رواية قمع المشاعر الفصل الثالث وخمسون 53 - بقلم Rozaya1122

قمع المشاعر.... التاسع من الجزء الثاني...
للكاتبة زهراء ( روزايه)...

انه بدونك
محطة وناس مابيها
انه بدونك
عروس بليل وانباكن تراجيها
...

شجن.. بابا خطيه اسراء هسه يجون عمامهه عليهه
عادل.. مالنه حق ناخذهه مرجعهه لعمامهه يله بنتي هسه امج تجي وراح اجيب قبس يمج لان بشار راح للمستشفى هو وجماعته..

قبس.. اليوم حنة فاطمه ورغم عزموني بس ماحبيت
اروح وبشار كال نطلع المغرب نتعشه برا وتغيرين
جو لان ملانه من البيت..

واكفه كدام المرايه ارتب بشالي الف مره البسه
ومديصير عدل وبشار مرجع راسه ع الجربايه بملابسه
وكلساع وكال ماتخلصيني سويتيهه قصه

فوكاهه من يحجي يتخربط من جديد لحد ما اخذت
الشال ورحت يم المغسله ارتب بي يله صار..

طبيت للغرفه خليت ايدي ع خصري
يله خلصت !! وابتسمت

بشار.. بعد وقت شويه لو ظاله ؟
قبس..ادري بيك تريد تضيع عليه الطلعه بس هسه
لوموعركه وكتله لازم اطلع..

بشار.. ماعاش اليمد ايده عليج شنو رأيج نلغي
الفكره ونكعد نتسامر اني وياج عندي مشروع
جديد خليني اهندسه عليج؟؟

قبس.. ضحكت بصوت عالي واشرتله باصبعي
لا ياباش مهندس مشاريعك طبقهه ع الارض موعلى قبس

بشار.. لااا مشروعي هسه يختلف وحتما
لازم يطبق عليج يافاتنتي!!

قبس.. ادري بي يريد يلهيني ويلغي الطلعه
بس هو يسولف واني ركضت لبست الجنطه والحذاء وكفت

بشار.. ماكو امل تبطلين؟
قبس.. لاااااااااا وهزيت راسي
بشار.. امري لله خلي اكوم يمكن قميصه تعقج شو شوفي؟؟

افتر يشوفني مابي شي حبيبي اصلا مسطره ..
بشار... لا اني احسه معقج هاج اكوي بعد وقت ويريد يفتح الدكم

قبس.. دكيت رجليه بالكاع بشااار تريد تضيع
الوقت عليه روح زاعلتك!!

ضحك بصوت عالي وباسني من خدي وراح للميز رش عطر
ولبس ساعته وكال روحي للسياره بين ما اقفل الباب

بعدني هستوني اطفي بلكهرباء دك تليفونه
هو مسافه عني بس سمعت صوته وهو يكول
لا ولك شتحجي انت؟؟؟

ركضت ع صوته وهو محتقن دم وسد التليفون وكعد ع الدرج ودنك راسه واني كعدت جوا لازمته من رجله
شكو بشار شصاير؟؟

حجه وياي وهو مدنك راسه لاول مره اشوفه هيج
وبهاي الكسره .. وعبالك قوته انمحت بلحظه..

جام يكول سامر مسوي حادث ومتوفي بس حجاهه
بغصه وبالم ..
بسرعه حضنته وماعرفت شلون اواسي

اعرفه شكد يحب سامر مثل مايحب عمر
من هم مراهقين سوه يكول جنت مااكل اللفه الا ويا نقسمهه
وشفت شامر شكد تعب لبشار

لا اله الا الله بسرعه اجت اخته ابالي شلون بيهه
وين تروح هاي البنيه وعمامهه يريدوهه

سحب نفسه من عندي وكام مابجه ولاشفت دموع
بس حسيته مكسور وكانو انذبج بس بدون صوت

حته ردة فعله جانت اثر صدمه ماحجه اي شي
بس كال تعالي اقفلي الباب وراي راح اروحلهم
وهسه اخابر ابوي يجي ياخذج

طلع كدامي اباوع لظهره شلون انحنى صدك الصديق
مرات يكون اخ وحزام ظهر
ومرات يكون عار وبس اذيه امثال وائل..

التفت عليه حبيبتي ديربالج ع نفسج واخذي ملابس وياج
خاف اتاخر وتظلين يم اهلي
قبس.. روح حبيبي لاتقلق بس تليفونك انتبه علي
ترى اقلق والله

قبس.. قفلت الباب وهو فتح باب البيت وطلع السياره
ونزل سده الله يكون بعونك وبعدني انتظر
ردة فعله لان بعده مصدوم ..

اذن الاذان صليت واخذتلي شكم لبسه وقررت
ماارجع حتلو كملت الفاتحه الا تتحسن نفسية بشار
ع الاقل يم اهله لمه ويلتهي موهنا بس اني وياا..

اجه عمو عادل اخذني والطريق كله يحجيلي
ع سامر شلون تعب وشلون عانى بحياته
تدرين عمو سامر مجاهد وتعب حيل
ولحد قبل هاي اللحظه  وهو ما ارتاح..

من عمره ١٢ سنه اجه شارد من ديالى وعاش
اسبوع بشوارع بغداد يفتر بيده طفله عمرهه سنتين
واكو رجال عنده مطعم ومساعده ومخلي ينظف المطعم بسبيل ينام هو واخته..

مات الرجال واجو ولده باعو المطعم وسامر شمروا بشارع هو واخته صار عمره ١٥ سنه يمكن واخته صغيرنه بحدود
ال٥ سنوات وصدفه جان ابوي يخيط وشافه وطببه
وانطا فلوس وماقبل ياخذ

ومن هاي تعرفنه علي وجبنا شكم يوم يمنه وصار
صديق بشار تعلق بي حيل ودرسوا سوه
وكام يشتغل وكعدله بشقه احنه ندفعله الايجار
وهاي تاليتهه لاتزوج ولا فرح باخته..

قبس.. عمو وهسه اخته وين تروح؟؟
عادل.. ماادري يابنتي عمامهه رايحلهم ناس قليل بحقهم
كلمه مجرمين سفاحين
تخيلي سنه من عدهن ذابحين اختهم كدام الكل وحاركين مرت اخوهم ومشاكلهم مستمره

قبس.. الله ياخذهم.. زين هو ابن عمهه يريدهه ليش مايتزوجهه يجوز يطلع ادمي..

عادل.. لا مو ادمي ابن عمهه متزوج اثنين ويريدهه الثالثه
علمود حصة ابوهه متشوفين سامر ماقبل
وحته راد يتنازلهم بالكاع بس حته يعوفون اخته بحالهم
عدهم الفلوس اهم حته من العرض

قبس.. ع سوالف عمو شفت نفسي بلباب نزلت جانت
بس شجن عيونهه مورمه واكيد ع المحروس
كعدت وياهه لابيه اواسيهه ولا بيه احجي

شجن.. شفتي قبس انقهرت ع سامر الله يرحمه
قبس.. اي والله بعده شباب انتي شلونج اليوم؟؟
شجن.. مثل ماتشوفيني كلبي جاي يتكطع؟؟

قبس.. كولي يالله مايستاهلج خلي يولي
وانتبهي ع حياتج كافي دمرتي نفسج..

شجن.. الله كريم.. كومي نسوي عشه هسه تجي ماما
قبس.. لعد صابرين وين ؟
شجن.. يم اهلهه ماراحت للحنه وعمر راح ورا بشار..

قبس.. ماتعرفين اخبار اسراء؟
شجن.. لا اتصل عليهه مترد بالي يمهه الله يساعدهه اخوهه
الوحيد هو الرباهه
قبس.. الله يكون بعونهه..
يله كومي للمطبخ اكعدي يمي واني اسوي

فتحت المجمده طلعت كبه وشجن تسوي بتيته شفت الباب انفتح طبن عمه بشرى وخاله وفاديه وهدى مناك رايحه لبيتهه

بشرى.. هاي قبوسه هناا تعالي ابوسج!!
قبس.. شلونج عمه
بشرى.. الحمدلله شبيجن وجوهجن مغبره..

شجن.. عمه سامر مات!!!
بشرى.. لطمت ع صدرهه اني عمتك يبشار شموته الولد ولجن منيلجن هالحجي

قبس.. حادث سياره وراح بيهه
بشرى .. الله يرحمه ولج تعالي ام بشار داده سامر ميت سوده عليه
ام بشار.. يمه وليدي بحفظ الرحمن
بشرى.. اكلهه مات ورايحين الولد

ام بشار.. واخته وينهه
قبس .. مانعرف
ام بشار.. يمه الله يساعد گلبهه وگلبك ياسامر يا اصيل الف رحمه ع روحك..

شو انطني تليفوني اخابر بشار اساله وين اسراء ؟؟
انطتهه فاديه التليفون خابرت تاخر يله شاله عزته خاله ومااسمع شيحجي بس كالتله ها ماشي لاتقلق

سدته وانطتني التليفون وكعدت ع الكرسي فتحت شالهه يكول ابو حسين راح يجيب اسراء يمكم ومحد يدري
لان الظاهر سامر موحادث لان لاگين سيارته مضروبه طلقات..
بشرى.. اكيد المايخافون الله عمامه الله ينتقم منهم
ضيعوا شبابه

قبس.. الجو متوتر تعشينه وب٩ اجه ابوحسين طلعت خاله تلكتهه البنيه زركه صايره بدون دموع بس تشهك
التمينه عليهه ونهدي بيهه وخاله حاضنتهه بس
شهكاتهه تزرف الكلب

حسيت نفسي تعبانه من علاجي صعدت لغرفتي الفوك
من شلنه خاله رجعت غرفه بشار القديمه بس بدلت الجربايه
بدل نفر سوتهه نفرين كالت من تجون يمنه ماتبقون حايرين..

مددت بفراشي تعبانه ماادري شلون اجت اسراء
ابالي وكلام بشار من كال وصه بيهه سامر
يمه عزااا بسلا بشار يتزوجهه؟؟

لااا مستحيل ميسويهه بس هو كال عمر
انطه وعد اسم الله شنو ذنبهه صابرين

ظلت الافكار تحوم براسي ساعه اكول
خلي عمامهه ياخذوهه وساعه انقهر عليهه
شنو ذنبهه تنحرم من مستقبلهه بهيج عائله سكط

شلت تليفوني اتصلت ع بشار اطمئنيت علي
جان صوته حيل كئيب ومخنوك سديته من عنده
ونمت..

مرت ايام الفاتحه وبشار يجي يسبح ويروح
اكتشفت شي جديد بي مايعبر عن حزنه باي شكل
لا بالبجي ولا بالصياح مجرد تبين علي الكسره والالم..

اسراء انزل مرات اشوفهه الكه شجن حاضنتهه وتريدلهه
حجه حته تبجي وياهه..

ولا واحد من عدنه راح لعرس غيث
بس سمعنه الزفه بالشارع وشجن كابلت اسراء
ودك ولطم لحدماتعبت والبنيه عبالهه تبجي وياهه

حته ماعرفنه شصار ماصار بالعرس بس فاديه بعدين حجتلنه
كالت جنهه خبله هي وعمه بسمه ركصن ركص مال اخبال
حته النسوان يكولن شبيهه امهه مامصدكه

المهم صفحه غيث انطوت وظلت ذكرى عالقه
بداخل شجن واتمنى تكدر بيوم ادوس ع كلبهه
وتنسى واحد اسمه غيث..

بعد اسبوع من الفاتحه اجه عمو بعصريه كال
هذوله عمام اسراء رايحين لشيخنه وباي حق احنه نخليهه
يمنه وباجر من الصبح يجون ياخذوهه..

بوقتهه كعد هو وجدو وعمو عامر شكد تناقشوا ع حل
بس للاسف عمامهه موجودين وقرروا باجر الصبح ياخذوهه

رغم اسراء شكد بجت وتوسلت بخاله دكول خلوني
خدامه ولاتزوجوني حيل انقهرت عليهه..

بليل جنه كلنه كاعدين واني بحضني علوش
صاير يخبل ويناغي وعمو عادل فتح موضوع اسراء بس هي جانت بالغرفه ..

بشار.. عمامهه اولى بيهه ومالنه حق نحجي اصلا عيب علينه
لان احنه غربه
عمر .... بس!!!

بشار.. لابس ولاغيرهه عمر اني اوديهه لعمامهه
البنيه ماتقربلنه بشي حتلو سامر صديقي بس مابيدي حل
لويقبلون يخلوهه يمنه حتلو مقابل فلوس ادفع بس عمامهه ناس شرانيين مالنه خلك مشاكل

ذاك اخوهه محد عرف منو كاتله ومزرفي بالطلقات ماعندي
حيل اتقاوى ويه عشائر مثلهم مايعرفون غير الحرام..

عمر.. يابه سامر قبل مايموت دائما يوصي بيهه
نكدر وسكت!!
بشار.. عمررررر شدد ع اسمه ورفع راسه بقلة صبر..

عادل.. شكو ؟؟ شنو البالك عمر؟؟
جانت صابرين كاعده ولا انسه هذا الموقف ابد

عمر.. اني اعقد عليهه ونكول اخذهه وخلي يرحون ومن تكبر اطلكهه ونحسبهه من البنات وتروح تزوج..

بس حجه هيج وهو عينه ع صابرين انتفضت
مثل اللبوه الجريحه هي وكفه هو صوت
شتحجي عمرررر تزوج عليه؟؟

عمر.. هدي هدي صابرين لاتصيحين بس مجرد عقد
حته لاتتاذى البنيه مالهه ذنب وسامر مايرتاح لان كل همه يحميهه منهم..

صابرين.. بدموع تجري وحجت بصوت مخنوك لعد ع حسابي
تزوجهه عليه ودكولهه بعيني وكدام الكل؟؟

ماكدرت تظل واكفه صعدت تركض ع الدرج حته ابنهه عافته يمنه والكل باوع لعمر ومصدومين من كلامه..

عمر.. لاتباوعون هيج اني انطيته وعد اخته بامانتنه واذا
لزم الامر اتزوجهه لحد يحجي..

بشار.. انت صاحي؟؟ عقلك وين تهدم عائلتك بهاي الخطوه
عادل.. اني ماقابل عمر مرتك وابنك شنو ذنبهم ترى
بتصرفك هذا تأذيهم

قبس.. شدد النقاش وزاد اكثر وماوصلوا لنتيجه بشار وعمو ماقابلين وعمر يحاول يقنعهم حته شكيت بلحظه هو رايدهه
واتعوذت من الشيطان ...

صعدت قبلهم لغرفتي احس هاي المشكله
ماراح تنحل وبيهه وماتتازم للاكثر
سديت باب الغرفه ومددت شويه سمعت صوت صابرين وهي تعيط..

كمت اريد اشوفهه شبيهه جان صوت عمر يمهه
سحبت القفل وظليت اباوع من الفتحه مال القفل
لان صوتهه يجي من برا..

شفته يجر بيهه يريد يفوتهه للغرفه وهي تفرفح
منتهيه بحيث يسحبهه تكعد بالكاع وماعدهه غير كلمه
تزوج عليه عمر؟؟ اني حبيبتك تزوج عليه؟؟

جان حاضنهه من راسهه واسمعه يهمسلهه بس مااميز
الكلام بس اسمع انتي حبيبتي وانتي روحي
وهو كلما يحجي تنفعل اكثر وتدفع بي

شكد حاول وراد منهه تفوت للغرفه وماقبلت
شكد انقهرت عليهه وماالومهه حقهه
شفت خاله اجت اخذتهه من عمر وكالتله يمي ترتاح بعدين حاجيهه ونزلتهه

اخذت نفس وكعدت ع الجربايه ياربي
حل هاي المشكله خطيه صابرين وخطيه
اسراء..

اجه بشار تعبان شمر نفسه ع الجربايه وفتحلي
ايده خليت راسي عليهه وايده تغلغلت بشعري

قبس.. بشار قابل بتصرف عمر؟؟
بشار.. اول ماسمعت خبر وفاة سامر نصحته
لايجازف بدمار عائلته ماكو وحده تقبل رجلهه يتزوج
عليهه باي حجه وحتلو ع ورق

بس هو انطه كلمه للمرحوم ويحس بالذنب
وماادري شلون تصفه

قبس.. خاف يكلولك انت تزوجهه لان صديقه المقرب مدري شلون اجت الفكره براسي..
بشار.. قبس والله مالي خلك سوالفج الماصخه
اشفتيني زعطوط واعالج الخطأ بخطا اكبر من عنده
خليني انام شويه ..

ثاني يوم اجو عمام اسراء ورادو ياخذوهه وعمر كالهم
اني عاقد عليهه من حياة المرحوم..

هذا الخبر جان صدمة للكل حته صابرين
وكعت من طولهه والتهينه بيهه

واسراء واكفه تبجي وتحس بالذنب كمت سالتهه
صدك هالحجي؟؟

اسراء.. اااي قبل شهر عقد عليه لان سامر جان
حاس يصير بي شي وقنعني حته يحميني من عمامي ..

قبس.. وانتي موافقه؟؟
اسراء.. ماعندي غير حل اعرف مرته تأذت بس والله
مااخليهه تشوف خيالي بس خلي انجح والله مااخذه منهه...

طلعت الزلم بعد ماشفوا العقد وبعد ماعدهم حجه لان
حته محكمه عاقد عليهه كلشي رسمي ..

صابرين تاخذ النفس كوه بحضن خاله وتبجي
كعدت لزمت ايدهه واقنع بيهه شي مؤقت
بس الله يساعدهه ماجانت تسمع اي شي
تسمع بس صوت گلبهه وهو يكلهه عمر تزوج عليج...

صابرين كامت تحجي انفعلت ودعت عليهه
اني شنو ذنبي تنكسر ركبتي وعائلتي
بسببهه

جان اتروح اتجيب ورقه عقد المحكمه وتخليهه
كدام صابرين وتكلهه شوفي
اني مرته هسه لاتظلين تتدعين عليه....

.
.
يتبببببع.. اعذروني قصير البارت مالحكت...