رواية كسرة قلب الفصل الأربعون 40 - بقلم نور الشمس

..اسمع واشوف عيون صگر تجدح اشرتله اششش خل نسمع
انطاها عنوان الشقه وسد الخط حاجيتها

..رفل نصعد للشقه قبلچ حته نكون قريبين اول دخلتج ندخل فهمتي
حاجتني بصوت يرجف

..اي اي بس فدوه مو تعوفني

..مااعوفچ شوفي مو ترتبكين ولاتخافين سوي روحج طبيعيه

وصلنه صعدنه نهاية الدرج صعدت هيه اول مافتح الباب الها دخلت  راد يسده خليت ايدي وسلاحي بيها
..عليش مستعجل خل نسولف شفته تفاجأ
دفعته وطبيت وصگر وراي باوع للمكان وضحك
گال شوف الوكح شمحضر
بگلبي گلت صگر مو وكتك انه اريد اركز بحل اشوف شلون نطلعها سلامات ونطلع منا هم وهوه يحشش
رغم عيونه تجدح

قيس..كرم شجابك هنا منو گلكم.. سويتيها لچ عبالچ تخلصين مني مو اني التكسرني وحده مثلچ

صگر ..هوب هوب على  كيفك الحچي ويانه ياعار تروح فدوه للمره امك هم فرحت بيك وگالت جبت وليد ولك شمحضر انت ماعندك خوات هذا الثوب المعلگه من فكرت تلبسه البنت الناس
ماعرضت اختك گبالك ماعندك اخت ماگلت امي مرتي بنتي
گاعد احچي ويمه بطل كسره وهجم عليه حميت وجهي بأيدي وكرم طگه على وجهه بكل قوته ايدي انترست دم من الكزاز  وهوه خشمه نزف من ضبرت كرم
كرم اشر الرفل تطلع
وقيس كلها بس اطلعين صورج انشرها
وهاي ماراح انساها الج

كرم حاجاه عوفها وحاجينه احنه انت تعرفني زين وتعرف انه ابنمن ومنين رغم سوايتك ماينسكت عنها ومو مال ناس ولد حمايل بس الخاطر ابن عمك وعمك والزاد الماكله ابيتهم ولأن مااريد الفضايح الهم وهمه مايستاهلون بس عزائهم انت ابن اخوهم ومحسوب عليهم ولخاطرهم انه احاجيك حجاية رجال
انطيني كل صورها وكل رام بي وكل جهاز تكسره يمي جمعهن هنا وسويهن گبالي
ولو شفتها تمشي يمنه تشتمر عنها يسره
لو اسوي بيك سوايه تتمنى الموت ولا صايرتلك

..انت شنو علاقتك تره اني هم النفس السسبب ساكتلك تعرفني لو غيرك اقتله والله وميرفلي جفن بس تدري بيه احترمك خليني محترمك وابتعد من طريقي وشيل ايدك من حياتي الخاصه

..ياحياة التحچي بيها انت تخرب بيوت عالم ماتخاف على عوائلكم عدكم بنات خير من الله چنت احاجي بهدوء
صاح بصوت
..لتجيب سيرة بناتنه على السانك بناتنه اشرف من الشرف مو هيچ هنه

..لاتاخذني بصوتك الصوت العالي مو سباعيه بصفك انه وجاي اسمعك وسلاحي بيدي حركه منك اعوقك والله اعرف سوالف الفزعات مالتك لاملك شكم سرسري وواحد يسند الثاني ع الموزينه ويانه مايمشن ذني ورفل بحمايتي
صاح صگر ولك شني هالبرود العندك شو تحاجي مترهي حرگ اعصابي ابن الچلاب
درت عليه ولك  لاتفاوض ولانعل على راسك اليرضا على بنات الناس يتوقع كلشي باهله انه مو كرم واتفاوض واخليلك قيمه انت اصلا شني ونحاچيك غير حظنه الاغبر يجيبلنه وين الرديه يحطنه بيها حجايه مااسمع منك طلع كلشي وسلمنه لو اگلك انت مالك امان سحبت سلاحي
قيس باوع الكرم وكله

..كرم تره اني مو ماعندي احد وتطلعلي ناس هواي خاف عبالك صيح بهذا الوياك وخل يتوكل شغله مال كبار لاتحطون ارواحكم بيها مو گدنه انتوو عبالكم بأريافكم تمشي الفزعه هنا العاصمه ماكو سوالف الفزعات محد يعذركم

صگر..اعصابي تلفت وانه اسمعه جريته وانطيته بوكس طگني بكل قوته على صدري وجعتني الضربه وضجت منه خليت المسدس براسه احسن شي اسوي الفكرت بي اول طبتي من شفته معلگ ثوب احمر الها محضره ويريد ينتقص منها بي اول ماشفته گلت كون البسه اله
گتله والله طلقه وحده اخلي الليله منكر ونكير يكملون التحقيق وياك وتعرف بينه مسودنين وهمج ونسويها
گوم البس هذا

..انت تخبلت اكيد

..جابه كرم وهوه مبتسم هاك البسه

قيس..كرم أنطيكم والله بس خل يسحب سلاحه وهذا شرطه كلشي انطيكم

كرم ..مشكلتي ماأمن بيك ابد
حاجاني صگر  حته لو انت امنت انه ماامن اليسوي ابنات الناس هيج ماعنده حجايه
ماالنه غير ضمان البس حته نصورك وصورك بصورها وانت تعرف اهلك منو وشنوو وراح تصير حدث الساعه
لبسه بعد التهديد اخذناله صور واخذنه الفلاش والرام البيهن صورها واكدناله مادامه مايگرب الها احنه عند حچايتنه كل صوره اله ماتنشر
طلعت منه وانه اتذكر وكفات ابن عمه صديقي واخوي وصديق براق هم هواي ساعدني بشغلات وصار بينه زاد وملح وهوه بنفسه حذرنه من صداقة قيس وصحبته لأن يجيب المتاعب وصاحب مشاكل نفس الجامعه بس ابد مايلتقون
وجان يگلي السبب عمي رباهم ع الدلال والدلال الزايد يفسد وحچيه صح اهله عودوه على انو هوه ولد وكلشي اله مباح وكلشي يريده ياخذه
رغم عندي عليه ضمان قوي ادري بي يخاف من الصور الي عدنه ومستحيل يفضح روحه بس ظليت قلق ولازم اخذ حذر لأن مو قيس اليسكت اكيد راح يشوفله طريقه يرد بيها اعتباره

خابرت رفل جاوبتني تبچي وتشهگ بقوه

..الوو

..هلا كرم ..عبالي صار بيكم شي اشو طولتوو صار شي اخذتوهن كدرتوو تاخذون ومنه 

..من اليوم اعتبري صفحه وانطووت انسي وديري بالج على روحج ابدي حياتج من جديد وخلي ابالج اليريدج اول شخص يخاف عليچ وهسه انه اترخص وان شاءالله ماقصرت وياج
جبتلجياهن الرام والفلاش وياي باجر تعاي اخذيهن من الدوام

..رحم الله والديك ماانسه وكفتك الي
كرم اني اسفه ..اسفه على كلشي

..ماله داعي الأسف اعتبريني اخوج وشتردين انه حاضر

..اسفه على الي صار اول مره اشوفك مجنت اعرف الناس ولااعرف الي يصير خارج بيتنه مجنت امييز الطيب من الخبيث ولا اعرف اميز المظهر واللهجه مو قياس

..كافي تبجين وهسه عرفتي ماصار شي مااثرتي عليه گبل وهسه لاتهتمين اعتبري الصار درس

سديته منها وانه افكر شلون صار هيج وياي ماادري شي مامفكر بي ولا مخططله لو اشوفه بالأفلام مااصدك واكول الصار تمثيل يعني شني من وكت الي يخلي رجال يتصرف هالتصرف
ضحكت وانه داير وجهي الصگر الهسه عيونه نار ومعصب لاف ايده وبعدها تذب دم
ضحكت وانه اتذكر وين لكه فكرته هاي من لبسه الثوب والله ولامفكر بيها وانه يمه ومحتار شلون اقنعه يعوف الصور تالي عافهن وهوه الي يتوسل ينطي كلشي بس نمسحهن مسحهن وماانطيناه للضمان
وانه مبتسم گتله شبيها ايدك بعدهي تنزف خل اشوفها خاف تريد خياط

..جا شمالك فرحان جن صايدلك صيده تريد تتعلم بيه

..هههههه لا صدگ خاف توجعك

..يخوي توجع بس مو مثل گلبي وراسي ولك منين تعرفه هذا والله حلال بي الدفن

..اعرف عمامه خوش ناس ابن عمه صديقي كلش

..چا ماكلت الابن عمه يساعدك

..ماله سلطه عليه وادري مايگدرله بس افضح البنيه ابلاش ..شو ذب هاي الوصله وين لگيتها لفيت ايدك بيها

..انه ادري يمكن وصلة وحده من الحبايب اليجنه مال هز هيه وليراتها مو زين لگيت شي اوگف النزف بي

..يمعود ذبها وطلع منا شاش شي لاتلوث ايدك

...اووو راح يصير علي من هسه دكتور مايصير عليها كلشي من بخت الراگوصات بختهن عالي لاتخاف

..ضحكت مشتاق السوالفك وادري بيك تعبان بس ماترتاح الا بهذا حچيك گلي بيتك كمل لاتگلي باجازتي الگاك شايل

..اسبوعين ويكمل كلشي واتوكل على الله واكعد ابيتي وانت من تجي ماكو شي يمنعك بيتي بيتك

..ادري ادري بس ضجت والله ..شاهين شلونه

..شاهين زين اول امس راح الأمه يبقى يمها ساعه
نص ساعه وخابروني گالب الدنيا اخذته من راس شارعهم جده جابه الي

..شعجب يستغربها ليش شو يكيف ع الطلعه هوه

..ماادري بس هوه يضوج من البچي اذا شاف احد يبچي يتخبل يجوز باجيه يمه

..ماسألت شعجب هيه رايدته هسه

..سألت وعرفت بس ماردت احچي تنهدت كرم انت مااضم عليك بس العرفته خلاني اضوج اكثر
امه صاير عدها طفل معووق عمره ست اشهر ومييت
يمكن رادت تعوض الراح بشوفة شاهين ويمكن حست مثل ماانه رايد كون الندم ياكلها شلون شمرت ابنها شمره اخخ اخخ شاهين كاسر ظهري شگد ماادللة وامي وام رضا يدارونه وانه واحس يرادله بعد احسه ناقص حنان

..يلله انزل اسبح وبدل ونرتاح شويه ونطلع بره نكمل حچينه واودي وياك غراض الاهلي وشاهين ولوله وجهالك الباقين هم

..ضحكت همه صدك جهالي وجايني رابع بالطريق

..ياالله ع الخير ربي يتمم

..الله يسلمك يوم الالك ونفرح بيك شوكت ناوي تتزوج

..النيه موجوده والبنت شبه موجوده من اتأكد انت اول شخص يدري بس اكيد مو قبل التخرج اني هيج وماملحگ احكك راسي من الدراسه

.. الله كريم ..كرم مااوصيك خليك حذر من هذا قيس

..ان شاءالله مايحتاج توصي
بيومها طلعنه اتونسنه وبراق طلع ويانه بالليل رجعنه نوصله البيت اهله حته نرجع البيتنه
وي ماطبگنه السياره ابابهم طلعت ارجوان وامها
وياهم اخوها اصغر منها يطلع بعمر ضرغام اخوي تقريبا متوسطه
فتحت الباب سلمت على امها وعليها هيه مدنگه راسها گلت البراق انه اوصلهم بدربي لايطلعون وحدهم
مارضت امها گالت لا هوه بس شارع بينه ميحتاج متقصر عيوني احنه انريد نتمشه

استحيت الح گتلها براحتكم
صعدت للسياره وعيني عليها ماشلتها ابد
خليتهم يمشون وانه شلون بگلبي الاكلني عبالك يوميه حاميهن واليوم مااكدر اعوفهن وحدهن
الساعه فوك العشره مال مشي هسه صح منطقتهم شعبيه وحلوه بيها حركه بس هم تبقه الدنيا تخووف
صوت صگر فززني

..عيونك الله لايبارك بيك فصلتهن تفصل اهل صاحبك لو ناسي ولك خاف النيه يمه

ضحكت بصوت عالي فضحت روحي بضحكتي
گال اي ماطول هالضحكه هيه هاي بس لو ادري مركز بيها وشايفها فاتتني
حركت السياره بسرعه ومشيت وراهن من قربت اوصلهن خليت السياره تمشي بطيء
من وصلن البابهن وگفت مسافه عنهن
باوعتلي هيه ونزلت عينها بسرعه مالحگت افسر نظرة عينها
صگر گال وانه اكول براق ياطلابة براق ثاري مو محبتا بي عندك غايه
تدري بيك لو لا

..لا يمعوود شتريد اگلها غير عرض صاحبي بس اريد اتأكد ماعدها شي حته اعرف اخطبها لو شلون اوصل الها فكره ماادري

..ظل لاتدري وخلها تروح منك اردود ماتبت من ضميت حبك گبل

..لاتذكرني گبل شي وهسه شي گبل بت عمي ومتوقعها وجنت متأكد هيه الي وبوكتها الظروف والاقدار عكست وياي وجنت مو مال زواج زغير وعندي هدف اكبر  وهسه وبعد مو مال زواج هم بعد مامكمل دراسه بس شسوي الگلبي المتعبني هيج يطيح بدون مايشوف
احنه مدري شمالنه نحب النسوان انه انت ابوي مدري شبينه عدنه الحب من اولياتنه وعيشه بدون مره ادللك وتشوف الحب بعيونها مانريدها
والله البعمري والوياي بيهم يكولون بعد عشرين سنه مانفكر بزواج ماادري الخلل بارواحنه بعاداتنه ماادري كل الادريه انه الهسه مامتأكد منها ومن اتأكد ماراح اخليها

..الله كريم ركز بدربك هسه خل نوصل ونكمل حجينه

ثاني يوم صگر رجع وانه رحت الدوامي شفت رفل وانطينها الامانه چانت مدنكه وخجلانه تشكرت وراحت
قيس ماجاي بيومها
حاولت اروح القسمها
رحت حته اشوفها من ابعيد بس خاف براق يشوفني شكله شعندي هنا
شفتها گاعده وي بنات ويضحكن
ضحكتها اثرت بيه اكثر واخذت روح من روحي
مر شهر كامل والامتحانات مابقالها شي وارجع وانه مامحاجيها ولامتجرأ وبراق اتيقن عندي شي بهذا القسم بالذات وصار مايسالني مثل اول مره حاول يتركني على راحتي وانه ماادري لو دره عليها شني موقفي
جانت كلش مؤدبه وعفويه اراقبها كل فتره
واشبع عيوني بشوفتها
والجرأه الي عندي راحت مني بليله ويوم مااكدر اجمعلي طاقه الربع ساعه اصارح بيها
تذكرت مغامرتي قبل
وشلون طلبت تجهيز كيك وهدايا وين راحت الجرأه والافكار العندي ماادري الصح وين
لأن گبل بفترة مراهقه لو لأن اعرفها مني وبيه ومامتوقع رفض واطباعهم من طبعنه يمكن هذا السبب
هيه لا اكو رهبه بحبي الها مااعتقد تقبل بعيشتنه
ارجع وافكر عيشتنه حلوه مابيها تعب ولا انتقاص بلعكس نسوانه مدللة

احس هالموضوع اخذ مني جهد ووقت حته الدراسه مو مثل قبل هالمره مااعتقد اطلع تقدير مثل كل مره
وصوت ابوي هم مو مطمني من اخابره احسه تعبان وصوته مكسور مو مثل گبل اسال امي تگلي زين بس يتعب من المشاكل
وامي ام شيخه حالتها الصحيه مدهوره
افكاري تروح وتجي
خلص الدوام وانه ماكدرت احجي ومتاكد هيه حست بيه
رجعت بعد مابدت العطله والبيت وحشه على صكر خلصناها سوه يوم ابيته يوم هوه عدنه المهم مرتاحين الحمدلله ابوي قنعته يعيد تحاليله ومراجعاته
وعلي جان فرحان وحاله متغير عن اول سنه االظاهر السنه الثانيه بده يتعود ع الجامعه واتعود ع البصره وعيشتها وطلابها بحيث عكس السنه الأولى جان حيل حابها وصرنه كل واحد يدرس بمحافظه واتعرف على اهلها وناسها من صكر الجان بالكوفه الي العلي والله العالم الباقين وين يصفون
بس جان عنده شي ودائما يلمح البنات عمي وانو خاف انه  مفكر بوحده منهن اخر مره سالني وجنه كاعدين صكر كله تره هريتنه طلع البكلبك جنك رايد منهن اخوك  رايد بس رادته مو هنا طلع البگلبك وكول
علي گله اي رايد زهراء وخفت خاف اخوي رايدها خته اعرف گبل لا اخطب وهم خايف ابوي يعارض

جاوبته انه لايخوك لاريدها ولاشي الله يسترهن وانت تستاهلها وهيه تستاهلك توكل بالله
وليش يعارض ابوك ابنيه ورايدها يكيف ويفرح

..ماادري بس هيج حاس ابوك ماناسي ذيج السالفه وانه والله خجلان منك بس شسوي حاولت ماافكر بيها ماكدرت

..حاجي ابوي واخطبها وكمل كليه واتزوج

..الله كريم الله يسهل

..لاتخاف انه احاجي ابوي بنفسي

وره يومين قنعت ابوي يفرغ روحه واخذه بنفسي للطبيب واطلب منه فحص عام اخذته ورحت البغداد
طول الطريق وهوه عينه مني وانه اسوق وهوه بصفي احس نظراته الي بيهن ابعاد هواي نظرة فرح نظرة امل نظرة نشوى وانتصار
احسه فرحان بيه
حلوو احساسي وانه اشوف حچي هواي بعيونه يعجز السانه يذكره استغليتها فرصه وحاجيته

..ابوو كرم بويه عندي سالفه وياك

..گول بعد ابوك اسمعك

..بويه علي رايد زهراء بت عمي فيصل وخايف يكلك وانت ترفض الذاك السبب نفسه بس انه اشوفهم مناسبين وانت الراي رايك بس تره هوه رايد وهاوي مو خاطب وبس
صفن دقايق وگال انت شتگول

..الگول گولك بويه بس انه اكول مناسبين مثل ماكتلك

..شنهي الخلاه يكلك الك مو الي

..بكلبي گلت بس لاتسجلت نقطه على علي وابوي دوم معودنه مانتحرج منه بس انه اكثر واحد انسى وياه كل قيود واخذ راحتي اكثر من اي وياه اعتبره صديق
ضحكت كتله غير اليدخل مكان ويريد يفوته يفوت من بابه وانه عنوان اكتابك بويه هوه راد يشوف اذا مارضيت انه معناها انت ماراضي وماله داعي يحاجيك بعدي يعني يقراك من خلالي

..ابتسمت وانه اسمع وصفه احلى ولد واحلى عنوان انت ذخري وذخيرتي وراحة بالي وگلبي فرحتي الماتنوصف انت وياك وبيك اتجدد ويرد الحيل بيه

..كلماته عجزت ارد عليهن بتبرير اكتفيت ابسمه مرسومه على ثغري وسكوت تام بس دگات كلبي اسمعهن دگات فرح
ماكدرت اعبر بشي شلت ايده وبستها وانه اسوق وردت اغيير الحديث كتله من طلعنه امي ظل بالها ونزلت دموعها ماكدرت اداريهن تتصور ابنها صار طبيب فاهم مكتفي الشروط وافهم من الفحص النظري وشفتك ماتتحمل وجبتك شكك فهمتها بعدني طالب ومامؤهل الفحص بزونه مو بشر مامقتنعه لا وحبوبتي تريدني اطييب عيونها ورجلينها بعد
ضحك ابوي وهوه يكهكه گال بعد شيخلصك هاي مو بس همه عربنه كلها متحضرتلك
ضحكنه الطريق خلصناه بين سوالف وصكت وابوي مارجعلي الجواب على موضوع علي ومالحيت عليه انه اعرفه من يريد ينهرب معناها يريد يفكر وينطي قرار مايندم عليه
وصلنه البيتي رتبت السرير وخليت ابوي يرتاح وكملت تنظيف الباقي من البيت حته العصر انروح نراجع
خابرت امي وحسيت اكو خوف بصوتها طمنتها على وصولنه وعلى صحته ووصيتها لاتخاف ماكو شي انه للامان اكثر ردت اسويله فحوصات مو اكثر
سديته منها وخابرني صكر هم سالني وطمنته
طلعت اجيب غده وبالطريق خابرت براق كال بالليل اجيك اشوفك واسلم ع الوالد
رتغدينه وسويت جاي الابوي رتبت السفره والمواعين
ورحت انام ساعه كبل لانطلع خابرت احجز كبل لا انام انطوني حجز ع الخمسه ونص العصر
نمت شويه وكعدت بالاربعه ونص سبحت وحضرت نفسي ولكيت ابوي متحضر
طلعنه وسوينه كل الفحوصات طولنه لثمانيه ونص
الطبيب زيد علاجه وكله داوم عليه وحميه غذائيه والبلقي كلشي تمام بالطريق خابرت امي وطمنتها
سمعت صوتها يرجف وانه فاتح المايك وسمعها ابوي
كلها عفيه دموع مايوكفن كافي يالغاليه مابيه شي كلشي ماعلي بس هلله هلله بيه
ضحكت وانه افهم وصيته شيقصد
كتلها كلشي مابي حته الطبيب گاله اتزوج اثنين فوك مرتك تريد ضحكنه على ردها الي مافكرت بي نطقت الي على السانها وگبل

..يالاخلف الله عليه هذا مو دكتور خراب بيوت هذا عمه بعين كون هذا علاجه
جاوبها ابوي وهوه يضحك والله ماكو غيرج علاج الي بس محد يفهمني حته انتي

.....
اجه بالليل براق وسلم على ابوي عافنه وراح يرتاح وكعدنه نسولف كتله اقل الشهر وانه يمك هاي مو جيه اريد اشوفك ونطلع ونزور
گال راح نروح للشمال بعد اسبوع اذا تريد روح ويانه

..انت ويامن

..اني وعائلتي وانت ونلتقي هناك وي جماعتنه

..لايخوي انه وياك المن زحمه وعيب انتو تونسوو غير مره

..مالك علاقه تعال ويانه واهلي قابل جديد عليهم انت لو ميعرفوك حته بيت عمي ويانه والحب همات

..ضحكت اي اذا الحب همات انه المن ماخذني خايب انت متيه رايك روح واذا بيه جيه اشوف حسن وباقي ربعنه اروح وياهم واشوفك هناك

..على راحتك

رجعنه للبيت
واول يوم اجوو عمامي وعماتي يشوفون ابوي سمعوو بي مراجع مو عبالك فحوصات لا عبالك البشر مايصير يراجع الا من يشوف الموت وابعيد الشر عنه شافه وراجع هذا فكرهم وتعال اشرح الواحد الاثنين اخر شي ابن عم ابوي قضى عليه من كال شوكت تعدل سنوني ولده ضحكوو وفهموه طبيب الاسنان يختلف ودراسته وحد وانه اصلا بعدني طالب صارت عندي عادي هاي الاسئله وبالعكس اتونس عليها واضحك مااضوج
امي اخذتني على صفحه وهيه عاكده حواجبها

..كرم صدگ الطبيب كال الابوك علاجك زواج من هسه اكلك انه مااظل اروح اكعد يم اخوك صكر

..ضحكت هالله هالله صار عندج ولد بيته وحد وتهددين الشيخ بي
صحت ابو شاهين حضر مكان الامي يمك تريد تكعد وياك لان الطبيب راد ابوي يتعالج وهيه ماراضيه
جاوب وهوه مافاهم شي
المكان كلها الها وان ماشالها تشيلها عيوني بس علاجيش هذا

..لطمت صدري فلك طرج شهامه وطر حظج يعني صدك

..شلت لوله وانه اضحك يمه شبيج شني الستلفه ياصدك غير نشاقه

..احلف بداعة كل غالي

..وداعة كل غالي جذب انه اضحك وياج مو اكثر

كاعد نسولف واحنه نمشي للمطبخ
ولان امي كلساع توكفنه ظلينه واكفين ونحجي على كيف بضحك
سمعنه عمتي افياء هواي تجاوزت على حوراء وهيه بس تناشغ
صكر عكد حواجبه وركز جنه مايريد يصدك السمعه
عيوني ظلت علي نزل شاهين من ايده وانه هم نزلت لوله
وراح بسرعه والشرار يطاير من عيونه

يتبع ..

حبايب البارت بدون مراجعه
وعوضتكم قريب ال ٣٠٠٠كلمه