رواية كسرة قلب الفصل الخامس والثلاثون 35 - بقلم نور الشمس

رجعت للبيت فرحان اول ماشفتني امي ام شيخه هلهلت وهيه تهوس

صاد العريس غزاله
فال السعد يافاله

ضحكت وانه اتخيل شكلها صدگ غزاله
بستها براسها واشوف امي فرحانه وخواتي هم من شافني هوسن
بس چانن مبيين عليهن فرحتهن مو كلش انه اعرف بناتنه تهمهن المظاهر وعدهن الأرمله جريمه عرسها ولازم تظل دافنه روحها وي رجلها مو انوب اخوهن متزوج ارمله
مايهمني ابد وشيگولن خل يگولن المهم انه مرتاح فرحتي اليوم ماانطيها الأحد
عبالك اليوم عاقد أول مره وهذا أول زواج الي
اريد الهوسه تخف واخواني يرحون حته اتفرغ احچي وياها
اخذت شاهين الحضني وانه ابووس بي
حبيبي بابا راح اتزوج صح بس محد يشغلني عنك ولا راح اعوفك انت الهوا الأتنفسه

شفته نعسان وعيونه حمر وهوسه وامي ملتهيه
اخذته ورحت الغرفتي
تمددت وخليته بحضني امسح على راسه وعيني بعيونه شلون يغمضن ويرجع يفتحهن
بسته بخشمه هيج انه معوده ابتسملي ابتسامه خفيفه من النعاس حته ضحك مايگدر يضحك
ضميته بحضني اكثر شويه ونام 
اخذت تليفوني اترددت اتصل لو لا
قررت اتصل
رن التليفون واحس گلبي دگاته تزيد
جاوبت

..الووو

..حوراء شلونچ 

..الله يسلمك

..سكتت وماحچت وانه هم حاير شلون ابدي
گتلها
مبروك عليچ وعلي انتي ماتعرفيني وبعدچ مامتعوده وحته انه بس الفرق انه حبيتچ من اول ماشفتچ ظليتي ابالي ويارب تكونين مثل ماشفتچ

..ان شاءالله اكون عند حسن ضنك

..احچيلي شمكمله انتي وين واصله بالدراسه

..مامكمله نجحت من الثاني متوسط للثالث وماداومت لأن تزوجت
بس احب القراءه ودائما اقرأ كتب دينيه وثقافيه وروايات يعني احب هواي اقرا
الشي الوحيد الي يطلعني من جو الكئابه

..حلوو مادام تقرين معناها عندج معلومات واطورين نفسچ القراءه حلوه ومفيده
والكئابه من اليوم ماكوو انتي وياي ايامج كلها سعاده ان شاءالله

..الله يخليك

..ويسلمچ الي احلى حوري بالدنيا
ضحكت من شفتها سكتت وبس انفاسها تنسمع
ياويل حالي كون اشوفهن هسه شلون موردات الخدود
راح تظلين ساكته احچي

..شگول

..كلشي گولي انه اسمع

..ابو شاهين

..بعد عيونه انتي

.جهالي

..شبيهم جهالچ لاتخافين عليهم بعيوني والله

..تنفست بخوف كلامه يريحني بس خايفه
تسلم عيونك اريدهم يتعودون عليك همه اصلا يحبونك بس اني خايفه

..لاتخافين والله ادللهم واحبهم المحبتج وماافرقهم عن شاهين واريد انتي هم نفس الشي تتصرفين وي شاهين

..شاهين لاتخاف علي والله ماراح اقصر وياه وان شاءالله نسعدهم

..ان شاءالله
سكتت ماحچت شي

..حوراء حوري وين رحتي الوو

..وياك بس امي اجت واستحيت احچي يمها گول

..احبببچ

..ها

..والله احبچ

..اني رايحه  امي تصيحني

..براحتچ حبيبه باچر حضريلي الجهال اطلعهم حته يتعودون عليه اكثر

..ان شاءالله .. حاچيته صگر

..امري 

..شكرا

..لاتتشكرين واجبي هذا انه اصلا گبلچ متكفلهم
وهسه همه ولد الغاليه مريتي

سديت التليفون ولکيت كرم متصل اكثر من مره طالعله انتظار
اتصلت بي باركلي وراد انه احاچي فهد على موضوعه لأن يستحي هوه يحاچي
ثاني يوم الضهر وره ماشربنه چاي حاچيته جنه بس انه وياه وگتله نفس الحل الي گلت الكرم عليه يسافر ويشوف روحه
شجع الفكره فهد وگال بالعطله خل يروح ويراجع هم وگال بطريقتك سأله مخلي عينه على وحده
حاچيت كرم وسألته ضحك  وگال لا ماكو شي مامخلي عيني ابد

ثاني يوم مريت اخذت الجهال طلعتهم اشتريتلهم ونستهم واخذتهم البيتنه عرفتهم على شاهين والولد بقيتهم يمي للعصر
حسيتهم تونسوو وامهم كل شويه تتصل اخر شي گتلهم يلله خل نروح اخذت شاهين وياي
اتصلت بيه وانه بالطريق

..الوو

..هلا حوراء شبيچ ماتگليلي اكلهم خو مااكلهم ليش خايفه جاي بالطريق انه وهمه وياي

..مااگدر والله غصبا عني مامتعوده يعوفوني هالگد

..شويه ونوصل ارتاحي

وصلتهم للبيت من شافتني حسيتها فرحانه وعينها عليه وعلى جهالها والملاعيب العدهم وفرحتهم جانت واضحه
اخذت شاهين تلعبه وتبوس بي بس هوه يستغرب ماطول يمها اجاني
وامها كل شويه تندعيلي وتتشكر
طلعت من البيت وانه فكري كله يمها ويم ابتسامتها والفرحه الي بين عيونها كافيه

مرت الأيام وعلاقتي بحوراء صارت كلش حلوه
تفكيرها يعجبني ماتعاند ولا ترضخ رأسا تحب تناقش وتفتهم يلله توافق على اي قرار يخصنه

بس تفكيري ضوجني وخلاني اخاف من روحي ماادري ليش اتذكر مواقف دعاء گبل شلون چانت تستغفلني وتتصل وتحب من وراي وارحع اقنع روحي دعاء تختلف والبشر مو متساوين كل شخص وتفكيره واخلاقه
وحته الانسان نفسه مامعصوم ويجي يوم ويتغير انه اليوم غير عن كبل اربع سنين تلاثه تفكيري اختلف اهدافي حياتي صارت الها معنى اكثر
احاول اقنع روحي وخايف اعكس هالشي على البنيه
بس هيه اصلا مستوره وكلشي اريده بيها
جريت نفس يارب رحمتك ارحم حالي
گطع افكاري صوت امي وهيه تصيحني فهد رايدني
رحت يمه وگعدت اريد افهم
گال اذا تريد اتزوج هسه وبيتك من يكمل انتقلوو اله البيت جبير وبي غرف كافيه بس انه الخاطر مرتك ولأن عدها ايتام وخاف تتحسس على جهالها والا منى عيني تبقون يمي وكدام عيني بس هيه هاي الدنيا والحايط مايمنع گلوبنه والمحنه البينه
اقتنعت بالفكره وگلت اخابرها واشوف
اتصلت بيها

..الوو

..چنت ارتاح من تجاوبني بسرعه احسمي بارد وينزل على گلبي يغسله
فدوه للألووو تخبل من السان الحلوو
شلونج حبيبه
سمعت ضحكتها وكل مااسمعها افرح

..هلا صگر شلونك بخير مادامك بخير

..لوني شويه اطووخ من لونج ..حبيبه بخير انتي شخبارچ فارغه لو بيدچ شي اريد اسولف

..لا ماعندي شي گول

..عندي قرار وياريت توافقين عليه مااجبرج انه

..شكوو شو خوفتني

..اريد اتزوج

..اي

..جريت نفس وضحكت  اي يبعد انه اخذت نفس وصحت  اريد اعرس مليت

..ضحكت انت مو گلت لمن يكمل البيت

..گلت بس مو كلشي ينگال تصدگينه اريد مريتي مليت اريدها بحضني واگعد على لمسات اديها اريد حوريتي يمي راح نتزوج واثث هنا الغرفه ومن يكمل بيتنه نشيل

..صفنت وانه اتخيل حياتي وجهالي وعالم جديد مااعرفهم بس وجود صگر كافي بحياتي والخوف هم بعده شلون بجهالي

..شو سكتي

..براحتك صگر شتريد يجرالك

..ماعندچ اعتراض

..لا براحتك بس هيچ جهالي ابقيهم يم امي ولو صعبه عليه ماادري الله كريم الوكتها

..مالچ علاقه كلشي يمي لاتفكرين فكري بروحچ وبس واتخيلي شلون اذا صرتي يمي شسوي
وشلون اتصرف
اخخخخ مايوم ردتلي شي وصار بس انتي طلبتچ من الله وانطاچ الي احلى هديه

..ربي يسلمك شكرا

..الشكرا هاي مااحبها فد يوم بدليها بكلمة احبك
تره والله سهله ركزي وياي وانه اخليچ تحفظيها

..ا ح ب ك  احبك هيج 

..ضحكت والله بدون ماتطلب احبك واموت عليك بس استحي احجي

..مو خوش سالفه انه مااستحي تره ومااحب الحيا يعني وياي شيلي وي غيري تگبعي بي

..ان شاءالله تدلل جيبلي شاهين يمنه باجر يبقه

..لا اجيبه تشوفينه واخذه مااگدر ابقي

..ماتأمن بينه

..مو هيچ بس روحي معلگه بي واظل قلق وهوه هم يستغرب ولو اخر روحتين تعود عليچ مو تزعلين حوراء بس هوه وكح وحرك لايروح يصير بي شي

..براحتك ابنك انت اعرف

..حسيتها ضاجت مااكدر مو بيدي صح انه جهالها كل فتره اخذهم لليل يلله يرجعون بس جهالها شويه اكبر ويفتهمون
مار.ت اطول وياها وهيه ضايجه
گتلها باچر امرلچ نسولف بالتجهيزات وشتردين گولي
سديت التليفون ونزلت الفهد
گتله بعد اسبوعين العرس يصادف وره جية كرم والعطله مالته بأيام

..يا الله ع الخير من باچر سويلك همه وحضر روحك وهالمره لاتگلي اعرس بفندق
عرسك هنا واسوي عرس ماصاير منه

..انه اصلا عاجبني اسوي عرس واعوض عرسي الراح فرحت وكتله انت بكيفك شتريد تحضر للعرس حضر انه عليه التجهيز هم يلله الحگ غرفتي وغراضي

ثاني يوم اتفقت وياها لازم نعقد محكمه
ورحتلها وره يوم
الصبح وگفت بالباب سلمت على امها والجهال وفتحتلها باب السياره وعيوني تتفحصها
اللون اللابسته بارز لون عيوونها وعاكس على وجهه احس نار  بگلبي صارت من تخيلت الكل راح يشوفها وينتبه الجمالها ماادري ليش هذا الأحساس يخنگني
بس هيه تختلف مو من النوع اللي ابالي انه اصلا شخلاني انعجب بيها غير اخلاقها وثگلها اريد اطرد فكره تطلعلي ثانيه نبهني صوتها

..صگر ناسي شي تريد تگول شي ليش هيچ تباوعلي

..ماكو شي حبيبه بس مو جنچ مطوختها بالألوان والمكياج الي حاطته

..باوعت الروحي يامكياج والله مامخليه غير كحله وحمره لون وردي كلش خفيف گتله مامخليه شي

..هذا كله ومامخليه جا لو خليتي شتسوين بيه

..ضحكت وانه اشوف ملامح وجهه تغيرت جر ايدي باسها
..هالمره سماح غير مره لا ..حاولي كلشي بالمعقول

..خفت من الجاي واسلوبه اختلف وياي فجأه شبي
وشني المو معقول بيه بالعكس عاديه كلش

رحنه عقدنه وهوه كل شويه حجابج عباتچ لاتضحكين لاتحچين عدلي گعدتج
كل شويه سالفه بحيث اختنگت عقدنه  وچنت اتمنى حياتي تتغير مثل جنسيتي اتأملها واقرأ چنت ارمله صرت متزوجه
وهوه اعزب صار متزوج
يارب تتغير للافضل

اخذني والطريق كله انه ساكته وحته هوه مااعرف اني افكر شلون بيه اذا بقه هيچ
شويه وحسيته لزم ايدي

..حبيبه مو تضوجين اروح فدوه الهالوجه تنهدت ادري بروحي ماانطاق تحمليني فتره اوعدچ كلشي يتعدل

..لا ماضايجه بس خلي ابالك انه مو الي ابالك انه حوراء وذيج اريد اكمل حكلامي صارت ايده على حلگي اششش ختولي لاتجيبين سيرتها ولاتقارنين ادري انتي شني بس اتحمليني انه مااعرف شبيه بس اخاف عليچ اريدچ الي وبس حوري 
احبچ والله

يارب نبدي حياتنه من جديد وتكون سعيده ومستقره
الطريق كله ماترك ايدي ويسوق بأيد وحده
چنت صافنه بشكله وانه اتأمل ملامحه
نگدر نگول وسيم وماچنه ابن عرب اكثر ولد العرب يكونون ضهاف حيل وطوال وملامحهم صح حلوه بس يبيين بيهم تعب ومايهتمون للمظهر مايرتبون ارواحهم دشاديش ولفة الجماغ وگبل
چنت اباوع العينه وهوه مركز ع الطريق بس احس حسبات اباله
لابس قميص فستقي فاتح افتح درجاته
وياه بنطرون كتان بيج وساعه ذهبي
عيوني تتنقل وانه اتفحص كلشي بي
فززني صوته

..ان شاءالله عجبتچ

..ابتسمت خجلانه وارتبكت اصلا مامباوعه الك انه

..اي مامباوعه خالتي چانت هنا بمكانچ فصلتني تفصل وفجأه صارت انتي وهيه اختفت

..خجلت اكثر ودنگت

..بطرف ايده رفع حنچي گولي حلوو كل هالكشخه مااستاهل منچ اعجاب

..كلش حلوو مايحتاج اگلك بس انتوو وين شو ماجنكم ولد عرب يعني شكلك انت امك حته الشيخ
شكولكم مو ولد عرب

..هابويه احد گالچ احنه عجم اعوذ بالله لو ظاله تتنوعين وبس احسن هههه

..لا لا مو قصدي الأصل اكيد عرب بس لا قصدي مناطقكم مو هيچ

..وين شفتي مناطقنه انتي تره مو بأرياف احنه لا گيعانه قريبه ع المدينه مو بعيده بس كلها بساتين وزرع وخضار بعدين احنه مامتعوبين الله منعم علينه وعدنه فلح واحنه اندير اعمالنه بس الي تحچين عنهم التعب يغيرهم يحفرون الگاع حفر حته يطلعولهم لگمه الهم والجهالهم
وشكلهم مايمنع حلاة انفسهم الطيبه ولايمنع شجاعتهم المعروفه

..ادري والله مو انتقاص منهم هيج حچيت بس مبينين اكو مثل ماگلت متعوبين

..اي حته بگيعانه الفلح متعوبين وبيهم مايهتمون بأرواحهم وبيهم لايخلصون شغلهم ويلتفتون الروحهم وكلشي بخاطرهم يسووه

..يعني عدكم ماي كهرباء مثلنه بالولايه

..ضحكت كلشي عدنه واحسن من الولايه هم
وگفت سيارتي قريب المطعم
هسه اجيج السياره قفلتها ولو ردتي شي خابريني رايح اجيب غده الچ انتي وامچ والجهال
سمعتها صاحت وراي مايحتاج لاتجيب عفتها ورحت
اخذت كيلوو كباب
ونص دجاجه نص ملح الأمها
طلعت طاير بس اريد اشوفها خاف احد يمها وصلت قريب للسياره فتحت الباب شفتها مغمضه عينها تعبانه

..هاحبيبه تعبتي

..دخت

..وصلتي بس ردت اخذلكم غده 

..ليش تكلف روحك شدعوه هالگد

..شجايب ماتگليلي ماكو تكلفه انه اوصلچ وارجع مااگدر اتأخر عندي شغل بالمؤسسه وهم يلله الحگ اكمل تجهيز ويراد احجز غرفه اليوم تردين اجيب كتلوك

..لا على راحتك انت شيعجبك يعجبني

..اموت ع القنوعه انه يلله حبيبتي نزلي واعتذريلي من الحجيه

..دخلت جوه الأمي لاگتني فرحانه والجهال اجوني يركضون
فتحت العلاليك واشوف شجايبلهم فرحت وانه اشوف شلون يطفرون بفرح

امي اندعتله هواي واندعتلي اكثر اتمنيت الله يتقبل دعائها ويريحني تعبت هواي من انه طفله ورغم صكر ودلاله بس اكوو خوف خوف من المجهول ومن تصرفاته هم مرات يخوفني

مرت الأيام اجهز ع السريع وحايره وافكر بجهالي هوه گال وياچ مااتخليهم بس انه مااكدر اخاف عليهم واستحي لو بيت وحدي يمكن احسن بس هسه لا
وهم متأكده مااكدر بلاهم
چنت احضر غراضي ودموعي تصب
اتصل عليه گبل الحنه بيومين

..الوو

..وين چنتي صار شگد اتصل

..يحاجيني وصوته عالي ارتبكت من نبرة صوته

..والله چنت احضر غراضي ماادري ماسمعته

..ميخالف شبي صوتچ وري انتي تبچين شبيچ ياهوو وياج

..مابيه والله على جهالي شلون راح افارگهم

..وين تفاركينهم حبيبتي غرفتهم يم غرفتچ لاتخافين حضرت كلشي

..سكتت ماردت اكله ماناويه اخذهم خاف يضوج بعدين افهمه گال

..مشتاقلچ واحسب يوم يوم اريدچ يمي والي

..ماظل شي كلهن يومين

..ولأن باقي يومين اريد اوصيچ وهالمره على روحي
حوراء انه تعبت تعبت هواي مو تشوفين عمري تره روحي اكبر من عمري هواي كلشي شايف وهواي ايام نمت وگعدت والقهر بيه ديري بالچ عليه وخليني گدام عينچ بكل تصرف وبكل خطوه تخطيها
اعيشچ احلى عيشه والله بس لاتخذليني

..بعيوني والله ليش احسك ماعندك ثقه بيه

..لا لا مو هيچ والله انه مو بيچ ماعندي ثقه لا بنفسي صرت اخاف اتعلق بشخص واحبه اريد خوفي يتبدد على ايدچ

..ان شاءالله اريحك وان شاءالله ثقتك ترجع مثل الأول واحسن

..الله كريم
شلونهم رضا ورضوان
بوسيلياهم

..يوصل همه هم خبصوني عليك يسألون

..باچر امرهم حضريهم الي خاف اجي مستعجل من الباب واطلع تره عاداتنه العريس مايشوف عروسته گبل اسبوع الا بالحنه والعرس

..ضحكت حلوه هاي عود ليش ..تره انه مااسوي حنه

..ماادري والله ..براحتچ مااجبرچ حچيت وياج ورفضتي من ايام

..مااگدر والله تدري مو اول اريد اكمل ماخلاني
..اي ادري ادري براحتچ

..سلمت عليها ووصيتها
سديت التليفون وحاچاني كرم

..ولك وين انت ابو شاهين

..وين يعني بشغلي ومحتار اركض منا ومنا

..جايك انه وصلت بس ابدل واطلعلك

..ياهلا بيك نورت الولايه

..باهلها منوره بأهلها

..اجه كرم وبدينه نكمل باقي التجهيز واخواتي وولدهم هم يحضرون كملنه شغلنه
ثاني يوم رحت اخذت الولد من الباب اشتريتلهم ملابس ولفات وعصاير ورجعتهم

فهد عزم الكل وبيوم الحنه الناس من العصر الساحه الگدام بيتنه انترست والذبايح الاجتنه هدايا اكثر من الي انذبحت
المهاويل فتحوو ميدانهم والكل فرحان

شيخه..

چنت مشغوله كلش انه وخوات فهد بنات عمي وهنه اليوم الحنه ماراضيات شني ارمله ووفاء تگلي الصوچ صوجج انتي الربيتي المفروض انتي التختاريله مو بكيفه مخليته جايب مره وياها ولد الغرب يربيهم هوه كافي عليه ابنه
جاوبتها

..اهم شي عاجبته وهوه رايدها ولو ارمله جا شبيها
لايسمعونج اخوانج اسكتي
مرت محمد گالت والله يا ام كرم حته اخوانه ماراضين بس هوه صگر صاير مايسمع حچي
ومتمرد.عليكم وعلى اخوانه

ضجت حيل كتلها

..ليش شمسوي شو يركضلهم اربعه وعشرين ساعه
جنت ايدي بالثلج اكسره واحجي
سمسوي صگر چي اتزوج وحده مو على مرامكم
يعني

فززني صوته

..عوفيهن يمه لااتعبين روحچ وتجاوبين
صاح
زهراء بنت اخوو
تعاي عمي جيبيلي من غرفتي تليفوني ناسي
وفاء گالت احنه غير علمودك

..كافي سدي السالفه هسه
طلعت وانه مقهور سمعت كلشي لاكتني مريم جايه وبيدها جنطها وفرحانه تضحك
باوستني وتتبارك

..ولچ شجابچ شطببج منا الدنيا مگلوبه

..لاعمي جواد طبب سيارته الهنا اتعطلنه لأن دوامه ماانكوه اجازه من وكت

..هلا بيكم كل الهلا فوتي جوه امهاتچ هناك

طلعت واسمع الهوسات والدبچات الي تهز الگاع
گعدت يم فهد

اشوفه فرحان
درت عليه

..ابو كرم راضي عليه

..ضحكت تريد تعرس لو تستشهد راضي عليك اكيد ليش هذا السؤال

..هيچ ردت اكمل فرحتي وافرح اكثر

..الله يتمم عليك وعساك دوم فرحان

بالليل خلصت الحنه ورجعنه للبيت وخواتي ماراضيات جي مارضت تسوي حنه
كالن احنه مو عليها نريد نفرح الصگر
گالهن فهد يمچن صگر وبدال هالنگ افرحن ياهوو لازمجن

اسمعهن ومامهتم لاضايج ولافرحان اجت عيني على كرم گاعد بصف امه ومريم گباله صايره
وابنها بحضنها
مارفع عينه عليها بس اول ماطب سلم وسأل عادي وهيه هم گامت وردتله السلام الكل صار عنده ذاك الصار ماضي
ظليت مركز گام ابنها يمشي واجه گعد بحضن كرم
تفاجأت بي وانه انخيل كرم شني احساسه
رفع عينه عليها وهيه دنگت گعده على رجله وظل يبوس بي شويه نزله وطلع
بحضني شاهين ولبوه انطيتهم العلي وضرغام وطلعت وراه

يتبع ..

حبايب اشكركم كلكم كل من سأل عني ودعا الي يارب يسهل امره وينوله الي اباله انحلت المشكله بفضل دعائكم وهسه يلله فرغت اول مابديت كملت البارت الكم اعذروني ماعندي وقت ارد على كل تعليق وماردت ارد على واحد واترك الثاني الكل قريت تعليقاتكم وربي ميشوفكم مكروه ويريح بالكم