رواية قسور والمهره شامه الفصل الحادي عشر 11 - بقلم أسيل

_شوفي واسمعيني زين ما أعيد كلامي مره ثانيه فتحي اذنج زين اليوم راح يجي سيد و يكعدون واهلج موجودين وحسب الأصول والتقاليد هم

شامه:يا أصول يا تقاليد انت غاصبني على هل زواج ما أريدك ولا اطيقك ما أريدك ما أريدك

_ هاا عاشكه محمد لازم

شامه: ههه يله اتهمني انت هم بعرضي بعد وكول مثل عدي واخذني ذلني مره ثانيه وثالثه تتصور راح ارجع احبك لو ارجع شامه الغبيه وأريدك اصلا كمت متخطر أبالي ولا أريدك ولا احبك اكرهك كله بسببك انت بسببك أحلامي شهادتي طموحي كلشي راح من ايدي لان وثقت بيك وانت متستحق اي ثقه اكرهك اموت منك

_راح توافقين ماشي قلبي

#الكاتبه

الله يرزقك كون نفس الوجع
من بعيد كون تشوفني ومنكسر
وتتمنى ترجع الي بخساره وطن
وانا على كد شونك ومنتصر

للشاعر محمد الطلقاني

رجعت لغرفتها بسرعه بس عافها جسمها كله يرجف فاتت نوال والضحكه تارسه وجهة ولزمت ايد شامه وكالت

نوال:اخيرا لج ما صدكت من سمعت فاروق راح تصيرين حرمته مبروك شنو راح تلبسين راح اطلع الج اني ملابس واحضرج صح مو حفله بس ميخالف والله نسوي الج حفله بس تهداء الأوضاع شويه

شامه:ما اريد اتزوجه ليش محد يسمع الي

فاتت فيروزه وبقت كاعده شامه ما كامت الها جسمها يرجف ومشت فيروزه وكالت

فيروزه:ما يتم هل عرس

شامه:ولا اني أريده يتم احجي ويه ابنج وكوليله ما ياخذني ويأخذ الي انتي تشوفيها مناسبه

فيروزه :ما رايدته ليش هو لعد رايدج

شامه :يجوز عاشكني ابنج ورايدني و ماعنده كرامه رفضته وهو لازك بيه

ضربتها راشدي كل قوتها وكعت على الجربايه شامه وضحكت ولزمت نوال فيروزه بسرعه فيروزه نقهرت من الي سوته بس ما رضت عليها تعلي صوتها وتحجي كبالها بهل طريقه وكال

قسور:يمه

فيروزه :لا تخليني اغضب عليك

قسور :يمه انا اختاريت اي انا عاشكها ما جذبت ورايدها وعاشكها قبل لا تفوت لهل بيت هي الي ردتها وردت احجي وصار الي صار يومها

فيروزه:اسكت اسكت لا تفضحنه ولك اسكت

قسور :يمه ارضي على هل زواج

فيروزه :لا

قسور :ورب الكعبه قسم بالله وحده اذا هل بنيه ما تصير حرمتي بعد محد يشوف وجهي بهل بيت واعتبري قسور مات يمه لا تسودننيني وانتي تعرفين هل بنيه وحابتها وما رايدتها تطلع من البيت ابوي راضي وكايلي على كلامج بالليل عنها لا تخبليني لا والله ارجع لبغداد وتحرم علي شوفه عتبة هل بيت

فيروزه:يمه استهدي يمه هدي

حجه بعصبيه ايده ترجف تعرف بيه من يعصب ويحلف على شي يسويه وما يتراجع بكلمته جان كلش عصبي وعيونه نكلبت دم لزمته فيروزه وبقت تهدي بيه وكالت اله الي يريده يصير اله مكدرت تشوف ولدهة هيج صاير بيه طلع بقت متمدده بالفراش صار الليل وشامه بعدها متمدده بالفراش وفاتت نوال وكالت

نوار :شامه.. هاي بعدج كومي ابوج جوه وياه حسام و

بس سمعت اسم حسام كامت بسرعه تعثرت و وكعت رجعت كامت ونزلت وشافت حسام كاعد بنص الولد ضرغام موجود والولد هم بس ابو حسام و امه ماكو مشت وشافت قسور يم عدي  كاعد  لزمت حسام من ايده وسحبته بالكوه كام وكال

ضرغام:هدي بنتي بس افهمي

شامه: حسام وجهك ما اشوفه هنا

ضرغام :بنيتي هدي

شامه:ما اريد اشوفه ما أريده هنا خلي يطلع

عصبيه جانت وترجف لزمها قسور و سحبها وصارت بضهره وكال

قسور:فوت ولك الأمان واذا احد تعرض الك من اهل البيت لك الحك ادوس راسي برجلك

حسام :حشاك شيخ استغفر الله

ضرغام :ابوك ما اجه بس لا زعلان مني

حسام:لا والله شيخ بس بالفراش وامي ظلت وياه

ضرغام :انا ازوره باجر

ابو شامه:على راسنه شيخ كل الهلا بيك

ضحكت شامه التفت قسور الها صح ضحكه قهره وغصه بس اشتاق الها بقت تضحك وزادت بضحكها والدموع تنزل من عينها وصفكت وكالت

شامه:انتو ناصبين عليه تحجون صدك يعني؟ هيج هسه صرتو أصدقاء

ابو شامه:بويه انتي الي اختاريتي مابيدي شي اسوي ضلج هنا والله احسن الج

شامه :اي.. اي

مشت وكعدت وتباوع على حسام وعدي وبقو البقيه يحجون ماكدرت تسكت وكالت

شامه :شنو الي صار وصرت ضحيه

بقو يباعون عليها حسام نزل راسه وكال عدي وهو يضرب على رجله

عدي :هل كلب ابن الكلب عوقني

كام قسور وضرب عدي راشدي كل قوته كامت بسرعه فيروزه وصاح ضرغام بيها

ضرغام :كعدي ولا تحركين رجلج

قسور:اذا ما تتعلم بالحجي انا اعلمك اطلع منا ولا تشوفني ركعة وجهك

طلع بسرعه عدي ورجع كعد قسور كامت شامه بسرعه وكعدت كبال حسام يم رجله باوع عليها وضحكت بوجها وخلت ايدها على وجه وكالت وهي تحرك بأيدها على وجهة ومبتسمه

شامه :قلب شامه انت احجيلي ليش سويت هيج لا تكول لحظه عصبيه بس فهمني ليش اني سويت الك شي حسام بس كول الي شنو سويته لا تكول لحظه عصبيه وعوقت عدي فهمني اني باقيه هنا ما أكدر بعد اروح لمكان صارت سمعتي بلسان كل واحد يسوه ومايسوه شوف بس شوف عليه وكولي لفلان شغله ضربته وعوقته وصرتي مرته واطلكت وراح ياخذني واحد ثاني ابوس رجلك ريح قلبي

ماحجه شي ضربته على صدره اكثر من مره بقت تبجي الكل منزل راسه كعدت بالكاع وكالت

شامه:هيج ماعندي خاطر عندك راح اتزوج مره ثانيه راح ارجع اتوجع الف مره باليوم لك ضيعت حياتي حسام ضيعتلي حياتي

حسام :الشيخ قسور كال انتي بأمانته راح يعتني بيج خوش انسان

شامه :بابا فدوه انت زين انت متعرف

قسور:كومي كافي عيب هل تصرفات ما تليق بيج

شامه :وهل تصرفات تليق بشيخ مثلك تاخذ وحده غصب؟

قسور:اي تليق يله كومي

ضحكت مسحت دموعها وكامت اجه فاروق سلم على الكل ومن ضمنهم ابوها وحسام وكال

فاروق:السيد بعد دقايق يجي والشيخ ضرغام الله يطيل بعمره موجود مبروك خيتي

شامه:شنو صاير فاروق بغلاة نوال وسويره احجي انت فهمني

مرت ساعات عقد السيد عليها وضرغام هم وصارت حلاله و فاروق خلاه يوقع وهي هم وهو راح يتكفل بموضوع المحكمه وهاي مرت ساعات وهي كاعده بجناح قسور الكتب مالته مكتبه بقت صافنه ندك الباب وفاتت فيروزه وبقت كاعده صافنه تباوع بره الشباك سحبت كرسي فيروزه وكعدت كبالها واكو جيس قماش بحظنها خلت ايدها على شعر شامه وحركتها وكالت

فيروزه:تعرفين تشبهين امج حور

شامه :ها

باوعت شامه على فيروزه وفتحت فيروزه الجيس الي بحظنها بيه ذهب وأربع صور وكالت وهي تشوفها صوره قديمه ابيض واسود وبيها شابه صغيره تشبه شامه وفيروزه وبنات ٣ وكالت

فيروزه:هاي امج حور

شامه:تعرفيها تعرفين ماما

فيروزه :اي اعرفها جانت تدرس هني الطب من بغداد يومها خيتي كريمه الله يرحمها جانت مريضه وابنها عدي الي هو بحساب ابني نطش عليه مي حار واحترك وجان بين الحياه والموت بس امج سهرت ايام على راسه ورجعته وانطته عمر جديد بفضل الله وفضلها بقت هني سنين هاي كريمه خيتي الوحيده وهاي زوجة اخوي عمر فضيله وهاي زوجه اخوي الصغير خطاب هاي ابينه بأن ام محمد انا اصيح الها الصفيره ما تنبلع

شامه :لعد مو ردتي تاخذين نوران

فيروزه:يمه نعمت عيوني يوم شفتها مرت وليدي قسور السحاره عمتني ما حبيتها عايني هاي انا وكريمه وصبوحه

شامه:هاي عمه صبيحه عمتي

فيروزه:اي هي

بقت تباوع على الصوره بقهر وحسره وشوفة شامه بقيه الصور وشوفتها صوره الهم وياها امها وبيها ابوها وكالت

فيروزه:عايني ابوج جان عاشكها لحور أهلها رفضوه يومها اجه وهدد يكتلها اذا صارت لغيره اخذت كتله يومها امج من أهلها ورادت تحرك نفسها وتلاحكو الها مسودنه مسودنه هل ابوها وافق وخله السلاح برأس ابوج وهدده اذا بيوم زعلها لو صار الها شي يكتله وزوجناهم بيدنه يوم سافرو لبغداد هواي بجينه حسيناها خيتنه وراحت ايام وكلمن تلهى بحياته الله يرحمها برحمتة الواسعه طيبه وبنت اصل ماشفنه شي غلط منها

شامه :انتي وعمه صديقات

فيروزه :مو وكتها

شامه :احجي النبي عليج

ولزمت ايدها كعدت عدل وصار وجهة بوجه فيروزه رفعت فيروزه ايدهة وخلت ايدهة على الخد الي ضربته وكالت وعيونها غوركت بالدموع

فيروزه: أخ مني اخ... تحبين الحجي اي صبوحه اخ منها  صبوحه رويحه هلي مو بس صويحبه جانت بعدال خيتي كريمه رفيكه دربي ومن جنه فريخات نركض وره فروخ المنطقه بالطابوك لحد ما توفت كريمه قبل عشر سنين تخاربنه تعرفين لولاها جان انا ناهبه ويه ضرغام

شامه :ليش موافقو اهلج

فيروزه :جان ابن عمي ناهي علي وكتها فاتت صبوحه بنص ابوي واخواني وامي وابن عمي كريم وفرعت الحجاب وكالت الهم هل ناقص غيره وشرف تحارش بيها والسبيع مصطفى خلصها من ايده شون يزوجه الي وانا بعدني بعز شبابي وهو كدر ابوي عاد من عرفو الحجي كسرو عصاته (الي يسوي مكسوره يطلعوه من العشيره) وطلعو من العشيره يومها دكنه وتصوب ضرغام سوده بويهي هو ابن خالي يصير ومن كام بالسلامه طلبني وأهلي وافقو بويه جنت مسودنه بيه وصبوحه صاحبه فضل اشتاك الها ملكاها حلو بويه اذا كعدنه قبل و ضحكنه ما نسكت اله ننكتل من اهلنه

شامه: لعد شنو المشكله ليش تزاعلتو ليش ما تتصالحون

فيروزه :بعد موتت كريمه باسبوع تعاركنه انا وياها لان اخذت عدي وانا ردت اربيه وادفع فلوس لأبوه ويومها كالت ابوه استغلالي وانسان باطل جان يأذي كريمه وما خليت كريمه تطلك منه لان حبله ومرضت وماتت بسببه ولأن ما رضيت بطلاكهم والحين اخذ الطفل ادفع فلوس لابوه بس حته أخذه ما رضت بتصرفي صحنه وتعاركنه ويومها كلت الها لا تجيني بعد وحلفت ما تفوت ولا لساني يطخ لسانها للموت ريت الله اخذ عمري ولا اكول الها هل كلام

شامه :اسم الله عمرج طويل وتشوفين أحفاد احفادج لا تكولين هيج واني اعرف مراضيه على زواجنه بس والله مغصوبه وخلي يزوج علي اي وحده ترديها اني هنا

فيروزه :معززه مكرمه تبقين هني راسي يابس انا اعرف كلامي كسر قلبج بس يمه حسبيني عجوز وخرفيت انا بالنهايه بعدال امج اعصب واغلط ما معصومه انا بس حجي الناس يكتل وتذكريت يوم خذاني ضرغام وفكس عيون الكل كلهم حجو علي بس جان بظهري ودام ابني رايدج ما احرمه من شي ولا أريد اعيد غلطه كريمه وصبيحه واضل نادمه طول عمري وانا باقيلي يومين واتوكل على لله

شامه :لا لاتكولين هيج انا مرايده تره قسور

ضربت شامه على ايدها فزت وباعت عليها وكالت بعصبيه

فيروزه :اكسر راسج هذا اليابس هسه حرمته انتي من شني وليدي ناقصه شي حور العين تأخذه لا ترفعين خشمك والله اكسره

طلعت فيروزه سوارات ولزمت ايد شامه ولبستها ست سوارات وكالت

فيروزه:ذاك اليوم جنه  كاعدين على العشه من فتح الموضوع اول مره اشوف وليدي خفيف وطاير من كال عاجبته وحده ماجنت اعرف هي انتي ولا تخافين تره راح اسوي عرس الج هذا وليدي كرة عيوني وانا اريد افرح بيه وافرح بيج

شامه:لا دخيلج راح يحجون أشكال وألوان وانا قلبي وجعني أخذها ابن خالته طلكها ومعيوبه وهو ستر عليه ابوس ايدج ما اريد

فيروزه :والله لانعل ابوه لابو اهله الي يجيب سيره بنت حور ويمسها بكلمه وشعليج انا ما اخذ شورج انا اكول ويتنفذ الي اكوله هذني ما يطلعن من ايدج جانت صوغه امي الي والحين صوغتج صارت

شامه:ابقه لابستهم

فيروزه :اي

شامه :هاي كلهم مو هواي

ضحكت فيروزه وضربت شامه على ايدها و وكفت وكفت شامه وكالت

شامه:عمه ام قسور تره عمه صبيحه كل يوم تدعيلج بالصلاه

فيروزه:شني تدعي عليه

شامه:لااااااااا والنبي وداعه ماما لا بس اسمعها كل مره تدعي الكم بالاسم انتي و ماما وكريمه ونجيه ما عرفتها منو بس جانت تدعي الها

فيروزه :امي اسمها نجيه هاي ارتاحي بنيتي ارتاحي وباجر نوال تجيب الج الجهاز انا وصيتها

#قسور

خلصت كلشي بحسب القانون صارت مرتي طلعت من البيت والولد راحو وياي وحسام صار رفيكنه كاعد والكسره الي بقلبه باينه بوجها وكال

فاروق:صلي على النبي تره كلشي اله حل

_الي تريده فصله وانا البسه

حسام :لا تأذي شامه

_تبشر

كعدنه بالساعات نسولف رجعت للبيت ونوال جانت واكفه باب الجناح وكلت الها شكو جاوبتني امي جوه ردت افتح الباب وسحبتني أشرت الي لا الباب جان مفتوح شويه وسمعت كل الحجي معاذ بقه بصفي ونوال بس كسرت قلبي من كالت مغصوبه صح غاصبها بس والله رايدها ومن خوفي عليها من الناس وحجي الناس و .... طلعت امي شافتني دارت وجها بستها من راسها وكلت

_ارضي على يمه

فيروزه:نجب ولي

_يمه حبيبه قلبي

فيروزه:بوس ايدي

وخلت ايدها  كبالي بستها وضحكت وانطتني الثانيه بستها ورجعت بست راسها ضحكت وضربتني على صدري كالت راضيه عليه وطلبت ما اطلع الصبح ابقه يم مرتي والريوك والغده والعشه يصعد النه بقيت ساكت فتت للغرفه وتوها طالعه من الحمام ولابسه بجامه مني وبلوز غركانه بيهم ابتسمت بس شفتها منوره غرفتي قفلت الباب والتفت عليه...

🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤

هلا وهلا وهلا حبيباتي شونكم ان شاء الله بخير

ويارب تحبون هل بارت وتتفاعلون بيه حته افرح و انزل الكم بارت جديد 😀😀

ها شوني من اسويلكم سبرايس مفاجعه
١٩٥٦ كلمه والي تكول خلص بسرعه لو قليل ادج عينها بالقلم الجاف بعدين ادج نفسي 😂😂😂😂

ادج يعني اضرب او افوت القلم بعينها سمعتها ب الشارع وما تطلع من راسي 😂😂😂😂😂😂😂😂😂😂😂😂