارات وجايه شكوه ع الشركه اكو غرفه خاصه للاجتماع وهذا اول اجتماع احضره ..

رحت ويه سناء وعاليه لكينه القاعه واحد يردم الثاني لان كل الموضفين مطلوبين واكو لجنه من الوزاره جايه القاعه جبيره حيل سناء دكت رجل الا نكعد بلبدايه عدلي بدلي دكول الا اكعد  اول شي

وصدك كعدنه بالسطر الاول وجانت حته اللجنه موجوده بس بشار ماكو كلساع وكالو وين المدير كالو هسه يجي بالتنقيب فوك النص ساعه كاعدين ننتظر

بس اشتميت عطره وهو يفوت للقاعه بدون ما التفت كتلهن اجه كالن شمدريج عندج عيون ورا هذا عطره الي احبه مخبوط جكاير ع عطر قوي ع هادىء ما اعرف شلون اوصفه

كعد ورا الميز وبصفه اللجنه وبدو يناقشون الاخطاء جنت اباوعله شنو من هيبه الشيب بمقدمه شعره زايده وقار وحته بكلامه واسلوبه هادىء ويسمح للكل يناقش

اثناء ماجان يحجي اجت عينه عليه بس بسرعه حولهه مدري شلون التفتت للجانب واشوف ميامين صافنه ازيد من صفنتي بس عيونهه تلالي دموع وكلساع تاخذ كلينس تعدل مسكارتهه ...

استمر الاجتماع ساعه ونص وكالو انتهى وقعنه ع تعهدات كل الي يرتكب خطأ يعاقب طلعنه من القاعه وظهري احسه تكسر من الكعده

دزيتله رساله استاذ اليوم مايجيني السايق ممكن ارجع وياك؟؟ شويه واجتني رساله من قريتهه وكع التليفون من ايدي كاتبلي يروحلج فدوه المدير !!!

عزاا بعيني هذا الجان ورا الميز يجتمع بينه اريد افتهم من باطينه ماكدر يوم افتهمه وعشره لااا  كلساع اطلع الرساله اقراهه وابتسم ...

فجاه وما احس غير اركض للحمام اتقيء انكلبت معدتي الم من كل مكان حته مااميز وين ولعبان نفس ذبحني اجت وياي سناء كتلهه روحي كليله لان تخيطت عبالك ماكدر اكوم من مكاني كوه اخذتني للمطبخ يم ام حسن..

شويه واجت جايبه غراضي وغراضهه كالت اجه استاذ بشار راح ياخذج للمستشفى!!
... ماريد مستشفى اخذوني للبيت
... موبكيفج هاي مرتين تتخربطين تظلين تاخذين مسكنات بكيفج يجوز عندج التهاب امعاء..

قبس.. الم فضيع عبالك سجين ونابت ببطني وغير لعبان النفس اجه بشار ومافات للمطبخ بس كال يله ست سناء اني نازل كدامكم..

كمت اسحل بنفسي العزيزه كوه فتحت الجنطه طلعت كلينس اريد اعدل كحلتي
سناء.. الناس بالناس والكرعه تمشط بالراس وينج وين الكحل
قبس.. لزميني بس اعدلهه كوه عدلتهه ماكدر موبيدي روحي بالكحل

طلعت امشي ع كيف لكينا ينتظرنه بالسياره صعدت ورا اني وسناء باوعلي بالمرايه بعدماحرك السياره هاااقبس شبيج؟؟
... مادري بطني نفس ذاك اليوم لوتاخذني للبيت احسن
.. لا انظل يوميه مطيره علينه اليوم خلي انشوف شبيهه بطنج

جان يسوق وكلساع عينه تجي عليه بالمرايه بس اني صدك موجوعه بحيث ماكدرت اتحمل وسياره تمشي اني من صغيره يصير عندي لعبان نفس من السياره دنكت راسي ع الكرسي الورا بس اريده يوصل

بس وصلنه سناء سباعيه هي وياي اخذتني لطوارىء وهوسه تحاليل وسونار جان اكو طبيب رجال جبير كال فورا عمليه البنيه عدهه زائده وملتهبه راح تنفجر ببطنهه

راحت سناء لبشار كالتله ماكو وقت جان نحول لمستشفى اهلي وطبيب مانعرف لازم ناخذ موعد بس كال خلي يسولهه ع الخاص بس بالحكومي ...

يمه تخبلت شكد مرين بويلات بس كلشي ولا الابره والدم اموت من الخوف من اشوف دم كدامي اتوسل ببشار يرجعني بس مايسمعني اصلا طلع وسناء وياي جهزوني واخذوني للعمليات عوزي ابوس ايد الطبيب بسرعه بنجوني ونمت...

فتحت عيني اون من الالم واصيح اااخ بطني شكيتوهه اول وحده شفتهه سناء ولج شسويتو بيه
سناء.. الحمدلله ع السلامه ام اللسان شسويتي شلعبتي وكدام المدير طمي روحج احسنلج..

قبس.. يامدير ولج اني صايره مدير عام الم موتني انطوني ابره شي جابولي ممرضه ضربتني ابره هدءت شويه وانتبهت على روحي الحجاب طاير محد بالغرفه بس اني وسناء  سالتهه ابيش الساعه

سناء.. ب٤ وبس اني والمدير هنا هسه يله خابر ع اهلج وكاللهم لان انخبصنه بيج
قبس.. سنيوه كليلي خوما كمت امسلت بالحجي
سناء.. فضحتينه والله اني من يمي فتت بثوبي
قبس.. عليج الله لادكوليهه بسلا كدام بشار..

سناء.. اي كدامه من طلعناج جبناج للغرفه المفروض تصحين يله بس اكو هوايه عمليات وكالو تصحه بالغرفه وكمتي تغردين ولازمه ايده عبالك راح يطير حته خجل مم عندي

اول شي كمتي تفشرين وتصيحين كوا... كلكم سفله انعل ابوكم لاابو الجابكم شكيتو بطني وطلعتو غراضي وينهم هذني الكح.... ولج ساجده العوبه

واني اسد بحلكج وماترضين تسكتين جان باوعتيلي كتيلي هاي انت ولج وين الب.... ( الاندر) وتصيحين حيل سناء جيبي الب....... وين اخذتو

واحط ايدي ع حلكج ومايفيد واستاذ بشار طلع برا ويسمعج وبعدهه سكتي شويه وهو اجه سالني عليج ودك تليفونه وانتي دكليله حرام الاغاني طفي سرسري وهي نغمه رنين عاديه

قبس.. اغطي بوجهي واحجي ع سناء سدي حلكي ضربيني طلعي دمي وين المواقف البايخه تصر كدام بشار كوه احجي من ورت العمليه بس حاسه باحراج مو طبيعي

سناء.. هسه اكلج بعد شي بس خاف تكومين عليه وشيخلصني
قبس.. يعني بعد مادكليلي شطلعت انتي جنتي متونسه وفوكاهه تضحكين

سناء... والله يا اختي فلم كوميدي كدامي ليش ما اضحك بس تاكدت انتي خبله ونص فيوز ولوماهاي الافكار المنحرفه براسج ماكمتي تحجين بيهه
قبس.. عليج الله سناء بس هذني لوبعد مصخمه كدامه

سناء.. لا بس اجاج اول ماطلعتي تونين وتاشريله ع مكان العمليه دكليله هنا هنا الالم وهو خطيه فدخجل لان اني واكفه خله ايده ع راسج وكالج خلصت خلصت

قبس.. ابدي انمحي لو ارجع انام واسوي نفسي خربانه شيكول عليه واني طالعه افشر فوكاهه كدامه راح تطبع اباله ويكوم يفكر بكيفه هسه يكول هاي السانهه زفر

بشار.. هاست سناء خابرت السايق اجاج مشكوره ماقصرتي
سناء.. لا تشكرني استاذ هي مثل اختي واذا ماكو احد عادي اني ابات وياهه
بشار.. لا رحمه الله والديج جايين اهلي بالطريق
سناء.. يله مع السلامه ودنكت عليه باستني وطلعت

قبس.. بس طلعت درت وجهي للحايط ما اريد اشوف عيونه واتذكر خرابيطي سد الباب وسحب الكرسي كعد لزك يمي بس بعدني دايره وجهي للحايط

بشار.. شنو زعلانه مني شو دايره وجهج عني؟؟
.. لا انت شعليك بس شويه موجوعه
... التفتي قبس خاف خجلانه من سوالفج
قبس.. لا ع المريض حرج واني جنت موبوعي

بشار.. ميخالف امنه باالله بس هذا الفشار منين جايبته همزين حطيناج بغرفه وحدج جان فضحتينه موعيب بنيه مثلج  تلفظ هيج كلمات.
قبس.. ماادري بروحي جنت احجي وما اباوعله
بشار.. زين شنو سالفه الاندر وين ضيعتي خليتيني اشك بالجانو بالعمليات ووياج

قبس.. ولاكدرت اجاوبه بس اريد اعرف شجابه ع بالي واصيح وينه هو اني مولابسته خاف نزعوني وما ادري

بشار.. تبقين بكل حالاتج حلوه من حجه هيج اني دايره وجهي انمدت ايده بكل هدوء اصابيعه لامست فكي حسيت بقشعريره بجسمي ودار وجهي علي...

ايده جوه فكي واصبعه الجبير يحركه ع بشرتي من يوصل قريب لشفايفي لا ارادي ترتجف واغمض عيوني

باوعتله بثماله وعيونه مركزه بيه ابد ما اعرف اقره عيونه ولا اعرف افسر اي نظره من عنده حجه بصوت حنين وهو ع نفس الحركه مال اصبعه قريب اشفايفي يحرك بي

بشار.. من طلعتي من العمليه لزمتي ايدي وتكليلي هنا الالم واشر ع مكان العمليه ..

قبس.. ياربي اليوم ناوي يرجعني للعمليات يسوولي عمليه قلب لان ماكاعد اتحمل اطرافي ثلجت وشعور غريب يلامس داخلي من يحجي بهدوء

بشار.. مرات اشوفج كدامي بعدج بنيه بريئه خام ومامجربه اي شعور وارجع اغالط احساسي واكول لا هي متزوجه ومجربه هيج احساس

قبس.. كوه طلعت من عندي الكلمه كتله لامامجربه هيج احساس!! ماحجه اي شي بس ظل يباوعلي واني نفسي يصعد وينزل بسرعه

سحب ايده بهدوء ودنك ع راسي باسه مجرد ماشفافه لامست كصتي رجف كل جسمي حته هو انتبه وابتعد

ليش هلكد اضعف كدامه معقوله هو شعور الحب هيج حلو لو اني ضعيفه زياده عن اللزوم بهيج مواقف ..

طلع برا وشويه واجت امه وعمه بشرى وعمو عادل وجدو بوقتهه شكد فرحت رغم الالم هيج الله عوضني بيهم ومافرقوني عن بناتهم ومبين الخوف والقلق بعيونهم...

ثاني يوم طلعت من المستشفى للبيت وفاديه لوجانت عندي اخت ماتقوم بواجبي هيج حته الاكل والسبح كله هي وهدى نفس الشي اجت يمنه يومين ظلت تمشطلي وكلساع جايبه اكله خفيفه تتوسل اكلهه وغير تعقيم العمليه كله هدى...

اليوم اخذني عمر وام بشار فتحت خياطات العمليه وزينه  صرت حته كمت وياهن بالمطبخ جنه كاعدين كالعاده ورت العشه وهالمره عمه بشرى موجوده وبشار كاعد

جان دكول عمه بشرى اني جايتكم بشغله كلفوني بيهه
عادل.. خير ام حوراء كولي
بشرى .. ان شاء الله خير

بشرى.. يابه بعرس عمر عيالي شايفين قبس وهاي صار شكم يوم يجون عليه يريدون يجون يخطبوهه كلت انطيكم خبر

بشار جان مرتجي ع التخم بس من حجت عمه شفته عدل كعدته وعمه بشرى طول ماتحجي عينهه على بشار وهوساكت

بشرى ... هايابه شكلت اخليهم يجون؟؟
الحجي.. والله الراي الاول والاخير الهه بنتي قبس شنو رايج!!!

قبس.. اجت عيني مباشرة على بشار ظليت مركزه بعينه وردت اي رفض من عنده اذت يحبني مثل ماكالت عمه ليش ماحجه هسه ظل ساكت والكل ينتظر جوابي..

قبس.. بكيفكم جدو خلي يجون...

يتببببع... متابعه ممتعه

كلكم احبكم واموت عليكم موتزعلون بس هذا البارت لسارونه الجميلهHamzayhoocom1996
موتزعلون ا ح ب ك م