رواية قرية المنسيين الفصل الثامن 8 - بقلم السيد عبدالكريم

فات 6 شهور منذ زواجي ، وخلال الشهور دي حصلتْ أحداث رهيبة ، هبدأ معاكم بالآنسة نورا ، نورا اختفتْ من ساعة ما عرفتْ إني هتجوز ، سألتُ عنها كذا مرة لدرجة إني رحت بيتها ، بس رفضتْ تقابلني ، مش عارف سبب زعلها ، بعد ما تعودت على وجودها جمبي وبعد ما كانتْ ديما تقولي كفاية إني أكون جمبك يا دكتور ، بعد كل ده اختفتْ ، وعم متولي قالها صريحة في وشي ، لمّا طلبتُ منه يكلّمها ويخلّيها ترجع الشغل في المستشفي قالي بكل صراحة :

ـ من الأخر يا دكتور هي مش عاوزه تشوفك تاني ... دي رسالتها ليك .

وهنا بدأت أخمن إن لو حد عمل لي سحر ساعة ما فقدتُ خصلة من شعري فأكيد السحر ده علشان نورا تبعد عنّي ، بس عامة أنا مكنتش فاضي علشان أدوّر عليها اكتر من كده ، وكنت غايب فى حياتي الجديدة ، الحياة الزوجية .

لمّا قابلت الأستاذ رأفت علشان يساعدني في دخول بيت الغمرواي كان رافض في الأول بس مع إصراري اعترف قدّامي إنه خبير له خبرة كبيرة في عالم العفاريت ، وفعلا قدر إنه يثبت كده بجدارة ، ولمّا دخلنا بيت الغمرواي شفت غراب كان بيساعدنا على دخول البيت لدرجة إن الغراب ده هو اللى دلّنا على الصعود للطابق الثاني ، ولمّا سألت عم متولي قالي :

ـ دا مش غراب يا دكتور ... دا عفريت من خدّام الأستاذ رأفت .

عم متولي فهمني إن الأستاذ رأفت له مجموعة كبيرة من العفاريت بيشتغلوا عنده خدّام ، رغم إنه أنكر كده بس أنا اعتبرت ده تواضع مش إنكار ، وعشت في بيت الغمرواي بدون أي مشاكل ، لا عفاريت ولا أصوات ولا صراخ ولا تهيؤات ، البيت صرفت عليه مبلغ كبير بس قدرت أحوّله لقصر جميل تتدلي الستائر من شرفاته وتحوطه النباتات والأشجار من جميع النواحي ، عشت 4 شهور في سعادة لا توصف مع زوجتي جيسكا ،

أمتي بدأت المشاكل ؟

بعد الشهر الرابع ، بالتحديد لما مراتي قالتلي :

ـ ماما هتيجي تبات عندنا فترة هنا .

بصراحة رغم حبي لمراتي لكن كنت متحفظ في موضوع إقامة أمها عندنا ؛ لأن أمها شخصية صامتة لدرجة غريبة ، عمرها ما سألتْ عننا ، عمرها ما أتكلمت معايا غير عبارات الترحيب وبس على غرار

( ازيك ؟ عامل إيه ؟) وبس ،

وكنت بسأل مراتي عن سر غموض أمها وكانت مراتي ترد ديما بجملة واحدة :

ـ هي ماما كده .. طول عمرها في حالها .. متحبش تدخل نفسها في اللى ميخصهاش ...ما دى زي النسمة .

المهم وافقت إن حماتي تيجي تُقيم عندنا فترة ، وجهزنا اوضة ليها ، ولسه فاكر اليوم اللى جات فيه البيت عندنا وهي تحمل حقيبة جلدية كبيرة الحجم ، جات الساعة 4 بعد الظهر ، واستقبلتها أنا ومراتي ورحبنا بيها .

وجات ساعة الغدا ، مراتي حضرت الغدا وانتظرتُ خروج حماتي من غرفتها علشان تاكل معانا ، بس حماتي مطلعتش ، سألتُ مراتي :

ـ هي مامتك مش هتاكل ولا إيه ؟

أجابت :

ـ لا مش هتاكل .

قلتُ :

ـ ازاي كده ؟ ميصحش ..يعني تقول علينا إيه ؟

قالتْ :

ـ سيبها فى حالها يا راغب .. هي تحب الوحدة ... وبتتحرج شوية ... بس لما تحب تاكل انا هجهزلها أكل .

طنشت الموضوع وقلت في نفسي جايز تكون محرجة شوية أو مش حابة تحسسنا بإنها تقيلة علينا ، ولما جه وقت العشا تكرر نفس الموقف ، حماتي رفضت تاكل معانا ، ولمّا سألتُ مراتي المرة دي قالتْ :

ـ أكيد جايبة أكل معاها .

الإجابة مكنتش منطقية طبعا بس أنا طنشت كالعادة ، وفات تاني يوم من غير حماتي ما تخرج من اوضتها ، كنت مستغرب أوي وبدأتُ أفكر :

( طيب حماتي لو جايبة معاها أكل وبتاكل في اوضتها ، ازاي مدخلتش الحمام خالص من ساعة ما جات ؟!!! دي حابسة نفسها في الاوضة من ساعة ما جات )

طبعا لو سألت مراتي هتقول نفس الاسطوانة

( ماما زي النسمة والكلام ده ) .

علشان كده مسألتش .

الموضوع بدأ يثير قلقي وخوفي في نفس الوقت ، خاصة في اليوم الرابع بالليل كانت مراتي نايمة وأنا صحيت وكنت عاوز أعمل كوباية شاي ، رفضتُ أصحّي مراتي ودخلتُ المطبخ أعمل لنفسي شاي ، وأول ما حطيت رجلي في المطبخ الكهربا قطعت ، ولعت شمعة وولعت البوتاجاز ، كانتْ الإضاءة قليلة والظلام شديد ، وبدأتُ أدوّر على علبة السكر في كل مكان بدون فايدة ، ساعتها لقيت ايد واحدة بتتمد ناحيتي بعلبة السكر وبتقول :

ـ تفضل يا حبيبي .

أخدت منها السكر وقلتلها :

ـ انتي صحيتي ؟

لم ترد وغادرتْ المطبخ ، الموقف فات في ثواني معدودة ، بس الموضوع مش محتاج ذكاء ، دي مراتي أكيد صحيت لمّا الكهربا تقطعت وجات المطبخ وناولتني علبة السكر لمّا شافتني محتار ، عملت الشاي ورجعت اوضة النوم والكهربا رجعت ، الغريب إني لقيت مراتي في سابع نومة ، أومال مين اللى ناولتني السكر دي ؟!!!

وهنا بدأتُ أركز ، بدأتُ أركز في الست اللى شفتها في المطبخ ، عصرت عقلي ورحت أسترجع الموقف ، السيدة اللى أعطتني علبة السكر مش مراتي ، دي أمي الله يرحمها ،

أيوه أمي ،

نفس صوت أمي ،

حتي وهي بتخرج من المطبخ لمحتُ ثوبها اللى كانت لابساه ، مكنتش الإضاءة قوية ، بس دي ملابس أمي اللى كانتْ لابساها يوم الحادثة اللى ماتت فيها ،

بسم الله الرحمن الرحيم ،

الموضوع كده بقى جنان ، كان لازم أتأكد هل أنا لسه بعقلي ولا اتجننت ،؛علشان كده صحيت مراتي وسألتها :

ـ جيسكا ... حسيتي لمّا الكهربا تقطعت ؟

أجابتْ وهي تعود للنوم في كسل وبصوت متقطع :

ـ كهربا إيه بس ياراغب ... أوووووو ...سيبني أنام بقا .

فات أسبوع وحماتي مخرجتش من اوضتها ، وطبعا بطلت أسأل مراتي عنها وعن سر بقائها في الغرفة ، بس هتجنن ، ازاي هي قادرة تقعد فى الغرفة اسبوع كامل بدون أكل ولا دخول الحمام ؟

علشان كده قررت إني أعمل خطة ،

بالليل لمّا تأكدت إن مراتي نامت سرت على أطراف أصابع قدمي ناحية الصالة ، وقدّام باب اوضة حماتي وقفت ، حسيت بطاقة سلبية غريبة ، وفجأة النور قطع ، طرت مترين في الهواء من الرعب ، اشمعنا النور قطع في الوقت ده بالذات ؟!!!

الغريب إني شفت ضوء طالع من تحت باب اوضة حماتي ، ازاي طالع ضوء زى كده والبيت كله ظلام ؟!!!

أنا طبعا رفضت أولع اى إضاءة علشان مراتي ولا حماتي ميعرفوش إني هنا بتجسس ، المهم قررت أرجع لاوضتي ، بس قبل ما أرجع سمعت صوت حماتي بتتكلم ، كان صوتها خافت وبتقول كلام غير مفهوم ، وحسيت أنها بتكلم شخص معاها ، وبعدها الصوت اختفي ، كانت كل حتة فى جسمي بترقص رعبا ، مشيت بسرعة ناحية اوضة النوم ، بس قبل ما أترك الصالة لمحتُ خيال شخص غريب في الظلام ، الشخص ده ظهر في لحظة واختفي ، كان نحيف ووجه مجعد ، الراجل اللى شفته ده كان هو الراجل بتاع القصب اللى شفته في موقف السيارة لحظة قدومي سوهاج لأول مرة .

جريت بسرعة ناحية اوضة النوم وأول ما دخلتها الكهربا رجعت ، مراتي صحيت علي صوت دخولي ولقيتنى مرتبك وبتعرش وفضلت تسألني عن السبب ، قلتلها :

ـ حسيت بتوتر شوية لمّا النور قطع فجأة .

كانتْ إجابتي غير منطقية زى ما انتو ملاحظين ، بس مراتي عادتْ للنوم وفضلت أنا سهران لحد الصبح .

تاني يوم رحت بيت رأفت بس للأسف مكنش موجود ، وواحد من جيرانه قالي :

ـ سافر القاهرة مع بنت اخته .

هنا تذكرت إن الأستاذ رأفت بيسافر كل فترة للمقطم يدوّر على ثغرة تنقله لعالم تاني ، وهو معرّف الناس هنا إن بانسيه تبقي بنت أخته وجاية تعيش معاه هنا بعد ما أبوها وأمها ماتوا ، طبعا رأفت كان بيحسبني هصدق الكلام الأهبل ده ، بس الموضوع أعقد من كده ، أكيد هو اكتشف مستعمرة من العفاريت في مكان ما وهو بيحكمها بحكم خبرته في الأمور دي ، عم متولي قالي إنه بيحكم طائفة من العفاريت في المقطم وبيسافر ليهم كل شهر يُلقي عليهم تعليماته ويصدر أوامره ، ورغم إن الكلام ده يشبه الهبل بس رأفت دا مش سهل وشكله وراه أسرار كتيرة ، بس دا كله لا يهمني ، المهم إني أخلّيه يساعدني في حل لغز حماتي زي ما ساعدني يطهر بيت الغمرواي من العفاريت بصحبة الغراب الخادم .

رجعت البيت وبعد جدال طويل أقنعت مراتي إني لازم أجيب حد يرش الطابق البيت من حشرت الحقول ، الجدال أخد وقت طويل ؛ لأن مراتي مكنتش مقتنعة ، بس في الأخر وافقتْ ، وأكيد عرفتوا ناوي أعمل إيه بالضبط .

لمّا جه يوم الثلاثاء صباحا كان فيه موظف من الشركة عندي في البيت ، وطلبتُ من عم متولي ياخد مراتي وحماتي لغرفة المبيت في المستشفي ، وبقيت وحيدا في البيت مع الموظف ، تركتُ الموظف يقوم بشغله بعد ما شرطت عليه يرش الصالة فقط ، ولمّا انتهي من رش الصالة خليته ينزل الطابق الأرضي ، وتوجهت أنا بسرعة إلى اوضة حماتي ، فتحت الباب في بطء ، وشممت رائحة ريش محترق ، كانت ريحة غريبة مقززة ، وشفت رسوم ونقوش على حيطان الغرفة مكنتش موجودة من قبل ، وشفت كتاب أصفر اللون والأوراق ملقي بجوار السرير ، لمّا فتحت الكتاب حسيت برهبة غريبة ، وكانتْ صفحات الكتاب تهز بين يدي المرتعشتين ، مفهمتش ولا كلمة من اللى في الكتاب ، هنا الموظف نادي عليا بعد ما انتهي من رش الطابق الأرضي ، اديته فلوس وشكرته وعدت لغرفة حماتي تاني ، وفضلت أدوّر في كل حتة في الاوضة ، مكنش فيه حاجة غريبة غير النقوش والكتاب والرائحة النتنة ، أعدتُ الكتاب مكانه وقبل ما أخرج من الغرفة لمحتُ تحت السرير جزء من الشنطة اللى جات بيها حماتي ، المفروض الشنطة دي فيها ملابسها ، بس إحساسي وفضولي خلوني أرتكب أكبر خطأ في حياتي ، سحبت الشنطة من تحت السرير ، وفتحتها ، ولقيت فيها 11 جمجحة بشرية ، وعلى كل جمجمة مكتوب عليها اسم صاحب الجمجمة بخط أحمر يشبه لون الدم ، وفضلت أقرأ الأسماء ، كانت أسامي رجال ونساء ، بس أكتر أسماء لفتوا انتباهي

( سعيد ) ،

( زهرة ) ،

( شعبان ) ،

طيب ليه الأسماء دي بالذات هي اللى أثارتْ انتباهي وفزعي ؟

لأن سعيد يبقى اسم والدي ،

وزهرة اسم والدتي ،

وشعبان هو نفس الجمجة اللى اخدتها من الراجل بتاع القصب ، أفقت من خواطري لمّا سمعت صوت مراتي وحماتي وعم متولي قد عادوا .