رواية قمع المشاعر الفصل الثالث وسبعون 73 - بقلم Rozaya1122

قمع المشاعر.... التاسع والعشرون من الجزء الثاني...
للكاتبة زهراء ( روزايه)...

انتهينه وانتهى!!! الما ينتهي وخلَّص حجينه
انتهينه وبقت كَطرات الوفه المذبوح تتناثر علينه
وبقت للمجفين كوم اسرار عد روحي الامينه
وكون نستاهد عتبنه يفيد بيهم عاتبينه
وكون يسوون البجي جابثنعش ناظر بجينه
غافلونا ...وباكَو العشرة غفل من بين ادينه
وباكَو من ايد العمر سنتين وبوجهم رضينه
تالي. نزعوا شوكَنا من كَلوبهم وكَالوا
عوض عنكم لكَينه...
....

قبس.. بسرعه بدون تردد دزيت الرساله
وبنفس الوقت حظرته ولغيت الحساب
مااريد اسمع جواب من عنده ..

شمرت التليفون ع الجربايه وركضت
للحمام اريد المي ينزل ع جسمي
يبردني احسه نار ومشتعل كعدت
ع الطبله واني صافنه لشوكت ابقه هيج؟!

لازم اطلع من قوقعتي ماانسى بس
كافي حزن وتفكير بي لو يريد جان طلكهه
لو يريد ماخلف منهه..

واخيرا استسلمت للامر الواقع
واخيرا نفضت نفسي من تحت الانقاض
وكمت على حيلي اعالج جرحي بنفسي
بشار انتهى ولو يصوغلي بغداد كلهه
على شكل حبات لؤلؤ ماارجعله!!!

بدلت وطلعت كعدت يم سناء لعبت
ويه سيوفي شويه انفتح باب الشقه ابو سيف!!

هذا الانسان رائع شكد مااخته طيبه
هو اضعاف منهه مايوم رفع راسه بوجهي
اسمع صوته الفجر يوميه وهو يقره القران
بخشوع من اسمع صوته احس بشعور حلو

كعد يمنه وهو يسولف عن الشافه برا
وسيوفي كام كعد بحضنه لاول مره يحجي وياي
وكال اختي ولو مو من حقي احجي
بس الله شاهد من يوم خليتي رجلج هنا
صرتي انتي وسناء سوه!!

احسبيني اخوج الجبير احسبيني ابوج
سناء حجتلي المريتي بس ومااكول غير
الله يساعدج ويعينج الشفتي والحملتي
اني رجال مااتحمله ..

بس مومعناتهه انتهت الحياة احسن خطوه سويتيهه
طلعتي ومارضيتي تعيشين حياة الذل
بس انتي جاي تعذبين نفسج

مااكلج انسي لان اني هاي كدامج صار سنين
على وفاة ام سيف واحسهه بكل مكان موجوده

اني هم اخذتهه عن حب وجنه جيران نلعب سوه
يعني تخيلي كبرنه وحبينه وتزوجنه وعشت
ايام احس نفسي بيهه ملاك من كدما معتنيه بيه

بس وينهه هسه؟ راحت لرحمة ربهه وعافتني
وعافت ابنهه بس لازم امشي مااوكف بطريقي
حبه مدفون بكلبي لا انساهه ولاافكر بيوم
اتزوج غيرهه بس عايش ومهتم بصحتي
لان هذا مكتوب ولازم انشوفه

الله يرضى عليج يااختي اطلعي من دوامه
الحزن بهاي الحاله جاي اتجذبين الطاقه السلبيه
الج وماراح ترتاحين ابد

انتي بيدج حلول اما اطلبين الطلاق من عنده
غايبيا وتشوفين حياتج وترتبطين وتكونين
عائله؟!!!

اما تبقين ع ذمته مثل حالتج هسه
بس ماراح تشوفين يوم سعيد لان تعيشين
ع امل اللقاء..

قبس.. ابو سيف موبس قصة حب واحبه
بس جرحه عميق ومو جرح واحد منين ابدي
ومنين اعدد واحد لو اثنين

استضعفوني !!وذلوني،!! لان يتيمه
اني لوعندي اخ واحد بس واحد ماجان
صار بيه هاي المصايب

لوعندي اب لو عندي خال يوكف بعيونهم
ويدافعلي اني صفيت وحدي بالمعركه
منين ماالتفت اشوف خنجر لحدما وكعت
ومحد كال اني وياج!!

مااكدر يا ابو سيف بحجم حبي اله
كرهته!!
وكرهت اهله وشكو واحد ينتمي الهم
مااكدر اعيش طبيعيه ..

ابو سيف... انتي كلتي ماعندج اخ تسمحيلي اكون
اخوج مده شهرين فقط ورا هذني الشهرين
ارجع انسان غريب عنج

قبس.. عقدت حواجبي وحجيت شنو قصدك؟؟
ابو سيف.. مدة شهرين انتي اختي واني اخوج
ماترفضين اي طلب وكله لمصلحتج اعتبريني
اخوج وبعد هذني الشهرين ارجع غريب عنج
واحترم اي قرار دكولي..

قبس.. مافهمت شيقصد بس هذا الانسان
مرتاحتله اصلا مأمنه ع نفسي بيناتهم
هزيتله راسي كتله موافقه بس مااعرف
شيقصد بس ردت اجرب شعور عندي اخ قريب
عليه..

ابو سيف.. من هسه نبدي لعد تكومين انتي
وسناء تحضرن حته نطلع وهاا اتفقنه ماكو اعتراض

سناء.. شحدهه تعترض هسه ربع ساعه تلكانه
متحضرين كومي ولج وسحبتني من ايدي

بدلت واني مااعرف وين اروح طلعنه من الشقه
هو يندل اماكن تجنن تفتح النفس
اخذنه للمطعم تعشينه افترينه هوايه
الهواء نقي الجو حيل حلو..

حسيت براحه موطبيعيه سيف يكمز كدامنه
وسناء تحجي وياي ولج شوفي هذا شكد صاك
اللهم اجعلهه بعيني بقره..

واني لاول مره احط ايدي ع حلكي واضحك
من كلبي لان سناء شكو واحد فات من يمنه
سوته بقره ..

رجعنه للشقه نوعا ما مرتاحه بس ويه
كل رمشة عين ويه كل نبضة گلب
اتذكره!!

ثاني يوم ظليت نايمه اجت سناء تكعد بيه
كومي كومي بسرعه!!

فزيت مرعوبه عبالي بيهه شي
كالت كومي ابو سيف حجزلج عند طبيب نفسي
وجانت لازمه بيدهه خاشوكه خشب جبيره

اذا ماكمتي ياقبس اكسر هاي عليج
كومي شلعت باب كلبي عبالك بس هي
مفاركه رجلهه

جان دكول ااااوف يالمدير العام والله
اشتاقيتلك من تشبعنه رزايل اني وعاليه
ووراهه ادز بيد ام حسين كهوه ترضينه ..

قبس.. يعني هسه جايه من الصبح حته تذكريني
بي خاف الي نيه ناسيته

سناء.. مو اعرفه كلبه جبير ولج تذكرين من تخربطتي
بالزائده ورحت كتله استاذ مو الشهريه
خطيه جان يشرب كهوه غص بيهه ..

قبس.. ههههه شو سكتي لاتذكريني جان ممعترف
بحبه بعده بس نظرات

سناء.. ومن سويتي عمليه وطلعتي تصيحين
وين الاندر مالتي ولج سناء نزعوني الاندر
هذوله الكوا..... واسكتج دكليلي شبيج كح.....

قبس.. ضميت وجهي باديه وعبالك الموقف
هسه صار ولج سناء اسكتي !!

سناء.. حب من اول فشوره وراهه اعترفلج
لان سمطتي ابو تأشريله ع مكان العمليه
ودكليله هنا هنا الم وهو مايعرف وين يودي وجهه..

قبس.. ههههه كمت اضحك وهي تضحك وياي
من اتذكرت الموقف شكد فشله ..

سناء.. كومي ام الاندر ولازمه الخاشوكه وكامت تهوس
من لاكي البا..... ام عليوي ..

قبس.. طكيتهه ضحكه ع شكلهه وهي تكمز بالغرفه
كمت غسلت واني مبتسمه ..

كدرت تغير مزاجي قررت اروح للطبيب
وبلكي اتحسن واطلع من دوامه التفكير ..

راحت سناء ويايه ماقبلت تدفع وتعاركنه
يم الطبيب تالي خزرنه ابو سيف يله
سكتنه ..

بس كلت بس ارجع احطهن بجنطتهه
مع العلم هي كالتلي دين اعتبري..

صاحو اسمي والسكرتيره منعت الدخول
للمرافق بس اني ماخايفه ولاعندي رهبه
لان هوايه داخله للاطباء نفسيين..

دخلت كلت السلام عليكم رد عليه السلام
افتهمه كاعده يمه مترجمه يحجي تركي

اشرلي ع الكرسي الكدامه وكام من الميز كعد بالكرسي
الثاني المقابيلي جان عمره تقريبا بالسبعين
شعره ابيض كله حته حواجبه سبحان الله اباوع
لايده بيهه نمش بس بيضه حيل...

اشوفه مبتسم ويحجي ويه المترجمه
ضحكت هي وكالت شنو اسمج ومن وين؟؟

اسمي قبس ومن بغداد...
حاجته ورد عليهه وهو يضحك وهي هم مبتسمه
جان دكول

الدكتور يكول كل بنات بغداد هيج حلوات ؟!

قبس.. بابستامه وخجلت كتلهه شكرا
غمض عيونه ومثل لحن اغنيه بس مافهمت غير بغداد

المترجمه.. الدكتور يهديلج هاي الاغنيه
بغداد تغوص كالؤلؤةً داخل عينيك
الفضاويتين !!
بغداد تغيب بأكملها رملآ وسماءآ وبيوتآ
تحت الجفنين المنسدليين...

قبس.. جان يغني بيهه واني مبتسمه ومنصيه
راسي خجلانه صوته حلو والاحلى صوت المترجمه
وهي تلحن الاغنيه..

الدكتور.. شنو معنى اسمج ياقبس؟
قبس.. شرار النار !!

الدكتور.. يعني حياتج هم نار مثل اسمج
قبس.. بلي !!
الدكتور.. الله عليكم يااهل بغداد شكد حلوه
كلمة بلي بلسانكم ..

قبس.. بيني وبين نفسي مبتسمه واكول يمكن
هذا الدكتور اسبوع يخليني حته تحشيش احشش
من كدما مرح ونسيت اني عليمن جايه..

بده يسالني واني اجاوب سالني ع مواقف حلوه
اذكريهه جانت الجلسه ايجابيه بشكل ماينوصف
مجرد مواقف مضحكه وسألني ع دراستي
وطلعت

دخل ابو سيف اخذ موعد وطلعنه كال الدكتور كتبلي
هذا العنوان وكال اخذهه هسه تغير جوو .
مارفضت لان اني جنت مصره اتعالج..

مرت الايام والجلسات كمت احجي لطبيب كلشي
من اوصل لبشار اكوم ابجي والطبيب يكعد كدامي
ويكول شكد تحبي لعد؟!

بديت اتحسن هوايه كلش هوايه احس بفرق
صرت اطلع وحدي بس اني وابو سيف ومرات سيوفي
ويانه

بس مرات تجيني الحاله من جديد احبس نفسي
شكم يوم ومااسولف ولا اضحك لغيت كل برامج
التواصل وحته ماادخل ع حسابه ..

خلصن الشهرين وتمنيت ابو سيف يبقه
اخويه طلب نجدد المده واني قبلت
وهم مستمره بالعلاج ومستمره اني وياه
نطلع ومرات سناء ويانه...
....

الاحداث شهر الواحد ٢٠١٨

شجن... حالنه ماجاي ينصلح فاديه مشاكلهه
زادت بابا مصر يطلكهه وعيالهه متمسكين بيهه
ورجلهه يوم زين وعشر موزين..

هدى حالهه للاسوء وماما شكل عدهه سكر هي
وبابا من القهر من اشوفهن واشوف الجهال
الماتعرف مصير اهلهه ويتعاركون عليهم الام
والاب اكول همزين ماتزوجت...

هالمره اجت فاديه وجايبه كل غراضهه
وماناويه ترجع وحالتهه النفسيه متحطمه

فاديه ...طلگوني منه اتسمعون شحجي طلگوني والله اذا كعدتو تحجون نصائح براسي اكتل روحي واخلص منكم ومن عنده

ام بشار.. ولج يمه استهدي بالرحمن كل مره ورجال يتعاركون شلون كلما تتعاركين لازم نطلك وهذوله الجهال العندج شنو ذنبهم

فاديه... ذنبهم برگبه ابوهم هم عايشه بالقهر ويا وهم يكتل ومن يصير عصبي يصير حيوان وتعالي اتحملي علمود جهالج منو كالكم اني حديد

اسمعوني كلكم اخر شي عندي اذا ماطلكتوني وغصبا ع راسه اخذ جهالي فوك خيانته الي ويوميه ويه وحده وفوكاهه واكفين بجانبه وحق الله اسوي المايعجبكم وهذيج الساعه تريدون تكتلوني اكتلوني ..

هدى.. تخبلتي لو ماعن حب اخذج وذبح نفسه عليج وانتي هم تحبي هسه صار ماتريدي افهمي اكعدي تفاهمي ويا لازم نسيتي شلون وكفتي بوجهنه وكلتي اني اريده واتحمل يله اتحملي !!

فاديه...ما اتحمله ومااريده اكرهه مامجبوره انام ع كتله واصبح ع خيانه ومراسلاته ويوميه مخلصهه ويه وحده ومن احجي يكول اني رجال

اني بعد مااحجي لان تعبت منكم اطلكوني هذا الاسبوع واذا ماطلكت برجلي اروح للمحكمه واحجي للقاضي وشيريد يصير خلي يصير..

ام بشار .. ياربي شنو هاي المصايب گلبي خلص ولجن ارحمني منين اتلاكهه فهمني منين

من اخوجن لاطايل سما ولا كاع !! لو ابنه اليكسر الخاطر

لومن مشاكلجن يوميه وحده زعلانه ومتعاركه ماتفكرن بينه مو سنين مرت علينه بس الويلات ملاحگتنه

هدى.. شكد عوجه دنيانه شلون گلبت حالنه وين جان الفرح ملازمنه وين هسه اندور راحة البال

بجيت ونزلت دموعي بقهر يمه گلبي مفرفح ع قبس اتخيلهه بكل مكان وشلون جانت مثل الفراشه وطايره

وكل هذا ماندري بيهه عدله!! ميته !! وين عاشت ؟ مااكول بس الله يساعدك يابشاار

وحسبي الله ونعم الوكيل على الكان السبب بدمارهه وتشتت عائلتهه وضياعهه

شجن.. يعني تتحسبين ع نفسج انتي وفاديه
منو الشتت عائلتهه غيرج الركصتي ع جروحهه

هدى.. شمدريني عساني ميته كله من حمزه يجيب
المحادثات ويكلي شوفي مرت اخوج شتحاجيني
طبعا احقد عليهه شمدريني تطلع اسراء هيج تسوي

شجن.. تدرين بيهه مايطلع منهه هيج شي
وتدرين بيهه تحب بشار شلون تفكرين هيج تفكير

هدى.. حمزه يحجي براسي وهو هم مايدري
عباله صدك قبس لان ادز صورهه وكال هي
امهه وخالاتهه هيج والعرك دساس

ام بشار.. مايفيد اللوم والعتب قبس ماندري بيهه
وين وهذا ابنهه كبر ولجن كلبي يحترك علي
وهو يكول امااا وينهه امك يابعد امي واهلي؟!

فاديه.. يمه طلكوني ماارجع لو اموت حته اتنازل عن كلشي
بس جهالي عندي مااريد حته اشوفه

ام بشار.. يجي ابوج واخوتج وكليلهم هالحجي كلبي
خلص من عدكم كافي ارحمني

وهاي شجن غيث يروح ويجي شسوي كليلي
انطي شجن رايح مطلك فاطمه بس سيد
وبالمحكمه ماترضى تحضر ودكله اطب للقاضي
واكله يطلكني اجباري لان عنده غيري واني ممقصره وياه..

هدى.. وناويه تنطين شجن لغيث ؟
ام بشار.. اني احجي ع هجامات البيوت وتريدين اخلي
شجن تصير مثلهن وبعدين بشار يكول لو تبقى طول عمرهه
بدون زواج ماانطيهه..

فاديه.. خلي يخليلهه بيت وحدهه ومالهه علاقه
بيهم وياخذهه هو شنو كلنه نعرف مايريد فاطمه
من سحورت بسمه اخذهه وهاي انگلبت عليهه..

ام بشار.. شيقنع بشار  المتخبل من عائله وائل
يكول هم نرجع لنفس الطاسه والحمام

شجن.. ماما ماكتلج خابرتني سرور كالت تعالي يمي
لان ماخذه اجازه مريضه تريد ترتاح وتظل وحدهه

ام بشار.. روحي بس امير ماتاخذي
شجن.. هي تريد امير لان تخاف من بشار عود بحجه
اجيبه اني !!

ام بشار.. لاااا ماتاخذي ابو مايقبل دشوفي
شلون حارم روحه من عنده حته لاياخذه يمهه
مايريده يتعلق بيهه..

شجن.. اول كلمه كالهه اماااا وهو مايدري بامه وين!؟

ام بشار.. لابد. ماتشرق الشمس وينجلي الظلام
وترجع لابنهه ويشبع من حنانهه..

شجن.. كمت حضرت شكم لبسه ومنتظره ابو حسين
يجي سمعت صوت عمه بشرى برا طلعت شافتني
مبدله كالت وين موليه؟!

شجن.. لبشار اظل يمهم شكم يوم
فاديه.. هاا لعد اني هم اروح ابو حوراء راح لكربلاء
واني اروح وياج صار هواي عاجبني اروح لبيت
ام عيون مشتاقتله..

شجن.. اجه السايق ورحنه اني وعمه مافايته بيتهم
من يوم زواجه ومن قبس انهزمت دكينه الباب نسمعه
نزلت من الدرج فتحت الباب تفاجات بوجود عمه..

خلت كراسي بالحديقه كعدنه اباوع للحديقه
حته الورود ذابله جانت تزهي تخبل هسه اي روح
مابي البيت

الطرمه بس تراب والشابيك يرادلهه جلف
مبينه سرور ماتنظف شويه وكالت خلي نصعد..

فتنه من يم باب المطبخ مال قبس شكد
انحبست هنا ودكلي اباوع من الشباك
مثل المسجون

صاحت عمه بشرى هذا بيت ام امير مقفول؟!

سرور حجت وهي تفر حلكهه ماعجبتهه كلمه ام امير
كالت اي المفتاح عند بشار اصلا ماداخلتله ابد

شجن.. صعدنه ليفوك نفس الطابق الثاني غرفة نوم
ومطبخ وصاله وصحيات بس مرتبات ومفروشات
كله اثاث راقي..

كعدنه بالصاله وعمه بشرى تباوع وكلساع وكالت
انطاج وانطه كليفه بيت ورجل ومكيفه!!

شجن.. شنو هذا المثل منو كليفه؟
بشرى.. هاي وحده كليفه اسمهه ظاله عجوز
اجاهه واحد مامتزوج وحطلهه بيت وبيوم عرسهه
كامت تهوس امهه بهاي الهوسه ..

شجن.. بس سرور حبابه؟
بشرى.. اي حبابه بس استغلاليه تستغل المواقف
حته تثبت نفسهه شوفي شجن تدرين ليش ماحبهه؟!

من راحو خطبوهه اني رحتلهه للعياده
وشرحتلهه كلشي جذابه ترى من دكول عبالي وعبالي
اني كعدت وفهمتهه شكد بشار يحب مرته
ولابد مايوم تنكشف الحقيقه ويرجعهه

تدرين شكالت!؟ كالت خاله بلا مطرود عندي
مراجعين وحاليا اني زوجة بشار مامسموح
تذكرين ضرتي كدامي..

هاي شوفيهه سرور مسويه نفسهه
الحبابه واصلا ميته غيره

شجن.. يااا عزا بعينهه لعد شمصبرهه
شلون قابل بهيج وضع ليش متطلك

بشرى.. بشار بالخطوبه من عرفت قبس
راد يدارك الخطأ وراحلهه وكالهه خلي نفسخ
راحت كالت لعمامهه واخوتهه تخبلت
واتفقت لايتقربلهه ولااطالبه بحقوق..

شعبالهه عبالهه هو رجال لازم بيوم
يحتاج ويجيهه بس اخوج مااهتز
ابد ..

شجن.. دكول ماالبس ولا اسوي اغراء اخجل من نفسي
بشرى.. عمة عينهه ام الخشك بشك!!

ولج مرت حمايه كالت لكيت مرت بشار الدكتوره
يم ابو ملابس النوم واشترت ٣ وكايلتلهه مرت حمايه
هاي كله للمدير كايلتلهه بعدنه عرسان ويطلب!!

شجن.. عزااا عمه مااتخيل سرور تلبس وتتودد
وهو يرفضهه شكد عيب اكلج عمه معقوله صارلهم
سنه ونص مااتقربلهه

بشرى.. لاااا سألته ذاك اليوم كال اني بيا حال
كلشي ماله طعم بحياتي اصلا مااشوفهه
عيوني ماتوف غير قبس!!

شجن.. هسه تسمعنه راحن تسبح
بشرى.. ومجذبين احنه خلي تسمعنه لعد ابوي
يلبس سيتات نوم ويتودد ..

شجن.. شويه وطلعت لافه الخاولي ع شعرهه
جان الجو بارد شهر الواحد وهي لابسه بجامه
طويله شتويه وبدي ربع ردن وجسمهه ضخم
مالاكيلهه ابد

فتحت التدفئه والصوبه الكهربائيه
وكعدت يمنه تسولف ع دوامهه وتريد ترتاح
واخذت اجازه!!

انتبهت ع ركبتهه اكو طكع صغار حمر
كلساع اركز  والتفت ع عمه معقوله ياربي!!

وهي عبالك متعمده تفر بركبتهه حته انشوفهن
شويه وعمه بشرى ماتحملت كالتلهه ياسرور
شبيهه ركبتج حساسيه؟!

سرور.. ههههه وغطتهه بالخاولي ياعمه موشجن
ممتزوجه غير ابن اخوج؟!

بشرى.. شبي ابن اخوي ترى بشار اني وياه اصدقاء
نسولف كلشي وسائلته عن علاقتكم كال ماكو شي
يعني يجذب عليه اني اعلمه؟!

سرور.. بلعت ريگه وتوترت لاعمه فدوه لتحجيله
شي يرجع عليه لان لبست هيج ميقبل

بشرى.. لا عمه تتهنون شعلينه بس جان كال
منو لازمه ولو اني ادري بي مايجذب كلمته وحده
ومايرجع بيهه..

شجن.. ماتعرف شتسوي سرور بسرعه كالت من رخصتكم
وكامت للغرفه وعمه طكتهه ضحكه ودكول وروح
اخوي رضا هاي ملعبه وتكهه ماكو

ولج سوت اثار بالحمر واجت عود اني عايشه
سعيده تعلمني بهاي الدروب واني بشرى..

شجن.. عمه لادكولين لبشار خاف يرجع عليهه
بشرى.. عيب عليهه مره شكبرهه ولج عمرهم بالاربعين
حته اذا صدك بيناتهم علاقه حميمه موتطلعنه هيج
مااستحت من عندي وانتي اخته..

شجن.. يله شسويلهه
بشرى.. كبور تلف العارات عبالهه يسويلهه اثار
مشتهيه ومستحيه ..

شجن.. شلون بعمه بشرى ماراح تسكت اكيد
ظلينه كاعدين وهي راحت بدلت لبست طويل واجت
احس نفسي غريبه بيت اخويه

من جانت قبس هنا نجي براحتنه
حته احنه نسوي اكل بينما هسه
استحي اكوم اغسل..

سمعنه صوت الهرون مال سيارته
دنيا المغرب جانت عمه فتحت البرده نباوع
منهه وسرور بالمطبخ تسوي عشه ..

نزل من سيارته وبوجهه لبيت قبس
ماصعد وظلينه نباوع هسه يجي
ماكو تقريبا نص ساعه يله طلع الجكاره
بحلكه يدخن ولازم الصونده يرش بالحديقه.

شويه وصعد اول مافتح الباب تفاجئ بينه
كال هاي بشرى هنا شو ماادري..

كمنه سلمنه علي كتله بس بشرى
لعد واني؟؟ باسني من خدي

وكعد يمنه اجت سرور كالتله الله يساعدك
وبيدهه كلاص المي رد عليهه وشربه ..

بشرى..اليوم احنه خطارك اجينه نغير جو
وسرور كالت ضايجه كلنه نجي يمهه

بشار.. هله بيكم بس ليش ماخابرتيني
اجيب عشه

سرور.. لا عدنه بالمجمده سويت احلى مقلوبه
لعمه بشرى
بشرى.. كثر الله خيرج حبيبتي ..

بشار.. خلي اكوم ابدل واصلي وبشرى
عندي سالفه وياج

سرور.. الحمام جاهز والمي دافي
بشرى..هوانت العندك سالفه لو اني عندي سالفه
شكبرهه بسرعه راح انفجر لازم اكولهه..

شجن.. ضحك وكام للحمام وطلع لابس دشداشه
خليجيه رفعهه شويه وكعد شفت رجله طلعت
شلون مفنوحه من فوك الكعب للركبه
خط احمر ..

بشار.. ايي شنو سالفتج حجيه بشرى
بشرى.. كامت كعدت بصفه وتبسبس وهو
يضحك بعدين سولفتلي شحجت..

دكول سالته ع سرور كال نفس الوضع اني
ماغشيتهه ردت اطلكهه بالخطوبه وماقبلت
وكالت زواجنه يظل ع ورق مااطالبك بحقوق

بشرى.. وسيتات النوم لعد منو يلبسهه ابوي
بشار... ههههه انتي تدرين خيالي واسع راح تخليني
اتخيل حجي صالح استغفر الله
من تكعدين يمي بس الذنوب اجمعهه..

بشرى.. ولك لاتضيع السالفه احجي
بشار.. هاي امور زوجيه مايصير اسولف بيهه
بس هي تبقه مره وبداخلهه مشاعر حتلو تلبسهن
كلبي وعقلي وعيوني مويمهه

بشرى.. ديربالك ترى تصيد بالماء العكر هيج
وتورطك وابو امير يعاشر غير ام عيون

بشار.. جر حسره جبيره وكال اااااااخ ياقبس
ادفع كل عمري البقه بس اشوف عيونهه ساعه
موعيون وقتي وساعتي هن !!

جانت لوتمر عليه اشكال المشاكل بالدوام
بس اجي واشوفهن انسه تعبي
اروح فدوه لضحكتهه وهذيج الحواجب
المبعثرات ..

بشرى.. اشو احسك مرتاح؟!
بشار.. هانت ماظل شي ونلتقي وشتريد
خلي تسوي اني كلي تحت امرهه..

بشرى.. شنو لگيتهه؟!
بشار.. قبل فتره طويله اجتني رساله من حساب
مااعرفه طلعت من عدهه وحظرتني ولغت الحساب
انطيته لغيث واني وغيث ظلينه مده اندور وماعرفناه

لان اختفى لغته بسرعه تدري من قريت رسالتهه
اسبوع واني مافايت البيت وسرور يم اهلهه
لو يكلولي باخر الدنيا وطريقك كله شوك
اروحلهه وادوس ع الشوك برجليه ..

المهم ظليت ادور هوايه ماكو اي اثر
صارت سولتي بسناء بس اتابع حساب سناء
مع العلم ماتنشر شي بس بلكي الكه خيط
امل..

صدفه سناء غيرت صورة الغلاف مخليه
صوره طفل وشفت بالتعليقات وحده اسمهه ام رنا
وكاتبتله فدوه حبيب عمته

يعني ام رنا الكالت عليهه القابله
اخت سناء؟؟؟!!!

يعني قبس عاشت عند ام رنا واحتمال هسه يم سناء
مااعتقد بقت ببغداد لان تاذت واكيد سناء
اخذتهه ومن خابرتهه حسيت بارتباكهه

ماردت استعجل هالمره ولاردت يوصل
الخبر الهه اكدر اخابر سناء واكلهه بكلشي
بس ردت التقي بيهه وجه لوجه وتشوف ابنهه
ماردتهه تعاني وحدهه اذا سمعت الخبر..

خفت احجي ويوصل الحجي الهه اني
عرفت مكانهه وهم تنهزم لان قبس مرات
عدهه تصرفات رعنه..

مااندل عنوان ام رنا هيج مجرد استنتاج
خاف مجرد تشابه اسماء ..

رحت لبيت عم سناء وطلبت منهم العنوان
بحجة عندي معامله لسناء
ويمكن الله جاي يهيء اللقاء بيناتنه..

طلع ابن عم سناء وحجيتله السالفه
هو اكبر مني ظل مدنك وكال مرتك بمكان
امين اني بيدي وديتهه..

ماتتصورين فرحتي شكبرهه
يمكن بغداد بكبرهه ماتوسعني
بلحظتهه حجالي شلون وداهن للمطار وهي
حاليا يم سناء ..

هذا الحجي قبل عشرة ايام
شفتي قبس شكد قويه فاتت بعيني
وخلتني سنه ونص متخبل عليهه ومااعرف
مكانهه..

شفتي شلون ماتركت اثر عقلي
ليل نهار يشتغل وماكدرت الكاهه

جنت اول ماافوت للبيت اغنيلهه
عينُ كعين الذيب محتالةُ
وهي تضحك دكلي ديربالك تبجيهن
ترى ينگلبن عليك ذيب من صدك!!!

بشرى.. وصارت ذيبه ومابجتك دم
بشار.. صارت والله وعرفت نفسي شكد
احبهه ابيع الدنيا كلهه علمودهه

بشرى.. شمنتظر لعد ليش مارحتلهه؟!
بشار.. كتلج مااريد اخسرهه وخاف تسمع وتنهزم
ابن عم سناء جابلي العنوان وكال حاليا هي
تراجع عند طبيب نفسي مااريد اخلي حالتهه
تنتكس ..

روحي متكطعه عليهه يوميه اكول اروح احجز
بس اتردد اريدهه تتعالج وتصير زينه
لان شوفتي موبصالحهه..

بشرى.. ولك بشار كلبي يخفق من الفرحه
معقوله اشوف بنيتي واحضنهه قبوسه
ام عيون

بشار..دخل احضنهه اني وعود بعدين انتي
بشرى.. كوم افتحلي بيتهه اريد اشوفه
بشار.. ليش
بشرى.. عاجبني اشوفه انطينه المفتاح اني وشجن
ننزل..

شجن.. انطانه المفتاح ونزلنه لليجوه اول مافتحنه
الباب اجتنه ريحه نبات الظل بشار معنني بي
بغيابهه

كلشي بمكانه غرفتهه نفسهه بدلتهه ع الجربايه
ومامحركهه ابد وكصيبتهه ع الميز وبصفهه مشط
لان عبالك اطرافهه مشطهه..

عمه بشرى كعدت بجت واني افتر واباوع
شكد حلوه نزاكتهه والبيت رغم متروك بس
احس انفاسهه ماليه المكان..

سديناه وطلعنه صبتلنه عشه سرور
تعشينه وسولفنه سوالف عامه
بس وجهه مايبشر بخير ويمكن ماكله رزاله..

بشار.. شجن لكيت طبيب زين كال جيبهه
احتمال يسويلج عمليه يخليلج مسند
واتركين العكازات تكدرين تمشي بدونهن

شجن.. صدددك؟؟ ياريت ع الاقل اكدر اطلع
والله حته سفرات مااطلع استحي واعطلهم

بشار.. الله كريم خلي تنحل السالفه العندي
واسويلج العمليه ...

شجن.. بيومهه اكتشفنه بشار مينام بغرفته
ينزل ينام بالاستقبال وسرور طكت قهر ماتوقعت
عمه بشرى تجي وتكشفهه...

ظليت ساكته وماحجيت لماما ولا اي مخلوق
بشار لكه قبس حسب طلب عمه بشرى
كالت نسوي نفسنه ماندري..

ثاني يوم رجعنه لبيتنه نفس الهوسه
وهدى وفاديه موجودات زعلانات والجهال
وجانو يمنه بيت عامر..

مرن يومين اجه بشار مايدري عمه بشرى
حجتلي شال اموري بوسه وكال
لماما حضريلي اموري شويه وارجعه..

بدلتله ماما وهو اخذه ساعه ورجعه
يبجي لان مايطلع يكول ماسكت ابد
ويخاف بس تحركت السياره..

اجه بابا شاله وظل يلاعب بي
وسرور كاعده اجت من العياده علينه
تريد تشوف اموري..

حجه بشار كال يابه باجر
اخذ امير واسافر لتركيا
حاجز اني ومكمل كلشي وباجر الساعه
٥ العصر موعد الطائره.....

.
.
يتببببببببع ....... احبكم ..

كيف سيكون لقاء الاحبه بعد فراق
طويل.....