رواية قسور والمهره شامه الفصل السادس عشر 16 - بقلم أسيل

بان : شنو ما كالو الج ام كوثر سفروها ولدنه لبغداد حتى تتعالج بس صارت حالتها اسواء وماتت كوثر طك قلبها وره امها وما كدرت تصبر حبست روحها رادت تنتحر اكثر من مره بس حسام جان شارف على حالتها ومانعها واليوم ماتت

ضحكت نوران ووكعت شامه الاستكانات انتجت على الميز بلعت ريكها بالكوه مشت للمضيف جان بيه قسور وكفت كبال الباب تريد تفتحه ايدها ترجف وكال حسام وهو بالكوه يكدر يتنفس

حسام:ما كدرت احميها ما كدرت شربت كل الحبوب وكالت هذا احسن النه حركت قلبي بويه ما عرفت شسوي الها قفلت الباب على روحها

قسور:انا... أ.. انا ما اعرف

ضرغام :ولك بويه شون تضمون هذا علينا انتو شون ما اجيتونه

حسين :انتو تعرفون شسويتو

مصطفى :ضميتو علينا شووون ولكم شووون

حسين :ولك قسور انا نطيتك بنتي امانه وجنت منطيها لواحد مغتصب ومخبل وانت دريت وسكتت

قسور :لا والشاهد الله ما دريت اله بعد ما طلكها عرفت من حسام هل حجي

حسام :انا ما حجيت خفت تنفضح بوست اديني ما احجي بويه انا ردتها والله حته كلت الها انا اخذج ما رضت وكالت انا بأمانتك وما كدرت احجي مو هين علي والله مو هين اشوف شامه مضلومه وكوثر مفضوحه ما دريت شسوي

ضرغام :ولد الكلاب انا غاضب عليكم وانت الكواد كلب ابن الكلب تضم هيج علي وانا الي ضلمت هل بنيه وضلمت بيت حسين ومصطفى وكسرت هل بنيه الله شون يسامحني

فتحت الباب وفاتت سدته الدموع تنزل من عينها كل جسمها يرجف الكل نصدم من شافهة وكفت كبال حسام ابوها راد يلزمها رفعت ايدها واشرت اله متريد احد يقترب منها وكالت بغصه

شامه:اني ليش صرت زوجه عدي

حسام :ش.. شا

شامه :اني ليش صرت مرته لعدي

صاحت بعلو صوتها وترجف نزل راسه كامت تبجي وشهكت لزمته من قميصه وصاحت بيه حته يحجي وتضرب برجلها الكاع مثل الطفله ضربته على صدره وتصيح

شامه :احجي... احجي... كووولي ليش

حسام:يومها عد.. عدي جان هو موجود اغتصبها ما كدرت ماكدرت امها تكوم من الفراش اغتصبها كبال امها جنت ماخذ الدوه الها لان ما اجتي للصيدليه... و.. و شفته جان السلاح بالكاع من خلص منها وهي تريد تستر نفسها بس.. بس جانت ما تكدر طلع كبالي ومفتخر بالي سواه كل شي جنت اريده هو اساعدها صعد بسيارته انا لحكته ضربت سيارته تعاركت وياه.. و.. وسحبت السلاح تعاركنه انا.. انا وياه وضربته بالغلط واليشهد الله ما ردت ياخذوج اله والله ما ردت واله هو ما ردتج هددني اذا احجي شي راح يفضح كوثر ومن.. من اطلكتي هددو ابوج اذا بقيتي يم بيت الشيخ لو صرتي اله راح.. راح يكتلونج لهذا قسور كال ما تطلعين من البيت وصرتي بحمايته ومرته و.. وكوثر اخذتها لبغداد امها نجلطت ما طولت عاشت جم اسبوع وماتت... كوثر والله كلت الها انا اخذج ومرتي ما قبلت اكثر من مره رادت تنتحر ومنعتها بس اخر.. اخر مره ما كدرت

حسام يحجي بغصه ما يكدر يطلع صوته ثابت مغبون خلت شامه ايدها على كصتها تناشغ مثل الطفله باوعت عليه وضربته راشدي على وجهة مشه قسور راد يلزمها دفعته كل قوتها ورجعت ليوره وباوعت عليه وصاحت

شامه :لكم انتو.. انتو شسويتو بيه.. لكم انتو تدرون شسويتو بيه.. اخ الله اخ يا اللله لك حسام تعرف لليوم ما أكدر انام اشوفه يم راسي يريد يذبحني تدري جم مره خلصوني من ايده لك حسام انت نهيتني بسوايتك هاي انت انت شسويت بيه مخه.. مخه اطشر بحظني وما ترضى تحجي لك اخ قلبي... قسور.. قسور ضميت هل شي وسكتت عليه ما كلفت نفسك تجي وتكلي واني اني اسئلك على كوثر تكلي بخير ما تحجي كل ما اسئلك تكول بخير زين ليش

قسور:ماكدرنه نحجي نخاف على سمعتها تصير بلسان الكل وهي طلبت من عدنه هل شي

تقرب منها ضربته راشدي كبال الكل عيونه صارت براسه مشه فاروق سحبه بسرعه هو ومعاذ سد ايده كل قوته وكالت وهي ترجف من العصبيه

شامه:لا انا مرتك ولا انت رجلي تطلكني طز واذا ما طلكتني شعره من راسي ما اطخها الله يشهد بيوم إلى اطخني احرك نفسي واخليكم فضيحه تزوج عليه طز بيك ولا أريدك ولا تملي عيني من بعد اليوم لا اني مرتك ولا انت رجلي

ضرغام :بنيتي عيب هل حجي هدي خلي نفهم

شامه :عمو على عيني وعلى راسي كلامك وانت هم استغلوك حالي حالك ضحيه بس الي كتله هو الي يصير غير شي والله ما اسكت بعد عليه

قسور :والكعبه وحق كل حرف بالقرآن طلاك ما اطلكج بس ما اطلع رجال إذا ما اكسر خشمج هذا سهلة يا بنت الناس

شامه:أعلى ما في خيلك اركبه ما تهز شعره براسي اكرهك واكره اليوم الي اجيت بيه لهل مكان الظالم بدل ما تاخذون حقها تسترو على مصيبتها وحسستوها هي عاهة وخليتوها تنتحر بسبب حجي الناس لكم ما تفرقون عن عدي ولو بذره

حسين:لج شامه

شامه :بابا مدا أكدر اتحمل بابا انت وياهم ضلمتني خليتني اتحمل كل هل وجع اسئلك وتعرف كلشي وضامه بابا تعرف بيه اكثر انسانه ما اتحمل وتحملت حته لا افرط بيكم ويصير الكم شي هلكد ما احبكم واخاف عليكم وانتو جنتو مخليني بين أدين واحد مريض ومغتصب وراد خمس مرات يكتلني ويهيني موتني لكم انتو نهيتوني جان يكومني ويكعدني بأهانه وطعن بشرفي و راحو فحصو شرفي مقدار الإهانة والظلم الي تحملته كله علموكم بس محد بيكم بعد يستاهل هل شي

معاذ :شامه.. هدي والله خفنه عليها وعليج ما ردنه توصل لهل مر.. مرحله

شامه :نتحرت ماتت مو راحت ارتاحت منكم

معاذ :خ.. خشمج

طك خشمها دم خلت ايدها على خشمها وفتحت الباب طلع ابوها وراها ويصيح عليها وهي تمشي قسور الإهانات الي حصلها من شامه جمدت قلبه هانته كبال اهله بهل طريقه الي اكبر واحد لو تجراء ونطق بهيج كلمات جان كتله بمكانه بس الي سيطرو عليه معاذ وفاروق الي كله لا تسوي شي تندم عليه للحظه وجعه قلبه بس رجع جمد وحلف وما يرجع بكلمته و راح يكسر خشمها وما يرجع بكلامه كعد حسام ما كدر يوكف على طوله نزل راسه وكام يبجي رجع حسين بقو كاعدين خله قسور ايده على راس حسام معاذ احتار بضرغام الي سكره صعد وهاي شهر كامل شامه ما تحجي لا ويه ابوها ولا تشوف قسور ولا تجاوب على حسام حاسبته شون الهوة صبيحه و فيروزه من عرفو بقو يلطمون على وجهم تخبلو بحيث فيروزه صبح وليل تبجي تتخربط وينقلونها للمستشفى خافو يصير بيها شي ودائما تستحي من شامه وقليل تحجي وياها قسور ما يفوت للغرفه ولا يباوع بوجه شامه ولا هي متحجي حته ويه اختها اعتزلت فدنوب منهم جانت كاعده يم فيروزه وتكشر الها برتقاله وتفاح وفات قسور البيت جانو كاعدين بالاستقبال التفت شامه وكح ضرغام وفيروز ومعاذ ونوال بقو صافنين وبأيد قسور...

🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤

احب احيي الي عرفو منو حتموت 😂

يله حزرو شكو بأيد قسور 😀

وكلش شكرا ع كل كلمه حلوة كتبتوها الي وشكرا ع التصويت الله يفرح قلبكم يله بس يصير فوك ال 30 صوت انزل بارت جديد