رواية قمع المشاعر الفصل الثاني وخمسون 52 - بقلم Rozaya1122

قمع المشاعر.... الثامن من الجزء الثاني...
للكاتبة زهراء ( روزايه)...

وين اروح وكلهة ضدي
الناس والدنياا وضحكتي
ارسم احلامي بمدينة من الرمال
ساعة وتهب ريح ويطشرونهة
وانتة ذاك الجنت اشوفن روحي بيك
تعوفني وتاخذ وياك الذكريات
الة اخلي الليل ياخذ عمر منك
وكلبك الما حبني يتوسل يجي
....

شجن..كل الانظار اتجهت عليه بوسط ضحكه من جدو
وهو يكلهه احنخ بناتنه غاليات ونريدلهن اليستاهلن
وامجد وليدنه مابيهه شي اذا قابله شجن..

ابلع بريكي مااكدر احجي بله شجاوبهه
ولا التفتت ع غيث ولاعبرته لان مصدومه
بكلام عمه بسمه وفوكاهه بابا حجه ويسالني شنو رأيج بنتي..

وحتلو جنت موافقه مثلا اكول كدام هاي الجموع
اني موافقه وبعدين اني صح شجن الضعيفه
بس مااعالج الخطأ بخطأ اكبر
وبعناد غيث اقبل بامجد اخو فاطمه وفرح...

بعدني ماحجيت واني اجمع الكلمات
اريد اكول لاا مامفكره اريد اكمل دراسه..
باوعت لبشار توقعته يعترض بس فاجأني بسكوته..

ماحسيت غير عمر عله صوته وكال والله عمه
امجد قبل ماهو ابنج هو صديقنه والنعم من عنده
بس اني نسيت افاتح الوالد بلموضوع بس بشار
يدري وجه لكلام اله يكله كتلك ع سالفه الولد الوياي

طبعا اعرفهم اخوتي بشار مايدري بشي
بس سوه نفسه يعرف وثق بكلام عمر
حجه بابا

عادل.. ياولد؟؟
عمر.. اكو ولد ابن عم صديقي ومتخرج العام وشايف شجن
اكثر من مره وحاجوني عليهه وكال حته اتكفل بعمليتهه
وبعد ماترهم انطيتهم حجايه وباجر يجون..

بسمه.. شكو بيهه خابره وكله ابن عمتي خطبهه
واولى مم الغريب..

عمر.. لاماترهم فشله الولد صار مده يلح عليه
وتالي انطي موعد وافشله كلشي بالقسمه
خلي يجي واذا ماصارت عود نسال شجن تقبل بامجد..

بسمه.. وهي شجن قابله بهذا الولد
عمر.. اي طبعا لعد لوماقابله مارجعتله جواب

شجن.. طول مايحجون اني مدنكه بالكاع خجلت حيل وامجد ماحجه كلمه وحده ظل ساكت
بس سكتوا كمت للغرفه احس الحراره طلعت من اذاني
ياولد ياخطبه هذا عمر شبي!!

كعدت ع جربايتي واني افكر بكلام عمر
خاف صدك يخلوني اتزوج اني مامستعده نفسيا
وبعدني بالكليه بس يجوز حجه هيج حته يغيض
غيث لان شاف حركات فاطمه..

ظليت كاعده واحرك برجلي الصاحيه
انفتح الباب صابرين اجت كعدت بصفي..

صابرين.. شجن عمر قبل ايام حجالي ع الولد وخوش ناس واهلهه متمكنين ويشتغل بشركه اهليه مال قروض
يعني فكري زين وعوفج من غيث ..

شجن.. الصراحه تفاجأت ماادري واني مامستعده للزواج
بهالوقت؟؟
صابرين.. احسنلج والله ترى غيث حتلو يحبج ماتصيرين
اله هسه بينت علي الغيره وعيونه صارن دم
وماكدر يظل كاعد طلع وكال مااجي للغده

بس مستحيل اخوتج يقبلون
فكري بمستقبلج واكسري خشومهن شلون
الشماته واضحه بعيونهن..

شجن..خلي تجي ماما وعمه بشرى واحجيلهن
واشوف رأيهن..
انتي موكلتي ماانزل شعجب نزلتي؟؟

صابرين.. عمر ماقبل كال الاتنزلين وشافتني فرح
فاتت من يمي والتليفون على اذنهه
ودكلي شنو شعورج اذا تزوج عليج حبيبج؟؟

عرفتهه تقصدني وسوت نفسهه تخابر
والله اكبر غلط رجعن حتلو تزعل بيبي
مامجبورين نتحمل هيج بنات دمرنه..

شجن.. عوفيهه لبسيهه وهسه ابدل واطلع وصيرن حزب عليهه موعبالهه مثل قبل كلشي تغير...

شجن.. بدلت ملابسي وطلعت لان راح يصير
الغده كلهن بالمطبخ وبس طبيت
فاطمه تحجي ويه امهه ماما شوفي هايه غيث دزهه
يكول اشتريلج منهه حلوه وتشوف بيهه لبنات عامر..

بسمه.. بعد ذوق غيث شلون موحلو وهو اليختار
هيج جمال هذا اصل الذوق..

فاديه.. منو مداح العروس غير امهه وخالتهه
عمه بسمه اتقي الله ترى فرح احلى من فاطمه بهوايه

بسمه.. ياااا ولج هاي فطومه الدمهه عسل دكولين موحلوه
لعد منو الحلوه بيجن؟؟

فاديه.. ليش عدنه قبس الا اشرد شوفيهه جنهه
هلال العيد جانت واكفه ترتب بالمواعين

وشجن خدودهه تخبل وبنات عمي عامر حلوات
يعني كلنه جمال عادي ماعدنه وحده موحلوه ابد..

بسمه.. اي بس بناتي محد بحلاتهن لاتقارنين بيهن
لان تخسرن؟؟

بشرى... عمت عين الباميا بناتهه!! ولج من جبتي فاطمه
موتخبلتي تصيحيلهه الزركه ع عمتهه
واسمهه خطيه تغار من فرح لان شكره وهذيج سوده

فاطمه.. اووو خاله شبيج تحجين عليه غير الاسمر
مرغوب..

بشرى.. امج جابتلج الحجي وطلعتنه جكمات وانتن الاميره ديانا دكومن صبن كتلنه الجوع
شلون اليوم ماعدنه شغل بس كال غيث وكال فاطمه
شبيجن مامصدكات...

فاديه.. كرصتهه من خدوده لك تأبرني ياجميل بشبش
انتي ماكو منج اثنين ..

بشرى.. امشي لج سويلي العصر محلبي واسكت
ميبساتهه عليه هالايام..

قبس.. شقه وضحك ورغم مداهرن ويه بسمه بس جان
بشقه حته محد زعل فرشنه السفره وشلنه الاكل

كعدت بصف بشار ودغيته بخاصرته شنج روحه
والتفت عليه جان يكول بسيطه !!! بنظرات توعد..

ناكل ونسولف صدك بيومهه اللمه حلوه واتونسنه
وساره مرحه حيل كلساع وكالت ماتفوت اللكمه ابلعومي
من ورا ام وائل بس ارجع دكلي اليوم
ماكله سمج الا تزوعي وتكرب عليه كراب الخيل..

شجن.. ثاني يوم صدك اجه عمر وكال العصر يجون
كون جاهزين وعمه بشرى وماما وهدى حجن هوايه براسي
اقتنعت اني حالتي مومثل البنات ومودائما تجيني خطابه
وناس زينه قررت اترك كلشي وراي وابدي حياة جديده..

للعصر اجت ام الولد وخالته واثنين بنات بكد هدى
اخواته طبيت وكعدت يمهم خلصنهه سوالف عاديه
وكلساع يرفعن راسهن عليه

اخذن رقم ماما وكالن انخابركم اني ماعندي اي احساس
لافرح ولاحزن ولاقلق شيجي من الله هله بي..

لليل وخابرن ع ماما صدفه كاعده يمنه
جان ام الولد دكول اعذرونه مانكدر نكسر بخاطرهه
بس ماتوقعنه هيج رجلهه ابنه ماكال هيج
شلون تخلف شلون تربي جهالهه الله يرزقهه القسمه الزينه

ماما ظلت تباوعلي عبالهه اهتم لو ابجي
لواندب حظي مثل قبل ماحجيت
لان هذا واقع حال ولازم اتعايش ويا
طبعا اني مومثل باقي البنات وحقهه تريد كامله لابنهه

قبس..مرت ايام طبيعيه بشار بين الدوام وبين
البيت يجهز بي لان قررنه ننتقل

بسمه ماتجينه من العيد واذا اجت وحدهه نص
ساعه تشوف بيبي وتروح وشويه خلصانين من المشاكل..

اليوم حاطه الجنط ومخليه ايدي ع خدي
وخاله والبنات ناصباتهه مناحه شلون راح انشيل
اجت السياره واخذوا كل الغراض واني حاضنه البنات وابجي
البيت بعيد بغير منطقه وراح اصير بعيده عنهن

تعودت هنا وماردت اطلع ابد جنت متمسكه بهذا البيت
بشكل موطبيعي احس رغم ذاك بيت جديد
واثاث راقي بس مامرتاحه مااحب الوحده ...

اول يوم نبات ابيتنه بعد ماسلمنه عليهم وكنالهم
باجر نجيكم عمو رغم حزنه بس فرحان يكول لازم يستقر

ظليت ارتب بشكم حاجه وداهمني النعاس
كلت باجر البنات يجن يساعدني حته تعشينه لفات
من كدماجنه تعبانين نمنه بسرعه...

فزيت ع صوت المنبه الساعه ب٧ بسرعه
كعدت بشار وكمت للمطبخ سويت جاي حته ريوك ماعدنه
كال اروح وادزلج المسواك

ع السريع شرب الجاي لان مايكدر ياخذ اجازه
يكول عدنه لود طلعت ورا لباب المطبخ بوسته
وقفل الباب وراح..
شربت جاي وغسلت الكوب وبديت بسره
ارتب واعزل البيت

عباره عن طابقين
كامل من كلشي اول ماانطب المطبخ امامي وع الجهه
اليسرى باب الاستقبال ومن عنده يطلع باب للصاله
غرفتين جوه وحده فارغه بعدهه والثانيه غرفتنه
وفوك هم غرفتين وصاله وحمام صعدت نظفتهم ونزلت ..

باوعت للساعه ب١١ تعبت حيل وجعت وماكو اي شي
بالثلاجه بس تفاحه ظاله من البارحه غسلتهه وواكفه بالمطبخ
اباوع ع الحديقه بعدهه هستوهه مزروعه بس بيهه ثيل كامل

شفت سياره وكفت بالباب وصوت سده البيبان مالتهه
اندك الباب ركضت خليت شال ع راسي وفتحت باب المطبخ
وطلعتلهم

فاديه وشجن وصابرين جايبهم عمر
فد فرحت بيهم عمر ماقبل يفوت كال العصر اجيكم

اول مره يجن للبيت ويمشن ويتلفتن
طبن للمطبخ خلن علاكه جبيره كالن هاي غداكم
ماما دزته فتحته شفته تمن ومرك باميا علي لحم خليتهم
ع الطباخ وكمت اشوفهم البيت...

كاعده يمهن ودك تليفوني بشار كتله البنات يمي لايظل بالك
وعندي غده من تجي جيب مسواك مااحتاج هسه...

شكد ماجنت تعبانه بس تونست وياهن
سوالف وشقه وتغدينه سوه وهم ساعدني بلبيت
للعصر اجه بشار قبل مايروحن وجان متسوك مسواك كامل
حته مواد تنظيف وشامبو ومعطرات

رتبتهم وهن يمي انسولف وبشار صعد نام
لان متغدي برا للمغرب اجه عمر اخذهن بعد ماطب شويه
باركلنه ع البيت

مرت ايام ملتهيه بلبيت الجديد خطار هوايه
اغلبهم اصدقاء بشار هم وعوائلهم اكثر جياتهم
بالليل واني لازم ابدل واستقبلهن وحده احلى من الثانيه
ومن عوائل راقيه...

بشار نصب كاميرات بلبيت كام من يطلع يقفل كل
الابواب واني اشوف من الكاميرا اليدك الباب اذا
غريب يدك ويروح...
منطقتنه كلهه بيوت جديده بس جار مايعرف بجاره
لو يموت كل واحد ساد بابه وكاعد

مرن شهرين ضبط ع شيلتنه بالبيت اني مستمره
ع علاجي رغم كمت اضوج من الصبح للمغرب اني وحدي
مليت من التلفزيون ومليت من التليفون
رغم بشار كام يرجع المغرب وبليل اذا بيوم يطلع
ياخذني لاهله...

بيوم من عدهن سويت عشه وصليت ومخليه ايدي
ع خدي وصافنه قبلهه العصر اني شبعت بجي
حيل كمت اضوج يمر النهار كله واني وحدي
اتمنيت ارجع لذاك البيت ماادري ليش مامرتاحه هنااا..

سمعت باب المطبخ انفتح كل يوم اكوم اتلكا
اليوم ظليت كاعده على كعدتي
من فات خله السويج
والتليفون ع الطبله واجه عليه .

جرني لحضنه يبوس بيه ويحجي
شبي الحلو ضايج وماتلكاني اليوم؟؟

قبس.. مليت وحدي من الصبح لليل طكت روحي !!
بشار.. شبيدي عليج حبييتي اني دوامي مزعج
وبس هالشهر واستلم الترقيه وتصير اصعب
حته للمحافظات اروح ..

قبس.. واني شمفتهمه منك بس بليل يمي
ومرات تعبان والنهار كله وحدي حته مليت
من النوم وماكوشي اتلهه بي..

بشار.. اكو واحد اعرفه فتح مدرسه اهليه بمنطقتنه
قريبه على اهلي اداومين بيهه؟؟
ولو اني مااريدج اتعبين بس علمودج لان وحدج بين
مايصير عدنه طفل تتلهين بي..

قبس.. واني مو مدرسه؟؟ اني خريجه معهد حاسبات
بشار.. اي مو الا مدرسه يخليج ع الحاسبه واني صاحب
فضل علي لان عينت بنته بعقد واكيد راح يقبل..

قبس.. بكيفك ومناك اروح لبيت عمي ومن تجي
انت تاخذني..
بشار.. لا مودائما تروحين اني اسجلج خط يرجعج للبيت
بس بيوم الماموجود او اتاخر روحي لاهلي..

قبس .. هااا بكيفك التشوفه انت حبيبي
بشار.. علمودج والله اني مااريدج اداومين واتعبين
بس المدرسه بنات فقط وكادرهه نسوي والمستثمر
اعرفه ورجال جبير يعني امن عليج يمه..

وهسه يله كومي حته نتعشه بين مااسبح
كومي حبيبتي شتريدين اني حاضر بس
مااشوف هاي الحواجب معكوده والعيون زعلانه ..

قبس.. بسته من خده كوم حبيبي الحمام جاهز واني راح اصب العشا تصلي ورا العشا؟؟
بشار.. لا هسه اسبح واصلي ع كيفج لاتستعجلين..

قبس.. راح للحمام واني بديت اجهز الاكل على الميز
نتعشه بالمطبخ وشاشه الكاميرات بالمطبخ
كعدت انتظره يجي واني اباوع ع الشارع وع اركان البيت
شلون ناس عبالك موتى لا طفل يطلع بشارع لا واحد يوكف بالباب..

ثاني يوم اخذني لبيت عمي الصبح وكال العصر اجيج
احس روحي ردت واني افوت للبيت اكره الوحده
عمري خلصته وحيده اريد اللمه اريد العائله الحلوه..

فاديه.. يابنات اريد احجيلكم شي؟؟
قبس.. شكوووو؟؟

فاديه.. اكو موظف ويانه برئاسة القسم
دائما اشوفه يباوع لو واكفه ويه البنات ويمر من يمنه
وعينه عليه حته صديقاتي انتبهن

ماانكر اني هم معجبه بشخصيته ورزن حيل
بس لا احجي ويا ولايوم باوعتله وجه لوجه
دائما اتجنبه حته اذا صادفني وجه بوجه..

قبل اسبوع اجه للقاعه واستأذن من الدكتور
كال فاديه عادل يريدهه العميد!!

حته استغربت شيريد العميد واني عمري ماصاعده لطابق الرئاسه طلعت من القاعه كتله شيريد العميد؟؟
جان يكول مااعرف مشيت ويا وبسرعه فتح الباب
ودخلت

جانت اكو مره تطلع بكد ماما سلمت ووكفت كدامه وهو
كعد كدام المره حجه ويايه العميد اسمج الرباعي؟؟
ولقبج وبهالكلاوات معقوله عميد مايعرف معلومات الطلاب
يكدر ياخذهن من التسجيل..

بعدين ظل يسال انتو بيت منو؟ والمره تباوعلي
حته نظراتهه ربكتني كمل اسئله وكال اتفضلي

رجعت للقاعه وبالي شارد شي مايشبه شي
وشيريد العميد من عندي بس طلع الدكتور
بسرعه طلعت سحبت صديقتي اسولفلهه

ظلت صافنه بوجهي جان دكول ولج فدو ترى
كمال اليباوعلج دائما واجه صاحج هذا كرايب
العميد واحتمال المره جايه تشوفج اني كتلج
ترى الولد رايدج ومن العام يفتر وراج..

وثاني يوم من داومت لكيته واكفلي يم الاستعلامات
بس شافني جان يوكفني كال دقيقه من وقتج!!

وظل يحجي واني من كد الارتباك حته ماسمعت
كل كلامه بس كال رجعيلي جواب اريد ادز الوالده ..

واني حجيت لعمه بشرى وماما كالت اذا خوش ولد
مابيهه شي اهم شي مقتنعه واني هسه سولفتلجن لان
حايره..

قبس.. انتي موصغيره اذا الولد عاجبج وابن ناس
مابيهه شي اولهه وتاليهه تزوجين
شجن.. والله فاديه اذا زين اقبلي وانتي معجبه بي
وتقريبا تحبي خلي يجون وعود بس خطوبه
وورا التخرج اتزوجي..

قبس.. ظلينه نحجي ويه فاديه وكالت خلي افكر
وارجعله الجواب مااريد استعجل..

واني للمغرب ورجعت للبيت وبيومهه اني وبشار خلصنه
الليل سهرانين ع مسلسل اسباني عشر حلقات

شجن... ورا يومين من راحت قبس خابرتنه عمه
بسمه وبدون سابق انذار عزمتنه ع حنة غيث..

بيومهه جنت اشتعل وانطفي وارجع اشتعل
مابيدي شي غير ادعي الله يبرد كلبي
مثل الجرح بلاول مانحس بالمه بس بمرور الوقت
يكوم يحفر بالكلب ..

جنت اكول اروح وساعه اكول لا مااروح
تمنيت قبس يمي بس للاسف كالت مااجي
لا اريد فرح ولا اختهه واصلا بشار ماخذهه
للمطعم ودكول يتعكر مزاجي اذا اشوفهن..

دموعي تصب وگلبي محترك من الالم معقوله
اشوفه عريس كدامي ويزفونه بوسط الهلاهل

جنت مقرره البس واروح واسوي نفسي مامهتمه
بس جذب ماكدرت مااكدر امثل اني فاشله بكلشي
هاي ضريبه اغلاطي جاي ادفعهه ع شكل دفعات..

ذبيت الستره ع جربايه وشمرت العكازات وكعدت
واني امسح بدموعي كافي لاتبجين كافي مامليتن
ماخلص الدمع البيجن جنت احجي ويه نفسي

وانفتح الباب فاديه هااا ولج ماتروحين موو؟؟
.. اي مااروح وشهكت من البجيه المسيطره عليه

فاديه.. احسن لاتروحين وماعندي كلام اواسيج بي
بس اكلج المايريدك ورده بقميصه لاتريده قيطان بحذائك

.. عبالج الحجي سهل اعرف احنه متفاركين
ومستحيل ننجمع بس كلبي جاي يتكطع من الالم
اهلي راحوا كلهم وفاديه مصممه تروح لغايه براسهه

واني ظليت مثل السمج المزوهر اگلب بروحي العزيزه
وكلبي دكاته مامنتظمه واحسه تعب من الالم تعبت ياربي لو تاخذ امانتك لو تخلصني من هذا الحب الماله نهايه!!!

راحت فاديه وماما لان الحنه ابيت عمه
وصابرين راحت لاهلهه واني صعدت للسطح
استند ع الحايط لحدما وصلت

دموعي تجري اصلا مابستاهل ابجي علي
بس موبيدي اني هسه مااحس بضعف بس
مقهوره ع شبابي الراح بيد هاي العائله

مقهوره ع نفسي وتعبي كله من ايدي
اني اذيت نفسي وجذب يكول احبج
لو يحبني مايسوي هيج جذاب واحد
يحب ينتقم ويفرض نفسه..

كمت اسمع صوت الهلاهل الطالعه من بيت خالي
كمت اسمع فرحتهم واني مخليه راسي
بين رجليه وابجي ع نفسي

بهذا الوقت مابجيت بس ع نفسي
وخسراتي الهه بجيت ع صحتي الراحت
من عندي وتالي هيج تاليتي..

بعد علو الهلاهل خلوني اسمع
الهوسه هاي الرادهه وهاي التمناهه
بعد اركصوا ع جروحي...

لحد ماصار المغرب واني ع فد دموع
نزلت توضيت اصلي وادعي الله
يريحني ويوفقني بالجاي

جنت مدنكه ع السجاده واناجي بربي
بدموع وخشوع وسمعت الباب انفتح حيل

شلت راسي واستغفرت وكمت عمر صعد يركض
ع الدرج وبابا ورا يصفك بادي بحزن
عيوني جانت مورمه بس كدرت اساله شصاير بابا؟؟

عادل.. لا اله الا الله يابنتي سامر صديق
بشار مسوي حادث وهسه خابروا عمامه الولد متوفي ...

شجن.. البقاء لله بابا الحكوا ع اسراء اخته
لايجون عمامهه ياخذوهه ....

يتبببببع ... احبكم....