رواية كسرة قلب الفصل الثالث والثلاثون 33 - بقلم نور الشمس

خبرت اهلي اروح البغداد ماعارضوو وصگر گال اروح وياك اتونس گبل لا الزم شغلي بيدي وبعد مااطلع الا بشغل
گبل ليله ابوي گاعد وامي والولد وچان علي هم رايح سادس بس هوه ماموجود يقره
گاعدين نضحك ونسولف وشاهين ولوله بحضن صگر گاعدين جنهم توم رغم بيناتهم اشهر
بس الي يشوفهم جنهم نفس العمر
چنه نسولف وهوه مشغول وياهم يشاركنه شويه ويرجع يلاعبهم لو يحاول يبعد واحد عن الثاني لأن كل شويه يتعاركون
ابوي چان يحچي بموضوع مهم وصگر يگله اي وهوه يبعد شاهين عن لبوه چان مالش شعرها
گله ابو شاهين ممكن اخذ لحظات من وكتك
گالها باستهزاء
ضحك صگر گله وكتي كله الك
صاح امي يمه اخذيهم عني ذوله نقطة ضعفي وجاي يخربون علي لا اتعاقب بسببهم تره عندي موضوع مهم يم الشيخ يحتاجله مداراه

گتلها يمه خليهم يمي تعالوو اجت لبوه تركض وهيه تتمايل ورجلينها بيض مدبدبات  فتحت اديني شبكتها ابووس بيها اول مره تجيني بنفسها كل مره انه اخذها غصب ابوسها واسكتها اكثر شي يم صگر هيه ومن يجي ابوي تنسى الكل وتروح يمه
اجه شاهين وراها يمشي خطوات متعثره گوه يوصل توه بادي يمشي
صگر چان مركز وي ابوي يحچون بموضوع الشغل صگر رايد فلوس يفتح مؤسسه خيريه لرعاية المرضى والأيتام وچانت فكرته انو يبدي هوه ويحاول يجمع تبرعات من الي يعرفهم وبعدها يوسع الموضوع وممكن يحاول يفتح مشروع يشغلهم بي ويحاول يوسع الفكره بهالوقت چان شاهين يمشي وامي مخليه صينية الچاي ورايحه تجيب كعك ضرغام طلب منها
بعد ماصحته يجي يمي اجه وصل قريب الي ورجع يريد يگعد يم ابوو چان يمشي ومامنتبه واحنه الكل مامنتبهين بالنه يم المشروع
لحظات ماحسينه الا بطفرة صگر بسرعه عجيبه شال شاهين رفعه عن الگاع الي چانت متروسه چاي والكتلي كله مگلوب وشاهين يصرخ چان باطن جف ايده مچوي بس شي قليل لو ماملحگه ابوو چان احترگ كله لأن طيحته صايره على طرف الصينيه گالبها والقوري مگلوب وياها
كلنه انخبصنه اخذته امي من ايد صگر وهيه تدهن بأيده بچه هواي وتعب ونام بحضن ابوو
وحته من نام صگر ماارتاح وظل قلق كل شويه ونظرات عيونه وجهه تبيين شگد حزينه وشلون متوتر وحالته حاله
ابوي گله الحمدلله ماتخوف الله قدر ولطف
تعال كمل سولفلي مشروعك الله حفظ ابنك يمكن الخاطرك لأن تفكر بعباده وتحاول تسوي الوجه الله ولو القليل والله مستحيل قوري كامل ينچفي مايأذي بس على كد الچويه شفت الكاع شلون متروسه جاي وانت شلته بسرعه الحمدلله الله دفع الشر

صگر..الحمدلله الف الحمدلله گتله شيخ باجر اكمل وياك انه رايح اخذه انومه وانه هم ارتاح فتره
خليته بچربايتي انومه يمي
رجعت حاچيت كرم

..كرم باچر توكل وحدك مااگدر اروح وياك ظل بالي يم شاهين من خوفي والرعبه الصارت بيه باجر ماافارگه ابد مااگدر

..براحتك ..ثاني يوم طلعت الفجر وابوي يوصي لاتروحلهم فارغ اخذ وياك شي من گيعانه اخذلهم صناديگ رطب جان الرطب توه نازل السوك اخذتلهم صندوگين من احسن انواع الرطب عدنه واخذت وياي مجموعة مسواگ احنه طبيعتنه لو دخلنه بيت مانروح فارغين
چنت متخوف من هالموضوع لأن مااعرف عاداتهم يتقبلون او لا گلت اگله احنه هذا طبعنه
وصلت بغداد ساعه تسعه الصبح
خابرت براق گال

.. اطلع ع الحريه تندلها مووو

..شني السالفه يخوي شكم مره موصلك انه

..اي هواي قابل انسى بس عبالي ماضابط الطريق

..ابقى وياي ع الخط خاف انسى صدك
شويه وقربت كتله سده اتذكركم كلش زين ماخربطت
وصلت شارعهم لگيته واگف بالباب
رحب بيه ونزل الغراض گال ليش تكلف روحك وظل يتشكر مني جاوبته مو من قيمتك وصدك كلشي مو من قيمته
دخلت بيتهم حلوو مرتب لاگتني مريه لابسه شيله بيضه وثوب نيلي بي دگه بيضه ناعمه من شفتها ارتاحيت وجهه مريح وكلماتها ريحتني وهيه تگول

..كُل الهلا يوم نورت بيتنه اغاتي

..الله يسلمج يمه منور بيكم منور بأهله

..تفضل عيوني اگعُد ارتاح داجيبلك مي تشرب

..گعدت وانه مبتسم ماحسيت روحي غريب
شويه واجه براق

..لك كرم مشتاقلك والله گوم گوم هاك ملابس وروح للحمام اغسل وارتاح بين ميجهز الغده وبعدها نطلع ونتونس منخلي مكان منروحله

..اي رايح بس گلي انت والوالده بس ساكنين هنا يعني ماكو احد بالبيت خاف اضايقكم الله عليك منروح انجمع الولد ونأجر مكان ننجمع بي كلنه ونخلصها ونسه وضحك للصبح

..تحلم حبيبي انت دخلت البيتي شيطلعك منه بعد ماكوو احد تعرف اخوي الكبير طبيب وبلندن
واختي الكبيره متزوجه وهم مهاجره بس اني وامي هنا ولتسأل ليش باقين اثنينه منگدر نسافر اني روحي هنا بمنطقتي مااگدر اطلع خارجها
حته بوقت القتل والتهجير احنه مطلعنه خارجها
دگوم هسه وبعدين احچيلك واعرفك على اصدقائي ولد المنطقه
وبعدها نطلع
مر اليوم براحه والدته كلش مريحه
ومو من النوع الي احسه متكلف لا چانو طبيعيين حسيت روحي وياهم من زمان اعرفهم
طلعنه العصر اتعرفت على اصدقائه كرار وانمار
بعدها التقينا بأصدقائنه تونسنه حيل
رجعت بالليل اريد انام تعبان خابرني صگر

..الوو

..هلا بكروم شلونك

..حبيبي ابو شاهين انتو شلونكم شاهين شلون صارت ايد

..الحمدلله بخير مشتاقيلك و اطوول تره ابوك قرر فجأه يرحون عمره هوه وامك واليوم اخذ الجوازات وبقت ع التأشيره شوكت ماتكمل يسافرون

..صدگ والله شو ماادري ليش؟ يالله بيها الخير يستاهلون العمره

..نسوو ياخذون رأيك اعذرهم خايب هوه فهد شوكت ماخذ رأيي احد هوه اجه وگل الأمي
شيخه حضري روحج وخل صگر ياخذج للسوك اشتري التردينه ومن الصبح الله يسلمها امي ماخلت شي مااشترته
گتلهم واحنه نظل هيچ ياهوو النه گلت للشيخ لو گايلي اتزوج حته مانهتم
جاوبني بس لشر ومن باجر ازوجك
عجبتني الفمره بس عليمن ائشر اذا جيراني فيصل ومحمد.

..ضحكت گتله گله نبأ موجوده

..تنهدت ولك نبأ وين موجوده راحت البنيه توكلت خلصت من ابوك ومن امها

..اوگف اوگف هاي من شوكت شو ماادري

..صار اكثر من شهر خابرتني تسلم وهيه الي انطتني علم مافرق عندي بس ضجت عليها

..بس لاتگلي مو خوش رجال

..لا لا بس رجال چبير وولده متزوجين المهم اخذها من بيئتها هوه شغله بالأمارات واخذها هناك يمه

..اي شو مبيين على صوتك ضايج

..اي والله ضجت وبوكتها ضوجتي چانت اكثر اتمنيت هيه مو من هالناس اتمنيت انه شخص عادي مو ابن شيوخ واگدر استقل عن اهلي ومااجيبلهم حچايه
هواي شغلات اتمنيتها بس مو بكيفي

..يعني حبيتها انت

..مو الحب الي انت تعرفه بس شفتها انسانه تستاهل واحد يضحيلها بس من قارنت بينها وبين فهد وسمعتي وسمعة اهلي وابني هم لا كفتهم علت يمكن ماحبيتها من گلبي لو حابها متأكد اوگف بوجه الكل بس احس بالذنب لأن ماخلصتها
انت وين اخذتني الياموضوع
ع العموم باچر تعال حته تلحگ عليهم
سديت التيفون وانه افكر بنبأ

..اتذكر اخر يوم من خابرتني چانت مبينه مبتسمه بسصوتها مخنوك وكل شويه تسكت چنت احس بيها تبچي
طلبت مني تحاچيني اخر يوم ومتريد اقاطعها تريد تحچي وتشكي كلشي اليمر ابالها ظلت للاربعه الفجر وياي ع الخط ومن راحت احس شي الي وانوخذمني ماادري ليش هيج حسيت يمكن لأن اتعودت عليها
طلعت بره مخنوك اناجي ربي
يارب تعبت انه اريد ارتاح
يارب اىزقنؤ بالأنسانه الي ترضيك قبل ماترضيني انسانه خايفه ربها
تخاف الله بيه وبأبني
انه مو اناني عندي ولد وهالولد لازم اشوفله ام قبل لتكون زوجه الي وبس
گطع صفنتي صوته وهوه يگلي ابا

..ياروح ابا شتريد تعال تعال شلته وطلعت البره وين لوله تعاي حبيبتي اخذتهم وطلعت گعدتهم بالسياره يحبوها اشغل الهم اناشيد وهمه يلعبون بدباديب زغار
فتحت تليفوني لازم اسوي اعلان عن المؤسسه
اول فقره من المشروع اطبقها كفالة يتيم
انشر حته تجيني الحالات واشوف شكم حاله تستحق نكفلهم
مشروع حلوو بس يرادله دراسه ووعي ويراد ناس اتخاف الله تسندني لأن وحدي مااگدر
خابرت اصدقائي وانطيتهم فكره
وسجاد رشحلي عائله جيرانه
گال والله تكسب بيهم اجر وثواب
لأن ماعدهم احد مره چبيره بالعمر ام الأرمله وهيه مواليد تسعينات وطفلين اثنين عمامهم اتبروو منهم بعد مااستشهد ابوهم
محد يمرلهم وهيه ماعدها اخوه وباقين على رحمة الله والناس مرات احنه هم نساعدهم بالشي للقليل النگدرله تصدگ ايام يبقون بدون مسواگ

..سامع هواي بس اتفاجئت بيناتنه وبمناطقنا هذي عمام يتبرون من ولد اخوهم اليتامه ليش وين غيرتهم

..صگر العالم حايره بعيشتها وقلة المال تجبر الواحد
يتنازل عن هواي من المبادئ

..هم صح هسه دنيا ليل الصبح امرلك انت والوالده تجون وياي حته نشوفهم واشوف شلون نساعدهم

سديت التليفون وانه محتار
دنيا اشكال بيها عفيه بلد البايگك مرتاح والي يدافع عنك ومنطي روحه ولده يتبهذلون هيچ ليش

ثاني يوم طلعت الصبح رحت السجاد واخذت امه ورحت بيتهم بالولايه والي عرفته البيت مگعدينهم بي للثواب وبالشته يغرگون من المطر
حالتهم حاله بس الحيره والاحراج الشفته بوجوهم دوخني حته گوه گدرت احچي
سلمت وحاچيت امها المره الچبيره وهيه چانت گاعده يم امها

..يمه الله ابا الخير ..انه ماجاي متفضل هاي اول نقطه انه متيقن هذا حقكم حق الفقير عند المتمكن
ومحاسبين امام الله والحمدلله الله امكني
اريد اسمع منچ احچيلي انتو شنو وليش هنا بهذا البيت والجهال منو الهم

..بعد گلبي يمه يحفظك الشبابك
انه طلعت من الدنيا بطرگ هالبنيه الوحده زوجتها بستر الف الحمدلله جان بيه حيل واخبز للناس وكبرتها اول ماكبرت خطبها ولد من منطقتنه ولد صاحب نخوه وخيير مااخيره عليك بس هوه مايتعييب وهم يتيم الأم ومربيته مرت ابوو انه احبه من زمان انطيته بنتي وگعد يمي وخلفت منه رضا ورضوان واستشهد قبل تلث سنين وهاي صار تلث سنين محد دگ بابنه منهم وعرفنه وحته خبز العالم بطلت تخبز ناس صارت تودي الأفران وبيهن هنه يخبزن هيه تخيط بس عوزها مكينه ماعدها چان هم دبرنه حالنه
چنت اوجه ظري بين الأم وبنتها الأم تحچي والبنت مدنگه رلسها مايبين بس دموعها الي يطيحن بكقره چانت حته چفوف لابسه وبس قرص الوجه طالع
اعذرها لأن بمجتمعنا الأرمله والمطلقه اي تصرف منهن حته لو مو مقصود العالم تاكل وجوههن

..گتلها يمه المكينه اليوم يمچ غيرها گليلي

..شكلك يمه بكيفك

..يمه كفالة يتيم يعني هذول الولد من اليوم انه متكفلهم مصرفهم شرايتهم مرضهم كلشي انه مسؤول منه
راتب شهري الهم والمكينه سهله اليوم تجيكم هيه وطباخ وثلاجه وسبلت
محتاجه شي بعد يمه

..سلامتك بعد امك
انه مامحتاجه بس سلامتكم اهل الغيره كون الله يچثركم ويحنن كلوبكم اكثر واكثر على اعباده

..امين يمه بست الولد وانطيتهم مصرف
ورحت بوجهي انه وسجاد للسوگ اشتريت الگلته كله واتذكرت الغساله
ولازم بيتهم يتعدل شويه
الحمدلله فهد دخل وياي وگال انه هم ادعم المؤسسه والي اعرفهم ابلغهم
يعني يصير الها دعم وتكدر تساعد اكثر من محتاج
رحنالهم والجهال بره بالباب چانت فرحتي اكثر من فرحتهم وانه احس روحي مسوي انجاز
اشتريتلهم كلشي وسلمت وطلعت وانه اسمع دعائهم وارتاح
مرت الأيام وفهد راح عمره وظلينه انه والولد
وبدينه نكفل ايتام بعد وصرن فرق والشباب كل فريق يروح وحد وهوه يتكفل كلشي
انه تحت رعايتي اربع عوائل منهن عائة ام رضا

راحو فهد وامي وظلينه وحدنه يوم احنه نسوي اكل يوم انودي من بره
انه ورم علينه الطبخ لأن اتعلمنه من الدوام انه اقسام وهوه بيت ويطبخون مرات بس انه اضبط خاصتا بالمشويات ولبوه وشاهين يمنه بقوو ع الحليب ونوكلهم هم
ويوميه نخابرهم امي وفهد نعرف اخبار وبعد تلث ايام يجون
وديت على وفاء ورباب وبناتها يرتبن البيت واتسوگت كلشي رغم محمد هواي مترجي الشيخ يتكفل بكلشي بس فهد رافض واكد عليه انه اشتري كلشي واجهز الجيتهم ولاتخلي احد غيرك يجيب
من وصاني استغربت فهد لشوكت تنسى موضوه كرم ومريم الهسه شايل عليهم

بدينه انحضر وبيوم الاجوو كلهم عمامي اجتمعوو وخوالي وبناتهم وولدهم عبالك عرس صار مو جية من العمره
فاجئني وجود حوراء وشايله ابنها وياها
سلمت عليه ملهوفه رديت السلام وبالي يم كرم
لگيته بره ردت احچي وياه وسكتت
گال

..تره ادري هيه هنا بس بعد ماتهمني القاهرني شعدها جايه البيتنه

..عيب كرم مهنا كان بيت عمها تريد تطردها شني ختولي لاتفكر بيها

..صگر تتوقع صدگ انه عاجز

..صددمني سؤاله وعرفته متضايق حيل من حجه هيچ لأن مايحجي بهالمواضيع ابد گتله لا الطب اطوور راجع انت ليش ماتراجع

.ضحكت بقهر راجعت وگال احتمال ضعيف بس ميبيين شي عدنه انت اعرف بنفسك جرب والتجربه هي الي تبيين وحته اذا اكوو العلاج موجود الي مثل حالتك مو ميؤوس منها
تدري حته مااباوع ع البنات ولا ارفع راسي ومن يجيب يمي احد هاي المواضيع مااتحمل ابقى
يعني ماترهم اعشم بنيه ع الزواج والحب وتالي شنهو شعرف عن روحي انه

..حيل كرم كل هذا ضامه كبرنه وصرنه نداري انه ماحچيتلك على نبأ وموضوعها الا لمن اختنگت وانت هم ليش هيچ ابتعدنه بعدين انت تگدر تعرف روحك مو الا زواج دائمي سافر وروح اتونس وسوي الي ابالك وتعال لحد يعرفك ويأثر عليك وانت هم ترتاح وماتظل بقلق

..تقصد زواج منقطع لاتلعب روحي انه من الفكره بس روحي ماتتقبل

..مجبور انت عندك غير حل سوي قابل الحرام احسن

..افكر بس صبه شي مااحبه انه اسوي

..فكر على راحتك وتعال فوت ابوك راح يوصل كل هالجماهير بانتظاره وانت ماكوو شتگول بالله

..جريت نفس شگول بعد ماينفع الگول

شويه ووصلوو استقبلناهم احسن استقبال الكل فرحان بس مو مثل فرحتنه
مر هذا اليوم هوسه وهمه تعبانين وزعوو الهدايا بالليل كلمن راح البيته وصعدوو همه يرتاحون وشاهين ولبوه دگوو يرحون وياهم
اسبوع كامل بعد جيتهم والعالم رايحه راجعه عليهم
بيتنه انترس هدايا من العالم وفهد هم كل يوم يشتري اكثر هدايا حته يوزعها لليجي
كملنه مشروعنه واتوسع
ومرن شهرين انه بنفسي اودي الرواتب للعوائل الكافلهن وفريق سجاد الفرق الباقيه همه اليرحون
چنت كل مااروح تطلعلي الحجيه ام حورلءانطيها الراتب وارتاح الدعوتها

بيوم ساعه عشره ونص بالليل
اتصل عليه رقمهم جاوبت وانه متأكد اكوو شي
حاجتني الحجيه تبچي يمه فدوه اروحلك ماعندي بس الله وانت
الولد ابن بنتي اتمرض راح يموت من العصر الهسه يذب من معدته ويصيح من بطنه

..ادللي يمه جاي مسافة الطريق
همه بالولايه واحنه باطراف المدينه مو ريف بس بساتين كيعانه
طلعت وانه اطمن فهد خاف اتأخر
وگلت الأمي هم

وصلتلهم خابرتهم طلعت امه چانت عيونها مورمه من البچي وخشمها احمر مثل كل مره بس قرص الوجه طالع گالت فدوه خويه مايگدر يگوم افتحلي الباب اشيله انه

..خلي انه جايه

شلته وخليته وره وهيه گعدت مخليه رلس بحضنها وامها صعدت ويانه
كل شويه عيني تروح للمرايه اتامل وجهه وهيه خايفه على ابنها هاي النظره شكم شخص محروم منها الأم مهما كان محد يسد مكانها
لحظات رفعت عينها صارت نظراتنه سوه انتبهت ع الطريق وانه احچي على روحي هسه اتگول استغلوني واستغلوو وضعي وصايره هواي وي الأرامل بالذات مؤسسات باسم الدين تستغلها
بعد مارفعت عيني وصلنه وبعد مافحصه الطبيب وحوله سونار لازم تنشال عنده الزائده الدوديه
وقعت امه ع العمليه ودخلو وبعد مادخلو انهارت تبچي وخايفه چنت اتمنى اصبرها او احچيلي كلمه بس الساني مربوط امها حاولت وياها لمن هدأت والحمدلله نجت العمليه
خابرت فهد كتله ابات ومااكدر اعوفهم لايظل بالك وشاهين خل كرم يشغله وينومه يمه بين مااجي

جنت اشوف خوفها واتذكرت شاهين محروم من هالشعور امه بعد الصار ولامره حاولت وياه يمكن اصلا ماجانت مهتنه اله بس تريد تبينلي هيه تزوجت وزوجها ضابط ويخوف بس خوش كسر ظهرهم فهد بالشروط والفصل يستاهلون

تنفست وزفرت الهوه بقوه ماادري ومامنتبه لليمي
گالت
خويه ادري تعبناك والله الله يجازيك خير ويرفع عنك البلاء روح هسه امي يمي خاف عائلتك وراك

..واجبي هذا لايظل بالچ بس تعبان من الدنيا مو منكم ولامتعاجز وعائلتي تدري بيه لاتهتمين من يطلعونه نطلع

من هذا اليوم شكلها مافارگ خيالي ولا كدرت انسى نظراتها وخوفها على ابنها ولانظرات خجلها مني

وره ماطلع اتسوكت الهم واشتريت العلاج وكتلهم خابروني بأي وكت
ومرت ايام واشهر رجع كرم للدوام وانه ماگادر اصارحه بمشاعري چنت خايف من ردود افعالهم خاف ابالهم امانه انه مو گدها وأولها وحبيت ارمله وام الايتام انه تكفلتهم
ظليت بصراع هوه هذا حب لو اعجاب لو شنوو شي ماحاسه من گبل
امي چانت تحاول وياي اتزوج وتشوفلي وحده وكل مااحاول افتح الموضوع وياها ينربط الساني واعيد حساباتي من جديد
بيوم الصبح رحت اسلمهم راتبهم الشهري
لگيت هوسه يم الباب من سألت كالوو الحجيه متخربطه طلعوها كتلهم انه اخذها بسيارتي اخذتها وصعدت هيه وام سجاد وياها
الطبيب كال جلطه خفيفه يومين وتطلع بس يستقر وضعها وايعدوها عن اي شي يوترها

جنه بالصاله
گتلها شخيرها الحجيه

..امي عاشت بقهر من وراي وراح تموت هم من وراي
جنه انراجع ذيج الفتره كلها علمود راتب المرحوم ومايطلع طلعوو اهله يستلمونه من زمان وماادري شلون مسوينه الهم مااعرف غير الدوله تعرف عنده زوجه وجهال شلون هيج صار

..لازم مزورين مايصير راتب الهم سكتت بس
بچت وماحجت شي

..كافي لاتبجين انه اشوف حل
بيومها گطع ابالي بس ارجع احاجي فهد بس اخاف هيه ماترضا

رجعت للبيت وحاچيت فهد حجيتله كلشي ابالي

گال هسه انت تاخذ رايي يعني لو تنطيني علم
حته افهم شجاوب يعني رايدها لو هيج فكره وخلص

..لا رايدها بس هيه ماتدري يعني الهسه مامتأكد ترضا لو لا بس كتلك كبل لا اتصرف واريد اعرف رايك

..اذا چي ارمله ماعندي اشكال بيها بهذا الوكت بناتنه اكثرهن هذا حالهن بس هيه عدها ولد واهلهم يجوز مليرضون لو يردونها الواحد من عدهم حاجيهم ونشوف حل

يتبع ..