رواية #قصة_هديل الفصل الثالث عشر 13 - بقلم غير معروف

المرحله الاولى بالكليه جانت احلى مرحله رغم ظروفنا وخلافاتنا العائليه بس جان علي ويايه كل يوم اشوفه وكل يوميه ناخذ صور فوتغراف حتى بيوم المريضه هم جنت اداوم ذكرياتنا بهاي السنه متنسي ميروح من بالي شلون احتفلنا بعيد الحب ولا اكدر انسى شلون رسمنا احلامنا والدنيا تزخ مطر علينا حتى اسم اول بنوته النا اختارينا (رنس معناه بذره الحب) شكد جنت احبه من يكلي ام رنوسه 😍😍
ومره اخذني ويه كروبهم سفره لجزيره بغداد رحنا تغدينا هناك ووره الغده بقينا كاعدين اني وعلي وسجى وصديق علي وخطيبته وبيومهه علي جان جايب الكيتار وكعد يغني صغيره جنت وانت صغيرون هاي اغنيتنا المفضله صارلنه اني وعلي 7 سنين حب ولا غيرناهه علي وصل لحد مقطع ومن الصغر لما يكبرون ...صديقه كال ان شاء الله لحد ما تعجزون مو بس تكبرون سجى كالت شنو الموضوع علي; لزم ايدي وكلهه هاي اغنية هدوله دائما اغنيهه الهه اني كتلهه اصلا هاي الاغنيه احسهه كتوبهه وغنوهه النه اني وعلي ....هيه ضاجت وعافتنه.... الله ع الذكريات
مابقه شي وتخلص السنه وبدت تحضيرات التخرج مال علي طلعنا اني وياه واشترينا قاط التخرج والرباط والحذاء تكرمون.. جماعته لبسو رباط احمر بس اني اختاريتله رباط ذهبي مطفي ويه القاط الاسود والقميص الابيض فدشي واخذتله هديه ساعه ذهبيه ونظاره اطارهه ذهبي
وبيوم صوره التخرج جان طالع احلى واحد كلش انيق عيوني دمعت من شفته; اني بيومهه لبست فستان اسود والشال والحذاء تكرمون ذهبي وجابلي ورده وحده بيضه واخذنه عدد هائل من الصور
وبيوم حفله التخرج مال القاعه ما قبلت اروح وياه لان خاف يجي عمي بس هوه مقبل كال لازم تجين ويايه وابويه مراح يجي هديل اريدج بهاي اللحضات ويايه ومتعوفيني .. كتله اوك رحت وياه وجانو جايين بس خاله ومصطفى وخطيبه مصطفى ....نسيت اكلكم مصطفى خطب واكيد احنا ما رحنا وياهم بالخطوبه 😢😢
خالتي خطيه بس تبجي من شافتني بالحفله كالت انتو شنو ذنبكم الصار صار وانتو وكعتو بيهه
المهم علي تخرج واني نجحت
طول العطله مخلصيهه بس ع الموبايل ما اكدر اشوفه ويشوفني وعلي بهاي الفتره ميحجي ويه ابو نهائيا مصطفى اخو علي تزوج وما رحنا بعرسه اخويه علي وايه صار عدهم بنيه وسموهه ملاك ...احمد اخويه خطب مريم صديقتي بس بعدهم مو خطوبه رسمي بس حاجينا اهلهه
خلصت العطله وبديت دوام بالثاني بس هالمره الكليه كئيبه ولا اتمنى اداوم علي ما موجود ويايه وكل مكان اروحله اتذكره بي صرت يوم ادوام ويومين اغيب
ومره المغرب دك عليه التلفون رديت وخالتي تبجي كتلهه خاله شكو شصاير كالت علي تحاجه ويه عمج علمود موضوعكم كله الى متى نبقى هيج وظل يصيح وعمج ضرب علي وهذا طلع من البيت خاف يسوي شي بروحه فدوه خاله احجي وياه
انوب اني ادك وادزله رسايل فدوه بس احجي ويايه بس كلي الو وماكو ولا يرد صار الليل وهوه ماكو طول الليل كاعده بلكي يحجي ويايه اجه الصبح ادك يمعود بس رد عليه اخير شي رد عليه كال هديل عوفيني اني من اشوف نفسي اكدر احجي اخابرج كتله ماشي بس المهم انت سالم ومابيك شي كال مابيه شي
وره يومين خابرني الصبح اني جنت احضر بنفسي اريد اطلع للدوام كال هديل تعالي تلكيني واكفلج بره اباب الجامعه كتله ماشي رحت بالخط لكيته واكفلي والدنيا بيومهه مطر صادف نهايه شهر ال11
أجر تكسي وصعدنا اخذني لمطعم حتى نتريك هو بس صافن عليه ومياكل كتله علي احجي لتظل هيج كال شوفي اني راح اجيج من الاخير اني بعد ما اتحمل اعيش هنا كتله يعني شنو تريد تعوفني وتروح كال خليني اكمل .. صديق ابويه بالخارج عنده شركه مقاولات ومحتاج مهندس واني من اول ما تخرجت هو حاجاني وكلي تعال يمي حتى اذا تريد تكمل ماجستير هم تكدر بس اني بقيت هنا علمودج و يوميه اكول بلكي الوضع يتحسن وشوفي الوضع شلونه ابوج وابويه ميتصالحون الا اذا وكفو ع كبري ..
كتله والحل شنو
..كال الحل تجين ويايه حتى دراستج هناك تكمليهه كتله علي ما اعرف شرد عليك اني انصدمت من كلامه وهو جان بحاله فدمره تعبانه كتله خلي افتح الموضوع ويه امي وبلكي تحاجي ابويه ويصير خير
كال هديل احجيلي من الاخير لتشلعين كلبي اذا ابوج ما وافق تتخلين عني ؟؟؟؟......... تااااابع