رواية #قصة_هديل الفصل الثاني 2 - بقلم غير معروف

بيومهه اني ما كلت لماما نروح لبيت عمو اجه احمد كال تروحين ويايه لبيت عمي كتله لا حاره مابيه حيل اطلع

مر اسبوع واني ما رايحتلهم يجي علي ويه خالتي يشوفون امي ووين ما اروح يباوعلي انوب مدري شبيه بس ارتبك حتى مشي ما اعرف امشي;ماما صارت احسن كالت اليوم خالتكم عازمتنه ع العشا يلا كومي بدلي خلي نروح كتلهه لا اني ما اريد اروح كالت ولج علمودج مسويه فطائر وبسبوسه تدري بيج تحبيهن كتلهه ما الي خلك كالت انتي شو شبيج هالايام خانسه وما الج صوت احجيلي شصاير كتلهه ماما شنو السالفه اضحك واكمز تكولون طفله اسكت تكليلي خانسه مابيه شي كالت الله يهديج بس كومي روحي ويانه لان كلنه راح نروح تبقين وحدج الكهرباء تطفه والمولد اليوم عطلانه والدنيا كلش حاره كتلهه ماشي

كمت بدلت ورحنالهم سلمت عليهم وكعدنه بالصاله اشو هذا علي شغل اغنيه الاماكن كلها مشتاكه لك خررررررب وجهي صار ينطي الوان وظل بس يباوعلي

اني ما اعرف ساعه احس روحي فرحانه وساعه اضوج لان علاقتنا مو مثل قبل مكضيهه صفنات ونظرات وين قبل جنا كله ضحك وشقه هسه احس اكو حاجز بيناتنه وبنفس الوقت حاسه بخوف اخاف اهلنا ينتبهون علينه اني ما اعرف شنو ردة فعلهم بدون ما اعرف خايفه من شفته يباوعلي عفته ورحت للمطبخ حضرت العشا ويه خالتي وامي ورحت كتلهم تعالو تعشو اني من كد ما مرتبكه ولا اكلت وكلهم كلولي شبيج اليوم مو طبيعيه كتلهم لا مابيه شي بس احس روحي مريضه ماصدكت خلصو

عشا اريد اهلي يكومون ماكو جلبو بيت عمي بعدين عمي كال ابقو باتو يمنه اكيد ماكو مولد اليوم ما صلحوهه اني كمزت كتلهم لا خلي نروح كلهم صفنو عليه بابا كال شبيج ولج كتله لاماكو شي بله اجه حرامي للبيت شلون واليوم اريد نصعد اني واخواني انام بالسطح كالو ماشي رجعنا للبيت واني الليل كله مانمت بس افكر شنو اسوي اخير شي قررت اسمع كلام لعلي اكله انت اخويه ومن هالحجي مر يومين اني ما شايفته اليوم الثالث اجانه وجايب ويا تفاح اخضر

وكوجه حامضه مخليهن ع السنك ماما بالدوام وبابا بالشغل احمد بالمطبخ وعلي بالطرمه دخلت للمطبخ احمد كال شوفي علي شجايب فدشي تحبي كتله الله اموت عليهن يمه فدوه لعلاوي يعرف اخته شنو تحب علي سمعني كال عليمن تقصدين اني لو علي اخوج كتله ماكو فرق اثنينكم اخواني وعيوني الي اشوف بيهن اشو هذا كلب خلقته وطلع احمد صاح وراه علي علي وين رايح كله تاخرت اريد اروح ; مر اسبوع واني ما شايفه علي ماما كالت خلي اليوم نعزمهم ع العشا كتلهه

اوووف ماما خلينه مرتاحين كالت ولج شبيج كالبه ع بيت خالتج كتلهه مو كالبه عليهم بس تعالي اوكفي بالمطبخ وسوي عشا واني ضايجه كالت لتسوين شي ابوج يجيب كباب ودجاج شوي ونفضهه اذا بيج حيل سوي بيتزا كتلهه ماشي اني سويت بيتزا وكيكه وجهزت العشا وهمه اجوي بس علي ولامنتبهلي سلم عليه من وره خشمه خلينه العشا ودنتعشا خاله ومصطفى كالو البيتزا كلش طيبه ماما كلتلهم هدوله سوتهه

جان علي يكل لامي خاله حتى لو تعلمت طبخ محد ياخذهه ضاله ع كلبكم وكامو يضحكون اني ما سكتت كتله ولله اذا اليجوني مثل حضرتك ما اتشرف بيهم اضل يم اهلي احسنلي كال انتي مصدكه يجيج واحد مثلي اني ما الي مثيل عمو صاح بينا كال شبيكم اليوم كله متشوف السانهه اطول منهه ردت ارد علي بابا كال وتالي تسكتين لولا وهوه راسم ع وجهه فد ابتسامه خبيثه اتشمت بيه مرت ايام وهوه يعاملني باسلوب خبيث ويحاول بس ينرفزني اني جنت احاول اجنبه رجعت

المدراس والتهيت بتحضيرات الدوام  وحيل فرحانه دخلت للمتوسطه صرت اول متوسط حسيت بنفسي كبرت ومرت الايام بسرعه ونجحت للثاني متوسط واخويه علي ومصطفى ابن خالتي نجحو وتخرجو من السادس اعدادي وسوينالهم حفله وجابولهم طبل بالشارع وامي وخالتي يهلهلن ويطشن بالجكليت كلش فرحنا بيهم ...

صرت ثاني متوسط وعلاقتي نفس الشي ويه علي علاقتنا جافه وكلمن بحاله يوميه اروح للدوام وارجع انظف واعزل واطبخ ويه ماما وادخل لغرفتي اسد الباب واكعد ادرس بس يوميه علي يجي ع بالي والى متى يبقى هيج يتصرف ويايه ...

ومره بعطله نصف السنه رحت لبيت خالتي حتى اساعدهه عدهه تعزيل بالبيت دنعزل اني وياهه عدهم ميز بس حيل ثكيل كالت روحي صيحي علي خل يجي يشيله رحت داصيحه لكيته يحجي بالموبايل ويه وحده ويكلهه هااا حبي ولله جنت مشغول مشتاقلج هوايه .... اني بدون وعي صحت بي حيل بكل صوتي كتله علي كوم امك تريدك هو ارتبك وكال هسه اني جاي .....

ماصدكت اكمل تعزيل وارجع للبيت احس بنفسي اختنكت ما اكدر اتنفس فدشي ياكل بكلبي اكل رجعت وصعدت لغرفتي واني مختنه احجي ويه روحي هديل شبيج كل عقلج شعليج بالولد مو انتي الي منطيتي فرصه بس ماكو فايده نفس الخنكه والدمعه بطرف عيني ...... تابع