لفو ع سيف اللي بنظرات هاديه
يطالع بابوه مخفي تحت هالهدوء وملامحه الجامده
بثوره جيوش من الحزن مكبوته بجوفه ! ابتسم
بكل هدوء وشتت نظراته عن ابوه بغصه تتوسط
بين ضلوع صدره رفع عيونه وهو يطالع باخوانه
وخواته وامه منيره " ام صقر "
همس وبالقوه يوضح صوته :جيـ..ت اتطمن عليهم
قطع عليه ابوه بنظرات حاده والقهر بنبره صوته
الغليظه : هم بخير دامك مو موجود بحياتهم !
بهاللحظه رفع سيف عيونه لابوه وارتكزت
بنظراته فيه بصدمه!
بوسط جمود الكل بهتت ملامحهم من الصدمه!
طالعه سيف لجزء من الثانيه فتح فمه بينطق !! بس لسانه كان مربوط ! مشلول ! وكأنه ابكم بهاللحظه !
مثل القيود اللي تقيده ! شتت نظراته بهاللحظه
بألف شعور وشعور يخنقه ! لف ومشى بخطوات
ثقيله لحقه صقر بقهر: دقيقه سـيف انتـ..
بس جمد صقر بهاللحظه لما ابوه رفع العصا وحطها
ع فخوذه ووقفه بمعنى الحاجز لف صقر باستغراب لابوه اللي نطق بقهر : لاشوفك تدوره ! خله !
صقر بترجي : رجيتك يابو صقر لاتسـ..وي هالشي
بلحظه م سيف بيطلع قطع عليه نبره قاسيه بحده
وصلت لمسامعه : بتطلع من هالباب ي ولد غاليه بدون م تسلم ع امك وتتطمن عليها !
جمد سيف بمكانه بهاللحظه و بنفسه اللي على حدود
التهلكه بصوتها اللي مليان عتب قد مافي نبرته حنيه
رفع عيونه يحاول يتماسك بتنهيده طويله
لف ابو سيف لمرته منيره
بنبره حاده : تبينه ؟ اطلعي سلمي عليه برا
وهذه اخر مره اشوف فيها رقعه وجهه بهالبيت !
الوليد بنظرات قهر وضيق يطالع بمقفى سيف لف
ع ابوه : يبه تكفـ..ى
قاطعه ابوه بنبره قاسيه وكلها غضب : انت اسكت ولاكلمه!!
عريب بقهر :ليش يسكت ؟ مو معقوله ؟ تحرمنا من اخونا ؟
لف عليها ابو سيف ورفع العصاه بعصبيه : والله
لو ماشوفك مقفله فمك لاقطع لسانك ذا قطع !
اما سيف بتشتيت نظراته حوله وهم وراه شد ع
قبضه ايده بقهر يسمعهم وهو يلعن نفسه بألف لعنه ولعنه ع
دخوله بهالبيت خرب عليهم راحتهم وعكر صفو مزاجهم
مشى بخطوات سريعه باندفاع مثل ثوران مشاعره
بهاللحظه فتح الباب وهو بيطلع الا وقفه صوت
منيره " ام صقر "
بحده : والله لو اشوفك طالع من هالباب
بدون م تسلم علي ما انت ب حل ! كيف هاين ع قليبك تطلع بدون م تسلم ع اهلك وناسك؟
بلحظه تزعزع كل اللي بداخله ! بتردد لف طالعهم بنظره
اخيره ! مشى بخطوات واسعه لمنيره " ام صقر "
قرب وباس ايدها بلحظه سريعه رفع راسه وباس
جبينها ابتعد بابتسامه نطق وبالويل يوضح صوته : عساك بخير ي الغاليه !
رفعت ايدها بحزن وحطته ع وجهه : بخير ي يمه دامك بخير
ابتسم بابتسامه باهته وذبول لف وسلم ع خواته ومشعل ومر من ابوه وطلع بسرعه !!
أم صقر بحده وجمود لفت ع ابو صقر : شوف ي ابو سيف ! م حبيت اكسر كلمتك قدامه واخليه يتغدى معنا ! مير والله الشاهد ان كسره خاطره للحين ف قلبي ولانيب مسامحتك عليها !
مشت بقله حيله وهي تذكر الله وتستغفره
من قهرها وطلعت
_
" الساعه ٩:١٠ االليل "
بالعماره ميهاف وهي بتطلع من الباب :
بلم الايجارات وبقعد عند الخاله ام يوسف
اخذت مفتاح شقه ٩ " شقه سيف " ابتسمت بخبث وطلعت بهاللحظه للعماره وبدت تجمع فلوس
الايجار لهالشهر الى م وصلت لشقته بالدور الرابع
رفعت ايدها بطرف المفتاح وهي بتفتح الا جمدت وميلت
فمها بتفكير : م شفته اليوم !لو انه موجود كان نشب لي ! خلاص ي ميهاف بس
انتي ادخلي وصبيه واطلعي " سائل حق حشرات ريحته
كريهه لابعد درجه " فتحت الباب بهدوء دخلت
شافت الشقه ظلام اللهم نور الصاله الخافت بهاللحظه ارتاحت وعرفت انه
مو موجود رفعت حاجبها بحقد : نشوف مين اللي بيلعبها ع هدوء !
قفلت الباب ومشت بشويش للمطبخ شبه مظلم نزلت انبوب السائل ع الطاوله فتحت الغطا بالقوه وهي لابسه قلفزات
وعفست ملامح وجهها من ريحته اللي تصرع ابعدته
عنها وطلعت بسرعه من المطبخ وهي لافه بتتوجه للحمام
بس فجأة م انتبهت الا صقعت بايدها ع صدره حتى انكب من السايل ع تي شيرته
بققت عيونها بفجعه برعب لدرجه عظامها
ترجف وهي تطالع بصدمه ع السايل اللي انكب ع صدره وبطنه نزل سيف عيونه بذبول وتعب مسيطر ع كل خليه
بجسمه يطالع بنفسه عقد حواجبه مو مستوعب
نطق وبالويل وضح صوته : وشـ.
رفع عيونه اللي غطى ع نصفهم الارهاق وكمل سؤاله
بهمس : وشـ..هو ذا ؟
اما هي برعب تطالعه مسكت برجفه ايدها تي شيرته
المبلل تحاول تبعده عن صدره وبطنه بخوف : نـ..زله
بسرعه نزله بيحرقـ.. بوسط نظراته فيها مو مستوعب اللي هي تقوله
وكأن الدنيا تدور فيه ابعد نفسه بثقل عنها
وهو يحاول يتماسك قدامها يموت ولا انه يضعف قدام اي احد ! لف ومشى بخطوات ثقيله يسحب رجوله بالقوه وبايده يتكئ ع الجدار ومحني
ظهره وقد م يقدر يحاول يستعدل بوقفته مشى بضعف
لغرفته وبصوت مخنوق : اطلعـ..ي برا ..
دخل للغرفه ودوخته كل مالها تزيد وتزيد يجهل سببها
اما هي نزلت العلبه بالممر ولحقته برعب ينتفض قلبها
وتترجاه : تكفى شيله
الله يخليك بيحرقك وجع شيـ..
بس اختفى صوتها بهاللحظه لما طاح
من طوله
ع وجهه
بقرب من سريره صرخت برعب ركضت بسرعه
جثت ع ركبها وهي ترجف مسكته ولفته
بقوه عليها وهي تنتفض : الله ياخذني الله لايوفقك ع هالفكره ياميهاف احترق اكيد !
مسكت تي شيرته بضياع وخوف م حست
بنفسها
بلا وعي الا هي تشيل تي شيرته من ع جسمه!
حطت منشفهه مبللتها بمويه بارده وفرشتها ع صدره
وبطنه وهي بارتباك انه احترق والا صار فيه شي !
ودها انها تنزل وتنحاش بس خايفه يصير فيه وتبتلش !
رفعت عيونها ع وجهه بتأفف : ي مال الوجع قوم !
م كملت جملتها الا بتأوه عقد حواجبه بانزعاج
استعدلت بجلستها بهاللحظه وهي ع الارض بخوف بجنبه فتح عيونه بخفيف بقى يرمش ببطئ لحتى م وضح له ملامحها برعب قاعده تطالعه بربكه
مرر نظراته ع حوله انتبه لنفسه انه ع الارض
استوعب اللي صار ! كل اللي يذكره انه وصل للسرير وبعدها غاب عن الوعي ! فز بهاللحظه ورفع ظهره
عن الارض رجعت هي ع ورا بسرعه بخوف من فزته !
طالعها مابين نظرات فجعه وحده ! نزل عيونه لما حس بشي بارد ع صدره وبطنه عقد حواجبه باستغراب
مسك المنشفه ورفعها يطالعها بعدم فهم رفع عيونه لها
حطت ميهاف ايدها ع قلبها براحه : اوووف الحمدلله ما مت والا كان رحت بستين داهيه!
فز من مكانه بشعور من البراكين تتفجر بداخله
رمى المنشفه ع الارض بقوه :وش ذااا !! وش جايبك هنا ؟؟
رفعت عيونها له بلعت ريقها بهاللحظه بخوف !
اما هو من العصبيه موب حاس بنفسه ! كل اللي بغاه انه بهاليوم يعيش كئابته مع نفسه ! بدون ولا ادمي معه !
قامت ع حيلها بارتباك : جيـ..
قاطعها بصراخ وبنظرات الشر بعيونه : شجااابك؟
رجعت خطوه ع ورا وهي ترجف من عصبيته
كان يستفزها هاليومين ببرود وسخريه بس م وصل فيه الا انه ينفجر عليها مثل البركان ويثور قدام عيونها
نزل عيونه ع جسمه مو مستوعب اللي هي تسويه
رفع عيونه وبصراخ هستيري : وش قاعده تسوين ؟؟ وشهو ؟
ميهاف وهي تنفتض بمكانها : انكب عليـ..ك السـ..ـايل وخفت انك تحترق لانه قـ..وي يـ.. اختفى صوتها بلحظه م مسكها من عضدها ويضغط بقوه بلعت ريقها بنظرات الرهبه بعيونها !
قرب ومن بين اسنانه يرصها ونظرات الحقد
ويشد ع كل كلمه : وش دخلك لبيتي ؟
ضاع صوتها وكل كلامها بهاللحظه من الخوف !
الا بصراخه الهستيري مثل المجنون : بأيي حق
تدخلين بيتي بدون اذني هااااااه !! سحبها بعنف من عضد ايدها بقوه
وطلع من الغرفه بلحظه م هي تحاول تفك نفسها منه بألم
مو قاادره الا لما فتح الباب ودفها بقوه لفت عليه بصدمه غمضت عيونها بسرعه لما ضرب الباب بقوه
بوجهه حط راسه بهاللحظه ع الباب وهو يتنفس بسرعه
كل قوته وعصبيته تبخرت بهالثانيه !
رفع راسه عن الباب بلحظه دق جواله تأفف بقله حيله
مشى للصاله اخذ جواله من الكنب شاف رقم صقر تنهد باستسلام ورد : الو
صقر وهو يطالع بالعماره بحيره : اي شقه انت ساكن فيها؟
جمد سيف بهاللحظه بصدمه !!!
نطق بصدمه وعدم استيعاب : صقـ..ر ؟ اي شقـ..ـه تتكلم عنها انت؟
صقر باستغراب ضيق عيونه بالعماره وهو واقف عند
سيارته : ترا ادري انك طلعت من بيتكم واخذت شقه بهالعماره ف اخلص علي وش هي رقم شقتك ؟ تعبت وانا واقف !
مشى سيف بهاللحظه بسرعه للبلكونه فتح الدريشه وطلع ع البلكونه وهو يتفحص بنظرات سريعه ع
الشارع مو مستوعب ! و فتح عيونه ع وسعها بصدمه من وجود صقر واقف بجنب سيارته رجع سيف ع ورا
بصدمه : شدراك انت بمكاني ؟
ابتسم صقر بدهاء :ي حبيبي معلومات استخباراتيه المهم اخلص وينك اي شقه؟
رفع سيف بايده ع راسه بربكه وضياع : شسمه !
شقـ.. ! شقتي رقمها تسعه ! بس انتظر دقيـقه
م امدى سيف بيتكلم الا قفل صقر ! ركض سيف بهاللحظه
وفتح الباب بسرعه بخوف انها ممكن تكون فيه !
تنهد براحه انها مو موجوده ! غمض عيونه وزفر !! رجع طرف الباب شبه مفتوح
و شغل الانوار الخافته مشى بالممر
لقى العلبه اللي ع الارض استنكر الريحه ! شالها بقرف
ودخل المطبخ اخذ غطاها وغطاها ورماها ف الزباله
ودخلها لداخل الدولاب مشى بتأفف فتح الدرايش للشقه
وشغل المروحات عض ع شفته بقهر وهو يتذكر حركاتها !
دخل للحمام باستعجال ياخذ شاور يحس بالقرف من الريحه ..
_
طلع صقر سله فيها حافظات الاكل طبعاً هي سوات
امه منيره موصيته انه ياخذها لسيف قفل باب سيارته
ودخل للعماره بلحظه نزول ميهاف من الدرج بحلطمه وقهر
تكلم نفسها
: الله ياخذه ليته احترق !! ليت !! اوووف شكل الريحه اتلفت اعصابه ؟ مع نفسه عسى
يارب هالريحه ماتروح من شقته وافتـ..
بس سكتت لما حست بشخص واقف قبالها بالثوب الابيض ..
رفعت عيونها انتبهت له وهو عاقد حواجبه وشايل السله بايده بثوبه الابيض وبرزته وبشعره الكثيف الاسود
بدون شماغ ولا عقال كان شكله ملفت ! بلعت ريقها
رمشت بربكه نزلت بسرعه من العتبتين ولفت الا قاطعها
بصوته الرجولي : لو سمحتي !
لفت عليه باستغراب !
صقر بتردد : تعرفين وين الشقه ١٠ ؟
رفعت حاجبها باستنكار : الشقه ١٠ فاضيه بسم لله تزور مين !
عقد حواجبه !
ميهاف باستوعاب ع نفسها ارتبكت : معليش اقصد الدور الرابع ع يمينك مكتوب رقم الشقه !
ابتسم : مشكوره
لفت ونزلت لبيتهم همست بتنهد : سبحان لله فرق بأدبه ذا عن
الثور اللي فوق > ملاحظه م تعرف ان صقر اخو سيف
صعد صقر فوق وبلحظه م طلع من الاصنصير ومتوجه للشقه ١٠ الا قطع عليه صوت سيف
من وراه لما فتح باب شقته : وين وين !
الشقه اللي قدامك فاضيه رايح لمين بالله
لف صقر بضحك مشى ودخل : وانا اقول البنت وش فيها منصدمه لما قلت لها وين شقه رقم ١٠ ؟
جمد سيف بهاللحظه بصدمه وبشك : اي بنت ؟؟؟
صقر باستغراب نزل السله ع الارض : بالعقل
يعني وش بيعرفني اي بنت ؟ وحده لابسه عبايه ونقاب
وغمز : بس والله واضح من عيونها انها حلوه
ماشاء الله اخترت العماره الصح !
ضربه سيف ع صدره : بالله اسكت !
صقر بتألم : وجع بشويش !
عقد حواجبه وهو يطالع بسيف : بالله شفيك تتصبب
مويه ! رفع سيف الفوطه ينشف شعره المبلل
وهو لابس تي شيرت : توي متروش
لمح السله باستغراب طالع بصقر : وش ذا ؟
صقر بضحك : ابد والله امك منيره حلفت علي
م اطلع من البيت الا وانا شايل هالحافظات فيها
اكل تقول خل سيف يتعشى !
سيف بابتسامه تخفي وراها ثوره احزان
بحنيه نزل مستوى نفسه فتح السله وغمض عيونه
وهو يستنشق الريحه !
قفل صقر الباب ودخل للصاله ع يساره رفع حاجبه : عجيب والله شهالشقه ؟
قام سيف وشال السله وحطها ع طاوله الطعام اللي ع يمين الصاله بالزاويه
صقر : ليش تركت بيتكم وجيت لهنا ؟ ناوي تعيش
لحالك؟
لف عليه سيف ميل شفايفه : ابد ابي شقه صغيره تكفيني !
صقر بتنهد قعد ع الكنب وضم ايدينه لبعض
: ناوي تعتكف لحالك وتنطوي ع نفسك اجل؟
سيف : مين قال !
مشى بتهرب : بروح اجيب الصحون والملاعق
قام صقر ولحقه للمطبخ عفس وجهه بقرف : وش هالريحه !
سيف وهو يفتح الدولاب بتصريف : مدري قمت
ولقيت هالريحه بالممر وفتحت الدرايش بتروح بعد شوي
فتح صقر الثلاجه وعقد حواجبه ولف ع سيف
: من جدك الثلاجه فاضيه !
سيف وهو يطلع صحنين واخذ ملعقتين وغسلهم
لف عليه : توي مالي يومين ساكن
صقر بدهشه : وش تاكل اجل؟
طلع سيف من المطبخ : من المطعم
لحقه صقر : وبس هذا حالك بيكون بالشقه واكل مطعم داخل واكل مطعم طالع !
قعد صقر ع الكرسي اما سيف واقف يفتح الحافظات ابتسم ع ريحه الاكل اللي انتشرت : كوشري !! الله
ابتسم صقر : افتح الحافظه الثانيه بس ! الا مسويه لك كبسه دجاج بالخضار وفوق كل ذا مسويه لك
ايدام " مرق " يحبها قلبك
ضحك سيف : شكلها كانت ناويه تعوضني عن غدا اليوم
اختفت ابتسامه صقر بهاللحظه تجهم تعابير ملامحه
قعد سيف وغرف لصحنه وصحن سيف اخذ الكولا
ورفع عيونه لصقر : اموت انا ع اللي يجيبون لي كولا
صقر بحزن : سيف بخصوص اللي صار اليـ.. قاطعه سيف وهو ياكل : قفل السالفه نسيتها ..
تنهد صقر واخذ ملعقته : براحتك
بوسط م ياكلون قطع صقر الصمت اللي بينهم
ب هم: سيف ! ام وصايف اتصلت علي اليوم تسأل عنك
جمدت ايد سيف وهو ماسك ملعقته ع الصحن من طرى اسمها !
انتبه صقر عليه وكمل : م ودك تحط حد لهالموضوع ! ريح البنت ي سيف قاعده تتعذب بسببك !
غمض سيف عيونه ونزل ملعقته !
تنهد سيف فتح عيونه وهو يطالع بصحنه لجزء من الثانيه
بوسط نظرات صقر فيه رفع سيف عيونه له
: وش قالت ؟
صقر : قلت لك تسأل عنك
سيف بطوله بال : وبعدها ؟
صقر : وتقول انها تدق عليك ولاترد
سيف : عشان موضوع وصايف ؟
صقر : تبي تتطمن عليك والا ماتبيها تتطمن ي المجنون !
ابتسم سيف ونزل عيونه اخذ ملعقته وكمل اكله
شرب صقر البيبسي ونزله وهو يطالع بسيف : اشوفك م رديت
سيف وعيونه بصحنه وهو ياكل : ع وش هو ارد ؟
صقر بتأفف : سيف لاتستغبي ع راسي !
ابتسم سيف وكمل اكله ببرود
صقر بتنهد : م تبيها انت ؟ قول خل البنت تشوف نصيبها
رفع سيف عيونه واستند ع الكرسي بتنهد ..
كمل صقر بحزن :
سيف ترا خالتك يعني الله اعلم بضيقه صدرها ع اختها
قبل م تكون امك ي سيف ! وبعدين م قالت لي شي
عن سالفتك انت وبنتها والله ولاجابت طاري ! بس انا اللي حاب افتح هالموضوع
تقدم صقر باهتمام وحط ايدينه ع الطاوله وهو يطالع
سيف : قول لي موب ذي البنت اللي حبيتها من كنت بالثانوي موب ذي البنت اللي اصريت الا ان تحجزها لك وخطبتها ؟
موب ذي البنت اللي علقتها فيك ! موب هي ؟؟ وقفت معك بحزنك وفرحتك وانت وش سويت ؟ غير انك سحبت عليها وسافرت مقدرين وضعك ووضع اللي صار بس ع
ع الاقل كان قلت لها اعذريني بهالفتره انا محتاج ابقى لحالي ونفسيتي متغيره ! مو تجافيها ي سيف بهالشكل ! حرام والله الحب اللي بينكم ٨ سنين يروح وينمحي بهالطريقه !
تراها بنت خالتك ي سيف ! اذا م صنتها وحفظتها بعيونك
مين بيصونها ؟ قول لي !! مو كانت امنيه المرحومه انها
تشوف زواجكم ؟ ليش ع اخر لحظه خنت كل العشره
وخنت حبك لها واخلفت كل وعودك للبنت !
قرب سيف بكل برود واخذ ملعقته وكمل
اكله : بيتعدل الوضع ان شاء الله
صقر بسخريه : الحين منحاش م تبي تزور خالتك عشان م تفتح لك هالموضوع ؟
جمد سيف ورفع عيونه لصقر !
صقر بتنهد : ترا صدرها ضايق تقول ماعاد هو سيف الاولي
ادق عليه اترجاه يجي يقعد وينام عندي بهالفتره بس هو
مطنش ! صدقني خالتك م فكرت تفتح لك هالموضوع ابد
بالعكس ! هي تبيك كولد اختها قبل م تكون زوج بنتها
مسك صقر البيبسي بيشربه
وقف : سيف !
سيف وهو يقلب بملعقته بالكوشري : هممم
صقر : طالع فيني
رفع سيف عيونه له !
صقر : تبي نصيحتي ك اخو !
نزل سيف عيونه ورفع ملعقته ياكل : لا
كشر صقر بهاللحظه قام وضرب سيف ع راسه : تبن عساك تغص يارب
قام وكمل : المهم وين انام ؟
رفع سيف عيونه له بدهشه : بتنام عندي !
صقر بنظرات استحقار : شرايك؟
سيف : ماعندي الا وحده اللي هي غرفه النوم ومافيه مفرش
زايد حتى تنام بالصاله !
صقر: خلاص بنام معك
سيف بتأفف : بالنوم بتناشبني بعد !
رفع حاجبه صقر : اشوف لسانك طولان !
قام سيف بتنهد واخذ الصحنين والملاعق ولف ومشى
للمطبخ ببرود : م انلام والله
صقر بحده : سيف !
ابتسم سيف ع كثر م يحب يغيضه دخل المطبخ ونزل الصحون وطلع وهو راجع للصاله وقف باستنكار لما شاف صقر داخل لغرفه النوم يطالع بالاثاث كان مودرن
تجاهله سيف وشال السله والمحافظ وحطهم بالمطبخ
ورجع للغرفه دخل وعقد حواجبه لما شاف صقر
يفتح الدولاب ينبش !
رفع حاجبه سيف : حتى بالملابس بعد ؟
لف صقر عليه : ابي بجامه اي شي حتى
انام براحه
تأفف سيف ومشى له : ليتك سمين حتى م يدخل فيك
دفه عن دولابه وطلع له
ضربه صقر ع راسه : احترمني مره ثانيه
سيف ببرود مشى : طالع نفسك بالمرايه واسأل حالك انا وجه احد يحترمني والا لا؟
طالعه صقر بغيض طلع سيف بضحك
_
الساعه ٢ بعد منتصف الليل " ميهاف "
ضامه رجولها لصدرها وهي قاعده ع السرير ومستنده
ع رفوف الدولاب اللي ورا راسها وهي
تكلم بالجوال : اخبارك انتي؟
ميعاد : ابد زي الفل هاه بشريني انتي وش صار
ع تسجيلتس بالجامعه قبلوتس ؟
ميهاف بتنهد : يماطلون
ع اعصابي الله يستر
ميعاد : لالاماعليتس بيقبلونتس ي قليبي ..
ميهاف بزفره عميقه : ان شاءلله من بؤك لأبواب السما ي ستي !
ميعاد : اقول هيه بطه ترى تركي يسأل عنتس !
لاشعورياً فز قلبها وابتسمت ع ذكر اسمه
ميعاد : هيه الو !
انتبهت ميهاف : هاه معك !
ميعاد بحسره : اوف اوف اوف امداتس تذوبين ي العاشقه
كملت بتحسر : هالعاشق مدري وش مزينه فيه انتي؟ والله من يسمع اسمتس لاطريناه انا وامي وخواتي
يبتسم وتغدي عيونه قلوب احس احلامه كلها لانام
مهر بيت ميهاف من كثر م يفكر فيتس قبل م ينام
ضحكت ميهاف
ميعاد : اي اي اضحكِ ي بطه وش عليتس واحدن يحبتس وهو م كلمتس بحياته ولا راسلتيه مير يراقبتس من بعيد
لبعيد ويفز قليبه ي عزتي له متى تفكينا وتتزوجينه اشغلنا
تراه بطلباته ماغير اكرف وراه
ميهاف : احمدي ربك هو اللي يكرف عشانك
ميعاد بحسره : الله اعلم يكرف عشان مين !المهم يسألني كل يوم عن صحتس وعن قلبتس
تجهم ملامح ميهاف بهاللحظه من طرت لها موضوع قلبها!
_
" سيف وصقر "
صقر وهو ع جنبه ع السرير ويقلب بجواله
ينتظر النوم والغرفه ظلام شغل الاباجوره سيف
وخفف انارتها ولف ع صقر
ونطق : صقر !
صقر : همممم
سيف من بين تردده وفضوله : م قلت لي البنت اللي قابلتها تحت هي كيف اوصفها لي !
لف عليه صقر ورفع حاجبه : شتبي فيها
ثم ضحك بعفويه : لايكون ناوي عليها وبتخطبها ..
سكت سيف بهاللحظه ! انقبض قلب صقر وتلاشت ابتسامته استعدل بجلسته بجديه : سيف لايكون !!
طالعه سيف بنظرات ازدراء : لايكون ايش ؟
تربع صقر وهو يطالعه بجديه وترقب : سيف ! وش ناوي عليه ! صدق بديت احس ان جيتك واستأجرك هنا م كان عبث !
تجاهله سيف ببرود وسحب مخدته يعدله : شكلك تهوجس وتوسوس بديت تخلط بين الخيال والواقع ! وش ابي فيها بالله!
تنهد صقر : وجع استخفيت اقول مو من عوايده سيف بهالطبع !
صد سيف للجهه الثانيه وحط راسه ع ذراعه
بنظرات حقد وبنفسه : بلاك م تدري بالغبنه اللي بصدري ولا باللي بسويه فيها !
غمض عيونه بزفره عميقه
_
" بيوم جديد "
كانت باحداثها الخفيفه عند صقر وسيف طلعو يفطرون
برا وبعدها طلع صقر ع الشركه لعند ابوه
اما سيف رجع لشقته بدأ بالتفكير والتخطيط باللي بيسويه
رفع جواله امعن النظر فيه لثواني ثم ابتسم بكل هدوء
واتصل ع هالرقم استعدل بجلسته وبابتسامه
مكر وخبث ارتسمت ع ثغره لما رد عليه هالشخص
_
" الساعه 5:14 العصر "
" ميهاف "
طلعت من البيت وهي صاعده لعند ام يوسف الا وقفت
باستغراب لما شافت ثلاث بنات من المستأجرين بهالعماره
واقفين عند الدرج الثاني ومسببين زحمه !
عقدت حواجبها ميهاف لما سمعت سالفتهم
البنت ١ : والله ي بنات اثنين شفتهم الصبح طالعين و راكبين هالسياره الفخمه !
البنت ٢ بقهر : حمى كان صورتيهم طيب
البنت٣: شكلهم مستأجرين جديدين !
البنت ١: مدري مدري بس وش الفخامه وش الرزه
والله عقلي للحين معهم ..
ميهاف بقله صبر مشت ولفت للدرج الثاني تجاهلتهم
تعرف هالبنات اغث بنات ف العماره وكم مره تتهاوش معهم وقفت بهاللحظه ع صوت البنت١ : بعض الناس شايفين نفسهم مدري مقطعتهم الكشخه والفلوس
ولا طوله اللسان وقله الحيا
لفت ميهاف وابتسمت ببرود : انتي وهالخبلتين
اللي معك تمثلون النوع الثاني
ولفت وتجاهلتهم بوسط صدمتهم وغيضهم وردودهم
_
" الساعه ١٠:٤٦ الليل "
فتحت الباب بتعب دخلت : مساء الخير
ام ميهاف : مساء النور !
قفلت الباب ونزلت عبايتها وعلقتها عقدت حواجبها
: وين ابوي ؟
ام ميهاف : داخل منسدح بيلين ظهره وينام
ميهاف : اها طيب
تصبحين ع خير
دخلت لغرفتها نزلت شراباتها اخذت علبه مويتها
واكلت ادويتها وشربت المويه ونزلتها ع جنب ابعدت
فراشها وهي بتنسدح الا قطع عليها دخول امها
رفعت عيونها لها باستغراب قفلت امها الباب ودخلت
وقعدت ع طرف السرير والابتسامه شاقه وجهها
عقدت ميهاف حواجبها باستغراب : شفيه !
ام ميهاف بفرحه : اااخ الحمدلله يارب والله اللي استجاب دعواتي
استعدلت ميهاف بجلستها بخوف : شصاير
ام ميهاف بفرحه : اسمعيني ي بنيتي
اليوم فيه واحد من الرجال دق ع ابوك وطلب ايدك ع سنه
الله ورسوله
بهتت ملامحها بصدمه همست : تركي
ابتسمت امها : نامي وبكره اقولك كل شي
ابتسمت ميهاف وهي بداخلها قلبها يرفرف
من الفرحه قامت امها ومسحت ع راس بنتها بحنيهه وباستها
: يالله ي يمه خذي ادويتك وسمي بالرحمن ونامي
هزت راسها بطواعيه طلعت امها بهاللحظه فزت
ميهاف والفرحه مو سايعتها الدنيا كثر سعادتها
تحس ودها تطير من قوه الوناسه : اخيراً الانسان اللي ابيه بعيش معه
غمضت عيونها والابتسامه شاقهه وجهها بدقات قلبها
السريعه حست من تلميحات ميعاد البارحه ان تركي
ناوي هالمره يتقدم لها ضمت رجولها لصدرها بدت تفكر وتسرح بخيالها مع الانسان اللي عشقته ب حب عفيف
من نظره كانت بلحظه م صادفها مره وهي طالعه بوجهه
بدون غطا لما كانت عندهم بالبيت وابتدى قصه العشاق !
قطع على حبل افكارها اتصاله فتحت عيونها واختطفت جوالها بسرعه
بظنها انها ميعاد الا تلاشت ابتسامتها لما شافت رقمه
كشرت ردت بنبره حاده وحقد : خير !!
سيف بتفكير : وينك انتظرك!
استعدلت بجلستها بدهشه وغيض : نعم نعم !!
سيف : صرعتني ريحه العلبه اللي جايبتها!
ميهاف : عاد ليتك صدق تنصرع وافتك منك !ماراح اجي انقلع
سيف : اها اوك خليني اقفل وادق ع صاحب العماره واعلمه بسواتك !
كشرت بهاللحظه بقهر : علمه !!
اتسعت ابتسامته : متأكده !!
ميهاف باصرار وعناد : ااااي !!
سيف : حلو خليك ع الخط بدق عليه من جوالي الثاني حتى تسمعينه !
جمدت ميهاف بهاللحظه مابين نارين انه يكذب او صادق ! اخذ جواله الثاني من الطاوله واتصل عليه وحطه سبيكر ..
سيف : السلام عليكم
جمدت لما وصل لمسامعها صوت صاحب العماره : وعليكم السلام والرحمه
سيف : الاخ فواز ال** صاحب العماره : اي نعم تفضل اخوي
سيف : لو سمحت انا عندي شكوى بما اني مستأجر جديد
بعمارتك **
قاطعته ميهاف بهاللحظه لما حست بجديته : قفل!!!
ابتسم سيف بمكر وابعد الجوال الثاني عنه : شقلتي !
ميهاف بغيض وهي تغلي : قفل بجي خلاص قفل !
ابتسم : اوك
قفل الجوال واستأذن من صاحب العماره وقفله
استند ع ورا باريحيه وهو ينتظرها " بعد نص ساعه رن جرس الشقه قام بابتسامه
خبث انه ذلها له فتح الباب بكل برود عقد حواجبه : اووه انسه ميهاف ي هـ..
دفته ودخلت لفت بسرعه وبقهر : وين العلبه اخلص !
قفل الباب ولف عليها بابتسامه : بالحمام احترت وين اوديها !
مشت بسرعه وبقهر دخلت الحمام التفتت تدوره
بلحظه ماهي بتلف وبحده : وينننـ.. الا بشهقة عاليه من السايل اللي انكب
فوقها وغطاها كلها بوسط ابتسامته : اوه معليش انكب بالغلط !
اما هي متسمره بمكانها ومقفله عيونها تتنفس بسرعه بفجعه انه كب عليها سايل الحشرات ..
بربكه وخوف وقرف وضياع فيها بهاللحظه نزلت راسها وهي تحس بالغثيان
من قوه الريحه الكريهه وهي مغمضه عيونها بقوه
باحكام وايدينها متجمده بالهوا بدون اي حركه من
صدمتها فتحت فمها وهي تنطق بلعثمه
: وشش سـ..ويت ؟
وصوتها يقطعه شهقاتها وهي فيها الصيحـه
رفع حاجبه ببرود : مجرد اني رجعت لك معروف
امس
قطع عليه صراخها بقهر وهي مغمضه عيونها بدون اي حركه
: ذا يحرق انت م احرقك امس !! جعلك للحرق صدق
عقد حواجبه : مين قال انه يحرق !
جمدت بهاللحظه : شتـ شتـ..قول
حطت كم عبايتها ع نقابها وهي تحس بالغثيان
من معدتها اللي قلبت من الريحه ابعدت ايدها
وهي تدور بايدينها بضياع بالفراغ
: ابـ..ـي مويه وين المغسـ..له ؟
ابتسم وهو يشوفها تتخبط بالفراغ ضايعه ومشتته : مدري
صرخت بقهر : وين !
تنهد باريحيه : ع يمينك
لفت ع يمينها وهي بتموت من القهر وكابته
الصيحه : وين قدام ؟؟ اتسعت ابتسامته : ايه
تقدمت فتح لها المويه ووقف واستند بايده ع المغسله وهو
يطالعها كيف اخذت المويه بايدينها ورشته ع وجهها
اللي يغطيه النقاب
بخوف انه يحرقها لدرجه انها شاده ع تغميضها لعيونها
م سمعت الا ضحكته بهاللحظه انتفضت بصراخ
: حمى تصيبك حححـ.. ونزلت راسها زياده وهي تحس بالغثيان ودها تبكي
وبنبره باكيه: احسه يحرقنـ..ي جعلك م ترتاح جعلك م تذوق السعاده حمى تصيبك
وتلتوي من وجعها انا شسوي ! بحتـ..رق بسبـ..ك انا شسـ..ويت ؟
ميل شفايفه بكل برود : كل ذا و ؟وش سويت
رفعت راسها وبصراخ وهي باقيه مغمضه عيونها
: انكتم !!
سيف ببرود : بكيفك المهم لاخلصتي نظفي الشقه ..
ميهاف : وجع هيه
وين بتروح ! قاعده احترق !
لف عليها اما ميهاف لاشعوريا بضعف رفعت ايدينها لعيـونها بس م تقدر تلمسها وهي مغمضه : تكفـ..ى لاتـ..روح عيـ..وني تحرقني شسـ..وي ؟
قرب ووقف قبالها وهو عاقد حواجبه : صادقه ؟
هزت راسها بضيق مخنوقه ترجف : مـ..و قادره افتحـ..ها
تحـ..رق
قرب زياده باستغراب : ارفعي راسك طالعيني
رفعت راسها بضعف
سيف : افتحيهم
هزت راسها بنبره باكيه نزلت راسها وهي بتحط ايدينها ع عيونها
: ما اقـ..در
سيف : افتحيهم ..
ميهاف : قلت لك ما اقدر
سيف : طيب اوقفي !! خليني اشوف عيونك افتحيهم !
نزلت راسها بارتباك اجتمعت كل الافكار
السلبيه براسها !
سيف بحده : ارفعي راسك وطالعيني
رفعت راسها بعد تردد
سيف باصرار وحده : افتحيهم !
ميهاف بدون اي رد ولا استجابه !
سيف بحده : افتحي !! مستحيل انها احرقتك
تستهبلين !
حست بعصبيته بهاللحظه فتحت عيونها ببطئ
و رجعت غمضتهم بقوه بخوف ان ممكن السايل
يدخل فيهم هزت راسها بلا : مابي افتحها اخـ..ـاف يدخل فيه
لف بتأفف اخذ الفوطه الصغيره بللها بمويه لف
عليها ومسح عيونها فيها رجعت بتأفف : شتسـ..وي
صرخ عليها : اثبتي !! جمدت بمكانها بهاللحظه !
مسح عيونها ورمى الفوطه بالمغسله ولف عليها : هاه افتحي !! فتحت عيونها بخفيف رمشت ببطئ الى م حست
بالراحه وبدت ترمش رفعت عيونها له
سيف بترقب : قلتي تحرقك اجل !!
طالعته بغيض وبقهر : ليش تكبه ليش ؟؟ ابتعد ع ورا وبنظرات سخريه : بالعقل بكبه عليك
وانا ادري انه يحرق ؟ قاريه وشايفه لايحرق ولاشي !
عقدت حواجبها باستنكار : م يحرق ؟ تمزح ! انـ..
سيف ببرود : هذا هو العلبه قدامك اقري !
ولف وطلع ضربت برجلها ع الارض بقهر وغيض
طلعت وراه وبعصبيه : انا بذيك اللحظه م كبيته عمد !! م دريت !
مشى بكل ببرود وهو متوجه للصاله وهي وراه : محد طقك ع ايدك وقال لك تدخلين شقتي بدون علمـ..
و عقد حواجبه وقف ولف عليها وقفت بهاللحظه بسرعه
قبل م تصطدم فيه !! طالعها بفضول : كيف دخلتي لشقتي وانا مقفلها؟
طالعته بغيض وبربكه : لقيتها مفتوحه
رفع حاجبه : مفتوحه ؟
هزت راسها بسرعه بإيه
قرب وهو رافع حاجبه : متأكده ؟
رجعت ع ورا بارتباك نطقت بنفس واحد : لا اكذب
طالعها بسخريه ثم لف وقعد ع الكنب وسحب جواله من الطاوله يطقطق
تكتفت بقهر وهي تطالعه عقد حواجبه وعفس وجهه
بانزعاج رفع عيونه لها : بخرتي البيت بهالريحه روحي
شوفي لك صرفه !
طالعته بعصبيه ودها تخنقه : مجنون انت !!! سيف بنظرات ازدراء : ايه يالله ع شغلك
انفجرت بعصبيه : هيييهه انت !
سيف ببرود : اسمي سيف !
ميهاف بعصبيه : والتبن !!!
جمد بنظراته الحاده فيها بلعت ريقها بهاللحظه
قام وهي رجعت ع ورا بخوف : امزح زله لسان !التوبه !
سيف : طيي بطلع لك شي من الملابس
دبري نفسك ونشفي عبايتك بعد م تخلصين كرف بخرج وبطول شوي حتى تاخذين راحتك بالتنظيف
ورفع ايده : انتبهي مره ثانيه تتطاولين بلسانك علي !
خليك مؤدبه ! واذا شفتك طالعه من بعدي ومانظفتي !
بتعرفين وقتها وش بسوي فيك ! وانصحك انك م تعاندين
وطلع تاركها بوسط صدمتها وانتفاضها من العصبيه
ودها تصارخ بهستيريه بس ماباليد حيله !
اما هو دخل غرفته فتح دولابه عقد حواجبهه وهو
يطالع بملابسه ! : من وين القى شي يجي قدها ذي؟
انتبه لبجامته الجديده
تنهد : جديد ! حرام اللبس فيها والله !
تأفف وطلع وحطه عندها
سيف : بطلع لاوصيك !
طالعته بقهر وحقد وكره ! طلع بكل برود اخذ
مفاتيح سيارته وجواله وطلع قفل باب الشقه حتى م تطلع وتنجبر انها تنظف ونزل ركب سيارته وشغلها
بهاللحظه رن جواله رفعه من شاف رقم المتصل
وصايف ! جمد !!
نزل الجوال بنيه انه يتجاهل اتصالها وهو بيحرك سيارته الا بشعور غريب اجتاحه
انه يرد عليها ! اخذ جواله ورفعه لاذنه ورد : الو
بلحظه م وصل لمسامعها صوته الرجولي ببحته
انقبض قلبها بخوف م كانت متوقعه ولو واحد بالميه انه بيرد
بارتباك ورجفه وضح بنبره صوتها
: سيـ..ف !
استند ع ورا وتنهد : هلا وصايف ..
تجمعت الدموع بعيونها بهاللحظه وبغصه وخنقه همست : اسـ..فه لاني دقيت بهالوقت بس
امي تسأل عنك
عقد حواجبه من نبره صوتها : معليش انشغلت م دقيت عليها بس ان شاءلله بكره او بعده بجي ازوركم
ابتسمت من بين حزنها لاشعورياً انسابت دمعتها
ع خدها همست وهي مخنوقه : انـ..ت بخيـ..ر ؟
نزل عيونه بهاللحظه بصمت لجزء من الثانيه واردف : بخير
رفعت راسها تحاول انها تمنع دموعها من النزول : الحمدلله يالله م اطول عليك فآمـ..ـان الله
سيف : بحفظه مع السلامه
بلحظه سريعه قفلت الجوال نزلت وجهها وغطته بكفوفها
وانهارت بالبكا ! كيف يجفيها ؟ كيف يتعامل معها بهالبرود ؟ ما حن لحبه ؟ م اشتاق لها ! بدت تلعن نفسها
الف مره ومره كيف انها طاوعت قلبها ودقت عليه !! كيف اهانت نفسها وكبريائها وكلمته ! كيف ؟ هاذي هي ! انسانه ضعيفه بحبها له ! م تقدر تقاوم الحنين والشوق اللي بقلبها يوجع ! تشتاق لشخص م فكر
فيها ولا اهتم ! نزلت راسها ع المخده ودفنت وجهها ودخلت بنوبه بكى ونحيب !
اما سيف بتنهد غمض عيونه وزفر بزفره عميقه لثواني ! فتح عيونه وحرك سيارته ..
_
" ميهاف "
استغلت عدم وجوده في البيت تروشت وأخذت البجامه اللي اعطاها اياها واخذت ملابسها
وغسلتها ونشفتها بسرعه وعلقتها مشت
باستعجال تنظف تحاول تخلص قبل م يوصل
ولانها بعد م عليها عبايتها هذا اللي خلاها تعيش بتوتر حاولت قد م تقدر انها تخلص بدري بالتنظيف
بعد م خلصت اخذت عطر من عطوره ورشتها بكل
البيت اخذت عبايتها اللي باقي مبلله ع خفيف
رجعت لبست ملابسها اما لبسه هو ؟ طشته بالزباله
بعناد لبست عبايتها ونقابها توجهت للباب وهي بتفتحه لقته مقفل دورت المفتاح م حصلته ! زاد قهرها بهاللحظه
رفعت حاجبها بتوعد : هه يحسب اني غبيه وضعيفه ! هين
مشت للمطبخ اخذت السكين ورجعت للباب بدت تفتح مسامير مقبض الباب اللى فتح معها بالاخير ابتسمت
ع ذكاءها فتحته وطلعت وتركته مفتوح بعناد ونزلت بسرعه
لتحت بخوف ان ممكن اهلها ينتبهون عليها فتحت الباب
بخفيف ودخلت لغرفتها بسرعه نزلت ملابسها وعبايتها
وبدلت بقرف وانسدحت بفراشها وهي تحاول تهدي من نفسها بعد اللي سواه فيها ! نطقت بقهر : وجع بدال م اكسر راسه ! هو اللي كسر راسي !! ليت القتل حلال فيه
حمى تصيبه !! اوووف
_
بعد م وصل سيف وصعد لفوق طلع من الاصنصير وهو متوجه لشقته بي عقد حواجبه ان الباب مفتوح دخل باندفاع
خوف ان فيه احد متهجم ع شقته ! شاف السكين استوعب بهاللحظه انها هي تنهد بعدم استيعاب : مجنونه هالبنت ! كيف طرى عليها هالفكره !! تأفف بقهر وقفل الباب ماله خلق انه يسويه وتوجه لسريره وانسدح ..
.
الساعه ١١:٣٠ قريب الظهر "
دخلت ام ميهاف باستغراب : وهاذي للحين نايمه؟
قربت لعندها بخوف هزتها : يمه بنيتي ميهاف فيك شي ؟
فتحت عيونها بانزعاج وبنعاس رفعت ايدها لعيونها : همممم
ام ميهاف بارتياح : وجه روعتيني حس بالي فيك شي وش هالنوم !! قومي قومي غسلي وجهك وتعالي اقعدي معي ابيك بموضوع
لفت للجهه الثانيه بهمس : طيب
ام ميهاف وهي تشم سدت انفها بقرف : وش هالريحه !!
فتحت ميهاف عيونها ع وسعها لفت ع امها بشهقه : هاه ! م اشم شي !
ام ميهاف : مدري كأنه شي مخمج !
استعدلت بجلستها تحك شعرها بارتباك وحده : اااي من برا اوووف صرعوني بريحتهم !
ام ميهاف : جايز والله ! المهم يالله اخلصي !
تنهدت ميهاف : طيب
طلعت امها للمطبخ وطلعت من بعدها ميهاف دخلت للحمام فتحت الحنفيه و صب مويه تنهدت براحه
وغسلت وجهها وبعد م طلعت كانت امها حاطه القهوه ع الارض وتو ابوها دخل للبيت : السلام عليكم
مشت له ميهاف باست راسه وايده وابتعدت : وعليكم السلام
ابو ميهاف وهو ينزل جزماته : وش هالنوم ! لاصلاه ولاعباده الله يهديك ي بنيتي مافي مثل قومه الصبح ! الحين
تفطرين والا تتغدين !
ميهاف : م حسيت بنومي
مشى ابوها وقعد ع حيله ع الارض واتكى ع المركه
صبت له ام ميهاف فنجان القهوه وقربت له صحن التمر
مشت ميهاف وقعدت جنب امها اخذت امها الفنجال: تبيني اصب لك ؟
ميهاف : لا مابي خليه شوي
ام ميهاف : براحتك
وصبت لنفسها اما ميهاف تطالع بالتلفزيون
اومأت ام ميهاف لرجالها بمعنى تكلم !
ابو ميهاف بهدوء : ميهاف !
لفت عليه : هلا سم
رفع ابوها الفنجال ارتشف قهوته ونزله يطالعها :
علمتك امك امس بالموضوع
عقدت ميهاف حواجبها: اي موضوع ؟
امها : بسم لله عليك ! موضوع الخطبه
لفت ميهاف عليها شهقت : يوه !! صح تذكرت !
انقبض قلبها بارتباك
نزل ابو ميهاف الفنجال وكمل :
اسمعيني ي بنيتي هذا اللي تقدم لك
واحد ماشاء الله تبارك الله سمعته معروفه ورجال اجودي ونخوه ووظيفته زينه
نزلت ميهاف راسها بابتسامه وهي تسمع كلام ابوها
كيف يتكلم عن الانسان اللي حبته تركي
ابو ميهاف : وانا والله اني سألت عنه قبل م تعلمك امك وباقي بسأل عنه بهاليومين ان شاءلله مير والله اللي قالو انه رجال ماعليه كلام ومحافظ ع صلاته وخلوق ودكتور بعد جراحه ماشاء الله وله من اسمه نصيب
اسمه سيف وتراه ساكن بهالعماره !
بهاللحظه تلاشت ابتسامتها وتبخرت رفعت عيونها لابوها بملامحها
اللي بهتت من الصدمة بانقباض قلبها
ابو ميهاف : والرجال يبي الرد بهاليومين ي بنيتي
انتي فكري وخذي راحتك وتطمني ي يبه محدن
بيغصبك ع شي م تبينه !
وكأنها بعالم ثاني م تسمع ولاتوعي باللي يقوله م حست بنفسها الا هي قايمه وقادتها رجولها
بخطوات بائسه لغرفتها قفلت الباب واستندت
بظهرها عليه حطت ايدها ع قلبها المضطرب بنبضاته وهي تتنفس بسرعه مو قادره حتى تتحكم بنفسها
تحس بالخنقه !! تجمعت الدموع بمحاجر عيونها
مشت بخطوات بطيئه بصدمتها وبرعشه ايدها اخذت ادويتها من ع طاولتها الصغيره لاشعورياً فكت العلبه
واكلت مهدئ حتى يوازن بدقات قلبها ويهديها !
قعدت ع حيلها ع طرف السرير وهي تطالع بالارض
مو مستوعبه شي !! مو مستوعبه كيف انه تجرأ وخطبها !
انسابت دمعه بحرقه على خدها مثل حرقه قلبها !
_
ابو ميهاف باستغراب : شفيها قامت كأنها مستغربه ؟
ام ميهاف بابتسامه : ماعليك هذا الحياء ومايسوي تقهوى ي رجال تقهوى وعين من الله خير
رفع ابو ميهاف الفنجال : الله ييسر امرها ونفرح فيها
ام ميهاف بابتسامه : امين يارب الله يسمع منك !
_
بعد ربع ساعه طلعت ميهاف من الغرفه وهي تلف الطرحه ع راسها وبايدها نقابها
طالعو فيها امها وابوها باستغراب !
ام ميهاف : وين ي يمه ؟
ميهاف بدون نفس وهي تحاول انها تتصنع الهدوء
عكس داخلها وهي تغلي ! : بطلع لخالتي ام يوسف
ابو ميهاف بضحك : ماشاء الله اشوفك راضيه عليها
هالايام وتروحين لها
ميهاف بابتسامه باهته : ااي اتونس عندها شوي
ام ميهاف : بتتغدين عندها !
ميهاف باستعجال مشت للباب وتلبس جزماتها : مدري
لبست نقابها : مع السلامه
فتحت الباب وطلعت صادفت محمد من استعجالها م باسته وصعدت دخل محمد باستغراب
ام ميهاف : تعال ي حمود بس نزل جزماتك ي يمه
عند الباب ونزل شنطتك وعلى الحمام يالله غسل ايدينك ووجهك
_
ميهاف وهي تغلي من القهر وتنتفض مو شايفه اللي قدامها
كل همها بس انها تشوفه وتصرخ بوجهه !
دخلت الاصنصير وضغطت ع رقم الدور ٤ وهي تهز رجلها
بقله صبر متجاهله وجع وانقباضات قلبها بتوترها !! وصل الاصنصير وانفتح طلعت باندفاع متوجهه
لبابه لقته مفتوح من بعد م كسرته امس دفته بعنف
ودخلت وهي تتلفت وتصارخ باسمه ! مالقته بالصاله
لفت وتوجهت لغرفته باستعجال دخلت لقته نايم
فتحت اللمبات وبصراخ هستيري : وش تبي مني انت !!!
فتح عيونه بانزعاج من الصوت رفع نفسه ع خفيف وهو عاقد حواجبه مو مستوعب وجودها ولا عصبيتها !
قربت لعنده لا شعوريا وهي تغلي اخذت الفازه من الطاوله ورفعتها
بتضربه لكنه فز و لحق ومسك ايدها قبل م تضربه ..
عقد حواجبه من تهورها وجنونها !
طالعته بحقد وكره وبغيض من بين دموعها : انـ..ت
وش تبي مني ؟؟ وش تبي ؟؟ طالعها باستغراب !
ميهاف بعصبيه : ليش تتقدم لي ؟؟ تبي
تهينني ؟؟ تبي تذلني ؟؟ وش تبي ؟؟ تكلم !! ارتخت كتوفه بهاالحظه لما استوعب تغيرت ملامحه لبرود افلت ايدها وابتعد وقام من السرير وهو بيطلع من غرفته م وعى الا بالفازه اللي تهشمت وتكسرت
ع الجدار اللي جنبه وقف بهاللحظه يطالع بالفازه
صد بهدوء وطلع توجه للحمام وانتم بكرامه اما
هي بقهر قعدت ع السرير ونزلت راسها م تحملت
انهارت بضعف وبغصه : ياربـ..ي وش بـ..سوي !
الله ياخذه الله لايهنيه بحياته كانه ناوي يدمرني !! غطت وجهها بكفوفها : اووووف!! ماهي الا دقايق و رفعت راسها مسحت عيونها بعنف
وبنبره حاده : يحلم !! يبطي عظم ان وافقت !! يخسى اني اخذه يخسى !!
قامت وطلعت من الغرفه شافته طالع من الحمام
يمسح ايدينه بالفوطه رفع عيونه لها لجزء من الثانيه يطالعها! ثم مشى بكل هدوء مر من جنبها
ودخل لغرفته لحقته وهي تطالعه بقهر كيف انه م نطق
وتجاهلها !! فتح دولابه وطلع ثوبه وطلع شماغه
وحطهم ع السرير بوسط نظراتها الشرسه فيه !
مشى طلع الكبك حقه من الدرج : م عندي شي اقوله !
نطقت بقهر : كيف ماعندك شي !!
نزل الكبك حقه ع الكوميدينا وفتح الدرج يدور علبه الكبك الثانيه : المفروض تفرحين شفيك مكشره !
طيرت عيونها فيه بعصبيه مشت لعنده وبغبنه ووقفت قدامه : قول انك تستهبل !! قول!
رفع عيونه لها ورفع حاجبه باستنكار : اضحكِ مين قدك سيف بن عبدالله بن مقرن يخطبك !
ضربت بايدها ع الطاوله وبعصبيه : تخسى !!
نزل راسه وابتسم طلع الكبك الثاني وهو يفتحه
: متى ناويه تروحين للمستشفى عشان تحاليل الزواج ؟
توسعت حدقه عيونها بصدمه : وش هالثقه ؟؟ رفع عيونه سيف : بكره مناسب ؟
انفجرت بعصبيه وبصراخ هستيري : انسى !! انسى اني اتزوجك !! والله اني مـ..
اختفى صوتها لما حط ايده ع فمها من فوق النقاب
رفع حاجبه ببرود وعيونه بعيونها : لاتحلفين وانتي عارفه
ومتيقنه اني بتزوجك وغصب عنك وعنهم !
بنظرات عيونها الحاده اللي ممتزجه بخوف تتنقل بين عيونه !
همس بابتسامه بارده بسخريه ارتسمت ع ثغره : م جيتي
هنا وسويتي كل هالفوضى الا انك عارفه ومتأكده اني باخذك
وغصب عنك !
دفته بحده تنتفض : تحلم ي ولد ابوك اني اتزوجك
نزل عيونه ببرود ومسك علبتين الكبك بحيره بينهم : تراي مستعجل ردي ع اهلك الليل بالموافقه وبكره
بنسوي التحاليل وبوقت م تطلع بملك عليك
وبنمشي ..
رفعت حاجبها بدهشه : نعم !! رفع عيونه لها ولف علبتين الكبك عليها : اي واحد احلى ؟
طالعت بالكبك وهي تتنفس بسرعه من عصبيتها رفعت
عيونها له بنظرات شرسه مسكت علبتين الكبك
ورمتهم بقوه ع الارض وانفجرت بصراخ : زواج ماراح اتـ..
سكتت لما شافت نظراته اللي ابعدها عن الكبك
وهو بالارض ولف يطالعها
قرب وابتسم : كملي !
همست بربكه : لاتقول انك بتهددنـي مثل كل مره !
احنى ظهره ووقرب من مستوى طولها وقبال وجهها : انا ماودي والله ادخل بتهديدات مالها معنى ! خلينا نملك بهدوء ونمشي اذا ودك نسوي اكشن قبل الزواج؟
م عندي مشكله جاهز !
طالعته بكراهيه : وش تهديدك هالمره !
ابتسم : ابوك يدري انك تجيني بانصاص الليالي؟
بهاللحظه بهتت ملامحها وجمدت بنظرات عيونها اللي توسعت بصدمه فيه !!
صد وابتسم اخذ جواله وفتحه بوسط نظراتها فيه مو مستوعبه !! الا لما رفع جواله قدامها عقد حواجبها رفعت عيونها باستغراب له !
سيف : طالعي دققي !!
نزلت نظراتها للجوال وضيقت عيونها بتدقيق بهاللحظه رجعت ع ورا بسرعه من هول صدمتها
رفعت عيونها له لاشعورياً تجمعت الدموع بمحاجر
عيونها !
رمى جواله ببرود ع السرير واخذ علبتين الكبك من الارض
وحطهم ع السرير : ع العموم انا اخذت موافقتك !
بس حسب الاصول والعادات انك تردين ع اهلك
ولف عليها بتشديد ع كلمته : الليله !! والا صدقيني اول واحد بيوصل له هالفيديوهات هو ابوك !
ومن بعدها كل اللي بالعماره !
صد وهو يطالع بساعته بيشوف الوقت !
لاشعوريا هي نزلت دمعتها بحرقه بللت فيها نقابها !
همست بخنقه : الله يحـ..رقك مثل ماحـ..رقت قلبي ..
لف عليها بنظرات شرسه وبحده بنبره صوته : هالقلب مو قلـبـك !! م تملكينه وان كان بين ضلوع صدرك !!
طالعته من بين عيونها اللي غرقانه بالدموع ! صدت وطلعت بسرعة قعدت ع الدرج
واجهشت بالبكا لدقايق ! كان هالدور فاضي مافيه
الا سيف يسكن بهالشقه !
قامت بضعف ع رجولها ودخلت الاصنصير وهي منهاره تبي تنزل قبل م يطلع ويشوفها بهالحاله !
تكره نظرات الشفقه وتكره انها تكون ضعيفه قدام احد
نزلت للدور الاول م حست بنفسها الا هي واقفه عند باب شقه الخاله ام يوسف تدقه بضعف من بين
شهقاتها المكبوته فتحت لها ام يوسف بفرحه : وش عندها المزيونه مسيره علي ب الضحى ي هـ..
سكتت بخوف ضربت بايدها ع صدرها : ي وجه الله شفيتسس ي بنيتي ؟
طالعتها ميهاف بغصه و انهارت زياده ..
عند سيف بلحظه طلوعه من الاصنصير اللي قبال الدور الاول
وقف بهاللحظه بنظرات عيونه عليها لما شافها منهاره وواقفه قبال شقه ام يوسف ..
سحبتها ام يوسف بخوف ودخلتها : شفيتس ي يمه عسى ماشر !
دخلت ميهاف وقفلت ام يوسف الباب
ومشت معها للصاله
قعدت ميهاف وبنبره مخنوقه : ولاشي بس تهاوشت مع صديقتي !
ابتسمت ام يوسف وقعدت جنبها مسحت ع ظهرها : ي شطنتس تبكين عشان كذا
اوهوه ي يمه باقي بتشوفين قدامتس الدنيا مع رجلتس قوي قليبتس الرهيف ذا قويه ..
انهارت ميهاف بهاللحظه ! حضنتها ام يوسف وتطبطب
ع ظهرها
_
اما سيف ركب سيارته لوهله تفكير باللي حوله كيف بيتقبلونها
كيف بيتقبلون زواجه السريع وهو مال امه اسبوعين متوفيه!
شتت هالافكار عن راسه وحرك سيارته متوجه لخالته
ام وصايف
_
بعد اسبوع ونص من الاحداث !
عند ميهاف اللي كانت اسوء ايام بحياتها هالايام
تنام ع خيبات الحزن والهم وتصحى بضيق وتكدر
م عاد لها نفس للأكل وكلها سرحانه بتفكير !
اما امها وابوها فسروه ع انها شايله هم الزواج !
بعد م اعطتهم موافقتها بغصه اااخ ع ذاك اليوم
كيف نطقت بكلمه موافـقه من بين غصات قلبها !
كيف كانت تتمنى فرحتها بهالكلمه بنصيبها من تركي !
كيف ! طبعاً م خبرت ميعاد ولا احد من طرف اهلها خوف
من انها تجرحه ! يعشقها عشق قيس لليلى بس مجبوره
ومغصوبه ع سيف !
الساعه ٤:٣٠
فتحت ام ميهاف الباب عليها بفرحه وتوتر : يالله ي يمه
تدق علي ساره تسأل عنك اصعدي لها حتى تجهزك مابقى شي بعد المغرب بيجي الشيخ والرجال !
رفعت ميهاف عيونها اللي طغى ع نصفها الحزن وبوجهها
اللي مشحوب نزلت عيونها وهمست بدون نفس : طـ..يب
طلعت ام ميهاف للمطبخ تجهز الحلويات والموالح
قامت ميهاف والغصه تتوسط بين ضلوع صدرها اخذت
عبايتها ونقابها ولبستهم وهي مخنوقه وطلعت
صعدت فوق ركبت الاصنصير وضغطت ع الدور الثالث
واستندت براسها ع جدار الاصنصير والحزن متقمص
ملامحها وطاغي ع قلبها فتح الاصنصير طلعت وتوجهت
لشقه ساره مجرد م دقت الباب الا فتحت ساره وبتهليل
وببشاشه : حيا الله عروستنا ميهااااف !
ادخلي
دخلت ميهاف نزلت نقابها وتصنعت الابتسامه
ساره بحماس قفلت الباب : والله م تصدقين شكثر فرحتي لما قالت لي امك بذاك اليوم انك انخطبتي ! ابد حلفت عليها اني انا اللي بزينك بليله ملكتك والفستان علي !
مسكت خدودها : كم مهوفه عندي انا ؟؟ ابتسمت ميهاف وهي متثاقله من الهم اللي بداخلها!
مسكت ساره ايدها وسحبتها لغرفتها : يالله ي عروسه اكلي بالاول وبعده بسوي مكياجك وشعرك !
قعدتها ع الكنب اللي بغرفتها وقبالها الطاوله فيها الاكل والعصير
_
" سيف "
بلحظه طلوعه من الكواي وبايده ثوبه وشماغه رفع
جواله واتصل ع صقر اللي رد : ي هلا ومرحبا
سيف : اسمعني ابيك تلبس وترسم ع سنقه ١٠ وتجي للشقه الحين ..
صقر باستغراب وقف سيارته : ليه ؟
سيف : انت تعال بالاول وبعدين بفهمك ع كل شي يالله انتظرك
صقر بتنهد : اوك الله يستر مو متطمن ..
سيف : موب لازم تتطمن يالله مع السلامه
م عطى مجال لصقر يعصب عليه و قفل !
وركب سيارته وحرك متوجه للعماره
دخل وصعد لشقته نزل ثوبه وشماغه
ع الكنب وتوجه للحمام وانتم بكرامه يتروش !
_
" بيت ابو صقر "
دخل صقر باستعجال صعد لغرفته ع طول للحمام
تروش وخلص وطلع وهو لابس الروب
فتح الدرج وطلع ساعته
والكبك والقلم وتوجه للدولاب وفتحه وهو يطلع ثوبه
صادف دخول امه : وين وين وين ! وش فيك مشتط !
لف صقر بتفكير : البس ثوب كويتي والا العادي ؟
مشت ام صقر وقعدت ع حيلها ع الكرسي : وش عندك ؟
صقر : مدري والله سيف دق وقال البس وتعال لي
ام صقر باستغراب : وش يبي ؟ لايكون فيه شي ؟
لف صقر بنظرات ازدراء : يمه بالله فيه شي ويبيني اكون متكشخ ؟
ام صقر : انا وش دراني ! م قال لك وش يبي ؟
لف صقر وطلع ثوبه الابيض وحطه ع السرير : لا
بس ان شاء الله خير بالله يمه ضبطي لي من هالبخور الزين خليني اتبخر فيه قبل م اطلع
ام صقر : لا ما عليك بيادر جايبه ذا البخور اللي تحطه بجهاز صغيّر وتتبخر فيه والله انه زوين جاز لي ريحته خذه معك لا رحت لاخوك تبخر فيه انت وهو شكل المزيون معزوم ع مكانن زين !
صقر بتكشيره : افااا وانا مو مزيون ؟
ام صقر وهي طالعه :
اقطع بس الزين كله ماخذه سيف عنكم
صقر بحلطمه : طيب طيب
قفل الباب ولبس ثوبه
_
" الساعه ٦:١٦ المغرب " " سيف "
بعد م لبس ثوبه وقف ع المرايه وهو يقفل ازارير ثوبه
اخذ المشط ومشط شعره الكثيف الاسود ع ورا
لف اخذ الكبك وهو بيلبسه الا قطع عليه رن الجرس
مشى وهو يقفل الكبك بكمه فتح الباب ع دخول
صقر برزته واناقته اللي تلفت الانتباه سلم ع سيف وابتعد : هاه قولي شسالفه !
التفت سيف ومشى لغرفته
قفل صقر الباب ولحقه بغيض وقهر : ياخي تكلمم
دخل الغرفه ودخل وراه صقر بقله صبر يطالعه : انطق !! لف سيف بكل برود : ابيك تكون الشاهد ع زواجي !
انصدم صقر ونطق بلعثمه من هول صدمته : بتتـ..زوج ؟ لا تمزح
سيف : والله صادق بتزوج بيجي الشيخ بعد نص ساعه
ولف ع المرايه : ف خلنا نستعجل !
صقر بصدمه قرب له : دقيقه لف علي ي حمار
وش زواجه ؟ كيف ؟ ومين ؟ وصايف ؟؟
سيف : لا
جن جنون صقر بهاللحظه : تكذب !
اخذ شماغه : فاضي لك حتى اكذب !
صقر بعدم استيعاب قعد ع السرير يطالعه : وابوي ؟ والناس وش بيقولون؟
سيف ببرود اخذ شماغه ؛ اخر همي هم
ولف عليه : هاه شرايك انسف الشماغ او لا ؟
صقر بعصبيه: اوف من برودك
-
" ميهاف "
ابعدت الفرشه ساره وهي تطالع بميهاف اللي فتحت
عيونها ع خفيف : هاه افتح !
شهقت ساره : لالالا بتحوسين الايلاينر خليك لا تفتحينه !
لفت واخذت علبه الهايلايت واخذت بالفرشه شوي
وطبطبت ع عظمه الخد وارنبه الانف شي بسيط
ميهاف بتملل احنت ظهرها : تعبت !
ساره : ي بنت ارتزي بظهرك خليني اكمل
ميهاف بتنهد استعدلت بجلستها وهي ضاغطه بكفوف ايدينها بتوتر وضيق !
ساره : افتحي عيونك
فتحتهم ميهاف
ساره : العدسات تحرقك ؟
هزت ميهاف راسها بلا
ساره : حلو طالعيني اشوف !! الله الله وش هالعيون والله اني م العب !! وش هالسناعه ي انا !
والله ي بنت الروج العودي طلع عليك فخم !! وينك م تحطين هالالوان ي غبيه يجنن !!
تنهدت ميهاف : انا زين امشط شعري كل يوم !
ساره بشهقه :يوه شعرك !
لفت عليها وصارت وراها فتحت الرولات عن شعرها
الاسود الكثيف اللي سرعان م انفلت وانسدل ليغطي
ع ظهرها بطوله لفت ساره ميهاف عليها
واخذت المشط و وفرقته وحطته ع جنب ونفخته من قدام
وفيرته بالفير حتى م يطيح ع وجهها ابتعدت
بانبهار : مااااشاءلله ماااشاءلله ! والله ي بنت بديت اغار منك ماشاء الله تبارك الله صايره تجننين شوفي المرايه ..
لفت ميهاف ع المرايه تطالع نفسها بارتباك
وتوسعت عيونها بانبهار من شكلها والمكياج اللي حلاها
زياده وطريقه شعرها اللي بلمعان سواده ! لفت
ع ساره وابتسمت مسكت ايدها : مشكوره كانت امي شايله همي ..
ضحكت ساره : شدعوه خوات حنا بعدين م انسى لك يوم انك وقفتي معي بوقت ولادتي وساعدتيني ب ولدي
فارس يالله هذاي ارد لك الجميل
ميهاف بتصنعها للابتسامه عكس النار اللي شابه بجوفها
مشت ساره واخذت الفستان الابيض : يالله عاد تمنيت والله زفه وتلبسين فستان العروس
بس دام ان المحروس زوجك مستعجل ! ف اخذت هالفستان
حبيته من شفته قلت هذا بيليق عليك واخذت
هالكعب ! يالله البسي وانا بنتظرك برا
اومئت براسها ميهاف وطلعت ساره برا الا دق الباب
وفتحته كانت ام ميهاف بتوتر من فرحتها : هاه خلصت !
ساره بابتسامه : ادخلي ادخلي قاعده تلبس
دخلت وقعدو بالصاله ..
ساره بضحك : متحمسه لشوفتها !
ام ميهاف : اي والله بنيتي وحيدتي كيف م تبيني اتحمس
لشوفتها بليله عمرها ..
قطع عليهم دخولها وهي تمشي ببطئ بالكعب
وقفت امها ولاشعورياً دمعت وهي تذكر الله
عليها !
ميهاف بحلطمه نزلت الكعب : يعور مابيه
دخل محمد : يالله بابا يقول جا الشيخ
قمطت ميهاف !
مغصها بطنها من الخوف بهاللحظه !
ام ميهاف : طيب يالله بننزل
ساره : البسي الشوز ! تحملي لانك مو متعوده
بس تعودي ي قلبي بعدين لارحتي لاهله بتروحين بشحاطات مثلاً ؟؟
ميهاف بتكدر وتكشير : اووف لاتذكريني !
ام ميهاف : يالله يمه البسي !
دخلت ساره لغرفتها اما ميهاف لبست الشوز وانتم بكرامه
ام ميهاف : وين عبايتك ؟
ميهاف : داخـ..
قطع عليهم خروج ساره وهي تسحب شنطه السفر
الوسطى وبايدها الثانيه عبايه وشنطه يد صغيره بلون اسود مخملي
وقفت ساره : اسمعيني ادري ان م امداك تجهزين
طول هالاسبوعين ومحتاسه عشان كذا شوفي ي بنت الاجواد هالشنطه فيها ملابسي الجديده !
ميهاف بصدمه : لاتـ.. قاطعتها ساره : خليني اكمل هاذي شريتها العام من تجهيزاتي لزواجي وابد والله ماتهنيت حملت بفارس من اول شهر ولاجتني مناسبات حتى البسهم وبعد الولاده
انتفخت يااختي ولا لي حاجه بلبسهن خذيها انتي بالعافيه عليك فيها من الفساتين والشورتات والبناطيل بما ان جسمك نفس جسمي قبل الحمل والله مضيقه علي
بالدولاب وناويه اشتري ان شاء الله هالشهر ملابس قبل م اسافر لاهلي ف فكيني منهم وهاذي عبايتي جديده
شريت لي قبل يومين وحده وذي م احتاجها
قوست ميهاف ثغرها : ياااااربي !
مسكتها وخمتها : مشكوره مشكوره مشكوره والله
لولا الله ثم انتي كان ضايعه انا الحين
ابتسمت ساره : شدعوه قايله لك خوات حنا
ابتعدت ميهاف بابتسامه خنقتها العبره
ام ميهاف : مشكوره ي بنيتي والله تعبناك معنا
ساره : لاوالله ان فرحتي لها كأن وحده من خواتي تزوجت المهم يالله يالله انزلو للشيخ قبل م يطفش ويروح
ميهاف بهمس : ليت والله يتكنسل
فتحت ساره العبايه : يالله البسي
لبستها ميهاف بربكه ولفت الطرحه وحطته ع وجهها وسلمت ع ساره ونزلو لبيت ام يوسف اللي حلفت ان
الملكه تصير فيها وماقصرت من تجهيزاتها للحلويات والعصير والكيكه دخلت ميهاف و استقبلتها ام يوسف
بالاحضان : مبروك ي يمه مبروك ي فرحتي فيتس كنت ابيتس ليوسف مير يالله نصيبتس !
ابتسمت ميهاف بابتسامه باهته
ودخلو للمجلس الاول اما المجلس الثاني فيه الرجال
بلحظه م دخل الشيخ مع ابو ميهاف رفع عيونه
سيف له وقام وسلم عليه مع صقر وقعدو
وبعد م كرموه بالضيافه
الشيخ : يالله بسم لله ع بركه الله
الاخ سيف بن عبدالله بن مقرن
هل تقبل ب ... طالعه صقر وهو مغبون من تصرفاته !
بعد م انتهى الشيخ من سيف وراح لميهاف : السلام عليكم بنيتي
نطقت بارتباك : وعليكم السـ..لام
الشيخ : هل .. نزلت عيونها بغصه تجتاحها وبخنقه
انسابت دمعتـها وهي تضغط بكفوفها : موافـ..ـقه !
عطاها الكتاب مسكت القلم برجفه ايدها و وقـعت بحسره ..
بعد م انتهى الشيخ رجع لمجلس الرجال
وبعدها اعلن زواجهم بشكل رسمي على سنه الله ورسوله
تنهد سيف بهاللحظه و
قام وسلم ع الشيخ وسلم ع ابو ميهاف وهو بداخله
مغبون : بلاك م تدري وش بنيتي لبنتك ولك !
طلع ابو ميهاف مع الشيخ ونزلو لف سيف ع صقر
اللي م قدر يكشر وابتسم بفرحه ضم سيف : مبروك وانا اخوك مبروك ..
ابتعد عنه وكمل : ولو اني مو راضي ومغبون انك حاطني قدام الامر الواقع بس يالله فرحتي اكبر من اني ازعل ..
ابتسم سيف : الله يبارك فيك اسمعني لارجعت للبيت ابيك تعلم امي منيره
صقر بتكشيره وحلطمه : لا عاد !!
سيف بنظرات ترجي : يالله عاد !
صقر بتأفف : خلاص لاتطالعني بهالنظرات اووف !! طيب طيب
ابتسم سيف : مشكور يالله خلصت مهمتك توكل !
طالعه صقر بنظرات حاده : نعم ؟؟
سيف : سمعتني م اردد كلامي انا !
مرر صقر بلسانه ع شفايفه : هين اوريك انا هين
ضحك سيف ع صقر اللي طلع
_
من ناحيه ميهاف يتخطفونها امها والخاله ام يوسف بفرحه
ويباركون لها اما هي تتصنع الابتسامه قدامهم والفرحه وهي بداخلها الف غصه وغصه
ام ميهاف : يالله ي يمه بيدخل رجالك حتى يسلم عليك
ام يوسف : توردت خدودها ي ملح اللي تستحي
نزلت راسها بارتباك طلعو ام ميهاف وام يوسف ونزلو
تحت لبيت ابو ميهاف تاركينها لحالها بالمجلس
قام سيف بعد م تأكد انهم راحو وهو بيطلع من مجلس الرجال الا وقف لما انفتح باب الشقه بوحده لابسه عبايه
باندفاع دخلت وتوجهت للصاله وهي تنادي عليها
بنبره حاده : ميهااااف !! ووووينك ؟
رفعت عيونها ميهاف باستغراب لما دخلت عليها
ميعاد وهي تغلي وتنتفض من العصبيه : ماشاء الله
عروستنا الف مبروك تزوجتي هاه !!
بهاللحظه بهتت ملامحها ميهاف من الصدمه
وجمدت بمكانها وقلبها ينتفض من الصدمه والربكه !
ميعاد بحسره وعصبيه : كيف هان عليك تبيعين اخوي !! كيف !! تزوجتي وخنتيه!! وهو ناويي
يتقدم لك هاااه !! عشقك وحبك وحطك ع راسه ويعد الايام عد حتى يتزوجك ! مو هو الانسان اللي حبيتيه وتبين
تتزوجينه هاه !! الحين عشان تقدم لك واحد جراح ودكتور وهيهات وغني رحتي وافقتي وبعتيني وبعتي اخوي !! بلعتي لسانك الحين !! ولا بعد ماتبينا
ندري !! ليه شايفه نفسك اميره !! تكبرتي الحين !!! اصلاً اخوي الغلطان من البدايه انه ياخذ وحده
مريضه وهي ع حافه الموت قالتها امي له ذي التعبانه م تصلح لك بس هو غبي انه متمسك فيك غبي !! والله م تستاهلينه !! بس عيشتيه بالحب والغرام والعشق وبالاخير سحبتي عليه ! الله لايوفقك روحي الله لايسامحك كانك حرقتي قلبه ي التعبانـ..
م حست الا بصوته الرجولي من وراها : خلاص عاد!
لفت ميعاد عليه طالعته بحقد
سيف ببرود : صمخه ؟ م تسمعين؟
ميعاد بعصبيه : وش دخـ..
سيف بهدوء : قلت لك اطلعي والا تبينها
للمره الثالثه اقولها !! لفت ميعاد بقهر ع ميهاف : الله لايهنيك ماراح يسامحك هو مو مسامحك !!!
ولفت وطلعت بسرعه بلحظتها نزلت ميهاف راسها
وبغصه اجهشت بالبكا م قدرت تتحمل
اما سيف اللي واقف بجنب الباب ولاشافها ولاحتى لمحها
نطق : انتظرك تحت
وطلع رفعت عيونها بهاللحظه نطقت بقهر : الله ياخـ..ذك
بلحظه م نزل سيف وشغل سيارته وهو بيركب لمح شخص لابس ثوب ابيض وبشعره المبعثر
واقف عند عامود الكهربا يطالع بنظرات حقد وقهر !
وبجنبه ميعاد : امش هاذي م تستاهلك !
تركي بهدوء يخوف وهو يطالع ب سيف : هذا زوجها ؟
لفت ميعاد بحقد :ااايه !الله لايهنيها !!
تركي : استغفري لاتدعين عليها وادخلي
لفت عليه تطالعه بقهر تأففت ومشت ودخلت للبيت ..
_
اما ميهاف اللي لبست عبايتها وسلمت ع امها وابوها
واخوها وحتى ام يوسف ودعتهم بوسط دموعهم ع فرقاها
باست حمود اللي بدموعه : بتجيـ..ن بكره صح؟
ابتسمت من بين دموعها : ان شاءالله
ابو ميهاف : يالله ي يبه رجالك ينتظرك
استعدلت بوقفتها اومئت براسها بطواعيه ونزلت تحت
بلحظه م شافها سيف طلعت من الباب نزل من سيارته
بهاللحظه وقفت ميهاف من لمحته واقف بعيد اعتدل
بوقفته لما شافها لف سيف بمكان م تناظر له ! عرف
انه هو الانسان اللي حبته تقدم بكل هدوء
وفتح الباب لها: ميهاف !
م حست فيه عيونها بتركي !
سيف بنبره عاليه شوي : ميهاف ؟
انتبهت ولفت عليه : هاه !
سيف : شفيك ؟
همست : لا ولاشـ..ي
ركبت السياره وقف سيف بعد م كلمه ابو ميهاف يستودعه الله و يوصيه ع بنته ودعه سيف وركب السياره لف ع
ميهاف اللي صاده عنه لف بكل هدوء وحرك سيارته
متوجه للفندق بوسط الصمت اللي بينهم لبعد م وصلو
فتح باب السياره ونزل اما هي فتحت الباب من قوه ما فستانها ضيق والكعب تبهذلت مسك ايدها رفعت عيونها
له بنظرات حاده سحبت ايدها ونزلت بنفسها
تجاهلها سيف وعطى مفتاحه للقرسون حتى يحرك السياره للمدخل ودخلو اخذ مفتاح الجناح وصعدو فوق
بعد م فتح باب الجناح دخلت هي ودخل بعدها قفل
الباب وبهدوء : تلقين الغرفه بنهايه الممر
تجاهلته ودخلت للغرفه وقفلت الباب نزلت عبايتها ورمتها
ع السرير وهي تغلي من القهر والدموع بعيونها
اما هو نزل شماغه وطاقيته وعقاله ع الكنب غرس اصابعه بشعره
الكثيف وبعثره اخذ علبه مويه وتوجه للغرفه فتح الباب
وقف بهاللحظه لما شافها واقفه ع المرايه باناملها النحيله
تحاول تفتح العقد عن رقبتها بتأفف لفت و جمدت
لما شافته واقف ع الباب يطالعها ..
بلعت ريقها وبرجفه يمغصها بطنها !
صدت وهي تحاول تستقوي بنفسها ولاتبين
ربكتها ! دخل وقعد ع طرف السرير وهو مجمع كفوفه
يطالع بانعكاسها ع المرايه لفت عليه
بقهر : مين سمح لك تدخل !
عقد حواجبه وهو يتفحصها بنظراته من فوق لتحت : م توقعتك بتكونين كاشخه لي
عضت ع طرف شفتها بقهر !
رجع ايدينه ع ورا يستند ورفع حاجبه بانبهار : بس طلعتي ذويقه !
صدت بهاللحظه بغبنه وهي تحاول تفك العقد :م طلبت رايك !
اتسعت ابتسامته ببرود : مين قال لك اني انتظر منك تطلبين رايي ؟
غمضت عيونها بقله صبر متنرفزه منه ومن هالعقد صرخت بقهر وتركته : اوووووف !!! لاتنفك
زين
قعدت ع الكرسي ونزلت الشوز بقهر
عقد حواجبه : شفيك مكشره ومعصبه !
ميهاف بنرفزه : ترا والله مو رايقه لك اطلع ولاتكلمني !
قام : تبيني افكه لك !
رفعت راسها بهاللحظه : نعم !
قرب لها : لفي
قامت وابتعدت ع ورا : مااابي لاتقرب !
سيف : ترى بفكه يعني ماراح اكلك
رجعت ع ورا : مابي مرتاحه كذا انا ..
وقف ورفع حاجبه بسخريه : قبل شوي كنتي بتصيحين
من قهرك انك م فكيتيه والحين مرتاحه ؟ وش هالتناقض !
ميهاف بغيض : اصيح ! لاتخترع كلام
من راسك !
سيف : والدموع اللي بعيونك !
صدت ميهاف ونزلت الساعه من ايدها : من
العدسات تحرقني !
تجاهلها مشى وفتح الدولاب واخذ بجامته
تجاهلته ميهاف طلعت وقفلت الباب وقعدت بالصاله
ع الكنب وهي تهز رجلها بقهر !!
وشهقت لما استوعبت : مو كأنه بدل ! لا وطلع له
لبس من الدولاب !! طالعت بنفسها بشهقه : وانااا ؟ يوه الشنطه بالسياره
قامت وتوجهت للغرفه : مالي شغل ينزل ويجيبها مستحيل انام بالفستان
وبلا وعي فتحت الباب ودخلت : ابي شنطتي جيـ..
توسعت حدقه عيونها وصدت بسرعه بشهقه
اما هو بمكانه ثابت وايدينه مدخلها بالاكمام باقي م لبس
البلوزه وكان لابس بس البنطلون عقد حواجبه وابتسم ورفع عيونه لها : مره ثانيه دقي الباب لو انك متأخره دقيقتين كان الله اعلم شصار فيك
جمدت بهاللحظه لاشعورياً لفت وبعصبيه : شتقصد؟؟
رفع سيف بلوزته ولبسها مشى لها وهو يسحب البلوزه
من ع صدره ويعدلها ع جسمه ووقف قبالها وهو
يشمر اكمامه : شبغيتي ؟
نزلت راسها وانسدل شعرها ع وجهها وهي تضغط ع اصابعها
تتهرب من عيونه : ابـ..ي شنطتي م نزلـ..تها انت !
عقد حواجبه : اي شنطه ؟
رفعت راسها له بسرعه بدهشه : شنطه ملابسي !! نسيتها ؟
سيف بعناد : بالسياره بس م طرى علي اجيبها
ميهاف بحلطمه : سيف !! عقد حواجبه : اول مره تنطقين باسمي
ميهاف بقهر : من زينه !
تغيرت نظراته لحده وبملامح وجهه لجديه : عيدي ؟؟
رمشت بسرعه وبلعت ريقها من نظراته شتت
نظراتها عنه ومشت وقعدت ع السرير !
بوسط نظراته اللي ما شالها عنها رفعت عيونها له
اللي التقت بعيونه نزلت عيونها بسرعه !
وبهمس : وجع مهايطيه م تقولين كلمه الا
تبلعين العافيه بس من نظراته !
غمضت عيونها وتأففت ! : يارب رحمتك !
سرعان م فتحت عيونها لما مسك وجهها ورفعه
له وهو واقف وهي باقي جالسه ع طرف السرير
بنظرات الخوف بعيونها مسكت ايده بتبعده عن وجهها
همست : شـ..وف انا والله تعبانه ولا لي خلق للمشاكل خلها بكره نتهاوش !
رفع حاجبه وهو ماسك فكها بايده : عاد م اشوف هالشي انا من تصرفاتك !
ميهاف بارتباك نظراتها تنتقل بين عيونه : كيـ..يف ؟
نزل ايده وتنهد : اسمعيني قلت اني ماراح انكد عليك بهالليله وبكون رايق وهادي ! بس شكلك تبيني اوريك
الوجه الثاني بتصرفاتك المتهوره والطفوليه ذي !
كشرت : طفوليه بعينك !!
رفع حاجبه بغيض : ميهاف !!
نزلت راسها بتنهد : طيب خلاص بسكت !
لف واخذ جواله من ع الكوميدينا ورفعت راسها
: وشنطتي ؟؟
لف عليها : م طرى علي انزل !
ميهاف بقهر وقفت : مو لازم تنزل خلهم هم يجيبونها حرام عليك سيف والله الفستان ذا يحكني وكاتم ع قلبي
ماقدر انام
ابعد سيف الفراش وقعد ع طرف السرير وهو يشيك ع جواله : لاتنامين اجل
شدت ع قبضه ايدينها بقهر مسكت اعصابها
وهمست بقله صبر : سيف !!
تجاهلها !
ميهاف بقهر : سيف !! تجاهلها للمره الثانيه وهو يطقطق بجواله
مشت بكل قهر سحبت جواله : طالع فيني !! استند بذراعه اليمين ع فخذه اليمين رفع عيونه : نعم!
قوست ثغرها بخوف انه ممكن يعصب عليها تحاول
تستعطفه بنبره رجا : خلـ..هم يجيبون شنطتي
نزل نظرات عيونه ع جواله بايدها لجزء من الثانيه
ثم رفع عيونه لها خافت من نظراته لاشعورياً نزلت جواله ع الكوميدينا ورجعت لمكانها
سيف : تبيني انكد عليك ليلتك ؟
هزت راسها بلا !
قام وطلع للصاله شهقت ولحقته وهي يالله تمشي بدون
راحه من قوه ما الفستان ضيق من تحت :
والله يالله امشي عاد ارحمني خلهم يجيبون شنطتي
رن الجرس وقفت ميهاف بمكانها اما سيف تجاهلها
وفتح الباب وقف القرسون وسحبها ودخلها شهقت
براحه لما شافت الشنطه قفل سيف الباب و مشت
بسرعه للشنطه طالعها بطرف عينه : هاذي اللي يالله تمشي !!
مسكت الشنطه وهي تحاول تسحبها رفع حاجبه : ع اساس انك تقدرين تشيلينها ! وخري
قرب بيمسكها الا دفته : لا لاتلمس اغراضي انا بسحبها بنفسي ما احتاج مساعده احد !!
طالعها بنظرات ازدراء : احسن وفرتي علي
ومشى
اما هي من وراه تحاول تسحبها م قدرت !
#يتـــــــــــــــــــــــــــبع....
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!