بهتت ملامحها بصدمة
بدهشه الكل !!! بغصه كسر داخلها شيء! من سابع المستحيلات انه بيتصلح !!
اخذت الجوال منه برعشه ايدها ! ودفته وطلعت بسرعه وهي تحترق بداخلها !! ودها لو انها تقتل نفسها ولا انها تعيش هالموقف !!
ام صقر وهي بتمسكها سبقتها ميهاف وطلعت
من المخيم بسرعه بعيونها الغرقانه بالدموع
بهاللحظه وقفت لما شافته واقف قبالها
وفاتح باب السياره !
اشر براسه بمعنى اركبي !
طالعته والشرار يتطاير من عيونها !! شتت نظراتها عنه بلحظه م نزلت دموعها !! صدت ومشت بسرعه وركبت !
تنهد وقفل الباب ومشى للباب الثاني وركب
وحرك !
_
" مخيم الرجال"
بندر وهو يلبس جزمته وانتم بكرامه : اقول عبدالعزيز
عبدالعزيز وهو يصب الحليب بالابريق ومشغول : هممم
بندر : عطني مفتاح سيارتك بروح اعبي الدافور غاز
عبدالعزيز بإنشغال حط الابريق ع الجمر : تلقاه ع المركه !
مشى بندر واخذه وطلع متوجه للسياره !
عبدالعزيز بلحظه م عدل الابريق ع الجمر الا طير
عيونه وشهق لما استوعب ان بندر اخذ سيارته !!
فز من مكانه بسرعه ولبس جزمته
وركض وهو يدعي ان الله يعمي عيون بندر عن البنت اللي نايمه بسيارته !!
بلحظه م وصل لبندر اللي بيفتح الباب
صرخ عبدالعزيز : بندددرررر!!!
جمد بندر ولف !! قرب له عبدالعزيز وهو يتنفس بسرعه قفل الباب ولف عليه : لاتاخذ سيارتي !
عقد بندر حواجبه باستغراب : ليه ؟
عبدالعزيز بإرتباك : هاه لا يعني بتتوصخ بالتراب !
رفع بندر حاجبه : نعم ؟؟ تقدر تغسلها!
ضحك عبدالعزيز بربكه : لا يعني بروح مشوار بعد شـ..
سفهه بندر فتح الباب وركب انجن عبدالعزيز وهو بيمسكه
بس قفل بندر الباب بعناد وشغل السياره ولف ع ورا حتى يرجع بس توسعت عيونه بصدمة
من البنت اللي منسدحه بعبايتها وتطالعه بخوف !!
ارتعب بندر بهاللحظه وقف السياره وفتح الباب ونزل
وابتعد ع ورا بوسع عيونه : وش هو ذا ؟
حط عبدالعزيز ايده ع وجهه بتنهد : ياااربي !!
لف بندر عليه بصدمه : تككككلمم !!
_
" سيف وميهاف "
لف عليها سيف وهي ع وضعها متكتفه وصمت
عميق بدون م تنطق بشي !!
صد بعيونه للطريق و مد ايده : عطيني جوالي !
طالعت بإيده ! ثم صدت فتحت الشنطه وطلعت جواله
ورمته قدامه وصدت وتكتفت
رفع حاجبه بدهشه لحركتها ! لف عليها ونطق ببرود : وجوالك بعد !!
بهاللحظه لفت عليه بصدمة !!
سيف بحده : قلت هاتيه !!
صدت لما حست بالدموع تتجمع بعيونها اخذت
الشنطه وعطته ولفت وهي تطالع بالدريشه
عفست وجهها لما حست بألم بقلبها ! بلعت
ريقها وهي تحس بالمراره !! تعبت من الكلام وتعبت من انها تعانده ! مافيها الحيل والقوه انها
تواجهه بأي شي اكتفت بصمت عميق مثل جرحها !!
اما هو دخل ايده للشنطه وطلع جوالها رفع حاجبه
بسخريه : انسي انك بتتواصلين مع احد بعد هاليوم
رمشت ببطئ وهي تتجاهله !
لف بعيونه للطريق : تماديتي وانا محذرك من البدايه تحسبيني غبي وغافل عن افعالك ؟؟ وقف السياره
ع جنب ثم لف عليها بسخريه : ع بالك ان ماعندي علم
باللي سويتيه ف وصايف واختها بالعزيمه اللي راحت !
قد ما انها انصدمت الا انها م لفت عليه غمضت
عيونها وانسابت دمعتها بحرقه ع خدها !!
سيف : قلت يمكن صار سوء فهم ! ف عزمتهم اليوم وقلت بشوف وش بتسوين !!
وضحك بسخريه : بس م بقيتي كلمه سوقيه م قلتيها بوجهها !! اذا هاذي تربيه اهلك فيك ! ف انسيها دامك بين عايلتي وجماعتي تربيه الشوارع ذي م ابيها !
عضت ع طرف شفتها بوجع من كلمته وهي صاده وقلبها
اللي يوجعها زادت انفاسها
استرسل سيف ببرود وتهديد : ولا صدقيني
بسوّد عيشتك !! ترى اللي صار قبل شوي ولا هو بشي باللي بسويه فيك !! مرر بلسانه ع شفته السفليه لما شافها سافهته !
مسكها من عضدها فزت بألم ولفت عليه بوسط دموعها الحاره !
سيف بتهديد : اقسم بالله لو اشوفك تتعاملين معي بهالحركه
تسفهيني وانا اتكلم والله محد يلوم نفسه غيرك !! طالعت بإيده وهي عاقده حواجبها وعاضه ع شفتها السفليه من الالم ! فك ايدها صدت بهاللحظه بشهقه من بين انفاسها الغير منتظمه فتحت الشباك
تبي هواا تبي اكسجين ينعش رئتهاا وهي مكتومه !! بدقات قلبها السريعه !! اخذت تسحب الاكسجين بقوه
لداخل رئتها برعشه ايدينها !!
حرك سيف السياره بنرفزه للبيت !!
_
" مخيم الحريم "
البنات بصدمه وعدم استيعاب للي صار !
اميره : صح انها م كان لازم تقول هالكلام !
بس وربي قلبي عورني عليها !!
ريهام بحزن : لو تشوفون وجهها كيف كان مخطوف
لونه من الصدمه والفشيله !!
مناهل : هو غلطان اقل شي يسويه انه يكلمها لحالها.مو قدامنا !!
اميره : بنات تهقون ان وصايف غلطت ع ميهاف هاذي ثاني مره تصير المشكله !!
ريم : لالا حرام عليك وصايف هاديه ومسالمه البنت وكلنا نعرفها ! بس ميهاف ؟ مدري والله عن شخصيتها بس م اتوقعها وصايف !
ريهام : اي والله نفس كلامك
بلحظه م دخلت عريب سكتو البنات وصرفو السالفه ..
ام صقر بعتب : ي يمه ي وصايف تكلمي قولي لي
وش الهوشه ذي من جديد !! مايصير هالكلام!! وصايف بغصه : صدقيني ي خالتي هي اللي تبلت
علي كنت بدخل للبنات بس وقفتني وقالت ليش جايه تبين المشاكل !
سفهتها وكنت بمشي الا وقفتني ورفعت صوتها !
ام وصايف بعصبيه واقفه بعيد ومتكتفه وتطالعهم بغبنه صدت بقهر واتصلت ع السواق يرجع ياخذهم ..
_
" عبدالعزيز "
بندر بقهر : انطق !!
عبدالعزيز اللي قرب منه وحط ايده ع فمه : اصص لاتفضحنا بفهمك بس اسكت !!
نزل بندر ايد عبدالعزيز : بسرعه اخلص من ذي ؟؟
عبدالعزيز : ذي وحده
" وبدأ يقوله بوسط انظار البنت فيهم من ورا الشباك بخوف وارتباك حست انها بتنفضح اكثر واكثر ! "
بندر بصدمه لف ع السياره ثم لف ع عبدالعزيز : نعممممم ؟؟ عبد العزيز بتنهد : عاد ذا اللي صار !
بندر : شلون تاخذها وانت ماتدري وش السالفه يمكن متبليه الرجال!
رفع حاجبه عبدالعزيز باستحقار : بالله عليك
تبي تتبلى الرجال وهو يسحبها للخيمه وتصارخ !!
بندر بتنهد : طيب وش بتسوي فيها؟
عبدالعزيز : مدري باخذها لاهلها اكيد
بندر : اخاف ان اهلها يتهمونك انك خاطفها!! عبدالعزيز بتفكير وقلق حك دقنه : تهقى كذا؟
بندر : والله توقع كل شي من بنت لقيتها بهالموقف !
عبدالعزيز : اخذها لمركز الشرطه؟
بندر : اخاف تشتكي عليك هناك وتقول انك خاطفها !
كشر عبدالعزيز : لاوالله ؟
بندر بتنهد : ان لله طيب وينه هالرجال اللي تقول عنه ؟
هز اكتافه عبدالعزيز :مدري تركته بمكانه وجيت هنا !
بندر : اخـ..
م كمل كلامه الا لفو ع سياره الشرطه اللي
وصلت لمخيمهم و توسعت عيون
عبدالعزيز بصدمه وصد بسرعه
وتلثم بشماغه لف عليه بندر باستغراب : شفيك تلثمت ؟
عبدالعزيز بارتباك : غط علي غط !!
بندر بارتباك لف ع سياره الشرطه اللي نزلو منه شرطيين
ثم لف ع عبدالعزيز : شفيه؟؟
عبدالعزيز بصدمه : هالشخص اللي اقولك تحرش فيها امس ! معهم الحين شكله مبلغ علي !!
جمد الدم بعروق بندر بهاللحظه
لف بوسع عيونه يطالع بهالشخص اللي واقف مع الشرطيين !
_
" سيف وميهاف "
بعد م وصل للبيت سحب فرامل بلحظتها فتحت الباب ونزلت وهي م توعي بنفسها وكأن اللي صار كان حلم !!
مشت بخطوات بائسه وراه دخلت بعده وهي بتصعد
همها انها تكون لحالها تعيش مع نفسها بهالفتره !
بسقطع عليها صوته : وقفي !!
وقفت ولفت عليه نزلت نقابها عن وجهها بقله حيله تطالعه
قرب لها ابتعدت ع ورا
وهمست بتعب : سـ..يف فكـ..ني خلاص م كفـ..ـاك البي سويته؟
وقف قبال وجهها رمشت ببطئ بإرهاق
اخذ جواله بكل برود واتصل وحطه سبيكر
بوسط نظراتها فيه باستغراب ابتعد ع ورا : خليك واسمعي !
رمشت ببطئ بعيونها اللي مايله للاحمرار !
بهاللحظه توسعت عيونها بصدمه
واستعدلت بوقفتها بلحظه م سمعت صوت
ابوها : الو !
سيف بابتسامه : هلا والله ي عم اخبارك ؟
ابو ميهاف بفرحه: بخير ي وليدي ؟ وانت ؟ واخبار
بنيتي ميهاف وينها غاطه ماعاد لها حس ولاخبر وجوالها مقفل شغلتو بالنا !
سيف بابتسامه خبث وهو يطالع بميهاف : بخير وتسلم عليكم
مشت بهاللحظه بخطوات لهفه وشوق رفع ايده
سيف بمعنى وقفي ! وقفت باستغراب !!
سيف : واخبار عمتي ؟
ام ميهاف بصدمه اختطفت الجوال لما درت انه سيف : الو ! سيف ؟ اخبارك يمه عساك بخير !
سيف : الحمدلله بخير وانتي ؟
ام ميهاف بحزن وشوق : بخير الحمدلله وينها ميهاف مختفيه ؟
سيف : معليش والله اعذرونا سافرنا لبرا وانقطعت الشرايح ولا شرينا !
ام ميهاف : هي بجنبك ؟؟ تجمعت الدموع بعيون ميهاف بهاللحظه !
سيف : لا انا برا وهي بالفندق بس ان شاء الله باقرب وقت بقولها تدق عليكم
ام ميهاف بحزن : ان شاء الله خلها تنتبه ع نفسها ووصلها سلامنا وقول لها اننا فاقدينها البيت من دونها موحش !
محمد : وقول انا احبها
نزلت دموعها وقوست ثغرها وهي تحس بالخنقه !!
سيف : اوك يوصل فآمان الله
وقفل ونزل الجوال مشى لها بكل برود مسك وجهها
ورفعه له وابتسم بمكر : هاذي اخر مره بتسمعين صوتهم فيها !!
رجعت ع ورا بخطوات مهزوزه لفت وصعدت بهاللحظه ةهي تجهش بالبكا دخلت غرفتها حطت ايدها ع يسار
صدرها اللي انقبض بحزن مع وجع بكل يسار
كتفها مع قلبها دمرها اهانها ذلها كسرها !! رفعت عيونها اللي مليانه بالدموع برعشه ايدينها قفلت الباب بصوت مخنوق وهي مهزوزه مو قادره حتى توقف ع رجولها
تحس الدنيا كلها اسودّت بعيونها: الله يحـ..رق قلبك !
" الساعه ١٢:٢٣ منتصف الليل"
بعد يوم كامل من الهدوء بالبيت سيف اللي م شاف ميهاف ولا طلعت من الغرفه اما هو طفى سيجارته بالصحن
وهو بيقوم بس قطع عليه اشعار رساله واتس رفع جواله
وفتحه كانت رساله من خالته ام وصايف طويله
بدأ يقرأ وهو عاقد حواجبه في منتصف الرساله توسعت حدقه عيونه بصدمه شب بهاللحظه قهر !!!
طلع بسرعه من غرفته متوجه لغرفتها وهو بيفتح الباب لقاه مقفل !! قرب أذنه وصل لمسامعه صوت شهقات متتاليه
انقبض قلبه بخوف ! ضرب الباب
بسرعه : ميهااااف ؟؟ ميهاااف ؟؟
اخذ يضغط بقوه ع مقبض الباب وباندفاع ميهاف ؟؟ وهو يسمع شهقاتها كل مالها تزيد وتزيد
ابتعد ع ورا ومشى بسرعه وضرب
الباب بقوه ورجع للمره الثانيه وسوا نفس هالحركه
كل تفكيره محصور فيها وبشهقاتها اللي ارعبته !! لحظه ما انكسر الباب دخل بسرعه
و جمد لما طاحت عيونه
عليها وهي ع الارض وراسها ع ذراعها ع طرف
السرير مشى لها بسرعه جثى ع رُكبه ومسك وجهها ورفعها له : ميهـ..
انقطع صوته لما شاف وجهها الشاحب
ودموعها انتبه لايدها ماسكه علبه دواها اخذه بسرعه وفتحه وهو يشيك رفع عيونه لها بخوف
وبصدمه : لاتقولين انك نـ..ـاويه تقتلين نفسك !!! رمشت ببطئ بابتسامه سخريه باهته ارتسمت
ع شفايفها بخفه وبذبول ملامحها ومن بين
شهقاتها اللي تزيد تاره ! وتاره تنخفض : مو مقـ..هور اني ماخـ..ذه قلب امـ..ك ؟ مو تتمنـ..ى مـ..وتي استـ..ـانس بحقـ..ق لك امنيـ..تك !
اما هو قام بهاللحظه
مثل المجنون بصدمه باللي هي سوته نزلت راسها بهاللحظه لما حست انها بتستفرغ
من جوفها بوسط الم قلبها اللي يزيد رفعت ايدها بلحظه م احنت ظهرها بألم
الا بشـيء ينساب من شفايفها رفعت ايدها اللي ترتعش ولمست طرف شفايفها ابعدت ايدها و ابتسمت
ابتسامه ذابله لما شافت الدم ع ايدها وهي تستفرغ
دم بلحظه م لف عليها وهو يفور دمه من العصبيه منها ..
جمد بهاللحظه وتسمر بمكانه لما شاف ايدها دم هز راسه بصدمه : مستحيـ..ل !
رفعت راسها له بتعب بجسدها المنهمك عكس قلبها
اللي مثل الطبول !! ركض لها سيف بهاللحظه
مسكها وشالها ووقفها معه سحبها للحمام وهي تقاومه بضعف
م قدرت دخلها غصب للحمام وانتم بكرامه
لفها عليه ومسك وجهها وهو يرص بقبضه ايده
ع فكها وبنبره حاده بعصبيه : استفرغيه !
رفعت راسها بلحظه م حست انها بتستفرغ
تبي تقاوم
صرخ بهستيريه لفها ع المغسله ونزل راسها
وهو وراها وبصراخ اعلى : رجعيه والا صدقيني بنفسي بخليك غصب ترجعينه
م كمل جملته الا استفرغت كل اللي بجوفها وبخمول قوي كأنها فقدت طاقتها بهاللحظه
ارتخت بين جسمه بلحظه م غسل وجهه مسكها
بسرعه عرف انها بدت تفقد وعيها من قوه الحبوب !
شالها وطلع وتوجه فيها للسرير سدحها وعقد
حواجبه لما شاف لبسها عليه دم وغرقان بالمويه راح للدولاب وطلع لها بجامه ورجع طالعها لثواني ثم زفر قرب وفتح ازارير قميصها وفصخه ..
ومسك بجامتها بيلبسها عقد حواجبه كان عليها بدي تحت قميصها بس اللي استغربه اكثر
جرح طويل وعميق ممتد لبين نص صدرها
واثار الخياطه واضحه نزل البجامه بإستسلام
وبغصه عض ع شفته وقعد ع طرف السرير
عرف انه مكان عمليه زراعه القلب ! وايدينه بحضنه بيأس هاذي هي معه ! وقلب امه بين ضلوعها !
م تحمل رفع ايدينه وغطى وجهه بكفوفه حس انه مخنوق !!
تأنيب الضمير يقتله باليوم اكثر من مره !! مالها الدنيا طعم من بعد فراقها ! حس نفسه مخنوق م قدر نزل ايدينه قام وتركها وطلع
نزل لتحت اخذ باكيت الدخان من ع الطاوله وطلع للحديقه
قعد ع الكرسي بكل استسلام رفع السيجاره لشفايفه
وولعها واخذ يمارس الشهيق والزفير وينفث الدخان
اللي لوثت رئتيه بسواد مثل سواد حياته الحالكه !!
_
" بالمخيم "
بنهايه اليوم على المغرب توزعو العوايل ولو ان باقي لهم يوم ثالث ! بس شافو ان يومين تكفي والرجال
مرتبطين بأشغال ! والاكشن اللي صار بهاليومين
كفى ووفى عن يوم ثالث !
" عبدالعزيز "
لاخر لحظه قدر يغطي نفسه عن انظار الشرطه
بعد م كلمو الرجال والشباب واستفسروا منهم
واكدو لهم ان م شافو بنت ولا لهم معرفه باللي صار !
بوسط مراقبه بندر للوضع وهو يطمن عبدالعزيز اللي بسيارته متخبي ويتواصل معه بالرسايل !
بعد م راحو الشرطه وتأكد الوضع مطمأن م قدر
يتحمل وكلم البنت ان تدله ع بيتهم حتى يوصلها !
والا بينزلها لقسم الشرطه ويمشي !! بس هي ترجته
انه يتركها هنا ولاياخذها لمكان !
شك بوضعها بس رفض بالاخير دله بندر ع حل
انه يخليها بالمخيم دام بقي يوم للايجار وبعدها يتصرف
معها ! ف قعد معها عبدالعزيز بالمخيم بعد م راح الكل
_
" عبدالعزيز "
البنت وهي طالعه من الخيمه بتتوجه للحمام اعزكم الله
لما جمدت من شافت رجال منحني بوضعيه
الركوع بالقرب منها رجعت ع ورا برعب !
رفع عيونه عبدالعزيز لها استوعب خوفها : تطمني ماراح اسوي شي جيت بس اخذ عزبتي !
طالعته بخوف لفت بترجع قطع عليها عبدالعزيز
لما ترك شنطه عزبته ووقف: دقيقه
لفت عليه بارتباك
عبدالعزيز : ي بنت الحلال اسمعيني
بلعت ريقها بمراره !! عبدالعزيز بتنهد : امسى الليل وما اقدر استضيفك لوقت اطول
نزلت راسها بغصه لحظه م تجمعت الدموع بعيونها
زفر عبدالعزيز : الصباح ي اني باخذك لاهلك اذا دليتيني عليهم والا بنزلك لقسم الشرطـ..
قطع عليه بهاللحظه لما مشت بسرعه وجثت
ع ركبها بقله حيله ومسكت ثوبه ومن بين دموعها وشهقات
: رجيتك طالبتك! تزوجني واستر علي مابي الا الستر
جمدت كل خليه دم بجسمه ..
-
" بيت مضاوي ام بندر عمه سيف "
بغرفه نومها بعد م جمعت عيالها البي ارتبكوا بخوف اول مره امهم تجمعهم وتكون جاده ومتوتره بهالحاله اسوء الافكار وسوداويتها
حاصرت عقولهم بهاللحظه !!
بندر بخوف : يمه تكلمي!!
مضاوي بارتباك وضح حتى بنبره صوتها : اسمعـ..وني
و
استرسلت بربكه وهي ع الكرسي رفعت عيونها لهم : انا بدون م ابدأ بمقدمات وسالفه طويله وعريضه بدخل ف الموضوع !
غيث بتوتر : ايه؟
مضاوي : والله مثل م تشوفون كبرتو وصرتو رياجيل وينشد فيكم الظهر !
ولفت ع البنات : وانتم بعد ي يمه حريم البيت ماشاء الله
بندر وهو بدأ يفهم عقد حواجبه باستغراب :ايه كملي ؟
مضاوي بتنهد : وفاه ابوكم كمل الست سنين والله يرحمه
ويغمد روحه الجنه يارب
العمر يركض ! وانتم بتتزوجون وبتلتهون بحياتكم ولا ودي ابقى لحالي وحيدتن من غير احد !
اخذت نفس عميق ونطقت بنفس واحد : انا تقدم لي واحد عن طريق خالكم ابو عبدالعزيز !
جمدوا بحالة صمت
عميق بهاللحظه بملامح الدهشه !!
_
" عبدالعزيز "
حس كأنه اهانه بوضعها وترجيها !!
ابتعد ع ورا : قومي ي بنت الحلال !
طالعته بضيق وبدموعها ومن بين شهقاتها : داخله ع الله ثم عليك لاترجعني والله
بيذبحوني انت م تدري هم شياطين الرحمه
منزوعه من قلوبهم تكفى الله يخليك تكفى ! بس
ابي الستر والله مابي اي شي ثاني !!
عقد حواجبه وهو يطالعها ضحك بعدم تصديق : ي بنت الناس انتي واعيه باللي تسوينه تعرضين نفسك للزواج لرجال غريب م تعرفينه ؟
نزلت راسها وهي تشد ع قبضه ايدها بالتراب
وبغصه : مجـ..بوره والله مجبـ..وره
م تحمل طلع وتركها ركب سيارته وقعد وهو يحاول يستوعب كلمه بس من كل كلامها تزوجني !!! م حس بنفسه الا انه يتصل ع سيف ! هو الاقرب واحد يفزع له ويحل مشكلته !!
"سيف "
بلحظه م وقف سيف وبيتوجه للبيت قطع عليه رنين جواله رفعه شاف رقم عبدالعزيز عقد حواجبه باستغراب
رد عليه : هلا عبدالعزيز !
عبدالعزيز بعدم استيعاب وضياع : ابي الفزعه !!
رفع حاجبه سيف وبشك :شفيه ؟؟؟ صاير شي ؟؟ عبدالعزيز : تعال للمخيم مافيه الا انا ابيك بموضوع !
عقد حواجبه سيف : الحين ؟؟
عبدالعزيز : اايه
سيف : وين اجيك للمخيم ! تعال لي للبيت !
عبدالعزيز : هاه؟؟ خلاص خلاص بجيك انا ارسل لي اللوكيشن حق بيتك !
سيف بتنهد وباقي الشك فيه : اوك برسله لك الحين بس احلف لي ان مافيك شي !!
عبدالعزيز : والله مافيني شي بس ابيك بموضوع يالله بقفل جايك
زفر سيف وقفل جواله وارسل له اللوكيشن !
اما عبدالعزيز اخذ البنت معه وتوجه لسيف !
-
" بيت مضاوي "
بندر بدهشه : يمه صادقه ؟
هزت راسها امه بالايجاب !
ريهام : يعني انتي كيف مرتاحه له والاشلون؟
غيث بضحك : الله الله بنزفك عروس اجل قبل بناتك !
ضحكت امه !
ريم بدهشه : يمه طيب شلون استخرتي انتي يعني؟
مضاوي : انا مالي راي بعد شوركم ! اذا انكم موافقين برد على خالكم بالموافقه ! واذا كانكم رافضين الله يستر علينا وعليه !
ابتسم غيث : انا عن نفسي موافق
بندر بتنهد : ماعندي مشكله من حقك ي الغاليه بس ابي اعرف من هو حتى اسأل عنه !
مضاوي : صديق خالك ويعرفه وسأل عنه زين ي يمه
ريم بابتسامه حضنت امها : اخخخخ بس اخخخ
بتتزوجين وبتتركينا !
ضحكت مضاوي : وين اترككم ! بشرط عليه يسكن هنا ماحنا تاركين هالبيت هذا ان صار نصيب ان شاء الله
ورفعت عيونها لريهام ومقرن : وانتم ي يمه وش رايكم؟؟
ابتسمت ريهام وحطت ايدها ع كتف مقرن : شدعوه م نوافق من حقك ي حلوه اللبن ! استخيري وردي عليه
بالموافقهه
غيث بضحك : شكلها مستخيره ومخلصه امورها هالحرمه
بندر بضحك : والله شكله !
نزلت راسها مضاوي بحيا !
غيث بضحك مشى لها : اوف اوف استحت ي ناااس !
باس راسها وقعد جنبها : ي زينك ويازين هالحيا
ابتسمت وضمته لجانب اخته ريم : الله يخليكم لي
ولايحرمني منكم يارب
_
" سيف "
بعد م صعد فوق دخل غرفتها شيك عليها لقاها
ع وضعها ! قرب ومسك معصمها يتحسس نبضها
تأكد انه متوازن وطبيعي ! تنهد براحه طلع
ونزل لتحت للمجلس شغل الانوار بإنتظاار عبدالعزيز
ماهي ساعه بالكثير الا دق عليه عبدالعزيز
وهو واقف بنص الشارع يشيك بنظره ع البيوت
بعد م رد عليه سيف : هلا وصلت ؟
عبدالعزيز وهو يطالع حوله : اي بيت انت؟
سيف : اللي لونه ابيض ساده واغلبه قزاز !!
رفع حاجبه عبدالعزيز : هاه ايي اي لقيتك !
قرب سيارته وركنها ع جنب !
اما هي بخوف وارتباك انه ممكن يتركها ولايسوي شي !!
عبدالعزيز : خليك بالسياره انا بنزل شوي وبرجع !
همست برجفه صوتها : طـ..يب
تنهد ونزل وتوجه لداخل الا سيف ع باب البيت
من داخل : حياك
مشى له عبدالعزيز ودخله سيف للمجلس
وقعدو !
سيف بارتباك : اخلص شفيه ترا شلت همك!
زفر عبدالعزيز : ابي الفزعه !!
عقد سيف حواجبه : شصاير؟
عبدالعزيز : ياخي تورطت بوحده لقيتها بالبر وهاذي هي معي بالسياره !!
رفع سيف حاجبه بدهشه : نعم ؟؟
_
" ميهاف "
للحظه م فاقت من اغماءها وهي ترمش ببطئ بعدم استيعاب
رفعت نفسها بخفيف وغثيان بمعدتها قامت بس شهقت لما شافت انها بالبدي !!
وعلى السرير بجامتها اختطفت
قميصها ولبسته ونزلت من الدرج جمدت بصدمه من شافت وحده بعبايتها واقفه عند الباب !!!
رجعت ميهاف صعدت عتبه ع ورا
بخوف ووجهها مخطوف لونه !
اما البنت بخوف بلعت ريقها بضياع وتشتت !!
_
" سيف وعبدالعزيز "
بعد م قال له عبدالعزيز كل اللي صار !
سيف بعدم استيعاب ضحك : اسألك بالله صادق؟
عبدالعزيز بضجر : بالله اجل بمزح ؟؟
عقد سيف حواجبه : غريبه !! وحده بعمرها
يسحبها واحد بالغصب لخيمه وتنحاش منه
وبالاخير م تبيك توديها لاهلها !!
زفر عبدالعزيز وحط ايده ع جبينه يضغط
بقوه ثم رفع عيونه لسيف : قول لي وش اسوي ؟ انا مستحيل اخليها معي !!
سيف بضحك : والله تغيرت الدنيا صارت البنت تطلب ايد الرجال !
كشر عبدالعزيز بغيض : هذا بالله وقت برودك
وضحك ؟؟ ياخي فكر معي وين اقلع هالبلوه ؟
كبح سيف ضحكته واستعدل بجلسته : وش اسوي بالله ! سالفتك م تدخل المزاج
عبدالعزيز بقهر : تدخل والا م تدخل عاد ذا الصدق
سيف بضحك :طيب هد اعصابك شفيك !
عبدالعزيز بضجر وقف وبقى يروح ويرجع بنفس
المكان وبتردد : وش اسوي الحين ؟؟ كيف اتصرف فيها؟
لف ع سيف بقهر : يااخي تكلم انطق ! انا ليش
طاق لك مشوار اجل !! سيف ببرود رفع حاجبه وحط رجل ع رجل : طيب تزوجها بالسر
شهق عبدالعزيز: نعم صاحي انت والا عقلك فيه شي ؟؟
سيف : لاوالله صادق بس بالاول تأكد من وضعها ثم تزوجها بالسر لين م تهدأ الامور وطلقها !
ضحك عبدالعزيز بصدمه : انااا ؟؟ اناا اتزوجها ؟؟ لالا بديت والله اشك بعقلك ي ولد العم !! انا ابوي ابو عبد العزيز محسن هيهات هيهات والله بكلمه يهابه الناس لو درى بس بسواتي بينحرني نحر !!
تنهد سيف : مالك الا هالحل !
تأفف عبدالعزيز بقهر وعصبيه ولف يمشي ويرجع
وهو يضغط ع ايدينه ويفكر بصوت عالي بلحظه
م سيف تكتف يطالعهه وقف عبدالعزيز بسرعه
ولف ع سيف : لقيتهااا !!
عقد سيف حواجبه : اتحفني ي ابو الافكار انت!!
عبدالعزيز بحماس : تزوجها انت طيب بالسر
دام وضعك يسمح ماشاء الله دكتور يعني ومقتدر
وعادي الشرع حلل اربع !
رفع حاجبه سيف بإستنكار : وش قلت ؟؟؟
_
بعد نص ساعه طلع عبد العزيز لسيارته
اما سيف رجع ودخل للبيت وعقد حواجبه
لما شاف البنت بنقابها وعبايتها وحالتها مبهذله
رجعت ع ورا بخوف !
قطع عليه صوت ميهاف
: مين ذي !!!
لف سيف عليها ورفع حاجبه : قمتي ؟
ميهاف بنبره حاده وعدم استيعاب : مين ذي تعرفها؟
قرب بابتسامه ومسكها ودخلها للغرفه وقفت
وسحبت ايدها بغيض : انطق !!
اتسعت ابتسامته وقرب : زوجتي ! او بالاصح
بتكون زوجتي
بهتت ملامحها بصدمه !!
رفع حاجبه بلحظه م نطقت ببرود وبسخريه : الحمدلله ! اجل طلقني وتزوجها وفكني منك
خلها تقوم فيك !
ومشت بتتعداه الا بلحظتها مسك ذراعها وقفت ورفعت عيونها ضحك بسخريه بدون م يلف عليها !
عقدت حواجبها بأستغراب !
لفت عليه واتسعت ابتسامته : بتبقين تحت ظل جناحي واحلمي مثل حلم ابليس بالجنه اني اطلقك !
طالعته من فوق لتحت بنظرات استحقار وسخريه : هه ! لاتعشم نفسك بهالكلام !
وسحبت ايدها من ايده ومشت وطلعت وصعدت لفوق !
طلع سيف ببرود ارتبكت البنت بخوف ماهي ثواني
الا رجع عبدالعزيز بخوف ودخل : سسيف !! مالقيتـ..
سكت لما شافها ونطق بدهشه : ااانتي هنا!! وش جابك ؟
بلعت ريقها بخوف : جيت اكلمـ..ك
زفر بعمق :
حسبالي صاير شي بعد
طالعته باستغراب !
لف سيف وصعد لفوق اما عبدالعزيز ناداها للحديقه حتى يفهمها ع اللي اتفق عليه مع سيف !
_
" بيادر ونايف "
وهي توها داخلها لغرفتها الا اتصل ابتسمت
وردت : الو
نايف : هاه عجبتك الهديه فتحتيها ؟
اتسعت ابتسامتها وفيها الصيحه من جمال
مفاجأته : حيل والله ! ولبست السلسله
ابتسم : لاشوفك منزلتها هاه !!
نزلت راسها بحيا : ابشر
تنهد وقعد ع الكنبه اللي بغرفته : مشتهي اتابع
فلم درامي ابي افرغ الطاقه اللي فيني !
ضحكت : شدعوه تبي تصيح؟
ضحك وهو يفتح اللاب : لااا عاد بس من زمان
م تابعنا فلم سوا !
ميلت شفايفها بتفكير : وشهو الفلم طيب ؟
رفع حاجبه : دقيقه بس اشوف وش بالمفضله عندي!
بيادر : اجل ع م تدور بطلع اللاب وبروح اجهز لي اكل!
نايف : يالله انتظرك
_
" ميهاف "
دخلت للغرفه اخر همها انها تفكر فيه
وفي زواجه ! بس اللي حرق اعصابها غروره وثقته انها بتبقى عنده حطت ايدها ع بطنها بغثيان
مشت للحمام اعزكم الله بخطوات سريعه استفرغت
كل اللي بجوفها غسلت وجهها بلحظتها حست بالارتياح
طلعت وهي تزفر بعمق وايدها ع بطنها لحظه
مالمحته داخل للغرفه وقفت ونزلت ايدها
سيف : تعالي نامي عندي بالغرفه وخليها تنام بهالغرفه
رفعت حاجبها بدهشه
ابتسم سيف بغيض : شفيك م عجبك؟
تنهدت ببرود : اوك المكان مكانها
ومرت من جنبه وطلعت ونزلت للصاله ودخلت البنت ع نزول سيف طلع لعبدالعزيز برا يتكلم معه
ميهاف بابتسامه : حياك شفيك خايفه !
طالعتها البنت بربكه
ميهاف بابتسامه : تعالي ي قلبي تطمني بآمان انتي
ارتاحت البنت من كلامها وصعدت معها دخلتها لغرفتها
وتركتها ترتاح فيه قفلت الباب وراها وطلعت على صعود
سيف وقف باستغراب : وينها؟
ميهاف بابتسامه : بغرفتي خلها ترتاح
ومشت وسبقته لغرفته تاركته وراها بوسط استغرابه من اسلوبها وبروده اعصابها لحقها ودخل للغرفه ..
ودخل للغرفه قفل الباب وهو نظره عليها قاعده
ع طرف السرير ميلت شفايفها بتفكير ولفت
عليه : ليش احس البنت خايفه اروح انام عندها ؟
رفع حاجبه بإستنكار : ميهاف ؟
مشى لها وضحك بسخريه ووقف قبالها ونطق : ليش تتصنعين كل هالبرود والطيبه !
وقفت ووجهها بوجهه باستغراب تطالعه!
اتسعت ابتسامته : يالله استلعني فيها مثل م استلعنتي بوصايف لاوصيك !
ضحكت بهاللحظه ثم تلاشت ضحكتها لابتسامه
وبنظرات تحدي : ابشر من عيوني
ثم قوس ثغرها ورفعت ايدها تمسح ع كتفه وهي تطالع بايدها وبنبره هاديه وحزينه : شفيك انت علي !
ورفعت عيونها له بزعل تطالع بعيونه : ليه تشوفني بنظره اني خبيثه وشيطانه ؟
عقد حواجبه وقرب منها وبسخريه بنظرات عيونه
تتنقل بين عيونها : انتي تشوفين نفسك ملاك؟
طالعته بنظرات استعطاف وبريئه : ايه مو قلب امك بين ضلوعي ! كيف م تبيني اكون طيبه وملاك !
صد بضحكه قطبت حواجبها بإستغراب لف عليها وهو يضحك نزل مسك ايدها : يكفي انك تلوثينه ب سمّومك ..
صد عنها وتوجه للسرير تاركها بغيضها
_
بعد نص ساعه
كان سيف منسدح ع ظهره وحاط ذراعه ع عيونه
اما ميهاف قاعده ع الكنب ع يسار السرير وفاتحه الدريشه حطت راسها ع ذراعيها
بتنام الا بهاللحظه فزو ع صوت شي يضرب بالارض !!
لفت ميهاف بوسع عيونها ع سيف اللي رفع نفسه عن السرير يطالع بالباب بشك !!
قام وقامت ميهاف بهاللحظه لما توجه سيف للباب فتحه وقف
ولف عليها : خليك هنا
ميهاف بخوف : لاوالله بجي معك مابي اقعد لحالي هنا !
طالعها بطرف عينه ثم صد بتأفف فتح الباب ومشى وهي وراه مباشره
ميهاف بشهقه : دقيقه يمكن البنت ذي طيحت شي بالغلط ع الارض ! وقف هنا انا بدخل
وجت بتمشي بس مسكها سيف وسحبها : خليك وراي
مشى بخطوات واثقه وبحرص دق الباب مره مرتين ويناديها
م ردت لف ع ميهاف اللي طالعته بخوف وهمست : افتحه
صد ومسك مقبض الباب وتنهد وفتحه ببطئ ودف الباب بهدوء بهاللحظه !!! وكأن دقت أجراس نهايتهم بصدمتهم
وكأنه صاعقة نزلت عليهم لما شافوها
معلقه وشانقه نفسها ..
بشهقه ميهاف حطت
ايدها ع فمها بوسع عيونها رجعت ع ورا بخوف
اما سيف برعشه قويه انتفض فيها جسمه
من هول صدمته ركض لها بسرعه مسكها من رجولها وهو يدفها لفوق مسك عرق ايدها يتحسس نبضها وبصراخ هستيري : تعاااااالي ساعديني
طالعته بخوف وشهقاتها القويه اللي تتعالى مشت له وهي بالقوه تسحب رجولها والدم واصل للركب فكها سيف وابتعد ع ورا لفت ميهاف بسرعه
بخوف
سيف بوسع عيونه بصدمه : ماتـ..ت !
برررعب اجهشت ميهاف بالبكى وبصياح
-
بيت ابو وصايف "
دخلت ام وصايف لغرفه بنتها رفعت عيونها
وصايف لامها و تنهدت وصدت
دخلت امها وقفلت الباب ومشت لعندها ووقفت ع راسها
وتكتفت وهي تطالع بوصايف بنظرات عتب !
وصايف بقهر لفت ع امها : لاتقولين شي !! خليك ضدي دايماً !! ارفعي بهالبنت اللي م تتسمى
وفضليها ع بنتك اللي من لحمك ودمك !!
ام وصايف : وانتي تشوفينها زينه بحقك باللي سويتيه؟
وصايف بقهر وبغصه اجتمعت الدموع بعيونها : شسويت انا شسويت ؟ ليش شايفه الحق معها ليش تصدقينها !!!
ام وصايف بتنهد قعدت ع طرف السرير : ي يمه هو م باعك !! هو يبيك لاتخربين حياتك وحياة زوجته من الحين ! اصبري لين م يفرجها الله
بهاللحظه طاحت دمعتها بوجع : يبيـ..يني ؟؟ يبيـني بعد م خطبني وتركني وجفاني طول هالسنين!!
ام وصايف بضيق : صدقيني انتي م تدرين باللي صاير فيه اعذريه ! كلنا نعرف ان بعد وفاه اامه رحمه الله عليها
جعلها ف الفردوس الاعلى يارب متغير ! ماهو عليك ع اهله واخوانه انتي م شفتيه كيف عصب ع مرته امس ماعاد هو سيف الاولي !
نزلت راسها واجهشت بالبكى : خلاص طابـ..ت نفسي منه ي يمـ..هه
زفرت امها بضيق : صدقيني هو بينفذ وصيه خيتي تكونين عروستن له ! لاتضيقين صدرك ي يمه لو ان مالك معزه عنده كان م شفتيه هاوش زوجته !
رفعت عيونها وصايف ومن بين دموعها بأمل :صدق ؟؟
اومئت امها براسها بابتسامه
_
" بيت ابو صقر "
قعدت بيادر بغرفتها وهي بتدق ع نايف بس قطع
عليها دخول عريب : بدوره !!
رفعت عيونها بيادر بتأفف : هاااه ي عريب!!
قفلت الباب ومشت عريب وقعدت ع الصوفا ب فضول : ياخي انتي م كملتي لي السالفه ذاك اليوم لما قلتي ان ميهاف شفتيها هي اللي تكب العصير ع نفسها !
زفرت بيادر : للحين براسك !!
عريب : !! تكلمي اخلصي
بيادر بإستسلام
بدت تقول السالفه من الالف للياء ..
بلحظتها انفتح الباب شهقو بخوف
ام صقر بصدمه : اناا اخت عبدالله وش اللي سمعته !!
جمدو بصدمه !!
"بسياره فاخره وتدل على الغنى الفاحش "
حاط رجل ع رجل ! وماسك عصاته بيمينه
فتح الشوفير الباب رفع عيونه ( المجهول ) وارتسمت
ابتسامه سخريه جانبيه ع ثغره بلحظه م ركب
الشخص وهو يغلي من القهر والعصبيه !!
قعد قدام (المجهول) : شوف لي حل مع هالحيوان سيف! نفذ صبري
صد (المجهول ) واتسعت ابتسامته ونطق بصوته الغليظ الجهوري : بينفتح عليه باب من ابواب جهنم !كل شي بينقلب عليه اصبر ..
-
سيف وميهاف
بلحظه فزت ميهاف من نومها برعب وهي تتنفس بسرعه بصدمه حطت ايدها ع صدرها اللي يعلى ويهبط من رعبها بالكابوس !!
بلعت ريقها بخوف لفت ع سيف اللي نايم
رمشت بسرعه وهي ترجف !
قامت بسرعه وبنفسها : لازم تنقلع برا البيت ذي
ماتقعد هنا دقيقه وحده ! والله م تقعد !
طلعت بسرعه وتوجهت للغرفه وهي تغلي من القهر والخوف كل تفكيرها محصور بالكابوس !
اما سيف اللي نزل ايده عن عيونه وفتحهم !
رفع نفسه ع السرير
تنقلت عيونه حول الغرفه م لقاها !!
م اعطى للموضوع اي اهميه زفر قام وتوجه للحمام اعزكم الله !
غسل وجهه بمويه بارده اتكئ بايدينه ع المغسله
بهاللحظه قطع عليه صراخ البنت بترجي : فكيني !!! تكفين اترجاك خليني !
رفع راسه !! من وضح له الصوت وكلماتها بنحيب وصراخ تغيرت ملامح لجديه !! طلع من حمام غرفته ركض و
طلع من غرفته ولف انصدم لما شاف ميهاف ماسكه البنت عند طرف الدرج
والبنت بصراخ وبكى تترجاها تبعد عنها
وبلمح البصر طاحت البنت ع ورا من اعلى الدرج ع العتب الى تحت
شهقت ميهاف بخوف !!
اما سيف متسمر بمكانه من هول صدمته !! مو مستوعب !! تقدم برجفه بخطـ..وه !
لفت ميهاف بهاللحظه
برعب بوقتها بهتت ملامحها من شافت سيف !!
لاشعورياً طاح نظر سيف على السكين اللي طاح من ايد ميهاف من صدمتها !!
حس كل هذا ولو انه كابوس !! يتمنى يصحى منه!! لف بسرعه يطالع بالبنت اللي ع الارض نهايه الدرج
اجتمعت الدموع بعيون ميهاف برعب نطقت : سـ..يـ..
م كملت كلمتها الا شهقت بألم لما ضرب ظهرها بقوه
بالجدار بلحظه م دفها سيف بقوه ونزل من الدرج بسرعه بأنفاسه السريعه جثى ع ركبه
برجفه ايدينه تحسس معصم ايدها نبضاتها ..
لف بنظراته الشرسه يطالع بميهاف اللي انقبض قلبها بخوف ماهي ثانيه الا قام ويصعد الدرج متوجه لها مثل الوحش رجفت بخوف
رجعت ع ورا شهقت لما مسكها من شعرها صرخت
بألم لما سحبها بقوه لغرفته ودفها
وهو يغلي ودمه يفور وبتهديد وهو راص ع اسنانه : صدقيني لا ﻷخليك تتمنين الموت لاطلع روحك بس ارجع لك !!!
اخذ المفتاح وطلع وقفل الباب شهقت بخوف قامت
من بين الامها تضرب الباب وبصراخ وترجي
من بين دموعها مرعوبه :سيف !! تكفى لا تقفل الباب وتروح ترجيتك سيف تكفى افتحه ..
" نزل سيف بسسرعه يركض لتحت !
جثى ع رُكبه عند البنت الا يسمع أنينها بألم براسها وظهرها !
سيف بهمس : انتي واعيه ؟
فتحت عيونها بخفيف ورجعت غمضتهم
دقايق م استوعبت نفسها فتحت عيونها
بشهقه ابتعد سيف ع ورا لحظه م رفعت البنت
راسها بوسط المها سحبت عبايتها تغطي رجولها
وصدت بخوف تحاول تغطي وجهها وشعرها
قام سيف بهاللحظه وصد : تبيني اخذك ع المستشفـ..
قاطعته بخوف بوسط آلامها :لالا مابـ..ي
عقد حواجبه بإستغراب : متأكده ع الاقل خليهم
ياخذون فحوصـ..
قاطعته : مابـ..ـي شي
قامت وهي عاضه ع شفتها من الالم
سيف : لاتصعدين الدرج نامي اذا تبين بالمجلس
اللي وراك
م كمل كلمته كانت البنت دخلت المجلس وقفلت الباب بسرعه
صد وغرس ايده بشعره وزفر بزفره عميقه بتعب !
رفع عيونه لفوق بهاللحظه لما سمعها تصرخ وتناديه!! م يدري ليش بهالوقت اجتمع ف قلبه كل مشاعر الكره
والحقد والغضب !! نزل ايده وصعد لفوق بخطوات سريعه تعبر عن قمه عصبيته فتح الباب
سمعت صوت المفتاح ابتعدت ع ورا برجفه
اول م فتح الباب والتقت عيونه بعيونها بلعت ريقها بخوف
رفع حاجبه وبنبره حاده : اجل وصلت فيك انك تحاولين تقتلينها ؟
بهتت ملامحها بصدمه !!! دخل وقفل الباب بالمفتاح وحطه بجيبه
لف ودخل لغرفه تبديل الملابس بوسط صمتها
عقدت حواجبها بوسط رعبها كيف تجاهلها ! وش يخطط
عليه !
_
" بيت ابو صقر "
ام صقر بصدمه : وش هالحتسي !!
بلعت ريقها بيادر بخوف : وشهو؟؟
عريب : يمه!
دخلت ام صقر وقفلت الباب : وش اللي سمعته !! وشهوو ؟؟
طالعو بيادر وعريب ببعض ثم لفو عليها بتوتر
قعدت ام صقر ع الكرسي وماسكها عصاتها : تكلمي وراتس ساكته وبالعه لسانتس ميهاف هي اللي كبت الماخوذ العصير عليها هي اللي تبلّت على وصايف بذيتس الليله؟؟ بيادر بخوف وتردد : ايـ..ـه
ضربت ام صقر بعصاتها ع الارض بعصبيه : اخخخخ بس اجل تسذب علي بذيتس الليله !! ي شيبي والله حوبه وصايف ماراح تتعداها !! والله ..
" ميهاف وسيف "
وهي تسمعه يضرب بباب الدواليب وكأنه يفتش عن شي
قلبها يفز بخوف مع كل ضربه يضربها للدولاب !! عرفت انه بيكوفنها بعد اللي صاار !!
م حست بهاللحظه الا لما دخل وهو يحكم قبضه ايده بالحزام توسعت عيونها بصدمة بشهقه قويه لما قرب منها رجعت ع ورا بقشعريره قويه إلى ان انحصرت بالزاويه انهارت ببكى بترجي لما رفع ايده !
صرخت من قوه الالم اللي فيها من ظهرها ومن انقباضات قلبها !
حطت ايدها ع ايسر صدرها تضغط بقوه ودموعها خانتها وشقت طريقها لخدها
لحظه م طاحت عيونه ع ايدها وهي مشتده بقبضتها ع قلبها جمدت ايده اللي ماسك فيها الحزام
بالهوا بهاللحظه وكأن فيه شي يرده ويمنعه !! وكأن بهاللحظه استوعب اللي قاعد يسويه !! ارخى ايده ورجع بخطوه بطيئه ع ورا !
كيف سولت له نفسه انه يأذيها !! يأذي اللي شايله
قلب امه ويعذبه !! صد وعض ع طرف شفته بقهر
وبداخله يحترق!!! وده انه يأذيها ويأدبها !
بس بنفس الوقت م يمنعه الا قلب امه اللي يتوسط بين ضلوع صدرها !!
لف ورمى الحزام بالارض بقوه
وصرخ يحاول يفرغ العصبيه والنار اللي شابه بجوفه !
رفعت عيونها له من بين دموعها بخوف انهارت بالبكى بزياده م قوت رجولها ع الوقوف
طاحت ع الارض وحصرت نفسها بالزاويه
لمت رجولها لصدرها وانطوت ع حالها بخوف وهي تطالعه
وصلت فيه انه يحاول يضربها !! هذا اللي ارعبها اكثر واكثر !!
لف عليها بنظرات حقد وشراسه ! توجه
لها غمضت عيونها ورصت ع نفسها زياده من الخوف
م حست فيه الا ماسكها من عضدها شهقت سحبها
ووقفها وجهه بوجهها مايفصل بينه وبينها الا شعره !! بعيونها تتنقل بنظرات خوف بين عيونه وانفاسه الحاره
تلفح وجهها وخصلات شعرها وهو ينتفض من العصبيه
وهو راص ع اسنانه : وصلت فيك المواصيل تحاولين تقتلينها؟؟؟ هزت راسها بغصه من بين دموعها ب لا !
سيف بعصبيه مسكها من وجهها بقبضه ايده
فزت بخوف لدرجه حبست انفاسها بداخلها من قوه قربه لها
نطق ب كراهيه وحقد : وش اللي سوته هي !! مسكت ايده برجفه وبالقوه تقدر تتكلم : فكـ..ني تكفـ..ى
رفع حاجبه بسخريه : افكك !! مو هي ترجتك انك تفكينها
وترحمينها ؟؟ هاه وانتي وش سويتتي ؟؟
قوست ثغرها بالدموع اللي اجتمعت زياده بمحاجر عيونها
ضحك بسخريه : مثل خباثتك م شفت !! ولا راح اشوف
فك ايده عن وجهها وغرسه بشعرها من وراا شهقت
بألم قربها وثبتها بوجهه حيل لدرجهه ان شفايفه
بتلامس شفايفها ضحك بكل سخريه وخباثه : طالت وشمخت ي ميهاف !!
بلعت ريقها بخوف ع اخر لحظه استجمعت شجاعتها
غمضت عيونها ونطقت بأندفاع ونفس واحد : هي اللي بغت تنتحر وانا كنت بمنعها !!!
عقد حواجبه بهاللحظه !! لثواني بوسط دقات قلبها اللي مثل الطبول م شافت منه رده فعل !! فتحت عيونها ببطئ بخوف وترقب ..
رفع حاجبه بإستنكار : كيف بتنتحر ؟؟ توسعت عيونها بأمل انه صدقها !!
اخذت نفس عميق وكملت : طلعت لعندها شفت الباب مفتوح دخلت انصدمت لما شفتها ماسكه السكين بتقطع شرايين ايدها حاولت امنعها بس طلعت من الغرفه ولحقتها !! بس ع اخر لحظه م قدرت امسكها !
وتنهدت بضيقه وهمست : وانت تعرف عاد الباقي !
امعن النظر فيها لثواني ! ثم همس : حلو اجل قولي هالكلام قدامها ونشوف وقتها اذا صدق او لا !
فتحت عيونها ع وسعها بصدمه ودهشه !!
عقد حواجبه ونطق ببرود : ليه انصدمتي ؟
بلعت ريقها وهمست : لا م انصدمت ! بس !! ثم نطقت بإندفاع بعد ربكه : وانت ليه م تصدقني !! يعني ليه تشوفني اني انا الكذابه الخبيثه الشيطانه ..
اتسعت ابتسامته يغيضها : لانك كذا !!
صدت وهي ودها لو ينتهي هذا كله ! مثل الكابوس بحياتها!! مسكها من معصم ايدها وسحبها وفتح الباب ونزلو تحت
ميهاف وهي تقاومه : سـ..يف انت خلاص سمعتني
وقلت لك كل شي ! ليه مو راضي تصدق !! اقولك
ذي نوت تنتحر !! منتظر مصيبه ع راسك انت!! خلاص خلها تروح !!
لف عليها : وليه تبينها تروح !!
طالعته لجزء من الثانيه ثم نطقت : مو مرتاحه !
رفع حاجبه بسخريه : ومين قال ان يهمني راحتك !
حمقت بهاللحظه بقهر !!
صد ونزلو وقف ع باب المجلس ! طالعته باستغراب : ليه هي وينها اصلاً !!
تجاهلها ودق الباب : هيه !!
البنت بهمس ومتألمه : هـ..ـلا
سيف : اطلعي ابيك شوي !
لفت عليه ميهاف بهاللحظه : انت مصر !!! تجاهلها !
ماهي دقايق الا فتحت البنت الباب وطلعت ابتعد
سيف ع ورا : اسمعيني
نزلت راسها بالارض بتعب
سيف : انت كنتي مبيته النيه انك تنتحرين !!
رفعت البنت راسها بصدمه !!!
صدت ميهاف بهاللحظه ودها تطلع بس سيف ماسك ايدها !!
سيف : لو مادخلت ميهاف كان قطعتي ايدك بالسكين !! صح هالكلام ؟؟
لفت البنت ع ميهاف بوسع عيونها اما ميهاف متجاهله نظراتها !
لف سيف ع ميهاف اللي صاده عنهم ثم لف
بهدوء ع البنت
ونطق : جاوبيني صح او لا!!
لفت البنت تطالعه بعدم استيعاب !!
سيف : يعني صح ؟؟
لفت ميهاف تطالعها بترقب من اجابتها !! البنت : لا
بهاللحظه رص بقبضه ايده بقوه على ايد
ميهاف اللي متسمره بمكانها بصدمة !!!
البنت بتوتر : بروح مع عبـ..دالعزيز جاي هو
تنهد سيف : اوك براحتك
لفت البنت ودخلت وقفلت الباب بلحظتها نطقت ميهاف : تكذب صـ..
حط ايده ع فمهاا وبنظرات حاااده : انكتمي !!
سحبها معه وصعدها
لفوق دخلها للغرفه معه وقفل الباب بهاللحظه لفت عليه
هي بقهر : تكذب !! اقولك تكذب لاتروح لين م تعترف !!!
استند ع طرف التسريحه وتكتف وهو يشوفها كيف
منفعله ومعصبه وهي تغلي من القهر : انااا وش فايدتي لو قتلتها مريضه انا مجنونه حتى اقتل احد!! ليش بايعه ديني وحياتي ؟؟
ابتسم على عصبيتها !
ميهاف ودمها يفور : اقولك تكذب انت ليه تحب ترفع ضغطي ليه ؟
سمعت صوت باب البيت اللي تحت يسكر
شهقت : طلعت والله م تتعدى عتبه البيت الا تعترف !! مالـ..
م كملت خطواتها بتطلع الا حاوط سيف بايده ع خصرها وسحبها عن الباب : وين رايحه وين !!
لفت عليه بقهر وعصبيه : فكني مستحيل اسكت عنها والله لاخليها تعترف بلسانها انها تبي تموت جعلها للموت !
وهي تدفه بس هو مسك ايديها بايده الثانيه
ونزلهم بضحك تنرفزت زياده : لانك م انظلمت عشان كذا تضحك بكل برود الله ياخذك فكني !!
سحبها لعند التسريحه واسند ظهرها ع طرف التسريحه
وايدينه محاوطتها ع يمينها ويسارها
ونزل راسه يضحك بقوه بهاللحظه هي
تسمرت بمكانها بعدم استيعاب واستغراب !! كيف بلحظه تغيرت شخصيته فجأه
قبل دقايق معدوده كان بركان والحين يضحك بصدر مثلج ويكتسيه البرود
رمشت بسرعه مو فاهمه شي : ليـ..ه تضحك ؟
رفع عيونه لجزء من الثانيه وصد وانفجر بضحك زياده اما هي بصدمه تطالعه جاهله
سبب ضحكه وبنفس الوقت اول مره تشوفه يضحك
بهالهستيريه ذي
رفع عيونه لها تلاشت ضحكته الى ابتسامه واسعه
قرب لها حيل بهاللحظه ارتبكت من قربه حاولت
ترجع ع ورا بس هو يعاندها ويقرب زياده
وهي ترمش بسرعه ! نطق سيف : تبين تعرفين ليه اضحك ؟
قطبت حواجبها زياده ! وهمست : ليـه ؟
سيف بضحك رفع حاجبه : لأن كل اللي صار هو اتفاق بيني وبينها !
طالعته بعدم استيعاب
استعدلت بوقفتها بهاللحظه وهي مو فاهمه شي !! وبتوتر :كيـ..يف يعني ؟
سيف بإبتسامته الواسعه وبخفه ضحكته : انا متفق معها تمثل عليك انها بتنتحر ! وبشوف
لو احط هالاتهام فيك ! بتصدقين بقولك والا بتكذبين !
وضحك زياده : بس م توقعت توصل انها تطيح من الدرج طلعتي مو هينه !
بهتت ملامحها بصدمه
كمل بضحك :لأني عارف وواثق انك بتروحين لها لغرفتها لانمت !
شفتي كيف ان برائتك م قدرتي تثبتينها من كثر
خباثه افعالك وكذبك !
حسيتي بهاللحظه بموقف وصايف
بذيك العزيمه ؟
قرب اكثر وهمس : ذا اللي ابي اوصل له
اما هي انجلطت بهاللحظه!
ضحكت بصدمه وعدم تصديق : دقـ..يقه!! دقـ..يقه ! مستحيل اللي تقوله انت !!
رفع حاجبه بسخريه ثم ضحك !
اما هي م قدرت تستوعب اي كلمه من اللي قاله !! نطقت بصدمه : كيف انت متفق معها مو كنت مصدوم وكنت
ناوي تضربني حتى بالحزام ! كيف ؟ > ملاحظه سيف ما ضربها بالحزام بس رفعه وع اخر لحظه نزله ب الاساس هي صرخت من الم ظهرها بضربه الدباب >
ميل راسه بتفكير وهو يغيضها ويطالعها ببرود : خبرت عبدالعزيز انه يعلمها وتتفق معي باللي ابيه ومقابلها !! امممم مو مهم اقول لك وش المقابل كان عشان كذا استقصدت انها تنام بغرفتك ! لاني عارف
انك ماراح تصبرين عنها وبتروحين لها !! حتى لما قمت من نومي ولا لقيتك انتظرت بس هاللحظه اللي اسمع فيها صراخ هالبنت !! ولما طلعت توقعت بس ان هالحد
هو السكين ! بس صدمتيني لما طاحت من الدرج !!
وضحك : بس والله هالشي ساعدني للأمانه !! مثلت قدامك المعصب اللي م يشوف ارضه من سماه ولما حبستك وطلعت الحزام بس عشان اوهمك اني بضربك
تدرين ليه ؟
قرب وهمس : بس حتى اعيشك بين زوايا الرعب والخوف !
نزلت راسها بهاللحظه بصدمه استوعبت اللي صار وكأنها كانت مغفله بلحظتها !!
نطقت بإستحاله تصديق : يـ..عني كل هذا !! كـ..ذب
غمضت عيونها شدت بقبضه ايدينها بقوه ع طرف التسريحه استحقرت نفسها وغبائها انها تكون لعبه بين ايدينه
عضت ع طرف شفتها السفليه بقهر يستوطن بقلبها
بوسط نظراته فيها بإستمتاع لإنتقامه منها !! ماهي ثواني
الا فتحت عيونها ع وسعها رفعت راسها له بسرعه لما تذكرت : والحلم !!!
عقد حواجبه : اي حـ..لم ؟؟
ميهاف بعدم استيعاب : الحلم !! شلون !! طيب انا حلمت انها انتحرت !!
رفع حاجبه : لاتكون ذي كذبه جديده منك !
كشرت بعصبيه : اقولك حلمت فيها !!! م كنت مرتاحه لها اصلاً وانت تقول كذبه جديده !! والله حلمت فيها والله !
م اعطاها اي اهميه لف وقعد ع طرف السرير احنى ظهره
اخذ الباكيت من ع الطاوله وطلع سيجاره وثبتها بين
شفايفه واشعلها بوسط نظراتها فيه بقهر وبعصبيه نفث الدخان ..
انفجرت بصراخ
هستيري : مريض انت !!! عقد حواجبه ببرود وهو ياخذ شهيق من الدخان ليتلوث فيه
صدره وينفثه بلحظتها ببرود !!
ميهااف وهي تتنفس بسرعه ووجهها مال للاحمرار : لهالدرجه همتك وصايف هامتك مشاعرها اذا انك مهتم هالكثر ليش م تزوجتها !!! لو يهمك مشاعرها ونفسيتها ليش م تزوجتها وسديت حلوق
الناس والقيل والقال عنها اهنتني وذليتني قدامهم !!
كملت بعصبيه مثل البركان اللي انفجر من بين عيونها اللي غرقت بالدموع وعروق رقبتها اللي برزت من قوه نحيبها وصراخها الهستيري : م خليت شي م سويته فيني !! غصبتني اني اتزوجك واهنتني قدام عايلتك !! حرمتني من اهلي !! حتى انك منعتني من الموت ذليتني بقلب امك ليتني م اخذته ومت ولاشفت
هالويل والجحيم هذاا !! انهارت بالبكا وكأنها استهلكت طاقتها
بتعب صدت وبهمس من بين شهقاتها : ليـ..ت !
احنت ظهرها بإنيهار حطت ايدها ع قلبها اللي مثل الطبول تحس انه بيطلع من صدرها من قوه دقاته !!
نزلت راسها وبدموعها اللي تحرق خدها وبأنفاسها السريعه المسموعه
م حست فيه الا هو وراها سحبها من خصرها واستعدل ظهرها ولصقه ع صدره
اما هي بقله حيله تحاول تبعده عنها : فكككنـ..ـي ! خلاصصص كرهـ..ت حياتي وكرهت
كل شي
همس سيف : خذي نفس
قوست ثغرها من بين شهقاتها تحس بالخنقه
نزلت راسها وانفجرت بالبكى همست وبالقوه
يوضح صوتها : ماعـ..ـاد اعـ..ـرف وش تبـ..ـي !
مسك بايده اليمين ايدها اللي ع قلبها وابعده
وحط ايده ع قلبها وبخده ملاصق خدها همس
وهو يطالع بإنعاكسها بالمرايه بنظرات هاديه :
عرفـتي الحين الوجع وحياه الجحيم ؟ عرفتي شعور انك ودك تقتلين نفسك وتنهين كل احساس مر بداخلك!! تعرفين شعور انك ترسمين الابتسامه ع شفايفك وهي باهته حتى وصل فيك انك تجهلين احساس هالابتسامه ! لدرجه السعاده تنسين
دربها ! افكار سوداويه مثل عيشتك تمر ف ذاكرتك
الف مره ومره باليوم ولاتفارقك ثانيه وحده بس !!
اما هي عاضه ع شفتها السفليه وتطالع بالارض بدموعها اللي تنساب وهي تسمع كل كلمه بنبره صوته المبحوحه
وانفاسه الدافيه اللي لفحت رقبتها ..
كمل : كل شي بداخلك احترق من بركان انفجر واندفن تحت رماد ! جيوش من الاحزان تثور بوجهك بلحظه م
تفتحين عيونك من نومك !!
وضحك بسخريه ع حاله : حتى النوم اللي ممكن تشوفيه هو الطريقه الوحيده انك تهربين فيه من عالمك الاسود !
خانك ولاحقتك كوابيس لدرجه وانت بهالكابوس
يعلى صوتك لنفسك بترجي انك تصحين منه !! توهمين نفسك بأمل انك بتصحين بهاللحظه منه وينتهي !!
اختفت ابتسامته وسكت لثانيه وبداخله ثوران من هالمشاعر والضياع وكأنه فتح جروح قلبه !! همس : بـ..س حتى نفسك خذلتك بهالحظه وبقيتي
محصوره بدوامه هالكابوس !
لحظتها رفعت راسها ولفت عليه التقت عيونها الغرقانه بالدموع بعيونه اللي لمحت فيها الحزن المندثر عقدت حواجبها م تدري ليه كلماته اوجع قلبها زياده !!
حتى نبضاتها ازدادت !! ضحك وصد لحظه م استوعب نفسه !
رفع حواجبه ونزل ايده عن قلبها
اما هي متسمره بمكانها تطالعه !! حس بنظراتها لف وهو يحاول يصرف : شفيك!
تغيرت نظراتها لنظرات بائسه ع حاله
وهمست بهاللحظه : لاتقـ..ول هالكـ..ـلام مره ثانيه
عقد حواجبه بهاللحظه !
همست وبأنفاسها الدافيه الخفيفه وبنبره صوتها
الهاديه وبعيونها اللي تتلألأ من الدموع : ترى قلب امك يعـ..ورني من كلام ولدها !
جمد بهاللحظه !!
نطقت بنبره وجع : صح اني كـ..نت ع حافه الموت
وودعت احلامي وأهلي بذيك الايام ! الا ع اخر لحظه لما خبروني ان فيه متبرع وزرعوه بين ضلوعي وانكتبت
لي حياه جديده بوسط فرحتي اني بكمل احلامي
وبين اللي احبهم ! بس انت تجهل شعور يبدد ابتسامتي والفرح اللي بداخلي ! اعيش بصراع بين عقلي وهالقلب !
كل مره اكتشف اني احب اشياء انا م كنت احبها بقلبي الاول !!! ومواقف تمر علي م احس الا بوجع بقلبي وانا بالاساس جاهله هالمواقف ولا اعرف سبب الوجع عليها !
ابتسمت بإبتسامه حزينه : حتى بلحظه م شفتك لأول مره شعور غريب ماعـ..رف اوصفه ! حسيت قلبي بيوقف من دقاته السريعه فز قلبي لشوفه ملامحك وكأني اعرفك
من سنين !!
سكتت بهاللحظه بغصه !! بوسط نظراته فيها
تبددت ابتسامتها بهاللحظه ونطقت
: شعور يتعب وانا احاول كل مره اكرهك واكرهك
بس قلب امك متعلق فيك !! م تدري شكثر عقلي
يعيش بصراع ب كرهي لك وقلبها يحن لك بين ضلوعي !
رفع حاجبه بدهشه وكأن اللي اعترفت فيه عكس اللي يشوفه منهااا !!!
_
" عبدالعزيز "
بالسياره وهو متوجه لبيت ام سيف كان
اتفاقه انه يخليها هنا كم يوم الى ما يتعدل الوضع !
البنت
وهي تضغط ع ايدينها بربكه وبخوف وبداخلها
انكسار باللي عاشته بحياتها
بحيره وتردد تضغط ع اصابعها : اسـ..فه !
عقد حواجبه ولف عليها حس انه سمع غلط
: وشهو ؟
لفت البنت عليه بضيق : اسـ..فهه لف للطريق الى م وقف عشان الاشاره ! لف عليها
وهو رافع حاجبه بإستنكار : ع وشهو تتأسفين !!
البنت بحزن : ورطتك معي ! وكنت بتنسجن بسببي !
صدت ونزلت راسها بتأنيب : سامحنـ..ـي والله مابغيت كل هذا يصـ..ير
تنهد : ماتدرين يمكن ربك سخرني لك بذيك اللحظه عشان افكك منه ! من رايي والله انك تشتكين ع هذا الحيوان
وترجعين لاهلك ! صدقيني الشرطه بيكونون متسترين !
بس ي خوفي اهلك يبلغون انك مختفيه والا مخطوفه وانتي
عاد تعرفين الباقي اخاف تطيح براسي !
لفت عليه بضيق : كيف تبيني ابلغ ع ولد عمي ! كيف؟
جمد عبدالعزيز بصدمه ..
" بيت ابو صقر "
ام صقر بعصبيه قامت : وانا ادافع عنها مثل المهبوله مصدقتها ! مير ربي م يضيع حق احد بيجي هاليوم اللي بتنظلم فيه ومحدن بيصدقهااا ! اخخ بس اخخ
طلعت وقفلت الباب تاركه بناتها وراها بين صدمه وحيره !!
_
" سيف وميهاف "
سيف بعدم استيعاب يطالعها !
ميهاف بضيق : تكفـ..ـى اذا م تبي ترحمني ارحم
ع الاقل قلبها ! ماعاد اعرف انا وش اعيش وش احب وش اكره !! احس اني انسانه ثانيه
نزلت راسها واستندت ع صدره : تعـ..بت ماعاد فيني الحـ..يل اني اتحمل !
اما هو بهاللحظه جمد !! م توقعها تضعف وترتمي
بحضنه بهالسهوله !!!
_
" بيت ابو تركي "
وهو قاعد ع السرير وحاط ايدينه تحت راسه
ويطالع بالسقف بتفكير غمض عيونه وزفر
بزفره عميقه حن لها وحن لأيامها مستحيل
تفارق مخيلته لحظه انها طلعت مع العماره
مع زوجها ! بقهر بداخلها كيف تركته بعد م قطعت
وعد مع اخته انها بتكون من نصيبه !
ضاق صدره فتح عيونه وتأفف لحظتها قطع عليه
تنبيه رساله ع جواله استعدل بجلسته فتح جواله
ع رساله السكرتير : المدير يبي يقابلك
الصباح ان شاء الله ف عجّل بجيتك !
عقد حواجبه باستغراب : المدير !!! عسى ماشر
لا عاد لايقول انه بيفصلني !!
زفر بتأفف وارسل : ان شاء الله ابشر
قفل جواله وبداخله شك واستغراب مو متطمن
ان المدير طلب انه يقابله !! انسدح وحط ايده
تحت راسه بتفكير الى م غفت عيونه ونام يدون م يحس
_
" ميعاد وام تركي "
من جهه ثانيه ام تركي قاعده بغرفه ميعاد : هاه كلمتيه !
ميعاد بتنهد : لا جيت بدخل بس قال انه تعبان وبينام
ام تركي بقهر : هو ذاك اليوم سامع لما تكلمنا عن بنت هالبواب الله يقهرها مثل م قهرت قلبه !! ااخخ بس لو اشوفها والله ماراح اخلي كلمه م اقولها لاشرشحها !! ضربت ايدها ع رجلها بقهر : تزوجت من شافته
مطنوخ يلعب بهالفلوس لعب هالمشفوحه !
ميعاد بتنهد: ااي اكيد سمع ي يمه م تشوفينه
سفهنا ولاسلم وراح لغرفته !! عارف اننا نبي نخطب له
ام تركي وهي تغلي من القهر : حسبي الله عليها جعلها تتطلق ويخرب بيتها مثل م خربت بيت وليدي
ميعاد : عاد ولدك عنيد اخاف م يبي يتزوج !!
ام تركي بعصبيه واندفاع : الله لايقوله !! ماعلينا منه لو يوصل اني اخطب له بدون م يدري !
ميعاد : لالا يمه لاتتهورين اخاف نخطب ويفشلنا مع الناس لا خليه ع راحته لين م يهدأ وينساها خليه ينشغل بوظيفته
ام تركي بتنهد : الله يريح قلبه ويرزقه من فضله ويبعد عنه
عيال وبنات الحرام يارب ..
-
سيف وميهاف "
غمضت عيونها بهاللحظه وهي بحضنه رفع ايده
قبل م يلمس شعرها تردد !!!
ع اخر لحظه استسلم وحط ايده ع راسها بدون م ينطق ب شيء ارتخت بين ضلوعه لمده رفعت راسها
عنه وعيونها بعيونه بإرتباك : تصـ..بح على خير
لفت بسرعه وطلعت من الغرفه بوسط استغرابه
كيف ابتعدت عنه بسرعه وتوتر وارتباك!
تنهد ورجع وقعد ع السرير ! اما هي دخلت لغرفتها
توجهت للسرير وقعدت ع طرفه بهاللحظه بهواجيس وافكار!
_
" الصباح "
" تركي "
طلع بسرعه يركض وهو يلبس الكبك باستعجال
ام تركي وهي طالعه من المطبخ وهي شايله الصينيه
اللي فيها الحليب والفطور باستغراب طالعته : وين ي يمه
وين ؟؟
تركي بإستعجال : متأخر !!
لبس جزمته وطلع بسرعه !!
_
" سيف وميهاف "
ع دخول سيف وقف لما شافها نايمه
وخصل شعرها ع وجهها قرب لها وهمس : ميهاف !! ميـ..هاف !! قومي !
لفت ع الجهه الثانيه بصوت ناعس : همممم
سيف : قومي يالله
حضنت مخدتها لها بكسل : مابـ..ـي
سيف بتنهد سحب الفراش منها : ميهاف قومي اخلصي حتى نلبس ونطلع !
فتحت عيونها بسرعه ولفت عليه بدهشه : نطلع!!
رفع حاجبه وابتسم : سبحان لله ع هالكلمه
صحصحتي عيونك ع هالوسع !
كشرت بحلطمه وهي تفرك عيونها : صدق تتكلم !!
سيف بتنهد : قومي يالله امي منيره عازمتنا ع الفطور !
رفعت ميهاف حاجبها بدهشه : عاازمتنا!!
سيف : اخلصي عندك ربع ساعه بس !
طلع بهاللحظه رفعت راسها عن السرير وهي تتغمط
بعدم استيعاب واستغراب : عازمتنـ..ـا ؟؟؟
تنهدت وقامت ..
" بيت ابو صقر "
الخدم وهم يجهزون الفطور نزل صقر بابتسامه
ونشاط : ي صباح الخير
باس راسه امه وايدها مشى وهو بيقعد ع الكرسي
ع طاوله الاكل قاطعته امه : لالا لاتقعد !
عقد حواجبه ولف عليها : ليه !!
ام صقر : فطوركم بالمجلس !
رفع حاجبه باستنكار لف ع طاوله الاكل بالفطور اللي فيه ثم لف ع امه : كيف يعني !! وهالفطور ؟؟
ام صقر : سيف ومرته بيجون يفطرون يالله روح !
تنهد وقام : لاوالله بتذليني ي ام صقر ع زوجته !! ان شاء الله راح اتزوج قريب وانتقم منكم ان شاء الله
اصبرو علي !!
ام صقر بضحك : روح روح !!
تنهد : الشكوى لله يوم من الايام بتعرفون قيمتي !!
عريب وهي نازله : ياصباح الله خير من ها اللي يتحلطم !! ياناس !
رفع حاجبه صقر بغيض : انكتمي بس !! تجاهلها وطلع للمجلس !
قعدت عريب ع الكنب بتنهد : يمه ناويه تكلمينها مصره؟؟
ام صقر : اجل تبيني اسكت لا والله مانيب ساكته خل هالبنت تعرف حدودها وتكرم نفسها
..
" بعد ساعه ونص "
بعد ما افطرو صقر ومشعل وطلعو
لأشغالهم اما الوليد نايم بغرفته بعد م كان مواصل !
لحظتها وصلو سيف وميهاف بعد م رحبت فيهم امه وقعدو يفطرون بوسط نظرات ام صقر لميهاف
انتبهت ميهاف لنظراتها حست ان فيها شي ! بس تجاهلت الموضوع !
بعد م خلصو وقامو وقعدو بالصاله قام سيف
ام صقر : وين ي يمه !
سيف : بطلع فوق لـغرفه صقر بآخذ لي غرض وبقوم الوليد
عريب : اي والله قومه كيس نوم!!
ابتسم وصعد !
ماهي ثواني الا فتحت ام صقر الموضوع : الا اقول ي ميهاف وش عندتس تتبلين ع وصايف !
جمدت ميهاف بصدمة وعدم استيعاب
نطقت : مافهمـ..ت !
ام صقر : لا فهمتي اللي اقصده زين ! لاتحسبيني من اللي هب ودب تضحكين عليهم بكم كلمه !!
ميهاف وقلبها بدأ يدق بقوه بتوتر !!
ام صقر بحده : تقومين تكبين العصير عليتس وتتبلين المسكينه بكم كلمه تسم البدن وراه !! وتفشلينها قدام
الكل !! وش هالعوابه اللي فيتس !! كرمناتس وقدرناتس بس شكلتس داخلتن على طمع وناويتها خراب !! انصدمت بهاللحظه !! عريب : وش سوت لك البنت حتى تتهمينها بكلام باطلل !!
بيادر : وش استفدتي اصصلاً !!
ميهاف وعيونها تتنقل بينهم وهم باندفاع عليها بكل
كلمه بنبره حده م عطوها مجال حتى انها تنطق !!
ام صقر : اسمعيني ! عديتس بنت من بناتي ! واني سويت هالعزيمه وكرمتسس ع كثر القيل والقال امه متوفيه ولا كملت شهر وسفهنا هالحتسي عشانتس وبالاخير تسوين هالسواه! اهنتي الضعيفه حتى اصلتس وفصلتس م سألنا وجملناتس بيننا بس شكلتس مانتي بهينه ووراتس شي من هالزواج !
بهتت ملامحها بصدمه
حست بالحراره تنفض جسمها نفض وتوتر وضغط
عليها كل الايام اللي راحت انعدمت الراحه فيها !! حتى بهاليوم بعد استفتحوها بهوشه !! نزلت راسها وهي
تحس قلبها وده يطلع من صدرها من قوه م ينبض وبضعف
يحتويها ماعندها اي كلمه تقدر تدافع فيه عن نفسها !
الا ع نزول سيف من بدايه الدرج جمد بهاللحظه وتسمر بمكانه
وهو يسمعهم بعد م علت اصواتهم عليها واندفاعهم بكلامهم
وهو م يسمع لها صوت
نزل درجتين لمحها بزاويه الكنب ومن حركاتها عرف انهم ضغطوا عليها لدرجه استغرب صمتها !!!
اما هي بلعت ريقها بضغط كبير عليها
منه ومنهم ومن وصايف واهلها وكيف انهانت قدام الكل بالامس جاهله نظرات سيف لها من بعيد وهو يراقبهاا بصمت !! ،
" الشركه "
دخل تركي بإستعجال للشركه وتوجه لمكتب
المدير ! وقف من شاف السكرتير بإستعجال
نطق : صباح الخير المدير موجود !
السكرتير : اي من دقيقتين وصل !
تنهد تركي براحه : اشوا حسبالي تأخرت طيب هو طلب انه يقابلني ! شوفه فاضي او لا؟
السكرتير بأستفسار : انت تركي الموظف الجديد ؟
تركي باستغراب : ايه !
السكرتير : سأل عنك قبل م يدخل وقال انه ينتظرك!
تركي بتوتر : اوكك !
لف بارتباك : عساه خير يارب
مشى بخطوات بطيئه وضح فيها التوتر دق الباب
الا ع صوت المدير : تفضل !
فتح الباب وابتسم : السلام عليكم صباح الخير
دخل وقفل الباب من نطق المدير : حياك حياك
تفضل ي تركي !
ابتسم تركي بارتباك مشى وقعد ع الكرسي الي قبال المكتب بفضول وتوتر
_
" بيت ابوصقر "
ام صقر : م جيتس وسألتس انا وش صار بذيتس العزيمه وش قلتي لي ؟؟ هاه !
رفعت ميهاف عيونها لها !! ام صقر : م قلتي انه تبلت عليتس وقذفوتس بعرضتس وحتى سبو اهلتس هاه؟؟ وراتس ساكته ؟؟ وش نيتس انتس تذلين البنيه
وتفضحينها وهي م سوت لتس شي ؟ ذي جزاتي
يوم رحبت بتس بيننا !
طالعت فيها ميهاف بغصه تتنقل بنظرات بينهم
كيف كل شي انقلب بهاللحظه ! كيف استنفذو طاقتها
لا منهم ولا من ولدهم !! شتت نظراتها عنهم ماعاد فيها الحيله انها تنطق وتحاجج احد !! تعبت من كثر م تحاول
تدافع عن نفسها تعبت !!
م حست بهاللحظه الا بنبره صوته ببحته الرجوليه
قطع هالصمت وهو داخل للصاله : مين قال ان نيتها تذل وصايف واختها ؟؟
رفعت عيونها ميهااااف بصدمه له بوسط
هدوء الكل من دخوله !! مشى سيف ببرود وقعد بجنب ميهاف وعيونه بعيون
امه منيره : م سوت هالشي الا انها شايفه الغلط منهم!
عقدت ام صقر حواجبها باستغراب !! وبناتها
بعدم فهمم يطالعونه ! اما ميهاف تطالع فيه م قدرت تشيل عيونها عنه للحظه حتى من صدمتها !!
سيف : بذيك الليله غلطت وصايف واختها العنود ! وسبّوها سكتت ومشت لهم المره الاولى ! بس توصل فيهم انهم كانو بيفضحونها قدام المعازيم !!ذي اللي م ينسكت له !
ام صقو بدهشه لفت ع ميهاف اللي بجمود تطالع
بسيف بوسع عيونهاا !!
ام صقر بصدمه : صدز هالحتسي ي ميهاف !!! ميهاف وكأنها مو عايشه معهم بهاللحظه من صدمتها بسيف اللي نطق : حتى سالفه امس بالمخيم ! تهجمت عليها واخطيت وهي مالها ذنب وصايف اللي نوتها هوشه بس انا فهمتها غلط !
لف سيف بهاللحظه عليها بهدوء والتقت عيونه بعيونها مو مستوعبه ان هذا سيف!
بيادر بصدمه : كيف يعني ! وصايف واختها اللي تبلو عليك؟؟
عريب : والله لحسه مخ ذي !!
ام صقر : وراتس ساكته تكلمي !!
عقد حواجبه سيف وهو يطالعها اما هي متنحه
من صدمتها ! استوعبت صوت ام صقر لفت عليها
بارتباك : هـ..ـلا
ام صقر : وانتي وراه م علمتيني وفهمتيني دام ذا
الصدز؟؟
ميهاف بهمس : وش تبيني اقول ؟ خفت المشاكل تكبر وهالايام انضغطت كثير والله فيها !
ام صقر بتنهد : لاااحول ولاقوه الا بالله الله يصلحكم ويهديكم ! وراه كل هالمشاكل ي يمه كان سكتي عنها
اما هو م ابعد نظره عنها وهي تتكلم بارتباك من نظراته!
ام صقر : الله يهديها ويصلحها يارب ! والله م عاد اجمّع من هالمشاكل !
صد سيف بلحظه مالفت عليه ميهاف !
ام صقر بتأنيب : سامحيني ي يمه والله اني مادريت انهن متبلينتس والا كان وريتهن الشغل !
لفت ميهاف عليها وابتسمت : لاعادي خلاص خلونا نقفل
السالفه الله يستر عليهم !
ام صقر بتنهد : امين يارب اجمعين !
قام سيف ولف ع ميهاف : يالله
قامت ام صقر : ع وين ي يمه ؟ تو باقي م قعدنا
لف سيف عليها بابتسامه : والله ي الغاليه مشغول
ام صقر : خل شغلك بعدين ماهو بطاير خلنا نقعد نتونس ونسولف وتغدو عندنا وبعدين امشو
سيف بابتسامه قرب لها وباس ايدها وراسها : مره ثانيه ان شاء الله
ام صقر باستسلام : عنيد راسك يابس مثل
امك رحمه الله عليها
ضحك وهو يخفي حزنه : الله يرحمها ويغفر لها
يالله فآمان لله !
لبست ميهاف نقابها وودعتهم وطلعت
معه لحظه م ركبو السياره لفت ميهاف تطالعه
لحد الان م استوعبت اللي سواه !
شغل السياره وحرك لف عليها باستغراب
: شفيك تطالعيني !
صدت : ولاشي
ابتسم وصد للطريق
_
" المستشفى "
بإجتماع بين كبار الدكاتره المعروفين !
د. ياسر بينهم يطالعهم بغيض !!
المدير بتنهد جمع كفوفه : اسمعني يادكتور ياسر !
انت معروف بين الدكاتره بجهودك المبذوله واخلاصك بالعمل وكفائتك بين الموظفين ! بس سمعه المستشفى
اهم بكثير لو احد درى باللي صار ! تزرع قلب مريضه بدون موافقه الاهل ع الزراعه؟ شي صعب اننا نتقبله ف عشان كذا قررنا اننا نزيحك عن مكانك ونعين
دكتور عوضاً عنك !
رفع حاجبه ياسر بإستنكار : ومين هالدكتور ؟؟
المدير : الدكتور سيف بن عبدالله المقرن !
ضحك ياسر بعدم تصديق : يقال انكم تعوضونه الحين !!! هه هزلت والله !
قام : مو مشكله هو تخصصه بعيد عن تخصصي !
وظفوه بمكاني اهم شي راحه نفسي وابتعد
عن هالمشاكل !
طلع وتركهم لف المدير ع سكرتيره : دق على د.سيف وقول اني ابي اقابله ..
#يتـــــــــــــــــــــــــــبع....
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!