رواية قنــــاع القـــــوة الفصل الثامن والعشرون 28 - بقلم الكاتبة ديانا

بارت ٢٤
#قناع_القوة

صار موعدنه مع البارت ٢٤  ادري رح تكولون قصير ... بس هو مجهد مشاعر  و الله هاي اولاً و ثانيا. ختمة احداث و نقلة باحداث جديدة  ان شاءالله ❤️❤️❤️

البارت ٢٤
قناع القوة

اسراء....
كعدت الصبح و لكيت حسناء... كاعدة بس مو على بعضها ... صافنة و تفكر ...
كتلها شبيج يولي وجهج اصفر و عيونج حمرا ... شنو منايمة الليل...؟؟

حسناء..: اي والله اسراء منايمة ...

اسراء..: ها هي كولي يا الله و سلمي امرج بيد العينه متنام ...

حسناء..: تدرين البارحة خابروا العصابة ... و ساوموني....

اسراء و بشهقة..: اااااي يا الله ولج يعني رضاء ما بيها شي ... يا ربي رجعها بالسلامة ... ليش مكلتي..؟؟؟ امي هسة تفرح اروح اكلها...

حسناء جرت اسراء من ايدها..: تعاي وووين ..؟ اكعدي ... خلي اكملج ... و امي لا تجيبيلها طاري ... اسراء رجعة رضاء بالحلم ... تعرفين شكد رايدين ..؟؟؟؟ ولج اخوج بايك ملاييين ... و يريدوها كلها و وياها وثائق و مستندات تودي ناس ورة الشمس...

اسراء و صارت تبجي..: و شنو العمل حسناء... اختنه تروح ...
الله يسامحك طه....ليش هيج ... ليش بهذلتنه... ابونه راح و رضاء ماكو ... و امي بلا عافية ... يا ربي انت اعلم بالحال... يا ربي فك اسرها ...'

حسناء.....
جمدت و اني افكر بفكرة العرض الي عرضته علية ام حسن... الي بوقتها خلاني انتفض من مكاني و اعترض بصدمة... هو جان واكف وراية... حجت وياه على انفراد قبلي... و يمكن كالتله ع هالعرض هاليوم يعني هو مثلي درى اليوم ... هاي بشنو تفكر... اكو وحدة تعرض ع زوجها هيج عرض... و ان انت مريضة... بس مو هيج...

لا ارادياً رجعت نظري عليه ... و كأنما ردت اشوف ردة فعله.... نظراته اخترقت كل سنتمتر بجسمي... حسيتها سهام و استقرت بية... صح كان واكف بجمود و مكتف ايده بس ملامحه كانت كفيلة بان تعبر عن الي بداخله... و ينطيني شعور سيء....
رغم هيبته و وقاره... بس احسه جلمود ... قاسي... ميبالي بالگدامه ... كل ظني رح يعترض... او ينهي هالمهزلة بصوته العالي الي تعودت اسمعه من يصيح ع ام قصي .. لو احد العاملين عنده...

بس ما نطق ... بس شفته اسبل اجفانه و هز راسه و كأنما كلي اي وافقي ...
مقبلت و رفضت و ام حسن صارت تتوسل .. اخر شي كالت شاهين خلينه وحدنه...

عافنه شاهين و اني وياها ظلينه سوا... طلبت مني اتقرب منها و اكعد ع السرير...
بالبداية ما رضيت بس هي تعبت و شفتها صوفرت اكثر ...استسلمت و جيت كعدت يمها...

نورس..: شوفي حسناء... اني مو غشيمة... و انت هم ذكية و فطنه... اللعبة الي دخلتي بيها كلها اعرفها... و يمي اسمج الكامل و بيتكم وين و حتى عدد الانفار العايشين بي... يعني كل هاللعبة اكدر اكشفها لشاهين ... و هو رح يعرف شلون يحاكمج... انت و الدخلج بحياتنه... تعرفي ... ظاهر ... المسكين شنو ذنبه... يعني يلبس براسج قضية تحتيل و رغم الوضع مو زين و الامن مو تمام لكن بفلوسه يدخلج السجن و الله العالم شكد رح تاكلين حكم .... فكري زين  رح تفيدين و تستفيدين ...

حسناء و بخوف ..: و بشنو رح افيدج و اني رح اتزوج رجلج ... رح اكون ضرتج...؟. 

نورس..: اول شي اني زوجي يحبني و هذا الشي ضامنته ... و واثقة منه... ثاني شي .. شاهين كلش مقتنع انه حسن يرجع يتشافى اذا طلعه برة لالمانية ... و تسجيله باحد المراكز التاهيلية للامراض النفسية و التوحد... و هذا الدافع الاساسي لطلبي منج ... هذا الطلب... يعني ابني يضيع... و يتيه هناك ... اني ابني اعرفله ... رح تزيد حالته و تسوء اذا ابتعد عن الجو العائلي... جان متعلق بية هواية... يومه كله وياية ... نلعب و نضحك و نطلع و حتى جنت ادرسه و اسويله تمارين ... مثل ما هسة انت بديتي وياه ....

حسناء...
انرسمت ع ملامحي علامة التعجب و الاستفهام لجملتها الاخيرة... شمدريها اني دا اسويله تمارين ...هي حست علية ... كالتلي لا تظنين ما اعرف الي ديصير وراية ... دبة النملة ادري بيها... اعرف ابني مندمج وياج و زوجي تعلم ع وجودج ...
كالت جملتها الاخيرة الي بخصوص شاهين و حسيت بغصة توسطت كلماتها ... حسيتها تلمح لشي ... معقولة اني لا ارادياً صار ذاك الموقف بيتهم... رجلها ما اواطنه و لا ارتاح ابقة وياه بمكان بوحدنه دقيقتين... شتلمح هاي...؟؟

رديتها بفتور...عكس دواخلي..: و شمعنى اني ... تكدرين تشوفييلج وحدة و مو مثلي ... بمقاييس احسن و تكون خبرة اكثر ...

نورس..: انت حرة .... تكدرين ترفضين ... بس اني انفذ شرطي... كلشي اكول لزوجي و ما اسكت و اتسترلج .. و رجلي انسان عملي... و يتخبل من احد يدوسله ع طرف ... و يستغفله

حسناء ...
مدا اعرف شأسوي هي .. تهددني بزوجها ... و زوجها محاوطني بنظرات غريبة ... ممفهومة ... ساعة ظلما و تجدح نار ... و ساعة احس بيها شي تلتمسله روحي ...
يا ربي وين وكعت نفسي... شجابني هنا..

نورس..: لا تظلين تفكرين اني اعتقد هذا العرض من يمج ..شاهين ميتعيب ... صح هو يحبني و الي مكانة بگلبه خاصة و اني زوجته الاولى و الاخيرة... بس هو  ما رح يقصّر وياج ... رح يسخي عليج بالفلوس... و ينطيج اسمه... بس بالبداية رح يكون زواج بعقد شيخ و بعدين محكمة...

رادت حسناء تعترض لكن قاطعتها نورس و رغم وهنها و ضعفها لكن الفطنة و الذكاء ظهرت جلية ع ملامحها... هذا الشرط لصالحج ... و اني فكرت بي... لان حبيبتي انت عمرج بالهوية مو مثل ما شاهين يعرف... عمرج ميتعدى العشرين طالبة اعدادية .. هو فاهم انت اخصائية يعني عمرج مفروض تعدى الخمسة و عشرين...

حسناء.....
سكتت و بين ع ملامحي الموافقة ... لان ما رايدة ادخل اهلي بمصيبة جديدة...
طلعت من الغرفة و حسيت بنظراتها رغم المرض جانت الفرحة بين ملامحها ظاهرة و نشوة الانتصار تلمع بين عيونها ...

رجعني شاهين ... اغلب الطريق  ساكت و اني متوترة ... يعني هذا الشخص الصخرة رح يكون بيني و بينه رباط... لا ... ما معقولة ... شلون خاف يكشفني ... قابل رح نظل ع عقد السيد...
ما فد يوم رح يشوف هويتي...
يا ربي ساعدني...

قطع الصمت و التوتر بصوته المبحوح ..: شوفي ست حسناء... احياناً يكون مكتوب النه شي و احنه غافلين عنه... و لا بالنه ... بس الله بمقاديره يقدره النه.... و احنه البشر سواء رضينه او لا لازم نسير بهالدرب...

حسناء قاطعته ..: اي صح بس انت مفروض و بهاي شخصيتك ... تمنع هالمهزلة و ترفض... على شنو انت ساكت .. ما ادري...؟

شاهين و احتدت ملامحه حس بالاهانة و خدش لرجولته..: اولاً ... لا تعلين صوتج ... و حاولي تسيطرين على انفعالاتج ... ثاني شغلة ... اني انجبرت حالي حالج ......

هالمرة هي انخدشت انوثتها و انزعجت لان ردلها الصاع صاعين... ابتلعت ريقها و باوعت لملامحه و هو يسوق سريع ... و بغضب

كمل شاهين و هالمرة بصوت اهدأ من الثورة الي احدثتها قبل شوية حسناء... : نورس لازم تسوي عملية للكبد ... تبديل كبد .... و هي متريد تسوي لان دكول اخر ايامي اريد اكظيها براحة وية ابني ...
و قبل ايام بالگوة كدرت اقنعها... لكن اليوم طلعتلي بسالفة جديدة .. هددتني متسويها اذا ما انفذ شرطها .....

حسناء و بنبرة استنتاجية..: و شرطها ان نتزوج ..!!!

شاهين اندار باوع لملامحها الطفولية و باستغراب اظهرت حسناء الحقيقية بدون ما تدري ... و رجع باوع ع الطريق...

و بعد ثواني تكلم بنبرة مسيطرة ..: باجر اجي لبيت خالتج بيت ظاهر ... و اطلبج منهم... و انت فهميهم الموضوع ... و ظاهر ما اعتقد رح يمانع ... و انت كذلك ... لو اكو احد بحياتج ..؟؟؟؟

كال جملته و خزرني بنظرة ظلما و تجدح نار.... اني تلعثمت معرفت شاحجي....

مصيبة وحطت ع راسي يروح لبيت ظاهر و يطلبني عزا العزاني.... شاكول لاهلي ... و شاحجي لظاهر ... خرب حظج حسناء...

شاهين و هو يفترس ملامح حسناء المتوترة...: ما جاوبتيني ع سؤالي،؟؟

حسناء و بتلعثم..: هاااا لا ماكو ... بس ميصير  هيج انام اكعد الكة روحي دا انخطب و من انسان ما اعرفه  ... و بعدين بيت خالتي هسة ملتهين عدهم شغلة .. عود بعدين .... فد اسبوع هيجي و تعال...

شاهين و بعصبية لان هالحسناء صار مرتين تجرحه  ..: اليوم اشوف ظاهر و احجي وياه،....

حسناء ..
يبو عليج ... هاي شجاب هالمصيبة .. شرح اسوي وية هالحوت هذا ... كلشي يريده هو يسوي و على رأيه و هنوب رح يدخلني بمتاهات لا اخر لها ،...

رديته بحزم..: اني ما احب يدخل احد ... انت و زوجتك حجيتوا وياية .. بعد ما اله داعي ظاهر... ظاهر و بيت خالتي اني افاتحهم...
خليها علية... بس مو هسة شوية شوية

شاهين..: زين لعد ... مو اسبوع مثل ما كلتي خليهة كم يوم لان عندي مشاغل ...

رجعت حسناء من ذاكرتها لهالمواقف ع صوت اسراء.... شبيج حسناء... ركزي وياية ...

حسناء...: هاااا شكلتي...؟؟؟؟؟

اسراء..: دا اكلج شنو رايج ابيع ذهبي و اجيبلج الفلوس علمود نداين عليها و ننطيهم ...

حسناء..: كعدي راحة ... اسراء مصارلج اسبوعين من تزوجتي... شتبيعين ... لا عيوني منرضاها نرخصج كدام اهل زوجج علمود نرجع رضاء...

اسراء و دمعتها بدت تنزل ع خدها..: لعد شلووون ؟؟؟ مدكوليلي لو نبيع رواحنه هم منجيب المبلغ...

حسناء...: الله كريم اسراء ربج يدبرها ... اكلج انت رجعي لعيالج البارحة ليش مرجعتي ويه غيث...؟؟؟

اسراء ..: ما اريد ارجع .. ما اكدر اخلي امي وحدها... و هي بهالحالة..

حسناء..: يا حالة .. حبيبتي خالتي ولاء هنا ... و اني هم ... انت تعبتي ...من نحتاجج ندز عليج

اسراء..: اوك لعد اروح هسة و اجي المغرب ابات و ارجع الصبح...

حسناء..:اسراء امي وصتني اكلج ارجعي لا تعاندين ... بيتج اولة .... و كالتلي خلي اختج تنزع الاسود ميصلح ع رجلها... ولو اني هاي العقايد ما اامن بيها ... و شوية ضبي براغيج لا تظلين فاهية... هاي ام رجلج لا تسكتيلها شفتها بالعزا شلون تتأمر عليج... ما خلي تتامر ع مرت سعدون لو تخاف منها ..

اسراء..: لا حسناء ... ام غيث خوش مرة حبابة ... تعاملني مث ما تعامل بناتها بس هي تحب خدمة شكو بيها مثل امي...

حسناء ..:ميصير براسج خير ظلي ... ع وضعيتج هاي... ام غيث تتأمر عليج و غيث شايل خشمه عليج و الحمدلله
اسراء..: لا و الله الحمدلله كلهم زينين وياية ... حسناء نفسيتي متتحملج عوفي هالمواضيع و انت ان شاءالله من تزوجين حدي سنونج ع عيالج و تمالخي وياهم ...

حسناء..: اي طبعا. احمس ع اذانتهم بصل لو اذوني.. مو مثلج عاقجة الوجه و اتبجبج....

طلعت اسراء و رجعت بذاكرتي لطلب ام حسن و انعصر گلبي
.............................................................

غيث.....

من التفكير ليلة كاملة ما اعرف شلون رحت امتحنت... و هاي جيتي من الامتحان ... دخلت للبيت البيت سنطة ... رحت لغرفة امي لكيتها نايمة ... امي هيج وكت تتغدا و تنام ... و الساعه بعدها ما عابرة الوحدة...
لا جهال سعدون و لا مرته ... شنو السالفة ... كعدت بالهول شوية اكلب بالتلفزيون و بالي مو هنا بالي يم وحدة گلبي عاصرني عليها... اسراء... انت اذيتها غيث هواية... و كل هذا هي ساكتة ...
عقدت العزم لازم اجيبها اليوم من اهلها و اكعد احجي وياها...
اخذت ملازمي و صعدت فوك ... اني و اصعد اسمع حركة بالغرفة مالتي .. منو اكو ... معقولة اكو جريدي... صعدت على كيفي هاي لو بزونة لو جريدي اني يمكن عايف الشباك مفتوح ...

وصلت للباب و جان افتح بقوة و بفتحتي للباب اسراء عيطت وكعت بين ايدي ...
صارت بين ايدي ملامحها قريبة كلش لوجهي... اتنفست نفسها... ركزت بعينها المليانه عتاب و الم،..
سافرت بنظراتي لداخل عينها... هي انحرجت و الخجل لون عينها... و صارت احلى... ردت اضوك هالخجل شنو طعمه .. ردت التهم شفايفها و استمتع بيها .. هي حلالي ... هي الك غيث .. شلون عايف هيج فرصة .. شلون هاملها و هي من ضلعك انخلقت..

و بتردد نزلت ع شفافها و شفافي تتلمس ملمس شفافها الوردي .. غمضت عيني و تهت بعطر انفاسها و القوة الي جاذبتني الها ....
بس حطمت كل هالنشوة من نزلت من ايدي و بحركات قاسية .... دفعتني...

اني اتفاجئت ..

غيث..: احم احم ... اسراء ... شوكت جيتي..؟؟

اسراء و بخجل ..: قبل شوية ... معبالي رح تجي هسة

غيث..: خلصت امتحان و جيت ... شدتسوين ..؟؟

اسراء..: البردة واكعة حلقاتها دا اعدلها ..

غيث ..: لو منتظرتني اني اسويها...

اسراء...
حسيت شي خمط روحي... ما حسيت ع نفسي الا وبين ايد غيث... تقربلي و اني گلبي راد يطلع من مكانه... جان كلش قريب علية و هاي اول مرة...
بس مكدرت ... ابادله الي راده ... ما اعرف ليش... خوف لو مستحة لو مكابرة ...

ابتعدت عنه ... و لهيت نفسي ... اسوي بالفراش ... و ارتب  بالغرفة ...

غيث...
ما نزلت عيني من عليها... اليوم قريت بعين اسراء هواي اشياء... قريت الخجل و البراءة .. و الانوثة... غيث ظلمتها للبنية و هي حلالك ... اليوم لازم اكون كد المسؤلية ... اعتقد كسرت شي بداخلها و اني هيج مبتعد عنها...

رحت يمها و جريتها من ايدها ... و صارت گبالي ... عينها بعيني ... و جسدها قريب من جسدي ... رغم هي ما وصلت لطولي بس رفعت راسها ببرائة تباوعلي... مسحت دمعة نزلت من عينها جانت حارة ... مسدت بشرة خدها بابهامي ...
عيونها تنزل منها الدموع و بيها حجي... حجي يذبح ...

غيث...: ليش هالدموع ... ؟؟؟

اسراء نزلت راسها و صارت تبجي بونة... رفع راسها بايده ... و باس راسها و حضنها ... و هي استسلمت اكثر من حطت راسها ع صدره و صارت تبجي اكثر ... و ونتها تشكي الوجع بداخلها لغيث... وجع فقدان ابوها ... و وجع غياب اختها ... و وجع انوثتها المكسورة ....
غيث ظل حاضنها حييل و يمسد لراسها و يكلها ..: اشششش تهون ... ان شاءالله كل هذا يزوول............
دك تليفونه و اتفاجئ بالرقم ...

-الو ... ها ابو فاطمة ... بشّر ... حمدلله ع سلامتهم...

الطرف الثاني ما سمع منه غير بس العويل و النحيب...

غيث...: ابو فاطمة .شنو السالفة ... ليش تبجي ... فطومة بيها شي..؟؟؟

الطرف الثاني..: ولك غيث ... راحت من ايدي ... راحت ام فاطمة ....

انقطع الخط و غيث مصدوم ... حاط ايده ع حلكه ...

اسراء..: شكو غيث ..؟؟

غيث و بصوت باكي ..: صاحبي انهجم بيته .......