رواية كسرة قلب الفصل السادس عشر 16 - بقلم نور الشمس

احضر روحي ليش لا

درت على كرم ولك ابوك سواها صدگ

..انت الجبتها الروحك ياهو گالك تصاحب

..وحد انه حالي حال الشباب

..لا مو حالك حالهم انت تختلف تدري هاي السوالف مرفوضه عدنه اذا تحب حب واتزوج محد مانعك

..وهسه

..هاهيه تكبعت بيها هههه

..انت اضحك وانه محتار

..لاتحتار كول يالله واتقبلها لو خطوبتكم يطوول موعدها بحجة الدراسه ع الأقل سنه وبهاي السنه اختبرها وشوف

..والله ماادري الله كريم
حاچتني امي

..شو تبسبسون صگر شعندك دير بالك تسويلك سالفه وتفشل الشيخ

..لا يمه هذا هوو ماسوي شي والله بس گلولهم ماكو عرس هسه ع الاقل اكمل مرحله اولى

..نحاول والله كريم

ثاني يوم الصبح الشيخ وصه كرم يشتري صناديگ العصير والماي ويوديهن البيت ابو دعاء حته يقدموو للمشيه
من اجه كرم كال ابو دعاء ماقبل گال احنه مانضييف شني حته الماي مودينه ابو گال هم اهل الكرم والنعم منهم بس هاي عاداتنه الي يمشي يجهز كلشي
واتفقوو يرحون الزلم بس واحنه الاسبوع الوراه نعقد ونلبس ذهب
صگر راح وياهم وعيني عليه فدوه هذا اليوم متانيته من سنين
من اجوو فرحانين وفهد گال اتباركوو الصگر من اليوم صارت برگبته مره ولازم بعد كل خطوه يحسبلها حساب
الكل فرحان ماعدا صکر عنده يوم عادي حته مجامله مايجامل
گلنه شكم يوم ويتعود
الاسبوع مر بين تحظيرات المهر وبين علاج وجهي الي بيين عليه تحسن عيوني صارن يغمضن وجهي شويه تحسن بقه العووج واضح من احجي يبين
گبل العقد بيومين رحتلهم انه ومحمد زتني اشترينه ذهب وحجزت بدله
اشترت تخم كامل وياه بتوت سته وحجل ومحبسين وحلقه ومحبس الامها هديه
الأم والبنيه فرحانات رغم امها متردده من زواجها بهيج عمر وگالت تردين الصدگ انه مو راضيه بهيج عمر بس علي يگول ماكو احسن منهم عائله والنعم منهم والولد شاريها اكثر من مره يخطب وانه بس بنات عندي تعرفين هم اريدهن يستقرن وارتاح من جانبهن
طمنتها وكتلها انه ادير بالي عليها واعتبرها بنتي انه ماعندي بنيه ومرت صگر بنتي
انطيتهن المصاريف ورجعت
جنت تعبانه كلش
ذبيت عباتي وشالي مددت رجليه
گاعده يم امي بغرفتها تسالني واجاوبها
اجه فهد

..گواها الله ام كرم خو ماتعبتي 

..كوه حيلك بعد الروح انت عدلت كعدتي اجه گعد يمي لا فرحانه تعب الفرح مايهم

.شفتيها جنتچ

..شفتها تخبل عين الله عليها جنها طير

..الله يستر عليها ..اشترن على مرامهن لو صار اشكال

..مثل ماردت اشتريت اكثر من اليردنه والي ابالهن شكم صگر عدنه

..وينه هوه غير كون يصير ادمي

..لاتلح عليه بحجييك خلي على راحته

..شريد منه انه اريده يصير رجال ويعرف الي يسوي

جاوبته امي لاتخاف يمه يصير بعد هوه سبع ومرتب شناقصه ومايصير
گمت من يمهم حضرت العشه كملته وقدمتلهم عشاهم رتبت المطبخ وسويت جاي وره ماخلصوو عشه كملت وصعدت اخذت هدومي للحمام
طلعت من الحمام لكيته يخابر اشرلي مااحچي
نزلت الخاولي وبديت انشف شعري وگفت گبال المرايه امشط واخلي مكياج وعطر

اسمعه يحچي

..لا لا ابد مامقبوله منكم هاي انتم ناس اجاويد وهالسالفه اطير بيها ارگاب

.ذبيت مشطي وصفنت عليه يحجي ومندمج ياشر بيده
ويصيح

..انت تعرف الفقير مايملك غير عرضه واذا ابالك تسدها بفلوس الفقير مايبيع عرضه انه مااقبلها مو همه
قربت عليه صوت التليفون عالي
ذاك اليخابره يكله انت ويانه لو ضدنه
جاوبه
..وي الحگ انه ابن امي وابوي ماارضاله لو ابني لطالع من ظهري ما ارضا يسوي هيج الله فوگكم لاتستهترون باعراض الناس لايصير بيكم اتعس بعدين عرض اخوكم عرضكم شلون ترخصون بخوكم
ذاك ضل يحاجي
صاح بصوت كافي انه جبيركم واگلكم مايصير التردونه واخوك زلمتها خل يجيني هسه
لا وكتها بعدنه گاعدين خل يجي

سد التليفون وهوه يحجي الله يطيح حظكم غيره سز وين وصلنه وين راح توصل بينه بعد

..على كيفك فهد گلبك مو زين عليك

..هوه ظال گلب من وره هاي السوالف
الله عليج حمه يتهم مرت اخوو بالعاطل الحمه طول عمره  اخوو
على عركة بين نسوان بالشارع يفضحها ويسمع جيرانه
التكتل اسألهم اخوكم عنده دليل يگولون لا حشاها بس هيه ساعة حرگه وحجاهن
زلمتها جان طالع ومن راجع مامشكيها مخابره اهلها ماخذيها وودولي گوامه هسه بأعتبار انه شيخهم

..فلك طره شلون هيج يحچي

..طايح حظه .انطيني هدومي ابدل راح يجي زلمتها

..انطيته الملابس وطلع صاح كرم وصگر گلهم اريدكم يمي تسمعون
ساعه واجه كرم راد ضيافه
اصوات تعله وصوت الشيخ يسكتهم
تاخرو يلله طلعوو
اجه الشيخ ووراه كرم وصگر
گلهم سمعتوو الصار اتعلموو اخذوو درس
علمود نسوان اندفع منها خسر اخوو وباجر غصبا عنه يعتذر كدام شيوخ وساده زينه اله هاي
تعلموو وصيروو اسباع الياخذ حجاية مره بساعة حرگه يسوي المصايب كتول وفصول من هالسوالف
گال تعبان انه اروح ارتاح تعاي شيخه

صعدت وراه

شني شگال الك زلمتها

..زلمتها عاقل احسن من اخوو رغم ذاك اكبر منه
گال اجيت لگيت البيت مگلوب وهيه تريدني اتعارك وي اخوي واخوي متحضر وانه انغثيت من حچيه اعرف روحي بس يعيد حچيه يمي اكتله وبيتنه متروس اسلاح طلعت من البيت حته ارتاح وارجع اعاتبه من رجعت مالگيتها جايين اخوانها ماخذينها
واخوانه يكلوله طلگ شني تطلع بدون شورك فوك عملت اخوهم يردون يسودونها كلش
..وهيه ليش توصل الحچي الأهلها

..ماادري هيه هم غلطت بس يجوز المره ماله خل ينحطله حد

بدل ولزم راسه وتمدد
گربت عليه لزمت راسه ضغطت على مكان الوجع

..راسك يوجعك

..اي والله ..لزمي شعري جري حيل حته الوجع يهيد

..سويت مثل مايريد غمض
وانه اتنوع الوجهه اروح فدوه الهالوجه مرت عليه ذيج ايام عرسه ويوم الحنه ودبج المهاويل احس گلبي انخمش يايمه شينسيني هذا اليوم
فزيت على صوته

..مليتي مو چنت مرتاح ليش هديتي شعري

..لا والله بالي راح بعيد

..اي ادري وين راح راح اليوم الزفه انه هم هناك راح بالي اليوم الي چنت كاره روحي كلش
تدرين بليلتها للصبح مانمت خايف عليچ خاف يصيرلج شي بس فاجأتيني من نزلتي وكلشي مابيج جنت ادري بداخلج بركان اخخخخ شيمسح ذيج الأيام من ذاكرتي

.الحمدلله عدت

..اي عدت بس بعديش بعد ماانتي تاذيتي وگلبي تعب

..اسم الله على گلبك

..تدرين هسه انه شريد

..شتريد

..اريدچ انتي اريد اطفي حرورة گلبچ وانتي تريحين راسي

..ضحكت وانت شمدريك بحرورة گلبي

..اعرفها من لمعة عيونچ من ترتاحين ومن تزعلين يبيين عليها نسيتيني غير حافظج انه

گام بعد ماچان مخلي راسه بحظني
همسلي طفي الضوه وتعاي يمي

ثاني يوم راحو للمشيه العرفته
اهلها شارطين تعزل وحدها وحماها يعتذر من اهلها ورجلها قرر يطلع من البيت كله مو بس يعزل بداخله
انحلت مشكلتهم بس بقه بين الاخوه زعل والحچي خسن الگلوب وكسرها وكسرهم الله اليعلم شوكت وشلون يجبر

ثاني يوم اجتمعنه كلنه يوم العقد الكل فرحان الهلالهل والهوسات خواته وبناتهن وولدهن وي الولد بره ونسوات حماي كلنه مجتمعين حته العصر نروحلهم
همه بالولايه بعيدين عنه مسافه
الي تلگط الخضره والي تعصر طماطه للطبخ والي واگفه تعزل ذني بناتنه وسعاد واگفه واگفه بالباب ادگ علي ورباب تغني

امشن نتبارك لأبن اللوه ارگاب الخيل
والبنات يرگصن ويهوسن
انه مبتسمه وطايره من الفرح حته بالي مو يم وجهي
انتبهت الروحي من انه ضاحكه رجعت اضحك احس الجهه المشلوله تتحرك
رحت للمرايه شفتها تتحرك وباقي عوج قليل كلش

هنه يرگصن ومامنتبهات الي رجعت وگفت على جدري حمست اللحم وخليت البانيا (الباميا)
ورجعت وياهن اهوس

فرحنه واليحبنه يفرح ويانه
وهذا اول فرح شفناه بدنيانه

ياخيه اتباركلي عريس الولي

نشتغل ونهوس ونرگص فرحانين كلش
طب صگر اتلگيناه بالهلاهل ضحك حسيته فرح الفرحنه
صعد اول درجات وصاح

..يمه تعاي شويه يمي

رحتله هايمه گول

..شني عود اليوم انه اللبس ذهب

..اي يمه لازم تلبس جاانت مافرحان

..خايف يمه خايف تطلع موخوش بنيه وابتلي

..يمه والله تخبل ابنيهزعاقله ماادري شلون انت قشمرتها وهسه تگول خايف

..شسوي التفكير ذبحني

..بالخطوبه تگدر تتعرف عليها وتشوف

..الله كريم ..بس هيه حلووه موو

..ضحكت تخبل هسه تطلع مشتاقلها

..اي والله يمه مشتاق الها وحبيتها انه بس خايف من الاسمعه ويصير دنيا مگلوبه

..من وراكم ومن بلاويكم لو خليف كبل لاتحاجيها مافكرت هيج
ردت اخفف عنه ضحكت هسه تشوف عيونها ورموشها وتضيع علومك

..ابتسمت شفت امي تضحك عادي يمه هاي وجهج متحسن

..من فرحتك بعد امك انت

..دوم الفرح الج يالغاليه انه طالع شوي اجي ولتحضر رايح يم فهد

طلع صگر انطيناهم غداهم خلصوو الزلم غده وگالو حضرن ارواحتچن
اليرحون وي صگر گد الملجه ويطلعون فيصل ومحمد وفهد
بس احنه كلنه انروح  ومايقبلون ناجر سيارات ياخذونه لا ولدنه همه اليودونه
فهد اجه گال انتي ترحين بسيارة صگر انتي وكرم روحي وياه
ردت اكله وياك صاح كبل لااحچي ام حسون وينج خويه انتي وامي بسيارتي
عرفته ماناسي من واعد وفاء گبل اشهر كلها انتي اول الحاضرين
اخذ وفاء وامي وطلعوو
طلعنه كلنه جوگه وحده السيارات صافه وولدنه ثيابهم بيض يلمعن وغترهم تطاير بالهوه ربي يديمكم ويديم جمعتكم گلتها بگلبي
طشن النسوان ع السيارات وانه وكفت اشوف خاف اكو نقص ابلغ فهد
سعاد وبناتها صعدن وي ابوهن صلاح ابن عمنه ورباب وولدها صعدت وي رجلها ونص من ولدها راحو وي بيت عمهم الثاني نسوان فيصل اثنين صعدن وياه الولد ماراحوو والبنات ماكفن بالسياره صحت المرت محمد حماي خلي مريوم تجي يمي بسيارتنه هيه واكتفتء بت فيصل وقسمن الباقي بين سيارتكم وسيارة اهلهن

اجت مريومه تخبل رغم سمارخا سمار خفيف كلش وعينها الشهل وشعر اشگر حلوه كلش وانه اموت عليها
صعدت هيه واكتفاء بت فيصل الزغيره

كرم خليته يصعد يم صگر بالصدر وانه والبنات وراهم
احنه هلي اعراسنه ومناسباتنه يجوز البعض يعتبرها هوسه بس احنه بدون هاي الجمعه مانحس بفرح
فهد كبل لانطلع وصه مانريد صوت ابد
وصلنه ونزلوو الزلم گبلنه دخلوهم من غرفة الخطار واحنه دخلنه ع الهول
هلهلنه هلاهل بس بعد الزلم كاعده
عيني ع البنيه تخبل ناعمه بيضه وضاويه ابدلتها لون وردي
كل حبايبنه صفنن عليها وعلى حمالها رغم بناتنه كلهن حلوات بس هيه ملامحها جذابه
شويه واجت امها گومتها واشرتلي اروح وياها اوگف
سمعنه الشيخ يسالها كررها تلث مرات وافقت
هلهلنه احنه وسمعتهم يعقدون اله دموعي نزلت فرحانه اليوم حسيت بتعب الربا ومجازاته اولهن شفته عريس
خلص العقد طلعوو اخوانه وعمام الابنيه ..وابوها
گال الصگر تفضل شوفها

اجه صگر عينها منها متوقعته يستحي لو يدنگ ابد ماخجل ولا ارتبك عادي عنده وصل يمها سلم وگعد
والبنيه حيل مرتبكه
لبسها ذهب وباسها واخذو صوور وطلعنه هوه ويانه
ارتاحيت من خلصت على خير
رجعنه للبيت فرحانين الكل يسولف بجمالها وجرائت صگر
واتفقوو العرس يكون بعد سنه اهلها فرحوو ماعدهم اعتراض
مرت ايام خطوبة صگر اول شهر ماقبل يروح وگوه يخابر
بعدها صار يخابر بس مايروح طلع قبوله بجامعة الكوفه
وظليت الوب ماادري يخابر لا
عجبته البنيه بعده مامرتاح من جانبها
كرم بهاي الفتره يدرس بس مره سألني يمه بنات عمي هم يجوهن خطابه

..اي يمه هواي يجون بس عمك يكول مامستعجل عليهن بعد

..اي احسن حته مريم يعني

.شبيها مريم

..اكول اكو احد رايدها

..اي

..ها ياهوو

..انه رايدتها الواحد.بس كون ماتعرس منا لمن يكبر
شفته ارتبك عافني وطلع
ضحكت وانه فرحانه بلكي مخليها اباله شفايتلي
وتصير جنتي

مرت ايام وصكر ماكو بس على گد التليفون وتجينه صوره تخبل
بيوم اجه الشيخ عصب گال خابريلي صگر هسه ارد.اشوف اخرتها وياه شنهي

..شني شبي

..خابري وماعليچ

يتبع ...