رواية قمع المشاعر الفصل السادس وسبعون 76 - بقلم Rozaya1122

قمع المشاعر....  الثاني والثلاثون من الجزء الثاني...
للكاتبة زهراء ( روزايه)...

شكد تقهر شوفته من بعيد
وانه لابيه اروحن ولابيه ارد
وجماله اجبر عيوني عنه تبتعد
ياكرامه ياغرور ياعزه نفس
كلهن يوكعن من عيني بعينه تصد
.....

قبس... اموري بحضن ابو واني عيني
علي كلساع يباوعلي ويضم راسه
ماسالته شكالت امك من سمعت بيه
اكتفيت بالصمت..

قبل لانوصل كتله وين ناوي تاخذني
احسب احسابك ماافوت لبيت اهلك
ولالبيتك!!

بشار..يحجي ويباوع بعيوني ميل راسه
وعيونه ذبلانه!! لازم تجين لبيت اهلي
وين اوديج !!

قبس.. كتلك قبل انتم انتهيتوا بالنسبه الي
والي رجعني لبغداد ابني والله لويصبوكم
ذهب ماارجع واشوفكم

بشار.. ميخالف بس اليوم وباجر اطلع ادورلج
بيت!!
قبس.. ولا نص يوم تريدني التقي
بالدكتوره زوجتك المصونه كل عقلك لو اعرف
انام بالشارع ..

بشار.. قبس لاتصعبيهه بيتج ع وضعيته
ومحد دخله ارجعي بيمن ماالكه بيت..

قبس.. ماارجع كتلك ماارجع سمعتني
البيت الداسته مره غيري ماارجعله..

بشار.. وين اوديج وامير ويانه تحجين
صدك !؟
قبس.. لعد اتشاقه وياك!! ماحسبت احسابك
من اجيت غير توفر سكن لو عبالك قبس
تتقشمر مثل قبل..

بشار.. فرك وجهه وكال دخل نوصل والله كريم
قبس.. سكتت وهو ظل ساكت العب بايد
اموري وهو ضام راسه

احتاجيت حمام شلون سالفه هاي
شلون اكوم وحدي واصلا مااندل واستحي
بنص الركاب..

قربت راسي علي التفت بسرعه
ماباوعت لعينه مدنگه واحجي
اريد اروح للحمام تعال ويايه...

هز راسه وانطه امير لبشرى الخلصتهه
نوم كلساع تفز وكالت وصلنه ورجعت نامت..

كام ويايه اتلكتنه مضيفه حاجاهه
واخذتني غسلت وطلعت رجعنه
لمكانه ردت اخذ امير لزك ببشرى
ماقبل يجيني..

وصلنه لبغداد وبعد الاجراءات
كعدنه بالاستراحه هوه بغداد
من اتنفسه احسه يجرحني..

بس وصلت اتذكر شكو ذكره
سيئه شكد عانيت بيج
وشكد انظلمت بس الحمدلله
طلعت منج مظلومه ورجعت بريئه..

كعد بصفي عاد نفس الحجي
هو وبشرى انفعلت حيل كتلهم
لو اموت ماارجع عوفني بالشارع
ومااطب ابيوتكم..

اخر شي شال التليفون وخابر
ع عمر كاله تعال اخذ جيب سيارتي
من البيت وتعالي للمطار ..

ظلينه ننتظر وامير ابد ماتقربلي
لو ابو لو بشرى عيوني تترقبه
وتتود اله بس نافرني ومايريدني ابد..

فوك النص ساعه اجه عمر دك تليفون
ع بشار وطلعنه ليبرا من شفته قريب
وكفت بشرى تمشي كدامنه شايله امير
وبشار بصفي

من شافني وكفت التفت عليه وكال امشي
ليش وكفتي؟!
قبس.. مااصعد وياه مونفسه هو الكال
موتي اخوي اذا ماغسل عارج اني اغسله
مايشرفني اشوف خلقته ولا اكول ابن عمي..

بشار.. قبس اجيبلج طياره تنقلج يمعوده
خلي انشوف مكان نكعد بي وبعدين اجرلج
اذانهم واحد واحد ..

قبس.. جر اذانك بالاول ورفعت حاجبي..
بشار.. والله لوما بنص العالم جان عرفت
شلون اجاوبج حجاهه بحديه امشي عاد
وبطلي عناد.

قبس.. كتلك ماامشي والله وروح اهلي ماامشي
بشار.. استغفر الله مدكليلي هالراس اليابس شنو؟؟
اوكفي يمج امري لله...

قبس.. وكفت ع جهه وراح لعمر درت وجهي انطيته
ظهري لسه اتذكر نظراته شلون يباوعلي
وشلون يتوعدلي وبالفتره الاخيره كام مايسلم عليه...

حجه وياه واجاني كال امشي بيده السويج
وشايل امير وعلاكته ماسلمت ع عمه لان صارت
بعيده

اخذ السياره من عمر وهو وعمه اجروا تكسي
وراحوا مشيت وراه صعدت بالسياره وانطاني
امير وهو افتر صعد ويشمر روحه ع ابو..

يشغل بالسياره ويحجي وياه بابا حبيبي
هاي ماما خطيه اكعد هسه اخذك لبيبي..

وابد شكد عنودي اله كعد بحضنه ويسوق
بايد وحده كلساع اكله ع كيفك لان
امير يسوق وياه ..

سألته وين راح انروح؟!
بشار.. نحجز بالفندق وباجر اشوف حل..
قبس.. واهلك؟!
بشار.. شبيهم؟!

قبس.. ينتظروك
بشار.. ااي كلت لعمر كلهم قبس ماتقبل تشوفكم
قبس.. هاااا
بشار.. جعتي؟!
قبس.. لااا بس تعبانه خلي نوصل وبعدين ناكل..

وصلنه للفندق حجز غرفه وصعدنه غراضنه
ركضت للحمام سبحت وطلعت اخذت امير
اريد ابدله مايرضى يجيني

هنا مدري شصار بيه فقدت كمت اعيط
وسحبته كوه وهو يبجي ابدله وهو يصرخ
وبشار بالحمام ..

طلع بسرعه بس بالجامه والخاولي ع اكتافه
وهو يحجي موهيج ولج كوه تريدي يتعود
الف مره كتلج يستغرب..

قبس.. معليك انت يتعود غصبا علي
مثل ماتعود ع سرور
بشار.. قبس!!! وجره من ايدي يسكت بي
ويرزل بيه انتي مخبله متشوفي شلون
ميت بجي جبير ويفتهم لوطفل ..

قبس.. وشوكت انتظر بعد هم فد سنه حته يتعود
كله منك خليته يتعود ع سرور واني مافكرت بيه..

بشار.. والله انتي موصاحيه كتلج سرور
ماربته عاش يم امي وهو طبعه هيج
حته لعمر مايروح لو شجن لو امي
طالع عليج ..

قبس.. ماعاجبتك موووو ؟! وتقلد طالع عليج!!
بشار.. اذا انتي ماعاجبتني لعد منو اليعجبني
بس بطلي هالطبع وصيري حبابه
قنعي موهيج يحليوه!!

قبس.. جنت مامنتبهه من العصبيه بسرعه
فترت واني عيني ع صدره كمت ابلع بريگي
واحرك بعيوني بصوره عشوائيه
مااريد ينتبه..

بسرعه ابتعدت وهو يلاعب بي
صرت وراه وهو يشيل اموري
ويشمره فوك ويلزمه وهو يضحك
عيني على ظهره وشلون يتقوس وتبين العضلات
من يرفع اديه..

نسيت نفسي ورحت لايامي الحلوه
جان شحده ينزع هيج لان اركض ادغدغ
بطنه وهو يصيح يلبس بسرعه ويكول
اخلص منج كل رومانسيه ماعندج ...

جنت مبتسمه وسارحه بخيالي ومرتجيه
ع الحايط التفت عليه وهو يتقرب
انتبهت لنفسي بسرعه كحيت وغيرت نبرة
صوتي بعصبيه كتله جوعانه!!!

بشار.. كصتيني كص وعيونج ذبلانه
فد وحده لوتيه من توصلين للجد تنهزمين!!

قبس.. انت حيل واثق من نفسك
من زمان كايلتلك انت بلييييد!!
وراح اعيدهه عليك يابلييييييد يا اناني

بشار.. طكهه ضحكه بصوت عالي وعبالك اول مره
يضحك ! شو عيديهه !!

قبس.. حجيتلك نكته استاذ بشار!!
كام يتقرب واني محشوكه بالحايط واموري
يلعب ع الجربايه صار بعد شبرين عني..

بسرعه تحركت ردت اطلع بس سحبني
من ايدي طخيت بصدره العاري
نفسي ثگل رجليه تخردلت

كمت احاجي بكلبي لاتخذلني
حباب صير قوي !!
لاتضعف ياگلبي حباب
لاتخذلني..

بس متعوده علي العاق لازم
يتخلى عني ويركضله
دكات كلبي صارت مسموعه
سرت رجفه بجسمي ويه انتقال حركه ايده..

لمني بحضنه حيل وراسي ع صدره
دكات كلبه منتظمه مرتين تخربطن
مره من اجيته كلي دم وحضني !!
ومره من التقينه اول مره بتركيا تخربطن !!

وهسه منتظمه وينبض بهدوء
واني گلبي عبالك عنده حفله
صاخبه فضحني وشهرني !!

ابتعدت عنه وين اروح هي غرفه وحمام
شلون سالفه عوجه درت وجهي وكتله
ماتلبس شمنتظر؟!

بشار.. كابري بعد كابري!! عندي خلك طويل
وياج واريد اشوف وين راح توصلين!!

قبس.. باوعتله ورفعت حاجبي كتله
نوصل للمحكمه ونطلك..

بشار.. منصي ع الجنطه طلع تشيرت
ردن طويل لبسه وهو يحجي راح اجيب
اكل واجي موالكاج انتي وامير عياطكم
واصل لاخر الدنيا..

قبس... طلع واني حرت ويه اموري
حته زحفت على ركبي سويت ميووو
احط اديه ورا اذاني واسويله حركات
واطلعله الساني...

ساعه يضحك وساعه مايعبرني يدير وجهه
كمت فتحت شعري رغم قصير وكعدت يمه
وانطيته المشط بسرعه كام يمشط ويدردم

اهااا عرفتك ولك ابوك سالفته ويه العيون
وانت سالفتك ويه الشعر !!

احني جسمي حيل وارجع استقيم
وهو يلعب ع ظهري ويضحك
فرحت حيل ابد مابجه لحدما اجه بشار

جنت نايمه ع ظهري ومنزله رجليه بالكاع وجسمي
ع جربايه واموري صاعد ع وجهي ويلعب بشعري
ومدري شيحجي..

جان البدي مالتي يمكن مرفوع ماحسيت
غير يحرك طرف اصبعه ع بطني كمزت بسرعه
حته اموري راد يوكع ..

باوعلي بابتسامه ورفع اكتافه وكال
ماعليه اني هي بطنج صاحتني!!

قبس.. بطل هاي السوالف كتلك لاتستغل
ضعفي بامير وبعدين شكو تمد ايدك ع بطني
هاااا شكووو؟!

وكمت من مكاني وهو واكف واباوعله
بعصبيه مصطنعه واحجي منو سمحلك
ودغيته ببطنه حيل مره واثنين لحدما
لوه ايده يله عفته..

رغم شكد تأذى بس كال شكد مشتاق
لهاي الحركه بطني يوميه تسالني عليج
وينهه الخبله التدغني يوميه ؟!

قبس.. فتحت الاكل ارتب بي واحجي
اهلك خابروك
بشار.. اااي رادوج وكتلهم متريدكم

قبس.. كعدنه ناكل واموري بحضني وكلساع
يكوم ويفتر ع ظهري عود نصي اريد العب
واني عفت الاكل والعب وياه وهو صافن علينه..

كملنه اكل وغسلنه سويت ممه لامير
مايتعب بالنوم بس غنيتله غفه مددت بصفه
وبشار يصلي من كمل نام بصف امير من الجهه الثانيه..

مد ايده طفه الضوه صار الجو حلو
هم شتا وجانت الساعه ب٣ والدنيا مغيمه
وبي بروده ...

هدوء واثنينه ساكتين همس بصوت
ناصي عن لايكعد امير وكال سولفيلي
تأذيتي ورا الولاده؟!

قبس.. هزيت راسي اااي
بشار..القابله كالت تعمدت اذيهه وسويتلهه
خياطات هوايه ومااجت تراجع ؟!

قبس... الله يلعنهه!! تدري شكم خياط
١٢ خيط خلتني شهر لا اكدر امشي ولا اكدر انام
مثل الناس ومدري شلون مخيطتهن

بشار.. مممم وليش ماراجعتي خاف يلتهبن
قبس.. بيا حال اني هن لحميات كالت ماالتهبن
بس تاذيت حيل ..

بشار.. ترفعين دعوه ثانيه عليهه؟!
قبس.. موانت رفعت دعوه وانفصلت واخذت جزاتهه
بشار.. اااي وعيالهه اخذوا اطفالهه كلهم ومايخلوهه
تشوفهم وحاليا يم اهلهه ومحرومه من اطفالهه زغار

قبس.. هاهي هذا عقاب الدنيا وبالاخره اني
شكيت لربي وهناك نتقابل اني وياهه..

بشار.. انتي بريئه ونظيفه ودعوتج ماتعدتنه كلنه
ماكو واحد بينه سلم كلنه اخذنه نصيبنه واولهم اني ...

قبس.. بس اسراء مااعرف اخبارهه يجوز
تزوجت وخلفت مويريدهه ابن عمهه
بشار.. ماادري من نحل سالفتنه اخلي امي تخابر
بيت عمهه

قبس.. سكتت وهو هم سكت
شويه ورجع حجه
بشار.. بعدج مصره ع الطلاق
قبس.. طبعا !!

بشار.. وامير
قبس.. الحضانه من حق الام
واذا لزم الامر مستعده ادخل للقاضي واكله حرموني
منه سنه واكله اذني مااسمع بيهه من ضربته
كلشي اكدر اسوي بس احصل ابني..

بشار.. فكري قبس فكري مره ثانيه الوقت الج
مستعد انتظرج طول العمر بس ابعدي فكره
الطلاق ..

قبس.. بشار انت وعدتني واني ثقيت بيك
طلكني وخليني اعيش ايامي مرتاحه ويه امير..

بشار.. فكري لخاطر امير اعرف مااستاهل
فرصه ثانيه بس الي تريدي انفذه اطلك سرور
واشتريلج بيت جديد شتردين اسوي ..

قبس.. مادخلني اطلكهه تبقيهه ثق بالله
اخر شرط اشرطه عليك هو طلاك سرور
اني مومن هذا النوع

رغم حقارتهه واستغلالهه ورغم كلامهه
الجارح بحقي بس هي حالهه حال الالف
النساء الي صارن زوجه ثانيه سواء بسبب
او بدون سبب!!

يعني الي افتهمته من عمه بشرى هي عدهه عقم
يعني من اطلكهه انتهت بعد ماتزوج واذا اتزوجت
هم ماراح تاخذ واحد زين وهي جبيره بالعمر

والشي الثاني انت مامتقربلهه دكول عمه
يعني من اطلكهه لازم تتقربلهه لان هذا عيب
بحقك..

بشار.. شنو قصدج؟!
قبس.. يجوز دكول عليه مجنونه بس مااريد
اطلكهه حته لاتتقربلهه !!

بشار.. تغارين!!
قبس.. لاتحجي ويايه هيج بس مااعرف
مااكدر اتخيلك ويه وحده ثانيه

يجوز سبب تصرفاتي هسه ومرات تشوفني
هادئه وماتوقعت هيج ردة فعل اني بنفسي
جنت اكول اذا اشوفك ارفع دعوه بالمحكمه عليك
بس من عرفت مامتقربلهه احترمتك ..

بشار.. ولللج شوصايره تلوصين شنو احترمتك
غصبا عليج !
قبس.. خاني التعبير المهم قصدي مثل الاحترام

بشار.. شلون تفكرين اكدر اتقربلهه وروحي بيج
وانتي عايفتلي شعرج يوميه الصبح وبليل اشمه
مرات اصفن ع نفسي اكول يمكن صرت موصاحي
لازم مشط وامشطهه

شسويتي بيه وبدلت وعطرج ع جربايه
شسويتي واني روحي صارت بالغرفه منين
مااندار اشوفج اريد افتح الكنتور ملابسج
كدامي شلون تريدين اباوع لغيرج..

قبس..لعد ليش تزوجت ؟!
بشار.. غلطت قابل نبي اني هم انبياء الله
غلطوا اني بشر وغلطت بلحظه غضب ماادري
جنت ضايع بالتفكير وغلطت...

كتلج مااستاهل تسامحيني بس تدرين
بيه شكد احبج ولج موبس حب عشق!!
هيام!!

قبس.. اني نعست تصبح ع خير
بشار.. طايحه الحظ تشعل السالفه وتنهزم

قبس.. مديت ايدي حضنت اموري واني
مبتسمه شفته شكد تحرك بمكانه مامرتاح
كام شرب جكاره واني مانايمه حاسه بكل
حركه بالغرفه...

مرت ساعه تقريبا ودك تليفونه جان يمي
شفته سرور ردت اجاوبهه بس كلت
شنو هالسوالف انتي موتردين تطلكين...

هو جان يغسل اجه شافهه كعد ع جربايه يم رجليه
وجاوبهه كمزت من مكاني وسحبت التليفون منه
وفتحت سبيكر وهو متفاجئ بتصرفي..

يحجي ويباوعلي كالهه هاسرور!!
سرور.. الحمدلله ع السلامه ابو امير
شلونك اموري شلونه؟!
بشار.. الحمدلله زين
سرور..شنو هذا الخبر من الصبح ننتظر
وتفاجات خاله كالت قبس راجعه وين لكيتهه؟!

بشار.. قابل هي ضايعه جانت مسافره يم صديقتهه
وهسه رجعت!!
سرور.. ليش مارجعت للبيت هنا كلهه تنتظرهه
بشار.. باجر امرلكم ونحجي انتي ظلي يم اهلي
سرور.. بشاااار
بشار.. هاااا

سرور.. سكتت وكالت ديربالك ع نفسك
واشتاقيتلك البيت وحش من دونك
بشار.. ان شاء الله
سرور.. مع السلامه

قبس.. شبيك سكتت مستحي مني ماكتلهه
اني اشوق!!
بشار.. انتي موتردين تطلكين ليش تغارين؟!

قبس.. لاا مااغار بس جاي اعلمك لاتجرح
مشاعر النساء
بشار.. ماحجيت شي حته اجرحهه
قبس.. حجيت بعصبيه كوم من رجليه اريد انام

بشار.. نامي منو لازمج حلوه هاي طلكني
وتعال اغار عليك ..
قبس.. درت وجهي ع امير بس داخلي يغلي
اعبري النهر مدامه ضيق ياقبس كل عقلج
تعيشين بنار الغيره..

ظليت اتگلب بفراشي غفيت شويه
وكعد امير فتحت الضوه بشار ماكو طالع
غسلت لامير وبدلتله زين وياي مابجه..

كشرتله موزايه كعد ياكل بيهه واني كاعده
يمه كلساع ابوسه ويشيل الموزه من حلكه
وينطيني عود اكلي !!!

شبعته تكرص من خدوده وبوسات
كمل ولزم المشط هاي يمكن افضل لعبه
عنده مستعد ساعه وهو يمشط ومايمل...

للمغرب اجه بشار طب ساكت توضى
وكام يصلي حسيت الم بطني ركضت للحمام
طلعت الشهريه هلووو كملت السالفه
شكو موقف يفشل صار..

ماعندي احتياط وظليت حايره انتظرته
كمل صلاة وكلساع اريد احجي واستحي
واضحك بداخلي شوف الادب ياقبس
شلون تستحين البعد خلاني اخجل منه..

تالي طلعت تليفوني ودزيتله رساله
نسيت مايعرف رقمي كتبتله روح
اشتريلي......

فتح التليفون وعقد حواجبه بالاول
ماعرف الرقم بس رفع راسه عليه سويت
نفسي العب بامير جان يدك تليفوني بصفي..

شكد خبيث دك لان مايعرف رقمي سده وكام
وكال شنو تستحين دكولين
ودازتلي رساله وخسرانه رصيد؟!

قبس.. هسه موعرفت بعد شكو
بشار.. محتاجه شي بعد ؟!
قبس.. لاااا بس جيب فواكه لامير

طلع وشويه واجه جايبهن عفت
امير يمه ورحت بدلت وغسلت
طلعت لكيته يخابر بصديقه..

من سده كال لكيتلج بيت صديقي فارغ
عارضه للبيع بين ماينباع راح اكعدج بي
واشوف شلون..

قبس.. بيع البيت مالتك المن مخلي واشتري
مشتمل لسرور ومشتمل الي

بشار.. سرور اطلكهه ؟!
قبس.. لاتلعب ع بنات الناس هم انسانه
وعدهه مشاعر مادزت عليك حته تخطبهه
وماسوت شي غلط واذا ع استغلالهه شي
طبيعي تريد تكون زوجه الك

الي اريد اكوله الك لاتنتظر مني اي شي
سواء طلكتهه او بقيتهه ماراح ارجع بقراري...

بشار.. كومي خلي نتعشه وبطلي
خرابيط
قبس.. اوك عود لاتنسه ترى كلت انفذلج
اي شي وطلبي الوحيد اطلكني

بشار.. صاح بصوت عالي كاااااافي
افتهمنه سدي حلكج عااااد..

قبس.. سكتت ماحجيت وكمت حضرت
العشه تعشينه واثنينه ساكتين كملنه
وهو مدد واني بين مالميت الاكل وغسلت

كعدت بعيد عنه ع القنفه وماكو اي حديث
بيناتنه شبي بسرعه عصب هسه جان مابي
شي وطبيعي!!

فتح التلفزيون واني العب ويه اموري
لحد الساعه ب١١ نام امير واني كمت بدلت
لبست تراك خفيف واجيت مددت..

بعدني هستوني خليت راسي صاح قبس
تعالي يمي!!

قبس.. ليش؟!
بشار.. تعاالي خليني اشبع منج كلهه ايام
وانطلك وتحرمين عليه

قبس.. بشار نام ماتعبان
بشار.. قببببس وحجه وهو صاك ع اسنانه
تجين لو اني اكوملج..

قبس.. مااجي !!
بسرعه كام وسحبني من ايدي نزلني من الجربايه
ادفع بي وخررر شبيك نسيت نفسك
لوتريدني ابلع سوايتك السوده..

مالحكت اكمل كلامي واكفين بنص الغرفه
ولزم راسي باثنين اديه واخذ شفايفي
بلهفه ببوسه عميقه لامست كل خليه
احساس بداخلي..

استسلمت او بالاحرى اني جنت اكابر طول
هاي الايام حاوطت اديه ع ركبته وبادلته
البوسه صار يتنقل من ركبتي لورا اذني ..

حركة ايده صارت جريئه اكثر بس جنت
مستسلمه بالكامل لحدما انتبهت ع نفسي
واني مدده ع صدره وايده بشعري..

هدووووء فضيع ماحجه ولاكلمه
بس جان يروي عطشه وكلساع يبوسني
واني ساكته ..

غفيت بحضنه وايدي محاوطه خصره
وماكعدت غير ع بجية امير نص الليل..

كمت من مكاني لبست البدي وكمت شلته
رجع نام خليته بنصنه وكملت نومتي..

ثاني يوم كعد قبلي لكيته بالحمام
من طلع كتل تحضري حته انروح للبيت
بسرعه تريگنه وطلعنه ..

اخذني للبيت فارغ لا اثاث لا شي نكعد
علي اشوفه شكد استغفر وتليفونه اهله
يتصلون ومايرد..

خابر ع ابو حسين وطلب منه يجيب
الضروريات واجه ابو حسين جاب فراش وطباخ
وثلاجه كله جديد وقنينه غاز وشكم ماعون..

انقهرت على بشار طلعت ورا كتله لتهتم
راح ادبر حالي بيهم واقفل الباب عليه
وروح تفاهم ويه اهلك

كللهم قبس ماتريد تشوف اي واحد
لايحرجوك ولا يحرجوني...

سكت قفل الباب وطلع واني رجعت
للبيت للظهر جاب غده وطلع والمغرب
اجه وجايب مسواك بس تعبان حيل
ب٩ نام شفته اخذ علاج وغفه بسرعه...

ثاني يوم نفس الحال يجيني الظهر
ويجيني بالليل غير شمحتاجه وشلونه
امير ماكو اي حديث..

ورا اسبوع اجه جايب اثاث كامل سيارتين انحبست بالغرفه
وفوتوا الاثاث طلعت رتبت اني وياه
كالي تردين غرفتج لو جديده اجيبلج كتله لا نفسهه
جيبهه

سالته ع البيت كال اشتريتلج هذا
اكعدي بي وذاك عارضه للبيع وسرور
راح اطلكهه..

سكتت ماحجيت اي شي ورا ايام
بين مارتبت البيت واموري تعود عليه
ايدي بالبيت ليل نهار ارتب وانظف صار
حلو وهو بناء جديد..

جانت الساعه ب١٠ الصبح بشار يبات يمي
اني انام بالغرفه وهو بالصاله رجعنه مثل
قبل واكثر مابيناتنه غير السؤال ..

اندك الباب طلعت صحت منووو؟
اجاني صوتهه وهي دكول اني سرور

ظليت واكفه بباب المطبخ
اطلعلهه لولا ظلت ادك وتصيح
ام امير بس كلمتين افتحي الباب..

طبيت وسديت باب المطبخ ومافتحتلهه
مااريد لا اشوفهه ولا اسمع اي كلام منهه..

شويه ودك عليه رقم غريب واكيد
هي منو يتصل بيه بسرعه انطيته حظر
هيج مرتاحه وراسي بارد..

اجه بشار وماكتله ولااريد ادخل بيناتهم
يطلكهه يبقيهه مايهمني ابد
مامقصر ويانه ابد وموضوع الطلاق ساكت عنه
كلما اريد افتحع اشوفه تعبان ...

بيوم منهن هو بالدوام وجانت عصريه
واني وامير نلعب بالغرفه مكعبات
اندك الباب دكه غريبه؟!

اني ورا جية سرور طلبت من بشار يخليلي
كاميرا بالباب حته مااطلع واكول منووو؟!

ركضت للكاميرا اباوع واشوف هوايه بالباب
ركزت عليهم بيت عمو عادل كلهم حته هدى وفاديه
وصابرين وبيبي ...

شعدهم جايين ؟! بشار مموجود
ردت احسسهم اني مااريدهم
فتحت باب المطبخ وصحت منوو؟!

اجاني صوت عمو وهو يكول احنه
بويه قبس اني عمج ؟!

نفس الحال ويه سرور طبيت
وسديت الباب خليهم يدرون اني
مااريدهم ظليت اباوعلهم بالكاميرا
شكد دكوا واني ماكمت..

راحوا قررت بس يجي بشار
اطلب منه هاهي امير تعود عليه
ولازم نطلك..

اجه بليل صبيت العشه وغسلت مواعين وراهه
لكيته مدد يشوف تلفزيون وامير ع صدره..

وكفت يمه وكتله بشار مولازم
تنفذ وعدك وتكون كد كلمتك
خلينه نطلك باجر..

كعد ع حيله ونزل امير بالكاع
وكال اخر كلام عندج؟!

قبس.. اي قرار نهائي
بشار.. ماشي باجر الصبح انروح نطلك
وانفذلج الوعد...

.
.
يتبببببببع..... متابعه ممتعه