رواية قصة شوق وسلفتها الفصل الثالث 3 - بقلم غير معروف

شوق قالت للشيخة: انتى بتقولى إيه معقول خلاص خلاص انا هلبس وهحاول اكون عندك دلوقتى. وشوق قالت للشيخة انها عاوزه تكلم أمها وفعلا كلمتها واتفقت معاها انها هتكون عندها ولو حد سألها هى تعبت تانى. وشوق خدت صينية الشاي وخرجت وقدمت الشاي لحماتها وأميرة سلفتها. أميرة: ايه ده هو انتى مش هتشربى شاي معانا؟ شوق: انا لسه ماما مكلمانى وتعبانة اوى ولازم أروحلها دلوقتى. الحماة: مش انتى لسه راجعة يا شوق؟ شوق: تعبت تانى يا ماما. الحماة

بصت لشوق واتعوجت وقالت: طيب ابقى سلميلى عليها. شوق: حاضر حاضر. وشوق كانت ملهوفة اوى على تفسير الحلم ونسيت انها حطت برشام الهلوسة فى كوباية أميرة وكوباية حماتها ومخدتش بالها كل اللى شاغل شوق الحلم وطلعت شقتها ولبست هدومها ونزلت جرى ع بيت أمها وفى الطريق قابلت فاطمة. فاطمة: مالك يا بنتى بتجرى كده ليه وشكلك مخضوض؟ وقالت بصوت واطى ووشوشة: شكلك حطيتى برشام الهلوسة لسلفتك؟ اوعى تكونى خايفة يا شوق. شوق:

اه حطيته فى الشاي بس فى حاجة مهمة تانية. فاطمة: حاجة إيه؟ شوق: فاكرة الحلم اللى قولتلك عليه؟ فاطمة: قصدك الكابوس أعوذ بالله انا لما بسمعه منك جسمى بيقشعر. شوق: اومال انا أعمل إيه انا لما بشوفه بقوم مخنوقة عارفة لو مرة مش مشكلة هيبقى حلم زى أى حلم إنما على طول بحلم بيه. فاطمة: وايه دخل الحلم فى الهفتك دى ووشك الأصفر ده انتى شكلك مخضوض اوى. شوق:

ماما كلمتنى وكان عندها ست شيخة بس ايه قادرة وهتفسر الحلم هى قالت حاجة بس انا عاوزة اتأكد وبرضه خايفة 😢. فاطمة: شيخة ياااه انا بموت فى الحاجات دى انا هاجى معاكى. شوق: والصيدلية؟ فاطمة: فايز هناك ومعاه البت اللى هيخطبها واقفة معاه علشان كده مشيت هو بالمحسوس كده قالى أمشى. شوق: خلاص تعالى. وشوق وفاطمة راحوا ع بيت مامة شوق ووصلوا البيت وطلعوا وشوق خبطت وأم شوق فتحت وشوق قالت: ماما هى فين ست الشيخة؟ الأم:

فى الصالون ادخلى هى قاعدة جوه مستنياكى من بدرى. شوق: تعالى ادخلى يا فاطمة معايا. الأم: ازيك يا فاطمة عاملة إيه يا بنتى ربنا يسعدك وأشوفك عروسة. فاطمة: يارب يارب ادعيلى بقولك يا أم شوق هى الشيخة دى بتفهم فى الأعمال أصلى كنت عاوزة أشوف بختى مع انى عارفاه بس هجرب. الأم: اه دى سرها باتع وبتشوف وكمان بتشوف الفنجان. فاطمة: طيب كويس. شوق: بطلى رغى يا فاطمة الشيخة مستنية جوه. وشوق دخلت ع الشيخة وقالت:

السلام عليكم يا ست الشيخة. الشيخة: وعليكم السلام تعالى يا شوق اقعدى. وشوق قعدت وقالت: تعالى يا فاطمة. الشيخة: مين دى؟ فاطمة: انا صاحبت شوق وفى مقام أختها انا تقريبا مليش غيرها. الشيخة: عندك حلم يا فاطمة؟ فاطمة: لا انا نفسى أشوف الفنجان لو حضرتك بتعرفى نفسى أشوف بختى مع انى عارفاه. الشيخة: محدش لى فى نفسه حاجة ومحدش يعرف بكرة فى إيه غير ربنا. شوق: انا عاوزة تفسير الحلم. الشيخة: احكيه وعاوزاه بتفاصيله. شوق:

انا بشوف انى لابسة فستان فرح أبيض وعروسة بس الفرح ساكت والغريب فى الحلم ان الناس بترقص من غير صوت انا مش سامعة موسيقى خالص بس كل اللى بيضايقنى انى قاعدة ع الكوشة لوحدى وبقول انا عروسة ومن غير عريس ومحدش سامعنى مع انى صوتى عالى وبقوم مفزوعة من النوم مع انى متجوزة. الشيخة: انا مش هفسر علشان لسه فى باقى للحلم. شوق: ازاي ده الحلم كله. الشيخة: يعنى أقولك انك هتموتى؟ شوق: أموووت؟ فاطمة: تموووت؟! بعد الشر؟ الشيخة:

الله أعلم بس خلى بالك من نفسك كويس. ايه يا شوق اتخضيتى ولا عاوزة أقولك كلام حلو انك هتخلفى مثلا ورزقك هيوسع؟ شوق: ياريت أخلف. الشيخة: ربك كبير. فاطمة: وانا؟ الشيخة: عندك حلم؟ فاطمة: لأ بس عاوزة أشوف الفنجان. الشيخة: انتى هتجيلى بيتى ولوحدك يا فاطمة علشان فى كلام كتير. فاطمة: كلام إيه الحقى يا شوق هى بتبرق كده ليه؟ شوق: فين ده دى شكلها عادى. فاطمة: انا عاوزة أتجوز ويتقدملى عرسان. الشيخة: قولتلك انتى هتجيلى بيتى.

فاطمة: مينفعش هنا؟ الشيخة: لا وقبل ما تيجى تكونى صايمة انتى فاهمة. فاطمة: حاضر بس امتى؟ الشيخة: خدى تليفونى وهتفق معاكى ع ميعاد وهتصل بيكى قبلها يلا قومى قومى. فاطمة: شوق هى بتزعقلى ليه؟ شوق: يا ست الشيخة انا مش مرتاحة عاوزة أعرف تفسير حلمى انا تعبانة. الشيخة: قولتلك لما يكمل تعالى وانا هفسرلك الحلم قومى يا بنتى. والشيخة حطت إيدها ع بطن شوق وقالت: انتى مخلفتيش ليه يا شوق لحد دلوقتى علشان أمك زعلانة عليكى اوى. شوق:

نصيبى كده انا مبخلفش بس انا عارفة ده ذنب مين وبتعذب بيه لحد دلوقتى. الشيخة: قومى يا بنتى روحى بيتك وخدى صاحبتك معاكى وخلى بالك ع نفسك. شوق: مع السلامة يا ست الشيخة ماما انا همشى علشان متأخرش يلا يا فاطمة. وفاطمة قالت بصوت عالى: هبقى أكلمك يا ست الشيخة. وقالت: طيب لما تتصل بحضرتك هو انتى اسمك إيه؟ الشيخة: هههههههههه أسمى عاوزة تعرفى أسمى؟ فاطمة: لو مش عاوزة خلاص. الشيخة: ليه هو سر انا أسمى صافية. فاطمة:

خلاص انا هسجله فى تليفونى الشيخة صافية. وشوق خدت فاطمة ومشيوا وروحوا ع البيت وشوق قالت لفاطمة فى الطريق: كان نفسى أعرف تفسير الحلم. فاطمة: الشيخة دى شكلها بتفهم أصبرى ع رزقك ده وهى بتبرقلى خوفت منها لا تعرف بالمصيبة اللى بنعملها. شوق: تصدقى وانا. شوق: ايه ده أشرف سلفى. أشرف: على فين يا شوق ازيك يا أنسة فاطمة. فاطمة: كويسة كويسة انا همشى يا شوق وابقى كلمينى سلام. أشرف:

هى مالها البت دى لما بتشوفنى بتجرى وبتتفزع مش قولتلك بلاش مشى معاها؟ شوق: كتر خيرها يا أشرف ماما كانت تعبانة ومحدش وقف معايا غيرها. أشرف: ألف سلامة مخدتيش أميرة معاكى ليه اه نسيت انها لسه والدة عقبالك وإن شاء الله ربنا يكرمك... طيب كنتى خدى حماتك يا ستى. شوق: حصل خير انت مروح البيت؟ أشرف: ايوه يلا. وشوق وأشرف راحوا البيت وأشرف قال: ايه ده هو باب السكة محدش قفله ليه دى الساعة عدت 8 بالليل. شوق: معرفش.

وشوق طلعت دخلت ع شقة حماتها وشافت حماتها قاعدة بتتفرج ع التلفزيون. شوق: ازيك يا ماما؟ شوق: ماما؟ أشرف طلع وقال: ازيك يا حجة مالك انتى تعبانة؟ شوق: معرفش شكلها مسهم مش عارفة فى إيه. الحماة: ههههههههههه ههههههههه الفيلم ده حلو اوى. أشرف: ده مش فيلم يا حجة ده برنامج. الحماة: هههههههه انا داخلة أنام بت يا اسمك إيه ههههههه انتى اسمك إيه؟ شوق: أشرف ماما شكلها تعبانة. أشرف: الظاهر كده. وأشرف أخد أمه ونيمها

فى أوضتها وقال لشوق: اطلعى نامى هى هتنام وهتبقى كويسة. شوق: انا هقعد معاها وهبات معاها النهاردة ما انا كده كده قاعدة لوحدى. أشرف: انا هدخل ومن وقت والتانى هبقى أجى أطمن الساعة داخلة ع 9 هدخل أكل لقمة انا تعبان طول النهار فى الشغل. شوق: نام انت وانا قاعدة معاها ولو فى حاجة هقولك بس هى شكلها كويس. وشوق قالت فى سرها: هى فين أميرة نفسى أشوفها هى شكلها عامل ازاي. أشرف: تصبحى على خير.

وأشرف دخل شقته واول ما دخل شاف بنته منه قاعدة بتلعب فى الصالة ودخل ع المطبخ ملقاش أميرة ودخل ع أوضة النوم وشاف ابنه عبدالله بيعيط وقال: أميرة فين؟ دى مش هنا. وخد ابنه ودخل ع شوق وقالها: خدى عبدالله فى كارثة مش عارف أميرة راحت فين.