رواية قمع المشاعر الفصل الحادي والعشرون 21 - بقلم Rozaya1122

قمع المشاعر.... البارت الثاني والعشرون..
للكاتبة زهراء ( روزايه)....

غــربلــت الحچــي وشفــت الــسوالــف عــيب
عشــت يم نــاس مابيهــم اوشــالــت طــيب
يــا وسفــه العــمر خلـصتــه مـوت ابمــوت
مـن اصد لـ مرايتــي يوجعـني شــوف الشــيب
....

قبس.. بعدنه مهوسين جان اطب ام العروس تملخ بنفسهه وتصيح الحكيلي ام بشار عمر كال لصابرين ظلي يم اهلج وحلف مايجي يزفهه وباجر ماكو عرس وحته كال لابوهه .
ام بشار.. اخذتهه للهول فوتي داده اتفضلي وكولي يالله

ام صابرين.. الله عليج حليهه هاي السالفه
ام بشار ... تعالي وياي للغرفه ماقبلت تحجي كدام الموجودين بس فاديه ماتكدر ع نفسهه راحت وياهن واجت سولفتنه

فاديه.. خطيه امهه تملخ بنفسهه ودكول هي بنتي هيج مو فشلتني وياكم وكالتلكم موافقه وبدون حته ماناخذ راي ابوهه ورجعت جواب من عدهه طايشه ومدلله وهيج تصرف لا هلوحده عدهم ولا اخ ولا اخت

ام بشار.. مهما يكون مايصير تقلل من قدرنه حته اذا ماعاجبيهه لخاطر رجلهه
ام صابرين.. وليش ماعاجبيهه ترى الكل مدح بيكم وكلمن يكول بيكم بخت صرتو نسابه ليش محد يعرف الحجي صالح بس بنتي رعنه وعمر اجه لابوهه وابوهه ضربهه راشدي كدام اخواتي

ام بشار.. هدي حالج وان شاء الله ماكو غير الخير هسه ادز ع عمر ونتفاهم ويااا.. وطلعت ام صابرين خطيه ودموعهه تلالي من ورا رعونه بتهه

قبس.. التهينه بهوسه العشا وام بشار كالت اني احاجي ومن جاي انصب عشه اجه عمر ولزمنه عماتي وامه وخالاته وهو يكلهن لاتتدخلن

بشرى.. يعني تردهه لاهلهه هاهي ماتريدهه ولك العيب علينه وسمعه ابنيه هاي
عمر.. ممنوع وحده من عدجن توصل يمهم وخاف يخابرن ع صالون ع صخام بوجه كلهن ماكو

ام بشار.. يمه تحجي صدك انت هوكلشي اتفاق احنه متفقين الصالون علينه مال الحنه والعرس باجر تجيك بدشداشتهه؟؟

عمر.. انتي بس بطلي لا ادافعين واني بخير وحق الله لازفه ولاصالون موماعاجبيهه اهلي خليهه يم امهه
بشرى.. عمه هي بنيه ومدلله وصغيره مافاهمه الحياه زين وشافت كرايبنه كلهه حلوه والحقيقه تقال هن موحلوات صديقاتهه رادت تحس بقيمه نفسهه موهيج تعاقبهه

عمر.. هسه شتريدن زفه ماكو وصالون ما اخذهه يريد ابوهه خلي ياخذهه ماعاجبه خلي يخلي بنته يمه ولاكلساع صايحاتني ..

حجه هيج وطلع وام بشار خطيه ساعه ادز ع عمو عادل وساعخ ع بشار وعمر قفل زفه ماكو حته فرحتنه خربت والظاهر هو متحمل عليهه مو مال اول مره لان ماكو هيج ردة فعل من اول مره وبيوم العرس...

كملنه العشا وغسلنه مواعين ورجعنه من جديد بدلنه وسوينه حفله وحدنه تعويض لمال العصر حفله تجنن بس بدون عروس بحيث الصغير والجبير كام يركص والولد برا مسوين بشارع والي بالحديقه بس المهم احنه ع كولت العجايز ملحتن گلوبجن...

نرجس كاعده يم الدي جي وكلساع مطلعه اغنيه جانت طالعه اغنيه دالي اريده اريده لاتزوجني المااريده شوفو المصايب جابولي شايب ميمشي الا عكازه بيده!!!

دفعتني فاديه وعمه بشرى يله اركصي ماشايفين ركصج جنت لابسه نفس اللبس مال العصر ومفتوح شعري وطبيت اركص

شجن.. من جنه ازغار انشوف اكو راقصه اسمهه نورا ركصهه فدشي وهاي المره قبس نسخه من ركص هاي نورا بحيث كل الي يركصن وياهه وكفن ع جهه وبس نباوعلهه من هز خصر من ركبه من كتف مثل الي يطلعن بالتلفزيون

بعدين كامن وياهه البنات والكل جان فرحان ويركص حته اني رجلي مومال ركص بس كاعده بمكاني واهز وياهن لحدماصارت الساعه ب١١ واحنه ع فد ركص صدك اول عرس عدنه واول فرحه والكل جان فرحان بس ماما ضايجه على العروس لان نعرف بعناد عمر

قبس.. بدلت لبست تراك طويل ورحت للمطبخ اجمع بالكاسات الفارغه لان صايره فد مره هوسه جانت اكو وحده من كرايبهم تصير بنت عم بابا الله يرحمه يكلولهه ام هيثم واكفه ومنطيه ظهري للباب

جان دكول والله طلعتي صدك بنت سميه عمي العرك دساس خالاتج مشهودلهن كاوليه ويركصن لصدام ورفاقه هنيال عادل حاطله كاوليه بنص بيته...

كلامهه مثل السم وموصغيره بالعمر تقريبا بكد عمه بسمه ماتحملت اسكت كتلهه شبيج مقهوره موبنتج جانت تركص لازم بنتج هم كاوليه؟؟

ام هيثم.. ياناقصه ياعديمه التربيه تشبهين بنتي بالكاوليه ؟؟
قبس.. شنو الفرق انتي عندج كل الي تعرف تركص كاوليه ومدام كلتي عليه هيج لان ركصت بنتج هم جانت تركص ويانه يعني نفس الشي

ام هيثم.. طايحه الحظ مامربايه منو يربيج سميه الساقطه لو عادل المخنث تف ع خلقتج ياكح...

قبس.. والله ماكو ناقص غيرج واريد اتجاوز عليج حتلو جبيره لان ماخليتي احترام لنفسج ناس ميتين تحجين عليهم منو انتي؟؟

من الاساس عندي عقده من موضوع اهلي وهاي اجت داست بطني انفعلت وماعرفت شجنت احجي مااركز ع الكلمه الي تطلع من عندي لوماعمه بشرى وفاديه اجن وسكتنهه جان هديت عليهه وكفشتهه..

ظليت بالمطبخ كاعده وكلبي مشتعل نار ماكو وحده ماركصت حته عماتي يعني كل الي تركص كاوليه وموخوش اسب اهلي اسب خالاتي من سابع ظهر ومايبرد كلبي...

اسمع صوتهه تصيح هسه اروح ما اظل اني انهان ابيت عمي ومن وحده بكد بنتي وعماتي يهدن بيهه وهي ازيد مني تجمع بغراضهه وتصيح شوفولي سياره هسه اروح ..

مدري منو داكه ع عمو عادل واجه اسمعه يحاجيهه ويكلهه احسبيهه عليه بس هي الله يسلمهه ضاجت لان كتلهه بنتج هم مدام تعرف تركص ...

ماكدرت اطلع من المطبخ اكيد الكل يعتبرني مذنبه وماعندي كل ردة فعل بس نار وتسعر بيه طلعت من باب الممر ومدري منو وصلهه

بس طلعت اجتني عمه بشرى تلوم بيه ليش حاجيتيهه هيج؟؟
.. عمه اني يمهه بكاعهه وليش اسكتلهه فشرت عليه واني اصلا ما اعرفهه اني ركصت وبتهه ركصت يعني اثنينه نفس الشي ...

بشرى.. كون عزا العزاج ع هالسان ولج مصخمه لوساكته وجايه كايلتلي اني ارزلهه
قبس.. وليش اسكت دكلي انتي ساقطه وامج هيج وتريديني اسكت لوتستحي ماحجت مره شكبرهه

بشرى.. هذا السانج يرادله كص من العرگ يله نخلص من عنده بس منو يكصه الج قبيسان ؟؟

قبس.. هاا حته انتي صرتي ضدي موبنتج هم ركصت تقبلين نكول عليهه هيج
بشرى.. اسكتي خلي اروح اسكت اخواتهه الي يهدن لسه ولوبيوتهن قريبه هسه يروحن ويزعلن

قبس.. روحي طالعه حسره عليه اتصرف بعفويه وحالي حال البنات لازم انوخذ بذنب خالاتي الي الله ياخذهن حته ما اندلهن وين ماحركت نفسي من المطبخ كلساع وحده تجي تاخذلهه شغله وتروح واني ع كعدتي

ورا ساعه تقريبا طب بشار بس اسمع صوت برا يمكن جماعتهم بعدهم ويمكن يباتون لان عمر عنده اصدقاء من المحافظات وجايين

بشار.. واكف بالسنك والتفت عليه خير وجهج مگلوب؟؟
.. مابيه شي انتظر رحمه الله شوكت ينامن حته اكوم انام
بشار.. ام السان شمحاجيه ام هيثم

قبس.. لازم وصلك الحجي ؟
بشار.. غير اني وصلتهه طلعت بهالليل المره زعلانه موعيب مره جبيره
قبس.. شو تحجون عليه ماتعلموهه العيب لو خبصتوني بس مره جبيره
بشار.. السانج ولج وصوتج لاتعلي

قبس.. مامعليته بس لازم الواحد ينهان ويسكت واذا حجه يطلع موخوش
بشار.. هسه غير نفتهم من عندج سمعنه من ام هيثم انتي شبيج؟؟
قبس.. لان ركصت دكلي انتي ع امج وخالاتج جانن يركصن لصدام وفشرت وغلطت ومن كتلهه بنتج هم ركصت شبت بيهه نار ماحجيت شي غلط..

بشار.. ببتسامه كال عفيه بهالوكت محد يوكفلج اخذي حقج بايدج وام هيثم موجديده عليهه كل مناسبه تسويلهه سالفه محد خلصان من السانهه

قبس.. لعد شكو سويتوهه فدمره وعمه بشرى دكلي يراد نكص السانج ونخلص لان دافعت عن نفسي

بشار.. هسه عوفيني من عمتج بشرى المايجي منهه بس شلعان الكلب كالو خوش تركصين؟؟

قبس.. شلون الواحد شمرو علي سطل مي بسرعه دنكت كتله منوكالك؟؟
بشار.. عمتج بشرى!!
قبس.. ترى حالي من حال البنات ركصت شبيكم متفاجئين اول مره تشوفون وحده تركص

بشار.. والله يابنت عمي شايف وعايف بس مثل شوفتج ماشفت
قبس.. شتقصد؟؟
بشار.. مواكلج انتي اثنين لوغبيه لوتستغبين؟؟كومي من المطبخ وروحي نامي مبين التعب عليج ..

قبس.. ولا الي خلك حته ارد علي كمت للغرفه لكيت فاديه فارشه للبنات محد حجت وياي والظاهر صدك ام هيثم معروفه بالمشاكل من كدما جنت تعبانه بسرعه نمت ...

ثاني يوم زفه ماكو وصالون البنيه محد اخذهه وظلت ورا اهلهه مانعرف شي وشكد قنعوا بعمر بس قفل نهائيا وجان حاجز بالفندق وخربهه وكال هاي الفلوس الي خسرتهه ماريدهه وهي قريبه علينه راحت سياره وحده جابتهه للبيت!!!

بوقتهه من اجت العروس ماكو ناس اغلبهه راحت بس عماتي وبناتهن وحده من خالاته وبيت عامر البنيه ماشالت راسهه من الكاع رغم ام بشار بوستهه واتصرفنه كلنه طبيعي بس مبين حاسه بكسره جبيره ...

فرح مابدر منهه شي غلط بكد الشعره وكلما تتحرك تخزرهه امهه لاهيه ولا اختهه جانت صاكرتهن عمه بسمه

صعدو العروس لغرفتهه اجت وياهه امهه ومن تعشينه راحت قبل لايزفون العريس كالت ابوهه وحده بالبيت وضايج على فراكهه اروح يمه

زفوا العريس بوسط الهلاهل والصفكات بس موهذا عمر الي متعودين علي مرح ويتشاقه جان وجهه مطعون طعن ومبينه علي العصبيه حته عمه بشرى صعدت ورا حاجتهه ع كيفه ويه البنيه..

مرت تقريبا نص ساعه او اكثر نزل عمر بعده ع الدرج وعمه بشرى كامت تهلهل لحدمانزل شفته شاور امه ومبين من ملامحهه مدري شمسوي

صعدت امه وبشرى واحنه وحده تسال الثانيه شكو شكو والي دكول هيج سوه والي تنطي من يمهه توقعات وكلنه عيونه ع الدرج من طلع عمر توقعت راح يضربون طلقات بس شو هدوء تام...

كاعده ويه البنات واشرتلي بشرى من فوك تعالي قبس صعدت اشوفهه جان تلزمني من ايدي
بشرى.. اسمعي ولج البنيه حالتهه حاله وجنهم متعاركين وماذيهه انتي متزوجه وتقريبا بعمرهه طبي احجي وياهه وقنعيهه

قبس.. الله عليج عمه شحجي هو اني شعرف
بشرى.. شبيج ماتعرفين موتزوجتي شلون اتزوجتي لعد
قبس.. هسه موانتن موجودات اني شكو؟؟
.. ولج ماتسمع من عدنه البنيه بس تبجي تفوتي طركاعه ع راسج عيونج غاصه كحل ام كحيله
قبس.. هههه اليوم شبيج وياي ودفعتني للغرفه

دكيت الباب وطبيت جانت كاعده ع الجربايه لابسه تراك ستن بس يمكن باجيه سطل دموع واني شحجي شكول بس كتلهه مبروك حبيبتي

صابرين.. الله يبارك بيج بس حجتهه وهي تنشغ بواجي
قبس.. يجوز حاجيلج عمر اني قبس بنت عمهم
صابرين.. اي اعرفج مسولفلي
قبس.. اجمع الكلمات كوه اول مره احس نفسي مره ويعتمدون عليه اجيت اسالهه تخوف لولا؟ شكول عليج عمه على هاي الورطه

كعدت بصفهه كتلهه ليش تبجين؟
صابرين.. عمر طلع الليله من عيوني اني ماتقصدت اقلل من قيمتكم وحرمني الفرحه كلهه شوفي شعري لاصالون ولا بابا قبل ياخذني لان زعلان ويايه

قبس.. يله عدت وانتي تخبلين مايحتاج صالون المهم شفناج بالحنه لاتهتمين !! وعمر يحبج بس هو عصبي وهم جان مقهور
البنيه طول ما احجي وهي تبجي وايدهه ع بطنهه سالتهه موجوعه؟؟

صابرين.. كلش الله عليج شوفيلي شي مسكن خابرولي ماما خلي ياخذوني لطبيب والله متاذيه
قبس.. قهرتني حيل سوده بوجهك عمر عود ع حب !! كمت وخليتهه تمدد وهي صدك متاذيه وبس تبجي اريد ماما

ياربي شسوي كتلهه هسه اصيحهه ونزلت لعمه بشرى لكيتهه تشرب جاي بالمطبخ كتلهه هاتشربين جاي ورطتيني؟؟

بشرى.. فوت فوت اشرب جاي بس انه وامي !! وضحكت لعد شبيج مو متزوجه وهي بعمرج كلت تفتهم اكثر من عندج احنه حاولنه وياهه بس تبجي

قبس.. عمه البنيه متاذيه وتريد امهه
بشرى.. وشسوي بامهه هذا مثل يوم القيامه كل واحد يحير بروحه
قبس.. لا عمه الله عليج لهدرجه ؟؟

بشرى.. ولج جنج مامتزوجه شبيج مامجربه يمعزايه لو تبقين ثوله؟؟
قبس.. هسه عوفج من عندي خلي يجيبون امهه
بشرى.. محد خابرهه هسه يصعدلهه عمر ويسكتهه انتي ماتعرفين تسكتين!!

قبس.. اكلج البنيه متاذيه وانتي تضحكين صدك جذب عمه بشرى عود هاي انتي الحنينه؟؟
بشرى.. خليهه حيل وياهه ولج تعالي ياغمه طلعت حاجيته ذاك جكاره ورا جكاره يكول من انخطبنه لسه هي تحجي ع اهلي واكثر من مره متعارك وياهه ومحذرهه قبل يوم وماتابت وبس طاب للغرفه يكول عبالك مدفع وانهد وهو معصب عليهه ومن ماخذهه متاذيه

قبس.. مايكدر يتماسك اعصابه شنو من ليله تظل تذكرهه
بشرى.. هسه كتله ناخذهه للمستشفى ماقبل كال هسه اصعدلهه اني بس يمهم خطار
قبس.. والله يالله سوه نفسه عتريس عليهه وهسه راح يرجع يسحل روحه يرضيهه والله لواني منهه وهيج يسوي بيه اخلي تحرم علي النومه

ويه حجايتي وجنت منطلقه فززني صوته وهو يكول من غضب ع هاللسان الاكشر بعد خلي تسمعج امه محمد؟؟

بشرى.. ههههه يايمه صار ساعه اريد اسكتهه ماتسكت وبس تهدد اصلخ واذبح استلمي يله

بشار.. ماتستحين صوتج شعلوه؟؟ فات واحد من يم المطبخ وسمعج
قبس.. فتت بثوبي من المستحه يبو عليه كله من ورا بشيره هي خلتني انطلق دنكت وسكتت

بشرى.. اكلك عمه وين اخوك مايصعد لمرته طلع العرس من خشمهه لوتاخذوهه للمستشفى
بشار.. ماصعدتي يمهه ابدال ماحاطه هاي ام العقل جان هديتي البنيه

بشرى.. والله صعدنالهه اصلا ماتباوع بوجهنه وتريد امهه دشوف اخوك وين خلي يروح يم مرته كافي عاقبهه هواي وبعد ماتعيدهه
قبس.. استغفر ربه وطلع غمتني عمه بشرى امداج ظلي السانج جايبلج العين

عفتهه ورحت للغرفه ولاطلعت بعد وهذني يسالن بيه شسوين صعدتي واني روحي بخشمي كل فشله تصير ويه بشار عبالك مؤقت يجي ويه مالساني ينهد..

ثاني يوم كلمن راح لبيته ونزلت العروس صح مبين عليهه من المشيه مالتهه بس زينه ومبين مرضيهه وهوسه الخطار ياناس رايحه ياجايه

ورا العرس بيومين رجعت للدوام وفاديه بدت اداوم وشجن قدمولهه كليه اهليه قسم هندسه حاسبات بس بعدهه ماداومت لان مراحل اولى تتاخر ...

واني مخلصتهه مد وجزر ويه بشار يوم نظراته توحي شي ويوم ماتجي عينه بعينه وعبالك يتهرب من عندي

جنت كاعده ادخل البيانات وحسيت الم ببطني وبي ومايزود كمت احس سجاجين وتملخ بيه صحت ع سناء الحكيلي ولازمه بطني

سناء.. ولج خاف الشهريه هاج حبايه بلكي تسكن؟؟
.. لا مو الشهريه بس اني من البارحه بليل عندي الم لان اكلت لفات من برا واليوم هم اكلت من اجيت يمكن من عدهن...

انطتني الحبايه ولاعبالك شاربه شي كمت ابجي من الالم ولزمني لعبان النفس اركض للحمامات اتقيء لحدما تطلع روحي وسناء وياي ماعافتني

اخذتني من ايدي كالت خلي اخذج لابن عمج المدير لو يخابر السايق لو ياخذج للمستشفى شوفي وجهج شلون صار صدك اباوع ع نفسي بالمرايه شفايفي يابسات وجهي اصفر

راحت وياي سناء حاجت السكرتيره رفعت السماعه كالتله استاذ قبس وسناء يريدون يدخلون كالهه خلي يجن طبت كدامي سناء واني مخليه ايدي ع بطني بس شافني بسرعه كام

سناء.. اسفه استاذ عندك شغل بس قبس من الصبح متخربطه وهسه جانت بس تتقيء
بشار.. تعالي اكعدي كعدت ع القنفه مال التخم وهو يسال شبيج كعد قريب عني واول مره اشوف الخوف بعيونه

قبس.. ما اعرف بطني ونفسي تلعب حيل متاذيه
بشار.. رفع راسه لسناء من يمته هيج خاف ماكله شي
سناء.. والله مادري استاذ عبالنه الشهريه بس دكول لا مو موعدهه بس يمكن ماكله لفه نفسهه دنيه

قبس.. الله يصخم وجهج سناء وماتشتمين ريحه الرجال شكلتي لروحج من جفصتي بالحجي ماكو عيب لامستحه

شفت شبح ابتسامه ع وجه جان يكلهه اخذي راحتج ست سناء هسه ادزهه البيت مشكوره
قبس.. دنكت باستني وطلعت ولامهتمه وعبالك كالت كلمه عاديه ندري كبار بس معقوله عادي عدهن وكدام المدير اني الج سناء !!

رجع ارتجى ع الكرسي وكال شكلتي؟؟
قبس.. اكلت لفه البارحه واليوم هم اكلت ومعدتي تخربطت
بشار.. ليش تاكلين من برا ترى اكو كافتيريا يم الشركه ونظيفه وحته مطعم اكو خاص بالشركه
قبس.. شمدريني بعد اكلت

بشار.. ارجعج للبيت
قبس.. اي والله لان روحي تكلب
بشار .. هسه اخابرلج السايق
قبس.. خابر السايق وسده التفت عليه وهو مبتسم كال خوفتيني عليج؟؟

بعدني مامجاوبته ولاهو مكمل حديثه واندك الباب السكرتيره جانت عصبيه

استاذ بشار اكو وحده اسمهه ميامين دكول جنت ويا زميلته ومنعتهه ومصره الا تدخل...

من كالت اسمهه اشوف ملامح وجهه تغيرت ١٨٠ درجه بسرعه انعكدن الحواجب وحجه بدهشه متاكده ميامين؟؟

بعدهه السكرتيره واكفه جان تفتح الباب وتفوت بس صوت الكعب مالتهه يدك بالراس

وكفت بالباب وكالت شلونك بشار؟؟؟؟

يتببببع..... متابعه شيقه