رواية قمع المشاعر الفصل الرابع وسبعون 74 - بقلم Rozaya1122

قمع المشاعر.... الثلاثون من الجزء الثاني...
للكاتبة زهراء ( روزايه)...

غير الـ ما يطـيبن خاطـري شخـليت
و غـير الـ مـا تحبـهن مـا مسويـلڪ
شلـونڪ لا تگـلي
شلــوني بــيا لـون ؟
ناگص عـافية و بالعافية ادعيـلڪ..
....

عادل..خير يابه شعندك بتركيا وماخذ امير وياك
شسوي بي؟!
بشار.. بشرى مريضه واني اريد اروح
اجيك كتلهه انروح سوه واموري اريد اخذه
مااكدر افارگه..

ام بشار.. يمه بعده زغيرون وين يتحمل سفر
وخاف يشلع كلبك
بشار.. لا مو ويايه بشرى هي تسكته وهو طفل
يخلصهه نوم..

هدى.. متاخذ سرور وياك احسن حته تعتني بي
وبعدين شبيهه عمه مريضه شوماكالت؟!

بشار.. شسوي بسرور؟! ومدخليني تحقيق
روحي سأليهه ليش مريضه؟! يمه حضريلي
امير ب٣ امر علي اخذه..

شجن.. طلع بعد مابوس امير وكلبي يركص
من الفرح كلساع اريد احجي واكلهم راح لقبس
يرجعهه بس اخاف من عنده لان هو ماحجه
خاف ميقبل..

ركضت لعمه خابرتهه جاوبتني كتلهه شبيج
مريضه؟؟
بشرى.. كلشي مابيه اريد اروح اتونس واسوي
عملية تجميل لخشمي

شجن.. تحجين صدك لوتشاقين؟!
بشرى.. والله اذا لحكنه اروح اسوي هاي الجيوب
دمرني خلن خشمي يندار صفح

شجن.. عمه اذا شفتي قبس بوسيلياها الله عليج
وكليلهه خلي ترجع ..
بشرى.. لاتحجين شجونه اخوج مايريد احد يعرف
مدري شكو براسه...

شجن.. سديته من عمه ورحت ويه ماما
طلعنه جنطه صغيره رتبنه غراض اموري
وحايره شلبسه باجر

قبس شلون راح تشوفي وشلون راح
تحضني بعد هذا الفراك لك اموري واكرص بخدوده
اموري باجر تشوف ماما وهو يضحك..

اموري بعدله اسبوع ويصير عمره سنه كامله
بس حاليا يوكف ويمشي ويه الحايط
يدردم هوايه بس اكثر كلمه يكولهه امااا وددا..

ثاني يوم ب٣ اجه بشار اخذ امير
سويت نفسي ماادري بأي شي
بوسناهم وراحوا سرور يم اهلهه راحت
واني كلبي نار شوكت يوصلون وشوكت تبشرني
عمه بشرى...
...

قبس.. خلصت جلسات ويه الطبيب بديت
اتقوى شويه كدرت اكون ايجابيه قدر
الامكان ابتعدت عن السلبيه

ابو سيف اخ ونعم الاخ مايوم رفع راسه
وحجه وياي كلما يحجي هو منصي مرات نطلع
عائله كامله ومرات اني وياه وسيف يخلينه
بمكان العاب وهو يروح يخلص شغله ويجينه..

اليوم كعدت مالي خلك صارلي شكم يوم
ممرتاحه كلبي مخنوك صار العصر حبيت اطلع
وحدي رغم برودة الجو .

سناء جانت نايمه وابو سيف طالع بدلت وطلعت
كلت شويه اتمشى بالشارع وارجع الشقه تخنكني..

طلعت وسديت الباب بهدوء
ونزلت ع الدرجات وايدي ع كلبي
شجاك مدكلي شجاك ليل نهار تنغز بيه
المك شوكت يهدء وهاي نبضاتك شوكت تنتظم ؟!

الذكريات تراكمت عليه رغم شكد احاول
اكون طبيعيه بس تجيني ايام اكون
اسيرة الذكريات..

امشي واحجي ويه نفسي
وين اني؟؟ بيا ارض ؟
وبيا محطه نزلني قطار العمر وراح ؟
الف معركه بعقلي والف كسرة بگلبي ومازلت اعاني!!

لاكدرت اعبر السكه الجابتني...
ولاكدرت اكمل طريقي
من اول ماخليت رجلي انكسرت هاي السكه
وضعت وضاعت كل احلامي واشوفهه تتبخر على هيئه سراب ..

الجو بارد ثلج والدخان يطلع من حلكي
لابسه كوت ثكيل ولافه نفسي بي..امشي ع الرصيف
واباوع للماره وعيني ادور
وين اكو اثنين متحاضنين اظل اباوعلهم بحسره والم

نفس المكان اليوميه امر من يمه
يمكن لان هذا المكان يذكرني بغداد
واعيش الاجواء
وياخذني احساسي لهوه بغداد
ومجرد ماافتح عيني!!
الكه نفسي منفيه بالغربه وحيده ... حزينه .. مكسوره خاطر اااخ ياهوه الاحباب..

سحبت الكرسي وكعدت ع الطاوله
صايره بمقدمه الباب
ابو الكوفي دائما يفتح اغاني عراقيه قديمه
كل مره اغنيه شكل وكل اغنيه تعزف ع جرحي
وينفتح شكو جرح قديم بگلبي

بس هالمره الاغنيه مو عراقيه جنت استمع لاغنيه مياده الحناوي وكلمات الاغنيه تلامس جروحي..

انا الي بحلم كل ليله بيك
كل ليله .. كل ليله
وحشني وحشني منك
كل حاجه كل حاجه فيك..
ولابعدك قلبي ناوي يحب من تاني! ولا قادر
ومين حبك ويقدر مره تانيه يحب
مين مين ميين ياقادر ...
ليش هو اني اكدر انساك؟
لو اكدر انسه جرحك اليه؟
بكد حبي الك وبكد شوگي ولهفتي
يعادله اضعاف اضعاف جرحي ...

بيدي فنجان الكهوه ورن تليفوني فززني من صفنتي فتحته وجاوبت هااا سناء؟؟

سناء.. ووجعا وين وليتي ؟؟
ولج اني عايزه قهر عبالج احنه بغداد واصيح بيج بالسماعه

.. هااي اجيت طلعت اتمشه شويه
واشم هوه خوماكوشي شبيج تصيحين؟؟

تنهدت سناء وجاوبتني
لاا ماكو شي ظل بالي عليج شبي صوتج داتبجين مو؟؟

.. لا ماابجي! وفعلا ماجنت ابجي
عيوني ناشفه بس گلبي هو بحاله بكاء دائم
لاهدء بلحظه ولاسكن بدقيقه

سديته منهه ودفعت الحساب وكمت
نفس الطريق اتمشه بي
شكد الجو بارد بس نيران گلبي ماجاي تخمد ابد
شكد مر ع فراقنه وعبالك اليوم اول يوم الي بدونه..

هاي تاليتي انفيت بالغربه لا ام ولا اخت
ولاحبيب ولازوج كلشي خسرت
لو ما الله هيئلي سناء بطريقي
جان اني هسه رجعت اشتغل خدامه بالبيوت

بگلبي حرگه تهز اجبال
وعندي عتب الك يالحرمتني من طعم الحياة
حرمتني وفارگتني وعذبتني 
خليتني اتمنى الموت ولا اعيش لحظه من هاي الايام القاسيه!!

بعدني احن الك رغم السويته
وبعدني اشتاگ لحضنك وعطرك
بعدني احتاجك بكل خطوه اخطيهه
انت شطبتني من حياتك بس اني ماكدرت اتجاوزك ابد..

ااخ ياوجع گلبي !! مايفيد اللوم ولايفيد العتب هاي حالتي يوميه واني احاجي نفسي
بوسط فكري وحنيني مديت ايدي ع مفتاح الشقه افتحهه وكلما تجي عيني ع ايدي اتنهد بالم

واني اشوف الاثر الحافرهه ارجع للالم من جديد ارجع لنقطه البدايه وبسرعه اضم ايدي لان اشمئز منهه وتتضارب عندي المشاعر..

من ندم من اشتياق.. غربه .. من حب دفين ..بس اخر شي شعور الكره هو اليسيطر عليه واني اتذكر الصار بيه وين شمرني قطار العمر وراااح ...

فتحت الباب ودخلت تلكتني سناء
اكلت رزاله من عدهه لان طالعه وماكايلتلهه
سناء.. ليش هيج قبس موصرتي تخبلين شجاج
رجعتي لنقطة الصفر

قبس.. كعدت ع التخم ونزعت حجابي ودنكت
راسي ولزمته باديه وحجيت واني ابجي

سناء مشتاقتله؟!
اريده!! اريد اشتم عطره مثل قبل
مشتاقتله هوايه كلش هوايه...

سناء.. كعدت بالكاع يم رجليه ولزمت ايدي
المحروكه ياحبيبه شبيدي عليج
اكوم اخابره واكله الحك المره مشتاقه؟!

قبس.. الفراك صعب احسبي سناء صارلي
سنه ونص ماشايفته ولاسامعه صوته
لاشايفه طوله ولا مشتمه عطره!!

سنااااء وصرخت بصوت عالي مشتاقتله!!
اريده هسه كلبي يغلي علي ماجاي اسيطر
علي مااكدر امنعه ..

حته عقلي حته عقلي ياسناء يريده
جان رافضه وهسه يحثني ويكول
اريد اشوفه!!

ماريد ارجعله بس اريد اسمع صوته
روحي جاي تتكطع محد يحس بيه
بشار موبس زوجي وحبيبي
هو اهلي وناسي امي وابوي واخوتي

كمت ابجي بحرگه اضرب صدري
بقبضة ايدي اريد گلبي يهدء مدري شصابه
هاي الايام متعبني حيل ..

اخذتني بحضنهه وهي تبجي ويايه
ليش ولج اذا تحبي ليش معذبه روحج
خليني اخابره واكله يجيج

قبس.. من سمعت هيج مثل الصحيت ع نفسي
انتفضت وكفت ع حيلي وكتلهه ديربالج
ازعل عليج والله اني بس احجي حته ارتاح
جذب مااريده..

عفتهه وركضت للغرفه مااريده
جذب مااريد اشوفه موهو الحرك ايدي
نسيتي ياقبس شلون فرفرحت روحج
من ١٠ الصبح ل٥ العصر ومقفوله عليج
الابواب

نسيتي من ضحكن عليج وانتي
تبتسمين ماتعرفين شكو وطلع
هو خاطب وهن يواسني واني اكلهن لايحبني!!

تذكرين من جاب العمال صعدوا الغراض وانتي
مثل الطير المذبوح تعالجين بگلبج وروحج
وهو يحظر بزواجه..

تذكرين ضربته الج وهاي اذنج العاطله
وبعدج تحنين اله ولك ياكلبي بعدك عاق
ومتبري مني وتركض ورااا،..

بدلت ومددت بفراشي غمضت عيني
كمت اتذكر حياتي من جانو اهلي
عايشين رغم قساوة بابا من يضرب
ماما بس مايوم مد ايده عليه واذاني..

جنت اجي ابجي اكله الجهال يصيحولي
المخبله ويقلدون ع الوحمه مالتي
يطلع يكتلهم ويكلهم اليحجي ع قبس
اعلگه بعمود الكهرباء..

جانو اخوتي اصغر مني ومن يشوفوني
ابجي يكعدون كدامي ويكلولي لاتبجين
بس نكبر وتصير عدنه فلوس نسويلج عمليه..

دمعت عيوني واني اتذكرهم لوهم موجودين
جان اخذوا حقي من بين عيونهم
لوانت يابابا موجود جان ماخليت عامر
يكول نغسل عارهه..

كمت من فراشي توضيت وكعدت
اقرالهم قران وكلساع توكع دمعه
ع الورقه وامسحهه..

مرت الليله واني وياهه حرب
اقنع گلبي ينتفض عقلي
اسكتهم اثنينهم تدمع عيوني
حرت بيناتهم اسكت منو؟ واواسي منو؟!

ثاني يوم الصبح كعدت ع بواجي سيف
غسلت ولبست حجابي وطلعت لكيت
ابو يسكت بي وهو يشهك من البجي..

بس شافني اجه يركض عليه
كعدت بمستواه وسالته منو وياك حبيبي
ليش تبجي؟!

سيف.. اريد اروح للالعاب صديقي راح
وبابا ميقبل وعمه سناء تريد تروح وماتاخذني..

سناء.. طركاعه ع راس سناء ولك عمه اريد
اروح استلم راتبي والعصر اني وياك وقبس انروح
هسه الالعاب نايمه!!

سيف.. لاكاعده هي متنام موصديقي يوميه
يروح..

قبس.. لاتبجي اني اروح وياك وبابا يكمل شغله
ويجي علينه امسح دموعك يله..

بسرعه فرح رحت بدلت وطلعنه كلنه سوه
اني وسيف نزلنه بمدينة الالعاب وقليل بيهه
بس احنه العراقين اذا ردنه شي محد يمنعنه..

وابوسيف وسناء راحوا يخلصون شغلهم
وكال ارجعلكم خاف اتاخر خابروني...

سيف يلعب واني كاعده اباوعله
اضحك ع ضحكته وافرح من اشوفه
فرحان لان يتيم ينكسر خاطري..

صارت الساعه ب١١ اجه ابو سيف
كال يله انروح سناء بس استلمت رجعت للبيت
وماتندل تجيكم واني كملت شغلي واجيتكم..

نمشي بالشارع الي ياخذ لشقتنه
اضحك ع سوالف سيف لان
مايجمع الكلمات ويحجيهن بالعكس
وابو سيف يمشي كدامنه بخطوات قليله..

ماادري اني بحلم لو بحقيقه ؟!
ماادري عيوني خانتني لو صدك
الي اشوفه كدامي !!

بيناتنه شارع هذا هو لو يشبهه
وينك كلبي حاجيني هووو؟
انت تعرفه قبل عيوني..

وكانو اجاني ايعاز لاااا اشبه بالذبذبات
الكهربائيه موبس بگلبي بكل مكان
بجسمي

عقلي !!
كلبي؟!
عيوني!!
روحي الطلعت مني وركضت علي..

رجليه الخانني اريد امشيهم
اتربطن بحبال !!
ايدي اللازمه سيف تركت ايده وتريد تركض
قبلي تحضنه!!

اني احلم ااااي هذا حلم موحقيقه
موهو ؟! كلبي صاح بيه لااا هووو
هذا حبيبي وهذا انيسي يتوسل بيه
كلبي واني ساده اذاني مااسمعه

التفت عليه ابو سيف وهو يصيح
يله يمعوده مشيت بدون شعور
ماادري شجنت احس ساعه اكول هاي اوهام
وساعه اكول لاااا هووو!!

مشيت ويه ابو سيف وماالتفتت اريد اوصل
للشقه ماظل شي مااكدر سيف يجر بيدي
ويكلي خاله امشي واني كلبي يريد
يتحرر من اظلاعي ويركض ورااا..

طبيت للشقه بوجهي للغرفه كعدت بالكاع
قبس موهوو هاي يتخيلج؟!
هاي انتي مريضه بمرض اسمه الاوهام
شجابه لتركيا ووين يندل مكانج..

ضربت نفسي راشديات اريد افز من النوبه
التملكتني بس عرفت وتاكدت هاي حقيقه
من رجفة ايدي مثل قبل..

من البروده السرت من اصبع رجلي
لحد راسي !!
من دمي الي احسه صار بحالة هيجان
داخل اوعيتي !!

شفته نزل من سياره تكسب وحده
ويريد يعبر الشارع يمشي ويتلفت
هو شافني ؟!

لان ظل واكف وعينه عليه لاتقدم خطوه
ولارجع خطوه شفته شلون انصدم
بشوفتي !!

من بعيد ونظري مومثل قبل ماكدرت اميز
عيونه وملامحه !!
بس شفته مدري كلبي حس
بغضبه من صاحني ابو سيف ومشيت وياااه...

كمت اعيط سناااااء سناااااااء
اريد واحد يكلي غلط انتي متوهمه!!

اجت سناء فتحت الباب بسرعه وهي
تصيح شكو قبس اسم الله بنيتي شبيج؟!

قبس..سناء اني شفت بشار هنا قريب
علينه بهذني عيوني شفته بهذا كلبي ودكيت
ع كلبي بهذا كلبي شفته!!

سناء.. صخام الصخمج سنااء وين شفتي
وشلون اندل مكاني يافشلتج ياسناء شراح
اكله كذبت عليك

قبس.. ضميني بأي مكان لاتخلي يلكاني
سناء شوفي رجفة ايدي شوفي شفايفي
شلون ترجف هذا دليل ضعفي كدامه

بس عقلي رافض يلتقي بي سناء بروح
ابوج لاتخلي يلكاني شوفي كلشي بيه
يريده لاتخليني اضعف بس اشوفه انهار

سناء.. دكومي حبيبتي الكاع بارده كومي
بدلي وغسلي ولاتخافين عوفيهه وراي لتفكرين
بشي ..

قبس.. كومتني بدلت وغسلت واني ارجف
والله موخوف ابد مااخاف منه دائما احس بامان
وياه بس هذا ضعف اعرف روحي راح
اركض احضنه مااريد كلشي مااريد

ليش اجيت مواني بديت اوكف ع رجليه
ليش بشار ليش اجيت مااريد اشوفك
قربك نار وبعدك نار !! ليش رجعت ؟!

مددت بفراشي وسناء مخليه ايدهه
ع شعري واني احس برجفة شفايفي
شلون نملن !!

گلبي احسه يضحك عليه ويكول
غصبا عليج اشوفه واحضنه واشمه !!

عقلي كاعد يبجي ع حالي ويكلي
انتي قويه لاتضعفين واجهي اخذي
حقج ودافعي عن نفسج!!

عيوني ااااخ ياعيوني مابيدهن غير
الدموع ويتوسلن بيه لشوفته
لودقايق!!

شوصف كل عضو بداخلي منهار
كلشي بيه فرحان وينتظر
ساعة اللقاء !!
....

( الاحداث منقوله العمه بشرى لشجن )

بشرى.. صعدنه بالطائره بشار بصفي
واموري بحضني فرحانه حيل فرحانه
راح اشوفهه

خليهه تصيح!! تغلط !! تضربنه!!
كلشي خلي تسوي بس خلي انشوفهه
بسلامه..

اموري بس يبجي نطلعله لعبه مايسكت
انطي الممه يدفعهه حيل ويصيح
بيه ماوصلنه روحي طلعت..

اخذنه تكسي ورحنه لفندق بشار يندل
تأخرنه لليل يله طبينه الفندق
بدلت لاموري ونيمته وبشار
راح سبح وطلع يصلي

واني كاعده انتظر شوكت يروحلهه
شو ماناوي يروح كمل صلاة سالته
يله شوكت انروح ؟؟

بشار.. باجر الصبح اروحلهه وحدي
اعرف ردة فعلهه ماراح تستقبلني
ومااريد اخذ امير مباشرة واستغل ضعفهه..

بشرى.. خليني اروح وياك
بشار.. لعد ليش جبتج غير تظلين يم امير
اكعد وياهه واحجي يله اخذ ابنهه

بشرى.. جنه تعبانين بسرعه نمنه ثاني يوم
الصبح بدل وطلع كال اني اروح وبلكي
اكدر اقنعهه اجيبهه لهنا واذا مقبلت عود انروحلهه

راح بشار واني ايدي ع كلبي هسه
يجي وهسه يجي ساعه ونص يله فات
الوجه اسود ومطعون مبين صاير شي؟!

سالته عمه شبيك قبس بيهه شي؟؟
كعد ونصه راسه كال مابيهه شي بس !!
شفتهه هي واحد يمكن اخو سناء
وياهم طفل وتضحك

موقبس التوقعتهه داخل حزنهه لاطبيعيه
عايشه!!

بشرى..وانت مقهور لان عايشه طبيعيه؟؟
بشار.. بسرعه صاح بصوت كلت هسه يطردونه
عباله بالبيت احنه..

هي ع ذمتي ورجلهه اذا خطت بمكان
مااقبل علي الله يحاسبهه وهي ضاربتني عرض
الحايط وطالعه ويه رجال غريب مدري وين جانت وتضحك

لومن شافتني دارت وجهه بعد ماصفنت عليه
وكملت طريقهه وحته مااندارت وكالت هو لولا؟؟

شكو تمشي ويه اخوسناء نست هي
مره متزوجه وانهزمت بدون علمي
وفوكاهه مامهتمه والضحكه ماليه وجهه ويه رجال غريب..

بشرى.. ع كيفك ياعمه صدك جذب تريد
البنيه تنوح طول عمرهه مستحسف الضحكه
الضحكتهه متخليهه انت بكلبهه قابل تموت نفسهه

يابشار لاتغلط بعد انجمع بيهه وبعدين
حاسبهه وطيح حظهه شلون ضحكت للغريب
بس موهسه يابشار موهسه انت اجيت تصلح
موتخرب..

بشار.. عوفيني وحدي اهدء والله كريم
بشرى.. عمه موزين عليك موهاي عيونك حمر
هم تريد توكع مثل هذيج الوكعه الكشره
بشار.. عوفيني رحمه لاهلج خليني اهدء لاتلحين
فوك راسي

بشرى..عفته ورحت لامير هذوله شلون بيهم
والله ياقبس اعرفج راح تخلي يمشي حافي
ويسولف ويه روحه

يعني شفتي ودرتي وجهج ومااهتزيتي
ليش ولج ياقبوسه موهذا ابو ابنج وحبيبج
ليش يا بنتي؟!

لحد الظهر واني ماحجيت ويا وهو
ساعه يطلع وساعه يرجع ريحه الجكاير
كتلتني ..

نزلنه للمطعم تغدينه بوقت متاخر
شجن تراسلني كلساع اخذ صور وادزلهه
ع الفايبر واموري يخبل وفرحان ...

شويه ودك تليفونه بعدنه كاعدين
شفته عقد حواجبه وكال هاي سناء
اكيد عرفت وقبس كالتلهه..

فتح خط وكال الووو !! حجه وياهه
بس سمعته كالهه مو وقته سناء بعدين
الحجي ؟!

ظلت تحجي وهو كام يسولف بعيد
شويه واجه كتله هاا بشر شعدهه

دكول قبس شايفتك وحالتهه موشي
تبجي وتصيح لاتنطوني وتعتذر كذبت
عليه !

بشرى.. يمه بسلا رجعت حالتهه النفسيه..
بشار.. كومي عمه حاجاني اخو سناء كال راح انهديهه
وتعالو بصوره مفاجئه

لان متصل ع الطبيب مالتهه وشارحله الموضوع
وكايله لاتظلون تحجون كدامهه وتخلوهه تفكر
خلي يجي بصوره مفاجئه راح تعاني بس
احسن من مايهلكهه التفكير..

بشرى.. كمنه وهو دفع الحساب اباوع لامير
كاعد بحضني ويصفك ويهز براسه
وكلساع وكال ااامااا
اي يحبيبي رايح لماما ...

نزلتنه التكسي بشارعهم امشي
واباوع ااوف يالعراق شبعت بيك
الحراميه وشعبك ماشاف شي حلو..

اباوع لبشار وجهه اصفر اكو رجفه خفيفه
بيده كلساع يدير وجهه حاير شلون يلتقي
بيهه بيا وجه يشوفهه..
..

قبس.. وعدتني سناء وابو سيف ميحجون
وكالو اذا اتصل انكله مويمنه عايشه بغير مكان
ماادري صدكتهم لان جنت بحاجه لاي واحد
يقشمرني حته اصدك..

اشوف سناء مخبوصه وابوسيف كلساع
يخابر اخاف اسال بس ثقيت بيهم
مايدلون بمكاني..

بس الرجفه وكلبي المنتفض بعدهم ملازميني
اريد اهدي حالي بأي شي مااكدر اهدء
مثل الورق واجته ريح عاليه وطشرته
هيج حالي واكثر..

فتحت البرده اباوع السماء شاحبه
وكأبه تلوح لي في الافق
روحي تأن!!
وطواحين العالم في رأسي
ودموعي جفت في محاجرها!!

مااعرف شبيه ضعف!!
لو اسوء من الضعف يمكن وصلت مرحله
العجز من اتحكم بمشاعري
كلشي بيه ضيف مجرد ماشفته
مشاعري وجوارحي بدت تلملم بنفسهه حته
تهاجرني!!

ظليت حابسه نفسي بالغرفه لحد المغرب
واني عيني بالسماء اباوع ليش هيج
الجو كئيب ليش احس روحي مثل هاي الغيمه
كلساع بمكان..

اسمع الباب اندك مرات جيرانه هم عراقين
يجون ع سناء ظليت كاعده بمكاني
اسمع صوت ابو سيف وهو يكول تفضلوا

كمت وكفت ع حيلي هوووو
ااااي هوووووو
كلبي يعت بيه مثل الطفل ويعت بثوب
امه حته تشتريله لعبه

رجليه!!
اديه!! عيوني!!
جوارحي!!
كلهه تخلت عني !!
كلهه عافتني وركضت بدون استأذان

احشك نفسي بالحايط ماسمعت صوته
بس حسيته قريب !!
ماادري منو دك الباب بس كلبي دليلي
يكلي اجه اجه !!

انفتح الباب سناء وهي تباوعلي
بنظرات اعتذار !!
هزيت راسي برفض لاااااا
مااريد سنااااء مااريد افتحيلي
منفذ اطلع منه مااااريد!!

تتقرب عليه واني اريد اطلع من الحايط
من كدما انحشكت بي ...
اريد اهرب مااريد اواجه اني ضعيفه
كدامه مااريد اضعف بعد...

سناء.. قبس اهدئي مواليوم باجر
لوبعد سنه لازم تشوفي كومي قبس
كزمي حبيبتي هذوله كاعدين هو وعمتج
كومي يابنتي ..

قبس.. مااريد سنااااء مااريد كمت ارجف
رجليه ماساعدني كعدت بالكاع
ممستعده لكلشي ممستعده !!
مااريد سنااااء

اشفايفي ترجف اديه اضمهم بين رجليه
اريد اسيطر عليهم مدري شصابني
جنت اتوقع اذا اشوفه اضربه
اهجم علي ليش هيج ضعفت
اللللهي ساعدني!!

طلعت سناء واني كاعده بالكاع
اتمنى الارض تنفتح واختفي
جواهه مااسمع صوتهم سمعي
ضعيف بس احس بوجودهم..

بشرى.. من طبينه رحبوا بينه هم يدرون
راح نجي كعدنخ وسناء راحت تصيحهه ماادري
تدري بينه لو راح تتفاجىء

شويه واجت كالت متقبل وحالتهه متسمح
بس تصيح مااريد !!

حجه ابو سيف سناء سوي طريق
خلي يفوت الهه ابو امير احنه اهل
وغايتنه نجمعهم..

تشكر منه بشار وكام اريد اكوم بس
خليتههم براحتهم ياترى شراح
يسوون واثنينهم بنار!!

قبس.. مكرفصه نفسي لا رجليه تساعدني
اكوم ولاكلبي التبره مني بهاي اللحظات..

صفيت بس اني وعقلي كلشي
بيه تركني انفتح الباب فزيت
اشوف طوله ماكدرت ارفع راسي
اشوف بس نص جسمه..

سدت الباب واقدامه وهي تتقرب عليه
خلتني انهاااار بالكامل !!

غمضت عيوني مااريد اواجه
الفيت وانعصرت بحضنه احس روحي
راح تطلع اظلاعي راح اطك بين اديه..

مابادلته ماشافته !! مغمضه عيوني
وارجف بين اديه احس بلمساته
احس بأيده تغلغلت بشعري!!
دكات كلبه مخربطه بحاله تسارع
فضيع !!

تعانقت قلوبنه!!
امتزجت دقات قلوبنه وصارت لحن موسيقى
يطرب قلوب العاشقين..

خله كصته ع كصتي دموعي تتسابق
منو الاسرع ولاول مره احس بهزة اكتافه
وهو يبجي وراسه على راسي!!

مااعرف انطي ردة فعل ماادري شنو الي
اسوي بس ابجي وارعش ..
دماغي بده يستوعب ولفحني عطره

غمضت عيوني حيل اخذت نفس
عالي وكتمته بصدري
راسي لاارادي تقرب ع صدره
اريد استنشق عطره بعد اكثر
اريد اخزن لايام الجفاء...

حس عليه ضمني اكثر واكثر
لحدما حسيت قفصي الصدري
بحالة هيجان وصراع هو وگلبي
اليمنعه من الخروج..

مافتحت عيني ابد ابد!!
حسيت باديه وهي لامست وجهي
بوسات انطبعت بصوره عشوائيه على كل ملامحي

النصيب الاكبر لعيوني مااعرف شكد
بس جانن كلش هوايه وهو يبوسني حته
من حواجبي

رفع ايدي المحروكه وباسهه
رفع خصلات شعري من اذني المريضه
وباسهه بهدوء!!

رجعت راسي للحايط واني مغمضه
لهنا كاااافي ارتاحيت ياكلبي
هسه ارتاحيت من حضنته !!

فتحت عيوني بعينه جانن يباوعلي
بهيام بسرعه ذبلن وايده اللازمه ايدي
رخت !!!

ظليت مركزه بعينه وين مايحرك البؤبو
مالته اتحرك وياااه يريد يحجي مايكدر
ماركزت على اي شي بس عيونه
جنت اباوعلهن حته بدون ماارمش..

قرب نفسه اكثر وهمس يم اذني
عذبيني!! حرگيني بنارج
خليني مااعرف ليلي من نهاري
بس سامحيني !!

خليت ايدي بصدره حيل ودفعته
وكمت وكفت واني ابعد شعري
عن وجهي!!

رغم ضعفي بس اغمض وافتح
بعيوني اريد قوه اريد اواجهه
اريد احجي الضميته اسنين بكلبي..

التفتت علي اريد اصرخ واريد
احجي بس بنظره خاطفه ركزت علي كل
تفاصيله!!

جان لابس شتوي لون زيتوني
حلقتي نفسهه بيده
لحيته محدده بس ضعفان وعيونه تعبانه!!

درت وجهي وكتله اطلع براااا
مااريد اشوفك!!

بشار..حقج عليه اطلع والله قبس لاديرين
وجهج لاتغمضين عيونج حاجيني
وانتي مفتحه !!

شتريدين انفذ بس لااديرين وجهج
عني لج صار سنه ونص ياقبس سنه ونص
شفت الموت بغايبج

لخاطر يوم حلو واحد !!
ساعه وحده عشناهه بحب
لخاطرهه قبس بس اسمعيني

والله روحي انطيهه الج بس اشوفج
مرتاحه كتلج لااديرين وجهج..

واجه عليه سريع هزني من اكتافي
مغمضه عيوني مااريد اشوفه
هزني حيل وهو يحاول يقلل صوته
حته لايسمعونه..

مافتحت وتلاويت وياااه اريد
افلت من ايده نبتت اضافيري
بيده اريد يعوفني..

بس جان اسرع من عندي ايد لزمت اديه
والايد الثانيه لزمت راسي واخذ شفايفي
ببوسه عميقه حسيت روحي غابت !!

دفعته حيييييل ارتد ليورا واني امسح
بحلكي واحجي واشر بعصبيه
امشي اطلع برااا اشمئز منك اطلع
حته اسمك مااريد الفظه ...

بشار.. غصبا عليج تسمعيني حجاهه بعصبيه
ولف اديه اثنينهم وخلاني ع الحايط
اتلاويت وياه اريد ابعده ماكدرت..

وحده منهن جرهه خلاهه ع كلبه وظل
لازمهه والثانيه مثبتهه ع الحايط..

باوعتله بعصبيه وكتله عيب انت ماكاعد
ابيتك استاذ منا ناس غربه وخرررر عني..

بشار.. باوعيلي!!
قبس.. درت وجهي كتلك وخرررر عني
بشار.. باوعيلي ووابتعد!!

قبس.. باوعتله واني رافعه تك حاجب
شفت شبح ابتسامه بوجهه همس بهدوء
وعينه بعيني ..

ادري بيج قويه وسباعيه وتسمعين
الي راح اكوله قبس بنيتي اريدج قويه..

قبس.. شتريد تبشرني تزوجت الثالثه
لو الدكتوره جابتلك ولد!!

بشار..بلع ريگه ونص راسه ع عيوني
باسمي من جفوني وظل على وضعه مدنك
وشفايفه ع جفوني ويحجي ..

قبس اني وياج عدنه ولد ابنج مامات
وهذا جايبه الج تشوفي!!!!!!

شح عليه الهوه مااستوعبت اي كلمه
كالهه ظليت جامده بمكاني
واعيد بكلامي ابنج مامات
ابنج مامات!!!

ماادري شلون ارتخيت ووكعت بالكاع
وهو نزل بمستواي ولازم اديه..

رفعت راسي عليه واني اضحك
شتحجي انت جاي تقشمرني ابني
بيدي لزمته ميت بشاااااار ابنه مات
اني شفته..

كمت احجي بدون وعي كمت ارجف
مثل سعفه واجاهه اعصار
يحاول يهديني مايكدر..

دفعته وركضت لكنتور لبست حجابي
وطلعت اركض وينه!!!
وينه ابنج يكول جبته هم هنا ويجذب عليه..

شفته واكف بصف التخم وبيده تفاحه صغيره
عاضهه بسنيناته الصغار

اخذتني رجليه واني مااشوف بعيوني
من الغواش نفسه الطفل الشفته بحسابهم
وسرور دكول روح امك

لزمته من اديه اباوعله نفس عيوني
وهو مركز بعيوني ولو عنده السان
حجه بس بسرعه كام يبجي..

حضنته حييييييييل وكمت ابجي بصوت
عااااالي بصوت اريده يوصل لبغداد
ويكول شوفوا شكد انظلمت..

ماادري شصار ولااتذكر غير بس الحضنه
القويه كلهه ماعدت غير دقايق
وبعدهه سافرت روحي للبعيد واني
اشوف ماما تضحك وتكلي قرة عينج
بأبنج !!

ماادري شصار بس هايه ماما تبجي وهذا
بابا راسه ابيض ودموعه تنزل وهو يردد نفس
كلمة ماما ويكول قرة عينج يابنتي

اسمع صدى صوت بابا وهو يكول يوميه
ادعيلج الله يرجعه لحضنج
اخذي يابنتي هذا نصيب عذابج
ومظلوميتج!!
...

بشرى.. ماطولت ولاتحملت لذة اللقاء
ولاجمرة الفراق هي حضنه وصرخه
بصوت عالي ااااابننننني ووكعت بالكاع..

امير يصرخ شالته سناء
وقبس الوجه اصفر شاحب
وشفايفهه زرگ اتشاهدتلهه بكلبي
حسيت روحهه بدت تغيب..

حضنهه بشار وشالهه وابو سيف
ركض كدامنه وكفنله تكسي
امير عفته يم سناء راسهه بحضني
وبشار كلساع يلتفت واشوف الدموع تلالي بعيونه

وصلنه للمستشفى بشار يعرف
يحجي انكليزي بطلاقه وكدر يتفاهم
وياهم اخذوهه من عدنه واحنه مثل
السمج المزهور ...

مر هوايه على دخولهه وشويه
انفتح الباب انصدم بشوفتهه
فاقده منتهيه من الاموات
ايدهه واكعه من السديه ونقلوهه لغرفة الانعاش..

الطبيب حجه ويه بشار
كاله سكرهه ٤٧٠ وضغطهه ٤
راح نفقد المريضه گلبهه تعبان ...

حجه هالكلام ومشه يعني
كلبج ماتحمل الصدمه
يعني ماعشتي لذة اللقاء ويه ابنج
الله يكون بعون صبرج!!!

.
.
يتبببببببع.. متابعه ممتعه