رواية قمع المشاعر الفصل الرابع وخمسون 54 - بقلم Rozaya1122

قمع المشاعر.... العاشر من الجزء الثاني...
للكاتبة زهراء ( روزايه)...

اسراء.. لاتدعين عليه ولاتسبين اهلي اني هسه
مرته حالي من حالج اتقبلي الموضوع واسكتي.

صابرين بحضن خاله وشمرت نفسهه تريد تهد عليهه
بس لزمتهه خاله وحجت بحديه

اسراء احترمي المكان الكاعده بي والله وروح ابويه
هسه اطلع لعمامج واكلهم اخذوهه ماريد هجمان بيوت

ديربالج توكفين بوجه صابرين هالمره حجيتيهه
المره الثانيه اتصرف وياج غير تصرف
عمر ماعنده مره غير وحده بس صابرين
وانتي لخاطر المرحوم حميناج لاتستغلين هالشي ..

اسراء.. كعدت بالكاع ولزمت ايد صابرين بس دفعتهه
حيل ودارت وجهه كامت تبجي والله اني مالي ذنب
اني مااريد اهجم بيتهه والله حته جنت ماقابله
بس ماعندي حل ثاني

صابرين.. عندج حل تروحين لعمامج وتزوجين وتنسترين
مامجبوره اتحملج بحجه ماعندج احد
لاعبالج اقبل لو ع جثتي لواني لوانتي بأسم عمر..

قبس.. اسراء تبجي وصابرين ادك وتنوح واني حاطه
ايدي ع خدي وصافنه وفاديه تهدي بصابرين
وشجن تهدي باسراء..

بحدود النصف ساعه وصابرين بس تشهك
وماعدهه غير كلمه اني مااقبل ..

واسراء بدت حالتهه تسوء اكصر ووجهه صار ازرك
وصوت نفسهه عالي وخاله حايره بين هاي وهاي
تهدي منو وتوكف ويه منو..

قبس.. كومي فاديه اخذي اسراء للغرفه تعبت واني اخذ
صابرين يمي..
فاديه.. مالي علاقه خلي تاخذهه شجن
قبس.. ولج فاديه عيب بين ماانشوف حل
فاديه.. مااكوم كتلج حاجي شجن..

قبس.. استغفر الله والتفتت ع شجن كتلهه اخذيهه
كامت اخذتهه للغرفه وصابرين مرجعه راسهه ع التخم
تقربت يمهه حاجيتهه

كومي حبيبه تعالي يمي بالغرفه خطيه شوفي ابنج
شلون مفزوع نخلي يم خاله وصعدي يمي..

صابرين.. مااريد عوفيني هنا مااريد اشوف وجه عمر
عاقد عليهه وهسه هي مرته بالشرع والقانون
ويجي يمي واني الغبيه ماادري بشي ..

قبس.. تصدكيني اذا حجيت!! والله انجبر من زعلتي بهذيج الفتره جان مقهور وراد يتزوجهه ومن رجعتي اصلا نسى الموضوع بس هسه شلون صار هالشي مااعرف

صابرين.. لاتقنعوني وتريدوني اتقبل الموضوع
خلي نفسج بمكاني تقبلين؟؟

شوفي قبس سامر صديق بشار واذا يريد
يساعده فالمفروض بشار اليعقد بس ماضحه بيج
ولا بحبه ورفض رغم علاقته ويه سامر
بس عمر مجرد صديق اخو راح ضحه بيه وبابنه

قبس.. شدكولين حقج ولو بمكانج هم انهار بس بالهداوه لازم
نحلهه كومي لخاطر علوش كومي اصعدي يمي..

صابرين.. مااثقل عليكم هسه يجي بشار
يريد يرتاح راح اظل بغرفه خاله
ويجي لويطلكني لو يطلكهه!!

قبس.. والله مااعرف شكول احس الكلام ضاع
وماكو كلمه تكدر تبرد گلبهه اخذتهه لغرفة خاله مددتهه ع الجربايه وغطت راسهه تبجي..

عفتهه وطلعت لغرفة البنات اسراء تبجي ومبين
عليهه متخربطه وشجن تمسح بوجهه كلساع تجيهه حالة اغماء..

كاعده وساكته ماحجيت سمعت صوت عمر وبشار برا
بسرعه طلعت لكيت خاله تحجي ويه عمر بعصبيه
وعمو عادل داير وجهه وزعلان علي

كعدت بصف بشار واني اباوعله شكد تعبان حته لحيته
عاليه غمض عيونه بقلة صبر وسحب باكيت الجكاير
طلعله وحده خلاهه بحلكه وحاجاني جيبيلي الجداحه..

كمت للمطبخ جبتله الجداحه ورث الجكاره واحسه
يدخن بحرگة گلب وهو يستمع لعمر ..

عادل.. اني ابوك لو اخوكم الصغير ولك مااستحيت
تعقد واني مالي علم وكدام الناس اتفاجئ عقل ماعندك
من هجمت بيتك..

عمر.. يابه صار الصار افتهموا عاد صابرين مرتي واحبهه
ومستحيل افضل وحده عليهه بس السويته
لخاطر سامر مو اكثر والبنيه بس ينسون السالفه عمامهه
اطلكهه وتزوج وتروح بحالهه

بشار.. انجب لك لا اكوم ابتلي بيك صغير انت
زعطوط عقل ماعندك ؟؟ مافكرت بالنهايه شنو؟؟

اسمع خلي افهمك لان ادري بيك ارعن!!
اسراء تسمت باسمك وماعدهه احد ومن اطلكهه معناتهه
شمرتهه بالشارع
وسالفه تروح تزوج احنه وين عايشين من اطلكهه وين تعيش
حته يجوهه خطابه لو يجون يخطبوهه منك انت زوجهه السابق

وبعدين ليش ماحجيتلي اني مويمك ليش مااجيت
ونكدر نحلهه باي طريقه انشوف واحد انزوجهه مو انت
يافهيم

روح هذيج مرتك شلون راح تقنعهه وانت كسرت كلبهه
وعبالك راح يظل زواجك ع ورق؟؟ لا غلطان شويه شويه
دكوم تقسم ايامك بيناتهن ومحد خسران غيرك
لان خسرت مرتك ام ابنك هاي اذا قبلت تظل يمك..

عمر.. بشار اعرف السويته غلط بس انت تدري
بسامر يوميه مهددي وجان حاس بنفسه
مايطول واني غلطت من انطيته كلمه وذكرني بيهه
ماكدرت اتراجع بيهه

وجاب البنيه وصار الحجي واتفاق مجرد حمايه
واصلا اعتبرهه مثل الامانه ولا اني حيوان
حته بيوم افكر بيهه عندي مرتي واحبهه ومااعوفهه

عادل.. اني مااتحمل مشاكل عمامهه اساعدهه بالمعقول
موبهجمان البيوت عمر تصرفك غلط وراح تندم علي
وكول ابوي كالي والله ياعمر راح يجي يوم تاكل اصابعك ندم
ومو بس انت راح تتأذى حته احنه وياك..

بشار.. كومي قبس تعبان اريد انام وانت روح شوفلك حل
ويه مرتك وديربالك ترى مرتك عدهه الانتحار عاده
يعني مابينه خساره وفضيحه ونخيط شك ينفتح الثاني..

قبس.. كام بشار وكمت ويا عمر مخلي راسه بين اديه ومدنك
وخاله تحجي وتلوم بي وعمو من جهه وجدو الوحيد المساند عمر يكول كبرتوهه ...

طب كدامي للغرفه واني ورا سديت الباب وتقربتله
اليوم ماداوم من ورا المشكله لان اجو عمامهه من الصبح..

كعد ع الجربايه واستند ع اديه رجعهن ليورا ورجلي
بالكاع خليت ايدي ع رجله غمض عيونه!!

حجيت بهدوء حبيبي كوم بدل حته تمدد ترتاح..
انت مابيدك شي عمر موصغير وانت نصحته
اكثر من مره والباقي علي..
واحتمال يبقى ع ورق هو يحب صابرين

بشار.. اني مقهور منهم شلون ضموا عليه
حته المرحوم يدري بيه مااقبل بهيج حل
وماحجالي والف مره كتله زوج اختك واطلع من
المشكله بس ماعرف يتصرف..

قبس.. هي هم خطيه كلساع تتخربط وتبجي هم
فراك اخوهه الرباهه وهم الشعور بالذنب والبيت كله
مايريدهه ع كيفكم والله اني انقهرت عليهه

بشار.. لان كلبج بارد انقهرتي لو بمكان صابرين جان
هسه مكلوبه عليه طنطل..
قبس.. احطلك سم واسمك عاد بالتراب ولابحضن النسوان..

بشار.. لعد سدي حلكج ولاادافعين للغلط باجر خلي نرجع لبيتنه
اريد ارتاح هنا بس المشاكل..
قبس.. بس هم هسه محتاجيك؟؟
بشار.. محد محتاجني اني وابوي اخر من يعلم هو غلط
هو يحل غلطه

قبس.. خاف تطلك صابرين؟؟
بشار.. الله اعلم صابرين عدهه طيش ودائما تتبع عاطفتهه
واحتمال تطلك واحتمال لا

خليني انام شويه تعبان وانتي انزلي يمهن
ولاتحجين لا بالزين ولا بالشين ولاادافعين لطرف
ولادكولين خطيه محد خطيه غير صابرين..

قبس.. ماشي نام انت واني انزل يمهن مااكعدك لحدماتكعد
وحدك.. عفته مدد ونزلت الجو متكهرب عمر رايد يفوت لصابرين وماقابله وطالع..

رحت يم خاله بالمطبخ ساعدتهه بالغده ونحجي
بالموضوع وفاديه حسيت بيهه مامرتاحه لاسراء
بحيث وكفت ويه صابرين بس شجن وياهه..

اكو حجي بحلكهه وحايره شلون تحجي
رفعتلهه حاجبي بمعنى شكو اشرتلي باصبعهه
خطوبه جانت خاله دايره وجهه ع الطباخ..

هزيتلهه راسي بمعنى احجي واني وياج
كامت تكح وشالتنه احم احم
جان دكول ماما اريد احاجيج

ام بشار.. احجي
فاديه.. الولد الكتلكم علي وسولفتلج انتي وعمه بشرى
صار يومين يجيب اخته وياا يريد يجون للبيت

ام بشار.. اني كلت لابوج بس اخوتج مايدرون
شمعرفنه بيهم غير نسأل..

قبس.. خاله هي خطبه عاديه ونسوي نفسنه
كدامهم منعرف يجن يخطبن ونكلهم نسأل ونرجعلكم خبر
وبعدين الولد يسالون عليهم

ام بشار..ولج فاديه مبينه انتي راغبه وتريدين ترجعين
خبر..
فاديه.. لاماما موهيج والله العظيم ماعندي شي
اجيت وحجيتلج السالفه كلهه وحجيت لقبس
وهو منتظر جواب والباقي بكيفكم..

ام بشار.. من اداومين باجر احد واذا اجت اخته كليلهه
الحجي يم اهلي مويمي وخلي يجون وانشوف
ولو هسه مو وكتهه بيتنه مشحون...

قبس.. خاله لعد تتعطل امورنه هذا الشي صار
وانتهى فاديه موصغيره هي وشجن اي واحد يجي
اسالوا واذا قسمه زينه لاتتعطلون علمود ظروف فلان وفلان
مشاكلنه ماتخلص..

ام بشار.. ذبت الخاشوكه واجت كعدت يمنه ع الكرسي
تعالن فهمني شلون تنحل ولجن گلبي لاعب من عمر
خاف حاب البنيه ورايدهه

قبس.. معقوله!! ترى صابرين يحبهه ويخاف عليهه
بس سمعتي كال غلطت يعني حاس بغلطه..

فاديه.. شوفي ماما اعرف راح ترزليني بس
الله بالمرصاد لاتتوقعين وحده تمشي بدرب الخباثه
وتأذي انسان والله يعديهه الهه

الله شاهد اني مااكرهه وهسه كلبي متكطع عليهه
بس تذكرين شسوت بقبس واتفقت ويه فرح!!
ماما بس تخيلي لو بشار مصدك ومالگه دليل
موهسه قبس بخبر كان!!

ام بشار.. لاتشمتين ولج ديربالج تحجين هالحجي كدامهه
املص اذاناتج..
فاديه.. مااحجي كدامهه وكتلج مامشمته بس والله
هاي عقتاب رب العالمين لان لوماكاشفتهه هدى هي جانت مستمره بعلاقتهه ويه فرح

قبس.. لافاديه لاتحجين بهالموضوع والله وروح اهلي
گلبي متكطع عليهه واتمنى اساعدهه واني مسامحتهه
ولاشايله ذرة حقد عليهه ...

ام بشار.. اسمعني اني راح اقنع صابرين تظل هنا وماتروح
لاهلهه واريد عينجن على اسراء بهاي الايام
كلنه انراقبهه اريد اوكف ع العله اشوف عمر  يريدهه لولا..

فاديه.. صايره كله تخطيط وتكتيك ام بشار..
ام بشار.. مالي خلكج ولج روحي بخشمي ع بنات الناس
الورطهن اخوج وراح يخسر راحته

قبس.. عفتهن يسولفن وصعدت لغرفتي بشار غاط بالنوم
لزمت تليفوني اتصفح بي اني ماعندي اي برنامج تواصل
ماعدا واتساب احجي بي ويه البنات
مافاتحه الموضوع ويه بشار ولاهو مانعني
اشوف بس يوتيوب وبرنامج شاهد ..

مر الوقت واذن الاذان كمت اتوضيت وصليت
واخذت علاجي قبل الاكل باوعت للساعه ب١ هسه
عمو يجي لان راح للمحلات خلي اكعد بشار كافي نوم..
لان ورا دوام ب٢ كال اروح ويه المسائي لان الصبح ماكدر يروح..

جان نايم ع ظهره وايده ع عيونه هاي نومته المعتاده
واقدام رجليه وحده ع الثانيه مددت بصفه وكمت احرك
اصبعي السبابه ع لحيته  ورفعت ايده من عيونه
كرمش عيونه وعقد حواحبه..

فتح عيونه ومبين بعده نعسان كتله اكعد حبيبي الساعه ب١
موتروح للدوام ؟؟
بشار.. ليش تتحرشين بيه ؟؟

قبس.. وين متحرشه اني من اتحرش بيك هيج شوف
ودغيته ببطنه بسرعه لزم ايدي ولواهه حيل حسيتهه راح اطك

صحت اااخ ايدي بشار طكت ايدي عوفني!!
بشار.. الا اكسرهه يله ترتاحين يابشر اكره هاي الحركه ماتفتهمين..

قبس.. لا افتهم بس عوف ايدي الله عليك..وسويت نفسي
اريد ابجي وافرك بيهه شوف شسويت جان انكسرت
ايدي وما اسامحك ابد..

خليته يلتهي وياي وهو عباله صدك راح ابجي
وادغه دغه قويه بنص بطني وبسرعه
نزلت حته عثرت بطرف الفرشه وردت اوكع..

التفتت علي جان كاعد واشرلي بتوعد اني اعلمج
اطلعهه من عندج هاي الحاله السخيفه..

كمت اضحك واشرتله بيدي بمعناتهه جاوو
اني راح انزل اجهز الغده حبيب البي وانطيته بوسه
بالهوا سمعت ضحكته وهو يكول مخبله !!!

نزلت واني مبتسمه خاله تصلي ومحد بالمطبخ
كمت اجهز بالغده واجت فاديه ويايه وشجن يم اسراء
وصابرين حابسه نفسهه ..

فرشت السفره وكمت اشيل بالمواعين بين مايجون
عمر جان موجود بس بغرفته وعمو بغرفه جدو بس بيبي
يم بيت عمو عامر..

صحتهم واحد واحد تعالو تغدوا نزل بشار وعمر وطلعت
اسراء وشجن بس صابرين ماقبلت وبعدهه تبجي..

سال عليهه عمو كتله متقبل تاكل!! كال اني راح اكوملهه
وخطيه عاف الاكل وراحلهه وعمر مدنك ياكل حاجته خاله
ليش مارحت لمرتك تقنعهه تاكل..

عمر.. رحتلهه ماقبلت ومنفعله عوفوهه تهدأ.. شويه وصاح عمو ام بشار صبي صينيه مرتبه وتعالي ناكل اني وياج وبنيتنه ..

اسراء مدنكه وكامت خاله اخذت من السفره وصبت من الطباخ الباقي واخذت الصينيه وراحت يمهم..

كملنه الاكل بوسط هدوء تام بس صوت الخواشيك
عمر مااكل هوايه شويه وكام صعد لغرفته واحنه كملنه
وفاديه كالت اصعدي اني اغسل مواعين..
بشار بدل وراح للدوام واني طفيت الضوه ونمت

للعصر فزيت ع صوت صابرين عالي كمت لبست وطلعت
واكفه ع الدرج واشوف خاله تتوسل بيهه وهي ابد ماتسمع
اخذت ابنهه وملابسهه والتفتت على اسراء

كالتله حسبي الله ونعم الوكيل بيج اختاريتي راحتج ع حساب
حياتي مااكول غير تتلكيهه بعدين ولاتصدكيم بي
مثل ماباع بعقلي حلاوه هم راح يسوي بيج هيج

طلعت رغم توسلات خالتي واسراء بس تبجي
لليل اجه عمر ماحجه شي بس مبين على الحزن
وبشار ساكت الكل ماعنده كلمه يحجيهه..

ثاني يوم جنت غاطه بالنوم حسيت على بوسات
بشار وهو يكعد بيه مسحتهه بيدي لان دغدغني بلحيته

بشار.. تمسحين بوستي ؟؟ هاا
قبس.. عوفني انام ماشبعانه نوم..
بشار.. كومي كومي لازم اليوم تباشرين بالدوام نسيت البارحه
اكلج

قبس.. فتحت عيني كتله كول والله
بشار.. صباح الخير .. يايوم مجذب عليج
قبس.. صباح النور تعال ابوسك تعال يا حبيبي ودنك راسه عليه وبسته من خده ..

سحبني من ايدي وكمت هو نزل واني ع السريع غسلت وبدلت
جنت حيل فرحانه طايره من الفرح واخيرا راح اطلع من البيت
احب الالتزام واحب الشغل حيل ..

بدلت ونزلت هو من كعدني جان مبدل خاله عدهه علم هو حاجيلهه سوتلي حليب وتوسلتلي اكل بيضه
من الصبح ما اشتهي بس اكلت لخاطرهه وطلعنه للدوام..

المدرسه حيل قريبه ع بيت عمو اكدر اروح ارجع مشي بس فرع بيناتنه نزل ويايه وطبيت للاداره
جان المستثمر موجود سلم ع بشار وعرفنه ع المديره وانطوني شغلي هو ع الحاسبه ..

استأذن بشار من طلع كال من تريدين اطلعين خابري
امي تتلكاج علما تتعودين مع العلم ماتستوجب بس
كتله ماشي ..

باشرت اول يوم واني كاعده بغرفه صغيره بيهه
الحاسبه ولوكر وطابعه وجهاز استنساخ يعني لا اطلع
ولا اشوف احد بس بالفرصه اباوع من الجام
ع الطالبات شلون لبش شلون اناقه..

من خلصت الدوام دكيت ع خاله تلكتني براس الفرع
ورجعت للبيت هدوء البنات بالكليه وبس اسراء جانت تقره
قران

سالت خاله ع صابرين كالت ماكو اخبار جديده
خلوهه تهدء وانشوف بلكي انشوف حل..

من رجعت فاديه من الدوام جانت مخبوصه اليوم يجون
اهل كمال وانخبصنه وياهه خابرنه ابو حسين جابلنه
شغلات تقديم وعصير وهي راحت تسبح وخابرنه ع هدى وعمه بشرى حته يكونن موجودات..

للمغرب يله اجو اخواته ٢ وامه وعمته وحده جيرانهم يكلولهه
العلويه يكولون احنه من نخطب ناخذهه ويانه علاقتهم قويه بيهم..

فاديه قدمتلهم وكعدت وهن يباوعلهه اني مدري
شبيه مبتسمه يمكن لان ماعشت هيج اجواء..

حجت امهم وصار نقاش وخاله كالتلهم يجون اخوتهه وابوهه
وانرجعلكم الجواب طلعوا من عدنه ورا الاذان عمه بشرى راحت
وهدى ماقبلت تظل كالت جهالي بالبيت عفتهم..

شجن.. اسراء ماتحجي ابد ولاتفتح حلكهه بكلمه والليل كله
بس تبجي انقهر عليهه حيل
لا اهل عدهه ووجودهه يمنه غير مرحب يعني تحس بنفسهه
ثقيله ع الكل ..

اني بهايه الفتره صرت مدمنه مال كتب ليل نهار اقره
كتب روايات عالميه اقره لكتاب اجانب حسيت نفسي
بهذني الشهرين تغيرت تغير جذري

صرت شجن ثانيه اعرف اناقش واعرف ارد المقابل
واخلي حاير شلون يجاوبني صرت جريئه نوعا ما وكمت
اشارك حته بالمحاظره بعد ماجنت منطويه وحته صديقات ماعندي..

رجعت اتواصل ويه صديقاتي الجانن بالاعلام
حسيت نفسي كبرت وتعلمت
رغم تفكيري بغيث بس قويت نفسي وتركت كلشي
وانتبهت ع حياتي ومستقبلي...

ماما حجت لاخوتي ع كمال كالو نسال علي اذا فاديه موافقه
وبعد يومين اجه بشار جان يكول
هم عائله زينه والكل مدح باخلاقهم بس الولد اكو شكم واحد
كالو قبل من جان مراهق جان يشرب ..

بابا تخبل وكال منا وسدو الموضوع وبشار جان رأيه من رأي
بابا وكال الاحسن انسده احتمال يرجع يشرب وتعالوا يا اهلي خلصوني..

من سمعت فاديه صارت عدهه ردة فعل قويه
وكامت تبجي وخابرت هدى تريدهه تقنعهم
وادخلت هدى وجان الجواب نفسه مايفيدهه

ظلوا بحدود الاسبوع موضوع فاديه الكل تحجي بي
ورجعوا خبر لاهلهه وبس سمعوا راحوا لعمو عامر وراحوا لبيت
اخو جدو ماخلو واحد قريب علينه ماراحوله

الولد جان متمسك حيل بفاديه وبشار صار صريح
ويه اهلهه وكال لابو ابنكم جان يشرب بمراهقته
واحنه هذا موثوبنه ..

ظل ابو الولد يتوسل وابني جان مراهق وطايش
وعنده صديق موزين ووكعه ومن هذاك اليوم لهذا اليوم
ابني صوم وصلاه كلنه نغلط وهو غلط وتاب واني اتكفله الكم
من كدما توسلوا حته استحوا يرفضون

بس بشار ظل مصر ع رأيه رغم بابا وافق بس هو
كلما حجه وكال مايفيدهه المشه بدرب الحرام مره
يمشي بي مره ثانيه ..

بس هدى ظلت تحجي ووضحت لبشار بأن فاديه
موافقه ورايدته وبيومهه بشار انفجر ع هدى وصاح ع فاديه
بعصبيه عباله عدهه علاقه بي بس ظلت تبجي وتحلف
ماحاجيه ويااا

اخر شي من شاف الكل موافق وضد رأيه كال اني العليه
حجيته ونصحتهه ونصحتكم الباقي عليكم

وتفاجات بجرأه فاديه من وكفت كدام الكل وكالت موافقه
بيومهه شكد غميت نفسي ليش اني جبانه وضيعت
كلشي من ايدي ليش ماتعلمت القوه من اخواتي
من يدافعن عن نفسهن وعن حقهن

بشار جان كاعد من كالت موافقه كالهه كدام الكل انتي
تتحملين نتيجه اختيارج اذا شكيتي منه بيوم
تعالي لابوج وعمج يحلوهه لان نصحتج وماسمعتي..

رجعوا الخبر الهم وثاني يوم اجن النسوان اتفقن
على المهر وكالو انريد حفله وانريد بالقاعه
بس بابا ماقبل كال يعقدون بس وحته هي فاديه
ماقبلت ماحبت الهوسه كالت اعوض بالحنه...

عقدت فاديه بوسط اجواء عائليه بس هدى وعمه بشرى
بسمه ماعزمناهه طلعنه حجه ماعزمنه احد وعمه بشرى ماكالت
وبيت عامر اجت بس نرجس لان جانو يم خوالهم

عقد بسيط لبسهه الذهب وكعدوا شويه وراحوا
الولد شكله مقبول وعينه مانزلت من فاديه وبس مدنك ويهمس
يم اذانهه وهي تضحك مبين متمسك بيهه الله يسعدهم..

قبس.. بعد ماخصلت خطبه فاديه رجعنه لبيتنه
وضع صابرين مثل ماهو ماتقبل حته تشوف عمر
وماعدهه غير كلمتين لو اطلكني لو اطلكهه تختار واحد
اني ماارجع وعندي ضره..

اسراء عازله نفسهه وكلنه نسينه هي نجحت وطلع قبولهه
كليه التربيه من جان اخوهه موجود بس محد ذكر موضوع
دراستهه ولاهي حجت

صدفه من رجعنه بالطريق سالت بشار كال اي بس مات
اخوهه وماسجلت
قبس..  تخلوهه اداوم وتكمل دراسه؟؟

بشار.. مالي علاقه مو اني المسوؤل عنهه عمر يقرر
وهي هاي السنه راحت عليهه اذا يريد السنه الجايه..

قبس.. هي ساكته وحته ماحجت ولاذكرت دراستهه
يعني مستسلمه للامر..
بشار.. هي مابيدهه شي مجبوره تقنع ..

قبس.. وصابرين ماترجع حته جهازهه مغلق من اتصل عليهه
بشار.. عمر يوميه يروحلهه يكول حته ماتطلع تشوفني
وحته ابنه ماشايفه جرحهه وموسهله يداويهه بشكم كلمه..

قبس..وصلنه البيت جان متروك مده بديت انظف بي لحد المغرب وبيومهه راح جاب عشه من برا وسهرنه ع فلم ايطالي..

ثاني يوم مر طبيعي دوامي مريح حيل والخط يجيني
للباب بشار مرتاح بدوامه تقريبا رجعت الامور طبيعيه

اكثر من مره راجعت الطبيبه ومستمره ع العلاج
شكد لحيت ع سالفه الوحمه ويطلع حجج يوم باجر
وماقبل اسويهه..

بيوم من عدهن جنت اشتغل بالمدرسه يسددون قسط
واني انزل بالحاسبه البيانات اجت بنيه بصف اول
متوسط حلوه ناعمه بس السانهه بي رتله..

كتلهه هاحبييتي شنو اسمج؟؟ جاوبتني غدير
رايده شي ؟؟  كالت ست اني مجايبه القسط بابا
هسه يجي ويدفعه وطلعوني من الصف

روحي للمديره بلغيهه مدام ابوج يجي واني
من يجي اسويلج وصل شوفي للاداره
راحت البنيه واني خابرت ع بشار سولفت شويه
وسديته

دك الجرص وهوايه اولياء امور اجو سددو الاقساط
اني لبسي من ذاتي غيرته حته ماادخل بشار باي شي
كمت البس فستان طويل او تنوره وستره طويله وشي عريض
تركت البنطرون نهائيا كمت ماارتاح بي ..

بعد مادك للصفوف هدء الوضع كمت اشتريت عصير
وكيكه يوميه هيج وقت اكل اجوع مااتحمل حته احس بنفسي
سمنانه..

اندك الباب بسرعه شلت الكيكه ع جهه ومسحت حلكي
وكلت تفضل فات ذاك الرجال الضخم قاط ورباط وشخصيه

كال السلام عليكم رديت السلام جان ويا الحارس مال الباب
اني مدنكه ع الحاسبه جان يكول اني والد الطالبه غدير موفق
كتله اهلا وسهلا..

بس مداعيهه بالقسط هذا المبلغ كامل واريد وصل
بي!! جاوبته دقايق هسه اسويلك وصل ودنكت اكتب وهو يحجي ويه الحارس وبعدين كعد ع القنفه الكدامي..

اني ابد مااركز بوجه اليجون احجي وياهم بس
اشتت نظري مااباوع بوجوهم
سلمته الوصل ظل ماد ايده ماسحبهه  اني بسرعه جريت ايدي
حته وكع بالكاع ودنك الحارس شاله..

رجعت لشغلي ومااهتميت وهو استأذن وطلع
عادي مصادفه هوايه مثل هاي النماذج

من طلع وكف اباب الاداره يحجي ويه المديره صار كدامي
اني كمت وكفت قريب الشباك واباوع علي
مدري وين شايفته هذا الشكل موغريب عليه

طول بكلامه ويه المديره واني صافنه اريد
اتذكر هذا الشخص شايفته حته كمت اتذكر
الصوت سامعته بس مااعرف وين؟؟

بلحظه اجه كدامي وكأنو تذكرته شهكت
وخليت ايدي ع حلكي
مستحيل هوووو نفسه !!

.
.
يتببببع... احبكم هوايه

ممكن متابعه لهايه البنوته ادعموا كتاباتهه واكون
ممنونه منكم ZainabAlknany