رواية كسرة قلب الفصل الحادي والأربعون 41 - بقلم نور الشمس

مساء الخير بما انو بعد ع الصباح كم دقيقه
بنات حبابين على كيفكم وياي لتشمرني بعبوات المي الفارغه تره فحطانه من صدري ومابيه اركض 🙈🙈
😂😂

معترفه بذنبي وطمعانه بكرمكم اكيد تسامحون وتعذرون تعرفون اني مااتأخر الا اذا كنت معرضه الظرف اقوى مني والربوو مشكلتي المزمنه 😧

المهم حبايبي مشتاقتلكم ويمكن يمكن باقي بارت واحد بس اتاكد من الابطال خاف ناسيه شي ممذاكرته او مموضحته
والأهم من القريتوو كله غلسوو ع الابداع بالأغلاط والسحگات الي صارت عنوان الي 😅😅
طلعا البارت
٣الاف كلمه ونص هم كولو قليل 😬
❤❤❤❤❤❤❤❤❤❤❤

حوراء..

بيوم الي اجوو من بغداد صگر گال روحي يم امي اذا تگدرين خاف تحتاجج اخذي الجهال والحجيه وروحي احنه يوميه نروح بس اليوم من الصبح راد اروحلهم
امي تعبانه كالت انه اظل هنا وظلوو جهالي يمها وشاهين اصلا من طلع ابوو راح خلاه يم امه لان هوه يريدهم  اكثر
رحت من وكت وتساعدنه كملنه الغده ووخدرت  الجاي وصبيته اخذوه وكعدت اعزل بالمواعين راحت امي شيخه وگالت الزهراء وحوراء بنات حماي فيصل ساعدن مرت عمجن انتن كملن ذني وخلنها ترتاح ظهرها وگف من الصبح وياي وهيه حامل  وهنه حبابات وخدومات طفرن گالن لاتجيسين شي بس ظلي يمنه حته نكمل ع الواهس
چانت وفاء گاعده واني متجاهلتها مليت من سوالفها الماتخلص تذب سم تموت ع المشاكل تذكرت من شلت البيتي واجتني لعبت بيه لعب طلعته من عيني كل شويه وكالت هنا الحظوظ رجوله وخلفه وبيوت لا وانوب بيت مرتب من كلشي مامخلي شي اخوي الشفيه
خواتها يحجن يصيحن ولامهتمه
ظليت افكر واكول الحمدلله الله عوضني واهم شي زوجي يمي ويحبني ويقدرني وحته امي الخاطري جهزلها غرفه وكعدها يمي وجهالي ومطالبهم شعليه بيها هم مهما يكون اخته اتحمل واسكت ..فززني صوتها وهيه تصيح هي انتي ست الحسن شو فرحانه ومكيفه بنات الشيوخ يخدمنج وانتي مرتجيه وگاعده اخخ الوكت الاغبر الخلاج تگعدين وتگابلينه طلعتي مو بس ارمله وكتلت روحها ع العرس ودم زلمتها ماناشف فوكاها من ذني اليستعطن ويدورن صدقات واخوي انكسر خاطره توني يلله دريت بيج ادورون صدقات انتي وامج وتالي خوش من لفلفتيلج زلمه الله منعم عليه فوگ هذا كله يخدمنج بنات الشيوخ وانتي خلگ جنه

..كلامها مااستوعبته عقلي يسحب بطيء مااريد اصدك السمعته دموعي ماسيطرت عليها ومن اسمعها تكلي امج ادور صدقات شبعت بجي حمدت الله جي مااجت خليت ايدي على عيوني وبچيت من كل گلبي هالحچايه هيجت بيه شكو جروح بجيت بصوت عالي وبگلبي اردد حسبي الله ونعم الوكيل
تذكرت زوجي واستشهاده تذكرت الضيم والفگر الشفته تذكرت حالنه گبل وهسه وي راحتي بس مامرتاحه مامرتاحه اسمع كل هذا ولا اني الأكدر اواجه مو ضعف مني لا بس چنت اخجل من اخوها مغركني بأفضاله معوضني عن كلشي مغركني بحبه وحنانه وخوفه ومداراته الي والجهالي عيب اخلي راسي براسها وهيه اكبر مني بهواي
بس هالمره ماكدرت ابلعها اكثر اتهسترت بچيت بصوت عالي وگعدت خليت ايدي على وجهي وابجي وهيه مستمره تحجي
حوراء وزهراء كاللها عمه مالج غرض احنه من كيفنه وهيه مرت عمنه وصديقتنه هاي جي حبابه هيج انتي طايحتلها
..حته انتن صرتن وياها ام الرجوله والسحوره شبيها بنت حماتي ماخذاها صگر شمعنه هاي شعوزها بدور مو انه كتله لكيتلك وحده شو حته هديوه مرته ذيج احلى منها هسه ماعلينه عوفن المواعين وخل هيه تكملهن
كمت كتلهن وخرن انه اغسلهن بس مخنوكه حيل واريدها بس تخلص واروح البيتي بس عيب من الشيخ اطلع وانه مامسلمه عليه توني وگفت ورجعت اعدل برداني وامسح دموعي وسمعنه صوت صگر بعلو حسه صاح

..وفاااء وتالي وياج علميني شنهي التالي

..صگر لاتعلي حسك علي

..وروح امچ وروح ابوچ اذا مااختفيتي هسه من گدامي مو بس اعلي صوتي السانچ اكصه لو محترمه روحچ جا احترمتچ ولچ انتي ماتملين ماتهجعين بيچ مرض
والله والله وهاي كلهم يشهدون وهذا كرم حاظر السانچ هذا اذا طال على مرتي اگصه والله ومايوگف بعيني احد مليت مليت من طلايبچ كل جيه الچ تسممينها
وانتي تعاي عوفي المواعين وتعاي هنا اطلعي يلله گدامي وظلي هيچ لاتحچين وصيري مدگه للكل مو صگر المرته تنحگر مااحب المره الخانعه انه مااريدج ضعيفه بيمن مكسوره عينچ انتي ومخليتها تحجي براحتها ليش ماتگليلي ليش ماتخليني اتصرف

حوراء..
جان يحاجيني واعصاب وجهه واضحه منهار وعصبي ابد ماشايفته هيج كام يصييح عليه اريد اكله الخاطرك الساني انبلع
كرم كله صگر على كيفك بهداوه ليش تصيح غير محترمتك والخاطرك معناها بنت اصول وامي(شيخه) هم ظلت تحجي على وفاء تريد اطلعها 
وهيه ماتقبل وتگله مو انه الاخاف منك وانت اول امس خطن شواربك وصاير زلمه براسي
هوه سمعها هيج واتخبل طفره من مكانه لزم وجهه بايده فركه فرك وهيه صارت وره امي دفعته امي وكالتله الخاطري يمه عيب فدوه الخاطري
كرم صاح صلو على محمد صگر شبيك كافي
وانه من خوفي جنت مااريد اركز وياهم بس كوه الاحداث انخزنت بدماغي والخوف اخذني اريد ابيين روحي مامهتمه كمت بدون وعي اجلف مواعين الكل مامنتبهيلي هوه شافني اجاني بكل سرعته دفعني قوي وعيونه تريد تاكلني
كال
..انتي شبيچ انتي مو گتلچ عوفي كلشي اذا عاجبچ وضعج تصيرين خدامه انه مايعجبني ومايعجبني وانتي مرتي وماريد المره المذلوله نكت ايدي حيل وذب الماعون منها من صوت تكسيره غمضت واحس گلبي يوجعني كل الصار مو مستوعبته
هيه وره امي وحاچته

..انت شفايتلك لو جايبلك خدامه ولاجساحة زلم طول عمرك ماتعرف تتصرف وصوج شيخه الماربتك ماعرفت شتختار يوم تجيب عشاگه عافتك وعشگت براسك ويوم تجيب وحده ماخذه گبلك ومخلفه وماهمها زلمتها باجر هم انت تولي وتعرس وراك
بس باوعلها كرم اخذها وگلها كافي سكتي اسكتي بصوت عالي حجه  وصار گدامها  وكل الصگر بغلاتي عندك لاتگرب انت  التنحگ اكبر منك هيه
بس صگر شيسكته
شكوو ماعون ع المغسله والكانتر مرده بالكاع وقرب عليهم وكرم چتفه تجتف
فزينه على صوت الشيخ

صاح

..صگر كرم شني هالمهزله شخليتوو للنسوان ولك صگر شبيك خبصت الامه وحسك وصلني الهناك ويامن تتعارك انت وي النسوان هاي تاليتك هيچ انه ربيتك

..شيخ اذا انت هيچ شايفني وتشوفني غلطان البيت الي ربيت بي وكبرت بي ترضاها تنهان مرتي هنا ترضا بالحچي السمعته هاي وفاء يمك واسألها كلها شگلتي خل تعيدلك الكالته وهنا كلهم شهود وبعدين قرر ياهو الغلطان وانه هم شكوتي مو الك ادري بيك ماتنطي بيها هاي العزيزه ومحد طلع عينها غير محبتك الها وخلاها تشوف خلگ الله دون منها انه حچيي وي زلمتها
وهسه انه طالع واسف واعتذر صوتي عله ابيتك
درت على حوراء الي قهرتني اكثر من وفاء مااحب هيج تكون خاضعه وترجف من البچي ليش ماادافع عن روحها ليش السكوت درتلها گتلها يلله گدامي امشي البيتچ

حاچتني امي

..صگر يمه على كيفك مكانتك محفوظه ومرتك بعيونه مالك غرض باختك جنك ماتعرفها هذا ضيمها وي الكل شبيك تسودنت اليوم

..يمه مليت تعرفين شني مليت وحق الله مليت كل ماتجي ادري تعيد نفس هذا الحچي عليها اشوفها مغثوثه وباجيه وكل مره اسألها تنكر وتتحجج وانه اعرف هيه شنهي المبچيها وتركتها وگلت تتعود ومره ماتاكل مره يجي يوم وتعرف تردها بس الظاهر هيه مرتي هم عاجبها تترزل وتسكت اذا هيه يعجبها وترضا انه ماارضا

فهد.. انت تخبلت ولك صوتك لاتعلي مو بعينك انه اصبر خل افهم السالفه وانه اعرف الغلط وين هسه انتم هاي المتلگيني بيها منين الگاها انه منكم من العشيره ادري زغار انتم مرتك شبيها عمي شبيچ ليش تبچين

حوراء..سكتت ودنگت راسي ودموعي تجري وصوت شهگاتي يحجي البيه

دار على وفاء وفاء وتالي وياچ ولچ توه راسي صدع من شكاوي رجلچ ولچ شبيچ الظاهر غلطت من دللتچ ورطت ابن عمي بيچ والنتيجه شنهي الكل يصيح الغوث منچ انتي تدرين برجلچ شيريد مني راد يظل اخر واحد ويحاجيني على انفراد وعبالي مثل كل مره يشكيلي ويريدني احاجيج شكم مره حاجيتج ماسمعتي مني شكم مره
رجلج اليوم حاچاني يريد يتزوج صحت بصوت عالي يريد يتزوج مل منچ ومن مشاكلج يكول شگد ماچنت احبها والهسه احبها بس الراحه يمها معدومه
چنت ضايج منه ماعارضته مهما يكون هوه بكيفه بس اخذت على خاطري بيني وبين روحي هم هوه الله يوفقه ماراد يخليني وراه بس هسه لا والله انه اخطبها اله بيدي
شفتها گعدت بالگاع اشرت الشيخه تسندها
صاحت وخري عني

..فهد فدوه اموت والله لاتخليه

..مامتموتين كلشي ماعليچ اتحملي حاولت اصلحج بكل طريقه ماانصلحتي شسويلج يخوج كتلج زلمتج مايتعوض عينج عليه وعوفي العالم وعوفي الصوت العالم والمنابز والمشاكل بس انتي مااخذتي كلام ذنيج خواتج اكو واحد يوم جاب طاريهن ليش بس انتي ليش
شلچ على خطيتها ..مرت اخوج هاي بيش اطلبينها ليش ماتخلين قدر وقيمه الروحچ ليش خليتي اخوج يتجاوز عليج
درت اريد اشوفه چان مخلي راسه جوه البوري ع المغسله والكزاز جواه تارس الدنيا گتله ارتاح كافي شيل راسك الماي البارد يأذيك  تعال انت ومرتك الحگني ووفاء انتي هم گومي

صگر..شيخ ماكو شي ينحچي انت فهمت كلشي انه طالع ومرتي تروح البيتها امها وحدها

..براحتك روح بس من ترجع اريد ولاتسوق انت خل كرم يطلع وياك ..روح بويه روح وي اخوك لاتهده

..صار يابه

صگر..لا مااريد احد انه طالع وحدي مااريد احد وياي

فهد..بس سوق على كيفك وخلي اعصابك تهدأ لاتسويلك سالفه بدون داعي ماصار شي وحرمتك انه اعتذر عنها نيابه عن وفاء وعن كل الموجودين محد يستصغرها وانه موجود مقامها من مقامك وانت الغالي ارتاح وكلشي يتصلح

صگر..محشوم شيخ اعتذارك واصل وانه ما رايد منك انت ابونه وتمون بس الي صار ماينسكت عنه وانت تعرفني ماينفذ صبري الا لمن اختنك اشرت على رگبتي وانه هذا حدي

..ادري ادري بس هم مو هيچ روح هسه وبعدين نسولف

راح صگر ومرته سلمت عليه تريد تطلع اخذت خاطرها وفهمتها وخليت وفاء تعتذر منها وراحت ظلت وفاء كسرت خاطري
وحسيتها انكسرت من سمعت برجلها يريد يخطب
واصلا هوه خاطب ومتفقين باقي بس الزلم تروح ونعقد خواته شايفاتها ومتفقات على كلشي وهم هوه گالي حته ماازعل منه
ماتدري بكلشي التهت بالمشاكل
كتلها تعاي نحچي
انتي من تصيحين بنات الشيوخ احنه ومانخدمج البنات وين يشتغلن هنه ابيت اهلها لو انه عمهن وشيخه عمتهن ومرت عمهن والشيوخ شني ربهم وحد والناس عدهم خدم تره احنه النخدم الناس انه اخوج وهاي هيبتي وابوج وعمامج منين اجتنه من خدمة الناس نركضلهم بمشاكلهم ونحلها ونستر هاي ونهدي ذاك شني منتنه ع العالم
بعدين السانج مو مال بنت شيوخ شيخه وكرم سمعت منهم كلشي تعيرين بنت العالم بقدرها وال الله كاتبها الها جاانتي تدرين شمكتوبلج
تكدرين توكفين بوجهه كولي يالله بنت امي وابوي الصحه البيج ماتخليج تتهدين غيرج مالاكي الراحه
احمدي الله وديري بالج على صحتج تره البشر قوته وايامه معدودات وعوفي كلشي وحيري بروحج زلمتج باجر عقده  وانتي بكيفج هوه يگول كل وحده ابيت مااخليهن سوه تردين تظلين يمي ترتاحين فتره لمن يخلص العرس وترحين تردين تكعدين ابيتج انتي وجهالج وترضين بقسمتج انه وياج مااخليج بس طلاك مااقبل وتدرين رجلج يحبج بس انتي كرهتي روحه حاولي ترجعين مثل گبل وياه
وانه مال تكليلي عارض عذريني مااعارض مو من حقي

..ابجي واحجي محتركه وروحي طالعه فوك قهري اعتذرت الحوراء اني الها اطلعها منها انوب
كتله طبعا مالك عين تعارض ماشاءالله كلكم سطرتوهن اثنين اثنين جاانت هم اخذت مره مليت منها وذبيتها هوه هم يجي يوم ويشمرها خو ماشيخه احسن مني

..ولچ شگد صلفه انتي كلبي ماكلني عليج وانتي مثل ماانتي يطبچ مرض انه عليمن حاير بيج مو زين منه واتحملج هاي السنين انثبري هنا حته رده البيتج ماالج لمن تتادبين لاتخربين عرس الولد خلي يرتاح بعيد عنج لا اله الا الله ويريد مني راحه الطبيب
شيخه تعالي لحگيني 

شيخه ..صعدت وراه وهوه كل شويه يسحب هوه ينفخ
.شيخ على كيفك دير بالك على روحك

..جا هيه بيدي ماشفتيها كدامج عقل وحده خشت بالتلاثين هاي لو جنها زعطوطه

..عود صدك احمد يريد يتزوج

..اي صدك جااجذب عليها رجلها شكه لمن مل وانه الله يشهد عاذره اطلع الواحد من طوره لو ماعيون امي تعرضلي واللع جا جنزتها على طول السانها بس هذا الكاضني
خليها هنا شكم يوم لمن يخلص تلعرس وانه اردها البيتها

..بس خطيه والله مو مال ترضاله يعرس

..انه شني وماارضا رجال لامخالف شرع الله ولا مسوي العيب يريد يتزوج حته عرسه انه احظره خو ماانتخارب انه وعمامي الخاطر وفاء هيه لو بيها خير مااخذ عليها

..ياا هسه صار الياخذ بي خير انوب شوف شلون كوه تلوفونها

..خايبه صحتج تريحيني مو مال بساميرج وسوالفج حافظهن ذني انه راسي مصدع وموو وكت غيرتج واخذت مره وحده علبج  بدلت صمام اذا اخذت هالمره الا احط گلب ثاني وعاد وين الگه گلب يحبچ

..فدوه اروح الگلبك انه

..داخله بالله ام وليداتي الغاليه انتي

نمنه وصار العصر گعدنه لكيت وفاء تبچي وجايينها ولدها وبناتها
وهيه تكلهم هيج كلو الابوكم ماخلت غلط ماغلطته
كتلها خايبه انتي شتعلمينهم جا اليسمع هيج مييت عليج بعد
ولا جاوبتني وردت تسالهم منين هيه العروس كالولها ماندري
رحت الكرم لكيته يخابر اشرلي اتانيه
خلص وسده

..ها يمه جن عندچ شي تكولينه

..بعد امك اريد اسألك كلت الأبوك على علي اكل گلبي وانه مساع شفته معصب ماكتله خفت

..كتله يمه بس ماجاوبني وماعرفت راضي لو لا

..ابوك ماادري بيش يفكر وانوب هذا كرار راح تبدي امتحاناته وهوه ملتهي بالكوبه والسنه سادس

..يمه خلي براحته لاتحملينه فوك طاقته هوه اذا ناوي ينجح ينجح ويطلع المعدل اليريده وهوه ذكي ماينخاف عليه

..الله كريم ..هم شفت صگر راجع لو لا

..لا والله خل اخابره هسه عفته براحته يرتاح
اخذت تليفوني واتصلت مره مرتين تلاثه ماكو رد اجه سبع يركض كال انت وين تخابر  تليفونه ناسي
اخذته بيدي واخذت شاهين وياي حته من يشوفه يهدأ وكلت اروح البيته
طلعت بره وبيته مسافه ع الجهه اليمنه
دگيت الباب البره مره مرتين
حاجاني رضا
..منوو

..رضاوي عمي صيحلي صگر رايده كله كرم يريدك

..مو هنا مااجه اليوم

..صيحلي امك خل احاجيها اجت امه فتحت الباب اتفضل فوت

..لا خويه والله ماكاعد بس صگر وين ناسي جهازه

..ماادري من طلعته الضهر مااجه وراح تصير غروب توني ارد اودي رضاوي عليكم يشوفه

..لاتخافين هوه من يضوج يروح المكان وحده يرتاح انه هم راح اشوفه

..فدوه اذا شفته خابر امي حته تگلي شيصير وياك

..صار صار

..راح كرم وانه الخوف اكلني مااتصلت بي زعلت من حجيه فوك مااني الخاطره مجبوبه هنوب هوه رزلني
واستحيت من الشيخ وامه وحته ام شيخه موجوده بس المره ابد ماتدخل
كلت غير كون هوه يعرفني ليش هيج يعير بيه ليش ماكال مقدره اهلي
ظليت زعلانه ومتانيه يرضيني شوهسه خفت
ظليت انتظر من كرم خبر ساعه ساعتين صارت خمس ساعات من جية كرم ماكو امي كالت امشي روحيلهم شوفي زلمتج صار نص الليل
رحتلهم بس اني وعفت الجهال يم امي
من سمعت الشيخ يخابر انخطف لوني متت خوف ورجليني ثگلت
جان يخابر ويصيح

..مالگيتوو شفتو المستشفيات شفتوو الطرق ادري دنيا ليل مايظل الهالساعه وين راح مابيه هبطات والله
محمد انه جاي لا انه طالع مااظل بالبيت بعد شنعي ظلتي خل اشوفه وين صار

صرت بوجهه ودموعي تجري ماكدرت اسأل هوه شافني وگال لا اله الا الله عمي لاتبچين كولي ياالله بيش مفاولات النه طبيت جوه لكيت شيخه وامها مناحه مسويات
گالن مااله اثر ابد بس لا ساق وهوه عصلي وانگلبت سيارته

..صحت يمه لا اسم الله عمري گبل عمره
سمعت صوت وفاء گالت هوه شنهي الياخذ عمره غير گصتچ الفگر

..بدون وعي كمتلها ان شاءالله عليج كصتي فگر واسم الله على صگر عمره طويل ان شاءالله حسبي الله ونعم الوكيل بيج حسبي الله عليج عساج بهذا الحال واتعس ان شاءالله مفاولج عليج وعلى عمرج

صاحت شيخه كافي سكتن اسكتن دك تليفوني هذا كرم

..الوو هلا يمه الله يبشرك بالخير يا سجن ليش شسجنه عمت عيني يلله بهاي ولا غيرها

..يمه فدوه وينه

..رايح الكربلا وماماخذ وياه جنسيه ولا اوراق السياره ومحجوز حته تليفونه مو عنده بس فلوسه البجيبه يكول ماجنت واعي الروحي وردت ارتاح بغير مكان وحدي وهسه يلله محصل تليفون وخابر

..الحمدلاه الف الحمدلاه انه رايحه اكل الامي ياهوو يروحله هسه خل احضر اوراقه

..كرم جاي هوه وابوو وعلي يرحون

طلعت واسمعها ادردم وفاء اوف ياوفاء الاه يساعد المكرود رجلج صدك اكو نسوان بلاء
كل الصار منها وماتستحي طلعت تتهمني وتريد تشمت بيه ناسيه الخايفين عليه اخوها
ماشفتلي وحده تحبها وفاء ابد
حضرت الاوراق بالباب وانطيتهم ع السريع راحوو بالليل وبالي يمهم واندعيلهم كالوو ماكو دوام مايطلع هسه حته لو وصلنه نبات هناك والصبح نجيبه وماباقي ساعات ع الفجر بس الدوام بثمانيه علما نشوف شلون نطلعه ونجي

مرت هاي الليله من اصعب الليالي عليه
ثاني يوم وره الغده طبولنه اني ظليت ابيتي حته امه كالت ظلي ابيتج ارتاحي وهوه يجيج يرتاح ابيته احسن مادام وفاء هنا ماتكف من المغثه
طبت السيارات وانه اتنوعلهم صفوهن ونزلوو عيني منه نزل مبتسم جان يسولف وي كرم مامبين عليه ضوجه وزعل اتلگوه جهالي دنك حضنهم وباسهم ومن بعيد اشر السبع يجيبله شتهين جان شايله سبع
عبالك صار سنه ماشايفه
الظاهر بعده زعلان لان حته الباب بيتنه ماباوع
بس عليمن يزعل فوك مااني صابره اصلا المفروض انه الأزعل
حاجيت روحي هيه مال زعل البارحه ابجي وادعي الله يطمن بالنه هسه كمت اتشرط وادور زعل

ظليت ساعه وانه اروح وارجع امي كالت يمه شبيج دوختيني روحي وراه

..لا يمه براحته يجي هلا بي مايجي هم هلا بي
جنت كاعده بغرفة امي فزيت على صوته

..بيچ اكثر ام ارضيوو ياهو المايگدر يجيج
ضنتها وبست راسها
ورحت العمتي بست راسها
شلونج يمه

..الف الحمدلله يمه ليش هيج تخرعنه

..ماادري والله مو قاصد صارت بعد بس خوف بعض ناس ريح اعصابي طلع حركتي بيهم ضحكت مم شفتها فهمت

..حوري حضريلي الحمام

..صار كلشي حاضر
طلعت من غرفة امي الغرفتنه طلعت تراك وجاي اخذ الخاولي سمعت طبكت الباب وقفلته
درت عليه اضحك
..هلا نورت دارك ليش هيج تخوفني

..ماادري صارت صوجي ناسي اااوراق هنا ومدري شلون لگيت روحي باخر سيطره شويه وادخل كربلا وهناك رادوو الاوراق وانه حته جنسيه ماماخذ
كله منچ ولچ ليش هيچ تسكتين شو وياي السانچ شطوله

..ضحكت هاي مني وياك السانها طويل بس لا انه

..لا خيالج

..غير الخاطرك انت مقدرني وواجب اقدر اهلك

..والنعم منچ حبيبه بس التقدير للي يقدر واذا محد قدرج معناها انه مالي تقدير وانه ماارضا بعدين لو امي ومره جبيره اكول تنعذر بس اختي الي ماتقدر اخوها ولا عائلته وتتجاوز بهيج حجي وبدون ماتحط قيمه الاحد ماتستاهل منج صبر اذا ماتردين اطلعين بالوجه الموزين انتي گليلي وانه اتصرف يمكن لو كايلتلي ماوصلنه لهنا جان بحجايه بيني وبينها ومسكتها الصار امس مااريده ينعاد وهسه تعاي هنا حضني مشتاگلچ
.....

كرم مرت ايام وصار وكت السفره براق راح گبلنه بيومين
وانه وجماعتي لحگناه
اتفقنه يحجزلنه بنفس الفندق
رحنه وصلناهم من وكت اخذنه المفاتيح ورحنه نرتاح اجه علينه العصر كال يلله جليين تنامون انتوو عفت اهلي واجيت الكم يلله خل نطلع بدون وعي جاوبته ولك وين عفتهم مارضيت عليه ومافكرت يحس بيه او يبين عليه جاوبته بالاحساس الي بداخلي

..شبيك كرم يتونسون وين يعني عايفهم

..كل عقلك انت شلون تأمن امشي الحكهم واحنه نجي وراك

..امان حبيبي هنا امان

..يبوي الامان يم الله شتعرف وهتا امان حا انتو يهمكم بس الانفجارات والخطف هواي امور تخوف اكثر
ضحك حسن وكال
..ادري انت شايل هم اهله شعليك هوه اعرف بيهم

باوعت البراق ادري انت مو خطيبتك وياهم شتريد منه ماتروح
ضحك كال والله انت سالفتك مو عاديه خاف مواعدلك حبيبه ومتريدني اعرفها عرفته يلمحلي على موضوع اختفائي اخر ايام الدوام
جاوبته مرتبك لا والله مو هيج بس اهلك يحتاجوك

راحلهم ولحكناه عيني عليها وابالي هتا انهي كلشي واكلها
بس وين اشوفها وشلون
اول يومين ماكدرت التقي بيها ثالث يوم خليت براق
يلتقي وي خطيبته وراحو وحدهم وجماعتي هم وانه اتحججت جنت اراقبها شفتها نزلت جوه للفندق جانت تتصل بالتليفون
طلعت وراها كتلها وين توصلين

..يااخي انت شعليك

..بس على كيفچ وبلا هاي االنرفزه مجرد سؤال حته اوصلج

..خجلت من هدوئه ميحتاج توصلني صديقتي هنا واريد اشوفها

..عادي بس اوصلج اخذ تكسي واوصلج للمكان التردي

..لا مكان قريب اريد اتمشه

..اتمشه وياج حتلو بعيد عنج خو مااضايقج ماشي برجليني تره

..انت شتريد مني ليش دايما تتبعني خطواتك

..تنهدت وحسيت هذا وكته ..انه رايدچ وبالحلال بس حته مااصير خاين الاخوي اريدج تفكرين وبعد الدوام ترديلي خبر فكري زين وانه وربج يشهد علي رايدج من الله كبل البشر فكري زين واعرفي وضعي وانتي قرري
وهسه اوصلج وارجع
وبعد مااشوفج ولا اضغط عليج الا بوكت الدوام حته اعرف جوابچ

ماحاجتني شي دنكت ومشت
وانه رجعت وطول السفره ماردت اضغط عليها حته ماالتقي وياها بمكام واحد بس عيوني تراقبها
جنت احس بعيونها نظرة رضا او لمعة ترضيني حاسها معجبه بيه او مقتنعه نوعا ما ماادري صدك لو يتخيلي لان احبها كل الي ادري بي تغيرت من هذا اليوم وصرت اسمع القيصر واسلطن وياه وانسى كل اليمي
بطريق الرجعه نصبوو عليه وكل شويه مصوريني البراق ويخابرني يحجيلي ضحكت وهوه ع الخط
كتلهم ثولان انه شني وناصبين علي غير هوه عاقد وغارك بالعسل ومحبوبته يمه عايفينه وراجعين علي جي اسمع كاظم شني يعني اذا سمعته
ضحك هوه وكال من گمت تسمعه معناها طحت على كولتكم
...

خلصت العطله وداومنه وهالمره السنه اصعب والليل جنت ماانامه من اول اسبوع الي بالدوام
التهيت اول اسبوع ومارحت
وره فتره رحت يومين القسمها بس جانن بنات يمها وهيه هم ماساعدتني اخذ راحتي وانه مااريد احرجها ثالث يوم يوم كلت مابيها مجال لاكاني قيس سلم عليه باثنين اصابع اشرلي مثل التحيه ومبتسم حسيت وراه شي
كلت يجوز اباله بعد شي لازم اخذ حذر بالرجعه 
كملت طريقي جانت واگفه وي بنات اترخصت منهن وصحتها

جنت اريد لسمع جوابها سلمت وهيه سلمن ونزلت عينها
ضحكت وكتلها ها شنو قررتي اكو امل اكدر اتقدم لو اكو شي ماتعرفينه عني

..ضحكت لا عرفت كلشي بس بعد اكو شي مااعرفه انت وين مقرر تسكن

..مايحتاجلها سؤال بولايتي اكيدبس الي ابالي اذا تردين نستقل ابيت ماعندي مانع

..بس اني متخوفه

..خل نتمشه هسه نغيير مكانه شويه من الهوسه هنا وهذا الحجي مو وكته مبدئيا انتي موافقه لوو شنوو

..ماادري

..جا ياهوو اليدري

..ضحكت من گد متكولها صرت احبها وارددها ويمكن انتبهولي عبالهم عندي صديقه تحجيها

..اذا هيج ابارك الروحي معناها شاغلين البال ولو شويه

..دنكت مبتسمه ماكدرت اجاوبه واكله عاجبني من اول يوم شفتك

..مو انشلع گلبي كوليها كولي اتقدم تره والله مستصعب وگفتي عيب من براق والله

..بعدني مامجاوبه رفعت عيني شفت كرم انجر من متنه خالو براق داره عليه وضربه بوجهه خله ايده على شفته جان طالع دم من طرفها  ابد مارفع ايده وخله خالي يضربه من جديد صحت خالو فاهم غلط اني افهمك

دفعه قوي وگله مع الاسف مجنت متصورك انت تسوي بيه هالشكل امنتك بيتي واهلي وجنت اشوفك ابن ناس محترم مو عادتكم تخونون الزاد يبن الشيوخ
جاوبه
..حقك وهذا انه كدامك شتريد سوي بس لاتعوفني وانت خويي الغلط مني وانه نيتي بيضه الله يشهد

يتبع ..