رواية كسرة قلب الفصل التاسع 9 - بقلم نور الشمس

..احچي وين جنت

..حبيت اشتم هوه ماجايني نوم

..صگر انطيني تليفونك انه موجاهل ولا ازغر اولادك وتضحك علي احچي من الاخير عندك شي رايد وحده من باجر اخطبها بس هذا التختل مايعجبني ومايمشي عدنه

..شيخ انه مو جاهل تليفوني ماانطي بي شغلات تخصني

..فوت للبيت وجرب تعيد السمعته راسك اكسره فاهم

..طبيت للبيت وگلبي دگاته تتسارع اريد عذر يشفعلي ماكو شطلعك بهالليل وصلت للصاله
بدون ماافكر ردت اصعد وسمعت صوت فهد شگ طبلة اذني

..صگررر

..امر شيخ

..تعال هنا انطيني تليفونك 

..انطيته التليفون

..افتحه الي انت تقشمرني لو شني تليفون بي رمز ليش منطينياه

..فتحته وواكف احس الدنيا تفتر بيه
اخذه مني ودخل ع البرامج يگلب وعيونه بعيوني حمر دم صايرات

..عفيه بالسبع عاشت ايدك تربات اخوك
هيه هاي دروس التقويه موو

..سكتت ونزلت راسي

..ارفع راسك واحچي

..شگول

..ماتعرف شتگول .بس تعرف تقشمر بنت العالم

..تنوعت امي واكفه ومرته الجديده طالعه منا انه احب شوفتها انوب طالعه بوكت ماهوه يرزلني حيل ضجت انتبه علي وتنوعلهن

روحن الغرفجن وانت تعال وياي للغرفه بساع اريدك گبلي واصل

مشيت گدامه وان كاره روحي شافني بهيج موقف وانه اريد اثبت روحي كدامه صرت شاب ويعتمد عليه واتوازه وي اخواني حته اخلي اعتماده عليه طول عمره مدللني ويعاملني اكبر من عمري
موقف اليوم راح يزغرني بعينه

..اي ياصگر هيج ربيتك انه هاي مجازاتك لمك واتعرف وراها هواي شمات خاصتا على تربيتك من انت زغير يتمنون بيك نقص حته يذبون اللوم بيها
ربيناك تقشمر بنات الناس ليش ولك تالي اعمارنه حظنه وبختنه على ايدك يولن

..شيخ يعني حالي حال الشباب البعمري احب وانحب مامسوي شي جبير

..ولك مو جبير ..هذا حجيك كله وصورها العندك مو جبير شني الجبير الي تريده تريد تجمعكم غرفه بالحرام يلله بعينك يصير جبير
احجي منين هيه وبتمن هاي مو من عربنه

..بت شريكك بالشغل ابو دعاء بعدني مامكمل احس وجهي اندار من قوة الضربه ولاعبالك جف شل وجهي شل دنگت وماحجيت وامي فتحت الباب

..يمه صگر شبي ليش وياه.. فهد هوه شعليه باليصير بينه لاتذب حركتك بي

..انتي انجبي واطلعي وخلينه انه وياه اشايفه روحچ انتي هيج مطيره عقلي واظل اجلب بالرايح والراد واطلع قهري بيهم
قهرج اطلعه بيج لاخايف منج ولاعدتي تهميني اليمنعني العشره والي چان بيناتنه بس
اطلعي وعوفيني وي صگر وديري بالج تدخلين بشي

..طلعت وانه مستغربه حالته صاير نار معقوله مني لو صكر مسوي طركاعه يمه ابني شمسوي يروح بدربه ويرد بدربه
طلعت وخليتهم

فهد..اي صگر سولف بنت ابو دعاء هاي عمرها ١٦بگد كرم ابني شلون ضحكت عليها وقشمرتها ولك ناس اشراف ذولي رجال ونعم منه وامها مره محترمه ومتدينه من وقارها وحشمتها انه استحي اصد عليها انت شلون تخرب بيتهم ولك احجي

..شيخ مره هوه اجه للمكتب وانه هناك وفيصل احتاج وصولات وهوه ناسيهن وداني عليهن وطلعتلي هيه شفتها وعجبني شكلها وصرت اروح
عليهم كل مايحتاجون وبعدها راقبتها من تطلع السوگ وصاحبتها

. الله يطيح حظك انت مابيك صوج الصوج صوچي هواي كبرت راسك وصرت ماتعرف تتصرف
من الاخير البنيه باجر اخطبها الك

..لاشيخ مااريد

..قسما بالله ظهرك اكسره باجر اخطبها وخلي ابالك ابوها ماينطيها وراح اظل اخطبها كل مره منا لمن تصير الك

..بعد احسن ماينطيها  انه مااريد اتزوج هسه

..ماتريد تتزوج بس تريد تضحك على بنات الناس انت تعرف شتحجي لو ناوي ارتكب بيك جريمه شو صاير ماتعرف تحجي ولاتقدر

..الصوج مو بيه بس ..هيه هم قبلت تحاجيني يعني هيه راضيه بالي يصيرلها

..شوف لاتختبر صبري لازم ايدي گوه عنك واحد غيرك اكسره تكسر ..كل بنت تحب اليهتم بيها وبطبيعتها ادور حب وزواج وستر من تحب البنت يااغبر مو مثلك انت هاي فكرها ياخذها للبعيد تريد رجال يصونها ويحبها وتكوون اسره من الاخير يدورن زواج
انت لو مامعشمها بزواج ماظلت وياك ولاودتلك صورها ياطايح الحظ

..شيخ بس انه مااتزوجها

..مادام شفت صورها ماتصير الغيرك واشريها شرايه الك ..ولك ياحيوان تقبل تتزوج وحده شايفها رجال غيرك احجي تقبل لو الناس لعبه عندك
انت الخطيت وانت التتحمل

..صور عاديه بملابس بيت واذا شفتهن

..انت صاحي لو تريد ارتكب بيك جريمه تريدها تلبسلك ثياب نوم ماعاجباتك ثياب البيت
اطلع وباجر هيه تنخطبلك

..طلعت ضايج وافكر انه مارايد زواج انه صادقت حالي حال الشباب بس مامتوقع هيج يصير

فهد ..

طلع صگر وتليفونه خليته يمي والليل كله تدگ عليه قفلت الجهاز وبداخلي نار انه منين الكاها من شيخه من صگر
صكر ومحلوله سالفته اخطبها اله ماينطيها هسه ينطيها السنة التجي
ادري بي يفرح  بنسبنه
طلعت للصاله مغمض عيوني واحس راسي يريد ينفجر تمددت ع التخم 
حسيت ادين انمدت وخرت ايدي وبدت تفرك براسي رحعت راسي وره استرخيت ابتسمت رغم التعب شيخه حست بيه جانت هيج تسويلي من تحس بيه تعبان
لحظات احس بيهن ارتاحيت ماادري الوجودها يمي لو وجع راسي راح لزمت ايدها اريد احاجيها
حسيتها مو ايد شيخه اعرف  ايدها وحافظها
فتحت عيني ودرت عليها

..دجله ؟
شعندج هنا وياهو الگالج تجين يمي

..شيخ شفتك معصب وضايج ومبيين راسك يأذيك ردتك ترتاح

..مشكوره ماقصرتي هسه روحي خليني اريد ارتاح

..ليش ترفضني شيخ ليش تزوجتني من الاساس
ليش مارفضت طلب اخوي اذا انت تدري ماتگدر تكسر بمرتك

..انجبرت اقبل ردته يرتاح وانتي تعرفين

..انه هم مثلك انه هم انجبرت ومو هاي عيشتي الاحلم بيها بس صارت بعد وبديت اتغير وصرت اريدك واحبك اتخيلك رجلي من صدگ واتمنى الحگلي على جاهل منك يعني انت ماتفكر عندك هواي جهال الله يحفظهم انه شني مصيري

..مسحت وجهي واحس كلامها اربكني
دجله احنه متفقين مو صح شني الي تغيير

..مامتفقه على شي انه انه انجبرت اكول اي وبس انت ماتعرف البيه اگوم احسن

..شني المااعرفه كلشي صار بينه على اتفاق صار بيني وبينج تنهدت دجله مالي خلگ والله روحي الغرفتج وبطلي اهتمام بيه جنه متزوجين صدك الردتي انتي واخوج نفذته وراح اظل ع الوعد الاخر يوم

..ماردت شي انه ماردت بجيت وطلعت بسرعه
المشكله ماجان يفرق شي عندي وجنت اريد اخلص منه  بس من شفته وعاشرته بفتره قليله  حبيته  وعجبني اكون مرته من صدك
بس ماراح اعوفه الا وانه مرته

شيخه..

كعدت ثاني يوم الصبح الشيخ تعبان مبيين علي ماسلمت هوه وولده ملتمين داير مادايره
وامي حاجتني

..الوحده تنزل تصبح تكول شمحتاج رجلج غير تشوفينه شيحتاج مايحتاج

..يمه خليها مااحتاج شي منها ريوك واتريكت وهسه طالع

..باوعت السفره ممدوده ودجله بالمطبخ گلت بصوت عالي لازم الشيخ سمحلج اطبخين
خزرني بعينه ورفع حاجبه واشرلي بأصبعه

..اششش مالي خلك لغاويجن الغن وراي
دجله جاوبت لا ام كرم شفتج تاخرتي بالنومه كلت تعبانه انه اسوي عادي

..ياا هاي شبيها متغيره بكلبي شوراج جنج تردي اخذي مايهمني بعد سمعت الشيخ صاحني يحجي وعينه على صگر

..اليوم تودين على سعاد ورباب وانتي وامي روحن خطبن بنت ابو دعاء تعرفين مرته انتي خطبن بنته الصگر

صگر..رفعت راسي سواها صدگ اشرلي بمعنى عندك مانع
سكتت

فهد..اباركلك هسه لو من يرجعن

..بكيفك شيخ ياهوو يكول ينطون

..لاتخاف ماتصير الغيرك لو اعرف اشتريها شرايه
اجاني اتصال

..الوو

..ها محمد شكوو
جايك جايك

طلعت واجاني محمد

..شيخ اجاك ابو حيدر يريدك تاخذ عطوه من العشيره ...
..شنهي طلابتهم

..بيها كتل

..ياستار متعمد لو خطره

..ولد اثنين طلاب كليه اصدقاء كلش ورايحين ع الشط الاثنين مايعرفون يسبحون مدري شلون طايحين واحد طالع والثاني مات واهله متهمين صاحبه

..الولد وين هسه

..يحققون وياه

..ناخذ عطوه ونشوف اقوال الولد شني حته نحكم ونفصل

..محمد اليوم وديت النسوان يخطبن لخوك

..صگر

..اي

..شعجب مو ردته يدرس

..ردته بس هوه طايح حظه جابها الروحه رايدها واحسن مايتماده

..الي تشوفه

بالي مشوش بشهامه ونهايتها وياها وبصكر وسوايته ودجله الي حاس وراها شي وبدت تغير اسلوبها وتغريني اعرف هيه رايدتني واتجاهلها الهسه ماضامن روحي شگد اطول بالرفض صار شهرين ونص شيخه رافضتني ووعدت روحي بعد مااوصلها بس مرات اروحلها بدون مااشعر ومااحس على روحي الا من ترد علي رد ياذيني جاي تجبرني افكر بدجله رغم مو رايدها بس بوكت حاجتي ومن اشوفها ترفضني افكر عندي غيرها وحلالي ليش مااروحلها شتريد تسوي اكثر
تالي انعل الشيطان والغي هالفكره من بالي
كطع صفنتي صوت محمد

..شيخ ماگتلي اذا مو متعمد يعتبر كاتل يعني يغرك روحه وي ابنهم يلله يطلع مو كتال

..لا مو هيج لازم اكو دليل بغير الدليل ابنه علي يمين
قانون العشاير يگول
(البينه على من ادعى واليمين على من انكر )
واذا اكو شهود بالقضيه شهادتهم تكفي
خل نشوف الولد واقواله ونحلها

شيخه ..

من طلع فهد امي استلمتني رزايل وحجي وانه افكر بحجيها بس مااحس كلبي انجبر حته لو يريدها جااخذها مامعقوله الخاطري ساكت والهسه انه مو مصدكه مامتقرب الها
امي تحجي واجه صكر ضحكت وكتله

..صلاوات يابعد امك محتاره شسوي اليوم افرح بس لو ادبج لو اهلهل يوم عيد واشوفك عريس

..يمه شتفرحين مارايد هسه اتزوج

..ياا والخطبه

..فهد يريد

..امي كالتله شنهي يريد وانت مارايد حزوره هيه

..لايمه بس هوه يعاقبني

شيخه ..خاب ماتسكت يعاقبك يعرسلك

..ماتعرفين فهد دره بيه مصاحب وعنده هاي عيبه وماتصير ومو ثوبنه

شيخه ..هذا الصدگ ..يادهر طرني كون بنت ام دعاء مصاحبها

..هشش يمه فضحتيني جانتي مايتسولفلج سالفه سكتي لاتسمع شريجتج من الله كارهه

..هههههه لاتخاف من يروح الشيخ تدخل الكنها ماتطلع لمن يرجع
سولفلي سالفتك

..حجالي كلشي مارضيت عليه وحجيت وايدت فكرة الخطبه

..يمه جاكونك رايدها اخطبها لو بالحلال مايحلالك

..مو هيج يمه السنه انه اروح كليه وامتحاناتي راح تبدي مااريد انشغل وهم هيه يختلف طبعها يجوز تعجبني بس ماترهملي

..من كون تعرف هيج ليش تورط بنت الناس وياك

..انتي صرتي مثل فهد شاب ويعجبني وصارت

..حجي فهد صح جاهوه شيخ يستر بالعالم وانت تجي تسوي الفضايح

..خو انتي مزاعلته وياي صار صح

..ياا وهاي شلها غرض الحگ حگ

..يعني تخطبين

..اي

..بلكي اهلها ماينطون

..والله شكلك هيه زغيره وانت هم بعدك زغير مااعتقد ينطون بس ابوها حيل يقدر اخوك واخوك كال بكل وسيله تنخطبله

..اووف هوه شطلعه البارحه

..ولك وانت مااتوب ماخابرت بغرفتك

..ادري بي يصعدلج بالليل وكلت لايسمعني

..ولك ماصاعد.لاتجذب

..والله يصعد يوميه يخليني اكطع مخابرتي 

..ماادري ماحاسه بي

..هوه انتي لو حاسه جا التهه عنه وماخليتي يدور سوالف صكر وغيره

..ضحكت ولك شو ماتحترم انت

..يلله يمه اروح اقره

..روح يمه الله يوفقك

وديت على سعاد ورباب ورحت انه وياهن وامي
رحنه نخطب شفنه البنيه تخبل جنها طير
حلوه كلش
بيضه عيونها سود وصاحبة ارموش ثخان واطوال جنها مكحله والخد والشفه وردي مامخليه ذرة مكياج بس هيه تخبل كلت ياريت تصير من نصيبه
شعرها طويل وجسمها مبيين اكبر من عمرها
حجينه للام رايدين نسبتكم وابنه تعرفونه ونخطب هسه من يداوم كليه يتزوج الام تفاجأت وكالت جيتكم على عيني وراسي
طلعنه للبيت
فيصل وصلنه نزلت تلكتنه

وفاء تعد وتصف

..انه وحد عازلاتني من خطبة اخوي ورايحات انتن بس ..شيخه جنج مصدكه انتي امه

..اي خيه مصدكه جاليش مامصدكه سهرت الليل اهز مهده ومن يتمرض اتمرض وياه اجلت حملي سنتين خاطر اعتني بي وانتي وين جنتي جبتي وراه نوبتين كبل كرم اكو يوم غسلتيله بدلتي ليش تحجيني كوه

..ولچ انتي محد كبر راسج غير فهد كسر راسج بمره وبعدج متكبره عليمن هالخشم العالي

..همت عليها اريد اطگها وسمعت صوت فهد صاح

..وفااء ليش ماتحترمين نفسج ياهي التردين راسها ينكسر
ام كرم ماينكسر راسها بزودي وزود ولدها عندج شي احجي الج وحكج يوصلج كون غلطانه وياج انه هنا اتصرف غيري محد اله حگ يحاسبها

جريت نفس بس عيونه تخزرني عرفته مو راضي لأن ردت اطگها
جاوبته وفاء

..شيخ ترضاها يرحن يخطبن وانه ماادري

..نزعت عباتي وغترتي ..وانتي على هاي هاده
انه كتلها اخذي سعاد ورباب هنه الكبار حجي نسوان وابدايته ماناخذ العشيره كلها بالملجه بيج خير وتدللين شرط علي اول سياره انتي بيها تعاي جيبي هذا الحلو البيدج انطينياه
هلا بالسبع هلا بزلمة خاله تعال يكولون ثلثين الولد ع الخال وانت ابوك ابن عمي واخوي لازم تاخذ هواي مني

..حسيته بردها سكتت وماحجت ابتسمت من شافته يلعب ابنها رغم السانها وياي وكرها الي بس تحب اخوها حيل ومتعلقه بي وهوه هم يموت عليها مرات احسه يحبها اكثر من خواته الباقيات بس ابد مايسكتلها لو حاجتني وبنفس الوكت يحب مايزعلها
اجه شايل ابنها يلعبه ووصل يمي
همس

..شيخه ديري بالج تنعاد خواتي ماتمدين ايدج عليهن
مهما كان غلطهن ابيت اخوهن ماينضامن حته لو سلمتج البيت يبقه صدر البيت الهن

..بلعت ريكي وسكتت ماجاوبت شي

سأل بصوت عالي

..اي يمه ماكلتي شكالولكم

حجتله اني وسعاد ورباب هم اداخلن بالحديث
وجه الحجي الي

اي شيخه
عجبتج الچنه لا

لحظات تغيير مزاجي ابتسمت بس سمعت الچنه اي هوه ابني وهيه صدك بمثابة چنتي
بدون مااشعر  حجيت وانه مبتسمه

..الله يجعلها من نصيبه جنها حمامه تخبل وحبابه ومبينه فرحت وبالخطبه

..الله يتمم ..كمت من مكاني اريد ارتاح
لاكاني سبع يركض

..بابا بابا لاتخلي يطگني

..ياهوو هذا اليطگك ولك سبع اسمك عيب هاي الشرده
كرم ولك ماتستحي بطولي وتركض وره اخوك سيع بطول رجلك شتريد منه

..بويه انت دللته ودلالك طلع عينه

..شبي شسوالك

..كسر حاسبتي

..تتصلح وان ماتصلحت تجيك جديده عوف اخوك لاتخوفه

..اشرت السبع بيدي انه الك

..ظل تخوفه الحد ماتتعاقب واشوف ياهو ينطيك حاسبه بعد
راح كرم
وشلته ولك سبع ليش ماتصير عاقل لاتتوكح خلافي  محد يحميك
رباب كالت اسم الله عمركك طويل
الله يسلمج درت عليهن
اخياتي  ظلن ع العشه وانه اودي على زلمجن واولادجن

شكرنه وظلن ع العشه ودجله مافاركت وفاء عرفت هيه الي تساعدها
خلص الليل واحنه ملتهين حته دجله سوت شغل
وهنه هم مايجن خطار يعاونني دوم مايعرفن يكعدن
خلصنه العشه والچاي وكعدنه نضحك ونسولف وعيني من دجله ووفاء يسولفن ويضحكن
صارت بكلبي غيره
من طلعن رحت سبحت وبدلت وتمكيجت شسورت شعري
وصرت ازغر من عمري
نزلت وگعدت بصف الشيخ
شافني ظل مركز بيه

الجهال راحوو ودجله بغرفتها
وامي نايمه من دواها تنام من وكت
گال

..شني حنيتي لو ناويه تزيدين ناري وانه گوه مصبر روحي احس طاقة الصبر خلصت

..سويت روحي مافاهمه شتقصد.شني يعني

..يعني رايدج تفتهمين لو اوضح اكثر

..بوكتها اغتريت بنفسي وعجبتني فكرة دوم يريدني وينكسر كلبه مثل ماكسر كلبي وجرحني

..كتله انت مو كلت بعد ماانزل نفسي الج وانتي مني شنهي نسيت بعدني مامكمله اجتني لخه على حلكي بظهر ايده لخني
..اششش اذا كملتي اهينج والله كومي روحي يلله

..كمت منه ودموعي نزلت اول مره يشوفهن ومايتأثر بعدني ماصاعده فتح باب غرفة دجله

..احس گلبي يدگ بقوه

فهد..

جنت افكر بوضعي واجت متحضره كلت بلكي حست من سمعت حجيها وطريقة كلامها مو شيخه الاعرفها متغيره وحسيتها تتعمد تهيني
ثارت اعصابي انه رجال والرجال حاجته تطلب كوه مصبر روحي وهيه قضت عليه
بين الحاجه والانتقام رحت الدجله مرتي وحلالي وبالحالتين انه دافع الثمن لو تقربت الها شتريد تسوي اكثر
فزت من شافتني ابتسمت بوجهي
وسهلت علي هواي
حسيتها متحضرتلي
بس من وصل للصدگ ارتبكت وبدت تتهرب بس مو شيخه هاي حته مااجبرها الصار الي كله منها وهيه سبب بي وهم تريدني وتريد تبعدني حسيت روحي لعبه ابينهن شيخ احكم عشيره كامله نسوان اثنين يلعبن علي
تقربت الها جبر دقايق وسلمتني نفسها وحسيتها ذابت بيدي بس الي صار صدمني
لحظات بين الي اريد استوعب وبين المااريد اصدك
دفعتها ونهضت

..هاي شني شلون هيج

يتبع ..

حبايبي يسعد مسائكم الكل اقره تعليقاتكم ويسعدني تفاعلكم بس ماعندي وقت ارد ع التعليقات حبايبي كلكم احبكم